1. Ilaqutariit akor­nan­ni inuit asan­niuitsuunerat nalitsin­ni qanoq erser­pa?

BIIBILIMI siulit­tuutigineqar­poq inuit ul­luni kingul­ler­ni tas­saalerumaar­tut “asan­niuitsut”. (2 Tim 3:1, 3) Siulit­tuut taan­na nalitsin­ni eq­quup­poq, aam­ma ilaqutariit akor­nan­ni. As­sersuutigalugu angajoq­qaat mil­lionil­lit avis­simap­put akerleriilerlutil­lu, tamatumalu kingunerisaanik meerar­pas­suit asaneqan­ngitsutut misigip­put. Aam­ma ilaqutariit al­lat najugaqatigiik­kaluarlutik im­min­nut qanit­tumik at­taveqatigiit­tan­ngil­lat. Ilaqutariin­nik siun­nersuisar­toq ima oqar­poq: “Anaanaq, ataataq meeq­qal­lu oqaloqatigiin­neq ajor­put, pif­fis­samil­lu an­nersaat ator­toris­saarutinut elektroniskiusunut spil­linul­lu ator­tar­paat. Najugaqatigiik­kaluarlutik im­min­nut ilisarisimar­pian­ngil­lat.”

2-3. (a) Romamiut 12:10 naaper­torlugu kik­kut asasariaqar­pagut? (b) Al­laaserisami matumani suut sam­mineqas­sap­pat?

² Uagut silarsuarmit asan­niuitsoqarfiusumit ilusilersor­tik­kusun­ngilagut. (Rom 12:2) Paarlat­tuanil­li timik­kut anersaak­kul­lu ilaqut­tagut asanerulerumal­lugit iliuuseqar­tuar­tariaqar­pugut. (Romamiut 12:10 atuaruk). Kristumioqatitsin­nut asan­nin­neq qanoq it­toq ineriar­tor­tis­savar­put? Ilaqutariit qanit­tumik at­taveqatigiit­tut asan­nin­nerat­tut it­toq. Anersaak­kut ilaqut­tagut taamatut asagutsigit  nuan­naarluta ataasioqatigalugit Jehovamut kif­far­toqatigisin­naas­savagut. – Mika 2:12.

³ Qatan­ngutigiit­tut asaqatigiin­ner­put ineriar­tor­tik­kumal­lugu maligas­siuisut Biibilimi al­laatigineqar­tut ilaat misis­soriar­tigit.

4. Jehovap asan­ningaar­nera Jaaku 5:11-mi qanoq ersersin­neqar­pa?

⁴ Jehovap pis­susii nuan­nersut Biibilimi al­laatigineqar­put. As­sersuutigalugu al­las­simavoq ‘Guuti tas­saasoq asan­nin­neq’. (1 Joh 4:8) Taman­na ilisimagatsigu Jehova qanil­lerusut­tar­par­put. Aam­mali Biibilimi nas­suiar­neqar­poq Jehova ‘nal­lit­tuingaar­tuusoq’. (Jaaku 5:11 atuaruk). Jehovap uagutsin­nut asan­ningaar­neranut takus­sutis­saal­luangaarami!

5. Jehova qanoq nal­lit­tuisar­pa, qanorlu ilaarsin­naavar­put?

⁵ Jehovap nal­lit­tuingaar­nera Jaaku 5:11-mi al­laatigineqar­toq kajungilis­sutigisar­par­put. (2 Mos 34:6) Jehovap kuk­kus­sutitsin­nik isumak­keerfigin­nin­nermigut nal­lit­tor­tar­paatigut. (Tuss 51:3) Biibilili naaper­torlugu nal­lit­tuineq tas­saagin­nan­ngilaq isumak­keerfigin­nin­neq. Kinaluun­niit nal­lit­tuisoq an­nikil­lior­tumik takusaqaraangami qaman­nga pisumik ikiuerusut­tar­poq. Taamatut­taaq Jehovap ikiorusut­tar­paatigut, al­laat anaanaasup meeq­qaminik ikiuerusun­neraniit an­nerusumik. (Es 49:15) Nal­lit­tuisuugami an­nikil­lior­nitsin­ni an­ner­toq­qusersor­tar­paatigut. (Tuss 37:39; 1 Kor 10:13) Imaas­sin­naavoq qatan­ngutitsin­nit pakatsisin­neqar­tugut, Jehovatul­li nal­lit­tuis­sagut­ta put­tarsinata isumak­keerfigisariaqar­par­put. (Ef 4:32) Aam­ma qatan­ngutitsin­nik ajor­nar­torsior­tunik ikiuinis­saq pingaaruteqar­poq. Asan­nin­ner­put kajumis­sis­sutigalugu nal­lit­tuigaangat­ta Jehova, kik­kun­nit tamanit asan­nin­ner­paaq, ilaar­tar­par­put. – Ef 5:1.

6. Jonatani Daavilu qatan­ngutigiit­tut qanoq asaqatigiip­pat?

⁶ Inuit naam­mal­luin­nan­ngitsut qatan­ngutigiit­tut asaqatigiin­neran­nik Biibilimi arlalin­nik oqalut­tuaqar­poq. Jonatani Daavilu as­sersuutigeriar­tigit. Biibilimi ima al­las­simasoqar­poq: “Jonatanip Daavi as­sut qanitarisutut misigisimavaa, im­misul­lu asatigiler­paa.” (1 Sam 18:2) Daavi Saulip kingor­na kun­ngin­ngor­tus­satut Jehovamit toq­qar­neqar­poq. Taman­na pis­sutigalugu Saulip Daavi sin­ngagingaaler­paa toqun­niaraluarlugulu. Er­neratali, Jonatanip, ataatani il­lersun­ngilaa. Jonatani Daavilu ikin­ngutigiit­tuar­niarlutik tapersersoqatigiit­tuar­niarlutil­lu neriorsoqatigiip­put. – 1 Sam 20:42.

7. Jonatanip Daavil­lu ikin­ngutigiiler­nis­saan­nut akor­nutaasin­naasut ilaat ataaseq suua?

⁷ Jonatanip Daavil­lu asaqatigiin­nerat maluginiar­nar­tuuvoq, ikin­ngutigiiler­nis­saan­num­mi akor­nutaasin­naasut amerlaqaat. Taak­kua ilagaat Jonatanip ukiut 30-t sin­nerlugit angajul­liunera. Eq­qarsarsimasin­naagaluar­poq im­minerminiit inuusun­nerusumik misilit­tagakin­nerusumil­lu taama qanitsigisumik ikin­nguteqarsin­naanani. Taamatul­li eq­qarsar­nani Daavi ataq­qivaa.

8. Sooq Jonatani Daavimut ikin­ngutaal­luarsoraajuk?

⁸ Kun­ngip Saulip er­neratut Jonatanip kun­ngin­ngor­tus­saanini aalajangiusimasin­naagaluar­paa Daavilu sin­ngagilerlugu. (1 Sam 20:31) Maniguul­lunili Jehovamut ilumoorfigin­nit­tuar­poq. Taamaat­tumik Jehovap kun­ngis­satut toq­qagaa tapersersor­paa. Aam­ma ataatami kamaatingaaraluaraani Daavi ilumoorfigaa. – 1 Sam 20:32-34.

9. Jonatanip Daavi unam­mil­ler­timisut isigivaa? Nas­suiaruk.

⁹ Jonatanip Daavi asangaaramiuk unam­mil­ler­timisut isigin­ngilaa. Jonatani sorsut­tar­tuuvoq sapiitsoq pisis­sil­laq­qis­sorlu. Ataatanilu ‘nat­toralin­nit suk­kanerusar­tutut løvinil­lu nakuunerusutut’ tusaamaneqar­put. (2 Sam 1:22, 23) Jonatanip sapiitsuliar­pas­suani tul­luusimaarutigisin­naagaluar­pai. Ajugaaniar­tuun­ngilarli sin­ngatuujunanilu. Paarlat­tuanik Daavip sapiitsuunera Jehovamil­lu tatigin­nin­nera Jonatanip nuan­naar­torivai. Daavi Goliatimik toqutsim­mat Jonatanip im­misut asangaaler­paa. Uagut­taaq qatan­ngutigut taamatut asasin­naavagut. Qanoq?

10. ‘Uum­matik­kut ilungersorluni asaqatigiin­neq’ qanoq paasisariaqar­pa?

¹⁰ Apustili Petrusi ima al­lap­poq: ‘Uum­matis­sigut ilungersorlusi asaqatigiigitsi.’ (1 Petr 1:22, tastamantitâĸ) Jehovap tamatumuuna maligas­sip­paatigut, ilumoorfigin­nitsinimi soraan­ngisaan­nar­tumik asavai. (Rom 8:38, 39) Uagut qatan­ngutitsin­nut asan­nin­nermik ersersitsinis­sar­put ajor­nakusoor­tis­sin­naasar­par­put. Ajual­latsin­neqaraangat­tali eq­qaamasariaqar­par­put ‘asaqatigiin­nik­kut im­mitsin­nut kamageqatigiit­tas­sasugut, eq­qis­sineq ataqatigiis­sutigalugu ilungersorlutalu aalajangiusimal­lugu anersaak­kut ataasius­suseq’. (Ef 4:1-3) ‘Eq­qis­sineq ataqatigiis­sutaasoq’ noq­qaas­sutigiuarutsigu qatan­ngutit­ta kuk­kus­sutaat isiginiar­nerunagit Jehovap qatan­ngutitsin­nut isigin­nit­taasia ilungersorluta ilaar­nias­savar­put. – 1 Sam 16:7; Tuss 130:3.

11. Sooq qatan­ngutigiit­tut asaqatigiin­nis­saq ilaan­nik­kut ajor­naatsuin­naasan­ngila?

 ¹¹ Qatan­ngutigiit­tut asaqatigiin­nis­saq ajor­naatsuin­naasan­ngilaq, ingam­mik qatan­ngutit­ta naam­mal­luin­nan­ngis­sutaat maluginiaraangatsigit. Taman­na kristumiut siul­liit ilaan­nut ajor­nar­torsiutaasimavoq. Euodia Syntykilu as­sersuutigisin­naavagut. Taak­kua Paulusi suleqatigalugu nutaarsias­saq nuan­nersoq ‘sorsuutigisin­naasimavaat’. Akun­nermin­nili isumaqatigiin­ngis­suteqarmata Paulusip “Naalak­kami isumaqatigeeq­qul­lugit” oqaaq­qis­saar­pai. – Fil 4:2, 3.

12. Qatan­ngutitsin­nut asan­nin­ner­put qanoq ineriar­tor­tis­sin­naavar­put?

¹² Qatan­ngutitsin­nut asan­nin­ner­put qanoq ineriar­tor­tis­sin­naavar­put? Ilisarisimaneruler­nerisigut, taamaalioraangat­tami misigin­neqatigineruler­tar­pagut. Ukioqatigul­li kisiisa qanimut ikin­ngutigilersin­naavagut? Naamik. Eq­qaamajuk Jonatanip ukiunik 30-nik angajul­liugaluarluni Daavi qanimut ikin­ngutigileraa. Il­lim­mi, ilin­nit utoq­qaanerusut inuusun­nerusul­luun­niit ikin­ngutigilersin­naavigit? Taamaalioruit ersersis­savat ‘qatan­ngutigiis­suit tamaasa asal­lugit’. – 1 Petr 2:17, NW.

13. Sooq ilagiin­niit­tut ilaat al­laniit qanin­nerusin­naavagut?

¹³ Tas­sa imaap­pa qatan­ngutigut asagutsigit tamaasa qanimut ikin­ngutigis­sagigut? Taman­na ajor­nar­poq. Soqutigisaqatigiin­neq pis­sutigalugu inuit ilaat al­laniit qanin­nerusumik ikin­ngutigisar­pagut. Aam­ma Jiisusimut taamaap­poq. Apustilini tamaasa ikin­ngutitut taagaluarlugit Johan­nesi im­mik­kut qanin­neruaa. (Joh 13:23; 15:15; 20:2) Taamaat­torli al­laniit ajun­ngin­nerusumik pineq ajor­paa. As­sersuutigalugu Johan­nesi qatan­ngutinilu Jaaku Guutip kun­ngeqarfiani, tas­sa naalagaaf­fiani, nuimasumik inis­sisimaf­feqalersin­naanerlutik aperim­mata Jiisusip ima akivai: “[Taler­pim­ma] tungaani saamim­malu tungaani is­sianis­samik uanga  aalajangiisus­saatitaan­ngilanga.” (Mark 10:35-40) Jiisusi ilaarlugu uagut­taaq qanimut ikin­ngutigut ajun­ngin­nerusumik pisas­san­ngilagut. (Jaak 2:3, 4) Taamaalior­nermi ilagiin­ni eq­qis­seqatigiin­nermut akor­nutaasin­naavoq. – Jud 17-19.

14. An­neruniuk­kumanata Filip­pimiut 2:3 qanoq iluaqutigisin­naavar­put?

¹⁴ Qatan­ngutigiit­tut asaqatigiik­kut­ta an­neruniut­tas­san­ngilagut. Jonatani ilaarsin­naavar­put, taas­sumami Daavi sin­ngagilin­ngilaa kun­ngius­sutsimil­lu arsaar­niarsarinagu. Taamatut­taaq qatan­ngutivit pigin­naasaat pil­lugit sin­ngaleqinak, ‘makitajuitsuunik­kul­li al­lat ilin­nit an­nerutik­kit’. (Filippimiut 2:3 atuaruk). Tamat­tami ilagiin­nut iluaqutaasunik iliuuseqarsin­naavugut. Maniguut­tuarut­ta qatan­ngutit­ta pis­susaat nuan­nersut maluginiarsin­naalis­savagut up­per­neral­lu ilin­niarfigalugu. – 1 Kor 12:21-25.

15. Tanyap ilaqutaasalu misigisaan­nit suna paasiviuk?

¹⁵ Nuan­niitsumik nalaataqaraangat­ta qatan­ngutit­ta asan­nit­tulior­nerat ikiuineral­lu aq­qutigalugit Jehovap tup­pal­lersar­tar­paatigut. Ilaqutariit pingasunik meeral­lit misigisaan­nit taman­na erser­poq. Taak­kua 2019-imi USA-mi ataatsimeersuar­neq nunanit tamalaanit peqataaf­figineqar­toq imalu qulequtalik: “Asan­nin­neq soraan­ngisaan­nas­saaq!” najuuf­figaat. Anaanaasoq, Tanya, ima oqalut­tuar­poq: “Biilinik hotelitsin­nukar­til­luta apor­tip­pugut. Ajoquser­toqan­ngilaq, tupaq­qaqalutali biiliniit aq­qusinermut niuvugut. Biiler­toq al­la aq­quser­nup sinaaniit us­sersorluni biiliminukaq­qusivoq  navianar­torsiun­ngin­nias­sagat­ta. Tikik­katsigu paasivar­put qatan­ngutit­ta ataatsimeersuaqataaq­qam­mersut ilagigaat. Taan­nali kisimi unin­ngilaq. Aam­ma ataatsimeersuariat Sverigemeersut tal­limat unip­put! Panigalu iluaal­laatigeqisatsin­nik qatan­ngutit­ta ar­nat eqitaar­paatigut. Ajor­navian­ngitsoq oqaraluar­tunga qatan­ngutit­ta qiman­ngilaatigut. Al­laat ambulancenik tak­kut­toqareeraluar­toq amigaateqan­ngin­ner­put qulak­keer­niarlugu najuin­naavip­paatigut. Taamatut nuan­niitsumik nalaataqar­nitsin­ni Jehovap asan­nin­nera misigaar­put. Pisoq taan­na qatan­ngutitsin­nut asan­nin­nerulis­sutigaar­put, Jehovamul­lu qujamasun­nerulerlutalu asan­nin­neruler­pugut.” Il­lit ikior­neqar­tariaqar­nin­ni qatan­ngutin­nit asan­nit­tuliorfigineqar­nikuuit?

16. Qatan­ngutigiit­tut asaqatigiin­nit­ta iluaqutis­sar­tai suup­pat?

¹⁶ Qatan­ngutigiit­tut asaqatigiin­nerup iluaqutis­sar­tai eq­qarsaatigik­kit. Qatan­ngutigut pisariaqar­titsiner­paaf­fian­ni tup­pal­lersar­tar­pagut. Guutip in­nut­taani ataasioqatigiin­neq nakus­satsit­tar­par­put. Takutit­tar­par­put Jiisusimut ajoqersugaal­luta, eq­qor­tuliorusut­tul­lu taman­na kajumis­sis­sutigalugu Jehova kif­far­torfigerusuler­tar­paat. Pingaar­ner­tul­lu, Jehova, “Ataataq nal­lit­tuisoq Guutilu tup­pal­lersaajuar­toq”, ataq­qinarsisit­tar­par­put. (2 Kor 1:3) Qanor­toq tamat­ta qatan­ngutigiit­tut asaqatigiin­neq ersersil­lugulu ineriar­tor­tit­tuarisigu!