1. Sooq Jehovap siulersuinera pisariaqar­tipparput? Assersuuteqarit.

 TAKORLOORIARUK orpippassuarni tammarlutit. Orpippassuarni navianar­toqaqaaq. Aqqutiginiakkat aqqulluppoq uumasoqarlunilu nujuartanik, naasoqarpoq toqunar­tulinnik sullineqarlunilu nappaateqalersitsisin­naasunik. Angallas­sisumilli misilit­tagaqarluartumik ilaqarnerit nuannaarutigis­sagunarpat. Taassumami navianar­tuusinnaasut nalunngin­namigit ingalas­simanis­saannut ikiorsin­naavaatit. Orpippassuarni navianar­tuniittutullusooq ippugut. Jehovamik ikinnguteqar­nitsinnik ajoqusiisin­naasunik navianartunik ulikkaarpoq. Piukkunarluin­nartumilli siulersuisoqarpugut – tassa Jehova. Taassuma navianar­tuusinnaasunik ingalas­simannin­nissatsinnut siulersor­tarpaatigut apuuffis­satsinnullu paratiisissami inuunermut naassaan­ngitsumut siulersor­tarluta.

2. Jehovap qanoq siulersor­tarpaatigut?

² Jehovap qanoq siulersor­tarpaatigut? Pingaarnertut oqaatsini, Biibili, aqqutigalugu. Aammali inuit aqqutigalugit siulersor­tarpaatigut. Assersuutigalugu “inussiaq aalajaallunilu silatooq” anersaakkut inuussutissanik pilersuisittarpaa silatusaartumik aalajangiinias­sagatta. (Mat 24:45) Jehovap aamma angutit pikkorissut allat aqqutigalugit siulersor­tarpaatigut. Assersuutigalugu nakkutilliisut angalasartut ilagiinnilu utoqqaanertat ajornar­torsior­nitsinni iluaqutigisatsinnik qiimmas­sarlutalu ilitsersor­tarpaatigut. Qujamasuutigingaarparput Jehovap piffissami ajornakusoortumi naggatissap nalliutingajalernerani siulersorluar­tarmatigut! Jehovap ikiuineratigut taassumunnga ikinngutaajuarsin­naavugut. Taamaalilluta inuuneq nuannaarutigisin­naavarput, maanna aamma naassaan­ngitsumik.

3. Allaaserisami matumani suut sammissavagut?

 ³ Ilaannikkulli Jehovap siulersuinerata maleruarnissaa ajornakusoor­tissinnaavarput, ingammik inuit naammal­luinnan­ngitsut atorlugit siulersoraangatigut. Sooq? Imaassinnaavoq siunnersuutaat nuannarin­ngikkigut. Imaluunniit misigisin­naavugut ilitsersuutit silatusaar­nerunngitsut isummerlutalu Jehovap pilersitarisiman­ngikkai. Taamatut misigigaangatta Jehovap innuttaminik siulersuinera tutsuigineruler­tariaqarparput upperalugulu siulersuinerata maleruarnissaa uagutsinnut ajunngitsumik kinguneqar­tuaannartoq. Tatigin­ninnerput nakussatsik­kumallugu allaaserisami sammissavagut (1) Jehovap itsaq innuttani qanoq siulersorsimagai, (2) kiffani nalitsinni qanoq siulersortarai aamma (3) siulersuinerata maleruar­tuarnera qanoq iluaqutigigipput.

JEHOVAP ISRAALIKKUT QANOQ SIULERSORTARAI

4-5. Moorsisi aqqutigalugu Israalikkut siulersorlugit Jehovap qanoq ersersippaa? (Assiliaq takuuk).

⁴ Jehovap Israalikkut Egyptenimit aniguisin­nissaannik Moorsisi siulersuisussatut toqqarpaa. Moorsisi aqqutigalugu Israalikkut siulersorlugit ersarissumik takussutis­saqartippai. Assersuutigalugu napasoqartippaa ullukkut nuiaasumik unnuakkullu innerusumik. (Mos 2. 13:21) Moorsisip napasoq taanna malippaa Israalikkullu Immamut Aappalaartumut pisillugit. Taakkuli Egyptenimiut sakkutuuinit malersor­neqarlutik qimaariarfis­saaruttutut misigigamik paatsiveerupput. Isummerput Moorsisip Immamut Aappalaartumut siulersorsimasus­saanngik­kaluaraatsik. Moorsisili kukkunngilaq. Jehovammiuna Moorsisi aqqutigalugu innuttani tassunngartikkai. (Mos 2. 14:2) Tassanilu Guutip tupinnar­tuliornikkut aniguisippai. – Mos 2. 14:26-28.

⁵ Ukiuni 40-ni tulliuttuni Guutip innuttaanik inoqajuitsukkut siulersuinermini Moorsisip napasoq taanna najoqqutariuarpaa. a Piffissap ilaani Jehovap Israalikkut ersarissumik takusin­naasaannik nuiaq taanna Moorsisip toqqata qulaanut pisittarpaa. (Mos 2. 33:7, 9, 10) Jehovap Moorsisi nuiamit napasumit oqaluffigaa, Moorsisillu Jehovap oqaasii inunnut ingerlateq­qittarpai. (Tuss 99:7) Israalikkut takulluarsin­naavaat Jehovap Moorsisi aqqutigalugu siulersoraatsik.

6. Israalikkut Jehovap siulersuineranut qanoq qisuariarpat? (Mosesimik 4. 14:2, 10, 11)

⁶ Jehovap ersarissumik ersersik­kaluaraa Moorsisi sinniisumisut atorlugu Israalikkut amerlanersaasa ajoraluartumik taanna itigartippaat. (Mosesimik 4. 14:2, 10, 11 atuakkit). Arlaleriarlutik Moorsisi siulersuisutut akueriuman­ngilaat. Tamatuma kingunerisaanik Israalikkut kinguaariis­soqatigiit taakku nunamut neriorsuutigisamut isernissaat Jehovap akuerinngilaa. – Mos 4. 14:30.

7. Jehovap siulersuineranik maleruaasunik eqqaasaqarit. (Mosesimik 4. 14:24) (Aamma assiliaq takuuk).

⁷ Israalikkulli ilaat Jehovap siulersuineranik maleruaapput. Assersuutigalugu Kalebi pillugu Jehova ima oqarpoq: ‘Ilumoorluni malissimavaanga.’ (Mosesimik 4. 14:24 atuaruk). Guutip Kalebi pilluaqquaa allaat Kaanaanimi nunamik najugaqarfissaanik toqqaatillugu. (Jos 14:12-14) Aamma Israalikkut kinguaavi nunamut neriorsuutigisamut isertin­neqartut Jehovap siulersuineranik maleruaagamik maligas­siuilluarput. Josvap Moorsisi siulersuisussatut kingoraarmagu Israalikkut taanna “inuunera tamaat” ataqqingaarpaat. (Jos 4:14) Tamatuma kingunerisaanik  Jehovap pilluaqquai nunamullu neriorsuutigisamut isertillugit. – Jos 21:43, 44.

8. Jehovap innuttani kunngeqalermata qanoq siulersorpai? (Aamma assiliaq takuuk).

⁸ Ukiut arlallit qaangiummata Jehovap innuttaminik siulersuisussatut eqqartuussisut toqqarpai. Tamatuma kingorna Israalikkut kunngeqalermata innuttaminik siulersuisussatut pruffiitit toqqarpai. Kunngit Jehovamut aalajaatsut pruffiitit siunnersuutaat maleruar­tarpaat. Assersuutigalugu kunngip Daavip pruffiitimit Naatamit naqqinneqarnini maniguulluni akueraa. (Sam 2. 12:7, 13; Nal 1. 17:3, 4) Kunngip Josafatsip pruffiitip Jahazielip siulersuinera maleruarpaa, Juudakkullu kajumis­saarpai Guutip pruffiitii uppereq­qullugit. (Nal 2. 20:14, 15, 20) Kunngi Hizkia annikil­liorami pruffiitimut Iisajamut ikioqquvoq. (Es 37:1-6) Kunngit Jehovap siulersuinera maleruaraangamikku pilluaq­quneqartarput inuiaallu illersor­neqartarlutik. (Nal 2. 20:29, 30; 32:22) Kikkut tamarmik paasisin­naasariaqaraluarpaat Jehovap pruffiitini atorlugit innuttani siulersorai. Kunngilli Israalikkullu amerlanersaasa Jehovap pruffiitii tusarnaaruman­ngilaat. – Jer 35:12-15.

JEHOVAP KRISTUMIUT SIULLIIT QANOQ SIULERSORTARAI

9. Kristumiut siulliit siulersor­neranni Jehovap kikkut atorpai? (Aamma assiliaq takuuk).

⁹ Jiisusip makititaareernerata kingorna Jehovap ilagiit kristumiut pilersippai. Taamani kristumiut qanoq siulersorpai? Jiisusi ilagiinnut niaquusussatut toqqarpaa. (Ef 5:23) Imaanngilarli Jiisusip ilinniartitat qanoq iliornis­saannik ataasiak­kaarlugit ilitsersuukkai. Apustilit utoqqaanertallu Jerusalem­mimiittut siulersuisussatut atorpai. (ApS 15:1, 2) Aamma utoqqaanertanik ilagiinnik isumagin­nittussanik toqqaavoq. – Tes 1. 5:12; Tit 1:5.

10. (a) Kristumiut siulliit amerlanersaasa siulersor­neqarnertik qanoq isumaqarfigaat? (Apustilit Suliaat 15:30, 31) (b) Jehovap siulersuisussatut toqqagai sooq ilaasa itigartippaat? (Ungalusaq “ Sooq ilaasa Jehovap toqqagai akueriuman­ngikkaat” takuuk).

¹⁰ Kristumiut siulliit siulersor­neqarnertik qanoq isumaqarfigaat? Amerlanersaasa ilitsersuutit nuannaarutigalugillu kajumillutik maleruarpaat.  Aap, “qiimmas­sarneqarnertik nuannaarutigaat”. (Apustilit Suliaat 15:30, 31 atuakkit). Taavami nalitsinni Jehovap innuttani qanoq siulersorpai?

JEHOVAP NALITSINNI QANOQ SIULERSOR­TARAATIGUT

11. Jehovap angutinik siulersuisunik qanoq ikiuisimaneranik assersuuteqarit.

¹¹ Jehovap kiffani siulersor­tuarpai. Biibili erninilu, ilagiinnut niaquusoq, aqqutigalugit siulersorpai. Nalitsinni aamma inuit aqqutigalugit Guutip siulersuineranut uppernarsaatis­saqarpa? Aap. 1870-p kingorna qanoq pisoqartoq assersuutigeriartigu. Taamani Charles Taze Russellip ikinngutaasalu paasilerpaat ukioq 1914 Guutip kunngeqarfianut tunngatillugu pingaaruteqar­tussaasoq. (Dan 4:22, 23) Biibilimi siulittuutit misissoq­qissaaramikkit taamatut isummerput. Biibilimik misissuineranni Jehovap siulersorpai? Aap, siulersuinera ersarippoq. 1914-imi nunarsuarmi pisut ersersippaat Guutip kunngeqarfia aqutsilersimasoq. Sorsunnersuaq siulleq aallartippoq, tamatumalu kingorna tunillaas­sortunik nappaalasoqartarpoq, nuna sajuttarpoq nerisas­saaleqisoqar­tarlunilu. (Luk 21:10, 11) Jehovap kristumiut angutit ilumoortut aqqutigalugit innuttani ikiorpai.

12-13. Sorsunnersuup kingulliup nalaani oqaluus­sisoqarlunilu ilinniar­titsisoqar­neruniassammat qanoq iliuuseqar­toqarpa?

¹² Aamma sorsunnersuup kingulliup nalaani qanoq pisoqartoq eqqarsaatigiuk. Qullersaqarfimmi qatanngutit angutit akisussaasut Saqqummersitat 17:8 misissoq­qissaaramikku paasivaat sorsunnersuaq kingulleq Harmagedonnimik kinguneqar­navianngitsoq. Paasivaat eqqissineqaral­lassasoq eqqissineqaral­larnerullu nalaani Jehovap Nalunaajaasui inunnut amerlanerusunut oqaluus­sissasut. Taamaattumik, taamani silatusaar­nerorpasin­ngikkaluartoq, Jehovap peqatigiis­sortaasa Ilinniarfik Gileadi pilersippaat oqaluus­sisartut ilinniar­tinneqareerlutik nunanut tamalaanut aallartitaasaler­niassammata. Allaat sorsunnersuup nalaani ilaat aallartitaapput. Aamma ilagiinni oqaluus­sisartut tamarmik oqaluus­sillaqqin­neruler­niassammata ilinniar­titsillaq­qinneruler­niassammatalu  Teokratiimik Ilinniarfik pilersin­neqarpoq. b Taamaalillutik Guutip innuttai oqaluus­sinerunissamut piareersar­neqarput.

¹³ Takusin­naavarput Jehovap innuttani piffissani ajornar­torsiorfiusuni siulersorai. Sorsunnersuup kingulliup nalaanniilli Jehovap innuttai nunani amerlasuuni killilersor­neqaratik oqaluus­sisinnaasimapput. Inuppassuit Jehova ilisarisimalersimavaat, nunarsuarlu tamakkerlugu oqaluus­sisoqarpoq.

14. Sooq Jehovap peqatigiis­sortaasa utoqqaanertallu ilitsersuussutaat tatigisin­naavagut? (Saqqummersitat 2:1) (Aamma asseq takuuk).

¹⁴ Aamma nalitsinni Siulersuisoqatigiit Kristusimut siulersor­tissarsiortarput. Jehovap Jiisusillu piumasaannut naapertuuttumik ilitsersuerusuttarput. Ilagiinnik nakkutilliisut utoqqaanertallu aqqutigalugit ilagiin­niittunut ilitsersuisarput. c Biibilimi allassimavoq Jiisusip ‘ullorissat talerpimminik tigumiarai’. Taakku tassaapput utoqqaanertat tanitat, aammali ilagiinni utoqqaanertanut tamanut tunngatin­neqarsin­naapput. (Saqqummersitat 2:1 atuaruk). Soorunami utoqqaanertat tamarmik naammal­luinnan­ngitsuugamik kukkusarput. Moorsisi, Josva apustilillu kukkusarput. (Mos 4. 20:12; Jos 9:14, 15; Rom 3:23) Kristusilli inussiaq aalajaallunilu silatooq utoqqaanertallu siulersorai takusin­naavarput. ‘Naggatissallu nalaata tungaanut’ siulersor­tuassavai. (Mat 28:20) Taamaattumik pissutis­saqarluarpugut siulersuinerannik tatigin­ninnissatsinnut.

JEHOVAP SIULERSUINERATA MALERUAR­TUARNERA ILUAQUTIGAARPUT

15-16. Jehovap siulersuineranik maleruaasut qanoq ilinniarfigaagit?

¹⁵ Jehovap siulersuinerata maleruarnera maanna iluaqutigaarput. Assersuutigalugu inuunermik pisariil­lisaanermik kajumissaarut Andyp Robynillu maleruarpaat. (Hebr 13:5) Taamaattumik ataatsimiit­tarfinnik allanillu sanaartoqataasin­naasarput. Robyn ima oqarpoq: “Najugaqarfiginikuusagut mikingaarmata allaat ilaat iggaveqan­ngillat. Assiliisarneq nuannaraara, atortakkamali ilarpassui tuniniar­tariaqarsimavakka. Tuniniarakkit qullilivunga. Saarali, Aaperaap nulia, ilaarlugu kingumuun­ngitsoq siumulli isigiuarusuppunga.” (Hebr 11:15) Andyp Robynillu aalajangikkatik sooq nuannaarutigaat? Robyn ima oqarpoq: “Nuannaangaarpugut nalunngin­natsigu  Jehova sapinngisatsinnik iliuuseqarluta tunigatsigu. Jehovap suliassiis­sutaanik suliaqaraangatta paratiisissami inuuneq qanoris­sanersoq misigilaar­tarparput.” Andy isumaqataalluni ima oqarpoq: “Jehovamut kiffartornermi nukigut piffissarpullu tamaasa atoratsigit pilluarpugut.”

¹⁶ Jehovap siulersuinerata maleruarnera sutigut aamma iluaqutigisarparput? Marcia atuarfimmiit soraarum­meereerluni pionerin­ngornis­saminik siunnersor­neqarnermisut iliorusuppoq. (Mat 6:33; Rom 12:11) Ima oqaluttuarpoq: “Universitetimi ukiuni sisamani akeqanngitsumik ilinniar­nissamik neqeroorfigineqarpunga. Anersaakkulli ittunik suliniuteqar­nissara kissaatigigakku pioneritut imminut pilersorsin­naaniassagama tunngaviusumik ilinniagaqaan­narniarlunga aalajangerpunga. Tamanna aalajangersimasama pitsaanerpaartaasa ilagaat. Pioneriunera nuannaarutigeqaara, qanorlu annertutigisumik nammineq sulinissannut aalajangiisin­naagama Betelimukar­tarlunga kiffartorsin­naavunga Jehovamullu kiffartorninni allarpas­suarnik nuannaaruteqarsin­naallunga.”

17. Jehovap siulersuineranik maleruaanerput qanoq illersuutigisarparput? (Esaja 48:17, 18)

¹⁷ Illersuutigisatsinnik Guutip peqatigiis­sortaanit siunnersor­neqartarpugut. Assersuutigalugu aningaaserituujoqqunata Guutillu inatsisaanik unioqqutitsis­sutaasin­naasunut mianersoq­quneqar­tarpugut. Aamma taakkunatigut Jehovap siulersuinera maleruarutsigu iluaqutigis­savarput, tassami ilerasuuteqaratalu ajornar­torsiuterpassuit pinngitsoor­tissinnaavagut. (Tim 1. 6:9, 10) Uummaterput tamakkerlugu Jehovamut kiffartorsin­naavugut. Taamaattumik qamanngavik nuannaarneq eqqissinerlu misigisarpagut. – Esaja 48:17, 18 atuakkit.

18. Sooq Jehovap siulersuinera maleruar­tuarusuppiuk?

¹⁸ Annikil­liornar­tussarsuarmi Kristusillu ukiuni tuusintini naalakkersuinerani Jehovap qularnan­ngitsumik inuit aqqutigalugit siulersor­tuassavaatigut. (Tuss 45:17) Taamanik­kussamut allatut iliuuseqarusuk­kaluarluta siulersuinerata maleruarnissaa kissaatigis­savarput? Tamanna ajornan­nginnerussaaq maanna Jehovap siulersuineranik maleruaagutta. Taamaattumik angutit siulersuisussatut toqqakkat aqqutigalugit Jehovap siulersuinera maleruar­tuartigu. (Es 32:1, 2; Hebr 13:17) Siulersuisutta, Jehovap, tatiginissaanut pissutis­saqarluarpugut. Taassumami anersaakkut navianar­tuusinnaasunik ingalas­simannin­nissatsinnik siulersor­tarpaatigut apuuffis­satsinnullu – paratiisissami inuunermut naassaan­ngitsumut – siulersorluta.