1. Jehova qanoq nuannaar­tissinnaavarput?

 TAKORLOORUK asasat immikkuul­larissumik, atorneqarluarsin­naasumik kusanar­tumillu tunissuteqarfigigit. Tunissut quimut iliinnarlugu eqqarsaatigiun­naarpagu pakatsingaas­sagunarputit. Akerlianilli atorluarpagu qujamasun­nerminillu ersersitsippat tamanna nuannaarutigingaassavat. Assersuut tamanna sumut atorsin­naavarput? Jehovap asanninnini kajumis­sissutigalugu ernini uagut pilluta tunniuppaa. Tunissutaa tamanna asanninneralu qujamasuutigalugit ersersitsigutta nuannaangaassaaq. – Joh 3:16; Rom 5:7, 8.

 2. Allaaserisami matumani suna sammissavarput?

² Piffissap ingerlanerani utertitsissummik tunissut taamaat­tussaannartut isigilersoorsin­naavarput. Tamatumali assigiin­nassavaa Guutimit tunissutisiarput quimut iliinnarutsigu. Nuannaarutigigaluarlugu eqqarsaatigisarun­naassavarput. Taamatut pisoqan­nginniassammat Jehovap Jiisusillu uagut pilluta iliuusii tamaasa eqqarsaatigisas­savagut. Taamaalior­nissatsinnut allaaserisaq una iluaqutigisin­naavarput. Sammissavarput utertitsissut maanna qanoq iluaqutigisar­neripput siunissamilu qanoq iluaqutigis­sanerlugu. Aamma paasissavarput Jehovap asannin­neranik qujamasuutigin­ninnerput qanoq ersersis­sinnaaneripput, ingammik eqqaaniaanissap qanilliar­tornerani kingornalu.

MAANNA QANOQ ILUAQUTIGISARIPPUT

 3. Ilaatigut qanoq utertitsissut maanna iluaqutigisarparput?

³ Jiisusip utertitsis­sutitut pilliutaa maanna iluaqutigisalereerparput. Assersuutigalugu utertitsis­sutitut akiliut tunngavigalugu Jehovap ajortuliatsinnik isumakkeerfigisarpaatigut. Isumakkeerfigerusut­tarpaatigut naak isumakkeerfigisariaqan­ngikkaluarluta. Tussiaasiortoq qujamasulluni Jehova pillugu  ima erinarsorpoq: “Illimmi ajunngitsuuvutit isumakkeerfigin­nikkumasarlutillu.” – Tuss 86:5; 103:3, 10-13.

 4. Jehovap kikkut pillugit utertitsissut pilersippaa? (Lukkarsi 5:32; Timuutiusimut 1. 1:15)

⁴ Immaqa ilaat Jehovamit isumakkeerfigineqar­nissaminnut ajukkupput. Ilumoorpoq arlaannarpul­luunniit Jehovamit isumakkeerfigineqar­nissaminut pisinnaatitaan­ngikkaluartoq. Apustili Paulusi tamanna paasillugu allappoq ‘apustilisut taaneqar­nissamut ajukkulluni’. Nangillunili ima allappoq: ‘Guutip ajunngisaangaarfigimmanga apustiliuvunga.’ (Kor 1. 15:9, 10) Ajortuliagut peqqissimis­sutigigutsigit Jehovap isumakkeerfigis­savaatigut. Sooq? Asagamisigut, imaanngitsoq pisassarigatsigu. Ajukkunnerit pissutigalugu nikallungaguit eqqaamajuk Jehovap utertitsissut ajorteqan­ngitsut pinnagit ajortuliaminnilli peqqissimis­sutiginnittut pillugit pilersikkaa. – Lukkarsi 5:32; Timuutiusimut 1. 1:15 atuakkit.

 5. Jehovamit isumakkeerfigineqar­nissatsinnut pisinnaatitaavugut? Nassuiaruk.

⁵ Isumaqas­sanngilagut ukiorpassuarni Jehovamut kiffartorsimagatta taassumannga isumakkeerfigineqar­nissatsinnut pisinnaatitaalluta. Soorunami aalajaatsuunerput Jehovap maluginiarlugulu nuannaarutigisarpaa. (Hebr 6:10) Erninili tunissutitut tunniuppaa, imaanngilaq imminut kiffartor­nitsinni iliuutsigut pillugit akilerluta. Taamaattumik isumaqarutta nallittor­neqarnissarput imaluunniit immikkut ittumik pineqar­nissarput pisinnaatitaaf­figalugu assigiin­nassavaa oqartugut Kristusi asulersuaq toqusimasoq. – Aamma takuuk Galaatiamiut 2:21.

 6. Sooq Paulusi Jehovamut kiffartor­nermini ilungersorpa?

⁶ Paulusip nalunngilaa Jehova pillugu qanorluunniit iliuuseqar­tigigaluaruni isumakkeerfigineqar­nissani pisinnaatitaaf­figinagu. Taavami sooq Jehovamut kiffartor­nermini ilungersorpa? Jehovap ajunngisaangaarnera pillugu qujamasunnini ersersin­niarlugu, imaanngitsoq isumakkeerfigineqar­nissani qulakkeer­niaramiuk. (Ef 3:7) Paulusitulli aallussil­luarluta kiffartor­tuarpugut, Jehovap isumakkeerfigin­ninnera pillugu qujamasunnerput ersersin­niarlugu.

 7. Utertitsissut maanna allatigut qanoq iluaqutigaarput? (Romamiut 5:1; Jaaku 2:23)

⁷ Utertitsissut maanna aamma iluaqutigaarput Jehova qanimut ikinngutigisin­naagatsigu. a Allaaserisap siuliani eqqaaneqartutut Guutimut attaveqarneq inunnguuserin­ngilarput. Kisianni utertitsis­sutitut akiliut pissutigalugu ‘Guuti eqqisseqatigisin­naavarput’ taassumunngalu qanillisin­naalluta. – Romamiut 5:1; Jaaku 2:23 atuakkit.

 8. Sooq Jehovamut qinusin­naatitaanerput qujamasuutigis­savarput?

⁸ Jehova qanimut ikinngutigisin­naagatsigu immikkuul­larissumik iliorsin­naatitaavugut – tassa taassumunnga qinusin­naatitaavugut. Jehovap ataatsimiinnerni innuttami qinnutaat tusarnaartarpai, aammali kisimiilluta nipaqan­ngitsumil­luunniit qinugaangatta tusarnaar­tarpaatigut. Qinugaangatta eqqissial­lattarpugut, qinunerli misigis­sutsikkut annertoq­qutaagin­nanngilaq. Qinusar­nitsigummi Guutimut qaninnerulersin­naavugut. (Tuss 65:3; Jaak 4:8; Joh 1. 5:14) Nunarsuarmiik­kallarami Jiisusi qinukulasarpoq nalunnginnamiuk Jehova tusarnaartartoq qinusarninilu Ataataminut qanillis­sutigiuas­sallugu. (Luk 5:16) Jiisusip pilliutaa pissutigalugu Jehovamut ikinngutaasin­naagatta allaallu taassumunnga qinusin­naagatta qujamasuutigeqaarput!

 SIUNISSAMI QANOQ ILUAQUTIGIS­SAGIPPUT

 9. Jehovamut kiffartortut aalajaatsut utertitsissut siunissami qanoq iluaqutigissavaat?

⁹ Jehovamut kiffartortut aalajaatsut utertitsissut siunissami qanoq iluaqutigissavaat? Naassaan­ngitsumik inuusin­naatitaassapput. Inuppassuit isumaqarput taamaat­toqarsin­naanngitsoq. Kikkummi tamarmik toqusartut nalunngilarput. Jehovalli aallaqqaammut siunertaraa inuit naassaan­ngitsumik inuunissaat. Adami ajortuliorsiman­ngikkaluarpat kikkut tamarmik inuuneq naassaan­ngitsoq nalingin­naasutut isigissagaluarpaat. Jehovap ernini asasani tunniullugu akisunerpaamik akiliimmat nalunngilarput inuuneq naassaan­ngitsoq takorluuinerin­naanngimmat upperil­luinnarsin­naagipput, maanna piviusorsior­nerorpasin­ngikkaluartoq. – Rom 8:32.

10. Tanitat suna qilanaaraat, aamma savat allat suna qilanaaraat?

¹⁰ Inuuneq naassaan­ngitsoq aatsaat siunissami misigis­sagaluaripput Jehovap kissaatigaa maanna eqqarsaatigisas­sagipput. Tanitat pissanganartumik suliassin­neqarlutik qilammi Kristusilu nunarsuarmut naalakkersuinissartik qilanaaraat. (Saqq 20:6) Savat allat nunarsuarmi anniaateqarnatik aliasuuteqar­natillu paratiisimi inuunissartik qilanaaraat. (Saqq 21:3, 4) Illit savat allat nunarsuarmi naassaan­ngitsumik inuunissamik neriuutillit ilagaatsit? Neriuut taanna tassaanngilaq qilammiin­nissamik neriuummit naleqan­nginnerusoq. Jehovammi inuit nunarsuarmi inuusussatut pinngor­timmagit nalunngilarput paratiisimi inuunissaq ilumut pilluar­nartuussasoq.

11-12. Paratiisissami pilluaq­qussutisiassat suut qilanaarisin­naavagut? (Aamma assit takukkit).

¹¹ Takorlooriaruk nunarsuarmi paratiisimi inuuneq qanoq ikkumaarnersoq. Napparsimasoqarnanilu toqusoqar­tassanngilaq. (Es 25:8; 33:24) Kissaatigisannik ajunngitsunik sunilluunniit Jehovap tuniumaarpaatit. Suut ilinniarusus­sinnaas­savigit? Uumasut timmissallu pillugit ilinniarnissat soqutiginar­tissaviuk? Imaluunniit fysikkimut kemiimul­luunniit  tunngasut? Nipilersornermut eqqumiitsulior­nermulluunniit tunngasut? Paratiisimi illuliassanik titartaasartut sanasullu pisariaqar­tissavagut. Aamma naasorissaasut, nerisassanik naatitsisartut, atortus­saliortartut naatsiivilerisullu pisariaqar­tinneqassapput. (Es 35:1; 65:21) Tamakkorpas­suarnut allarpas­suarnillu ilinniar­nissamut naassaan­ngitsumik piffissaqassaatit.

¹² Toqusunit makititaasut tikilluaq­qunissaat nuannaarutaangaassaaq! (ApS 24:15) Aamma takorlooruk Jehovap pinngor­titarpassui pillugit ilikkagaqar­nerujar­tortillutit Jehova pillugu ilikkakkatit qanoq nuannaarutigitigis­saneritit. (Tuss 104:24; Es 11:9) Nuanner­nerungaar­tumilli taamanik­kussamut ajortulior­tarunnaarsimas­sagavit pisuusutut misiginak Jehovamut kiffartornerit qanoq nuanner­tigissanersoq takorlooriaruk! Maanna ‘ajortip nuannersui qaangiutipal­lattartut nuannaarutigiin­narumallugit’ paratiisimi inuunissat annaariaan­naarusussaviuk? (Hebr 11:25) Soorunami naamik! Taamanik­kussamut inuunivik nuannivissoq pitsaanerungaassaaq maanna pilliuteqar­nitsinniit. Eqqaamajuk nunarsuarmi paratiisi qilanaarisarput piviusun­ngorumaartoq. Jehovap asangaarluta uagut pilluta Ernini tunniummagu tamakkorpassuit piviusun­ngorsin­naapput!

JEHOVAP ASANNINNERA QUJAMASUUTIGALUGU ERSERSIGUK

13. Jehovap asannin­neranik qujamasuutigin­ninnerput qanoq ersersis­sinnaavarput? (Korintimiunut 2. 6:1)

¹³ Jehovap utertitsissummik pilersitsineranik qujamasuutigin­ninnerput qanoq ersersis­sinnaavarput? Taassumunnga kiffartor­nitsinnik inuunermi pingaar­nerpaatitsinikkut. (Mat 6:33) Jiisusimi toquvoq “inuusut imminnik pillutik inuujun­naaqqullugit imminnilli toqqutiginnittoq toqusunillu makititaasoq pillugu inooqqullugit”. (Kor 2. 5:15) Jehovap ajunngisaangaarnerata siunertaa paatsoorusun­ngilluin­narparput. – Korintimiunut 2. 6:1 atuaruk.

14. Jehovap ilitsersuutaanik tutsuigin­ninnerput qanoq ersersis­sinnaavarput?

¹⁴ Jehovap asanninnera qujamasuutigalugu ersersis­sinnaavarput taassuma ilitsersuutaanik tutsuigin­ninnikkut. Qanoq taamaaliorsin­naavugut? Aalajangigas­saqartilluta, soorlu qanoq sivisutigisumik ilinniar­tuussanerluta imaluunniit qanoq ittumik suliffit­taassanerluta, Jehovap qanoq iliortik­kusunneraatigut eqqarsaatigis­savarput. (Kor 1. 10:31; Kor 2. 5:7) Uppernerput iliuutsikkut ersersik­kaangatsigu nuanningaartumik pisoqartarpoq, tassa Jehovamut upperneruler­tarlutalu attaveqarluar­neruler­tarpugut, aamma neriuutitta piviusun­ngornissaa upperineruler­tarparput. – Rom 5:3-5; Jaak 2:21, 22.

15. Eqqaaniaanissap qanilliar­tornerani kingornalu qujamasunnerput qanoq ersersis­sinnaavarput?

¹⁵ Jehovap asannin­neranik qujamasuutigin­ninnerput aamma allatigut ersersis­sinnaavarput. Tassa eqqaaniaanissap qanilliar­tornerani  kingornalu utertitsissummik qujamasuutigin­ninnitsinnik sapinngisatsinnik ersersitsinikkut. Eqqaaniaanermi najuunnissap pilersaarutiginerata saniatigut allanik qaaqqusisin­naavugut. (Tim 1. 2:4) Qaaqqusatit nassuiaatikkit eqqaaniaanermi susoqas­sanersoq. Iluaqutaassaaq jw.org-imi videut Sooq Jiisusi toqua? aamma Jiisusip toquneranik eqqaaniaaqataagit takutikkukkit. Utoqqaanertat unittooq­qasunik qaaqqusinissartik eqqaamassavaat. Jehovap savaataasa tammarsimasut ilaat uternis­saminut kajumis­suseqalerpat takorlooruk qilammiittut nunarsuarmiittullu qanoq nuannaar­tigissasut! (Luk 15:4-7) Eqqaaniaanermi uppeqatigut piinnarnagit aamma najuuteq­qaartut sivisuumillu najuussiman­ngitsut tikilluaq­qusaasutut misigitik­kusuppagut. – Rom 12:13.

16. Sooq eqqaaniaanissap qanilliar­tornerani kingornalu oqaluus­sinerunissarput pilersaarusius­savarput?

¹⁶ Eqqaaniaanissap qanilliar­tornerani kingornalu Jehovamut kiffartorninni iliuuseqar­nerusinnaavit? Iliuuseqar­neruguit Jehovap Jiisusillu uagut pilluta iliuusii qujamasuutigalugit ersersil­luassavat. Jehovamut kiffartornermi iliuuseqar­nerujar­tortilluta taassumannga tapersersor­neqarnerput misiginerus­savarput, tamatumalu kingunerisaanik tatiginerulis­savarput. (Kor 1. 3:9) Aamma eqqaamajuk eqqaaniaanermut atatillugu Biibilimi atuagassat Ullut tamaasa Allakkat misissortakkit-mi ulluinnar­niluunniit ataatsimiinnermut najoqqutassami innersuus­sutigineqartut atuarnissaat. Immaqa allassimaffiit taakku nammineq misissor­nerusin­naavatit.

17. Jehovap suna iluaraa? (Aamma ungalusaq “ Jehovamut qujamasunnerput qanoq ersersis­sinnaaneripput” takuuk).

¹⁷ Soorunami imaassinnaavoq pissutsit atukkatit pissutigalugit allaaserisami matumani siunnersuutigineqartut ilaannaat maleruarsin­naagitit. Eqqaamajulli Jehovap iliuutsitit inuit allat iliuusiinut sanilliunneq ajorai. Uummammiugisatit takusinnaavai. Utertitsissummik tunissutiminik qamannga pisumik qujamasuutigin­ninnerit takugaangamiuk iluarisarpaa. – Sam 1. 16:7; Mak 12:41-44.

18. Sooq Jehova Guuti aamma Jiisusi Kristusi qujamasuf­figaagut?

¹⁸ Utertitsissut pissutigalugu ajortuliatsinnik isumakkeerfigineqarsin­naavugut, Jehovamut ikinngutaasin­naavugut naassaan­ngitsumillu inuunissamik neriuuteqarsin­naalluta. Jehova, asannilluni taama pilluaq­qusisoq, qujamasuf­figalugu ersersit­tuartigu! (Joh 1. 4:19) Aamma Jiisusi, asangaaramisigut nunarsuarmi inuunerminik uagut pilluta pilliutiginnittoq, qujamasuf­figalugu ersersit­tuartigu! – Joh 15:13.