1. Sooq Jehovap aappariinnermik tunisimavaatigut?

 JEHOVA Guutiugami pilluartoq pilluar­nissarput kissaatigaa. (Tim 1. 1:11) Inuunermi nuannaarutis­saqarnias­sagatta tunissuterpas­suarnik tunisimavaatigut. (Jaak 1:17) Taakkualu ilagaat aappariinneq. Angut arnarlu katikkaangamik neriorsuisarput asaqatigiil­lutillu ataqqeqatigiin­niarlutik. Qanimut asaqatigiit­tuarunik pilluarlutik inooqatigiis­sinnaapput. – Uss 5:18.

 2. Sooq aappariip­passuit ingerlal­luanngillat?

² Ajoraluartumik aappariip­passuit ullormi katikkamik neriorsuutigisartik puiorsimagamikku pilluan­ngillat. Nunarsuaq tamakkerlugu peqqinnissamik suliniaqatigiiffiup nalunaarusiaa naapertorlugu uiusorpassuit nuliatik timikkut, oqaatsikkut misigis­sutsikkullu ajortumik pisarpaat. Uiusup allat isigitillugit nuliani ataqqin­nittuliorfigisin­naasarpaa kisimiik­kaangamilli ajortumik pisarlugu. Aappariip­passuarni uiusoq pornografiimik isiginnaarangat nuliaasoq asaneqan­ngitsutut pilluan­ngitsutullu misigisarpoq.

 3. Sooq uiusut ilarpassuisa nuliatik ajortumik pisarpaat?

³ Uiusut ilaasa nuliaminnik ajortumik pinnittarnerat sunik aallaaveqarsinnaava? Imaassinnaavoq nakuuser­tartumik ataataqarsimagamik isumaqartut taamaat­tussaannaasoq. Allat kulturimit avatangiiserisaminnit sunnerneqarsin­naapput isumaqalerlutillu angut “angutaal­luassaguni” naalagaanini takutin­niarlugu nuliaminut nakuuser­tuusariaqartoq. Ilaat misigis­sutsiminnik, soorlu kamannermik, aqutsinis­saminnik ilinniar­tinneqarsiman­ngillat. Angutillu ilaat pornografiimik isiginnaar­tarnermikkut arnanut atoqatigiin­nermullu eqqunngitsumik isiginnit­taaseqalersimapput. Tamakkua saniatigut nalunaarusiami takutin­neqarpoq nappaalanersuup COVID-19-ip nalaani ajornar­torsiutit taamaattut amerleriarsimasut. Soorunami pissutsit tamakku uiusup nuliaminut ajortumik pinninnissaanut utoqqatsis­sutaanngillat.

 4. Kristumiut uiusut suna mianersorfigisariaqarpaat, aamma sooq?

 ⁴ Kristumiut uiusut arnanut eqqunngitsumik isiginnit­taaseqalin­nginnissartik eqqumaf­figisariaqarpaat. a Sooq? Pissutaasut ilagaat inuup eqqarsaatini timitalerusut­tarmagit. Apustilip Paulusip Romami kristumiut tanitat ima mianersoqquai: “Nalitsinni pissutsinut naleqqus­sassaaritsi.” (Rom 12:1, 2) Paulusi Romamiunut allammat ilagiit ukiuni arlalinni kristumiooreersimapput. Paulusilli oqaasiinit erserpoq ilagiin­niittut ilaat inuit ileqquinit eqqarsar­taasiannillu suli sunnerneqartartut. Taamaattumik allanngoq­qullugit kajumis­saarpai. Kajumis­saarutaa taanna aamma ullumikkut kristumiunut uiusunut atuuppoq. Ajoraluar­tumilli ilaat inuit eqqarsar­taasiannit sunnerneqarsimapput allaallu nuliaminnik ajortumik pinnittarlutik. b Jehovap uiusut nuliatik qanoq pisassagaat kissaatigaa? Tamanna akissutis­sarsisin­naavarput allassimaffimmi qulequtarisatsinni.

 5. Petrusimit allakkat siulliit 3:7 naapertorlugu uiusup nuliani qanoq pisassavaa?

⁵ Petrusimit 1. 3:7 atuaruk. Jehovap uiusut nuliaminnik ataqqin­neqquai. Uiusoq nuliaminik ataqqinnittoq nuliaminut inussiar­nersuullunilu asannit­tuussaaq. Allaaserisami matumani uiusup nuliaminut ataqqin­nittumik qanoq ersersitsisin­naanera sammissavarput. Siullertulli nuliaminut qanoq iliuuseqar­tannginnissaa eqqartus­savarput.

NULIAT ATAQQIN­NINNGITSULIORFIGEQINAGU

 6. Jehovap angutit nuliaminnut nakuusertartut qanoq isumaqarfigai? (Kolossimiut 3:19)

⁶ Nakuuserfigeqinagu. Jehovap kinaluunniit nakuusertoq uumigaa. (Tuss 11:5) Pingaar­nertullu uiusut nuliaminnut sukannersumik pinnittartut assuarai. (Mal 2:16; Kolossimiut 3:19 atuaruk, aamma quppernerup ataani ilanngussaq takuuk). Allassimaffik qulequtarisarput, Petrusimit allakkat siulliit 3:7, naapertorlugu uiusup nuliani ajunngitsumik pinngikkuniuk Guutimut attaveqar­neranut sunniuteqarsinnaavoq. Allaat qinnutai Jehovap tusarumajun­naarsinnaavai.

 7. Efesossimiut 4:31, 32-lu naapertorlugit uiusoq nuliaminut qanoq oqaluttas­sanngila? (Aamma “Nassuiaat” takuuk).

⁷ Oqaatsitigut nakuuserfigeqinagu. Uiusut ilaasa nuliatik nakuuserfigisarpaat ajuallatsitsinermikkut kamarujus­suarlutillu oqalunnermikkut. Kisianni Jehovap ‘kamannerit, kamarujus­suarnerit, nillianerit ajuallan­nartumillu oqalunnerit’ uumigai. c (Efesossimiut 4:31, 32 atuakkit). Oqaaserineqartut tamaasa tusaasarpai. Uiusup nuliaminut qanoq oqaluttarnera, aamma kisimiik­kaangamik, Jehovap pingaartippaa. Nuliani sukannersumik oqaluut­taruniuk nuliaminut attaveqarnini ajoqusiin­narnagu Jehovamut ikinngutaanini aamma navianar­torsior­tittarpaa. – Jaak 1:26.

 8. Jehovap pornografii qanoq isumaqarfigaa, aamma sooq?

⁸ Pornografiimik isiginnaaqinak. Jehovap pornografii qanoq isumaqarfigaa? Uumigaa. Taamaattumik uiusup tamakkuninnga isiginnaartartup Jehovamut attaveqarnini ajoqusertarpaa nulianilu ataqqin­ninngitsuliorfigisarlugu. d Jehovap piumasaraa uiusup iliuutsimigut aamma eqqarsar­taatsimigut nuliani ilumoorfigiuassagaa. Jiisusi oqarpoq  angutip arnaq pileris­suseqarfigalugu isigiuaruniuk ‘isummamigut allasiorfigereeraa’. e – Mat 5:28, 29.

 9. Sooq uiusup nuliaminut atoqatigiinnerup tungaatigut nikagin­nittulior­tarnera Jehovap uumigaa?

⁹ Atoqatigiinnerup tungaatigut nikagin­nittuliorfigeqinagu. Uiusut ilaasa nuliatik atoqatigiinnerup tungaatigut pinngitsaalillugit iliuuseqar­tinniar­tarpaat nuliaasumut minguttutut asaneqan­ngitsutullu misigititsisartunik. Jehovap taamatut namminis­sarsiorluni asannin­ngitsuliorlunilu iliuutsit uumigai. Piumasaraa uiusup nuliani asallugulu qujamasuutigissagaa misigis­susiilu ataqqillugit. (Ef 5:28, 29) Taavami kristumiu uiusoq nuliaminut nikanarsaasarlunilu nakuusertaruni pornografiimil­luunniit isiginnaartaruni? Qanoq ililluni eqqarsar­taatsini iliuutsinilu allanngor­tissinnaavai?

ATAQQIN­NINNGITSULIORNERIT QANOQ UNITSIS­SINNAAGIT

10. Uiusut Jiisusip maligas­siuinera qanoq iluaqutigisin­naavaat?

¹⁰ Uiusup nuliani qanoq nakuuserfigisarun­naarlugulu nikassaasumik iliuuseqarfigisarun­naarsinnaavaa? Sapinngisaminik Jiisusi ilaarniarsarisinnaavaa. Naak Jiisusi nuliaqarsiman­ngikkaluarluni ilinniar­titaminut pissusilersor­nermigut uiusut nuliaminnut qanoq pissusilersor­tarnissaannut maligas­siuivoq. (Ef 5:25) Assersuutigalugu Jiisusip apustiliminut qanoq pissuseqarlunilu oqaluttarnera uiusut qanoq ilinniarfigisin­naagaat eqqarsaatigeriaruk.

11. Jiisusip apustilini qanoq pisarpai?

¹¹ Jiisusip apustilini inussiar­nisaarfigalugillu ataqqin­nittumik pisarpai. Sakkortusaar­nianngisaan­narlunilu naalagaaniarneq ajorpoq. Naak Naalagaagaluarluni Jiisusi misigin­ngisaannarpoq oqartus­saanini nakuuserluni annerunias­sutigis­sallugu. Maniguulluni kiffartuuttarpai. (Joh 13:12-17) Ilinniar­titaminut ima oqarpoq: ‘Saamagama maniguul­lungalu ilinniarfigisinga, taava nakussatsissaasi.’ (Mat 11:28-30) Maluginiaruk Jiisusi saamasuummat. Inuk saamasoq sanngiitsuunngilaq. Akerlianilli qamuuna nukittugami imminut aqussinnaavoq. Kamassaar­neqaraangami eqqissisimanian­nnarlunilu misigis­sutsini aqussin­naasarpai.

12. Jiisusi allanut qanoq oqaluttarpa?

¹² Jiisusi oqaatsimigut tuppallersaallunilu qiimmas­saasarpoq. Malinnitsiminut sakkortuumik oqalunneq ajorpoq. (Luk 8:47, 48) Akerlilersor­timinit asissor­neqarlunilu kamassaar­neqaraluarluni “akilluni asissuineq ajorpoq”. (Pet 1. 2:21-23) Ilaatigut sakkortuumik akiniarnani Jiisusi nipangersimaan­nartarpoq. (Mat 27:12-14) Kristumiunut uiusunut maligas­saalluangaarami!

13. Uiusoq qanoq ‘nuliaminut atajuarsinnaava’? (Matiusi 19:4-6) (Aamma asseq takuuk).

¹³ Jiisusip uiusut ilitsersorpai nuliaminnut ilumoorfigin­nittuassasut. Ataatami oqaasii issuarpai oqarluni angut ‘nuliaminut atajuassasoq’. (Matiusi 19:4-6 atuakkit). Grækerisut oqaluut atorneqartoq ‘atajuarnermik’ nutserneqartoq nutsiin­navillugu isumaqarpoq ‘liimmerlugu’. Taamaattumik aappariit asaqatigiinnerat ima sakkortutigissaaq soorlulusooq imminnut liimmersimasut. Ataqatigiinnerat innarler­neqarpat marluullutik anniaatigissavaat. Uiusup nuliaminik asanningaartup pornografiimut tunngasut suulluunniit itigartissavai. Naleqan­ngitsut suulluunniit isigiumanagit ingerlaannaq alassavai. (Tuss 119:37) Aap, Juubitut isini isumaqatigiis­suteqarfigissavai arnaq nuliarin­ngisani pileris­suseqarfigalugu isigiumanagu. – Job 31:1.

14. Uiusup nakuusertartup Jehovamut nuliaminullu attaveqarnini iluarsiniarlugu iliuuserisassai suuppat?

 ¹⁴ Uiusoq oqaatsimigut timikkul­luunniit nakuusertartoq Jehovamut nuliaminullu attaveqarnini iluarsiniarlugu arlalinnik iliuuseqar­tariaqarpoq. Iliuuserisassai suuppat? Siullertut, ajornar­torsiuteqarnini nassuerutigisariaqarpaa. Jehovammi iliuusii tamaasa takusinnaavai oqaasiilu tamaasa tusaasin­naallugit. (Tuss 44:22; Oqal 12:14; Hebr 4:13) Aappaattut, nuliani nakuuserfigisarun­naartariaqarpaa pissusinilu allanngor­tillugu. (Uss 28:13) Pingajuattut, nuliaminut Jehovamullu utoqqatsissaaq qamanngalu pisumik isumakkeerfigeq­qulluni. (ApS 3:19) Aamma Jehovamut kimigiiserluni allanngor­nissaminut piumassuseqaleq­qulluni aamma eqqarsaatiminik, oqaatsiminik iliuutsiminillu aqutsisin­naanissaminik ikioqqulluni qinussaaq. (Tuss 51:12-14; Kor 2. 10:5; Flp 2:13) Sisamaattut, nakuusernerit ajuallan­nartumillu oqalunnerit suulluunniit uumigiler­nissaat ilinniar­niarlugu qinnutiminut naapertuuttumik iliuuseqassaaq. (Tuss 97:10) Tallimaattut, ikiorneqarumalluni erngerluni ilagiinni utoqqaanertanut saaffigin­nissaaq. (Jaak 5:14-16) Arferngattut, siunissami eqqunngitsuliun­nginnissamut iluaqutigisin­naasaminik pilersaarusiussaaq. Uiusoq pornografiimik isiginnaartaruni alloriarnerit aamma taakku atussavai. Allannguinis­saminik ilungersorluni iliuuseqarnera Jehovap pilluaq­qussavaa. (Tuss 37:5) Kisianni nuliaminik ajortumik pinnittarun­naarnera naammanngilaq. Qanoq ataqqin­nittumik iliuuseqarfigisin­naanerlugu aamma ilikkar­tariaqarpaa. Qanoq taamaaliorsinnaava?

NULIAT QANOQ ATAQQIN­NITTUMIK PISINNAAGIT

15. Uiusup nuliaminik asanninnini qanoq takutis­sinnaavaa?

¹⁵ Asannit­tuliorfigiuk. Uiusut ilaat nuliaminnik asanninnertik ullut tamaasa takutin­niarlugu iliuuseqartarput. (Joh 1. 3:18) Uiusup annikitsutigut nuliaminut asanninnini takutis­sinnaavaa soorlu tasiorlugu eqitaarluguluunniit. Aamma ullup ingerlanerani ima allaffigisinnaavaa: “Maqaasivakkit” imaluunniit “Ullumikkut  qanoq ippit?” Ilaatigut asanninnini takutis­sinnaavaa kusanartumik isumatusaar­tumillu kortimik allaffigalugu. Uiusup taamaalior­nermigut nuliani ataqqin­nittuliorfigisarpaa aappariin­nertillu nakussatsit­tarlugu.

16. Uiusup sooq nuliani qujamasuutigissavaa?

¹⁶ Qujamasunnermik ersersitsigit. Uiusup nuliaminik ataqqinnittup nuliani paasitissavaa sooq naleqar­tinnerlugu. Taamaaliorsinnaavoq nuliaminit sunik tamanik ikiorneqar­tarnini qujamasuutigisarnissaa eqqaamaguniuk. (Kol 3:15) Nuliani sooq asanerlugu paasisitsigaangat nuliaasumut qamuuna kissalaar­titsisarpoq, misigisarpoq toqqissisimalluni, asaneqarluni aammalu ataqqineqarluni. – Uss 31:28.

17. Uiusup nuliani qanoq ataqqin­nittumik pisarsinnaavaa?

¹⁷ Inussiar­nersuul­lutillu ataqqin­nittuugit. Uiusup nuliaminik asannittup nuliani naleqar­tillugulu qujamasuutigisarpaa. Jehovamit tunissutitut naleqangaartutut isigaa. (Uss 18:22; 31:10) Taamaattumik inussiar­nisaarfigalugulu ataqqin­nittumik pisarpaa, aamma atoqatigiinnerup tungaatigut. Atoqatigiinnerup tungaatigut nuannarin­ngisaanik iliuuseqar­tinniarsarinavianngilaa nikanarsaataasin­naasumik nalunngeqatigin­nissutaanul­luunniit akornutaasin­naasumik. f Aamma nammineq nalunngeqatigin­nissutiminut akornutaasin­naasumik iliuuseqar­niarnavianngilaq. – ApS 24:16.

18. Uiusut suna aalajangiusimassavaat? (Aamma ungalusaq “ Ataqqin­ninnermik ersersitseriaatsit sisamat” takuuk).

¹⁸ Qularis­sanngilat Jehovap nuannaarutigingaartaraa sapinngisannik nuliat oqaatsitigut iliuutsitigullu ataqqin­nittumik pigaangakku. Ataqqin­nittumik pisarnissaa aalajangiusimajuk nikanarsaataasumik iliuuseqan­nginnikkut akerlianilli inussiar­nisaarfigisarlugu, ataqqin­nittumik pisarlugu asannit­tuliorfigalugulu. Taamaalioruit takutissavat asallugu naleqar­tillugulu. Nuliat ataqqin­nittumik pisaruk, taava Jehovamut ikinngutaanerit – attaveqarnerit pingaar­nerpaaq – illersussavat. – Tuss 25:14.