ATUAQQISSAAGASSAQ 1
“Erseqinak, uangaagama illit Guutit”
“Siooraqinak ilagigakkit, erseqinak, uangaagama illit Guutit. Nakussatsippakkit ikiorlutillu.” – ES 41:10.
ERINARSUUT 7 Jehova, nakuussuterput
QILANAARTUUT *
1-2. (a) Esaja 41:10-mi allassimasut qatanngummut arnamut Yoshikomik atilimmut qanoq sunniuteqarpat? (b) Tusarliussap tamatuma kikkut iluaqutissaattut Jehovap allatsippaa?
QATANNGUT arnaq kristumiu aalajaatsoq Yoshikomik atilik nuanninngitsumik tusarlerneqarpoq. Nakorsaminit oqarfigineqarpoq inuuffissani qaammatialuinnanngortut. Qanoq qisuariarpa? Yoshikop Biibilimi allassimaffik nuannarisani, Esaja 41:10, eqqaavaa. (Atuaruk). Taava eqqissisimalluni nakorsaminut oqarpoq ernumanani, Jehovammi tasiormani. * Versimi allassimasut tuppallernartut qatanngutitta Jehovamik tatiginnilluinnarnissaminut iluaqutigai. Allassimaffik taanna sakkortuunik misilinneqaraluarluta eqqissisimaannarnissamut aamma uagut iluaqutigisinnaavarput. Qanoq taamaaliussanerluta paasiumallugu sooq Guutip Esaja taamatut tusarleraa misissoriartigu.
2 Aallaqqaammut juutit Babylonimut aallarussaasussat tuppallersarniarlugit Jehovap Esaja tamatuminnga allatsippaa. Aamma juutit aallarussaaqqasut kisiisa pinnagit taamanerniilli innuttani tamaasa pillugit tusarliussaq allatsippaa. (Es 40:8; Rom 15:4) Maanna ‘ullut atugarliungaarfiit’ inuuffigivavut, Esajallu allagaani tuppallersaatit aatsaat taama pisariaqartitsigivavut. – 2 Tim 3:1.
3. (a) 2019-imi ukiumut allassimaffik, Esaja 41:10, sunik neriorsuuteqarpa? (b) Sooq taamatut neriorsoqqissaarneqarnissarput pisariaqartipparput?
3 Allaaserisami matumani Jehovap neriorsuutai pingasut uppernikkut nakussatsinnartut Esaja 41:10-mi allassimasut sammissavavut: (1) Jehovap najussavaatigut, (2) Guutigaarput aamma (3) ikiussavaatigut. Yoshikotut inuunitsinni misilinneqartaratta taamatut neriorsoqqissaarneqarnissarput * pisariaqartipparput. Aamma silarsuarmi pisunit tatineqartarpugut. Ilavut allaat naalakkersuisunit pissaanilinnit malersugaapput. Neriorsuutit taakku pingasut ataasiakkaarlugit maanna misissoriartigit.
“ILAGIGAKKIT”
4. (a) Neriorsuut siulleq suna sammissavarput? (Quppernerup ataani ilanngussaq aamma takuuk). (b) Jehovap uagutsinnut misigissutsini qanoq ersersippai? (c) Guutip oqaasii qanoq misigilissutigaagit?
4 Jehovap siullermik imatut neriorsoqqissaarpaatigut: “Siooraqinak ilagigakkit.” * Uagutsinnik soqutiginninnermigut isumassuinermigullu Jehovap najorluta ersersippaa. Isumaginninnerminik misigissuseqangaarnerminillu qanoq ersersitsinera maluginiaruk. “Uanga isinni erlinnaravit”, oqarpoq Jehova. “Ataqqisaangaarlutit, asagakkillu.” (Es 43:4) Qilammi nunamilu suulluunniit Jehova kiffartortiminut asannikkunnaartissinnaanngilaa; uagutsinnut ilumoorfiginninnera patajalernavianngilaq. (Es 54:10) Asanninnera ikinngutaaneralu sapiissuseqalissutigaarput. Illersussavaatigut, soorlu ikinngutini Abrami (Aaperaat) illersoraa. Jehovap oqarfigaa: “Siooranak Abrami, uanga tassaavunga eqqortinnaveeqqutit.” – 1 Mos 15:1.
Jehovap ikiuineratigut misilinneqarnerit kuussuartut innertullu ittut anigorsinnaavavut (Immikkoortut 5 aamma 6 takukkit) *
5-6. (a) Misilinneqarnitsinni Jehovap ikiuinissamut soqutiginninnera qanoq nalunngilarput? (b) Yoshikop maligassiaanit suna ilikkarparput?
5 Nalunngilarput nammineq misilinneqarnitsinni Jehova ikiuinissaminut soqutiginnittoq, innuttanimi ima neriorsorpai: “Imertigut ingerlaguit ilagissavakkit, kuussuartigut ingerlaguit sarfaanneqassanngilatit. Innikkut ingerlaguit uutissanngilaatit, naaralaarneratalu ikuallatsissanngilaatit.” (Es 43:2) Oqaatsit taakku qanoq isumaqarpat?
6 Inuunitsinni unamminiarnartut peerniarlugit Jehova neriorsuinngilaq, ajornartorsiutinilli ‘kuussuartut’ ittunit ipitinneqarnissarput misilinneqarnerillu ‘innertut’ ittut Es 41:13) Yoshiko, aallaqqaataani eqqaaneqartoq, tamatuma ilumoornera paasivaa. Pania oqaluttuarpoq: “Anaanatta qanoq eqqissisimatiginera ajasoorutigaarput. Ilumut Jehovap qamuuna eqqissisimatikkaa takusinnaavarput. Toqussi tikillugu anaana peqqissaasunut napparsimasunullu allanut Jehova neriorsuutaalu pillugit oqaluttuartarpoq.” Yoshikop maligassiaanit suna ilikkarparput? Guutip ‘ilaginninnissaminik’ neriorsuutaa tatigigutsigu misilinneqartilluta uaguttaaq sapiillutalu nukittusinnaavugut.
naassaanngitsumik ajoqusiinissaat akuerinavianngilaa. Neriorsuivoq najorumaarluta, unamminiarnartukkut ‘ingerlanitsinni’ ikiorumaarluta. Jehova qanoq iliussava? Assuarnaassinnaaniassagatta annilaangajunnaarsissavaatigut, allaat toqusussanngoraluaruttaluunniit. (“UANGAAGAMA ILLIT GUUTIT”
7-8. (a) Neriorsuutit aappaat sammisassarput suua, qanorlu isumaqarpa? (b) Sooq Jehovap juutit aallarussaaqqasut ‘erseqqunagit’ oqarfigai? (c) Esaja 46:3, 4-mi allaqqasut sooq Guutip innuttaasa toqqississutigisimassavaat?
7 Esajap allagaani neriorsuutit aappaat maluginiaruk: “Erseqinak, uangaagama illit Guutit.” Ersineq pillugu allassimasoq qanoq isumaqarami? Allassimaffimmi oqaaseq “ersineq”-mik nutserneqartoq “aarlerinartoq pillugu ilimasulluni sanimut qiviaqattaarneq”-mik imaluunniit “navianartorsiortilluni paatsiveerunneq”-mik isumaqarpoq.
8 Juutit Babylonimi aallarussaaqqasut sooq Jehovap ‘erseqqunagit’ oqarfigai? Nunami tassani najugallit ersilernissaat Jehovap nalunnginnamiuk. Sooq ersilissappat? Juutit ukiut 70-it aallarussaaqqanerisa naajartulernerani Babyloni Medo-Persiap sakkutuuinit pissarsuarnit saassunneqartussaavoq. Sakkutuut taakku atorlugit Jehovap innuttani Babylonimi tigusaaqqanermit aniguisissavai. (Es 41:2-4) Babylonimiut inuiaallu allat akerartik takkutilersoq paasigamikku imminnut sapiillisinniarsaripput oqarfigalutik: “Nikalloqinak!” Aamma illersorneqarnissartik neriuutigalugu allanik guutilialiorput. (Es 41:5-7) Jehovalli juutit aallarussaaqqasut eqqissisarlugit oqarfigereersimavai: ‘Israeli illit [allat pinnagit] kiffara’ “erseqinak, uangaagama illit Guutit.” (Es 41:8-10) Maluginiaruk Jehova oqarmat: “Uangaagama illit Guutit.” Taama oqarnermigut Jehovap pallorfiginnitsiminik aalajaatsunik puiuisimannginnerminik eqqissisarpai – suli Guutigaat, sulilu taassumannga innuttarineqarput. Oqarfigai: “Kissumiassavassi isumannanngitsumullu pisillusilu.” Qularnanngilaq juutit aallarussaaqqasut oqaatsit taakku nakussatsissutigigaat. – Esaja 46:3, 4 atuakkit.
9-10. Sooq ernumasariaqanngilagut? Assersuuteqarit.
9 Silarsuarmi pissutsit ajorsiartuinnarnerat aatsaat taama inuit ernumalissutigaat. Soorunami aamma uagut ajornartorsiutinit nalaanneqartarpugut. Ersisariaqanngilagulli. Jehovap oqarfigaatigut: “Uangaagama illit Guutit.” Sooq taama oqarnera eqqissisimaannarnissamut pissutissaalluarpa?
10 Assersuut una eqqarsaatigiuk: Ilaasut marluk, Maasi Brianilu, timmisartorlutik anorersuarsiulerput. Timmisartoq aalalersorlu højtalerikkut nipi ima tutsiuppoq: “Aquttorsiuna. Erseqinasi. Qitequtisi ikkusimaannarallarsigit. Suli aalalaassaagut.” Maasi ernumangaalerpoq ileqimisaartorlunilu oqarluni: “Qanoq tamanna eqqississutaassagami?” Malugivaali sanimini Brian ernumarpasinngivittoq.
Aperaa: “Sooq taama eqqissisimatigaat?” Brian qungujulluni akivoq: “Aquttoq nalunngilluinnarpara. Ataatagaana!” Taava Brian nangippoq: “Maanna ataataga pillugu oqaluttuutilaarallarlakkit. Qularinngilara inuttaa pisinnaasaalu ilisimagukkit aamma illit eqqissisimassasutit.”11. Ilaasunik marlunnik assersuusiaq qanoq ilinniarfigisinnaavarput?
11 Assersuummit tamatumannga suna ilinniarsinnaavarput? Brianitulli Ataatarput qilammiusoq, Jehova, ilisimalluaratsigu eqqissisimaannarpugut. Nalunngilarput ullussani kingullerni anorersuartut ittunik ajornartorsiortilluta isumannaatsumut siulersorumaaraatigut. (Es 35:4) Inuppassuit ernumasut uagut Jehova tatigigatsigu eqqissisimaannarsinnaavugut. (Es 30:15) Aamma Brianitut inoqativut Guutimik tatiginninnissamut pissutaasut pillugit oqaluttuussinnaavavut. Aamma taakku isumalluarsinnaaniassapput qanorluunniit unamminiagaqartillutik Jehovap tapersersorumaaraatik.
“NAKUSSATSIPPAKKIT IKIORLUTILLU”
12. (a) Neriorsuutit pingajuat suna sammissavarput? (b) Jehovap ‘taliata’ innersuunneqarnera sumik eqqaasitsissutigaarput?
12 Esajap allagaani neriorsuutit pingajuat eqqarsaatigiuk: “Nakussatsippakkit ikiorlutillu.” Jehovap innuttaminik nakussatsitsinissaa Esajap nassuiareernikuuaa oqarluni: “Guuti Naalagaq aggerpoq pissarsuulluni, taliminik naalakkersuivoq.” (Es 40:10) ‘Taleq’ Biibilimi eqqaaneqaraangat pissaanermut assersuusiarineqarnerusarpoq. Taamaammat oqaatsit ‘taliminik naalakkersuinera’ Jehovap pissaanilissuartut kunngiuneranik eqqaasitsissutigaarput. Pissaanini nalissaqanngitsoq atorlugu itsaq innuttani tapersersorlugillu illersortarpai, aamma nalitsinni tatiginnitsini nakussatsillugillu illersortuarpai. – 5 Mos 1:30, 31; Es 43:10.
Sakkoq sunaluunniit Jehovap talianut nukittuumut illersuisartumut atorsinnaassuseqanngilaq (Immikkoortut 12-16 takukkit) *
13. (a) Pingaartumik qaqugukkut Jehovap nakussatsitsinissaminik neriorsuutini eqqortittarpaa? (b) Neriorsuut suna nukissaqalissutigalugulu isumallualissutigaarput?
13 Pingaartumik akerlilersuisunit malersugaatilluta Jehovap neriorsuutini eqqortittarpaa: “Nakussatsippakkit.” Nunat ilaanni oqaluussisarnerput peqatigiiffippulluunniit akerlilersuisutta inerteqqutiginiarsaraat. Taamaaliortoqaraluartorluunniit saassunneqarnerput ingasattumik ernumassutiginngilarput. Jehovap neriorsuutaa nukissaqalissutigalugulu isumallualissutigaarput. Neriorsuivoq: “Sakkut ilinnut sakkuaatissatut saffiukkat atorsinnaassuseqassanngillat.” (Es 54:17) Oqaatsit taakkua pingasunik pingaarutilinnik eqqaasitsissutigaavut.
14. Sooq Guutip akeraanit saassutsikkaangatta tupaallaatigineq ajorparput?
14 Siullertut, Kristusip ajoqersugaasut, uumigineqarnissarput naatsorsuutigaarput. (Matt 10:22) Jiisusip ajoqersukkani siulittuiffigai ullussani kingullerni sakkortuumik malersugaajumaartut. (Matt 24:9; Joh 15:20) Aappaattut, Esajap siulittuutaanit mianersoqquneqarpugut akerlilersortitta uumigiinnarata sakkut assigiinngitsut uagutsinnut atorumaaraat. Sakkut taakkua ilagaat salloqittaaneq sakkortuumilluunniit akerlilersuineq. (Matt 5:11) Akerlilersortivut sorsukkunnaartinniarlugit sakkunik taakkuninnga atuinissaannik Jehovap unitsinnavianngilai. (Ef 6:12; Saqq 12:17) Ersisariaqanngilagulli. Sooq?
15-16. (a) Eqqaamasassatta pingajuat suua, Esaja 25:4, 5-imilu tamanna qanoq erseqqissarneqarpa? (b) Uagutsinnik akerlilersuisut qanoq pineqarumaarnerat Esaja 41:11, 12-imi qanoq nassuiarneqarpa?
15 Eqqaamasassatta pingajuat eqqarsaatigiuk. Jehova oqarpoq uagutsinnut ‘sakkugineqartut atorsinnaassuseqassanngitsut’. Soorlu qarmaq anorersuarluni sialussuarmit illersuutigisaripput Jehovap ‘nakuusertut Esaja 25:4, 5 atuakkit). Akeraasut ataavartussamik ajoqusiinngisaannassapput. – Es 65:17.
kamannerannit’ illersussavaatigut. (16 Jehovap tatiginninneruleqqulluta uagutsinnik “kamaassisut” qanoq pineqarnissaannik sukumiisumik nassuiarpaa. (Esaja 41:11, 12 atuakkit). Akeraasut qanorluunniit saassussigaluarpata sorsunnerlu qanorluunniit sakkortutigileraluarpat kingunera taamaaginnassaaq: Guutip innuttaanut akeraasut tamarmik “nungussapput suujunnaarsitaallutik”.
QANOQ JEHOVAMUT TATIGINNINNERULERSINNAASUGUT
Jehova pillugu Biibilimi atuartarnikkut taassuminnga tatiginninnerulersinnaavugut (Immikkoortut 17 aamma 18 takukkit) *
17-18. (a) Biibilimik atuartarneq qanoq Guutimik tatiginninnerulissutigisinnaavarput? Assersuuteqarit. (b) 2019-imi ukiumut allassimaffiup eqqarsaatigeqqissaarnera qanoq iluaqutigisinnaavarput?
17 Jehova ilisarisimanerulerneratigut tatiginerulertarparput. Aatsaat Biibilimik atuaqqissaarnikkut atuakkattalu eqqarsaatigeqqissaarnerisigut Guuti ilisarisimallualersinnaavarput. Itsaq Jehova innuttaminik qanoq illersuisarsimanersoq Biibilimi tutsuiginartunik allassimasoqarpoq. Maanna qanoq isumassuiumaarneranik taakku isumallualissutigaavut.
18 Jehovap uagutsinnik illersuisarneranik assersuusiaq Esajap allagaaniittoq eqqarsaatigiuk. Jehova savanik paarsisutut kiffaalu savanut assersuuppai. Jehova pillugu Esaja allappoq: “Savaatini paarsisutut paarai, talerminik katersorpai; savaaqqat pakkuppai.” (Es 40:11) Jehovap taliinit nukittuunit pakkunneqartutut misigigaangatta illersorneqartutut toqqissisimasutullu misigisarpugut. Ajornartorsiuteqaraluarluta eqqissisimaannarnissamut iluaqutissarput inussiap aalajaallunilu silatuup 2019-imut ukiumut allassimaffittut Esaja 41:10 toqqarpaa: “Erseqinak, uangaagama illit Guutit.” Oqaatsit taakku tuppallernartut eqqarsaatigikkit. Siunissami unamminiagassannut nakussatsissutigissavatit.
ERINARSUUT 38 Nakussatsissavaatit
^ imm. 5 Silarsuarmi inuunitsinniluunniit ajortunik pisoqaraluarpat qanoq eqqissisimaannarsinnaanitsinnik pissutissat pingasut 2019-imi ukiumut allassimaffimmi eqqaaneqarput. Allaaserisami pissutissat taakku sammineqarneri ernumajunnaarnissamut Jehovamillu tatiginninnerulernissamut iluaqutigissavavut. Ukiumut allassimaffik eqqarsaatigeqqissaaruk. Ajornanngippat alanngaarsinnaaleruk. Siunissami unamminiagassannut nakussatsissutigissavat.
^ imm. 3 NASSUIAAT: Neriorsueqqissaarneq ilumoorullugu naqissusiineruvoq pinngitsoorani pisussatut neriorsuinerulluni. Inuunitsinni ajornartorsiuteqalerutta Jehovap neriorsuutai ernumavallaarunnaarnissamut iluaqutigisinnaavavut.
^ imm. 4 Oqaaseq “Siooraqinak” Esaja 41:10, 13 aamma 14-imi pingasoriarluni allassimavoq. Versini taakkunani Jehova imminut innersuuttarpoq. Sooq Jehovap Esaja isumassarsisillugu taama allatsippaa? Ilumoortoq pingaarutilik erseqqissarniarlugu – Jehovamik taamaallaat tatiginninnitsigut ernumajunnaarsinnaavugut.
^ imm. 52 ASSIMI MALUGISASSAT: Suliffimmi, peqqissutsikkut, oqaluussinermi atuarfimmilu ilaqutariit misilinneqartut.
^ imm. 54 ASSIMI MALUGISASSAT: Angerlarsimaffimmi ataatsimiinneq politiinit pakasaalluni isaaffigineqartoq, qatanngutilli uippallinngillat.
^ imm. 56 ASSIMI MALUGISASSAT: Ilaqutariittut atuaqqissaaqatigiittarneq pinertusaarnissamut nakussatsissutigisarparput.