ATUAQQISSAAGASSAQ 4
Unnukkorsiortitsineq Kunngerput pillugu qanoq ilinniarfigigipput
“Tassa timiga. ... Tassa aaga, angerutsip aava.” – MATT 26:26-28.
ERINARSUUT 16 Ernera tanitaq pillugu Jehova unnersiutigisiuk
QILANAARTUUT *
1-2. (a) Sooq naatsorsuutigisinnaavarput Jiisusip toqunermi persuarsiunngitsumik eqqaaniarneqartarnissaa isumagissagaa? (b) Jiisusip pissusii suut eqqartussavavut?
KRISTUSIP toquneranik ukiumoortumik eqqaaniaanermi pisartut oqaluttuarisinnaavigit? Qularnanngitsumik Naalakkap unnukkorsiortitsinerani immikkuualuttortat tunngaviusut amerlanersatta eqqaamavaat. Sooq? Unnukkorsiortitsineq pisariunngimmat. Pisorli pingaaruteqarpoq. Taamaattumik immaqa aperisinnaavugut: ‘Unnukkorsiortitsineq sooq taama pisariitsigaa?
2 Jiisusi nunarsuarmi kiffartornermini persuarsiunngitsumik, ersarissumik paasiuminartumillu sallusuissutinik pingaarutilinnik ilinniartitsisartutut ilisimaneqarpoq. (Matt 7:28, 29) Taamatuttaaq persuarsiunngitsumik isumaqarluartumilli toqunerminik eqqaaniaasarnissarput * isumagaa. Eqqaaniaalluni unnukkorsiortitsineq Jiisusillu oqaasiisa iliuusiisalu ilaat eqqartussavavut. Jiisusi qanoq maniguutsigalunilu sapiitsigalunilu asannitsigisoq qanorlu ilaarluarnerusinnaallutigu paasilluarnerussavarput.
JIISUSI MANIGUUPPOQ
Eqqaaniaanermi timiusamik viinnimillu assersuutit Jiisusip uagut pilluta toquneranik maannalu qilammi Kunngisut naalakkersuineranik eqqaasitsissutigaavut (Immikkoortut 3-5 takukkit)
3. Matthæusi 26:26-28 allaatigineqartutut eqqaaniaalluni unnukkorsiorneq Jiisusip pilersitaa qanoq pisariitsigaa, illussallu pingaarnerit sumut assersuutaappat?
3 Jiisusip toqunerminik eqqaaniaaneq apustilini aqqanillit najuutsillugit aallartippaa. Poorskimi unnukkiorsiornermi sinneruttut tigoriarlugit persuarsiunngitsumik eqqaaniaaneq aallartippaa. Matthæusi 26:26-28 atuakkit). Timiusaq seernarsaateqanngitsoq viinnilu nerrivimmiittut taamaallaat atorpai. Jiisusip apustilini oqarfigai illussat pingaarnerit taakkua timiminut aamminullu naammalluinnartumut, apustilini sinnerlugit qanittukkut pilliutigisassaminut, assersuutaasut. Apustilit unnukkorsiortitsinerup nutaap persuarsiortuunnginnera immaqa tupaallaatiginngilaat. Sooq?
(4. Jiisusip Marthamut siusinnerusukkut siunnersuutaa eqqaaniaalluni unnukkorsiortitsinermik pisariitsuutitsineranut pissutaasumik paasinninnissamut qanoq iluaqutigaarput?
4 Qaammatit arlalialuit tamatuma siorna, Jiisusip kiffartornermi ukiut pingajussaanni, ikinngutigilluakkaminut – Lazarusimut, Marthamut Mariamullu – pulaarami pisut eqqarsaatigikkit. Eqqissisimaartillutik Jiisusi ajoqersuilerpoq. Martha najuuppoq, pulaartuminilli ataqqisaminik nerersuartitsinissaminik piareersaanini puussaarutigaa. Jiisusip tamanna takugamiuk Martha amerlasuunik nerisassiornissap ilaannikkut pisariaqarneq ajorneranik paasinninnissaanut ikiorlugu inussiarnersumik naqqippaa. (Luk 10:40-42) Kingusinnerusukkut Jiisusip pilliutitut toqunissani nalunaaquttap-akunnialui sioqqullugit nammineq siunnersuutini malippaa. Eqqaaniaalluni unnukkiorsiortitsineq pisariitsuutippaa. Tamatumannga Jiisusi pillugu suna paasivarput?
5. Unnukkorsiutinit pisariunngitsunit Jiisusi pillugu suna ersersinneqarpa, tamannalu Filippimiut 2:5, 7, 8 qanoq naapertuuppa?
5 Jiisusi oqaatsikkut iliuutsikkullu tamatigut maniguuttarpoq. Taamaattumik nunarsuarmi inuunermini ullormi kingullermi maniguunnerujussuarmik ersersitsinera tupinnanngilaq. (Matt 11:29) Nalunngilaa inuiaat oqaluttuarisaaneranni annerpaamik pilliuteqassalluni Jehovallu qilammi kunngisut makitikkumaaraani. Taamaakkaluartoq toqunermi persuarsiortumik eqqaaniarneqarnissaanik piumasaqarnermigut pisariaqanngitsumik maluginiaqqunngilaq. Ajoqersukkanili oqarfigai ukiumut ataasiarlutik persuarsiunngitsumik unnukkorsiornikkut eqqaaniartassagaanni. (Joh 13:15; 1 Kor 11:23-25) Unnukkorsiutinit pisariunngitsunit naleqquttunillu ersersinneqarpoq Jiisusi makitasuujunngitsoq. Maniguunneq Kunngitta qilammiusup pissusiisa nuannersut ilagimmassuk nuannaarutigaarput. – Filippimiut 2:5, 7, 8 atuakkit.
6. Misilinneqarnermi Jiisusip maniguunnera qanoq ilaarsinnaavarput?
6 Jiisusip maniguunnera qanoq ilaarsinnaavarput? Nammineq iluaqutissarput pinnagu allat iluaqutissaat salliunnerisigut. Fil 2:3, 4) Jiisusip nunarsuarmi inuunerani unnuk kingulleq eqqarsaatigeqqiguk. Jiisusip nalunngilaa naalliulluni toqungajalerluni, apustilinili aalajaatsut, toqunerminik aliasuutiginnittussat, isumakuluutigingaarpai. Taamaattumik unnummi kingullermi ilitsersorlugillu qiimmassarlugillu tuppallersarpai. (Joh 14:25-31) Jiisusip maniguulluni ersersippaa allat atugarissaarnissaat isumakuluutiginerullugu. Uagutsinnut maligassaalluangaarami!
(JIISUSI SAPIIPPOQ
7. Naalakkap unnukkorsiortitsinera Jiisusip pilerseqqammerlugu sapiissuseqangaarnini qanoq ersersippaa?
7 Naalakkap unnukkorsiortitsinera Jiisusip pilerseqqammerlugu sapiissuseqangaarnini ersersippaa. Qanoq? Ataatami imminut piumasaa akueraa, naak nalunngikkaluarlugu taamaalioruni Guutimik mitaatilliisutut kanngunartumik pinerluttuliorneq pillugu toqutaasussaalluni. (Matt 26:65, 66; Luk 22:41, 42) Jehovap aqqa ataqqiumallugu, Guutip kisimi oqartussaanera tapersersorumallugu inuillu peqqissimisut naassaanngitsumik inuuneqalernissamut periarfissikkumallugit Jiisusi aalajaalluinnarpoq. Tamatuma saniatigut Jiisusip ajoqersukkani qanittukkut pisussanut piareersarpai.
8. (a) Jiisusip apustilini aalajaatsut qanoq oqarfigai? (b) Jiisusip toqunerata kingorna ajoqersukkat taassuma sapiinnermik maligassiaa qanoq ilaarpaat?
8 Jiisusi aamma annilaanganini eqqarsaatiginagu apustilimi aalajaatsut pisariaqartitaasa eqqarsaatiginerisigut sapiissusermik ersersitsivoq. Persuarsiunngitsumik unnukkorsiorneq, Judasi anisereerlugu pilersitaa, iluaqutigalugu ajoqersugaasa tanitanngortussat Jiisusip aavata kuineqarnerata iluaqutissartaanik angerusisaamullu ilaasinnaanerminnik eqqaasitsissutigissavaat. (1 Kor 10:16, 17) Qilammut qaaqquneqarnermut qinngaqqunnannginnerminnik uppernarsaanissamut ikiorniarlugit Jiisusip ajoqersukkani nammineq Ataatamilu taakkununnga piumasaminnik oqaluttuuppai. (Joh 15:12-15) Jiisusip apustilini aamma qanoq misilinneqartarumaarnerannik oqaluttuuteriarlugit immisut sapiitsooqqullugit kajumissaarpai. (Joh 16:1-4a, 33) Ukiorpassuit qaangiummata ajoqersukkat Jiisusip imminut pilliutigeriaannaanermik maligassiaa sapiillutik ilaarpaat. Assigiinngitsutigut misilinneqarnermi tapersersoqatigiipput, naak tamanna pillugu naalliuttariaqaraluarlutik. – Hebr 10:33, 34.
9. Jiisusi sapiissusermut tunngatillugu qanoq ilaarsinnaavarput?
9 Aamma ullumikkut Jiisusip sapiinnermik maligassiaa ilaarparput. Assersuutigalugu qatanngutivut uppernertik pillugu malersorneqartut ikiorumallugit sapiittariaqarpugut. Ilaannikkut qatanngutivut immaqa naapertuilluanngitsumik parnaarussaasarput. Taama pisoqarpat sapinngisatsinnik ikiortariaqarpavut, aamma illersorlugit oqaluttariaqarpugut. (Fil 1:14; Hebr 13:19) Aamma ‘nakimanata’ oqaluussinikkut sapiissusermik ersersitsisinnaavugut. (ApS 14:3) Jiisusitut inunnit akerlilersorneqaraluarutta malersorneqaraluaruttaluunniit Naalagaaffimmik tusarliussap oqaluussissutiginissaa aalajangiusimavarput. Ilaannikkut immaqa sapiinnerusariaqarluta paasisarparput. Qanoq iliorsinnaavugut?
10. Eqqaaniaaneq sapaatit-akunneri sioqqullugit susariaqarpugut, aamma sooq?
10 Kristusip utertitsissutitut pilliutaata uagutsinnik neriuuteqalersitsinerata eqqarsaatigineratigut sapiinnerulersinnaavugut. (Joh 3:16; Ef 1:7) Eqqaaniaaneq sapaatit-akunneri sioqqullugit utertitsissutip qujamasuutiginerulernissaanut immikkut periarfissaqarpugut. Piffissami tamatumani Biibilimi eqqaaniaanermut tunngasut atuartakkit ataqqinnillutillu Jiisusip toquneranut atatillugu pisut eqqarsaatigeqqissaartarlugit. Taamaaliorutta Naalakkap unnukkorsiortitsinerani katersuukkutta eqqaaniaanermi assersuutit pingaaruteqassusiat pilliummullu asseqanngitsumut takussutissaanerat paasilluarnerulissavarput. Uagut pilluta Jiisusip Jehovallu iliuusii qujamasuutigigutsigit paasillugulu qanoq nammineq asasattalu iluaqutigigaat neriuutitsinnik upperinninnerput nukittunerulissallunilu naggatissamut sapiilluta pinertusaarnissamut kajumissuseqarnerulissaagut. – Hebr 12:3.
11-12. Maannamut suut sammereerpavut?
11 Maannamut sammereerparput Naalakkap unnukkorsiortitsineranit pilliutip naleqangaarneranik eqqaasinneqaannarnata aamma Jiisusip imaannaanngitsumik maniguunneranik sapiinneranillu eqqaasinneqarnerput. Jiisusip qilammi Palasiunertut annaanneqarnissatsinnik qinnussisartutut suli taamatut pissuseqarnera qujamasuutigingaarsinnaavarput! (Hebr 7:24, 25) Qamannga pisumik qujamasunnerput ersersinniarlugu ilumoorfiginnilluta Jiisusip peqqusineratut toqunera eqqaaniartariaqarparput. (Luk 22:19, 20) Taamaaliortarpugut ullormi nisanip 14-iannut naapertuuttumi, ukiumi ullormi pingaarnerpaami.
12 Naalakkap persuarsiunngitsumik unnukkorsiortitsinera Jiisusip pissuseq uagut pilluta toqunissamut kajumississutaa pillugu ilikkagaqarsinnaavugut. Nunarsuarmi inuunermini pissuseq taanna ilisimaneqaatigaa. Qanoq pissuseqarami?
JIISUSI ASANNIPPOQ
13. Jehovap Jiisusillu asannittuliornerat Johannesi 15:9-mi aamma Johannesip allagai siulliit 4:8-10 qanoq allaatigineqarpa, taakkualu asanninnerat kikkut iluaqutigaat?
13 Jehovap uagutsinnik asanningaarnera Jiisusip iliuutsimigut tamatigut ersersilluartarpaa. (Johannesi 15:9; 1 Johannesi 4:8-10 atuakkit). Pingaarnertut, Jiisusi uagut pilluta inuunerminik pilliuteqarnissamut uummammit pisumik kajumissuseqarpoq. Tanitaagutta imaluunniit ‘savanut allanut’ ilaagutta pilliut taanna aqqutigalugu Jehovap Erneratalu uagutsinnik asanninnerminnik ersersitsinerat iluaqutigaarput. (Joh 10:16; 1 Joh 2:2) Aamma eqqaaniaalluni unnukkorsiornermi atorneqartut eqqarsaatigikkit, taakkunannga Jiisusip ajoqersukkaminik asanninnera isumassuineralu ersersinneqarpoq. Qanoq?
Jiisusip asannilluni eqqaaniaaneq nunarpassuarni pissutsinilu assigiinngitsuni nalliussineqarsinnaasoq pilersippaa (Immikkoortut 14-16 takukkit) *
14. Jiisusip ajoqersukkaminik asanninnini qanoq ersersippaa?
14 Jiisusip pisariusumik ileqqulersuummik pilersitsinani persuarsiunngitsumik unnukkorsiorluni eqqaaniaasarnissamik pilersitsinermigut ajoqersukkaminik anersaakkut tanitanik asanninnini ersersippaa. Piffissap ingerlanerani ajoqersukkat tanitat taakku ukiut tamaasa pissutsini assigiinngitsuni, aamma parnaarussaaqqanerminni, eqqaaniaasariaqarsimapput. (Saqq 2:10) Jiisusi naalassinnaavaat? Aap!
15-16. Ilaasa pissutsini sapernartuni Naalakkap unnukkorsiortitsinera qanoq nalliussisimavaat?
15 Taamanimiilli kristumiut ilumoortut Jiisusip toqunera eqqaaniarniarlugu sapinngisaminnik iliuuseqartarput. Naalakkap unnukkorsiortitsinerani periuseq sapinngisaminnik, ilaannikkut pissutsini unamminiarnartuni, malittarpaat. Assersuutit uku maluginiakkit. Kinami qatanngut Harold King parnaarussivimmi immikkoortinneqarnermini periarfissarsiortariaqarpoq. Isertorluni pigisani atorlugit eqqaaniaanermi assersuutit piareersarpai. Aamma ullormi sorlermi eqqaaniaasoqassasoq sapinngisaminik naatsorsorpaa. Eqqaaniaanissamut piffissanngormat parnaarussivimmi ineeqqami kisimiilluni erinarsorpoq, qinuvoq Biibililu tunngavigalugu oqalugiarluni.
16 Aamma allamik assersuuteqariarta. Qatanngutit arnat arlallit sorsunnersuarmi kingullermi tigusanut inissiarsuarmi parnaarussaaqqanerminni Naalakkap unnukkorsiortitsinera nalliussiniarlugu inuunertik navianartorsiortippaat. Pisumili atorneqartussat nalinginnaangaarmata isertorlutik eqqaaniaasinnaapput.
Ima nalunaarusiorput: “Tummarfik qaqortumik qalileriarlugu assersuutillu tassunga ileriarlugit kaajallallugu immitsinnut qanillivugut. Paasisaaqinagatta qulleq qamillugu naneruut qaammaqqutigaarput. ... Nukivut tamakkerlugit Ataatatta atianik illernartumik ataqqinarsisitsinissamik neriorsuuterput oqaatigeqqipparput.” Upperluangaaramik! Jiisusip pissutsini sapernartuni eqqaaniaasinnaanerput qulakkeeramiuk asannittuliorfigaatigut!17. Imminut qanoq aperisinnaavugut?
17 Eqqaaniaanissaq qanilliartortillugu pitsaassaaq imminut ima aperigutta: ‘Asannittuliornermut tunngatillugu Jiisusi qanoq ilaarluarnerusinnaavara? Nammineq pisariaqartitakka pinnagit uppeqatima pisariaqartitaat eqqarsaatiginerusarpakka? Qatanngutikka sapinngisaat sipporlugit piumasaqarfigisarpakka, imaluunniit pisinnaasaasa killeqarnerat eqqumaffigaara?’ Qanortoq Jiisusi ilaarlugu ‘misiginneqataanermik’ ersersitsiuarisa. – 1 Petr 3:8.
ILINNIAGASSAT TAAKKUA EQQAAMAJUAKKIT
18-19. (a) Suna qularinngissinnaavarput? (b) Sunissat aalajangiusimaviuk?
18 Kristusip toquneranik eqqaaniaasarnissamik piumasaqaat atuukkunnaangajalerpoq. Jiisusip annikilliornartussarsuarmi ‘tikiukkuni’ ‘qinikkani’ kinguleruttut qilammut katersussavai, eqqaaniaanerlu nalliussineqartarunnaassaaq. – 1 Kor 11:26; Matt 24:31.
19 Eqqaaniaalluni unnukkorsiorneq nalliussineqartariaarukkaluartoq qularinngissinnaavarput Jehovap innuttaasa persuarsiunngitsumik unnukkorsiorneq inuup maniguunnermik, sapiinnermik asanninnermillu ersersitsinerisa annerpaartaat nuannaarlutik eqqaamajuassagaat. Taamanikkussamut immikkut ittumik unnukkorsiortitsinermi najuussimasut qularnanngitsumik siunissami inuusut iluaqutiginiassammassuk oqaluttuarisassavaat. Unnukkorsiortitsinerli maannangaaq iluaqutigiumallugu Jiisusip maniguunnerata, sapiinnerata asanninneratalu ilaarnissaat aalajangiusimasariaqarparput. Taamaaliorutta Jehovamit akissarsisinneqarnissarput qularinngissinnaavarput. – 2 Petr 1:10, 11.
ERINARSUUT 20 Ernerit asasat tunissutigaat
^ imm. 5 Qanittukkut Jiisusip Kristusip toqunera eqqaaniarniarlugu Naalakkap unnukkorsiortitsinerani najuutissaagut. Persuarsiunngitsumik unnukkorsiortitsinermit Jiisusip maniguunnera, sapiinnera asanninneralu pillugit ilikkagaqangaarpugut. Allaaserisami matumani pissusii erlinnartut qanoq ilaarsinnaagivut eqqartussavarput.
^ imm. 2 NASSUIAAT: Eqqaaniaaneq tassaavoq pisoq inulluunniit pingaarutilik eqqaamaniarlugu ataqqiniarlugulu immikkut aaqqissuussaq.
^ imm. 56 ASSIMI MALUGISASSAT: Kiffat aalajaatsut kristumiut siulliit ilagiivini; 1800-kkut naalerneranni; Nazistit tigusanut inissiarsuini; nalitsinni Amerikami Kujallermi nunami kiattumi kusassagarujussuunngitsumi iigaqanngitsumi naalagaaffilersaarfimmi eqqaaniaasut assilialiarineqarnerat.