1-2. Atukkagut angutip inuusuttup eqqaaneqartup atugaanut qanoq assinguppat?

 TAKORLOORUK angut inuusuttoq pisuunik angajoqqaalik. Ullut ilaanni angajoqqaavi ajunaarput. Angutip tamanna aliasuutigingaarpaa. Tupaallaatigeqisaminik aamma allamik paasisaqarpoq. Angajoq­qaavisa aningaasaatitik atulussin­narsimavaat akiitsoqangaalersimal­lutillu. Aningaasanik kingornus­saqarnani akiligas­sarpassuaqalerpoq. Akiitsoqarfiilu ingerlaannaq akileeq­qusipput. Akiitsulli annertungaarmata akilersin­naanngilai.

² Oqartoqarsinnaavoq uagut atukkagut angutip taassuma atugaanut assingusut. Siuaasagut Adami Evalu naammal­luinnar­tuupput Paratiisimilu alianaangaartumi inuullutik. (Mos 1. 1:27; 2:7-9) Pilluarlutik naassaan­ngitsumik inuusin­naagaluarput. Alianaqisumilli pisoqarpoq. Adami Evalu ajortulioramik Paratiisimit anisinneqarput naassaan­ngitsumillu inuunissamik periarfissartik annaallugu. Kinguaavi qanoq kingornus­sassaqarpat? Biibilimi ima allassimavoq: “Inuk ataaseq [Adami] aqqutigalugu ajorti inunnut annguppoq, ajortillu toqu nassataraa. Inuillu tamarmik ajortulior­tarmata toqu tamanut siaruaappoq.” (Rom 5:12) Ajorti Adamimit kingornupparput, tamatumalu kingunerisaanik inuit toqusarput. Ajorti akiitsoqangaarnermut arlaannat­taluunniit akilersin­naanngisaanut assersuun­neqarsinnaavoq. – Tuss 49:9.

 3. Sooq ajortuliat akiitsunut assersuun­neqarpat?

 ³ Jiisusip ajortuliat akiitsunut assersuuppai. (Mat 6:12; Luk 11:4) Ajortulioraangatta soorlulusooq Jehova akiitsugaqarfigiler­taripput. Akiitsuk­kagullu akilerneqar­tariaqarput. Akilerneqan­ngikkunik aatsaat toqugutta isumakkeer­neqarsin­naapput. – Rom 6:7, 23.

 4. (a) Ikiorneqan­ngikkunik ajortiliusut tamarmik qanoq pineqas­sagaluarpat? (Tussiaat 49:8-10) (b) Biibilimi oqaaseq “ajorti” qanoq isumaqarsinnaava? (Ungalusaq “ Ajorti” takuuk).

⁴ Adamip Evallu annaasimasaat nammineerluta utertis­sinnaan­ngilarput. (Tussiaat 49:8-10 atuakkit). Ikiorneqan­ngikkutta naassaan­ngitsumik inuunissamik makititaanis­samilluunniit neriuuteqas­sanngik­kaluarpugut. Uumasut assigalugit toqusus­saagaluarpugut. – Oqal 3:19; Pet 2. 2:12.

 5. Akiitsutta akilernis­saannik Ataatatta asannittup qanoq ikiorsimavaatigut? (Asseq takuuk).

⁵ Takorlooruk angut inuusuttoq immikkoortumi siullermi eqqaaneqartoq akiitsuminik akileerusuttumit oqarfigineqartoq. Qanoq misigis­sasoraajuk? Qularnan­ngitsumik tunissut tamanna qujamasuutigingaassavaa. Tamatumunnga assingusumik ajorti Adamimit kingornussarput akilerlugu Ataatarput asannittoq, Jehova, uagutsinnut tunissuteqarsimavoq. Jiisusip tamanna ima nassuiarpaa: “[Guutip] inuit asangaaramigit Ernituani tunniuppaa kinaluunniit taassumunnga uppertoq suujunnaarsin­neqarnani naassaan­ngitsumik inooqqullugu.” (Joh 3:16) Tunissutisiaq taanna pissutigalugu Jehovamut qanimut attaveqar­nissamik periarfis­sinneqarpugut.

 6. Allaaserisami matumani suut sammissavagut, aamma sooq?

⁶ Tunissut assissaqan­ngitsoq taanna qanoq iluaqutigalugu ajortuliatsinnik isumakkeerfigineqarsin­naavugut? Tamanna akissutis­sarsiumallugu Biibilimi eqqaaneqartut assigiin­ngitsut sammissavagut. Nassuiaatit eqqarsaatigeq­qissaar­nerisigut isumakkeerfigineqar­niassagatta Jehovap iliuuserisimasai qujamasuutiginerulis­savagut.

JEHOVAP KISSAATIGAA IMMINUT IKINNGUTAALIS­SASUGUT

 7. (a) Inuit siulliit aamma suna annaavaat? (b) Adamimit Evamillu kinguaajugatta suna pisariaqar­tipparput? (Romamiut 5:10, 11)

⁷ Inuit siulliit naassaan­ngitsumik inuunissamik periarfissartik annaagin­narnagu aamma Ataataminnut Jehovamut attaveqarun­naarlutik taassumunnga akeranngorput. Adami Evalu Jehovap ilaqutariis­sortaanut  ilaagaluarput. (Luk 3:38) Meeqqiun­nginnerminnili Jehovamut naalannginnamik ilaqutariis­sortaanit avissaar­titaapput. (Mos 1. 3:23, 24; 4:1) Kinguaavi kikkulluunniit, aamma uagut, Jehovap ilaqutariis­sortaanut ilaasin­naanngillat. Taamaattumik Jehovamut akeraajun­naarluta taassumunnga attaveqarluas­sagutta ikiorneqar­tariaqarpugut. (Romamiut 5:10, 11 atuakkit). Tupinnaan­nartumillu tamanna piniassammat Jehova siulliulluni iliuuseqarpoq. Qanoq iliorami?

GUUTIP PERIARFIS­SIPPAATIGUT IMMINUT IKINNGUTAALER­NISSATSINNUT

 8. Jehova sumik pilersitsiva?

⁸ Inuit ajortillit imminut qanimut attaveqaler­niassammata Jehova saammaan­nartitsivoq. Tassa Adamip annaasaa utertik­kumallugu nalinganik pilersitsivoq. Romamiut 3:25-mi ima allassimavoq: “Guutip Jiisusi pilliutigaa aavanut uppertut saammaak­kumallugit.” Taamaalilluni Jehovap imminut ikinngutaaler­nissatsinnut eqqisseqateqaler­nissatsinnullu periarfis­sippaatigut.

 9. Israalikkut ajortiminnik isumakkeerfigineqar­niassammata Jehova qanoq aaqqissuus­saqarpa?

⁹ Jehova Israalikkut imminut attaveqarluar­niassammata ajortaasa isumakkeerfigineqaatis­saannik aaqqissuus­saqarpoq. Israalikkut ulloq saammaan­nartitsivik ukiumoortumik nallius­sisarpaat. Ullormi tamatumani palasiuneq inuit sinnerlugit uumasunik pilliuteqartarpoq. Uumasut inunnit pingaaruteqan­nginnerummata taakkua pilliutiginissaat ajortulianik matussusiil­luinnarsin­naanngillat. Israalikkulli peqqissimillutik Jehovap piumasaqaataatut pilliigaangata ajortaannik kajumilluni isumakkeerfigisarpai. (Hebr 10:1-4) Israalikkut ullormi saammaan­nartitsivimmi pisunilu allani pilliuteqar­taramik ajortiliunerminnik pilliummillu tamakkiisumik saammaan­nartitsissummik pisariaqar­titsinerminnik eqqaasin­neqartarput.

10. Inuit ajortuliaminnik isumakkeerfigineqar­niassammata Jehova qanoq iliorpa?

¹⁰ Inuit ajortuliaminnik isumakkeerfigineqar­nissaat Jehovap qanoq ajornarun­naarsippaa? Ernermi asasami ‘inuppassuit ajortuliaat nammakkumallugit ataasiaammik imminut pilliutiginissaanut’ pilersaarusiorpoq. (Hebr 9:28) Jiisusip ‘inuunini amerlasuut utertin­neqaatis­saattut akiliutigaa’. (Mat 20:28) Tamanna qanoq isumaqarpa?

AKILIUT UTERTITSISSUT

11. (a) Sooq utertitsissummik akiliisoqar­tariaqarpa? (b) Akiliisussamut sunik piumasaqaateqarpa?

¹¹ Jehova aalajangerpoq ajortuliatsinnik isumakkeerfigineqar­niassagatta taassumunngalu ikinngutaaler­niassagatta utertitsissummik akiliisoqar­tariaqartoq. Adamip annaasaa taarserumallugu suna akilerneqar­tariaqarpa? Eqqaamajuk Adamip Evallu naammal­luinnartumik naassaan­ngitsumillu inuunis­saraluartik annaammassuk. Akiliisoq annaasap assinganik akiliisariaqarpoq. (Tim 1. 2:6) Taamaattumik akiliisoq tassaasariaqarpoq angut inersimasoq (1) naammal­luinnartoq; (2) nunarsuarmi naassaan­ngitsumik inuunissamik periarfis­saqartoq aamma (3) uagut pilluta inuunermi pilliutiginissaanut piumassuseqartoq. Inuup taassuma Adamip annaasaa utertis­sinnaavaa.

12. Sooq Jiisusip akiliut utertitsissut akilersinnaavaa?

¹² Sooq Jiisusip akiliut utertitsissut akilersinnaavaa? (1) Naammal­luinnar­tuugami ajortuliunngilaq. (Pet 1. 2:22) (2) Tamanna pissutigalugu nunarsuarmi naassaan­ngitsumik inuunissamik periarfis­saqarpoq. (3) Uagut pilluta inuunini pilliutigerusuppaa. (Hebr  10:9, 10) Adami ajortuliun­ngikkallarami naammal­luinnartuusoq assigalugu Jiisusi naammal­luinnartuuvoq. (Kor 1. 15:45) Taamaattumik Jiisusi toqunermigut Adamip ajortuliaanik matussusiisumik akiliilluni annaasaanik taarsiisinnaavoq. (Rom 5:19) Jiisusi taamaalilluni tassaalerpoq “Adami kingulleq”. Adamip annaasaanik inummik naammal­luinnartumik allamik akiliisoqar­tariaqanngilaq. Jiisusimi “ataasiaammik” toquvoq. – Hebr 7:27; 10:12.

13. Suna pissutigalugu Jehovamut attaveqarluarsin­naavugut?

¹³ Paasivarput inuit saammaak­kumallugit ajortuliaminnillu isumakkeerfigineqar­niassammata Jehova aaqqiis­sutissamik pilersitsisoq. Ajornarun­naarsin­niarlugulu utertitsissummik akiliisoqarnissaa aaqqissuuppaa. Jiisusillu inuunini naammal­luinnartoq pilliutigigamiuk akiliut utertitsissut akilerpaa. (Ef 1:7; Hebr 9:14) Tamanna qanoq kinguneqarnersoq sammeriartigu.

AJORTIMIT TOQUMILLU IPERAGAALLUTALU NAAPERTUIL­LUARTUUTITAASIN­NAAVUGUT

14. Maanna suut sammissavagut, aamma sooq?

¹⁴ Jehovap aaqqiis­sutissaa uagut qanoq iluaqutigaarput? Tamanna akissutis­sarsiumallugu Biibilimi oqaatsit assigiin­ngitsut marluk sammissavagut. Taamaalilluta paasissavarput Jehovap isumakkeerfigin­ninnera inuttut ataasiakkaatut qanoq iluaqutigisar­neripput.

15-16. (a) Utertitsis­sutitut pilliut pissutigalugu sumit iperagaasimavugut? (b) Tamanna qanoq misigilis­sutigaarput?

¹⁵ Biibilimi allassimavoq akiliut utertitsissut akilerneqarsimammat iperagaasimasugut. Apustilip Petrusip tamanna ima allaatigaa: “Nalunngilarsimi sølvit kuultil­luunniit nunguttartut atornagit inooriaatsimit isumaqan­ngitsumit siuaasassinnit ingerlateq­qinneqartumit iperagaasusi [nutsiinn.: “akiliun­neqarlusi utertin­neqartusi”]. Kristusilli, savaaqqatut ajoquteqan­ngitsutut minguitsutullu ittup, aavanit erlinnartumit aniguisin­neqarpusi.” – Pet 1. 1:18, 19; q.a.i.

¹⁶ Utertitsis­sutitut pilliut pissutigalugu ajortimit toqumillu aliasuutaangaar­tartunit aniguisin­neqarsin­naavugut. (Rom 5:21) Jehovamut Jiisusimullu qujamasungaarpugut Jiisusip aava erlinnartoq aqqutigalugu iperagaasimagatta! – Kor 1. 15:22.

17-18. (a) Naapertuil­luartuutitaaneq qanoq isumaqarpa? (b) Tamanna uagutsinnut qanoq sunniuteqarpa?

¹⁷ Naapertuil­luartuutitaaneq isumaqarpoq ajortuliagut sussakkeer­neqartut. Taamaalior­nermigut Jehovap naapertuil­luarnermut najoqqutassiani unioqqutippai? Naamik, imaanngilaq pisassarigatsigu naapertuil­luartuutik­kaatigut. Aamma Jehovap ajortuliorneq akuerinngilaa. Kisianni utertitsis­sutitut akiliut akilerneqar­niassammat Jehovap Jiisusillu iliuuserisimasaat upperigatsigit Jehovap ajortuliatsinnik isumakkeerfigiumavaatigut. – Rom 3:24; Gal 2:16.

¹⁸ Jehovamit naapertuil­luartuutitaanerput qanoq iluaqutigaarput? Ilaat Jiisusip qilammi naalakkersueqatiginissaanut toqqarneqarsimapput Guutimullu qitornaalereersimallutik. (Tit 3:7; Joh 1. 3:1) Ajortuliaminnik isumakkeerfigineqarsimapput, soorlulusooq ajortuliun­ngisaan­narsimasut. Taamaat­tumillu Kunngeqarfim­miinnis­saminnut piukkun­naateqarput. (Rom 8:1, 2, 30) Naapertuil­luartuutitaasut allat nunarsuarmi naassaan­ngitsumik inuunissamik neriuuteqarput. Jehovap ajortuliaannik isumakkeerfigisimavai, taamaat­tumillu taassumunnga ikinngutaalersimapput. (Jaak 2:21-23) Inupparpassuit Harmagedonnimi aniguiumaarput  toqunngisaan­nassallutillu. (Joh 11:26) ‘Naapertuil­luartut naapertuil­luanngitsullu’ toqusimasut makititaajumaarput. (ApS 24:15; Joh 5:28, 29) Naggataatigut Jehovamut kiffaasut naalattut nunarsuarmiittut tamarmik ‘inussiaajun­naarsin­neqarlutik Guutip qitornaasut alutornarsisin­neqassapput’. (Rom 8:21) Utertitsis­sutitut pilliummik aaqqissuussaq pilluaq­qussutaangaarami – tassami Ataatatta Jehovap qitornaasut naammal­luinnartutut qanimut attaveqatigilernissaa qilanaarisin­naagatsigu!

19. Jehovap aamma Jiisusip iliuuserisimasaat pissutigalugit atukkagut qanoq ajunngin­nerulerpat? (Aamma ungalusaq “ Jehovap isumakkeerfigin­ninnera” takuuk).

¹⁹ Uagut angut inuusuttoq, aallaqqaataani eqqaaneqartoq, sunik tamanik annaasaqartoq akiligas­sarpassuarnillu akilersin­naanngisaminik kingornussisoq assigalugu neriuutis­saqanngik­kaluarpugut. Qujanar­tumilli Jehovap ikiorpaatigut. Jehovap ajortuliatsinnik isumakkeerfigineqar­nissarput ajornarun­naarsimmagu Jiisusillu akiliut utertitsissut akilermagu atukkagut pitsaanerulerput. Jiisusi Kristusi upperigatsigu ajortimit toqumillu iperagaasin­naavugut. Ajortuliagut sussakkeer­neqarsin­naapput, Jehovammi isumakkeerfigigaangamisigut ajortuliagut nunguterluin­nartarpai. Pingaar­nerpaatut, Ataatarput qilammiusoq asannittoq Jehova maanna qanimut attaveqatigisin­naavarput!

20. Allaaserisap tulliani suna sammissavarput?

²⁰ Jehovap aamma Jiisusip asanningaarlutik uagut pilluta iliuuserisaat eqqarsaatigeq­qissaaraangatsigit qamannga pisumik qujamasuler­tarpugut. (Kor 2. 5:15) Ikiorsiman­ngitsuup­patigut neriuutis­saqarsimanavian­ngikkaluarpugut! Jehovap isumakkeerfigin­ninnera inuttut ataasiakkaatut qanoq iluaqutigisar­neripput allaaserisap tulliani paasisaqarfiginerus­savarput.