1, 2. Sooq silarsuarmi matumani piitsoqar­tuaan­nas­sava?

UL­LUMIK­KUT aningaasarsior­nik­kut aaq­qis­suus­sinerit naak­kit­taaf­fiul­lutil­lu naaper­tuil­luan­ngitsuup­put. As­sersuutigalugu inuusut­tut sulif­fis­sarsior­tuaraluarlutik sulif­feqan­ngil­lat. Ilaasa inuuner­tik navianar­torsior­til­lugu nunanut pigis­saarfiusunut nuut­tar­put. Nunanilu pigis­saarfiusuni piitsor­pas­suaqar­poq. Silarsuarmi sumi tamani pisuut pisuujuneruleralut­tuin­nar­put piitsul­lu piitsuuneruleralut­tuin­narlutik. Mis­singersuutit nutaat naaper­torlugit inuit 1 procentii pisuujungaaramik inuit sin­nerisa tamak­kiul­lugu aningaasaateqar­nerat­tul­li aningaasaateqar­tigip­put. Erseq­qip­poq inuit ilaasa inuunermi sin­neran­nut naam­mat­torsuar­nik aningaasaateqar­tut inuit mil­liardil­lit al­lat piitsorujus­suusut. Jiisusip taman­na erseq­qis­sar­paa ima oqarluni: ‘Piitsut najor­tigiuar­pasi.’ (Mark 14:7) Sooq taama naaper­tuil­luan­ngitsoqar­tigaa?

² Jiisusip nalun­ngilaa Guutip naalagaaf­fiata kisimi silarsuarmi matumani niuer­nik­kut aaq­qis­suus­sinerit al­lan­ngor­tis­sin­naagai. Biibilimi ersersin­neqar­poq “niuer­tut”, tas­sa niuer­nik­kut aaq­qis­suus­sinerit, aam­ma politik­kik­kut up­perisarsior­nik­kul­lu aaq­qis­suus­sinerit Saatanip silarsuaanut  ilaasut. (Saqq 18:3) Guutip kif­fai politik­kimit up­perisarsior­nermil­lu eq­qun­ngitsumit avis­saaq­qal­luin­nar­put. Taak­kuali amerlanersaat Saatanip silarsuaata ilaanit niuer­nermit avis­saaq­qal­luin­narsin­naan­ngil­lat.

3. Apeq­qutit suut sam­mis­savavut?

³ Silarsuup niuer­nik­kut aaq­qis­suus­sineranut isigin­nit­taaser­put misis­sor­niarlugu im­minut ima aperisariaqar­pugut: ‘Pigisak­ka atorlugit Guutimut aalajaan­nera qanoq ersersis­sin­naavara? Niuer­nerup silarsuaanut qanoq akuliusimaval­laarun­naarsin­naavunga? Guutip in­nut­taasa taas­sumin­nga tatigin­nil­luin­nar­nerat nalitsin­ni misigisanit sunit erser­pa?’

4, 5. (a) Jiisusip oqalut­tuaani pisor­taq qanoq pineqar­pa? (b) Jiisusip ajoqersuk­kani qanoq peq­quai?

⁴ Lukasi 16:1-9 atuakkit. Jiisusip pisor­tamik peq­qusersuumik oqalut­tuaa tamatsin­nut eq­qarsaatis­siivoq. Pisor­taq naalak­kami pigisaanik atuipilut­tutut un­nerluutigineqar­poq, naalagaalu aalajanger­poq taan­na soraarsin­niarlugu. * Pisor­tarli ‘silatusaar­poq’. Atorfini qimatsin­nagu kingusin­nerusuk­kut ikior­tigisin­naasaminik ikin­ngutis­sarsior­poq. Soorunami Jiisusip ajoqersuk­kani kajumis­saan­ngilai, inuit silarsuarmi matumaniit­tut ilior­tar­nerat­tut, aniguiniarlutik naaper­tuil­luan­ngitsulius­sasut. Oqalut­tuarli atorlugu pingaaruteqangaar­tumik ilin­niar­tin­niar­paatigut.

⁵ Jiisusip nalun­ngilaa pisor­tatut ajor­nar­torsiuteqaleriataar­tutut ajoqersuk­kami amerlanersaat silarsuarmi naaper­tuil­luan­ngitsuliorfiusumi matumani inuus­sutis­saqar­niar­nermin­ni ajor­nar­torsiuteqaleriataas­sasut. Taamaat­tumik ima oqarfigai: “Mam­moni [pisuus­sutit, NW] peq­quserluut ikin­ngutis­sarsiutigisiuk nungup­pat taak­kua [Jehovap Jiisusil­lu] ilas­sisin­naanias­sam­masi inigisani it­tuin­nar­tuni.” Jiisusip siun­nersuutaa qanoq ilin­niarfigisin­naavar­put?

6. Nalitsin­ni niuer­nik­kut aaq­qis­suus­sinerit Guutip siuner­taanut ilaan­ngitsut qanoq nalun­ngilar­put?

⁶ Jiisusip nas­suian­ngik­kaluaraa sooq pigisat ‘peq­quserluutinik’ taanerlugit Biibilimi erseq­qis­sar­neqar­poq aningaasaater­pas­suaateqaler­niar­neq Guutip siuner­taanut ilaan­ngitsoq. As­sersuutigalugu Adami Evalu naatsiivim­mi Edenimi pisariaqar­titaat sin­nerlugit tuk­korluni tunivai. (1 Mos 2:15, 16) Kingusin­nerusuk­kut Guutip tanitat anersaamik il­ler­nar­tumik tanereerai taak­kua ‘arlaan­naataluun­niit pigisani nam­miniin­naq pigisaminik taaneq ajor­paa, tamarmil­li suut tamaasa pigeqatigiip­paat’. (ApS 4:32) Pruf­fiiti Esaja al­lap­poq siunis­sami inuit tamarmik nunap inerititaanik sumil­luun­niit akeqan­ngitsumik atuilerumaar­tut. (Es 25:6-9; 65:21, 22) Pif­fis­sarli taman­na nal­liutserlugu Jiisusip ajoqersugai ‘silatusaar­tariaqar­put’. Silarsuarmi matumani pigisat peq­quserluutit inuunermin­ni ator­til­lugit Guutimit iluarisaaniar­tariaqar­put.

7. Lukasip iivangkiiliuani kapitali 16-imi Jiisusi qanoq siun­nersuiva?

⁷ Lukasi 16:10-13 atuakkit. Jiisusip oqalut­tuaani pisor­taq nam­mineq iluaqutis­saminik ikin­ngutis­sarsivoq. Jiisusil­li kis­saatigaa ajoqersuk­kani nam­minis­sarsioratik qilam­mi ikin­ngutis­sarsis­sasut. Paasitin­niar­paatigut pisuus­sutitsin­nik peq­quserluutinik atuinitsigut Guutimut aalajaan­ner­put ersersis­sin­naagip­put. Qanoq taamaaliorsin­naavugut?

8, 9. Pisuus­sutit peq­quserluutit atorlugit aalajaan­nermik ersersitsisunik as­sersuuteqarit.

⁸ Ilaatigut aalajaan­ner­put ersersis­sin­naavar­put Jiisusip silarsuaq tamak­kerlugu oqaluus­seq­qusinera tapersersorlugu pigisanik tunisisar­nik­kut. (Matt 24:14) Niviarsiaraq Indiami najugalik aningaasanut nak­kakaatitsiveeraateqar­poq, al­laat pin­nguarsis­saarluni nak­kar­titsivigisar­tak­kaminik. Ulik­kaarmat aningaasat katersani oqaluus­sinermut atugas­san­ngorlugit tunis­sutigai. Qatan­ngut angut Indiami najugalik qaq­qor­tariarsuar­nik tunisas­sior­tuuvoq. Oqaatsinut malayalamimut nutserivim­miit­tunut qaq­qor­tariarsuit amerlasuut tunis­sutigai. Nutserivim­mi qaq­qor­tariarsuit pisariaqar­tin­neqarmata misigivoq tunis­sutini aningaasanit naleqar­nerusut. Taman­na ‘silatusaar­neruvoq’. Taamatut­taaq Grækenlandimi qatan­ngutit Betelimut uuliaqutip uuliaanik, im­mus­suar­nik nerisas­sanil­lu al­lanik tunis­suteqar­tar­put.

⁹ Qatan­ngutip al­lap Sri Lankami il­luni ataatsimiit­tarfit­tut ataatsimeersuar­tarfit­tul­lu pif­fis­sarlu tamaat kif­far­tor­tunik inis­satut atuk­kiup­paa. Taamaalior­nermigut iluanaarutis­saraluani an­naavai, oqaluus­sisar­tunul­li aningaasaateqar­pian­ngitsunut iluaqutaangaar­poq. Nunani sulinitsin­nik iner­teq­qutaaf­fiusuni qatan­ngutit angerlarsimaf­fitik naalagaaf­filersaarfit­tut ator­tar­paat. Taamaalior­nerisigut pionerit qatan­ngutil­lu al­lat pis­saatikitsut akiliisar­natik ataatsimiit­tarfeqar­put.

10. Tuk­korluta tunisisar­ner­put ilaatigut qanoq iluaqutigisar­par­put?

¹⁰ Siuliani as­sersuutigineqar­tunit erser­poq Guutip in­nut­tai ‘an­nikitsutigut ilumoor­tuusut’, tas­sa pisuus­sutinik nunap piinik anersaak­kut pisuus­sutinit nalikin­nerusunik atuinermi ilumoor­tuusut. (Luk 16:10) Jehovap ikin­ngutai taak­ku taamatut pil­liuteqaramik qanoq misigip­pat? Tuk­kor­tuugaangamik qilam­mi pisuus­sutiviit pigiler­tarlugit nalun­ngin­namik­ku pil­luar­put. (Luk 16:11) Qatan­ngut ar­naq Guutip naalagaaf­fiata sulineranut aalajangersimasumik  tunis­suteqar­tar­toq oqalut­tuar­poq ukiuni kingul­ler­ni inut­tut al­lan­ngorluni. Ima nas­suiaavoq: “Paasivara pigisatigut tuk­kor­tuunerujar­tor­til­lunga inoqatin­nut isigin­nit­taasera pitsaanerujar­tuin­nar­toq. Isumak­keerfigin­nil­laq­qin­nerujar­tor­punga, al­lanut naam­magit­tar­nerujar­tor­punga pakatsigaangamalu nikal­lujuin­nerujar­tor­punga siun­nersuutinil­lu akuersil­laq­qin­nerujar­torlunga.” Inup­pas­suit paasisimavaat tuk­kor­tuuneq inut­tut iluaqutigisarlugu. – Tuss 112:5; Uss 22:9.

11. (a) ‘Silatusaar­ner­put’ tuk­kor­tuunitsin­nit qanoq erser­pa? (b) Ul­lumik­kut Jehovap peqatigiis­sor­taani qanoq pisoqar­tar­pa? (Al­laaserisap aal­laq­qaataani as­siliaq takuuk).

¹¹ Aam­ma ‘silatusaar­tar­pugut’ pigisavut oqaluus­sisar­tunik al­lanik tapersersuinermut atoraangatsigit. Taava pif­fis­saq tamaat imaluun­niit oqaluus­sisar­tunik pisariaqar­titsif­fiusumi kif­far­torsin­naan­ngik­kaluarlutaluun­niit suli al­lat iluaqusersin­naavavut. (Uss 19:17) As­sersuutigalugu tunis­sutivut nunani piitsuuf­fiusuni amerlasuunik sal­lusuis­sum­miilerfiusuni Biibililersaarutinik pilersuinermut oqaluus­sinermul­lu iluaqutaasin­naap­put. Nunani soorlu Congomi, Madagaskarimi Rwandamilu Biibilit akisoorujus­suusin­naap­put. Ilaan­nik­kut sapaatip-akun­neranut qaam­mam­mul­luun­niit akis­sarsiatut akisutigisar­put. Qatan­ngutit ukior­pas­suar­ni nerisas­sarsis­sanerlutik Biibilisis­sanerlutil­luun­niit aalajanger­tariaqar­tar­put. Maan­na al­lat tunis­suteqar­tarmata aningaasal­lu ‘ikiorsiis­sutigineqar­tarmata’ Jehovap peqatigiis­sor­taani Biibilimik nutserineq Biibilinil­lu ilaqutariin­niit­tunut tamanut aam­ma Biibilimik atuaq­qis­saar­tar­tunut agguaas­sisar­neq akeqan­ngilaq. (2 Korinthimiut 8:13-15 atuakkit). Taamaat­tumik tunisisut tunis­suteqarfigineqar­tul­lu Jehovamut ikin­ngutaasin­naap­put.

12. Aaperaap Guuti tatigalugu qanoq ersersip­paa?

¹² Aam­ma Jehovamut ikin­ngutaalersin­naavugut niuer­nerup silarsuaanut akuliusimaval­laarun­naar­nik­kut pisuus­sutivin­nil­lu sal­liutitsinik­kut. Aaperaat aalajaatsoq taamaalior­poq. Jehova ikin­ngutigerusuk­kamiuk taan­na naalal­lugu il­loqarfik pigis­saarfiungaar­toq Uri qimap­paa tupermiuulerlunilu. (Hebr 11:8-10) Pigisat isumal­luutiginagit Guuti tatigiuar­paa. (1 Mos 14:22, 23) Jiisusip al­lat kajumis­saar­tar­pai taamatut up­per­tooq­qul­lugit. Ilaan­ni angut inuusut­toq pisooq ima oqarfigaa: “Iluarluin­narumaguit pigisatit tamaasa akigiar­tuk­kit piitsunul­lu tun­niul­lugit, taava qilan­ni pisuus­suteqalerumaar­putit; qaal­lutil­lu malin­nga!” (Mat­t 19:21) Inuusut­toq taan­na Aaperaatut up­per­tigin­ngilaq. Inoqar­porli al­lanik Guutimik tatigin­nit­tunik.

13. (a) Paulusip Timotheusi qanoq siun­nersor­paa? (b) Paulusip siun­nersuutaa ul­lumik­kut qanoq maleruarsin­naavar­put?

¹³ Timotheusi up­per­tuuvoq. “Kristusi-Jiisusimut sak­kutuujul­luar­tutut” taariarlugu Paulusip ima al­laf­figaa: “Kinaluun­niit sorsuk­kiar­tor­toq sak­kutuus­sarsiarin­nitsiminit iluarineqarumasoq ul­luin­nar­ni suliarisar­tak­kaminit akor­nusersor­tin­neq ajor­poq.” (2 Tim 2:3, 4)  Ul­lumik­kut Jiisusip ajoqersugaasa, ilaatigut pif­fis­saq tamaat kif­far­tor­tut mil­lioninit amerlanerusut, Paulusip siun­nersuutaa sapin­ngisamin­nik maleruar­niar­paat. Taak­kua silarsuup piumatuup matuma pilerisaarutai us­ser­nar­torsiorfiginaveersaarlugit najoq­qutas­siaq una eq­qarsaatigisar­paat: “Taarsigas­sarsialik taarsigas­sarsisitsisumut inus­siaataalersar­poq.” (Uss 22:7) Saatanip pif­fis­sar­put nukivul­lu tamaasa niuer­nik­kut silarsuarminut ator­tin­niarsarivai. Ilaasa angerlarsimaf­fit­taar­niarlutik, biilitaar­niarlutik, ilin­niagaqar­niarlutik al­laal­luun­niit katin­niarlutik aningaasar­pas­suar­nik taarsigas­sarsisar­put. Mianersun­ngik­kut­ta ukior­pas­suar­ni akiitsoqarsin­naavugut. Inuuner­put pisariil­lisarutsigu akiitsoqar­naveersaarut­ta aningaasanil­lu atuinikin­nerugut­ta silatusaas­saagut. Taamaaliorut­ta niuer­nik­kut aaq­qis­suus­sinermut inus­siaanata Guutimut kif­far­tor­nitsin­ni periarfis­saqar­nerusin­naavugut. – 1 Tim 6:10.

14. Suniarluta aalajangiusimasariaqar­par­put? As­sersuuteqarit.

¹⁴ Pilimanian­ngitsumik inooriaaseqarumal­luta Guutip naalagaaf­fia sal­liutit­tariaqar­par­put. Aap­pariit iluanaar­nar­tumik sulif­fis­suaateqar­put. Pif­fis­sarli tamaat kif­far­tor­tun­ngoq­qik­kusuk­kamik sulif­fiuter­tik, umiatsiar­tik pigisatil­lu al­lat tunivaat. Taava Warwickimi USA-miit­tumi qul­lersaqarfim­mi sanaar­tor­nermut nam­mineq kajumis­sutsimin­nit ikiuiar­tor­put. Taman­na taak­kunun­nga im­mik­kut it­tuuvoq, Betelimimi panitsik ningaar­til­lu aam­ma sapaatit-akun­nialuini ningaamik angajoq­qaavi, Warwickimi sanaar­toqataasut, suleqatigaat. Qatan­ngut ar­naq Coloradomi USA-miit­tumi pioneriusoq ul­lup af­faa aningaaserivim­mi sulisaler­poq. Sulisitsisuata suliai iluaringaaramigit pingasoriaam­mik akis­sarsiaqar­til­lugu ul­loq naal­lugu sulisaler­nis­saanik neqeroorfigaa. Taamatul­li sulisalis­sagaluaruni oqaluus­sineq sal­liutis­sin­naan­ngin­namiuk neqeroorutaa pilerinar­toq itigar­tip­paa. Jehovap kif­faanik pil­liuteqarsimasor­pas­suar­nik oqalut­tuat taak­ku ilaminiin­naraat. Jehovamut kif­far­tor­ner­put sal­liutin­niarlugu aalajangiusimagaangatsigu ersersit­tar­par­put Guutimik ikin­nguteqar­ner­put anersaak­kul­lu pisuus­sutiviit silarsuup neqeroorutaanit pingaar­tin­nerungaarlutigit.

15. Pisuus­sutit qanoq it­tut nalerisimaar­nar­ner­paap­pat?

¹⁵ Nunap piisigut pisuujugaan­ni imaat­tariaqan­ngilaq taan­na Guutimit iluarisaasoq. Jehovap ‘ajun­ngitsulianik pisuus­suteqar­tut’ pil­luaq­qusar­pai. (1 Timotheusi 6:17-19 atuakkit). As­sersuutigalugu qatan­ngutip Luciap paasigamiuk Albaniami oqaluus­sisar­tunik pisariaqar­titsisoqar­toq 1993-imi Italiamiit tas­sunga nuup­poq. Sulif­feqan­ngilaq, Jehoval­li isumagis­sagaani tatigaa. Albaniamiutut ilin­niar­poq inuil­lu 60-init amerlanerusut tun­niul­luin­narsin­naaq­qul­lugit ikiorlugit. Im­maqa oqaluus­sif­figisar­tak­katsin­ni taama angusaqar­tigineq ajor­pugut. Al­lal­li Jehova pil­lugu ilin­niar­tin­niarlugit taas­sumun­ngalu ikin­ngutaalersin­naaq­qul­lugit iliuuserisavut suulluunniit naas­saan­ngitsumik nuan­naarutigis­savavut. – Matt 6:20.

16. (a) Ul­lumik­kut niuer­nik­kut aaq­qis­suus­sinerit qanoq pineqas­sap­pat? (b) Taman­na pigisanut isigin­nit­taatsitsin­nut qanoq sun­niuteqar­tus­saava?

 ¹⁶ Jiisusip erseq­qis­sar­paa ul­lumik­kut niuer­nik­kut aaq­qis­suus­sinerit peer­neqarumaar­tut. Oqar­poq pisuus­sutit ‘nunguppata’ oqar­nani ‘nungussappata’. (Luk 16:9) Ul­luni kingul­ler­ni mak­kunani aningaaseriviit ilaat akiliisin­naajun­naarsimap­put nunal­lu ilaan­ni aningaasaqar­nik­kut ajor­nar­torsior­toqangaarluni. Qanit­tuk­kut pis­sutsit ajorsinerus­sap­put. Saatanip aaq­qis­suus­sineranut ilaasut tas­saasut politik­kik­kut, up­perisarsior­nik­kut niuer­nik­kul­lu aaq­qis­suus­sinerit peerutis­sap­put. Pruf­fiitit Ezekieli Sefanialu siulit­tuip­put kuulti sølvilu, niuer­nik­kut pingaaruteqar­tuarsimasut, naleerutis­sasut. (Ez 7:19; Sef 1:18) Silarsuup matuma naggatis­saani paasilerutsigu pisuus­sutit peq­quserluutit perusungaaratsigit pisuus­sutiviit pil­liutigisimal­lugit qanoq misigis­sagaluar­pugut? Takorlooruk angut inuunini tamaat aningaasaater­pas­suaateqarumal­luni sulereerluni paasileraa aningaasaatini tamarmik naleqan­ngitsuusut. Il­liusuuguit qanoq misigis­sagaluar­pit? (Us­s 18:11) Silarsuarmi matumani pigisat nungussapput. Taamaat­tumik pigisatit atorlugit qilam­mi ikin­ngutis­sarsinis­samut periarfis­sat asiutin­naveersaaruk. Jehova taas­sumalu naalagaaf­fia pil­lugit iliuutsivut pil­lualivis­sutigis­savavut.

17, 18. Guutip ikin­ngutaasa suna qilanaaraat?

¹⁷ Guutip naalagaaf­fia tikiup­pat kinaluun­niit ineqar­nermut akiliinanilu taarsigas­sarsisariaqas­san­ngilaq. Akeqan­ngitsunik naam­mat­torsuar­nil­lu nerisas­saqas­saagut, aam­ma peq­qis­suuniar­neq akeqas­san­ngilaq. Jehovap ikin­ngutaasa nunarsuup inerititaasa pitsaanersaat nuan­naarutigis­savaat. Kuulti, sølvi ujaq­qal­lu erlin­nar­tut pin­nersaatitut ator­neqas­sap­put pisuun­ngor­niutaanatik. Qisuit, ujaq­qat savimer­ngil­lu pitsaal­luin­nar­tut kusanar­tumik angerlarsimaf­filior­nis­samut akeqan­ngitsumik pineqarsin­naas­sap­put. Ikin­ngutit­ta piumagamik, imaan­ngitsoq akileratsigit, ikius­savaatigut. Nunarsuup inerititai tamaasa tamak­kiutis­savavut.

¹⁸ Tamak­ku qilam­mi ikin­ngutis­sarsisut akis­sarsias­saasa naleqangaar­tut ilaminiin­naraat. Jehovap pal­lorfigin­nit­tai nunamiit­tut nuan­naar­nermik nil­lias­sap­put Jiisusip oqaasii uku tusarunik­kit: “Qaagitsi, ataatama pil­luaq­qusai, naalagaaf­fik silarsuup tun­ngaviler­neqar­neraniit ilis­sin­nut pisas­sarititaasoq kingor­nus­sarisiuk.” – Matt 25:34.