Ilumut uanga pillunga Jiisusi toqua?
INUIT aalajaatsut ‘uatsitut misigissusillit’ misigissutsiminnik oqaaseqarneri Biibilimi allassimapput. (Jaak 5:17, NW) Assersuutigalugu Paulusip qanoq misiginerminik allaatiginninnera una paasilluarparput: “Ajunngitsumik iliorumagaluarlunga ajortumik iliortartunga. ... Uangannguakkuluk!” (Rom 7:21-24) Sanngiissutsitsinnik akiuigaangatta tuppallernaqaaq eqqarsaatigissallugu Paulusi, angutaasoq aalajaatsoq, taamatut misigisoq.
Paulusip aamma misigissutsini allat allaatigai. Galatiamiunut allakkat 2:20-mi ima allappoq: ‘Guutip ernera uannik asannippoq uangalu pillunga imminut tunniulluni.’ Paulusip tamanna qularutiginngilluinnarpaa. Illimmi, aamma taamatut misigivit? Immaqa tamatiguunngitsoq.
Siornatigut ajortuliarisimasatit pissutigalugit imminut nikagiguit Jehovap uagutsinnik asanninnera isumakkeerfiginninneralu immaqa upperiuminaatsissavatit Jiisusillu utertitsissutitut pilliutaata ilinnut tunissutaanera paasiuminaatsittarlugu. Jiisusip kissaatigaa utertitsissut ilinnut tunissutaasutut isigissagit? Taamaappat suna iluaqutigalugu taamatut isiginnittaaseqalersinnaavit? Apeqqutit taakku marluk akissutissarseriartigit.
JIISUSIP PILLIUTIMINUT ISIGINNITTAASIA
Aap, Jiisusip kissaatigaa utertitsissut ilinnut tunissutaasutut isigissagit. Tamanna qanoq nalunngissinnaaviuk? Lukasi 23:39-43 allaatigineqartut takorluukkit. Jiisusip saniani angut nappakkami anniartitaaffimmi nivingavoq. Ajortuliorsimanini nassuerutigaa. Nappakkami naakkittaatsumik pillarneqarami ingasattumik pinerluttuliorsimassaaq. Erloqissuteqarnermini angutip Jiisusi ima kimigiiserfigaa: “Naalagaaffinnut piguit eqqaaginga.”
Jiisusi qanoq qisuariarpa? Takorlooruk Jiisusip angut qiviarniarlugu qanoq anniartigisoq. Anniaraluarluni qungujuffigaa imalu neriorsorlugu: “Ilumut, ullumi oqarfigaakkit: Paratiisimeeqatigiumaarparma.” (NW) Jiisusip eqqaasiinnarsimasinnaagaluarpaa ‘Inuup Ernera tikiuttoq inuunini akissatut tunniutissallugu amerlasuut utertinneqaatissaattut’. (Matt 20:28) Maluginiarulli Jiisusip inuppassuit eqqartornagit pilliutigisassami angutip taassuma qanoq iluaqutigisinnaaneranik asannittumik oqaluttuukkaa. Inussiarnersumik oqarfigaa nunarsuarmi paratiisissami inuussasoq.
Erseqqippoq Jiisusip kissaatigigaa pilliutigisassani angutip imminut tunissutaasoq paasissagaa. Jiisusip pinerluttuliortoq Guutimut kiffartornissaminut periarfissaqarsimanngitsoq taamatut misigissuseqarfigimmagu qularnannginnerungaarpoq kristumiumut kuisissimasumut Guutimut kiffartortumut taamatut misigissasoq! Qanoq upperilluinnarsinnaavarput Kristusip pilliutaa uagut iluaqutigisinnaagipput naak siornatigut ajortuliorsimagaluarluta?
PAULUSIP ILUAQUTIGISAA
Paulusip oqaluusseqquneqarnini Jiisusip pilliutaanut eqqortumik isiginnittaaseqalissutigaa. Qanoq? 1 Tim 1:12-14) Ajortorujussuarmik iliuuseqarsimagaluarluni Jiisusimit suliassinneqarami taassumannga nallittorneqarnini, asaneqarnini tatigineqarninilu Paulusip qulariunnaarpai. Uaguttaaq nutaarsiassamik nuannersumik Jiisusimit oqaluusseqquneqarpugut. (Matt 28:19, 20) Tamanna Jiisusip pilliutaanut eqqortumik isiginnittaaseqalissutigaarput?
Ima nassuiaavoq: “Qutsavigaara taanna uannik nakussatsitsisoq, Kristusi-Jiisusi Naalagarput, tatigalunga imminut kiffartortunngortimmanga naak siornatigut mitaatiginnittuusunga qinuginnittuullungalu angutaasersorsuullungalu.” (Albert, ukiut 34-ngajaat ilaajunnaarsitaaqqareerluni qanittukkut Jehovamut utertoq, ima oqarpoq: “Ajortuliarisimasakka eqqarsaatigiuarpakka. Oqaluussigaangamali Paulusitut misigisarpunga Jiisusimit kiffartortunngortinneqarlunga. Tamanna pillugu nuannaarnerulertarpunga, ajukkukkunnaartarpunga aamma inunnera siunissaralu isumalluarfigisarlugit.” – Tuss 51:5.
Inunnik tamalaanik atuaqqissaaqateqarninni Jiisusip taakkuninnga nallittuineranik asanninneranillu uppernarsaavigikkit
Allan, sallusuissut nalugallaramiuk pinerluttuullunilu persuttaasartoq, ima oqaluttuarpoq: “Inunnik allanik ajoqusiingaartarsimanera suli eqqarsaatigisarpara. Ilaannikkut nanertuutigisaqaara. Jehovalli uanga ajortiliusuusunga oqaluussisartunngortimmanga qutsavigisarpara. Inuit nutaarsiassamut nuannersumut ajunngitsumik qisuariaraangata Jehovap ajunngisaarneranik asanningaarneranillu eqqaasinneqartarpunga. Misigisarpunga Jehovap atortaraanga uattut ajortunik iliorsimasut ikiorneqarniassammata.”
Oqaluussigaangatta ajunngitsuliorlutalu nuannersunik eqqarsaateqartarpugut. Jiisusillu uatsinnik nallittuineranik, asanninneranik tatiginninneranillu qularunnaarsinneqartarpugut.
JEHOVA UUMMATITSINNIT ANNERUVOQ
Saatanip silarsuaata ajortup suujunnaarsinneqannginnerani uummatitta ajortuliavut pillugit pillagassaatittuarsinnaavaatigut. Misigissutsit nuanniitsut taamaattut qanoq akiorsinnaavavut?
Jean, arnaq inuusuttuugallarami marloqiusamik inooriaaseqarnini pillugu ilerasuttartoq, oqarpoq: “‘Guutip uummatitsinnit annerunera’ nuannaarutigeqaara.” (1 Joh 3:19, 20) Uaguttaaq Jehovap Jiisusillu ajorteqarnitsinnik paasinnittuunerat tuppallersaatigisinnaavarput. Eqqaamajuk taakkua asannittuullutik, inuit naammalluinnartut pinnagit, ajortiliusut peqqissimisut pillugit utertitsissut pilersikkaat. – 1 Tim 1:15.
Jiisusip inuit naammalluinnanngitsut qanoq pisarnerai eqqarsaatigeqqissaarlugulu kiffartornitsinni sapinngisarput tamaat iliuuseqarnitsigut taassuma utertitsissutitut pilliutaata iluaqutiginissaa qulariunnaartarparput. Aap, taava Paulusitut oqarsinnaassaagut: Jiisusi ‘uannik asannippoq uangalu pillunga imminut tunniulluni’.