1. Jehova eqqarsaatigigaangakku suna eqqaasarpiuk?

 TAKORLOOR­NIKUUIUK Jehova qanoq ittuusoq? Qinugaangavit qanoq takorloor­tarpiuk? Jehova takuneqarsin­naanngik­kaluarluni Biibilimi ‘seqinertut eqqortin­naveeqqutitullu’ aamma ‘innertut nungutitsisutut’ eqqaaneqarpoq. (Tuss 84:12; Hebr 12:29) Ezekieli takorruuisin­neqarmat Jehovap avatangiisigisai ukuupput: Ujarak safiri, uilasorisoq neriusaarlu qinngornilik. (Ez 1:26-28) Taamatut allaatigineqarnera pissutigalugu ajukkuttutut misigisin­naavugut eqqarsarlutalu Jehova mianernarpal­laartoq.

2. Inuit ilaasa Jehovap qanillinissaanut suna akornutigisarpaat?

² Jehova takusin­naanngin­natsigu upperiuminaatsis­sinnaavarput asagaatigut. Inuit ilaat atugarinikuusatik ajortut pissutigalugit eqqarsartarput Jehovap asasinnaan­ngikkaatik. Immaqa nammineq ataataminnit asaneqarsiman­ngisaannarput. Misigissutsit taamaattut qanorlu uagutsinnut sunniuteqarsimasut Jehovap paasisinnaavai. Qanoq ittuunini Biibilimut allatsis­simagamiuk ikiorpaatigut.

3. Sooq Jehovap asannit­tuunera misissus­savarput?

³ Oqaaseq alla Jehovamut tulluar­nerpaaq tassaavoq asanninneq. (Joh 1. 4:8) Biibilimi ima allassimavoq: ‘Guuti tassaavoq asanninneq.’ Asanninneq aallaavigalugu iliuuseqar­tuaannarpoq. Guuti ima sakkortutigisumik asannikkami asanninnini  allaat imminut asannin­ngitsunut ersersittarpaa. (Mat 5:44, 45) Allaaserisami matumani Jehova taassumalu asanninnera pillugu misissuinerussaagut. Guuterput ilisarisimanerujar­tortillugu asanerujar­tussavarput.

JEHOVAP ASANGAARPAATIGUT

4. Jehovap qamannga pisumik misigis­suseqarnera ilinnut qanoq sunniuteqarpa? (Aamma asseq takuuk).

⁴ ‘Jehova qamannga pisumik misigis­suseqarpoq.’ (Jaak 5:11) Anaanamut isumassuingaartumut Biibilimi imminut assersuuppoq. (Es 66:12, 13) Takorlooriaruk anaanap meeqqani mikisoq asannilluni paaralugu sarliaraa sallaatsumik oqaluullugu. Qiagaangat imaluunniit anniaraangat paarisarpaa. Uaguttaaq upperil­luinnarsin­naavarput annikil­liornitsinni Jehovap asagaatigut. Tussiaasiortoq allappoq: “Eqqarsaatima eqqissiviil­liortileraangannga tuppallersaanerpit nuannaalersit­tarpaanga.” – Tuss 94:19.

5. Jehovap ilumoorfigin­nilluni asanninnera qanoq ersertarpa?

⁵ Jehova ilumoorfigin­nittuuvoq. (Tuss 103:8) Kukkugaangatta imminiiginnarneq ajorpaatigut. Inuiaqatigiit Israalikkut Jehova pakatsiseqat­taartarpaat, taamaattorli peqqissimisunut ilumoorfigin­nilluni asanninnini ersersit­tuarpaa. Ima oqarpoq: ‘Uanga isinni erlinnarlutillu ataqqisaangaarputit, asavakkillu.’ (Es 43:4, 5) Guutip asanninnera allanngorsimanngilaq. Naatsorsuutigiuaan­narsinnaavarput. Allaat ingasattumik kukkussuteqarsimagaangatta Jehovap imminiiginnarneq ajorpaatigut. Peqqissimilluta taassumunnga uterutta paasissavarput suli asagaatigut. ‘Isumakkeerfigiuas­salluta’ oqarpoq. (Es 55:7) Biibilimi allassimavoq Jehovap isumakkeerfigin­ninnera ‘nakussatsis­sutigis­sagipput’. – ApS 3:19.

6. Zakaria 2:12-imi Jehova pillugu suna ilikkarparput?

⁶ Zakaria 2:12 atuaruk. Jehovap asagamisigut misigis­sutsigut maluginiartarpai illersorusungaar­tarlutalu. Ajortumik pineqaraangatta nuanniil­liortarpoq. Taamaattumik pissutis­saqarluarluta ima qinusin­naavugut: “Isip tappiutaatut paarinnga.” (Tuss 17:8) Isi malussaris­sorujussuuvoq timimullu pingaaruteqarluni. Jehovap isimi tappiutaanut assersuum­matigut ima oqarporlusooq:  ‘Ilissinnik ajortumik pinnittut, innuttakka, asasakka ajortumik pivaat.’

7. Jehovap asagaatigut sooq upperineruler­tariaqarparput?

⁷ Jehovap kissaatigaa tamatsinnut immikkut asanninnini qularutigis­sanngikkipput. Aammali nalunngilaa misigisimasagut pissutigalugit imaluunniit maannakkut atukkagut pissutigalugit asanninnera qularilersin­naagipput. Ilumut asagaatigut qanoq upperinerulersin­naavarput? Jehovap Jiisusimut, tanitanut tamatsinnullu asanninnini qanoq ersersikkaa paasiniariartigu.

JEHOVAP ASANNINNINI QANOQ ERSERSIKKAA

8. Sooq Jiisusip Ataataminit asaneqarnini qularutiginngilaa?

⁸ Jiisusip Ataatani ukiorpassuarni qilammi najornikuuaa. Taamaattumik imminnut qanittuararsuupput asangaarlutillu. Jehovap Jiisusimut asanninnini ersarissumik oqaatigaa, tamannalu Matiusi 17:5-imi atuarsin­naavarput. Jehova ima oqaannarsimasin­naagaluarpoq: ‘Tassa akuerisara.’ Jehovalli kissaatigaa Jiisusi qanoq asatigigini ilisimas­sagipput, taamaattumik ima taavaa: “Ernera, asasara.” Jehovap ernini tulluusimaarutigaa pingaartumik kajumilluni inuunini pilliutiginiarmagu. (Ef 1:7) Jiisusip Ataataminit asaneqarnini qularin­nginnamiuk tamanna arlaleriarluni oqaatigisarpaa. – Joh 3:35; 10:17; 17:24.

9. Jehovap tanitanut asanninnera qanoq allaatigineqarpa? Nassuiaruk. (Romamiut 5:5)

⁹ Jehovap aamma tanitanut asanninnini ersersippaa. (Romamiut 5:5 atuaruk). Oqaaseq atorneqartoq “kuivaa” maluginiaruk. Qinerlerfissiat ilaanni kuussuartut uagutsinnut supisutut allaatigineqarpoq. Tamatumani Jehovap tanitanut asanningaarnera ersersin­neqarluarpoq. Tanitat nalunngilaat ‘Guutimit asaneqarlutik’. (Juud 1) Tanitat qanoq misiginerat apustilip Johannesip ima allaatigaa: “Ataatap asangaarmatigut Guutip qitornaanik taaneqarsin­naavugut!” (Joh 1. 3:1) Jehovap tanitat kisiisa asavai? Naamik, Jehovap uppernarsarsimavaa tamatta asalluta.

10. Jehovap ilinnut asannin­neranik uppernarsaat annerpaaq suua?

¹⁰ Jehovap ilinnut asannin­neranik uppernarsaat annerpaaq suua? Utertitsissut. Tassa asanninnermut tamanit ersiutaanerpaaq. (Joh 3:16; Rom 5:8) Jehovap ernini asangaakkani tunniuppaa toqunissaalu akueralugu inuiaat tamarmik ajortiminnik isumakkeerfigineqar­niassammata Guutimullu ikinngutaaler­niassammata. (Joh 1. 4:10) Jehovap Jiisusillu pilliutaanik eqqarsaatigin­neqqissaarutta paasisin­naavarput qanoq tamatta asatigigaatigut. (Gal 2:20) Jehovap naapertuil­luartuunera pissutigiin­narnagu aammali asanninnera pissutigalugu utertitsissut akilerneqarpoq. Jehovap uagutsinnut asanninnini uppernarsarpaa ernermi erliginerpaasami pilliutigineratigut. Una eqqarsaatigiuk: Uagut pilluta Jiisusip naalliunnissaa toqunissaalu akueraa!

11. Jeremia 31:3-mi suna ilikkarparput?

¹¹ Paaseriik­katsitut Jehovap misigis­sutsini isertornagit asanninnini oqaatigisarpaa. (Jeremia 31:3 atuaruk). Jehovap asagamisigut imminut qanillisip­paatigut. (Aamma takuuk Mosesimik 5. 7:7, 8). Jehovap asannin­neranit suulluunniit kialluunniillu avissaar­tissinnaan­ngilaatigut. (Rom 8:38, 39) Jehovap asanninnera ilinnut qanoq sunniuteqarpa? Tussiaat 23 atuaruk paasiniarlugulu Jehovap asanninnera isumassuineralu Daavimut tamatsinnullu qanoq sunniuteqarsin­naanersoq.

 JEHOVAP ASANNINNERA ILINNUT QANOQ SUNNIUTEQARPA?

12. Tussiaat 23 qanoq nassuiassaviuk?

¹² Tussiaat 23:1-6 atuakkit. Tussiaat 23-mi Jehovap asannin­neranik isumassuineranillu qularuteqan­ngilluin­narnini Daavip allaaseraa. Daavip Jehovamut, savanik paarsisutut taasaminut, qanimut attaveqarnini aamma allaaseraa. Jehovamit siulersor­neqarnini toqqissis­sutigaa tatigil­luinnarpaalu. Daavip nalunngilaa Jehovap asanninnera inuunini tamaat misigisus­saallugu. Sooq taama qulanngitsigaa?

13. Sooq Jehovap isumassuinera Daavip qularinngilaa?

¹³ “Sumik ajorsaateqan­ngilanga.” Daavi pisariaqar­titaminik Jehovap isumagiuarmani isumagil­luarneqartutut misigivoq. Daavip aamma Jehovamik ikinnguteqarluni taassumanngalu nuannarisaalluni nalunngilaa. Taamaattumik siunissami qanoq pisoqas­sagaluarpal­luunniit Daavip qularutiginngilaa Jehovap pisariaqar­titaminik isumagiumaaraani. Jehovap asagaani isumagiumaaraanilu nalunnginnamiuk nalerisimaarpoq, ernumas­suteqaranilu pilluarpoq. – Tuss 16:11.

14. Jehovap asannilluni qanoq isumassor­tarpaatigut?

¹⁴ Jehovap asannilluni isumassor­tarpaatigut, pingaartumik inuunitsinni ajortunik nalaataqaraangatta. Clairep, a ukiut 20-t sinnerlugit Betelimi kiffartortup, ilaquttani tulleriiaaginnarnik ajornar­torsiuteqalermata qanoq iliuuseqas­sanerluni naluaa. Ataataa qaratsamigut aanaartoorpoq, nukaa ilaajun­naarsitaavoq aamma ilaqutaasa niuertarfiutertik angerlarsimaf­fitsillu annaavaat. Jehovap qanoq isumagivai? Claire oqaluttuarpoq:  “Jehovap ilaquttakka ullut tamaasa pisariaqar­titaannik isumagisarpai. Takorloorsiman­ngisannik Jehovap ilaquttakka arlaleriarluni isumagisimavai. Jehovap ikiuisimanera eqqarsaatigikulasarpara asanninneralu puiunngisaan­nassallugu. Taamaaliortarama misilin­neqarninni pinertusaarsin­naavunga.”

15. Sooq Daavi nakussatsin­neqartutut misigiva? (Aamma assiliaq takuuk).

¹⁵ “Nakussatsit­taraanga.” Daavi ilaannikkut ajornar­torsiuterpas­suarnik annikil­liornar­tunillu nalaataqartarami nikallortarpoq. (Tuss 18:5-7) Jehovalli asanninnera isumassuineralu nakussatsis­sutigisarpai. Jehovap ikinngutini nikallungasoq uninngatittarpaa “narsani qorsuusuni” aamma imeqarluartuni. Tamatuma kingunerisaanik Daavi nakussatsillunilu nuannaarluni Jehova kiffartorfigiuarpaa. – Tuss 18:29-33.

16. Jehovap asanninnera illit qanoq nakussatsis­sutigaajuk?

¹⁶ Uaguttaaq Jehovap ilumoorfigin­nilluni asanninnera pissutigalugu misilin­neqarnermi atugarlior­nermilu pinertusaarsin­naavugut. (Upp 3:22; Kol 1:11) Rachel eqqaasin­naavarput. Nappaalanersuup COVID-19-ip atuunnerani uiata qimappaa Jehovalu qimallugu. Tamanna pissutigalugu Rachel aliasungaarpoq. Jehovamit qanoq ikiorneqarpa? Ima oqarpoq: “Jehovap asaneqartutut misigitit­tuarpaanga. Ikinngutit asannittut piffissaqarfigisarpaannga, nerisas­siuuttarpaannga, qiimmas­saatigisannik allaffigisarpaannga, allassimaffinnik nassittarpaannga, inussiar­nisaarfigisarpaannga Jehovallu uannik isumagin­ninneranik eqqaasit­tarlunnga. Ilaqutariis­suarnut asannittunut ilaagama Jehova qutsavigiuar­tarpara.”

17. Sooq Daavi ‘siooragisaqanngila’?

¹⁷ “Siooragisaqan­ngilanga najoramma.” Daavi navianar­torsiukulasarpoq pissaaneqangaar­tunillu akeraqarluni. Taamaattorli Jehovap asanninnera toqqissis­sutigisarpaa. Daavip nalunngilaa Jehovap sumiikkaluaruniluunniit najoraani, tamannalu tuppallersaatigisarpaa. Taamaattumik ima taalliorpoq: ‘Jehovap aniguisippaanga siooqqatigisannit tamanit.’ (Tuss 34:5) Ilaannikkut Daavi siooragisaqartarpoq, Jehovalli asanninnera toqqissis­sutigisarpaa.

18. Jehovamit asaneqarlutit nalunnginnakku ernumaninni qanoq nakussatsin­neqarsinnaavit?

¹⁸ Jehovamit asaneqarluta nalunngin­natsigu  ernumanitsinni qanoq nakussatsin­neqarsin­naavugut? Susi, pioneritut kiffartortoq, ernertik imminut toqummat uinilu qanoq misigisimanerlutik ima oqaluttuaraa: “Taamatut nalaataqarneq ajorluin­narlunilu alianar­torujussuuvoq ikioriarfis­saqanngitsutullu misiginarluni. Jehovalli qamannga pisumik asanninnera toqqissis­sutigaarput illersuutigalugulu.” Rachel siuliani eqqaasarput ima oqaluttuarpoq: “Taamaallunga unnuakkut aliasorujus­sualerama ernumalerlunga ersingaalerama nipituumik qiallunga Jehovamut qinuvunga. Qinoreerama tuppallersarlungalu uummatiga eqqissisippaa, soorlu anaanaasup naalungiarsuk eqqissisartaraa. Taavalu sinilersimavunga. Tamanna puiunngisaan­nassavara.” Utoqqaanertaq Tasosimik atilik sakkutuujumanani ukiuni sisamani parnaarus­sivimmiis­simavoq. Jehovap asanninnera isumassuineralu qanoq misigai? Ima oqaluttuarpoq: “Pisariaqar­titakka tamaasa sinnerlugit Jehovap isumagaanga. Tatigigaluarpara, maannakkulli tatiginerulerpara. Naak avatangiisikka nikallor­naraluartut Jehovap anersaani aqqutigalugu nuannaalersit­tarpaanga. Tamatuma qularun­naarsippaanga Jehova qaninnerulerukku ajunngisaarnera iluaqutiginerus­sallugu. Taamaattumik parnaarus­saaqqaninni pioneritut kiffartulerpunga.”

GUUTINNUT ASANNINGAARTUMUT QANILLIARTORIT

19. (a) Nalunngin­natsigu Guutimit asaneqarluta qinnutitsinnut qanoq sunniuteqarsinnaava? (b) Jehovap asanninnerata allaaserineqarnera sorleq illit killitsis­sutigaajuk? (Takuuk ungalusaq “ Allassimaffiit Jehovap qamannga pisumik asannin­neranik ersersitsisut”).

¹⁹ Misigisat sammeriikkatta ersersippaat Jehovap “Guutip asannittup” najoraatigut! (Kor 2. 13:11) Tamatta immikkut soqutigaatigut. Qularutigin­ngilluin­narparput Jehovap ‘asannin­neranit avatanger­neqarsimalluta’. (Tuss 32:10, Testamentitoqaq 1990-imi naqitigaq) Asanninnermik ersersitsisimaneranik eqqarsaatigin­ninnerujar­tortilluta qaninnerulis­savarput paasillugulu soqutigingaaraatigut. Ammasumik qinunikkut saaffigisin­naavarput oqaluttuullugulu asanninnera qanoq pisariaqar­titsiginerlugu. Qularinagu paasisaraatigut ikiorusungaaraatigullu isumakuluutigut tamaasa oqaatigisin­naavagut. – Tuss 145:18, 19.

20. Jehovap asanninnera taassumunnga qanoq qanillis­sutigisarparput?

²⁰ Soorlu ullormi qiianartumi ikumatitaq kissalaarfigisin­naagipput, taamatuttaaq Jehovap asanninnera annikil­liornerni ilungersunartunilu tuppallersaatigisin­naavarput. Taamaattumik Jehovap asanninnera tuppallersaasoq eqqissisitsisorlu nuannaarutigiuk. Qanortoq tamatta Jehovap asanninnera akillugu ima oqarisa: ‘Jehova asavara!’ – Tuss 116:1.