PINGASUN­NGORNERMI januaarip 18-anni 2023-mi jw.org-ikkut immikkut ittumik nalunaarutigineqarpoq qatanngutit Gage Fleegle aamma Jeffrey Winder Jehovap Nalunaajaasuisa Siulersuisoqatigiivinut ilaasor­tanngor­tinneqartut. Qatanngutit taakku marluk Jehovamut aalajaallutik ukiorpassuarni kiffartorput.

Qatanngut Fleegle Pennsylvaniap kitaani USA-miittumi sallusuissummi peroriartorpoq. Inuusut­tuaraasoq ilaquttanilu illoqarfeeqqamut avinngarusimasumut oqaluus­sisartunik pisariaqar­titsiffiusumut nuupput. Tamatuma kinguninngua novembarip 20-anni 1988-imi imermut morsutsitaavoq.

Qatanngutip Fleeglep angajoq­qaavisa piffissaq tamaat kiffartor­nissaanut kajumis­saartuar­tarsimavaat. Ilagiinnik nakkutilliisut aamma Betelimi kiffartortut angerlarsimaf­fimminnut qaaqqukulasarsimam­matigit taakkua pilluarnerat qatanngutip Fleeglep maluginiarsimavaa. Imermut morsutsitaareernermi kinguninngua, 1989-imi septembarip aallaqqaataani, pioneritut kiffartulerpoq. Ukiut marluk qaangiummata aqqaneq-marlunnik ukioqarlunili anguniakkani – tassa Betelimi kiffartorneq – anguaa. 1991-imi oktobarimi Brooklynimi Betelimi kiffartulerpoq.

Qatanngut Fleegle Betelimi ukiuni arfineq-pingasuni atuakkanik katiterisuuvoq, tamatumalu kingorna Kiffartornermik Nakkutil­liisoqarfimmi kiffartulerpoq. Tamatuma nalaani ukiorpaalunni ilagiinni russisut oqaluttuni kiffartorsimavoq. 2006-imi Nadia katippaa, marluul­lutillu Betelimi kiffartoqatigiilerput. Portugalimiusut oqaluttuni aamma ukiut qulit sinnerlugit Spaniamiusut oqaluttuni kiffartorput. Ukiorpassuarni Kiffartornermik Nakkutil­liisoqarfimmi sulereerluni qatanngut Fleegle Ilinniar­titaanermut Ataatsimiititaliap allaffeqarfiani kingornalu Kiffartornermut  Ataatsimiititaliap allaffeqarfiani sulilerpoq. 2022-mi marsimi Siulersuisoqatigiit Kiffartornermut Ataatsimiititaliaanni ikiortitut kiffartulerpoq.

Qatanngut Winder Californiami USA-miittumi Murrietami sallusuissummi peroriartorpoq, 1986-imilu marsip 29-anni imermut morsutsitaagami qaammatip tulliani apriilimi ikiorti-pioneritut aallartippoq. Nuannaringaaramiuk ingerlatiinnarpaa. Qaammatini arlalinni ikiorti-pionerioreerluni 1986-imi oktobarip aallaqqaataani pioneritut kiffartulerpoq.

Inuusut­tuaraalluni qatanngutip Winderip qatanngutini angajulliit marluk Betelimi kiffartortut tikeraarpai. Tamanna pissutigalugu inersimaneruleruni Betelimi kiffartor­tunngor­nissani anguniagarilerpaa. 1990-imi maajimi Betelimi Wallkil­limiittumi kiffartor­nissaminut qaaqquneqarpoq.

Qatanngut Winder Betelimi arlalinnik suliaqarsimavoq – ilaatigut eqqiaanermi, nunaateqarfimmi Betelillu allaffeqarfiani. 1997-imi Angela katikkamiuk taamanimiilli marluullutik Betelimi kiffartoqatigiilerput. 2014-imi Warwickimut nuutsin­neqarput, tassanilu qatanngut Winder qullersaqarfiup sanaartor­neqarnerani suleqataalluni. 2016-imi Napasuliap Alapernaarsuiffiup Ilinniarfeqarfianut Pattersonimiittumut nuutsin­neqarput, tassanilu qatanngut Winder Isiginnaagassianik Tusarnaagas­sianillu Aaqqissuisoqarfimmi kiffartulerluni. Ukiut sisamat tassaneereerlutik Warwickimut uterput, tassanilu qatanngut Winder Sulisoqarnermut Ataatsimiititaliap allaffeqarfiani suleqataalerluni. 2022-mi marsimi Siulersuisoqatigiit Sulisoqarnermut Ataatsimiititaliaanni ikiortitut kiffartulerpoq.

‘Inuit tunissutaasut’ taakku Jehovap soqutigisaanik kiffartor­tuarsin­naaqqullugit qinnuppagut. – Ef 4:8.