ATUAQQISSAAGASSAQ 28
Guutip kunngeqarfia naalakkersuivoq!
“Maanna Naalagarput tanitaalu inunnut tamanut kunngisut naalakkersuilerput.” – SAQQ 11:15.
ERINARSUUT 22 Guutip naalagaaffia nunamut tikiulli!
QILANAARTUUT a
1. Suna qularinngilarput, aamma sooq?
NUNARSUARMI pissutsit eqqarsaatigigaangakkit isumalluarnissat sapernartittarpiuk? Ilaqutariit imminnut ungasilliartorput. Inuit ataatsimut isigalugit nakuusernerulerlutillu namminissarsiornerulerlutillu saassussiumatunerulerput. Amerlasuut oqartussaasunik tatiginnippianngillat. Pissutsilli taakkorpiaat isumallualissutigisinnaavatit. Sooq? ‘Ullut kingulliit’ pillugit siulittuummut maluginiarnartumut naapertuuteqqissaartumik inuit pissusilersormata. (Tim 2. 3:1-5) Siulittuutip tamatuma eqquunnera, inuup unneqqarissup kialuunniit miserratigisinnaanngisaa, Guutip kunngeqarfiani Kristusip Jiisusip kunngisut naalakkersuilersimaneranut uppernarsaataavoq. Tamannali Kunngeqarfik pillugu siulittuuterpassuit ilaannaraat. Siulittuutit allat ukiuni kingullerni eqquuttut uteqqissallugit uppernikkut nakussatsissutigissavarput.
2. Allaaserisami matumani suut sammissavagut, aamma sooq? (Saqqaani assiliaq oqaaseqarfigiuk).
2 Allaaserisami matumani sammissavagut (1) siulittuut Kunngeqarfiup qanga naalakkersuilersimanerata paasinissaanut iluaqutaasoq, (2) siulittuutit Guutip kunngeqarfiani Jiisusip kunngisut takussaanani najuunneranut paasinninnissamut iluaqutaasut aamma (3) siulittuutit Guutip kunngeqarfianik akerlilersuisut nungutinneqarnissaannik paasinarsisitsisut. Siulittuutit taakkua katitertakkatut imminnut naapertuunnerat Jehovallu pisussanut piffissaliussaani sumut killinnitsinnik ersersitsinerat sammissavarput.
KUNNGEQARFIK QANGA NAALAKKERSUILERSOQ QANOQ PAASINEQARSINNAASOQ
3. Danieli 7:13, 14-imilu Guutip kunngeqarfiani kunngiusoq pillugu qanoq neriorsoqqissaarneqarpugut?
3 Guutip kunngeqarfiani Kristusip Jiisusip naalakkersuisutut piukkunnarnerpaaneranik Danieli 7:13, 14-imilu siulittuummi qularunnaarsinneqarpugut. Inuiaqatigiinnit tamaneersut nuannaarlutik ‘kiffartorfigissavaat’, aamma naalakkersuisumik allamik taarserneqanngisaannassaaq. Danielimik allakkani siulittuummi allami allassimavoq Jiisusi piffissarititat arfineq-marluk naappata Kunngeqarfimmi naalakkersuilissasoq. Jiisusi qanga kunnginngortoq paasineqarsinnaava?
4. Kristusip qanga kunnginngornerata naatsorsornissaanut Danieli 4:7-14 qanoq iluaqutigigigut nassuiaruk. (Takuuk ilanngussaq).
4 Danieli 4:7-14 atuakkit. ‘Piffissarititat arfineq-marluk’ ukiunut 2.520-nut assersuutaapput. Piffissaq taanna 607-imi Kr.in.si. Babylonnimiut kunngi kingulleq Jehovap Jerusalemmimi issiavissaarsuanit peersimmassuk aallartippoq. 1914-imi Kr.in.king. Jehovap kunngeqarfimmini Jiisusi kunnginngortimmagu naavoq. b – Ez 21:30-32.
5. ‘Piffissarititat arfineq-marluk’ pillugit siulittuut ilaatigut qanoq iluaqutigisinnaavarput?
5 Siulittuut qanoq iluaqutigisinnaavarput? ‘Piffissarititat arfineq-marluk’ pillugit siulittuut paasigatsigu Jehovap neriorsuutiminik piffissaq eqqorlugu eqquutsitsiuaannarnera qulariunnaarparput. Soorlu Jehovap kunngeqarfini qaqugorpiaq naalakkersuilissasoq aalajangeraa, taamatuttaaq siulittuutit allat tamaasa piffissaliussani naapertorlugu eqquutitissavai. Aap, Jehovap ullussaa ‘piviusunngorumaarpoq’! – Hab 2:3.
JIISUSIP KUNNGISUT NAJUUNNERA QANOQ PAASINEQARSINNAASOQ
6. (a) Kristusip qilammi kunngisut takussaanani naalakkersuineranut uppernarsaatit takussaasut suuppat? (b) Uppernarsaatit taakku Saqqummersitat 6:2-8 siulittuummi qanoq uppernarsarneqarpat?
6 Jiisusip nunarsuarmi kiffartornermi naangajalernerani nunarsuarmi pisussat aalajangersimasut, malinnitsimi qilammi naalakkersuilersimanerminik paasinninnissamut ilaqutissaat, siulittuutigai. Sorsunnerit, kaannersuit nunallu sajuttarneri eqqaasaasa ilagaat. Aamma “sumiiffinni assigiinngitsuni” tunillaassortunik nappaateqartarnissaa siulittuutigaa, tamatumanilu nunani tamalaani COVID-19-imik nappaalanersuaqarnera assersuutissaavoq. Pisullu taakku Biibilimi Kristusip najuunneranut ‘ilisarnaataasunik’ taaneqartut ilagaat. (Mat 24:3, 7; Luk 21:7, 10, 11) Jiisusip toqunermi qilaliareernermilu kingorna ukiut 60-it sinnerlugit ingerlareersut apustili Johannesi tamakkuninnga pisoqarumaarneranik uppernarsaavigaa. (Saqqummersitat 6:2-8 atuakkit). Jiisusi 1914-imi kunnginngormalli tamakku tamarmik pisarput.
7. Jiisusi naalakkersuilermat sooq nunarsuaq naakkinarsiva?
7 Jiisusi kunnginngormat sooq pissutsit ajorsippat? Saqqummersitat 6:2-mi pingaarutilimmik paasitinneqarpugut – tassa Jiisusi kunnginngoqqammerluni sorsuttussaasoq. Kikkunnut? Diaavulumut anersaapiluinullu. Saqqummersitat kapitali 12 naapertorlugu Saatani ajorsarpoq, aamma anersaapilunilu nunarsuarmut iginneqarput. Saatani kamaqaluni inuit saassuttalermagit ‘nunarsuaq naakkinarsivoq’. – Saqq 12:7-12.
8. Kunngeqarfik pillugu siulittuutit eqquunnerisa takunerat qanoq iluaqutigaarput?
8 Siulittuutit qanoq iluaqutigisinnaavagut? Nunarsuarmi pissutsit inuillu isiginnittaasiisa allanngornerat ersarissoq Jiisusip kunnginngorsimanerata paasinissaanut iluaqutigaarput. Taamaattumik inuit namminissarsiorlutik uumissuillutillu iliuuseqartut takunerat narrujuummissutiginagu eqqaamasarparput iliuusii Biibilimi siulittuummik eqquutsitsisut. Guutip kunngeqarfia naalakkersuivoq! (Tuss 37:1) Harmagedonni qanilliartortillugu nunarsuarmi pissutsit ajorsiartornissaat ilimagisinnaavarput. (Mak 13:8; Tim 2. 3:13) Ataatatta qilammiusup asannittup sooq pissutsit taama ajortiginerannik paasinninnissamut ikiorsimammatigut qujamasungaarpugut.
GUUTIP AKERAI QANOQ NUNGUTINNEQASSASUT
9. Nunarsuarmi pissaaneqarnerpaaq pillugu Danieli qanoq siulittuiva, qangalu saqqummerpa? (Danieli 2:28, 31-35)
9 Danieli 2:28, 31-35 atuakkit. Siulittuut taanna nalitsinni eqquukkiartortoq takusinnaavarput. Nebukadnesarip sinnattuanit Kristusip naalakkersuilernerata kingorna “ullussani kingullissani” piumaartussat ersersinneqarput. Nunarsuarmi kingulliulluni pissaaneqarnerpaasussatut Biibilimi siulittuutigineqartoq, ‘isikkanik saviminiullutillu marraasunik’ taaneqartoq, Jiisusip nunarsuarmi akeraasa ilagaat. Nunarsuarmi pissaaneqarnerpaaq taanna sorsunnersuarmi siullermi Tuluit Nunaat USA-lu immikkut ittumik suleqatigiilermata saqqummerpoq, tassa naalakkersuilerpoq. Nebukadnesarip inuusaliarujussuaq pillugu sinnattuani aamma siulittuutigineqarpoq nunarsuarmi pissaaneqarnerpaaq taanna naalagaaffinnit siornatigut pissaaneqarnerpaanit marlutsigut allaanerussuteqassasoq.
10. (a) Tuluit Nunaata USA-llu nunarsuarmi pissaaneqarnerpaanerat pillugu Danielip siulittuutaa qanoq eqquuteqqissaarpa? (b) Suna mianersorfigisariaqarparput? (Takuuk ungalusaq “ Marraq mianersorfigiuk!”)
10 Siullertut, nunarsuarmi pissaaneqarnerpaasimasut assiginagit Tuluit Nunaata USA-llu nunarsuarmi pissaaneqarnerpaanerat saffiugassanut ninngusuunut, soorlu kuultimut sølvimullu, assersuunneqarnani saviminermik marrarmillu akuukkamut assersuunneqarpoq. Marraq ‘aappariinnikkut akuleriinnermut’, tassa inuinnarnut, assersuutaavoq. (Dan 2:43) Nalitsinni ersarippoq inuit qinersinerni sunniuteqartarnerat, inuit pisinnaatitaaffiinik suliniuteqartarnerat, amerlasoorpassuullutik akerliussutsimik takutitsisarnerat sulisartullu kattuffii pissutigalugit nunarsuarmi pissaaneqarnerpaat politikkikkut anguniakkatik piviusunngortikkuminaatsittaraat.
11. Tuluit Nunaata USA-llu nunarsuarmi pissaaneqarnerpaammata ulluni kingullerni inuusugut sooq qularinnginnerulerparput?
11 Aappaattut, Biibilimi siulittuutigineqartutut Tuluit Nunaat USA-lu, inuusaliarujussuup isigaanut assersuunneqartut, nunarsuarmi pissaaneqarnerpaassapput kingulliit. Politikkikkut pissaanilinnit allanit taarserneqassanngillat. Guutip kunngeqarfiata Harmagedonnimi inuit naalakkersuisuinut tamanut ilanngutitillugit suujunnaarsippagit nungutinneqariataassapput. c – Saqq 16:13, 14, 16; 19:19, 20.
12. Danielip siulittuutaani uppernarsaat suna tuppallersaatigalugulu neriuuteqalissutigaarput?
12 Siulittuut qanoq iluaqutigisinnaavarput? Danielip siulittuutaanit aamma uppernarsarneqarpoq ulluni kingullerni inuusugut. Ukiut 2.500-t sinnerlugit matuma siorna Danielip siulittuutigaa Babylonnip kingorna nunarsuarmi pissaaneqarnerpaat sisamat Guutip innuttaanut annertuumik sunniuteqassasut. Tamatuma saniatigut Tuluit Nunaat USA-lu kingullersaallutik nunarsuarmi pissaaneqarnerpaassasut paasinarsisippaa. Tamanna pissutigalugu tuppallerlutalu neriuutigaarput Guutip kunngeqarfiata qanittukkut inuit naalakkersuisui nunguteriarlugit nunarsuaq tamaat naalakkersuiffigilissagaa. – Dan 2:44.
13. ‘Kunngit arfineq-pingajuat’ aamma ‘kunngit qulit’ sunut assersuutaappat, siulittuullu taanna qanoq eqquuppa? (Saqqummersitat 17:9-12)
13 Saqqummersitat 17:9-12 atuakkit. Sorsunnersuarmi siullermi nungutitsinerujussuaq pissutigalugu ulluni kingullerni inuuneq pillugu Biibilimi siulittuut alla eqquuppoq. Naalagaaffiit nunarsuarmi eqqissineqalernissaa qulakkeerusukkamikku 1920-mi januaarimi Folkeforbundi, 1945-mi oktobarimi Naalagaaffinnik Peqatigiinnik taarserneqartoq, pilersippaat. Peqatigiiffik taanna ‘kunngit arfineq-pingajuannik’ taaneqarpoq. Nunarsuarmili pissaaneqarnerpaanngilaq. Naalagaaffinnit aatsaat tapersersorneqarnermigut pissaaneqarsinnaallunilu sunniuteqarsinnaavoq. Naalagaaffiit taakku Biibilimi ‘kunnginik qulinik’ taaneqarput.
14-15. (a) Saqqummersitat 17:3-5 “Babylonnersuaq” pillugu sunik paasissutissiippat? (b) Upperisarsiorneq eqqunngitsoq qanoq tapersersorneqartigaa?
14 Saqqummersitat 17:3-5 atuakkit. Apustilip Johannesip Guutimit takorluuisitaanermini atortittartoq, “Babylonnersuaq” upperisarsiornerup eqqunngitsup naalagaaffissuanut assersuutaasoq, takuaa. Takorluugaq qanoq eqquuppa? Upperisarsioqatigiit eqqunngitsut nunarsuarmi politikkikkut pissaanillit sivisuumik suleqatigisarsimallugillu tapersersorsimavaat. Qanittukkulli Jehovap politikkikkut pissaanillit “eqqarsaatimisut” ilioqqullugit sunnissavai. Qanoq kinguneqartumik? Politikkikkut pissaanillit, ‘kunngit qulit’, upperisarsioqatigiit eqqunngitsut saassullugit suujunnaarsissavaat. – Saqq 17:1, 2, 16, 17.
15 Qanoq nalunngilarput Babylonnersuaq suujunnaarsinneqangajalersoq? Tamanna akissutissarsiumallugu pitsaassaaq eqqaamassallugu itsaq illoqarfiup Babylonnip kuussuarujussuup Eufratip ernga illersuutigimmagu. Johannesimut Saqqummersitani millionilippassuit Babylonnersuarmik tapersersuisut ‘imermut’ illersuutaasumut assersuunneqarput. (Saqq 17:15) Aammali allassimavoq kuussuup ernga ‘paqqerumaartoq’, tassa upperisarsiornerup eqqunngitsup naalagaaffissuata tapersersorterpassuani annaassavai. (Saqq 16:12) Nalitsinni inuppassuit upperisaqanngimmata ajornartorsiutitillu aaqqinniarlugit allanut saaffiginnittarmata siulittuut taanna eqquuppoq.
16. Naalagaaffiit Peqatigiit pilersinneqarnissaat Babylonnersuullu nungutinneqarnissaa pillugit siulittuutit paasinerat qanoq iluaqutigisinnaavarput?
16 Siulittuutit qanoq iluaqutigisinnaavagut? Naalagaaffiit Peqatigiit pilersinneqarnerat upperisarsiornerullu eqqunngitsup inuppassuarnit tapersersorneqarunnaarnera ulluni kingullerni inuunitsinnut uppernarsaataapput. Babylonnip assersuutaasumik ernginit tapersersorneqarnera paqqeriartoraluartoq upperisarsioqatigiit eqqunngitsut alla pissutigalugu nungutinneqarluinnassapput. Eqqaaneqareersutut Jehovap ‘kunngit qulit’ – politikkikkut pissaanillit Naalagaaffinnik Peqatigiinnik tapersersuisut – “eqqarsaatimisut” ilioqqullugit sunnissavai. Upperisarsiorneq eqqunngitsoq inuiaqatigiinnit taakkunannga tassanngaannaq nungutinneqarpat inuppassuit tupigusussapput. (Saqq 18:8-10) Babylonnersuup nungutinneqarnera nunarsuarmut tamarmut sunniuteqangaassallunilu erloqisitsissaaq, Guutilli innuttai ikinnerpaamik marluk pissutigalugit nuannaassapput. Jehovap Guutip ukiorpassuarni akerarisimasaa nungutinneqarluinnassaaq, silarsuarmillu ajortumit aniguisinneqangajalerpugut! – Luk 21:28.
SIUNISSAQ PILLUGU ISUMALLUARIT
17-18. (a) Uppernerput qanoq nakussatsittuarsinnaavarput? (b) Allaaserisap tulliani suut eqqartussavagut?
17 Danielip siulittuutigaa ‘paasisimasaqarneq annertusiartussasoq’. Annertusisimaqaarlu! Nalerput pillugu siulittuutit paasivagut. (Dan 12:4, 9, 10) Siulittuutit eqqoqqissaangaarmata Jehova oqaasialu isumassarsiarititaasoq ataqqinerungaalerpagut. (Es 46:10; 55:11) Taamaattumik Biibilimik misissueqqissaartarnikkut allallu Jehovamut akuerisaasumik attaveqaleqqullugit ikiornerisigut uppernerit nakussatsittuaruk. Jehovap tamakkiisumik tatiginnitsini tamaasa sernissussallugillu ‘eqqissisittuassavai’. – Es 26:3.
18 Allaaserisap tulliani naggatissap nalaani ilagiit kristumiut pillugit siulittuutit eqqartussavagut. Siulittuutit taakku aamma ulluni kingullerni inuunitsinnut uppernarsaataanerat sammissavarput. Aamma Jiisusip – kunngitta – malinnitsiminik siulersuineranut uppernarsaatit allat misissussavagut.
ERINARSUUT 61 Sapiillusi oqaluussiuaritsi!
a Oqaluttuarisaanermi piffissami pissanganarnerpaami inuuvugut! Biibilimi siulittuutinut arlalinnut naapertuuttumik Guutip kunngeqarfia pilersinneqareerpoq. Jehovamut upperneruleqqulluta ullunilu makkunani eqqissisimalluta Jehova tatiginiassagatsigu allaaserisami matumani siulittuutit taakkua ilaat misissussavagut.
b Takuuk atuagaq Naassaanngitsumik pilluarsinnaavutit! ilinniagassaq 32, immikkoortut sisamaat, aamma isiginnaagassiaq Guds rige begyndte at herske i 1914 isiginnaaruk.
c Danielip siulittuutaa pillugu paasisaqarnerujumallutit takuuk Napasuliaq Alapernaarsuiffik juunip aallaqqaataat 2012-imoortoq, qupp. 16-20.