1. Kun­ngip Daavip aperineratut qanoq apererusus­sin­naavugut?

TAMAT­TA eq­qis­sisimanar­tumik inoorusup­pugut. Kinaluun­niim­mi isumakuluuteqarusun­ngilaq. Ilaan­nik­kul­li isumakuluuteqangaar­tar­pugut. Taamaat­tumik Jehovap kif­faasa ilaat kun­ngip Daavip Jehovamut aperineratut im­maqa ima aperis­sap­put: “Qanoq sivisutigisumik isumak­kut eq­qis­siviil­lius­sanerama ul­lul­lu tamaasa uum­matin­ni isumakulut­tuarlunga?” – Tuss 13:3.

2. Al­laaserisami matumani suut sam­mis­savagut?

² Tamat­ta ilaan­nik­kut isumakuluuteqar­tar­pugut, iliuuseqarsin­naavugul­li isumakulup­pal­laarumanata. Al­laaserisami matumani sam­meq­qaas­savar­put isumakuluutaasar­tut ilaat. Taava ajor­nar­torsioraluarluta eq­qis­sisimaan­naq­qul­luta iliuuserisin­naasagut arfinil­lit sam­mis­savagut.

3. Suut isumakuluutigisin­naavagut, tamak­kulu iliuuseqarfigineqarsin­naap­pat?

³ Isumakuluutigisat­ta ilaat iliuuseqarfigival­laarsin­naan­ngilagut. As­sersuutigalugu nerisas­sat, atisat ineqar­niar­nerlu ukiut tamaasa akitsoriar­tor­nerat sun­niuteqarfigisin­naan­ngilar­put; aam­ma suleqatit­ta atuaqatit­taluun­niit qanoq akulikitsigisumik un­neq­qaserlutsin­nias­saneraatigut kinguaas­siuutitigul­luuniit inuunerlutsin­nias­saneraatigut aqus­sin­naan­ngilar­put. Aam­ma najugaqarfitsin­ni pinerlut­tulior­naveersaar­titsisin­naan­ngilagut.  Tamak­ku ajor­nar­torsiutigisar­pagut inuit Biibilimut naaper­tuutin­ngitsumik eq­qarsar­taasil­lit akor­nan­ni inuugat­ta. Saatanip, silarsuup matuma guutiata, nalun­ngilaa ‘silarsuarmi matumani isumakuluutit’ pis­sutigalugit inuit ilaat Jehovamut kif­far­torusus­san­ngitsut. (Matt 13:22; 1 Joh 5:19) Taamaat­tumik silarsuarmi isumakulun­nar­tor­pas­suaqarmat tupaal­laatigin­ngilar­put!

4. Isumakuluuteqar­pal­laaraangat­ta susoqarsin­naava?

⁴ Ilaan­nik­kut ajor­nar­torsiutit isumakuluutigingaaratsigit taak­ku kisiiviisa eq­qarsaatigisarsin­naavagut. As­sersuutigalugu isumakuluutigisin­naavagut pisariaqar­titagut akis­saqar­tin­nerlugit, soraarsitaas­sanerluta imaluun­niit nap­parsimalis­sagaluarut­ta sulisin­naajun­naas­sanerluta. Aam­ma us­ser­nar­torsior­nermi Guutip inatsisaanik unioq­qutitsisuus­sanerluta isumakuluutigisin­naavar­put. Qanit­tuk­kut Saatanip inuit sun­ner­tak­kani Guutip in­nut­taanik saas­sus­sitis­savai, taamaat­tumik saas­sus­sinermut tamatumun­nga qanoq qisuarias­sanerluta isumakuluutigisin­naavar­put. Im­maqa ima eq­qarsar­pugut: ‘Tamak­kunin­nga isumakuluuteqar­nera kuk­kunerua?’

5. Jiisusip suna pivaa ima oqarami: “Inuunersi isumakuluutigeqinasiuk”?

⁵ Nalun­ngilar­put Jiisusip ajoqersuk­kani ima oqarfigigai: “Inuunersi isumakuluutigeqinasiuk.” (Matt 6:25) Taman­na isumaqar­pa sumil­luun­niit isumakuluuteqas­san­ngitsugut? Naamerluin­naq! Itsaq Jehovap kif­fai aalajaatsut ilaat aam­ma isumakuluuteqar­tar­put, taamaat­torli Jehovamit ajorineqar­neq ajor­put. * (1 Kng 19:4; Tuss 6:4) Jiisusip oqimaaqatigiis­saarisumik ilin­niar­tip­paatigut. Kis­saatigin­ngilaa inuunermi pisariaqar­titagut tun­ngaviusut isumakuluutigival­laarlugit Jehovamut kif­far­tor­ner­put pingaar­ner­paatik­kun­naas­sagip­put. Isumakuluk­kaangat­ta misigis­sutsigut aqun­niarlugit susin­naavugut? – Ungalusaq “Qanoq taamaaliorsin­naasutit” takuuk.

6. Filip­pimiut 4:6, 7-ilu naaper­torlugit suna toq­qis­sial­laatigisin­naavar­put?

⁶ (1) Qinukulasarit. Kristumiut ajor­nar­torsiutimin­nik isumakuluuteqar­tut Jehovamut qinuneq toq­qis­sial­laatigisin­naavaat. (1 Petr 5:7) Qin­nutivit akis­sutaat­tut ‘eq­qis­sineq Guutimit pisoq inuit siuneqas­susian­nit tamanit an­nerungaar­toq’ misigisin­naavat. (Filippimiut 4:6, 7 atuakkit). Isumakuluk­kaangavit Jehovap anersaani il­ler­nar­toq atorlugu eq­qis­sisit­tas­savaatit. – Gal 5:22.

7. Guutimut qinugaangat­ta suut eq­qaamasariaqar­pagut?

⁷ Jehovamut qinugaangavit misigis­sutsitit tamaasa oqalut­tuarisak­kit. Suna ajor­nar­torsiutaanersoq qanorlu misiginerlutit nas­suiaagit. Aaq­qiis­sutis­saqarsin­naap­pat taman­na paasiumal­lugu ilisimas­suseqaq­qul­lutit iliuuseqar­nis­samul­lu nukis­saqaq­qul­lutit qinusarit. Ajor­nar­torsiut iliuuseqarfigisin­naan­ngik­kuk­ku isumakulup­pal­laaleq­qunak Jehovamut ikioq­qugit. Qanor­piaq ikior­neqarusun­nersutit qin­nutin­ni ilan­nguk­kaangak­ku Jehovap qanoq akisaraatit paasil­luar­nerulis­savat. Qin­nutit ingerlaan­naq akineqan­ngip­pat qinujuarit. Sunar­piaq perusun­nerlugu oqaatigis­sagit Jehovap kis­saatigiin­nar­nagu qinunin­ni qasusuis­sasutit kis­saatigaa. – Luk 11:8-10.

8. Qin­nutitsin­nut suut aam­ma ilan­ngut­tas­savagut?

 ⁸ Isumakuluutitit Jehovamut aniatik­kaangak­kit qujaniutit ilan­ngut­tak­kit. Ajor­nar­torsiuter­pas­suaqaraluaraangat­taluun­niit nuan­naarutigisin­naasat­ta eq­qarsaatiginis­saat iluaqutigis­savar­put. Misigis­sutsitit oqaaser­talersin­naan­ngik­kuk­kit eq­qaamajuk Jehovap aam­ma qin­nutit naatsut akisarai, al­laal­lumi ima oqaan­narsin­naavutit: “Ikiun­nga!” – 2 Nal 18:31; Rom 8:26.

9. Siooragaangat­ta susas­saagut?

⁹ (2) Nammineq ilisimas­sutsit pinnagu Jehovap ilisimas­susia tatigiuk. Kr.in.si. 700-kkun­ni Judak­kut As­syriamiunit saas­sun­neqas­sasoralutik sioorap­put. As­syriamiunit naalak­kersor­neqarusun­ngin­namik Egyptenimiunut ikioq­qup­put. (Es 30:1, 2) Jehovali oqar­poq Egyptenimiunik tatigin­nin­nerat kingunipiloqas­sasoq. (Es 30:7, 12, 13) Esaja aq­qutigalugu Jehovap oqarfigai qanoq piviusumik toq­qis­sisimalersin­naasut. Ima oqar­poq: “Utaq­qil­luaan­narlusilu tatigigus­singa taman­na nakuus­sutigis­savarsi.” – Es 30:15b, Testamentitoqaq.

10. Pis­sutsini qanoq it­tuni Jehovamut tatigin­nin­nerit ersersit­tariaqalersin­naaviuk?

¹⁰ Jehovamik tatigin­nin­ner­put qanoq ersersis­sin­naavar­put? As­sersuuteqariar­ta. Takorlooruk akis­sarsiaris­saarfiunerusumik Jehovamul­li kif­far­tor­nin­nut akor­nutaaler­tus­samik sulif­fit­taar­nis­san­nik neqeroorfigitit­tutit. Imaluun­niit sulif­fin­ni Guutimut kif­far­tun­ngitsumit qanin­niarujoorfigineqar­tutit. Imaluun­niit ilaqut­tavit asasavit ilaan­nit ima qinigas­sin­neqar­tutit: “Uanga imaluun­niit Guutit?” Taak­kua arlaan­naal­luun­niit misigigaluaruk­ku pingaarutilim­mik aalajangigas­saqaler­putit, Jehoval­li pisariaqar­tumik siulersorumaar­paatit. (Matt 6:33; 10:37; 1 Kor 7:39) Una apeq­qutaagin­nar­poq: Jehova tatigil­luin­narlugu siun­nersuutaa maleruarusus­saviuk?

11. Akerlilersor­neqar­nitsin­ni eq­qis­sisimaan­narsin­naaq­qul­luta oqalut­tuat Biibilimeersut suut atuaq­qis­saarsin­naavagut?

¹¹ (3) Inuit Biibilimi oqalut­tuarineqartut ilin­niarfigikkit. Biibilimi Jehovamik tatigin­nin­nerup pingaaruteqas­susianik ersersitsisunik oqalut­tuar­pas­suaqar­poq. Taak­ku pil­lugit atuaq­qis­saaraangavit Guutip kif­fani malersor­neqangaar­tut qanoq ikior­tarai maluginiar­taruk. As­sersuutigalugu juutit eq­qar­tuus­sisoqatigiivisa pingaar­nersaan­nit apustilit oqaluus­siun­naaq­quneqaramik qunuler­natik ima oqar­put: “Guuti inun­nit naalat­tariaqar­neruvoq.” (ApS 5:29) Iperar­tor­neqareeraluaramil­luun­niit apustilit eq­qis­sisimaan­nar­put. Sooq? Nalun­ngin­namik­ku Jehovap nuan­naralutik ikius­sagaatsik. Taamaat­tumik nutaarsias­saq nuan­nersoq oqaluus­sis­sutigiuar­paat. (ApS 5:40-42) Aam­ma Stefanusi toqutaalerluni kiinaa eq­qis­sisimar­pasingaarami “soorlu tas­sa in­ngilip kiinaa”. (ApS 6:12-15) Sooq? Up­peril­luin­naramiuk Jehovamit iluarineqarluni.

12. Petrusip al­lagai siul­liit 3:14 aam­ma 4:14 naaper­torlugit sooq malersugaagaangat­ta nuan­naarsin­naavugut?

¹² Apustilit Jehovamit tupin­nar­tuliorsin­naatin­neqaramik taas­suman­nga najor­neqar­tar­ner­tik nalun­ngil­luin­nar­paat. (ApS 5:12-16; 6:8) Ul­lumik­kul­li Jehovap tupin­nar­tuliorsin­naatin­ngilaatigut. Naaper­tuil­luar­tulior­ner­put pis­sutigalugu naal­liuk­kaangat­ta Jehovap oqaatsini aq­qutigalugu asan­nil­luni qularun­naarsit­tar­paatigut iluaralutalu anersaaminik najorluta. (1 Petrusi 3:14; 4:14 atuakkit). Siunis­sami ingasat­tumik malersugaas­sagaluarut­ta qanoq qisuarias­sal­luta isumakuluutigis­san­ngilar­put. Jehovap ikiuisin­naaneranik aniguisitsisin­naaneranil­lu  up­perin­nin­ner­put maan­nak­kut ineriar­tor­tit­tariaqar­par­put. Kristumiut siul­liit up­perin­nin­nerat­tut Jiisusip neriorsuutaa una up­peril­luin­nas­savar­put: “Uangami oqaasis­sas­sin­nik ilisimas­susermil­lu tuniumaaras­si akeq­qas­si as­sor­torsin­naan­ngisaan­nik akiorsin­naan­ngisaan­nil­lu. ... Piner­tusaar­nis­sigut inuunersi pigit­tuin­nas­savarsi.” (Luk 21:12-19) Puiun­ngisaan­narul­lu Jehovap kif­fani aalajaal­lutik toqusut suminer­tan­ngui tamaasa eq­qaamagamigit toqusunit makitis­sin­naagai.

13. Siooralerlutik Jehovamik tatigin­nik­kun­naar­tut misigisaan­nik eq­qarsaatigin­nin­neq qanoq iluaqutigisin­naavar­put?

¹³ Aam­ma siooralerlutik Jehovamik tatigin­nik­kun­naar­tut ilin­niutigisin­naavagut. Taak­ku pil­lugit atuaq­qis­saarut­ta taak­kunatut kuk­kun­naveersaarsin­naavugut. Judami kun­ngi Asa as­sersuutigeriar­tigu. Kun­ngin­ngoq­qam­merluni sak­kutoor­pas­suar­nit saas­sun­neqalerami Jehovamik tatigin­nip­poq, Jehoval­lu ajugaasip­paa. (2 Nal 14:8-11) Kingusin­nerusuk­kul­li Israelimi kun­ngip Bashap sak­kutuuisa ikit­tuin­naat saas­sutilerman­ni Asap Jehova an­natsitsisimisut sior­natigutul­li tatiginagu Aramæerit akilerlugit ikior­tis­sarsiarai. (2 Nal 16:1-3) Aam­ma utoq­qalil­luni nap­parsimarujus­sualerami Jehovamut saaf­figin­nin­ngilaq. – 2 Nal 16:12.

14. Asap kuk­kus­sutai qanoq ilin­niutigisin­naavagut?

¹⁴ Asa ajor­nar­torsiuteqaleraangami aal­laq­qaam­mut Jehovamik tatigin­nit­tar­poq. Kingusin­nerusuk­kul­li Guutimut ikior­tis­sarsior­nani nam­mineerluni ajor­nar­torsiutini aaq­qin­niar­taler­pai. Israelimut sorsun­nermini Aramæerinut ikior­tis­sarsior­nera silatusaar­neror­pasik­kaluar­poq. Eq­qis­sisimanerli sivikitsuin­naavoq. Jehovap pruf­fiitini aq­qutigalugu ima oqarfigaa: “Aramip kun­ngia tatigigak­ku Naalagarlu Guutit tatiginagu Aramæerit sak­kutuui ilin­nit aniguip­put.” (2 Nal 16:7) Ajor­nar­torsiutigut aaq­qin­niarlugit iliuuseqaraangat­ta im­minut tatigival­laarluta Jehovap oqaatsimini siulersuinera suusupagis­san­ngilar­put. Aam­ma aalajangiipal­lat­tariaqaraangat­ta aalajangiitin­nata Jehovamut siun­nersoq­qaaq­qusas­saagut, taavalu eq­qor­tumik aalajangiinis­satsin­nut ikius­savaatigut.

15. Biibilimik atuaraangat­ta susin­naavugut?

¹⁵ (4) Allas­simaffiit eqqaamaniar­takkit. Biibilimik atuar­nin­ni al­las­simaf­fiit Jehovamik tatigin­nin­nerup pingaaruteqas­susianik ersersitsisut atuaraangak­kit eq­qaamaniar­tak­kit. Nipilim­mik atuar­tar­neq imaluun­niit atuaq­qit­taqat­taagas­sanik al­lat­tuineq im­maqa iluaqutigisin­naavat. Jehovap Josva peq­quaa inatsisit nipilim­mik atuar­tas­sagai silatusaar­tumik iliorsin­naaq­qul­lugu. Inatsisinik atuar­tar­nini siooraler­nani sapiil­lunili Guutip in­nut­taanik siulersuinis­saminut iluaqutigis­savaa. (Jos 1:8, 9) Il­lit­taaq Guutip oqaasiani al­las­simaf­fip­pas­suit pis­sutsini an­nilaangaf­fiusin­naasuni toq­qis­sisimaan­nar­nis­san­nut iluaqutigis­savatit. – Tuss 27:1-3; Uss 3:25, 26.

16. Jehovap im­minik tatigin­nis­sin­naaq­qul­luta ilagiit aq­qutigalugit qanoq ikior­tar­paatigut?

¹⁶ (5) Guutip innuttai peqatigisakkit. Jehovap im­minik tatigin­nis­sin­naaq­qul­luta qatan­ngutit aq­qutigalugit ikior­tar­paatigut. Ataatsimiin­ner­ni oqalugiaatit, akis­sutit qatan­ngutitsin­nil­lu ineriar­tor­nar­tumik oqaloqateqar­tar­nerit iluaqutigisar­pagut. (Hebr 10:24, 25) Isumakuluutigut pil­lugit ikin­ngutigut ilagiin­niit­tut oqaloqatigigaangatsigit qiim­maal­langaar­tar­pugut. Ikin­ngutip ‘qiim­mas­saal­luni oqaaserisai’ isumakulup­pal­laan­ngin­nis­satsin­nut iluaqutigisin­naavagut. – Uss 12:25.

17. Hebræerit 6:19 naaper­torlugu ajor­nar­torsioraangat­ta Guutip naalagaaf­fia pil­lugu neriuutit­ta qanoq toq­qis­sisimatis­sin­naavaatigut?

 ¹⁷ (6) Neriuutit upperilluin­naruk. Ajor­nar­torsioraangat­ta isumakuluuteqaraangat­taluun­niit Guutip naalagaaf­fia pil­lugu neriuutit­ta ‘tar­nimut kitsatut it­tup’ toq­qis­sisimatis­sin­naavaatigut. (Hebræerit 6:19 atuaruk). Jehovap siunis­saq isumakuluf­fiun­ngitsoq pil­lugu neriorsuutaa eq­qarsaatigeq­qis­saar­taruk. (Es 65:17) Paratiisimi ajor­tumik pisoqarfiun­ngitsumi inuunis­sat takorlooruk. (Mika 4:4) Neriuutit al­lanut oqalut­tuarigaangak­ku up­perineruler­tar­pat. Oqaluus­sinermi ajoqersugan­ngor­titsior­tor­nermilu sapin­ngisan­nik iliuuseqar­tarit. Taamaalior­taruit neriun­nerit ‘naggatis­saq tikil­lugu aalajangiuteq­qajuarsin­naavat’. – Hebr 3:14.

18. Siunis­sami qanoq pisoqarsin­naava, qanorlu iliuuseqarfigisin­naavar­put?

¹⁸ Silarsuup matuma naggatis­saa qanil­liar­tor­til­lugu isumakuluutigisin­naasatsin­nik suli amerlanerusunik ajor­nar­torsiuteqar­tarumaar­pugut. 2021-imi ukiumut al­las­simaf­fik ajor­nar­torsior­nitsin­ni im­minut tatigival­laaler­nata Jehovamik tatigin­nin­nis­satsin­nut iluaqutigisin­naavar­put. Ukiup ingerlanerani iliuutsitsigut ersersit­tar­tigu Jehovap neriorsuutaa una up­peralugu: “Utaq­qilluaan­narlusilu tatigigus­singa tamanna nakuus­sutigis­savarsi.” – Es 30:15, Testamentitoqaq.