ATUAQQISSAAGASSAQ 4
Sooq eqqaaniaaqataasartugut
“Taamaaliortaritsi uanga eqqaaniarlunga!” – LUK 22:19.
ERINARSUUT 20 Ernerit asasat tunissutigaat
QILANAARTUUT *
1-2. (a) Asasarput toqukkut annaasimasarput pingaartumik qaqugukkut eqqaamasarparput? (b) Jiisusip toqussi aqaguttoq suna pilersippaa?
ASASAGUT toqukkut annaasimasagut qanorluunniit sivisutigisumik najorsimanngikkaluarlugit puiunngisaannarpagut. Pingaartumik ullormi toquffianni eqqaamasarpagut.
2 Jiisusi Kristusi, asangaagarput, ullormi toquffiani inuppassuit allat peqatigalugit nunarsuaq tamakkerlugu ukiut tamaasa eqqaaniartarparput. (1 Petr 1:8) Taassuma ajortimit toqumillu aniguisikkumalluta inuunini utertitsissutitut akigivaa. (Matt 20:28) Namminerlumi kissaatigaa malinnitsimi toqussi eqqaaniartassagaat. Unnukkorsiorneq immikkuullarissoq toqunissi aqaguttoq pilersippaa, imalu peqqusivoq: “Taamaaliortaritsi uanga eqqaaniarlunga!” – Luk 22:19.
3. Allaaserisami matumani suut eqqartussavagut?
3 Jiisusip toquneranik eqqaaniaaqataasut ilaat amerlanngitsut qilammiinnissamik neriugisaqarput. Najuuttullu millionillit nunarsuarmi inuunissamik neriuuteqarput. Tamarmilli kajumillutik ukiut tamaasa eqqaaniaaqataasarput. Tamatumunnga pissutaasut allaaserisami matumani eqqartussavagut. Aamma eqqaaniaaqataanerput qanoq iluaqutigisarnerlutigu sammissavarput. Siullertulli sammeriartigu sooq tanitat eqqaaniaaqataasarnersut.
SOOQ TANITAT NAJUUTTARTUT
4. Sooq tanitat eqqaaniaanermi iffiaq-qaqortumik viinnimillu ilangiisarpat?
4 Tanitat ukiut tamaasa eqqaaniaanermi ilangiisarput, tassa iffiaq-qaqortumik nerillutillu viinnimik imertarput. Sooq tamanna naleqquppa? Akissutaa paasiumallugu Jiisusip nunarsuarmiinnerani unnummi kingullermi susoqarnersoq eqqarsaatigeqqaartariaqarparput. Unnummi poorskisiorfimmi nerereernerup kingorna Jiisusip nalliuttorsiorneq Naalakkap unnukkorsiortitsineranik taaneqartartoq pilersippaa. Tassani apustilini aalajaatsut aqqanillit iffiaq-qaqortumik viinnimillu tunivai, nereqquaalu imeqqullugillu. Taava “angerusisaaq” – tassa isumaqatigiissut nutaaq – aamma Kunngeqarfimmik isumaqatigiissut eqqartulerpai. * (Luk 22:19, 20, 28-30) Isumaqatigiissutit marluk taakkua pissutigalugit apustilit allallu amerlanngitsut qilammi kunnginngornissaat palasinngornissaallu ajornarunnaarsinneqarpoq. (Saqq 5:10; 14:1) Tanitat kinguleruttut * kisimik isumaqatigiissutinut marlunnut taakkununnga ilaagamik eqqaaniaanermi iffiaq-qaqortumik viinnimillu ilangiisarput.
5. Tanitat neriuutissinneqarnerminnut tunngatillugu suna nalunngilaat?
5 Tanitat aamma allamik pissuteqarlutik eqqaaniaaqataarusuttarput, neriuutiminnimmi eqqarsaatiginninnissamut unnummi tamatumani periarfissaqarluarput. Jehovap tupinnangaartumik neriuutississimavai. Taakku 144.000-nik amerlassuseqartut toqujuitsuullutik aserujuitsuullutillu Jiisusi Kristusi makititaasimasoq qilammi naalakkersueqatigissavaat. Aamma Jehovap Guutip saavani kiffartussapput. Ila tupinnangaarami! (1 Kor 15:51-53; 1 Joh 3:2) Tanitat nalunngilaat qilammi taama nuannertigisumik suliassinneqarnissamut qaaqquneqarsimallutik. Aammali nalunngilaat aatsaat toqunissartik tikillugu aalajaakkunik qilaliartinneqarsinnaallutik. (2 Tim 4:7, 8) Tanitat qilammiinnissamik neriuuteqarnertik eqqarsaatigissallugu nuannaarutigisarpaat. (Tit 2:13) ‘Savammi allat’? (Joh 10:16) Taakku sooq eqqaaniaaqataasarpat?
SOOQ SAVAT ALLAT NAJUUTTARTUT
6. Sooq savat allat ukiut tamaasa eqqaaniaaqataasarpat?
6 Savat allat ilangiisanngikkaluarlutik eqqaaniaanermi najuuttarput. Nunarsuarmi inuunissamik neriugisallit eqqaaniaaqataasartussaanerat 1938-mi siullermeerluni ersarissumik ima allaatigineqarpoq: “[Savat allat] eqqaaniaanermi isiginnaartutut najuunnissaat naleqqulluinnarpoq. … Unnuk taanna taakkununngattaaq nuannaarutaavoq.” (Vagttaarnet 1938-moortumi marsip 15-iat). Savat allat eqqaaniaaqataanertik nuannaarutigisarpaat, soorlu katittorsiornermi qaaqqusaasut najuunnertik nuannaarutigisaraat.
7. Sooq savat allat eqqaaniaanermi oqalugiaat qilanaarisarpaat?
7 Aamma savat allat neriuutertik eqqarsaatigisarpaat. Eqqaaniaanermi oqalugiaatigineqartussaq qilanaarisarpaat, Kristusimmi naalakkersueqataasalu 144.000-t ukiuni 1.000-ni naalakkersuineranni inunnut aalajaatsunut iliuuserisassaat sammineqartarput. Qilammi naalakkersuisut taakku kunngertik Jiisusi Kristusi siulersortigalugu nunarsuarmik paratiisinngortitseqataassapput inuillu aalajaatsut naammalluinnartunngornissaannut ikiorlugit. Siulittuutit Biibilimeersut – soorlu Esaja 35:5, 6; 65:21-23 aamma Saqqummersitat 21:3, 4-milu allassimasut – eqquunnissaannik takorluuinertik eqqaaniaanermi najuuttut millionillit nuannaarutigingaartarpaat. Paratiisimi asasatik najorlugit inuunissartik takorloortarpaat, tamannalu siunissamut neriuuteqarnerulissutigalugulu Jehovamik kiffartuussiuarnissamut aalajangiusimanninnerulissutigisarpaat. – Matt 24:13; Gal 6:9.
8. Savat allat eqqaaniaaqataasarnerannut pissutaasoq alla suua?
8 Savat allat eqqaaniaaqataasarnerannut pissutaasoq alla tassaavoq tanitanik asanninnerminnik tapersersuinerminnillu ersersitserusunnerat. Tanitat savallu allat ataasioqatigiillutik kiffartoqatigiinnerat Biibilimi siulittuutigineqarpoq. Taakkua ilaat misissoriartigit.
9. Savat allat tanitanut attaveqarnerat Zakaria 8:23-mi qanoq siulittuutigineqarpa?
9 Zakaria 8:23 atuaruk. Savat allat anersaakkut qatanngutiminnut tanitaasunut attaveqarnerat siulittuummi tamatumani nuannersumik allaatigineqarpoq. “Angut Judakkuusoq ataaseq” tanitanut kinguleruttunut assersuutaavoq. (Rom 2:28, 29) ‘Inuiaat assigiinngitsut tamarmik angutitaat qulit’ savanut allanut assersuutaapput. Inuiaat taakkua tanitat ‘atisaasa nuuagut tigussavaat’, tassa aalajaallutik minguitsumik pallorfigeqatigissavaat. Aap, savat allat eqqaaniaaqataanermikkut tanitanut attaveqarluarnertik ersersittarpaat.
10. Siulittuut Ezekieli 37:15-19, 24, 25-milu allassimasoq Jehovap qanoq eqquutitippaa?
10 Ezekieli 37:15-19, 24, 25-lu atuakkit. Jehovap tanitat savallu allat qanimut suleqatigiilersikkamigit siulittuut taanna eqquutitippaa. Siulittuummi qisumerngit marluk eqqartorneqarput. Qilammiinnissamik neriugisaqartut ‘Judap qisuminertaatut’ ipput, Israelimimi kunngisut ivertinneqartarsimasut Judakkunneersuusarput. Nunarsuarmi inuunissamik neriugisallit ‘Josefip qisuminertaatut’ ipput. * Siulittuutigineqarpoq eqimattat taakku marluk Jehovap ataasiulersillugit ‘qisumininngortissagai ataaseq’. Tassa ataasioqatigiillutik Jiisusi Kristusi kunngigalugu kiffartoqatigiissapput. Tanitat savallu allat immikkoornatik ataatsimilli paarsisoqarlutik savaatitut katersatut ataatsitut illutik ukiut tamaasa eqqaaniaaqatigiittarput. – Joh 10:16.
11. “Savat” Matthæusi 25:31-36, 40-milu eqqaaneqartut Kristusip qatanngutaanik tapersersuinertik qanoq pingaarnertut ersersippaat?
11 Matthæusi 25:31-36, 40-lu atuakkit. “Savat” Jiisusip allassimaffimmi tassani eqqartugai tassaapput naggatissap nalaani inuit naapertuilluartut nunarsuarmi inuunissamik neriugisaqartut – aamma savanik allanik taaneqartartut. Taakku Kristusip qatanngutaanik kinguleruttunik tapersersuipput, tamannalu pingaarnertut ersersittarpaat nunarsuaq tamakkerlugu oqaluussinermi ajoqersuganngortitsiortornermilu suleqataanermikkut. – Matt 24:14; 28:19, 20.
12-13. Savat allat Kristusip qatanngutaanik qanoq allatut tapersersuisarpat?
12 Ukiut tamaasa eqqaaniaanissaq sapaatit-akunnerpaalunnik sioqqullugu savat allat Kristusip qatanngutaanik tapersersuillutik eqqaaniaanissamut nunarsuaq tamakkerlugu sapinngisartik tamaat qaaqquseqataallutik immikkut suliniuteqartarput. (Ungalusaq “ Eqqaaniaanissamut piareersarpit?” takuuk). Aamma ilagiit amerlanersaat tanitanik ilaqanngikkaluartut ilagiinni tamani eqqaaniaasoqarnissaa piareersartarpaat. Savat allat Kristusip qatanngutaanik taamatut tapersersuisinnaanertik nuannaarutigingaartarpaat. Nalunngilaat tanitanik ikiuinertik Jiisusip imminut iliuuserineqartutut isigisaraa. – Matt 25:37-40.
13 Qilammiinnissamik nunarsuarmiinnissamilluunniit neriuuteqaraluarutta suut allat pissutigalugit eqqaaniaaqataassaagut?
SOOQ TAMATTA NAJUUTTARTUGUT
14. Jehovap Jiisusillu uagutsinnik asanningaarnertik qanoq ersersippaat?
14 Jehovap Jiisusillu asanningaarnerat qujamasuutigaarput. Jehovap assigiinngitsorpassuartigut asannittuliorfigisarpaatigut. Asannittuliornerali pingaarnerpaaq tassaavoq ernituaminik asangaakkaminik pilliuteqarnera. (Joh 3:16) Jiisusittaaq kajumilluni inuunini uagut pilluta pilliutigigamiuk asanningaarnini ersersippaa. (Joh 15:13) Jehovap Jiisusillu uagutsinnut asannittuliungaarnerat pillugu utertitsivigisinnaanngikkaluarlugit qujamasunnerput inooriaatsitsigut ullut tamaasa ersersissinnaavarput. (Kol 3:15) Aamma taakkua asannittuliungaarnerat eqqarsaatigeqqissaarniarlugu taakkununngalu asanninnerput ersersikkumallugu eqqaaniaaqataasarpugut.
15. Sooq tanitat savallu allat utertitsissut qujamasuutigingaarpaat?
15 Utertitsissut qujamasuutigingaarparput. (Matt 20:28) Tanitat utertitsissut siunissamut nuanneqisumik neriuuteqalissutigisartik pingaartingaarpaat. Kristusip pilliutaanik upperinninnerat pissutigalugu Jehovap naapertuilluartuutippai qitornavissiartaaralugillu. (Rom 5:1; 8:15-17, 23) Aammattaaq savat allat utertitsissut qujamasuutigaat. Kristusip pilliutaa upperigamikku Guutimit minguitsuutinneqarput, taanna kiffartorfigisinnaavaat annikilliornartorsuarmilu aniguinissamik neriuuteqarlutik. (Saqq 7:13-15) Tanitat savallu allat utertitsissummik qujamasuutiginninnertik ukiut tamaasa eqqaaniaaqataanermikkut ersersittarpaat.
16. Eqqaaniaaqataasarnitsinnut pissutaasoq alla suua?
16 Eqqaaniaaqataasarnitsinnut pissutaasoq alla tassaavoq Jiisusimut naalakkusunnerput. Qilammiinnissamik nunarsuarmiluunniit inuunissamik neriuuteqaraluarutta Jiisusip eqqaaniaanissamik pilersitsinermini peqqussutaa una tamatta maleruarusupparput: “Taamaaliortaritsi uanga eqqaaniarlunga.” – 1 Kor 11:23, 24.
EQQAANIAAQATAANERPUT TAMATSINNUT ILUAQUTAAVOQ
17. Eqqaaniaaqataanerput Jehovamut qanoq qaninnerulissutigisarparput?
17 Jehovamut qaninnerulertarpugut. (Jaak 4:8) Soorlu sammereeripput, Jehovap uagutsinnut neriuutissiissutaanik asanningaarneranillu eqqarsaatiginneqqissaarnissatsinnut eqqaaniaanermi periarfissaqartarpugut. (Jer 29:11; 1 Joh 4:8-10) Siunissaq pillugu neriuuterput Guutillu uatsinnik asanninnera soraanngisaannartoq eqqarsaatigitillugit Jehova qaninnerulerlugulu asanerulertarparput. – Rom 8:38, 39.
18. Jiisusip maligassiaanik eqqarsaatiginneqqissaarnerput sunissamut kajumississutigisarparput?
18 Jiisusi ilaarusulertarparput. (1 Petr 2:21) Eqqaaniaangajaleraangatta Jiisusip nunarsuarmi ullut inuuffigisai kingulliit aamma toqutaanera makititaaneralu pillugit allassimasut Biibilimi atuartarpagut. Eqqaaniaanermillu oqalugiaammi Jiisusip uagutsinnik asanninneranik eqqaasinneqartarpugut. (Ef 5:2; 1 Joh 3:16) Jiisusip imminut pilliutigeriaannaanera eqqarsaatigeqqissaaraangatsigu taassumatut inooriaaseqarusulertarpugut. – 1 Joh 2:6.
19. Qanoq Guutip asanninneraniittuarsinnaavugut?
19 Guutip asanninneraniittuarnissarput aalajangiusimanerulertarparput. (Jud 20, 21) Guutip asanninneraniittuassaagut sapinngisamik naalattarutsigu, aqqa illernarsisittarutsigu uummataalu nuannaartittarlugu. (Uss 27:11; Matt 6:9; 1 Joh 5:3) Eqqaaniaaqataanerput killitsissutigalugu Jehovap iluarisaanik ullut tamaasa inooriaaseqarnissarput taassumalu asanninneraniittuarnissarput aalajangiusimanerulertarparput.
20. Sooq eqqaaniaaqataasarpugut?
20 Qilammiinnissamik nunarsuarmiluunniit paratiisiusumi inuunissamik neriuuteqarnerput apeqqutaatinnagu eqqaaniaaqataanissamut pissutissaqarluarpugut. Asangaakkatta, Jiisusip Kristusip, toqunera ukiut tamaasa eqqaaniartarparput. Pingaarnertulli asannittuliorneq annerpaaq – Jehovap uagut pilluta ernerminik pilliutiginninnera – eqqarsaatigisarparput. Ukioq manna tallimanngornermi apriilip 15-ianni 2022-mi eqqaaniaassaagut. Jehova erneralu asangaarpagut, taamaattumik ullormi Jiisusip toquffiani eqqaaniaaqataanissatsinnit pingaarnerusoqanngilaq.
ERINARSUUT 16 Ernera tanitaq pillugu Jehova unnersiutigisiuk
^ Qilammiinnissamik nunarsuarmiluunniit paratiisiusumi inuunissamik neriuuteqaraluarutta eqqaaniaaqataanissarput ukiut tamaasa qilanaarisarparput. Eqqaaniaaqataasarnitsinnut Biibilimi tunngavilersuutaalluartut allaaserisami matumani eqqartussavagut, aamma eqqaaniaaqataanerput qanoq iluaqutigisarnerlutigu sammissavarput.
^ Angerusisaaq Kunngeqarfimmillu isumaqatigiissut, siornatigut Naalagaaffimmik angerutsimik taaneqartartoq, pillugit paasisaqarnerorusukkuit takuuk Napasuliaq Alapernaarsuiffik oktobarip 15-ianni 2014-imoortumi qupp. 15-17 allaaserisaq “‘Tassaalissaasi kunngeqarfik palaseqatigiinnik innuttalik’”.
^ NASSUIAAT: Tanitat kinguleruttut tassaapput kristumiut tanitat suli nunarsuarmiittut.
^ Qisuminernik marlunnik siulittuut Ezekielip allagaani kapitali 37-miittoq pillugu paasisaqarnerorusukkuit takuuk Napasuliaq Alapernaarsuiffik juuli 2016-imoortumi qupp. 31-mi allaaserisaq “Atuartartut apeqqutaat”.