1. Sooq isumakkeerfigin­nilluni oqartoq qanorpiaq isumaqarnersoq nalunarsinnaava?

 “ISUMAKKEERFIGAAKKIT.” Taamatut oqarfigitik­kaangavit oqilial­lattarunarputit, ingammik ilisimagukku oqaatsikkut iliuutsik­kulluunniit arlaannik annersitsisimallutit. Inulli oqarpat “isumakkeerfigaakkit” qanorpiaq isumaqarnersoq nalunarsinnaavoq. Immaqa isumaqarpoq suli ikinngutigiil­luartusi. Immaqaluunniit isumaqarpoq pisoq pillugu eqqartueq­qinniarnani ikinngutigiin­nersili innarler­neqartoq. Inuit isumakkeerfiginninneq assigiin­ngitsunik isumaqar­tittarpaat.

 2. Biibilimi Jehovap isumakkeerfigin­ninnera qanoq allaatigineqarpa? (Aamma quppernerup ataani ilanngussaq takuuk).

² Jehovap inunnik naammal­luinnan­ngitsunik isumakkeerfigin­nittarnera isumakkeerfigeqatigiit­tarnitsitut inngilaq. Jehovap isumakkeerfigin­nittarnera immikkuul­larissuuvoq. Tussiaasiortoq Jehova pillugu ima allappoq: “Illit ilumoorlutit isumakkeerfigin­nilluin­nartarputit,taamaat­tumillu mianerineqar­tarputit.” a (Tuss 130:4, New World Translation) Aap, Jehova ilumoorluin­narluni isumakkeerfigin­nittarpoq. Taassuma isumakkeerfigin­ninnerup isumavia ersersippaa. Biibilimilu hebræerisut oqaaseq versimi tamatumani atorneqartoq taamaallaat Guutip isumakkeerfigin­neriaasianut asseqan­ngitsumut atorneqartarpoq.

 3. Jehovap isumakkeerfigin­ninnera inuit isumakkeerfigin­ninnerannit qanoq allaanerua? (Esaja 55:6, 7)

 ³ Jehova isumakkeerfigin­nikkaangami inuup ajortuliai nunguterluin­nartarpai. Isumakkeerfigineqarsimasoq Jehovamut attaveqarluaq­qilersinnaavoq. Qujamasuutigingaarparput Jehovap isumakkeerfigil­luinnar­tarmatigut. – Esaja 55:6, 7 atuakkit.

 4. Isumakkeerfigin­ninnerup isumavia pillugu Jehovap qanoq paasitip­paatigut?

⁴ Jehovap isumakkeerfigin­ninnera inuit naammal­luinnan­ngitsut isumakkeerfigin­ninnerannit allaanerummat isumavia qanoq paasisin­naavarput? Jehovap isumakkeerfigin­ninnini killitsin­nartumik assersuusiorluni Biibilimi allatsippaa. Allaaserisami matumani taakkua ilaat sammissavagut. Paasissavarput Jehovap peqqissimigutta ajortuliagut peertarai ikinngutigeq­qilertaraatigullu. Assersuutit taakkua sammineranni Ataatatsinnut asannittumut nallittuisumullu assigiin­ngitsorpas­suartigut isumakkeerfigin­ninnerminik ersersitsisumut asannin­nerulerlutalu qujamasun­nerulissaagut.

JEHOVAP AJORTULIAGUT PEERTARPAI

 5. Jehovap ajortuliatsinnik isumakkeerfigigaangatigut qanoq kinguneqartarpa?

⁵ Ajortuliat Biibilimi oqimaaqutinut nanertuutaasunut assersuun­neqarput. Kunngip Daavip ajortuliani ima allaatigai: “Ajortuliama artorsip­paannga, nanertuutaalerpoq uannut oqimaap­pallaartoq.” (Tuss 38:5) Jehovalli ajortuliaminnik peqqissimis­sutiginnittut isumakkeerfigisarpai. (Tuss 25:18; 32:5) Hebræerisut oqaaseq ‘isumakkeerfigin­ninnermik’ nutserneqartoq nutsiin­navillugu isumaqarpoq “kissummiussineq” imaluunniit “ersussineq”. Tassa Jehovap ajortuliatsinnik isumakkeerfigigaangamisigut ajortuliorsimanitta oqimaaqutai nanertuutaasut peertarpai. Soorlulusooq tuitsinnut oqimaaqutaasut peertarai.

 6. Jehovap ajortuliagut qanoq ungasitsigisumut ersukkiuttarpai?

⁶ Jehovap ajortuliagut qanoq ungasitsigisumut ersukkiuttarai Biibilimi assersuusiarineqarpoq. Tussiaat 103:12-imi ima allassimavoq: “Soorlu kangia kitaanit ungasissoq, taamatut unioqqutitsinivut ungasil­lisippai uatsinnit.” Kangia kitaaniit ungasingaarmat taakku imminnut angusin­naanngillat. Allatut oqaatigalugu Jehovap ajortuliagut uagutsinnit ungasin­neroqqis­sinnaajun­naartillugit peertarpai. Tassa Jehova isumakkeerfigin­nilluin­nartarpoq!

 7. Ajortuliagut Jehovap qanoq pissagai Biibilimi qanoq allaatigineqarpa? (Mika 7:18, 19)

⁷ Jehovap ajortuliagut uagutsinniit ungasil­lisikkai paasivarput. Kisianni tigummiar­tuassavaalusooq? Naamik. Kunngi Hizkia Jehova pillugu ima allappoq: “Ajortuliakkami tamarsuisa illit tununnut nallorsuullugit piiarpatit.” (Es 38:9, 17) Assersuummi tamatumani ersersin­neqarpoq ajortuliagut peqqissimis­sutigigutsigit Jehovap tigoriarlugit igissagai. Aamma imatut nutserneqarsinnaavoq: “Ajortuliakka ajortuliarineqarsiman­ngisaan­nartutut isigivatit.” Biibilimi tamanna aamma assersuummi allami erseqqis­sarneqarpoq. (Mika 7:18, 19 atuakkit). Versini allassimavoq Jehovap ajortuliagut immap itineranut igissagai. Itsaq immap itineranut igitat tiguneqaq­qissinnaan­ngillat.

 8. Suna ilikkarparput?

⁸ Assersuutit sammineranni paasivarput Jehovap isumakkeerfigigaangamisigut pisuusutut misigiun­naaqqulluta ajortuliatta oqimaaqqutaat tuitsinniit peertarai. Daavip oqaasii uku ilumoorput: “Pilluarput  inatsisaatsutut iliuuseqarnertik pillugu isumakkeerfigineqarlutillu ajortuliaminnik matoorif­figineqartut. Pilluarpoq ajortuliani pillugit Jehovamit naatsorsuusiorfigineqan­ngitsoq.” (Rom 4:6-8) Tamanna isumakkeerfigin­ninniviuvoq!

JEHOVAP AJORTULIAGUT NUNGUTERTARPAI

 9. Jehovap isumakkeerfigin­nilluin­nartarnera Biibilimi qanoq assersuusiarineqarpa?

⁹ Jehovap utertitsis­sutitut pilliut iluaqutigalugu inuit peqqissimisut ajortuliaannik nunguterisarnera Biibilimi aamma allatut assersuusiarineqarpoq. Soorlulusooq Jehovap ajortuliatsinnik minguiarlutalu eqqiaraatigut. (Tuss 51:9; Es 4:4; Jer 33:8) Tamatuma kingunerisaa Jehovap nammineq oqaatigaa: “Ajortuliasi aappallaris­sakkatut aappalutsigigaluarunik aputitut qaqortigilissapput; ilami purpurisut aappalutsigigaluarunil­luunniit taamaattoq savat meqquisut ilissapput.” (Es 1:18) Annoraamineq qaqortoq aappallorissumik simernilik errorlugu simernerata peernissaa sapernar­torujus­suusinnaavoq. Tassa taamatut assersuusior­nermigut Jehovap qularun­naarsip­paatigut ajortuliagut allaat takuneqarsin­naajunnaarsillugit eqqiarneqarluin­nassasugut.

10. Jehovap isumakkeerfigin­nilluin­nartarnini qanoq allatut assersuusiaraa?

¹⁰ Allaaserisap siuliani eqqaaneqartutut ajortuliagut aamma akiitsunut assersuun­neqarput. (Mat 6:12; Luk 11:4) Tassa Jehovamut ajortulioraangatta soorlulusooq akilersin­naanngil­luinnak­katsinnik akiligas­saqarfigineruler­taripput! Jehovalli isumakkeerfigigaangamisigut akiitsoqarun­naarsit­tarpaatigut. Ajortuliatta isumakkeer­neqareersut akilernissaat piumasarinngilaa. Soorlu inuk akiitsoqarun­naaraangami nuannaangaartartoq, uagut Jehovamit isumakkeerfigineqaraangatta oqilial­lattarpugut!

11. Biibilimi allassimammat ajortuliagut piiarneqartut qanoq isumaqarpa? (Apustilit Suliaat 3:19)

¹¹ Jehovap akiitsugut isumakkiigin­narnagit piiartarpai. (Apustilit Suliaat 3:19 atuaruk). Takorloorsin­naavarput akiitsut isumakkeer­neqaraangamik krydsiler­neqartartut, kisitsisilli suli takuneqarsin­naapput. Piiaanerli allaaneruvoq. Itsaq pilikki atorneqartartoq svampimik masattumik nunguter­neqariaan­naasarpoq. Tassa akiitsut piiarneqartut nunguter­neqarluin­nartarput. Akiitsut allanneqarsimagaluartut takuneqarsin­naajunnaartarput, soorlu piusiman­ngitsut. Jehovap ajortuliagut isumakkiigin­narnagit piiarluin­nartarmagit uummatikkut kissaammernaq, ilaa? – Tuss 51:11.

12. Pujoq pillugu assersuusiaq qanoq ilinniarfigaarput?

¹² Jehovap ajortuliagut qanoq piiartar­nerlugit aamma allatut assersuusiorpoq. Ima oqarpoq: “Piiarpakka unioqqutitsinitit putsutut isillugit, ajortuliatillu aamma nuissatut isillugit.” (Es 44:22) Tassa Jehovap isumakkeerfigigaangamisigut soorlulusooq ajortuliagut putsumik takuneqarsin­naajunnaarsittarai.

13. Jehovamit isumakkeerfigineqaraangatta qanoq misigisarpugut?

¹³ Jehovap isumakkeerfigin­ninnera pillugu assersuutit qanoq ilinniarfigaagut? Jehovamit isumakkeerfigineqaraangatta ajortuliatsinnik minguiar­neqaratta pisuusutut misigiuaan­nartariaqan­ngilagut. Jiisusip inuunini utertitsis­sutitut tunnius­simammagu akiitsugut Jehovamit isumakkeer­neqarluinnarput. Tassa Jehovamit isumakkeerfigineqaratta soorlulusooq ajortuliagut pisiman­ngisaannartut. Peqqissimigaangatta Jehovap ilumoorluin­narluni isumakkeerfigisaraatigut paasillugu oqilial­lannaqaaq!

 JEHOVAP IKINNGUTIGEQ­QILERTARPAATIGUT

14. Sooq Jehovamit isumakkeerfigineqarluin­narnissarput qularis­sanngilarput? (Aamma assit takukkit).

¹⁴ Jehovamit isumakkeerfigineqaratta qularis­sanngilarput taassumunnga ikinngutaaleq­qissinnaalluta. Tamatuma eqqaamanissaa ingasattumik ilerasut­tuanngin­nissatsinnut iluaqutigis­savarput. Aamma annilaangagisariaqan­ngilarput Jehovap puttarsisaqarnissaa pillarniarlutaluunniit iliuuseqarnissaa, taamaalior­navianngilarmi. Jehovap isumakkeerfigaluta oqaraangat sooq tatigisarsin­naavarput? Jehovap oqaasii uku pruffiitip Jeremiap issuarpai: ‘Iluanngitsuliaannik isumakkeerfigis­savakka ajortuliaallu eqqaaqqinnagit.’ (Jer 31:34) Paulusip hebræerinut allakkamini oqaatsit assingusut allappai. (Hebr 8:12) Kisianni qanorpiaq isumaqarpat?

15. Jehovap ajortuliagut eqqaaqqin­navianngikkai qanoq isumaqarpa?

¹⁵ Biibilimi oqaaseq “eqqaavaa” atorneqaraangat imaanngilaq eqqaamasaqarneq eqqarsaatigin­ninnerlu pineqar­tuaannartut. Aamma iliuuseqarneq pineqarsinnaavoq. Pinerluttoq Jiisusip saniani nivingasoq ima oqarpoq: “Jiisusi, Kunngeqarfinnut piguit eqqaaginga.” (Luk 23:42, 43) Imaanngilaq taamanik­kussamut eqqarsaatigiin­nassagini oqarfigigaa. Jiisusip akissutaanit erserpoq pinerluttoq makitik­kumallugu iliuuseqassasoq. Tassa Jehova oqarami ajortuliagut eqqaaqqin­naviarnagit isumaqarpoq ajortuliagut isumakkeerfigisimasani pillugit siunissami pillarnaviarnata.

16. Jehovamit isumakkeerfigineqaraanni misigissuseq Biibilimi qanoq allaatigineqarpa?

¹⁶ Jehovamit isumakkeerfigineqaratta iperagaasutut misigilerpugut. Tamanna paasiuminarsar­niarlugu Biibilimi assersuut alla atorneqarpoq. Allassimavoq naammal­luinnan­ngitsuugatta ‘ajortimut inussiaataasugut’. Jehovamilli isumakkeerfigineqaratta ‘ajortimut inussiaajun­naarsin­neqarpugut’. (Rom 6:17, 18; Saqq 1:5) Aap, Jehovap isumakkeerfigin­ninnera  pissutigalugu inussiatut iperagaasimanerput nuannaarutigisin­naavarput.

17. Isumakkeerfigineqarneq qanoq ajorunnaarutigaarput? (Esaja 53:5)

¹⁷ Esaja 53:5 atuaruk. Assersuummi sammisas­satsinni kingullermi inunnut toqussutaasin­naasumik nappaateqartunut assersuun­neqarpugut. Jehovap ernini aqqutigalugu utertitsis­sutitut akiliut akilermagu ajorunnaarsin­neqarpugullusooq. (Pet 1. 2:24) Ajortulioraangatta Jehovamut ikinngutaanerput innarler­tarparput. Kisianni utertitsis­sutitut akiliut pissutigalugu Jehovamit isumakkeerfigineqarsin­naavugut taassumunngalu ikinngutaal­luaqqilerluta. Soorlu inuk perulun­nartumik nappaatiminik ajorunnaarsin­neqartoq qamuuna nuannaartartoq, taamatuttaaq anersaakkut ajorunnaarsin­neqarnerput Jehovamillu isumakkeerfigineqarnerput pissutigalugu iluarisaagatta nuannaarutigingaarsin­naavarput.

JEHOVAP ISUMAKKEERFIGIN­NINNERA QANOQ MISIGILIS­SUTIGAARPUT?

18. Jehovap isumakkeerfigin­ninnera pillugu assersuutit Biibilimiittut qanoq ilinniarfigaagut? (Aamma ungalusaq “Jehovap isumakkeerfigin­ninnera” takuuk).

¹⁸ Jehovap isumakkeerfigin­ninnera pillugu assersuutit Biibilimiittut qanoq ilinniarfigaagut? Jehova qaqilereq­qinnani isumakkeerfigin­nilluin­nartarpoq. Taamaattumik Ataatatsinnut qilammiusumut qanimut attaveqarluarsin­naavugut. Eqqaamas­savarpulli Jehovamit isumakkeerfigineqarneq tunissutaasoq. Ajortiliugaluartugut ajunngisaangaarfigalutalu asagamisigut isumakkeerfigisarpaatigut. Jehovamit isumakkeerfigineqar­nissarput piumasarisin­naanngilarput. – Rom 3:24.

19. (a) Suna qujamasuutigis­savarput? (Romamiut 4:8) (b) Allaaserisap tulliani suna sammissavarput?

¹⁹ Romamiut 4:8 atuaruk. Jehovamit isumakkeerfigineqarluin­narsinnaanerput qujamasuutigeqaarput! (Tuss 130:4) Jehovamilli isumakkeerfigineqas­sagutta pingaarutilimmik iliuuseqar­tariaqarpugut. Jiisusip tamanna ima nassuiarpaa: “[Kukkuluttortut] isumakkeerfigin­ngikkussigit Ataatassi aamma kukkulut­tornisi pillugit isumakkeerfigis­sanngilaasi.” (Mat 6:14, 15) Tassa Jehova ilaarlugu allanik isumakkeerfigin­nittarnissarput pingaaruteqaqaaq. Qanorli taamaaliorsin­naavugut? Allaaserisap tulliani tamanna sammissavarput.