Ataata anaanalu katuuliupput upperluartut. Biibilimili ilikkaramikku Guuti Jehovamik ateqartoq Jehovamik Nalunaajaasun­ngorput aallussil­luartut. Ataata Jiisusip assinganik qiperuis­saarpoq, sanasutulli piginnaanini atorlugu illutsinni inimi allermi naalagaaf­filersaarfiliorpoq. Taannalu Filippinerit illoqarfiisa pingaar­nersaata, Manilap, avataatungaani San Juan del Montemi naalagaaf­filersaarfiit siullersaraat.

1952-imi inunngorpunga, angajoq­qaamalu Jehova pillugu ilinniar­tittalerpaannga soorlu angajukka sisamat aleqakkalu pingasut ilinniar­tissimagaat. Ataatama kajumis­saartarpaanga ullut tamaasa Biibilimi kapitali ataaseq atuartaq­qullugu. Biibililersaarutitsinnillu assigiin­ngitsorpas­suarnik atuaqqis­saaqatigisarpaanga. Angajoqqaama nakkutilliisut angalasartut allallu Betelimeersut uagutsinni ilaannikkut najugaqatit­tarpaat. Qatanngutit taakkua misigisimasaminnik ilaqutariittut nuannareqisatsinnik kajumis­sissutigeqisatsinnillu oqaluttuut­tarpaatigut. Tamannalu Jehovamut kiffartor­nitsinnik pingaar­nerpaatitsinis­satsinnut kajumin­nerulis­sutigaarput.

Angajoqqaakka Jehovamut upperluartut ilinniarfigeqaakka. Anaanama napparsimalluni toqunerata kingorna ataatagalu 1971-imi pioneritut kiffartoqatigiilerpugut. Ajoraluar­tumilli 1973-imi 20-nik ukioqartunga ataataga toquvoq. Angajoqqaakka qimagummata imaaruttutut kiserlior­tutullu misigilerpunga. Neriuutilli Biibilimeersup “kitsatut, isumannaatsutut nikinneq ajortutut,” ittup misigis­sutsikkut anersaakkullu patajaal­lisippaanga. (Hebr 6:19) Ataatama toqunerata kinguninngua Palawanimi, nunap immikkoortuisa ilaanni, qeqertami Coronimi specialpioneritut suliassin­neqarama akuersivunga.

Coronimut tikikkama 21-nik ukioqarpunga. Illoqarfis­suarmiit tikittutut tupaallaatigaakka qeqertami ikittuinnaat innaallagiaqarlutillu kuuinnartumik imeqarmata kiisalu ikittuinnaat biileqarlutillu  motorcykeleqarmata. Aamma Nalunaajaasut amerlan­ngillat, pionereqateqan­ngilanga ilaannikkullu kisima oqaluus­sisarlunga. Qaammat siulleq ilaquttakka ikinngutikkalu maqaaseqaakka. Unnukkut ullorissat isiginnaaleraangakkit qulliikka koorusaartarput. Suliassin­neqarnera unitsiin­narlugu angerlaan­narusuk­kaluarpunga.

Kiserlioraangama eqqarsaatikka misigis­sutsikkalu tamaasa Jehovamut oqaluttuarisarpakka. Biibilimi atuagas­siaatitsinnilu atuarsimasakka qiimmaal­lannartut eqqaaqqit­tarpakka. Tussiaat 19:15 eqqaakulasarpara. Paasilerpara Jehovamut iluarinartut, soorlu suliai pissusiilu, eqqarsaatigileraangakkit Jehova tassaasartoq uanga “qaarsora aniguisitsisigalu”. Kisimiin­ngisaannarneq pillugu Napasuliaq Alapernaarsuiffimmi allaaserisaq iluaqutigisaqaara. a Taanna atuaqqeq­qattaar­tarpara. Kiserliorninni misigisarpunga Jehovap najoraanga, piffissarlu tamanna qinunermut, atuaqqis­saarnermut eqqarsaatigin­neqqissaar­nermullu periarfissatut atortarpara.

Coronimut tikeqqam­mitsiaan­narlunga utoqqaaner­tanngor­tinneqarpunga. Utoqqaaner­tatuatut Teokratiimik Ilinniarfimmi, Oqaluus­sinermut tunngasumik ataatsimiinnermi, ilagiit atuakkamik atuaqqis­saaqatigiin­neranni aamma Napasuliaq Alapernaarsuiffimmik atuaqqis­saaqatigiinnermi aqutsisuusarpunga. Aamma sapaatit-akunneri tamaasa tamanut oqalugiaateqar­tarpunga. Imaallaat kiserlior­nissamut piffissaaruppunga!

Coronimi kiffartornera kinguneqarluarpoq, allaat Biibilimik atuaqqis­saaqatigisar­takkama ilaat imermut morsutsitaapput. Aammali unamminiar­nartoqarpoq. Ilaannikkut oqaluus­siffigisar­takkamut ullup affaa atorlugu pisuttarpunga, nalullugu sumi unnuissanerlunga. Oqaluus­siffigisar­takkatsinnut qeqertaararpassuit ilaapputtaaq. Mallersorsuakkut umiatsiamik ornikulasarpakka, uffa nalussin­naananga. Jehovalli tamatigut illersorlungalu nukissaqar­tittarpaanga. Kingorna paasilerpara Jehovap suliassamut ilungersunar­nerusumut piareersaraanga.

1978-imi Papua Ny Guineami, Australiap avannaaniittumi, suliassin­neqarpunga. Papua Ny Guinea qaqqartuujuvoq Spaniatullu angitigingajalluni. Tupigutsappunga paasillugu innuttaasut 3 millioniusut oqaatsit 800-nit amerlanerusut atortaraat. Qujanartumik inuit amerlanerit oqaatsit Melanesiamiutut pidgini, aamma tok pisinimik taaneqartartut, atortarpaat.

Siullermik illoqarfimmi pingaarnermi, Port Moresbymi, ilagiinni tuluttut oqaluttuni suliassin­neqaqqaarpunga. Ilagiinnut tok pisinitut oqaluttunut nuukkama oqaatsinik pikkorissarneq ilannguf­figaara. Ilikkakkakka oqaluus­sinermi atortarakkit oqaatsit ilikkapal­lappakka. Sivitsun­ngitsorlu tok pisinitut oqalugiar­talerpunga. Papua Ny Guineamut tikikkama ukiorluunniit ataaseq qaangiutin­ngitsoq ilageeqatigiinni tok pisinitut oqaluttuni nakkutil­liisutut angalasartutut kiffartor­tunngor­tinneqarnera tupaallaatigaara.

Nunami avinngarusimasumi ilagiit imminnut ungasit­tangaarmata ataatsimeersuarnerit arlallit aaqqissuut­tariaqar­tarpakka angalaqat­taartarlungalu. Nunami allaanerusunik oqaasillit uangalu sungiusimasannit allaanerusunik ileqqullit akornan­niilerama  kiserlioqaanga. Nuna qaqqartuujugami angalaarfigiuminaallunilu ilagiinniit ilagiinnut orniguteriaan­naasanngilanga. Taamaattumik sapaatit-akunneri tamangajaasa timmisartukkut angalasariaqar­tarpunga. Ilaannikkut timmisartumi qajannarpasissumi ataasiinnarmik motoorilimmi kisima ilaasuusarpunga. Umiatsiamik angalasar­nittulli annilaangatigisarpunga!

Oqarasuaatit amerlan­ngimmata ilagiit allakkatigut attavigisarpakka. Allakkannit siulliullunga apuukkaangama nunaqarfimmi innuttaasunut Jehovap Nalunaajaasui sumi najugaqarnersut apeqqutigisarpara. Qatanngutit nassaarigaangakkit tikilluaq­qusaagaangamalu ilungersuanikka nuannaarutigisarpakka. Jehovap ikiuinera misigisaqaara taassumunngalu qaninneruler­tarlunga.

Qeqertami Bougainvillemi ataatsimeeq­qaarama aappariit qungujullutik ornippaannga aperalungalu: “Eqqaamavitigut?” Eqqaalerpara Port Moresbymut tikissimatsiaan­narlunga aappariit oqaluus­siffiginikuullugit. Biibilimik atuaqqis­saaqatigisalerpakka kingornalu qatanngummut angummut atuaqqis­saaqatigisalersillugit. Maanna marluullutik imermut morsutsitaareersimapput! Taakku tassaapput ukiuni pingasuni Papua Ny Guineamiinninni pilluaq­qussutit ilaannaat.

1978-imi Coronimit aallanngitsiarlunga qatanngut arnaq ilakkuminartoq, Adelimik atilik, ilisarisimalerpara. Meeqqaminik marlunnik, Samuelimik Shirleymillu, perorsaajutigaluni pioneriuvoq. Aamma anaanani utoqqalisimasoq isumagaa. 1981-imi maajiugaa Filippinerinut uteqqippunga Adel katikkiar­torlugu. Katereeratta pionerioqatigiilerpugut marluullutalu ilaqutariit pilersorlugit.

Naak ilaqutaqalereeraluarlunga 1983-imi Palawanip ilaani qeqertami Linapacanimi specialpioneritut suliassin­neqaqqippunga. Ilaqutariiulluta avinngarus­simasumut tassunga, Nalunaajaasoqarfiun­ngitsumut, nuuppugut. Adelip arnaa ukiup ataatsip missaa qaangiummat toquvoq. Oqaluus­sinermik ulapputeqarnerput annaasaqar­nitsinnik atoruminar­nerulersitsivoq. Linapacanimi siuariaateqartunik Biibilimik atuaqqis­saaqaterpas­suaqaratta sivitsun­ngitsoq naalagaaf­filersaarfin­nguamik pisariaqar­titsilerpugut. Nammineerluta taanna sanavarput. Tikeqqaar­nitsinniilli ukiut pingasut qaangiutiinnartut nuannaarutigingaak­katsinnik inuit 110-t Jiisusip toquneranik eqqaaniaanermi najuupput. Taakkua ilarpassui aallareernitta kingorna imermut morsutsitaapput.

1986-imi suliassin­neqarama Culionimut, qeqertamut pupinnermik nappaatillit nunagisaannut, nuuppugut. Kinguninngua Adel aamma specialpionerin­ngortin­neqarpoq. Aallaqqaammut inuit pupissut oqaluus­siffiginissaat pissangagilaaraluarparput. Oqaluus­sisartoqatittali nunaqavissut oqaluttuup­paatigut pupinnermik nappaatillit nakorsar­tissimasut taamaat­tumillu tunillatsin­nissamut aarlerinar­toqanngitsoq. Taakkua ilaat qatanngutip arnap illuani ataatsimiinnerni najuuttalerput. Sivitsun­ngitsoq inunnut taakkununnga, Guutimit inunnillu sumigin­narneqarsimasutut misigisimasunut, Biibilimi neriuuterput pillugu oqaluus­sinissarput toqqissisimaf­figilerparput. Inuit taama  napparsimatigisut siunissami peqqissil­luinnarluni inuunissamik siulittuut paasigaangamikku nuannaartut takullugit nuannertaqaaq. – Luk 5:12, 13.

Culionimi inuunermut meerartagut qanoq tulluarsarpat? Meerartagut ineriar­tornartunik ilagisar­tagaqar­niassammata Adelilu arnat inuusut­tunnguit Coronimeersut qaaqquagut. Samuel, Shirley taakkulu inuusut­tunnguit marluk meerarpas­suarnik Biibilimik ilinniar­titsisarput, taavalu uanga Adelilu taakkua angajoq­qaavinik ilinniar­titsisarpugut. Allaat tamatuma nalaani ilaqutariit assigiin­ngitsut aqqanillit atuaqqis­saaqatigisalerpagut. Biibilimik atuaqqis­saaqatigisar­tagarpassuagut Jehovamut qanilliar­torlutik siuariar­tulermata ilagiit ataatsit sivitsun­ngitsoq pilersin­neqarsin­naalerput!

Aallaqqaammut oqaluus­siffigisar­takkatsinni eqqaanilu kisiartaallunga utoqqaaner­taavunga. Taamaattumik immikkoor­tortaqarfimmit aperineqarpunga Culionimi oqaluus­sisartunut arfineq-pingasunut kingornalu nunaqarfimmi Marilymi oqaluus­sisartunut qulingiluanut sapaatip-akunneranut ataatsimiinnerit siulersor­tarsinnaanerikka. Akunnerni pingasuni umiatsiarluta Marilyliar­tarpugut. Tamaani ataatsimeereeraangatta ilaqutariin­nguulluta nunaqarfimmut Halseymut akunnerpassuarni qaqqarsuit akornisigut ingerlaarluta Biibilimik atuaqqis­saaqateqariar­tortarpugut.

Marilymi Halseyimilu soqutiginnittut amerliar­tornerat pissutigalugu taakkunani marlunni ataatsimiit­tarfissatsinnik sanavugut. Linapacanimi qatanngutit iliorsimanerattut Marilymi Halseyimilu qatanngutit soqutigin­nittullu atortussanik tunissuteqarput sanaartoqataal­lutillu. Marilymi ataatsimiittarfik inunnut 200-nut inissaqar­titsivoq alliler­neqariaan­naagamilu ataatsimeersuarnerni atorneqarsin­naalluarluni.

1993-imi meeqqagut perormata Adelilu Filippinerini ilageeqatigiinni angalasartutut aallartippugut. Taava 2000-mi Kiffartortut Toqqakkat Ilinniarfiannut qaaqqusaavunga ilinniar­titsisussatut ilinniar­tinneqas­sallunga. Ilinniarfimmi tassani ilinniar­titsisussatut ajukkuk­kaluarpunga, Adelilli kaammat­tortuarpaanga. Eqqaasippaanga Jehovap suliap  nutaap tamatuma naammas­silluar­nissaanut pissatsik­kumaaraanga. (Flp 4:13) Adelip tamanna ilumoortuusoq nalunngilaa, namminermi peqqiil­lioraluarluni suliassani naammas­silluaramiuk.

2006-imi ilinniar­titsisuunerma nalaani Adel Parkinsonimik nappaateqartoq paasineqarpoq. Tuparujus­suarpugut! Paariumallugu suliagut unitsin­nialersaalerut­torikka Adelip saappaanga: “Nakorsamik nappaatinnik ikiorsiisin­naasumik ujarliutinnga, taava nalunngilara suliatta ingerlatiin­narnissaanut Jehovap ikiorumaaraatigut.” Ukiuni arfinilinni tulliuttuni Adelip naammagit­taalliornani Jehovamut kiffartornini ingerlatiinnarpaa. Pisussin­naajunnaarami kaassuar­takkami issialluni oqaluus­sisarpoq. Oqaluppiarsin­naajunnaarami ataatsimiinnerni oqaatsimik ataatsimik marlunnil­luunniit akisarpoq. Adel 2013-imi toqussi tikillugu maligas­saalluarsimaneranik pingaar­titsisunit allagarsiuartarpoq. Ukiut 30-t sinnerlugit nuliannguara aalajaatsoq upperluartorlu saninniippoq, maannali aammaarlunga aliasun­nerujussuaq kiserlior­nerujussuarlu atoqqilerpakka.

Adelip kissaatigaa suliakka ingerlatiin­nassagikka, taamaaliorpungalu. Ulapeqaanga, tamannalu kiserliun­nginnissannut iluaqutigeqaara. 2014-imiit 2017-imut ilagiit tagalogitut oqaluttut, nunani suliatsinnik killilersuisoqarfim­miittut, tikeraar­tarpakka. Tamatuma kingorna Taiwanimi, USA-mi Canadamilu ilagiit tagalogitut oqaluttut tikeraar­tarpakka. 2019-imi Indiami Thailandimilu tuluit oqaasii atorlugit Kristumiunut Oqaluus­sisartunut Ilinniarfimmi ilinniar­titsisuuvunga. Suliakka tamakku tamarluinnaasa nuannareqaakka. Jehovamut kiffartorninni tamakkiisumik ulapputeqaraangama nuannaar­nerusarpunga.

Suliassaqarfinni nutaani tamani qatanngutit asalersimasakka qimaleraan­ngakkit oqitsuin­naasanngilaq. Taamaat­toqartillugu Jehovap tatigil­luinnarnissaa ilikkar­nikuuara. Jehovap annertoq­qusersuisarnera misigikulasarpara, tamannalu suliassat aggersut suulluunniit qamannga akuerinis­saannut iluaqutigisarpara. Ullumikkut Filippinerini specialpioneriuvunga. Ilagiinni tikitanni uppeqatikka annertoq­qusersuisut isumagin­nittullu toqqissisimaf­figeqaakka. Aamma Samueli Shirleylu anaanamik uppernera ilaarlugu uppersuseqartut tulluus­simaarutigeqaakka. – Joh 3. 4.

Aap, inuuninni misilin­neqaatit amerlasuut misigisimavakka, nuliannguama asasama nappaas­suarmik eqqorneqarluni naalliulluni toquneranut allaat. Pissutsilli nutaat aamma akuerinikuuakka. Maanna takusimavara Jehovap ‘tamatta immikkut ungasin­ngikkaatigut’. (ApS 17:27) Jehovap “talia ima naatsiginngilaq” kiffani, allaat avinngarusimasumiittut, annertoq­qusersorsinnaavai nakkussatsis­sinnaal­lugillu. (Es 59:1) Jehovap, Qaarsuma, inuunera tamaat najorsimavaanga tassungalu qujassutis­saqaqaanga. Kisimiin­ngisaan­narpunga.