1. Nalitsinni inuppassuit suna anguniagarisarpaat?

 MALUGINIAR­TARPIUK inuppassuit imminut eqqarsaatigisartut? Assersuutigalugu imminut malugeq­qusaarniarlutik internetikkut attaveqaqatigiit­tarfinni iliuutsitik oqarataarutigisarpaat. Ikittuinnaat Jehova Guuti ataqqinaatis­sittarpaat. Allaaserisami matumani sammissavarput Jehovamik ataqqinaatissiineq qanoq paasisariaqartoq taamaalior­nissatsinnullu pissutaasut. Aamma sammissavarput uagut qanoq Guuti ataqqineqar­tariaqar­neratut ataqqinaatis­sissinnaagipput qanorlu Guutip atini siunissami ataqqinar­tikkumaaraa.

JEHOVAMIK ATAQQINAATISSIINEQ QANOQ PAASISARIAQARPA?

 2. Qaqqami Siinaajimi Jehova sua? (Asseq takuuk).

² Jehova Guutitut ataqqinangaartutut Biibilimi allaatigineqarpoq. Israalikkut Egyptenimit aniguisinnerisa kinguninngua Jehovap pissaaneqangaarnini ersersippaa. Takorlooruk qanoq pisoqartoq: Qaqqap Siinaajip killingani Israalikkut millionillit Guuti tusarnaar­niarlugu katersuupput. Nuissap ussissup qaqqaq ulippaa. Qaqqaq tamarmi – immaqa innermik anitsilluni – sakkortuumik sajuleriasaarpoq. Kallilerpoq innaallat­talerlunilu, sulluartaatit nipaattut nipitoorujus­suarmik nipeqarluni. (Mos 2. 19:16-18; 24:17; Tuss 68:8) Jehovap  alutornas­sutsini taamatut takutikkamiuk atini ataqqinarsisippaa. Israalikkut tupigutsangaarsimassapput.

 3. Jehovamik ataqqinaatissiineq qanoq paasisariaqarpa?

³ Inuit ilumut Jehova ataqqinaatis­sissinnaavaat? Aap. Assersuutigalugu pissaanera asseqan­ngitsoq pissusiilu nuannersut pillugit allanut oqaluus­sigaangatta Jehova ataqqinaatis­sittarparput. Aamma oqaraangatta Jehovamit ikiorneqarnerput pissutigalugu naammas­sisaqarsin­naalluta Jehova unnersiutigisarparput. (Es 26:12) Jehovamik ataqqinaatis­siinermut tunngatillugu kunngi Daavi maligas­saalluarpoq. Israalikkut takkuanni Jehovamut ima qinuvoq: “Illit pigaatit angingaassuseq, pissaaneq, naalannassuseq, kusanassuseq alutornas­suserlu; tassami qilammiittut nunamiittullu tamaasa pigaatit.” Daavi qinoreermat katersuuttut tamarmik Jehova unnersiutigaat. – Nal 1. 29:11, 20.

 4. Jiisusip qanoq Jehova ataqqinaatissippaa?

⁴ Jiisusip nunarsuarmiitilluni Jehovamit tupinnar­tuliorsin­naatitaanini eqqartoraangamiuk Ataatani ataqqinaatis­sittarpaa. (Mak 5:18-20) Aamma Ataatani pillugu oqaatsimigut allanillu pinnittar­nermigut Jehova ataqqinaatis­sittarpaa. Ilaanni Jiisusip synagogimi ilinniar­titsinerani arnaq ukiuni 18-ini anersaapiloqarsimasoq tusarnaaqataavoq. Anersaapilummit peqingaan­nalersin­neqarsimavoq. Ila alianassusia! Jiisusip ikiorusungaaramiuk ornippaa, asannit­tumillu oqarfigaa: “Arnaq, nappaatinnit aniguisitaavutit.” Attormani ingerlaannaq peqingajun­naarpoq “Guutilu unnersiutigilerlugu”. Ajorunnaarsin­neqarami Guuti qutsavigingaarpaa! (Luk 13:10-13) Jehovap unnersiutiginissaanut arnaq pissutis­saqarluarpoq – uaguttaaq pissutis­saqarluarpugut.

SOOQ JEHOVA UNNERSIUTIGIS­SAVARPUT?

 5. Sooq Jehova mianeraarput?

⁵ Jehova mianerigatsigu unnersiutigaarput. Jehovap mianerinissaanut arlalinnik pissutis­saqarpugut. Jehova killeqan­ngitsumik pissaaneqarpoq. (Tuss 96:4-7) Pinngor­titaanit tamanit ersarippoq asseqan­ngitsumik ilisimas­suseqartoq. Inuunerup pilerfigaa, inuussutis­satsinnillu tamanik pilersitsisuuvoq. (Saqq 4:11) Ilumoorfigin­nittuuvoq. (Saqq 15:4) Iliuusii tamarmik kinguneqarluartarput, neriorsuinermisullu iliortuaannarpoq. (Jos 23:14) Paasinarluinnarpoq Jehova pillugu Jeremia ima allammat: “Inuiaat tamarmik ilisimasortaanni kunngiisalu akornanni ilittut ittoqanngilaq”! (Jer 10:6, 7) Ataatatta qilammiusup mianerinissaanut ilumut pissutis­saqarluarpugut. Jehovali mianeriin­narnagu aamma asavarput.

 6. Sooq Jehova asavarput?

⁶ Jehova asangaaratsigu unnersiutigaarput. Pissusii nuannersorpassuit pissutigalugit Jehova asavarput. Misigit­tarlunilu nallittuingaarpoq. (Tuss 103:13; Es 49:15) Aliasuk­kaangatta nammineq aliasuttarpoq. (Zak 2:12) Qanimut ikinngutigiler­niassagatsinni ilisarisimaler­niassagatsinnilu ikiortarpaatigut. (Tuss 25:14; ApS 17:27) ‘Pavanersuaq issiagaluarluni maniguulluni nikanartoq pujualannit makitittarpaa.’ (Tuss 113:6, 7) Guuterput asseqan­ngitsoq unnersiutigerusupparput, ilaa? – Tuss 86:12.

 7. Immikkut ittumik sumik periarfis­saqarpugut?

⁷ Jehova pillugu ilumoortoq inunnut oqaluus­sissutigerusuk­katsigu unnersiutigaarput. Inuppassuit Jehova ilisarisiman­ngilaat. Sooq? Saatanip salluliuutinik siuarsaanermigut inuit tappiil­lisimmagit. (Kor 2. 4:4)  Taamaattumik inuppassuit isumaqarput Jehova Guutiusoq akiniaajumatooq, misigit­taatsoq naalliuutinullu pisuusoq. Uagulli Guuti pillugu ilumoortoq ilisimavarput! Inuit Jehovamik ilisarisiman­nilernis­saannut ikiorsin­naavagut taamaalillutalu Jehova ataqqinaatis­sillugu. (Es 43:10) Tussiaat 96-imi Jehovamik ataqqinaatis­siinerup pingaaruteqassusia erseqqis­sarneqarpoq. Tussiaat taanna sammitillugu Jehova ataqqineqar­tariaqar­neratut qanoq ataqqinaatis­sissinnaanerlugu eqqarsaatigiuk.

JEHOVA ATAQQINEQAR­TARIAQAR­NERATUT QANOQ ATAQQINAATIS­SISSINNAAVARPUT?

 8. Oqaatsitsigut Jehova qanoq ataqqinaatis­sissinnaavarput? (Tussiaat 96:1-3)

⁸ Tussiaat 96:1-3 atuakkit. Jehova pillugu oqaaseqar­nitsigut ataqqinaatis­sissinnaavarput. Versini taakkunani Jehova ‘erinarsorfigeq­qullugu’, ‘aqqa unnersiutigeq­qullugu’, ‘annaassinera nalunaajaatigeq­qullugu’ ‘inuiaallu naalannas­susianik oqaluttuuteq­qullugit’ kajumis­saarneqarpugut. Taamaalior­nitsigut Ataatarput qilammiusoq ataqqinaatis­sissinnaavarput. Itsaq Jehovamut kiffaasut aalajaatsut sapiillutik kinarpiaanera illersor­tarpaat. (Dan 3:16-18; ApS 4:29) Uaguttaaq taamaaliorsin­naavugut?

9-10. Angelenap misigisaa qanoq ilinniarfigaajuk? (Aamma asseq takuuk).

⁹ Angelenap a qatanngutip arnap USA-mi najugallip misigisaa assersuutigeriartigu. Suliffimmini Jehovap tusaamaneqarnera sapiilluni illersorpaa. Suliffit­taamini aallarterlaat allat peqatigalugit Angelena tunuliaquttani pillugu suleqatitaaminut ilisariteq­quneqarpoq. Angelenap Jehovamik Nalunaajaasuunerminik pilluaatigin­ninnini pillugu assit iluaqutigalugit oqaluttuar­nissani piareersarpaa. Tamannali sioqqullugu suleqataa angut imminut ilisaritin­nermini oqaluttuarpoq Jehovamik Nalunaajaasutut perorsar­neqarsimalluni. Jehovap Nalunaajaasuisa upperisaat ajortumik eqqartulerpaa. Angelena ima oqarpoq: “Uummatiga kassuppoq, eqqarsarpungali: ‘Jehova pillugu salluliortoq akuersaassavara? Imaluunniit illersussavara?’”

¹⁰ Suleqatini oqaluttuareermat Angelena qamuuna qinupal­lariarluni inussiar­nersumik suleqatini oqarfigaa: “Tunuliaquttagut assigiipajaarput. Uanga aamma Jehovamik Nalunaajaasutut  perorsar­neqarpunga, upperisarlu tamanna suli aalluppara.” Pisoq ilungersunaraluartoq Angelena eqqissisimavoq. Ikinngutinilu Jehovamut kiffartor­nerminni assinik suleqatiminut takutitsivoq upperisanilu ataqqin­nilluni oqaluttuaralugu. (Pet 1. 3:15) Qanoq kinguneqarpa? Angelena imminut ilisaritereermat angut siulliulluni ilisaritittoq eqqissiimivoq. Allaat nassuerutigaa Jehovamik Nalunaajaasutut perorsar­neqarnermini nuannersortai eqqaasimallugit. Angelena ima oqarpoq: “Jehova illersor­neqartariaqarpoq. Aqqa pillugu oqaluttuarneq ataqqinaataavoq.” Naak inuit ilaasa Jehova ataqqin­ngikkaluaraat uagut aqqa ataqqinarsisillugu oqaluttuarsin­naavugut.

11. Jehovamut kiffaasut Tussiaat 96:8-mi allassimasoq qanoq maleruar­tarpaat?

¹¹ Tussiaat 96:8 atuaruk. Pigisanik tunissuteqar­nitsigut Jehova ataqqinaatis­sissinnaavarput. Jehovap kiffai tamatigut taamaaliortarput. (Uss 3:9) Assersuutigalugu Israalikkut guutisiorfiup sananeqar­nissaanut aserfal­latsaalineqar­nissaanullu tunissuteqartarput. (Kng 2. 12:5, 6; Nal 1. 29:3-9) Ilinniartitat ilaasa “pigisatik atorlugit” Jiisusi apustilillu isumassor­tarpaat. (Luk 8:1-3) Kristumiut siulliit ilaat kaannersuarmik nalaataqartut uppeqatiminnit aningaasatigut ikiorneqarput. (ApS 11:27-29) Nalitsinni uaguttaaq kajumis­sutsimik tunissuteqar­nitsigut Jehova ataqqinaatis­sissinnaavarput.

12. Tunissutigut qanoq Jehovamut ataqqinaataasin­naappat? (Aamma asseq takuuk).

¹² Misigisaq tunissuteqar­tarnerup Jehovamut unnersiutaasar­neranik ersersitsisoq eqqarsaatigiuk. 2020-mi nalunaarusiami ersersin­neqarpoq Zimbabwemi panernersuaqarnerata kinguneranik kaannersuaqalersimasoq inuillu millionillit, aamma qatanngut arnaq Priscamik atilik, perlerlutik toqunis­saminnut aarlerinar­torsiortut. Pisut erloqinaraluartut Priscap pingasun­ngornikkut talliman­ngornikkullu oqaluus­sisarnini ingerlatiinnarpaa, allaat karrinik siaruar­teriffiup nalaani. Saniliisa oqaluus­sisarnera pillugu illaruaatigaat. Ima oqarfigaat: “Perlerlutit toqussaatit.” Priscap qularin­ngilluin­naramiuk Jehovap isumagiumaaraani ima oqarfigisarpai: “Jehovap kiffani imminiin­ngisaannarpai.” Sivitsun­ngitsorlu peqatigiif­fitsinniit ikiorsiissutit iluaqutigai. Tunissuteqartarneq pissutigalugu taamatut ikiorsiis­suteqar­toqarsinnaavoq. Priscap saniliisa tamanna ajasoorutigaat  oqarfigalugulu: “Guutip ikiortuarpaatit, taanna pillugu ilinniarusuppugut.” Saniliisa ilaat arfineq-marluk ilagiit ataatsimiin­nerinut najuuttalerput.

13. Pissusilersornerput qanoq Jehovamut ataqqinaataasinnaava? (Tussiaat 96:9)

¹³ Tussiaat 96:9 atuaruk. Pissusilersor­nitsigut Jehova ataqqinaatis­sissinnaavarput. Palasit guutisiorfimmi Jehovamut kiffartortut timikkut minguitsuusariaqarput. (Mos 2. 40:30-32) Pissusilersor­nikkullu minguitsuuneq aamma pingaaruteqarluinnarpoq. (Tuss 24:3, 4; Pet 1. 1:15, 16) “Kinaassusitoqaq” peertariaqarparput, taavalu “kinaassuseq nutaaq” atissavarput. Tassa minguttuunik iliuuseqar­naveersaarlutalu eqqarsaatipiloqar­naveersaassaagut, aamma Jehovap pissusii nuannersut ilaarlugit pissuseqar­niassaagut taassumatullu eqqarsar­tariaaseqar­niarsaraluta. (Kol 3:9, 10) Jehovap ikiuineratigut allaat ajoqisumik inooriaaseqartut allannguisin­naallutillu nutaamik kinaassuseqalersin­naapput.

14. Jackip misigisaa qanoq ilinniarfigaajuk? (Aamma asseq takuuk).

¹⁴ Jackimut tunngasoq eqqarsaatigiuk. Jack angutaavoq peqqarniitsumik nakuusertartoq. Taanna allaat ‘Anersaapilummik’ taagorneqartarpoq. Pinerlut­tuliortarnini pissutigalugit Jack toqumut pillagaavoq. Taamatulli pillagaan­nginnermini qatanngummit angummit parnaarus­sivimmut pulaartartumit Biibilimik ilinniar­tinneqar­nissani akueraa. Jack ajortorujus­suarnik iliuuseqarsimagaluarluni pissusitoqqani asooruppai imermullu morsutsin­neqarnis­saminut piukkun­narsilluni. Jack ima allannguisimatigimmat parnaarus­sivimmi paarsisut ilaat taanna pillagaalluni toqunneqar­tussanngormat qullipipput. Politiiuneq parnarus­sivimmi sulisoq ima oqarpoq: “Jack parnarussani ajornerpaagaluarpoq, maannali ajunngin­nerpaavoq.” Toqunneqar­neraniit sapaatip-akunnera qaangiuttoq qatanngutip parnarus­sivimmi ataatsimiitsitsisartup parnaarussaq alla ataatsimiigiaq­qaartoq naapippaa. Ataatsimiinnermut najuunnis­saminut suna kajumis­sissutigaa? Jackip allannguinera ajasoorutigaa, qanorlu Jehovamut kiffanngor­nissaminut iliortariaqarnini paaserusuppaa. Ersarippoq pissusilersor­nitsigut Ataatarput qilammiusoq naalannarsisis­sinnaagipput! – Pet 1. 2:12.

 JEHOVAP ATINI SIUNISSAMI QANOQ ATAQQINAR­TISSAVAA?

15. Jehovap atini qanoq qanittukkut ataqqinar­tilluin­nassavaa? (Tussiaat 96:10-13)

¹⁵ Tussiaat 96:10-13 atuakkit. Tussiaat 96-ip naanerani Jehova kunngitut eqqartuus­sisutullu naapertuil­luartutut allaatigineqarpoq. Jehovap atini qanoq qanittukkut ataqqinar­tissavaa? Pissutsit naapertuil­luartut atuutsilersin­nerisigut. Babylonersuaq Jehovap aqqanik nikanarsaataasumik iliuuseqar­tangaarami suujunnaarsin­neqassaaq. (Saqq 17:5, 16; 19:1, 2) Babylonersuup suujunnaarsin­neqarneranik takunnittut ilaasa immaqa Jehova ilagaluta kiffartorfigilissavaat. Kiisalu Saatanip silarsuaa ajortoq Jehovallu aqqanik mitaatiginnittut tamarmik Harmagedonnimi suujunaarsin­neqassapput. Jehovamut asannittut naalattullu tulluusimaarlutik aqqanik ataqqinar­titsisut aniguisin­neqarumaarput. (Mak 8:38; Tes 2. 1:6-10) Kristusi ukiuni 1.000-ini naalakkersuereerpat naggammik misilin­neqarnerup kingorna Jehovap aqqa illernarsisin­neqarluin­narumaarpoq. (Saqq 20:7-10) Taamanik­kussamut Jehovap “naalannas­susianik ilisimasaqarnerup nuna immissavaa soorlu ermit matoqqagaat immap naqqa”. – Hab 2:14.

16. Sunissat aalajangiusimaviuk? (Aamma asseq takuuk).

¹⁶ Inuit tamarmik Jehovap ataqqineqar­tariaqar­neratut aqqanik ataqqinar­titsinissaat qilanaarnaq! Tamannali pitinnagu sapinngisatsinnik Guuterput unnersiutigalugulu taanna pillugu oqaluus­siuarisa. Akisussaaffipput pingaarutilik tamanna eqqarsaatigiuarsin­naaqqullugu Siulersuisoqatigiit 2025-mi ukiumut allassimaffittut Tussiaat 96:8 toqqarsimavaat: Jehovap aqqa ataqqinar­tissiuk.