“Ingerlaqatigissavassi”
“Ingerlaqatigissavassi tusaratsigu Guutip najoraasi.” – ZAK 8:23.
1, 2. (a) Jehovap nalitsinni susoqassanerarpaa? (b) Allaaserisami matumani apeqqutit suut akineqassappat? (Allaaserisap aallaqqaataani assiliaq takuuk).
JEHOVA oqarpoq nalitsinni ‘inuiaat assigiinngitsut tamarmik angutitaasa ilaasa quliullutik angut Judakkuusoq ataaseq atisaata nuuagut tigullugu oqarumaartut: Ingerlaqatigissavassi tusaratsigu Guutip najoraasi’. (Zak 8:23) “Judakkuusoq” Guutip anersaamik illernartumik tanitaanut assersuutaavoq. Taakku aamma ‘Israeli Guutip pigisaanik’ taaneqarput. (Gal 6:16) ‘Angutit qulit’ nunami naassaanngitsumik inuunissamik neriugisaqartunut assersuutaapput. Taakkua nalunngilaat Jehovap tanitat pilluaqqugai taakkuninngalu pallorfiginneqateqarnertik tulluusimaarutigalugu.
2 Pruffiitip Zakariap oqarneratut Jiisusi oqarpoq Guutip innuttai ataasiussuseqassasut. Qilaliarnissamik qilanaarinnittut ‘savarpannguanik’ taavai nunamilu inuunissamik qilanaarinnittut ‘savanik allanik’ taallugit. Oqarporli tassaassasut “savaatit katersat ataatsit” namminerlu ‘paarsisimittut ataatsitut’ malissagaanni. (Luk 12:32; Joh 10:16) Eqimattat marluummata ima eqqarsartoqarsinnaavoq: (1) Savat allat ullumikkut tanitat aqqi tamaasa nalunngittariaqarpaat? (2) Tanitaq imminut qanoq isumaqarfigissava? (3) Ilagiinni eqqaaniaanermi timiusartorlunilu viinnisortoqartalerpat taanna qanoq pissusilersorfigissavara? (4) Eqqaaniaanermi timiusartorlutillu viinnisortartut amerliartortut malugigukku isumakuluutigisariaqarpara? Allaaserisami matumani apeqqutit tamakku akineqassapput.
ULLUMIKKUT TANITAT AQQI TAMAASA ILISIMASARIAQARPAVUT?
3. Sooq qulakkeerlugu ilisimasinnaanngilarput kikkut 144.000-nut ilaassanersut?
3 Tanitat ullumikkut suli nunamiittut tamarmik aqqi savanit allanit ilisimaneqartariaqarpat? Naagga. Sooq? Taakku akissarsiassartik ilumut pissaneraat kimilluunniit ilisimaneqarsinnaanngimmat. [1] Guutimit qilammut qaaqqusaasimagaluarlutik aatsaat aalajaattuarunik akissarsissapput. Tamanna Saatanip nalunnginnamiuk ‘pruffiitioqqusersut’ atorlugit ‘tammartinniarsarai’. (Matt 24:24) Kristumiup tanitap akissarsissanerluni aatsaat qulakkeersinnaavaa Jehovamit aalajaatsutut nalilerneqarnerminik erseqqissaavigineqaruni. Jehovap taanna toqutinnagu imaluunniit annikilliortitaangaarnissap aallartinngitsiarnerani taamatut inaarutaasumik naqissuserlugu akuerissavaa. – Saqq 2:10; 7:3, 14.
Jiisusi siulersortigaarput, taannalu kisiat malissavarput
4. Tanitat ullumikkut nunamiittut aqqi tamarluinnaasa ilisimaneqarsinnaanngippata taakku qanoq ‘ingerlaqatigisinnaavavut’?
4 Tanitat ullumikkut nunamiittut aqqi ilisimaneqarsinnaanngippata savat allat taakku qanoq ‘ingerlaqatigisinnaavaat’? Biibilimi allassimaneratut angutit qulit “angut Judakkuusoq ataaseq atisaata nuuagut tigullugu oqarumaarput: Ingerlaqatigissavassi tusaratsigu Guutip najoraasi”. Versimi tamatumani “angut Judakkuusoq ataaseq” eqqaaneqarpoq, versilli naggataatungaani erseqqippoq inummut ataasiinnaanngitsumut assersuutaasoq. Tassa Judakkuusoq tanitanut tamarmiusunut assersuutaavoq. Savat allat tamanna nalunngilaat taakkulu peqatigalugit Jehova kiffartorfigalugu. Tanitat aqqi ilisimasariaqarnagillu ataasiakkaarlugit malittariaqanngilaat. Jiisusi siulersortigaarput, Biibilimilu allassimavoq taanna kisiat malissagipput. – Matt 23:10.
TANITAQ IMMINUT QANOQ ISUMAQARFIGISSAVA?
5. Tanitat mianersoqqussut suna eqqarsaatigeqqissaartariaqarpaat, aamma sooq?
5 Tanitat Korinthimiunut allakkani siullerni kapitali 11-mi mianersoqqussut eqqarsaatigeqqissaartariaqarpaat. (1 Korinthimiut 11:27-29 atuakkit). Tanitap qanoq eqqaaniaanermi “qinngaqqunnarluni” timiusartorlunilu viinnisorsinnaava? Jehovamut attaveqarluartuanngikkuni aalajaanngikkunilu eqqaaniaanermi timiusartorlunilu viinnisoruni ataqqinninngitsuliussaaq. (Hebr 6:4-6; 10:26-29) Sakkortuumik mianersoqqusineq tamanna tanitanut eqqaasitsissutaavoq aalajaattuartariaqarnerannik “ajugaasup nersornaatisiassaa piniarlugu, Guutip Kristusi-Jiisusikkut pavannga uatsinnut qaaqqusissutaa”. – Fil 3:13-16.
6. Kristumiut tanitat qaaqqusaanerminnut naapertuuttumik inuullutik qanoq ersersissinnaavaat?
6 Paulusip kristumiut tanitat ima allaffigai: “Uanga Naalagaq pissutigalugu parnaarussaasunga oqaaqqissaarpassi qaaqqusaanissinnut naapertuuttumik inooqqullusi.” Qanoq taamaaliussappat? Ima nassuiaappai: “Tamatigut qanilaartuullusi saamasuullusilu naammagittartuullusilu asaqatigiinnikkut immissinnut kamageqatigiillusi. Eqqissineq ataqatigiissutigalugu ilungersorlusi aalajangiusimaniarsiuk anersaakkut ataasiussuseq.” (Ef 4:1-3) Jehovap anersaava makitasuunngortitsinani maniguuttunngortitsisarpoq. (Kol 3:12) Tassa tanitat isumaqanngillat inunnit allanit ajunnginnerullutik. Nalunngilaat nunami inuunissamik neriugisalinnit anersaamik illernartumik annerusumik pisussaatitaanatik. Isumaqanngillat sallusuissutit itisuut Biibilimeersut uppeqatiminnit paasilluarnerusinnaallugit. Aamma kinaluunniit oqarfiginavianngilaat aamma taanna tanitaasimasoq eqqaaniaanermilu timiusartortariaqarlunilu viinnisortalertariaqartoq. Aap, maniguuttuugamik nalunngilaat Jehova kisimi qilaliarnissamut qaaqqusisinnaasoq.
7, 8. Kristumiut tanitat suna naatsorsuutiginngilaat, aamma sooq?
7 Tanitat qilaliarnissamik qaaqqusaaneq ataqqinaatitut isigigaluarlugu immikkut ataqqineqarnissartik naatsorsuutiginngilaat. (Ef 1:18, 19; Filippimiut 2:2, 3 atuakkit). Aamma nalunngilaat Jehovap tanikkamigit tamanna allanut ilisimalersinngikkaa. Taamaattumik tanitaq tupaallanneq ajorpoq tanitaanini ingerlaannaq allanit upperineqanngippat. Nalunngilaa Biibilimi allassimasoq Guutimit immikkut akisussaaffiligaasimanerartoqarpat tamatuminnga upperinnipallassanngitsugut. (Saqq 2:2) Tanitap malugeqqusaartuunnginnami tanitaanini inummut siullerpaamik naapitaminut oqaluttuarinavianngilaa. Kimulluunniimmi oqaluttuarissagaa ilimananngilaq. Aamma siunissami qilammi akissarsiassani usorsisimaarutigalugu oqaluttuarissanngilaa. – 1 Kor 1:28, 29; 1 Korinthimiut 4:6-8 atuakkit.
8 Tanitat allanit immikkoortitaasutut pissusilersunnginnamik tanitat allat kisiisa peqatiginiarsarisanngilaat. Tanitaanertik pillugu oqaloqatissarsiorlutik Biibilimillu atuaqqissaaqatissarsiorlutik tanitanik allanik naapitassarsiorneq ajorput. (Gal 1:15-17) Tanitat taamaaliortaraluarpata ilagiit ataasiussuseqassanngillat. Anersaamut illernartumut, Guutip innuttaanik eqqisseqatigiissitsillunilu ataasiussuseqartitsisumut, akerliusumik iliuuseqassagaluarput. – Romamiut 16:17, 18 atukkit.
QANOQ PISSUSILERSORFIGISSAVIGIT?
9. Sooq eqqaaniaanermi timiusartorlutillu viinnisortut pissusilersorfiginerinut tunngatillugu mianersortariaqarpugut? (“ Asanninneq ‘kanngunartuliortarinngilaq’” takuuk).
9 Qatanngutit angutit arnallu tanitat qanoq pissusilersorfigissavigit? Jiisusip ajoqersukkani ima oqarfigai: “Tamassi qatanngutigiippusi.” Imalu nangilluni: “Imminut akitsisinniartoq nikanarsisitaassaaq, imminullu nikanartittoq akitsisitaassaaq.” (Matt 23:8-12) Tassa inuk kinaluunniit, aamma Kristusip qatanngutigigaluarpagu tanitaq, pingaartippallaarutsigu eqqunngitsuliussaagut. Biibilimi utoqqaanertat eqqartorneqarneranni uppernerannik ilaarseqqulluta kajumissaarneqarpugut, allassimanngilarli inuk naalakkatsitut siulersuisorilissagipput. (Hebr 13:7) Taavami sooq Biibilimi allassimava ilaat ‘marloriaammik ataqqineqartussaasut’? Tamatumunnga pissutaasoq tassaavoq taakkua ‘paarsisuulluartuunerat qasusuillutillu nalunaajaasarnerat ajoqersuisarnerallu’, tanitaanerat pissutaanani. (1 Tim 5:17) Tanitat nersorpallaarlugillu soqutigivallaarutsigit peqqusiileqilersissavavut. Ajornerussagaluarporlu makitasuunngornerannik kinguneqarpat. (Rom 12:3) Kinaluunniit Kristusip qatanngutaasa tanitat ilaata taamatut ingasattumik kukkuneranut pisoorusunngilaq! – Luk 17:2.
Eqqaaniaanermi timiusartorlunilu viinnisortoq qanoq pissusilersorfigissaviuk? (Immikkoortut 9-11 takukkit)
10. Kristumiut tanitat ataqqillugit qanoq ersersissinnaavarput?
10 Jehovamit tanitaasut ataqqillugit qanoq ersersissinnaavarput? Qanoq taninneqarsimasut aperissanngilavut. Tamanna allat susassarinngimmassuk uagut paasisassarinngilarput. (1 Th 4:11; 2 Th 3:11) Aamma isumaqalissanngilagut tanitap uia nulialuunniit, angajoqqaavi ilaqutaalu allat aamma tanitaasut. Neriuut ilaquttanit kingornussaanngilaq. (1 Th 2:12) Allat ajuallaatigisaannik apeqquteqarnaveersaassaagut. Assersuutigalugu tanitap nulia aperissanngilarput uimi naassaanngitsumik nunameeqatiginnginnissaa pillugu qanoq misiginersoq. Upperilluinnarsinnaavarpummi silarsuartaassami Jehovap ‘pinngortitat tamaasa kissaatigisaannik qaarsillartittassagai’. – Tuss 145:16.
11. Ingasattumik nuannaartorinninnaveersaarneq qanoq illersuutaava?
11 Tanitat allanit pingaarnerusutut pinngikkutsigit imminut illersussaagut. Qanoq? Biibilimi allassimavoq ilagiinni ‘qatanngutaasuusaartoqarsinnaasoq’ immaqa tanitaanerartunik. (Gal 2:4, 5; 1 Joh 2:19) Aamma tanitat ilaat aalajaakkunnaarsinnaapput. (Matt 25:10-12; 2 Petr 2:20, 21) Qatanngutit tanitaagaluarpata, ilisimaneqarluaraluarpata ukiorpassuarniluunniit aalajaallutik Jehovamut kiffartorsimagaluarpata ingasattumik nuannaartorivallaassanngilavut. Aalajaakkunnaassagaluarpatami Jehova upperiunnaassanngilarput kiffartorfigiunnaarnagulu. – 1 Kor 3:4, 5.
QASSIUNERI ISUMAKULUUTIGISSAVARPUT?
12, 13. Sooq eqqaaniaanermi timiusartorlutillu viinnisortut qassiuneri isumakuluutigissanngilarput?
12 Eqqaaniaanermi timiusartorlutillu viinnisortartut ukiorpassuarni ikiliartorsimapput. Ukiunili kingullerni ukiut tamaasa amerleriartarsimapput. Sooq tamanna isumakuluutigisariaqannginneripput misissoriartigu.
13 “Naalakkap pigisani ilisimavai.” (2 Tim 2:19) Qatanngutit angutit eqqaaniaanermi timiusartorlutillu viinnisortunik kisitsisut naluaat kikkut ilumut tanitaanersut, Jehovalli nalunngilaa. Taamaattumik timiusartorlutillu viinnisortunut kisinneqartunut ilaapput kukkullutik tanitaasorisut. Assersuutigalugu timiusartortarlutillu viinnisortarsimasut ilaat taamaaliortarunnaarput. Allat isumakkut misigissutsikkullu ajornartorsiuteqarlutik isumaqarsinnaapput Kristusi qilammi naalakkersueqatigissallugu. Erseqqippoq tanitat nunami kinguleruttut qasserpiaanersut oqaatigisinnaanngikkipput.
14. Annikilliornartorsuaq aallartippat tanitanik nunamiittoqarnissaa pillugu Biibilimi qanoq allassimava?
Matt 24:31) Aamma Biibilimit erserpoq ulluni kingullerni tanitat nunarsuarmi ‘amiakkoqarumaartut’. (Saqq 12:17, 1936) Allassimanngilarli annikilliornartorsuaq aallartippat qassit suli nunamiissanersut.
14 Jiisusi tanitat qilammut katersussallugit tikiuppat nunarpassuarni tanitaqassaaq. Biibilimi allassimaneratut Jiisusip “inngilini aallartissavai nipituumik qarlortartoqartillugu, taakkualu katersussavaat taassuma qinigai nunarsuup sammiviinit sisamanit qilaap isuaniit isuanut”. (15, 16. 144.000-t Jehovap toqqagai pillugit suna paasisariaqarparput?
15 Jehovap aalajangertarpaa qaqugukkut tanitanik toqqaassanerluni. (Rom 8:28-30) Jiisusip toqusunit makititaanerata kingorna toqqaasalerpoq. Ukiuni qulikkuutaani tulliuttuni kristumiut ilumoortut tamarmik tanitaasimagunarput. Tamatuma kingorna ukiuni hundredelikkuutaani kristumiuunerartut amerlanerit Kristusimik malinninngillat. Taamaakkaluartoq ukiuni taakkunani kristumiut ilumoortut ikittunnguit Jehovamit taninneqarput. Jiisusip qajuusiassanut naasupiluit akornanni naasunut assersuuppai. (Matt 13:24-30) Ulluni kingullerni Jehovap 144.000-nut ilaasussanik toqqartuinini ingerlatiinnarpaa. [2] Guuti naggatissaq nalliutiliivissoq toqqaaniarluni aalajangerpat eqqortuliornera apeqqusinngilluinnassavarput. (Es 45:9; Dan 4:32; Romamiut 9:11, 16 atuakkit). [3] Naalakkamik nalunaaquttap-akunnerani kingullermi sulilersunik qanoq pinninneranik naammagittaalliuutiginnittutut innginnissarput mianersuutigisariaqarparput. – Matthæusi 20:8-15 atuakkit.
16 Qilaliarnissamik neriugisallit ilaannaat ‘inussiamut aalajaallunilu silatuumut’ ilaapput’. (Matt 24:45-47, NW) Ukiuni hundredeni siullernisulli ullumikkut Jehovap Jiisusillu inuit ikittunnguit atorlugit inuppassuit nerisittarpaat, tassa ilinniartittarpaat. Ukiuni hundredeni siullerni kristumiut tanitat ikittuinnaat Kristumiut Allagaataannik Grækerisuunik allatsinneqarput. Aamma ullumikkut kristumiut tanitat ikittuinnaat Guutip innuttaanik “piffissaq eqqorlugu” anersaakkut nerisitsinissaq akisussaaffigaat.
17. Allaaserisamit matumannga suut ilikkarpigit?
17 Allaaserisamit matumannga suut ilikkarpavut? Jehovap aalajangerpaa innuttami amerlanersaat nunami naassaanngitsumik inuussasut Jiisusimillu naalakkersueqateqartussat qilaliassasut. Jehovap kiffani tamaasa, “Judakkuusoq” aamma ‘angutit qulit’, akissarsisissavai, taakkualu tamaasa assigiinnik inatsiseqartillugillu aalajaattuassasut peqqullugit. Tamarmik maniguuttuassapput. Tamarmik Jehovamik kiffartorfiginnillutillu ataasiussuseqassapput. Ilagiinnilu eqqisseqatigiinneq tamarmik sulissutigissavaat. Naggatissaq qanilliartortillugu tamatta Jehovap kiffartorfigiuarnissaa savaatitullu ataatsitut Kristusip malittuarnissaa aalajangiusimatigu.
^ [1] (immikkoortoq 3) Tussiaat 87:5, 6 naapertorlugit imaassinnaavoq Jiisusip naalakkersueqataasa aqqi Guutip siunissami ilisimaneqalersikkai. – Rom 8:19.
^ [2] (immikkoortoq 15) Apustilit Suliaat 2:33 naapertorlugu tanitanngortoqartarneranut Jiisusi akuusaraluartoq qaaqqusisoq tassaavoq Jehova.
^ [3] (immikkoortoq 15) Paasisaqarnerorusukkuit Napasuliaq Alapernaarsuiffik februaarip aallaqqaataat 2008-moortoq, qupp. 23-24, imm. 13-16 takukkit.