ATUAQQISSAAGASSAQ 3
ERINARSUUT 35 ‘Suut pingaarnerusut qulakkeertigit’
Jehovap iluarisaatut aalajangiisarit
“Naalakkamik mianerinninneq ilisimassusermut aallarniutaavoq, Illernartuusumik ilisimanninneq silaqassuseqalersitsisarpoq.” – USS 9:10.
SAMMISAQ
Silatusaartumik aalajangiiniassagaanni ilisimasaqarneq, paasisimasaqarneq naliliisinnaassuseqarnerlu sooq pisariaqartut.
1. Tamatta susariaqartarpugut?
ULLUT tamaasa aalajangigassaqartarpugut. Aalajangigassat ilaat, soorlu suut ullaakkorsiutigissanerlugit imaluunniit qassinut innassanerluta, aalajangeruminarnerusarput. Aalajangigassalli allat nalorninarnerusarput. Peqqissutsitsinnut, pilluarnissatsinnut, asasatsinnut Jehovamulluunniit kiffartornitsinnut sunniuteqarsinnaapput. Iluaqutigisassatsinnik ilaquttattalu iluaqutigisassaannik aalajangeerusuttarpugut. Pingaarnerpaatullu Jehovap iluarisaatut aalajangiinissarput kissaatigaarput. – Rom 12:1, 2.
2. Silatusaartumik aalajangiinissamut suut iluaqutigisinnaavigit?
2 Aalajangiilluarnerusinnaavutit (1) paasiniaaguit, (2) aalajangigassannut tunngatillugu Jehovap isumaa paasiniarukku aamma (3) periarfissat eqqarsaatigilluarukkit. Allaaserisami matumani iliuuserisassat taakku sammissavagut paasiniarlugulu qanoq naliliilluarnerusinnaasugut. – Uss 2:11.
PAASINIAAGIT
3. Aalajangiitinnak paasiniaaneq sooq pingaaruteqarpa? Assersuusiorit.
3 Aalajangiilluassagaanni iliuuserisassaq siulleq tassaavoq paasiniaaneq. Tamanna sooq pingaaruteqarpa? Takorlooriaruk perulunnartumik nappaateqarsorisoq nakorsiartoq. Nakorsap misissornagu apersornagulu nakorsartinnissaanut tunngatillugu aalajangiissava? Soorunami naamik. Illittaaq atukkannut tunngatillugu paasiniaaqqaaruit aalajangiilluarnerusinnaassaatit. Qanoq taamaaliorsinnaavit?
4. Ussatit 18:13 naapertorlugu qanoq paasiniaasinnaavit? (Aamma asseq takuuk).
4 Aperisarnikkut paasisaqarsinnaasarputit. Assersuutigalugu imaassinnaavoq katerisimaarnissamut qaaqqusaasutit. Ilaassavit? Suna pilersaarutaanersoq ilisimanngikkukku qaaqqusisorluunniit ilisarisimalluanngikkukku ima aperisinnaavat: “Sumi qaqugulu pissava? Inuit qassit aamma kikkut ilaassappat? Kina nakkutilliisuussava? Susoqassava? Aalakoornartortalinnik sassaallertoqassava?” Apeqqutit taakku akissutissarsigukkit silatusaartumik aalajangiinissannut iluaqutigissavat. – Ussatit 18:13 atuaruk.
5. Paasiniaareeruit sussavit?
5 Paaserusutatit paasereerukkit ataatsimut isigalugit eqqarsaatigilluakkit. Assersuutigalugu imaassinnaavoq paasigit Biibilimi najoqqutassianik ataqqinninngitsut ilaassasut imaluunniit nakkutilliisoqartinnagu aalakoornartortalinnik sassaallertoqassasoq. Ingasattumik festernermik kinguneqariaannaasinnaava? (Pet 1. 4:3) Una aamma eqqarsaatigiuk: Ilaaguit ataatsimiigianngitsuussavit imaluunniit oqaluusseqataanngitsoorlutit? Pissutsit ataatsimut eqqarsaatigilluarukkit aalajangiilluarnerusinnaavutit. Aammali allamik eqqarsaatigisassaqarputit. Nalunngilat illit qanoq isumaqarnerlutit, Jehovalli aalajangiunniakkat qanoq isumaqarfigaa? – Uss 2:6.
JEHOVA QANOQ ISUMAQARNERSOQ PAASINIARUK
6. Jaaku 1:5 naapertorlugu sooq Jehovamut ikioqqusassaagut?
6 Jehovap qanoq isumaqarnera paasiumallugu taassumunnga ikioqqugit. Jehovap neriorsorpaatigut ilisimassusermik tunissalluta. Aalajangiineq aalajangersimasoq iluarinerlugu paasiniassagatsigu ilisimassusermik “isornartorsiuinani tamanut tukkorluni” tunissuteqartarpoq. – Jaaku 1:5 atuaruk.
7. Jehovap isumaa qanoq paasiniarsinnaaviuk? Assersuuteqarit.
7 Qinunikkut Jehovamut ikioqqoreeruit akissutaa eqqumaffigilluaruk. Assersuuteqariarta: Nunami allami angalatillutit tammaruit angalaffigisanni najugaqartumut ikioqqusinnaavutit. Taavali suli akissuteqanngitsoq ingerlaannassavit? Soorunami naamik. Akissutaanut tusarnaaqqissaassaatit. Taamatuttaaq Jehovamut ilisimassusermik tuneqqullutit qinoreeraangavit Biibilimi inassutit najoqqutassiallu suut atukkannut naleqqunnersut misissornerisigut akissutaa paasiniartaruk. Assersuutigalugu katerisimaarnermut eqqaariikkatsinnut ilaassanerlutit aalajangiileruit pitsaassaaq uku pillugit Biibilimi allassimasut eqqarsaatigigukkit: Ingasattumik festerneq, ileqqorluttunik ilagisaqartarneq aamma Guutip kunngeqarfiata nammineq kissaatigisanniit salliuttuarnissaa. – Mat 6:33; Rom 13:13; Kor 1. 15:33.
8. Paasissutissarsiorninni ikiorneqartariaqaruit susinnaavit? (Aamma asseq takuuk).
8 Ilaannikkut paasissutissarsiorninni ikiorneqartariaqarsinnaavutit. Uppeqatinnut misilittagaqarluartunut siunnersoqqusinnaavutit. Aammali nammineq misissuiguit iluaqutigissavat. Biibililersaarutitsinni, soorlu Jehovap Nalunaajaasuisa ujarliutaanni aamma Biibili inuuninni iluaqutigiuk-mi paasissutissarpassuaqarpoq. Eqqaamajuk una anguniagassaasoq: Jehovap iluarisaatut aalajangiinissat.
9. Qanoq qulakkeersinnaavarput Jehovap iluarisaatut aalajangiinissarput? (Efesossimiut 5:17)
9 Jehovap iluarisaatut aalajangiinissarput qanoq qulakkeersinnaavarput? Pingaarnerpaatut Jehova ilisarisimallualertariaqarparput. Biibilimi allassimavoq ‘Illernartuusumik ilisimanninneq silaqassuseqalersitsisartoq’. (Uss 9:10) Aap, silaqassuseqalerumalluta Jehovap kinaassusia, piumasaa aamma suut nuannarinerai suullu uumiginerai pillugit ilisimasaqartariaqarpugut. Una eqqarsaatigiuk: ‘Jehova pillugu ilisimariikkakka eqqarsaatigalugit qanoq iluarisaatut aalajangiisinnaavunga?’ – Efesossimiut 5:17 atuaruk.
10. Sooq Biibilimi najoqqutassiat ilaquttatsinni kulturitsinniluunniit ileqqorineqartartunit pingaaruteqarneruppat?
10 Jehovap iluarisaatut iliorumalluta ilaannikkut asasatta pakatsissutigisaannik iliuuseqartariaqarsinnaasarpugut. Assersuutigalugu imaassinnaavoq angajoqqaat ajunngitsumik siunertallit panitsik inersimasoq angummik pisuumik – Jehovamulli attaveqarnerminik pingaartitsinngitsumik – aappaqaqqullugu kimigiiserfigigaat. Angajoqqaat panitsik ilorrisimaarnartumik inuuneqassasoq kissaatigaat. Kisianni paniusup eqqarsaatigisariaqarpaa angutip taassuma ikiussaneraani Jehovamut attaveqarluarnerulernissaminut. Jehova qanoq isumaqarpa? Tamanna Matiusi 6:33-mi paasisinnaavarput. Tassani kristumiut peqquneqarput ‘Guutip kunngeqarfia salliuttuassagaat’. Angajoqqaagut nunaqqatigullu ataqqivagut, Jehovalli nuannaartinnissaa pingaarnerpaatipparput.
PERIARFISSAT EQQARSAATIGILLUAKKIT
11. Pissuseq Filippimiut 1:9, 10-milu eqqaaneqartoq suna periarfissannik eqqarsaatiginnilluarnissannut iluaqutigissaviuk?
11 Najoqqutassiat Biibilimeersut aalajangigassannut naleqquttut paasereerukkit periarfissatit eqqarsaatigilluartariaqarpatit. (Filippimiut 1:9, 10 atuakkit; studienote “god dømmekraft” qallunaatuuaniittoq takuuk). Naliliisinnaassuseq iluaqutigalugu periarfissavit kingunerisinnaasaat paasisinnaavatit. Ilaannikkut aalajangeriaannaasarpugut. Aalajangigassalli allat aalajangeruminaassinnaapput. Naliliisinnaassuseq iluaqutigalugu allaat aalajangeruminaatsumik aalajangigassaqartillutit silatusaartumik aalajangiisinnaassaatit.
12-13. Sumi sulissanerlutit silatusaartumik aalajangiinissannut naliliisinnaassuseq qanoq iluaqutigissaviuk?
12 Takorlooriaruk ilaquttatit pilersorumallugit suliffissarsiortutit. Marlunnik periarfissaqarputit. Assigiinngitsunik paasisaqarputit, soorlu sumik suliaqassanerlutit, qaqugukkut suliffiunersoq, suliartorlutit angalasariaqarnerlutit il.il. Periarfissani taakkunani marlunni suliaq najoqqutassianut Biibilimeersunut akerliunngilaq. Immaqa aappaa iluarineruat nuannarisannik suliaqassagavit imaluunniit akissarsiornerussagavit. Aalajangiitinnalli aamma allanik eqqarsaatigisassaqarputit.
13 Assersuutigalugu ataatsimiinnerup nalaani sulisariaqassavit? Imaluunniit taanna suliffittaarissagukku ilaquttavit misigissutsikkut anersaakkullu pisariaqartitaannik matussusiinissannut ajoqutaassava? Taakku eqqarsaatigigukkit “suut pingaarnerpaanersut” – tassa Jehovamut kiffartornerit ilaquttavillu pisariaqartitaat – pingaarnerpaatissavatit, aningaasarsiorneq pinnagu. Taava Jehovap pilluaqqusinnaasaanik aalajangiisinnaassaatit.
14. Naliliisinnaassuseqarutta asanninnermillu ersersitsisarutta qanoq allanik naakkiutitsinaveersaarsinnaavugut?
14 Aamma naliliisinnaassuseqarutta eqqarsaatigisassavarput aalajangikkagut inoqatitsinnut qanoq sunniuteqassanersut allanik ‘naakkiutitsinaveersaarniassagatta’. (Flp 1:10) Tamanna ingammik pingaaruteqarpoq inuttut nammineq aalajangigassanut, soorlu atisalersoriaatsimut isikkorissariaatsimullu, tunngatillugu. Imaassinnaavoq atisalersoriaatsimik isikkorissariaatsimilluunniit aalajangersimasumik iluarisaqarnerusugut. Kisianni taamaannerput ilagiinniittut allalluunniit ajuallaatigissappassuk sussaagut? Naliliisinnaassuseqarutta allat misigissusii ataqqissavagut. Asanninneq kajumississutigalugu anneruniajuitsuulluta “allap iluaqutissaa” salliutissavarput. (Kor 1. 10:23, 24, 32; Tim 1. 2:9, 10) Taava asanninnitsinnik ataqqinninnitsinnillu ersersitsisumik aalajangiisinnaassaagut.
15. Pingaarutilimmik aalajangigassaqartillutit qanoq pilersaarusiortariaqarpit?
15 Pingaarutilimmik aalajangigassaqaruit eqqarsaatigiuk piviusunngortikkumallugu susariaqarnerlutit. Jiisusip ilinniartippaatigut arlaannik pilersaaruteqaraangatta ‘naatsorsortassagipput naammassinissaanut akissaqarnerluta’. (Luk 14:28) Taamaattumik aalajangiunniakkat piviusunngortikkumallugu qanoq piffissartornartigissanersoq, qanoq aningaasartuutaatigissanersoq qanorlu iliuuseqartigisariaqarnerlutit eqqarsaatigikkit. Immaqa ilaquttatit oqaloqatigisariaqarpatit aalajangigassaq tapersersussagunikku taakkua immikkut qanoq iliortariaqarnerannik isumaqatigiumallugit. Sooq taamatut pilersaarusiorneq pingaaruteqarpa? Imaassinnaavoq paasissagit arlaatigut allannguisariaqarnerlutit allatulluunniit aalajangiiguit pitsaanerussanersoq. Aamma ilaquttatit qanoq isumaqarnersut paasigukku ilimanarneruvoq aalajangigassap kinguneqarluarnissaanut tapersersussagaatsit. – Uss 15:22.
KINGUNEQARLUARTUSSAMIK AALAJANGIIGIT
16. Kinguneqarluartussamik aalajangiiumallutit susariaqarpit? (Aamma takuuk ungalusaq “ Qanoq silatusaartumik aalajangiisoqarsinnaasoq”).
16 Allaaserisami siunnersuutigineqartutut iliuuseqarsimaguit silatusaartumik aalajangiisinnaassaatit. Paasiniaasimavutit najoqqutassiallu Jehovap iluarisaatut aalajangiinissamut iluaqutigisassatit misissoreerlugit. Maanna aalajangiinerit kinguneqarluaqqullugu Jehovamut qinusinnaavutit.
17. Aalajangiilluarnissamut suna pingaarnerpaava?
17 Siornatigut kinguneqarluartumik aalajangiisarsimagaluaruilluunniit eqqaamajuk aalajangiilluarnissamut pingaarnerpaaq tassaasoq ilisimassusermik Jehovameersumik tutsuiginninneq, nammineq silaqassutsit misilittagaqarnerilluunniit pinnagit. Taassuma kisimi ilisimasaqarluarnermik, paasisimasaqarluarnermik naliliisinnaassusermillu tunisinnaavaatit. Taakkulu tassaapput ilisimassusermut tunngaviusut. (Uss 2:1-5) Jehovap iluarisamisut aalajangiinissannut ikiorsinnaavaatit! – Tuss 23:2, 3.
ERINARSUUT 28 Jehovamik ikinnguteqarneq