1-3. Suut pis­sutigalugit ilaan­nik­kut qiasar­pugut?

 QANGA kingul­lermik qiavit? Ilaan­nik­kut nuan­naar­nerup pianik qul­lilisar­pugut. Amerlaner­tigul­li aliasun­ner­put pis­sutigalugu qiasar­pugut. As­sersuutigalugu asasamik toquk­kut an­naasaqaraangat­ta qiasar­pugut. Laura, * qatan­ngut ar­naq USA-mi najugalik, ima al­lap­poq: “Panim­ma an­naanera an­niaatigisangaarak­ku ilaan­nik­kut misigisar­punga tup­pal­lersaatis­saqar­nanga. Taamaak­kaangama aliasuk­kun­naar­nis­sara takorloorsin­naaneq ajor­para.”

² Aam­ma al­lanik pis­suteqarluta qiasarsin­naavugut. Hiromi, Japanimi pioneriusoq, ima oqar­poq: “Ilaan­nik­kut inuit oqaluus­sif­figisar­tak­kama Biibilimik soqutigin­nin­ngin­nerat nikal­lungas­sutigisar­para. Qial­lunga Jehova qin­nuigisar­para ilumoor­tumik ujarlersunik naapitsisin­naaq­qul­lunga.”

³ Qatan­ngutit taak­kua misigisaan­nut as­singusumik misigisaqar­nikuuit? Tamangajat­ta angersin­naavugut. (1 Petr 5:9) ‘Qiim­mat­tarluta’ Jehova kif­far­torfigerusuk­kaluarlugu aliasun­neq, nikal­lunganeq ilungersunar­tumil­luun­niit misilin­neqar­neq pis­sutigalugu ilaan­nik­kut qiaatigaluta kif­far­torfigisar­par­put. (Tuss 6:7; 100:2) Taamatut misiginitsin­ni susin­naavugut?

4. Al­laaserisami matumani suut sam­mis­savagut?

 ⁴ Jiisusi ilin­niarfigisin­naavar­put. Ilaan­nik­kut Jiisusi kil­litsingaar­tarami ‘qis­saser­tar­poq’. (Joh 11:35; Luk 19:41; 22:44; Hebr 5:7) Qul­lilinerisa ilaat ilin­niutis­sar­taal­lu sam­meriar­tigit. Aam­ma ajor­nar­torsiutit qul­lilis­sutigisin­naasagut qanoq qaangersin­naanerigut sam­mis­savar­put.

5. Johan­nesi 11:32-36 oqalut­tuamit Jiisusi pil­lugu suna ilik­kar­par­put?

⁵ Ukiumi 32-mi ukiuk­kut Jiisusip ikin­ngutaa Lazarusi nap­parsimal­luni toquvoq. (Joh 11:3, 14) Lazarusi marlun­nik qatan­nguteqar­poq, Maria Mar­thalu, Jiisusil­lu ilaqutariit taak­ku asangaar­pai. Ar­nat taak­kua marluk qatan­ngutimin­nik an­naasaqar­ner­tik aliasuutigingaar­paat. Lazarusip toqunerata kingor­na Jiisusi Mariap Mar­thal­lu nunaqarfian­nut Betaniamukar­poq. Mar­thap Jiisusi aggersoq tusaramiuk tuaviin­naq naapigiar­paa. Takorlooruk aliasungaarluni ima oqar­toq: “Naalagaq, maaniis­simagaluaruit qatan­ngutiga toqusimas­san­ngik­kaluar­poq.” (Joh 11:21) Taama oqariitsiar­toq Maria al­lal­lu qiasut Jiisusip takugamigit “qis­saser­poq”. – Johannesi 11:32-36 atuakkit.

6. Sooq Jiisusi qis­saser­pa?

⁶ Sooq Jiisusi qis­saser­pa? Indsigt i Den Hellige Skrift-imi ima al­las­simavoq: “Ikin­ngutaata Lazarusip toqunera taas­sumalu qatan­ngutaasa aliasun­nerat pis­sutigalugit Jiisusi anersaarulul­luni qul­lilivoq.” * Lazarusip nap­parsimal­luni an­niarsimanera toqusus­saal­lunilu paasigamiuk qanoq misigisimas­sanersoq Jiisusip takorloorsimasin­naavai. Aam­ma qular­nan­ngitsumik Mariap Mar­thal­lu qatan­ngum­mik toqunera pis­sutigalugu aliasun­nerat takugamiuk qul­lilisimas­saaq. Ikin­ngutin­nik ilaqut­tan­nil­luun­niit toquk­kut an­naasaqarsimaguit as­singusumik misigis­suseqarsimas­saatit. Pisimasup tamatuma ilin­niutis­sar­tai pingasut sam­meriar­tigit.

7. Jiisusip ikin­ngutini pil­lugit qul­lilineranit Jehova pil­lugu suna ilik­kar­par­put?

 ⁷ Jehovap misigis­sutsitit paasisarpai. Jiisusip Ataatani as­sigil­luin­nar­paa. (Hebr 1:3) Qul­lilinermigut Ataatami qanoq misiginera ersersip­paa. (Joh 14:9) Asasamik toquk­kut an­naasaqarsimaguit qularutigis­san­ngilat Jehovap aliasun­nerit maluginiarlugulu misigin­neqatigingaaraatit. Uum­matit sequmis­simasoq katsorsarusup­paa. – Tuss 34:19; 147:3.

8. Qanoq nalun­ngilar­put Jiisusip asasagut toqusimasut makitik­kusuk­kai?

⁸ Jiisusip asasagut toqusimasut makitik­kusuppai. Qul­lilin­ngitsiarluni Jiisusip Mar­tha ima neriorsor­paa: “Qatan­ngutit makis­saaq.” Mar­thap Jiisusip oqaasii up­perai. (Joh 11:23-27) Mar­thap Jehovamut aalajaal­luni kif­far­tor­tuugami Eliap Elisal­lu tupin­nar­tulior­nik­kut toqusunit makititsisimanerat nalun­ngis­simas­savai. (1 Kng 17:17-24; 2 Kng 4:32-37) Aam­ma Jiisusip toqusunit makititsisimanera tusarsimas­savaa. (Luk 7:11-15; 8:41, 42, 49-56) Il­lit­taaq asasavit toqusimasut takoq­qin­nis­saat qularutigis­san­ngilat. Jiisusip qul­liliitigaluni ikin­ngutini aliasut­tut tup­pal­lersaramigit ersersip­paa toqusimasut makitik­kusungaarlugit!

9. Jiisusi ilaarlugu aliasut­tut qanoq tup­pal­lersarsin­naavigit? As­sersuuteqarit.

⁹ Aliasuttut tuppal­lersarsin­naavatit. Jiisusip Mar­tha Marialu qiaqatigiin­nar­nagit tusar­naarlugil­lu tup­pal­lersar­pai. Uagut­taaq aliasut­tut tup­pal­lersarsin­naavagut. Dan, Australiami utoq­qaaner­taasoq, ima oqar­poq: “Nuliama toqunerata kingor­na ikior­neqar­nis­sara pisariaqar­tip­para. Aap­pariit arlal­lit ul­luugaluar­pat un­nuaagaluar­pal­luun­niit tusar­naar­nis­samin­nut piareersimasar­put. Aliasun­nera ersersis­sin­naasar­para, qiagaangamalu peq­qusiileqineq ajor­put. Aam­ma ikior­tar­paan­nga, as­sersuutigalugu nam­mineersin­naan­ngik­kaangama biilik­ka asat­tar­paat, pisiniut­tar­paan­nga iggat­tarlungalu. Aam­ma qinoqatigikulasar­paan­nga. Ikin­ngutaal­luar­tuup­put qatan­ngutaal­lutil­lu ‘er­niusimasut an­nikil­lior­nermi ikior­tis­saal­lutik’.” – Uss 17:17.

10. Lukasi 19:36-40 pisimasoq oqalut­tuariuk.

¹⁰ Jiisusi ukiumi 33-mi nisanip 9-an­ni Jerusalemimut apuup­poq. Il­loqarfik qanil­liar­toraa inup­pas­suit Jiisusi kun­ngimis­sut akueralugu ersersin­niarlugu atisatik aq­qutis­saanut iliorar­paat. Pisimasoq nuan­nersuuvoq. (Lukasi 19:36-40 atuakkit). Taamaat­tumik ajoqersuk­kat pisus­saq tupaal­laatigisimas­savaat. Jiisusip “il­loqarfik qanil­lil­lugu takuleramiuk qis­satigaa”. Jerusalemimiut nalaatas­saat ajor­tut pil­lugit Jiisusi qul­liliitigaluni oqalut­tuar­poq. – Luk 19:41-44.

11. Sooq Jiisusi Jerusalemimiut pil­lugit qul­liliva?

¹¹ Jiisusi aliasup­poq nalun­ngin­namiuk juutit amerlanersaasa Kun­ngeqarfik pil­lugu tusarlius­saq akuerin­ngik­kaat. Taamaat­tumil­lu Jerusalemi piuneerun­neqas­saaq juutil­lu aniguisut aal­larus­saas­sap­put. (Luk 21:20-24) Ajoraluar­tumik ilimagineqar­tutut Jiisusi inuit amerlanersaan­nit akuerineqan­ngilaq. Il­lit najuk­kan­ni inuit amerlanersaasa Kun­ngeqarfik pil­lugu tusarlius­saq qanoq qisuariarfigaat? Ajun­ngitsumik qisuariar­tut ikit­tuin­naap­pata Jiisusi qanoq ilin­niarfigisin­naaviuk? Ilin­niutis­sat pingasut sam­meriar­tigit.

12. Jiisusip inoqatini pil­lugit qul­lilineranit Jehova pil­lugu suna ilik­kar­par­put?

¹² Jehovap inuit asavai. Jiisusip qul­lilinera Jehovap inun­nik asan­ningaar­neranik eq­qaasin­neqaatigaar­put. ‘Kimil­luun­niit tam­maq­qusin­ngilaq, tamaasalu al­lamik isumataar­nis­samut  periarfis­sik­kumavai.’ (2 Petr 3:9) Inoqatitsin­nik asan­nin­ner­put ersersit­tar­par­put nutaarsias­sat nuan­nersut pil­lugit im­minut pil­liutigeriaan­naal­luta oqaluus­sigaangat­ta. – Matt 22:39.

13-14. Jiisusip inun­nik misigin­neqatigin­nin­nini qanoq ersersip­paa, aam­ma uagut qanoq ilaarsin­naavar­put?

¹³ Jiisusi oqaluus­sinermi aallussil­luarpoq. Jiisusip periarfis­sani tamaasa ilin­niar­titsinis­saminut ator­taramigit inun­nik asan­nin­nini takutip­paa. (Luk 19:47, 48) Taamaalior­nis­saminut suna kajumis­sis­sutigaa? Misigin­neqatigin­nin­nini. Ilaan­ni tusar­naarusut­tut amerlangaarmata Jiisusi ajoqersugaalu ‘nerinerluun­niit ajuler­put’. (Mark 3:20) Jiisusi aam­ma un­nuak­kut oqaloqatigineqarumagami kajumil­luni oqaluus­sivoq. (Joh 3:1, 2) Jiisusimik tusar­naar­tut amerlanerit ajoqersugan­ngun­ngil­lat. Jiisusili taak­kunun­nga peq­qis­saarluni oqaluus­sivoq. Uagut­taaq kik­kut tamaasa nutaarsias­sanik nuan­nersunik tusar­naar­nis­saan­nut periarfis­sik­kusup­pagut. (ApS 10:42) Taamaaliorumal­luta im­maqa oqaluus­seriaaser­put al­lan­ngor­tit­tariaqarsin­naavar­put.

¹⁴ Pisariaqaraangat allan­ngueriaan­naasarit. Pif­fis­sani as­sigiin­ngitsuni oqaluus­sineq ajorut­ta inuit nutaarsias­sanik nuan­nersunik tusar­naarusut­tut im­maqa naapin­ngitsuus­savagut. Matilda pioneriusoq ima oqar­poq: “Uigalu pif­fis­sani as­sigiin­ngitsuni oqaluus­sisar­pugut. Ul­laak­kut niuer­tarfin­ni sulif­feqarfin­nilu oqaluus­sisar­pugut. Ul­loqeq­qata nalaani inup­pas­suit aq­qusaar­tagaan­ni atuagaasiviit angal­lat­tak­kat atorlugit oqaluus­sisar­pugut. Taava kingusin­nerusuk­kut inuit angerlarsimagaangata il­lumiit il­lumut angalaar­tar­pugut.” Pif­fis­sami iluarisatsin­ni oqaluus­siin­narata inuit naapin­nis­saat ilimanar­nerugaangat oqaluus­sisarsin­naajumal­luta naleq­qus­sar­tariaqar­pugut. Taamaalior­tarut­ta Jehovap iluaris­savaatigut.

15. Lukasi 22:39-44 naaper­torlugit Jiisusi aqagumut toqusus­saasoq qanoq pisoqar­pa?

¹⁵ Ukiumi 33-mi nisanip 14-ian­ni un­nuak­kut Jiisusi naatsiivim­mut Getsemanemukar­poq. Tas­sani Jehovamut qinul­luni uum­mam­miuni  aniatip­pai. (Lukasi 22:39-44 atuakkit). Al­las­simavoq ‘nil­lingaarluni qul­lilil­lunilu qinusoq’. (Hebr 5:7) Aqagumut toqusus­saal­luni Jiisusip suna qin­nutigaa? Jehovamut aalajaat­tuarsin­naajumal­luni piumasaatul­lu ilior­tuarsin­naajumal­luni nukis­saqar­teq­qul­luni qinuvoq. Jehovap er­nermi ilungersorluni qinunera tusar­paa, nakus­satsin­niarlugulu in­ngili aal­lar­tip­paa.

16. Sooq Jiisusi naatsiivim­mi Getsemanemi qinutil­luni qul­liliva?

¹⁶ Jiisusi Guutimik mitaatigin­nit­tutut isigineqar­nis­sani nikal­lungas­sutigingaaramiuk naatsiivim­mi Getsemanemi qinutil­luni qul­lilivoq. Aam­ma nalun­ngilaa akisus­saaf­fini, Ataatami aq­qata naalan­narsisin­neqar­nis­saa, pingaaruteqangaar­toq. An­nikil­lior­nin­ni Jehovamut aalajaan­nerit misilin­neqar­pat Jiisusi qanoq ilin­niarfigisin­naaviuk? Ilin­niutis­sat pingasut sam­meriar­tigit.

17. Jehova pil­lugu suna ilik­kar­par­put Jiisusip qin­nutaanut qisuariar­neranit?

¹⁷ Jehovap qinnutitit tusartarpai. Jehova Jiisusip qin­nutaanut tusar­naar­poq. Sooq? Jiisusip Ataataminut ilumoorfigin­nit­tuar­nis­sani aq­qatalu naalan­narsisin­neqar­nis­saa pingaar­ner­paatim­magit. Uagut­taaq Jehovamut ilumoorfigin­nit­tuar­nis­sar­put aq­qatalu naalan­narsisin­neqar­nis­saa pingaar­ner­paatik­kutsigit ikioq­qul­luta qinugaangat­ta Jehovap akisas­savaatigut. – Tuss 145:18, 19.

18. Sooq oqarsin­naavugut Jiisusi ikin­ngutitut misigin­neqataasutut it­tuusoq?

¹⁸ Jiisusip misigis­sutsitit paasisarpai. An­nikil­lior­nitsin­ni ikin­ngum­mit misigin­neqataasumit, ingam­mik as­singusumik misigisaqarsimasumit, tup­pal­lersar­neqar­ner­put qujamasuutigingaar­tar­par­put. Jiisusi ikin­ngutaavoq taamaat­toq. Uagutsitul­li san­ngiitsuuneq ikior­neqar­tariaqar­nerlu misigisimavai. San­ngiif­figisar­tak­kagut nalun­ngilai, aam­ma “pif­fis­saq eq­qorlugu” ikior­neqar­nis­sar­put isumagis­savaa. (Hebr 4:15, 16) Jiisusip naatsiivim­mi Getsemanemi in­ngilimit ikior­neqar­nerminik akuersineratut uagut­taaq – im­maqa Biibililersaarutit, oqalugiaatit, isigin­naagas­siat, utoq­qaaner­tat ikin­ngutil­luun­niit aq­qutigalugit – Jehovamit ikior­neqar­nis­sar­put akuerisariaqar­par­put.

19. Guutimut aalajaan­nerit misilin­neqaraangat qanoq nakus­satsin­neqarsin­naavit? As­sersuuteqarit.

 ¹⁹ Jehovap ‘eqqis­sinermik Guutimit pisumik’ tunis­savaatit. Jehovap qanoq nakus­satsis­savaatigut? Qinugut­ta ‘eq­qis­sineq Guutimit pisoq siuneqas­suser­nit tamanit an­nerungaar­toq’ pis­savar­put. (Fil 4:6, 7) Taamatut tunineqar­ner­put uum­matik­kut eq­qarsaatik­kul­lu eq­qis­sis­sutigis­savar­put. Qatan­ngutip ar­nap Luzimik atil­lip taman­na misigaa. Ima oqar­poq: “Kiserlior­taqaanga. Ilaan­nik­kut misigis­sutsit taamaat­tut eq­qarsalersit­tar­paan­nga Jehovamit asaneqan­ngitsunga. Taamali eq­qarsaleraangama ingerlaan­naq Jehovamut oqalut­tuarisar­para. Qinugaangama misigis­sutsik­ka aqus­sin­naaler­tar­pak­ka.” Taas­suma misigisaanit erser­poq qinuneq eq­qis­sisitsisar­toq.

20. Jiisusip qul­lilisar­neranit suut ilik­kar­pagut?

²⁰ Jiisusip qul­lilisar­neranit ilin­niutis­sat tup­pal­ler­naqaat atoriaan­naal­lutil­lu! Eq­qaasin­neqar­pugut ikin­ngutigut aliasut­tut tup­pal­lersar­tas­sagigut aam­ma asasatsin­nik toquk­kut an­naasaqar­nitsin­ni Jehovamit Jiisusimil­lu ikior­neqar­nis­sar­put up­peris­sagip­put. Aam­ma Jehova Guuti Jiisusilu Kristusi ilaarlugit misigin­neqataal­luta oqaluus­sisar­nis­satsin­nut ilin­niar­titsisar­nis­satsin­nul­lu kajumis­saar­neqar­pugut. Tup­pal­ler­naqaarlu nalun­ngin­natsigu Jehova er­neralu misigis­sutsitsin­nik san­ngiis­sutsitsin­nil­lu paasin­nit­tar­tut piner­tusaarsin­naaq­qul­lutalu ikiorusuk­kaatigut. Jehovap neriorsuutigisamisut ‘qul­linik tamanik isitsin­niit­tunik al­lar­terinis­saata’ tungaanut ilik­kak­kagut maleruar­tuar­tigit! – Saqq 21:4.