1. 1935-mi ataatsimeersuar­nermi oqalugiaat angum­mut inuusut­tumut qanoq sun­niuteqar­pa?

AAP­PARIIT Biibilimik Atuaq­qis­saar­tar­tuusut – tas­sa Jehovamik Nalunaajaasuusut – pingasunik er­neqar­put marlun­nil­lu paneqarlutik. Qitor­natik Jehovamut kif­far­tor­nis­samik Jiisusimil­lu Kristusimik ilaarsinis­samik ilin­niar­tis­simavaat. Er­nerisa ilaat 18-inik ukioqarluni 1926-mi kuisip­poq, tas­sa imermut morsutsin­neqar­poq. Angut inuusut­toq taan­na, Biibilimik Atuaq­qis­saar­tar­tut tamarmik ilior­tar­nerat­tut, ukiut tamaasa Naalak­kap un­nuk­korsior­titsinerani timiusamik nerisarlunilu viin­nimik imer­tar­poq. Siunis­samul­li neriuutaa tamarmi al­lan­ngor­poq oqalugiaat “Inup­pas­suit”-mik qulequtalik pis­sutigalugu. Oqalugiaat taan­na J. F. Rutherfordip ataatsimeersuar­nermi 1935-mi Washington D.C.-mi USA-miit­tumi oqalugiaatigaa. Ataatsimeersuar­nermi tamatumani suna paasineqar­pa?

2. Qatan­ngutip Rutherfordip oqalugiaatimini pis­sanganar­toq suna nas­suiar­paa?

² Qatan­ngutip Rutherfordip oqalugiaatimini “inup­pas­suit” Saq­qum­mersitat 7:9-mi eq­qaaneqar­tut kik­kuunersut nas­suiar­paa. Ul­loq taan­na tikil­lugu isumaqarsimap­put “inup­pas­suit” taak­ku tas­saasut qilam­miit­tus­sat Jiisusili kun­ngioqatigis­san­ngik­kaat tanitatut aalajaatsigin­ngin­namik. Qatan­ngutip Rutherfordip Biibili tun­ngavigalugu nas­suiar­paa  “inup­pas­suit” taak­ku qilam­miit­tus­saan­ngitsut, tas­saanerar­paali Kristusip savaataanut al­lanut ilaasut * “an­nikil­lior­titaangaar­nermit” aniguil­lutik nunarsuarmi naas­saan­ngitsumik inuusus­sat. (Saqq 7:14) Jiisusi ima oqar­poq: “Aam­ma al­lanik savaateqar­punga ungalusami matumani in­ngitsunik; taak­kut­taaq siulersus­savak­ka, nipigalu tusas­savaat; tas­saalis­sap­pul­lu savaatit katersat ataatsit, paarsisoq ataaseq.” (Joh 10:16) Savat al­lat taak­ku tas­saap­put Jehovamik Nalunaajaasuusut aalajaatsut nunarsuarmi paratiisis­sami naas­saan­ngitsumik inuunis­samik neriugisal­lit. (Matt 25:31-33, 46) Anersaak­kut qaam­marsagaaneq taman­na Jehovap in­nut­taasa ilar­pas­suisa, ilaatigut angutip inuusut­tup, inuuneran­nik qanoq al­lan­nguisitsisoq sam­meriar­tigu. – Tuss 97:11; Uss 4:18.

3-4. 1935-mi ataatsimeersuar­nermi Nalunaajaasor­pas­suit suna paasivaat?

³ Ataatsimeersuar­nermi oqalugiar­tup tusar­naar­tut nunarsuarmi naas­saan­ngitsumik inuunis­samik neriugisal­lit tamaasa nikueq­qum­magit tiguar­tin­nar­poq. Najuut­tut ilaat naaper­torlugu tusar­naar­tut 20.000-t mis­saaniit­tut af­faat sin­nerlugit nikuip­put. Taava qatan­ngut Rutherford ima oqar­poq: “Takusigit! Taak­ku tas­saap­put ‘inup­pas­suit’!” Tusar­naar­tul­lu tamarmik nuan­naar­nermik suaar­taap­put. Nikorfasul­lu taak­kua paasivaat qilaliar­tus­saanatik. Aam­ma paasivaat Guutip anersaavanit tanin­neqarsimanatik. Aqaguani 840-t Nalunaajaasun­ngorlutik imermut morsutsin­neqar­put, taak­kualu amerlanersaat savanut al­lanut ilaap­put.

⁴ Oqalugiaatip tamatuma kingor­na inuusut­toq siusin­nerusuk­kut eq­qaaneqar­toq al­lar­pas­suil­lu Naalak­kap un­nuk­korsior­titsinerani timiusamik neris­saarlutil­lu viin­nimik imis­saar­put. Nalunaajaasor­pas­suit misigis­susii qatan­ngutip angutip maniguut­tuusup ima oqaatigai: “1935-mi eq­qaaniaanermi naggam­mik as­sersuutinik ilangeeqataavunga. Paasivara Jehovap anersaani il­ler­nar­toq aq­qutigalugu qilaliar­nis­samik neriuuteqar­tin­ngik­kaanga. Nunarsuarmili inuunis­samik paratiisin­ngor­titseqataanis­samil­lu neriuuteqar­punga.” (Rom 8:16, 17; 2 Kor 1:21, 22) Taamanik­kumiil­li “inup­pas­suit” amerliar­tuin­narsimasut tanitat kingulerut­tut suleqatigisarsimavaat. *

5. Eq­qaaniaanermi timiusamik neris­saarlutil­lu viin­nimik imis­saar­tut Jehovap qanoq misigis­suseqarfigai?

⁵ 1935-mi eq­qaaniaanerup kingor­na timiusamik neris­saarlutil­lu viin­nimik imis­saar­tut Jehovap qanoq misigis­suseqarfigai? Ul­lumik­kum­mi Nalunaajaasup imermut morsutsin­neqarsimasup Naalak­kap un­nuk­korsior­titsinerani timiusamik neril­lunilu viin­nimik imer­tarsimagaluar­tup kingusin­nerusuk­kut paasiguniuk tanitaanani? (1 Kor 11:28) Ilaat timiusamik nerisarsimal­lutil­lu viin­nimik imer­tarsimap­put neriuutimin­nut tun­ngatil­lugu paatsuugaqarsimagamik. Un­neq­qaril­lutil­li kuk­kus­suter­tik nas­suerutigigunik­ku, as­sersuutinik ilangeeqataasarun­naarunik aalajaal­lutil­lu Jehova kif­far­torfigiuarunik­ku qularis­san­ngilaat Jehovap savanut  al­lanut ilaasutut akueris­sagaatsik. Timiusamik nerin­ngik­kaluarlutik viin­nimil­lu imin­ngik­kaluarlutik eq­qaaniaanermi najuut­tar­put nam­mineq pil­lutik Jehovap Jiisusil­lu iliuuserisimasaat qujamasuutigingaaramik­kit.

6. Jiisusip in­ngilit qanoq peq­quai?

⁶ An­nikil­lior­nar­tus­sarsuaq nal­liutingajalermat Saq­qum­mersitat kapitali 7-imi kristumiut tanitat ‘inup­pas­suil­lu’ pil­lugit al­las­simasunik misis­suineq qiim­maal­laatigis­savar­put. Jiisusip in­ngilit peq­quai anorit sisamat ajoqusiisar­tut noqis­sagaat. Kristumiut tanitat tamarmik naqis­suser­neqareer­tin­nagit, tas­sa Jehovamit inaarutaasumik akuerineqareer­tin­nagit, anorit taak­ku iperas­san­ngilaat. (Saqq 7:1-4) Aalajaan­ner­tik akis­sarsis­sutigalugu tanitat Kristusi qilam­mi kun­ngioqatigalugulu palasioqatigis­savaat. (Saqq 20:6) Guutip ilaqutariis­sor­taasa qilam­miit­tut tamarmik tanitat 144.000-t qilam­mi akis­sarsisin­neqar­nerat nuan­naarutigingaas­savaat.

7. Saq­qum­mersitat 7:9, 10-milu Johan­nesip kik­kut takorruuisin­neqarluni takuai, taak­kulu sulerip­pat? (Saq­qaani as­siliaq takuuk).

⁷ Johan­nesip kun­ngiul­lutil­lu palasiusut 144.000-t takoreerlugit “inup­pas­suit” Harmagedonimit aniguisimasut takuai. Taak­ku 144.000-nit amerlanerungaar­put, amerlas­susiilu ilisimaneqan­ngilaq. (Saqqummersitat 7:9, 10 atuakkit). ‘Qaqor­tunik atisaqar­put’, taman­nalu isumaqar­poq Saatanip silarsuaanit ‘mingutsin­neqatsaalisimasut’ aam­ma Guutimut Kristusimul­lu aalajaat­tuarsimasut. (Jaak 1:27) Jehovap Jiisusil­lu, Guutip savaaraata, iliuuserisimasaat pis­sutigalugit an­naan­neqarsimaner­tik suaar­taatigaat. Palmit avalequtaan­nik tigumiar­put, taman­nalu isumaqar­poq Jiisusi Jehovap kun­ngin­ngor­titaatut akueralugulu nuan­naarutigigaat. – Naleq­qiuguk Johan­nesi 12:12, 13.

8. Saq­qum­mersitat 7:11, 12-imilu Jehovap ilaqutariis­sor­tai qilam­miit­tut qanoq al­laatigineqar­pat?

⁸ Saqqummersitat 7:11, 12 atuakkit. Taava takorruugaq naaper­torlugu qilam­mi susoqar­pa? Qilam­miit­tut tamarmiul­lutik “inup­pas­suit” takugamik­kit nuan­naangaarlutik Guuti un­nersiutigaat. Siunis­sami “inup­pas­suit” an­nikil­lior­nar­tus­sarsuarmit aniguip­pata Jehovap ilaqutariis­sor­tai qilam­miit­tut nuan­naangaas­sap­put.

9. Saq­qum­mersitat 7:13-15 naaper­torlugit “inup­pas­suit” maan­nak­kut sulerip­pat?

⁹ Saqqummersitat 7:13-15 atuakkit. Johan­nesi al­lap­poq “inup­pas­suit” taak­ku atisamin­nik “Savaaq­qap aavanut eq­qiaasimasut qaqor­titil­lugit”. Taman­na isumaqar­poq ilerasuuteqan­ngitsut Jehovamil­lu iluarisaasut. (Es 1:18) Kristumiuup­put tun­niul­luin­narsimal­lutil­lu imermut morsutsin­neqareersut, Jiisusip pil­liutaanik up­perin­nil­luar­tuup­put Jehovamul­lu qanit­tumik at­taveqarlutik. (Joh 3:36; 1 Petr 3:21) Taamaat­tumik Guutip is­siavis­saarsuata saavani qeqarsin­naap­put taan­nalu nunarsuarmi “kif­far­torfigalugu ul­luk­kut un­nuak­kul­lu”. Maan­nak­kut oqaluus­sinerup ajoqersugan­ngor­titsior­tor­nerul­lu an­ner­tunersaa aal­lus­sil­luarlutik suliaraat, Guutip naalagaaf­fianut at­tuumas­suteqar­tut inuunermin­ni pingaar­ner­paatil­lugit. – Matt 6:33; 24:14; 28:19, 20.

10. “Inup­pas­suit” suna qularutigin­ngilaat, neriorsuutil­lu suup eq­quun­nera misigis­savaat?

¹⁰ Inup­pas­suit an­nikil­lior­nar­tus­sarsuarmit aniguiumaar­tut Guutimit isumagineqarumaar­ner­tik qularutigin­ngilaat ‘is­siavis­saarsuarmi is­siasup tupini nap­parumaarmagu oq­qif­fis­saat­tut’. Neriorsuut savat al­lat qilanaarisimasaat una eq­quutis­saaq: ‘[Guutip]  qul­liit tamaasa isaan­nit al­lar­terumaar­pai, toqulu peeruk­kumaar­poq, aliasut­toqarun­naarlunilu nil­liasoqarun­naarlunilu an­niar­toqarun­naas­saaq.’ – Saqq 21:3, 4.

11-12. (a) Saq­qum­mersitat 7:16, 17-milu al­laatigineqar­tutut “inup­pas­suit” pil­luaq­qus­sutisias­sat suut qilanaarisin­naavaat? (b) Savat al­lat eq­qaaniaanermi susin­naap­pat, aam­ma sooq?

¹¹ Saqqummersitat 7:16, 17 atuakkit. Maan­nak­kut Jehovap in­nut­taasa ilaat kaat­tar­put aningaasaatikil­lior­ner­tik sorsun­nerluun­niit pis­sutigalugu. Al­lat up­per­ner­tik pis­sutigalugu par­naarus­saaq­qap­put. Inup­pas­suil­li taak­ku nuan­naar­put nalun­ngin­namik­ku silarsuaq ajor­toq man­na suujun­naarsin­neqareer­pat timik­kut anersaak­kul­lu naam­mat­torsuar­nik inuus­sutis­saqas­sal­lutik. Jehovap silarsuaq ajor­toq suujun­naarsik­kuniuk in­nut­tani ‘kiam­mit [kaman­nerminit] naal­liutsitaaq­qunagit’ il­lersus­savai. An­nikil­lior­nar­tus­sarsuaq qaangiup­pat Jiisusip aniguisut nunarsuarmiit­tut ‘puilasunut [naas­saan­ngitsumik] inuus­sutaasunut’ siulersus­savai. “Inup­pas­suit” neriuutaat nuan­ningaar­poq, ilaa? Taak­ku inun­nit kisiar­taal­lutik toqun­ngisaan­nas­sap­put! – Joh 11:26.

¹² Savat al­lat nuan­ningaar­tumik neriuuteqaramik Jehovamut Jiisusimul­lu qujamasungaar­put. Qilaliar­tus­saan­ngik­kaluar­tut Jehovap tanitanik asan­nin­nermisul­li asavai. Tanitat saval­lu al­lat tamarmik Guuti Kristusilu un­nersiutigisin­naavaat. Ilaatigut taamaaliorsin­naap­put Naalak­kap un­nuk­korsior­titsinerani najuut­tar­nik­kut.

13-14. Sooq tanitat kingulerut­tut saval­lu al­lat tamarmik Kristusip toquneranik eq­qaaniaanermi najuut­tas­sap­pat?

¹³ Eq­qaaniaanermi ataaseq timiusamik neril­lunilu viin­nimik imer­pat taamaaliun­ngitsut 1.000-t mis­saaniit­tar­put. Tas­sa nunarsuarmi ilagiit amerlanersaan­ni eq­qaaniaanermi timiusamik nerisoqar­tar­nanilu viin­nimik imer­toqar­tan­ngilaq. Tamatuman­nga erser­poq eq­qaaniaanermi najuut­tar­tut amerlanersaat nunarsuarmi inuunis­samik neriugisaqar­tut. Taavami sooq najuut­tar­pat? Katit­torsior­tunut as­sersuun­neqarsin­naap­put. Najuun­nermik­kut katerlaanik asan­nin­ner­tik ajun­ngitsumil­lu kis­saas­siner­tik ersersit­tar­paat. Taak­kunatul­li savat al­lat  eq­qaaniaanermi najuut­tar­put Kristusimik tanitanil­lu asan­nin­ner­tik ajun­ngitsumil­lu kis­saas­siner­tik ersersik­kusuk­kamik­ku. Aam­ma najuut­tar­put Jiisusip pil­liutaanik qujamasuutigin­nin­ner­tik ersersik­kusuk­kamik­ku, pil­lium­mi taman­na pis­sutigalugu nunarsuarmi naas­saan­ngitsumik inuusin­naap­put.

¹⁴ Savat al­lat eq­qaaniaanermi najuut­tar­neran­nut pis­sutaasoq pingaarutilik al­la tas­saavoq Jiisusip peq­qus­sutaa naalak­kusuk­kamik­ku. Naalak­kap un­nuk­korsior­titsinerani siul­ler­paami Jiisusip apustilini aalajaatsut ima oqarfigai: “Taamaalior­taritsi uanga eq­qaaniarlunga.” (1 Kor 11:23-26) Taamaat­tumik tanitat ilaan­nik nunarsuarmiit­toqar­til­lugu savat al­lat eq­qaaniaanermi najuut­tar­put. Aam­ma kik­kut tamaasa eq­qaaniaanermi najuuteq­qul­lugit qaaq­qusar­paat.

15. Eq­qaaniaanermi Guuti Kristusilu un­nersiutigiumal­lugit susin­naavugut?

¹⁵ Eq­qaaniaanermi erinarsor­nik­kut qinunik­kul­lu Guutimik Kristusimil­lu un­nersiutigin­nin­nis­samut periarfis­saqar­pugut. Ukioq man­na oqalugiaatigineqar­tus­saq ima qulequtaqar­poq: “Guutip Kristusil­lu il­lit pil­lutit iliuuserisimasaat qujamasuutigiuk!” Taman­na Jehovamut Kristusimul­lu qujamasun­nerulis­sutigis­savar­put. Timiusap viin­nil­lu ingerlaar­tin­neqar­neran­ni najuut­tuusugut Jiisusip timaanut aavanul­lu as­sersuutaanerat eq­qarsaatigis­savar­put. Uagut inuusin­naaq­qul­luta Jehovap er­nermi toqunis­saanik akuerin­nin­nera aam­ma eq­qarsaatigis­savar­put. (Matt 20:28) Ataatatsin­nik qilam­miusumik Er­neranil­lu asan­nit­tuusugut tamat­ta eq­qaaniaanermi najuuk­kusup­pugut.

16. Tanitat saval­lu al­lat sutigut as­sigiis­suteqar­pat?

¹⁶ Tanitat saval­lu al­lat Guutip isaani naligiip­put. Eqimat­tat arlaan­naal­luun­niit asanerun­ngilaa. Taman­na nalun­ngilar­put tanitat pisiariumal­lugit akiliutaa, tas­sa er­nermi asasami inuunera, atorlugu aam­ma savat al­lat pisiarim­magu. Eqimat­tat taak­ku as­sigiin­ngis­sutaat tas­saagin­nar­poq as­sigiin­ngitsunik neriuuteqar­nerat. Tamarmik Guutimut Kristusimul­lu aalajaat­tariaqar­put. (5 Mos 10:12) Eq­qaamajul­lu Guutip anersaava tamatsin­nut as­sigiim­mik sun­niuteqarsin­naasar­toq. Tas­sa Jehovap inuup pisariaqar­titaa naaper­torlugu anersaamik il­ler­nar­tumik tunisar­paa.

17. Tanitat kingulerut­tut suut qilanaaraat?

¹⁷ Kristumiut tanitat qilaliar­nis­samik neriuuter­tik inun­nguuserin­ngilaat. Guutimit taamatut neriuuteqalersin­neqar­put. Neriuuter­tik pil­lugu eq­qarsaatigin­nit­tarlutil­lu qinusar­put, aam­ma qilaliar­nis­sar­tik qilanaaraat. Anersaan­ngorunik qanoq it­tumik timeqaler­nis­sar­tik  takorloorsin­naan­ngilaal­luun­niit. (Fil 3:20, 21; 1 Joh 3:2) Taamaat­toq qilanaaraat Jehovap, Jiisusip, in­ngilit tanital­lu al­lat naapin­nis­saat qilam­milu Kun­ngeqarfim­meeqatiginis­saat.

18. Savat al­lat suut qilanaaraat?

¹⁸ Savat allat nunarsuarmi naas­saan­ngitsumik inuunis­sar­tik neriuutigaat. Taamatut neriuuteqar­neq inun­nut pis­susis­samisoor­poq. (Oqal 3:11, qup­per­nerup ataani ilan­ngus­saq) Nunarsuarmik paratiisin­ngor­titseqataanis­sar­tik qilanaaraat. Nam­mineq il­lus­samin­nik il­lulior­nis­sar­tik, naatsiivilior­nis­sar­tik peq­qil­luin­narlutil­lu qitor­nanik perorsaanis­sar­tik qilanaaraat. (Es 65:21-23) Jehovap pin­ngor­titai – qaq­qarsuit, or­pip­pas­suit imar­piil­lu – misis­sor­niarlugit nunarsuup angalaarfiginis­saa qilanaaraat. Nuan­naarutiginer­paavaal­li Jehovamut qanin­nerujar­tuin­nar­tumik at­taveqar­nis­sar­tik.

19. Eq­qaaniaanermi tamat­ta qanoq periarfis­saqar­pugut, ukiorlu man­na qaqugu eq­qaaniaas­saagut?

¹⁹ Jehovap kif­fani tamaasa nuan­ningaar­tumik siunis­saqar­tip­pai. (Jer 29:11) Jiisusip toquneranik eq­qaaniaanermi naas­saan­ngitsumik inuusin­naaq­qul­luta Guutip Kristusil­lu iliuuserisimasaat pil­lugit un­nersiutigin­nin­nis­samut periarfis­saqar­pugut. Kristumiut ilumoor­tut ataatsimoor­tar­nerisa eq­qaaniaaneq pingaar­ner­paar­taraat. Arfininngornermi marsip 27-anni 2021-mi seqer­nup tarrin­nerata kingor­na eq­qaaniaas­saagut. Ukioq man­na kristumior­pas­suit kil­lilersor­neqar­natik eq­qaaniaas­sap­put. Al­lat akerlilersor­neqaraluarlutik najuutis­sap­put. Al­lal­lu par­naarus­saaq­qal­lutik eq­qaaniaas­sap­put. Qanor­toq Jehova, Jiisusi Guutil­lu ilaqutariis­sor­tai qilam­miit­tut isigitil­lugit ilagiit, eqimat­tat inuil­lu ataasiak­kaat tamarmik eq­qaaniaal­luarilik!