1. Ilumoortoq qanoq isumaqarfigaajuk?

 JEHOVAP kiffaasa ilumoortoq Guutip oqaasianeersoq nuannaringaarpaat. Taanna tunngavigalugu uppertun­ngorsimavugut. (Rom 10:17) Jehovap ilagiit kristumiut ‘ilumoortumut sukaallutillu tapersersuisuusut’ pilersis­simagai upperilersimavarput. (Tim 1. 3:15) Aamma ‘siulersortigut’ Biibilimi ilumoortumik nassuiaasarlutillu Guutip piumasaanut naapertuuttumik ilitsersuisartut kajumilluta naalattarpagut. – Hebr 13:17.

2. Jaaku 5:19 naapertorlugu ilumoortoq ilinniareerlugu qanoq pisoqarsinnaava?

² Ilumoortoq ilinniareerlugu Guutillu peqatigiis­sortaanit ilitsersuutinik maleruaanissaq akuerereeraluarlugu ilumoortumit avissaariar­torsinnaavugut. (Jaaku 5:19 atuaruk). Biibili imaluunniit Guutip peqatigiis­sortaanit ilitsersor­neqarnerput tatigiun­naassagipput Saatanip kissaatigaa. – Ef 4:14.

3. Sooq ilumoortoq aalajangiusimas­savarput? (Efesossimiut 6:13, 14)

³ Efesossimiut 6:13, 14 atuakkit. Ungasin­ngitsukkut Diaavulup salluliuutit ilumoorsorinartut atorlugit inuiaqatigiit Jehovamut akerlilersuisun­ngortissavai. (Saqq 16:13, 14) Aamma nalunngilarput Saatani Jehovap innuttaanik tammartitsiniarluni aatsaat taama sapinngisaminik iliuuseqar­tigissasoq. (Saqq 12:9) Taamaattumik maanna ilumoortumik sallumillu immikkoor­titsisin­naanermut sungiusar­nissarput aamma ilumoortumut  naalannissamik ilinniar­nissarput pingaaruteqarluinnarpoq. (Rom 6:17; Pet 1. 1:22) Annikil­liornar­tussarsuarmi aniguinissarput pineqarpoq!

4. Allaaserisami suut eqqartus­savagut?

⁴ Allaaserisami matumani ilumoortup paasinissaanut Guutillu peqatigiis­sortaanit ilitsersuutit akuerinis­saannut pissuserisariaqakkagut marluk sammissavagut. Taavalu ilumoortoq aalajangiusimajumallugu iliuuserisassagut pingasut eqqartus­savagut.

ILUMOORTOQ PAASISSAGAANNI PISSUSERINEQAR­TARIAQARTUT

5. Jehovamik mianerinninneq ilumoortup paasinissaanut qanoq iluaqutigaarput?

⁵ Jehovamik mianerinninneq. Jehovamik mianerin­nikkatta Jehova asangaarlugu taassuma iluarin­ngisaanik iliuuseqarusun­navianngilagut. Jehovamit iluarisaarusukkatta eqqortumik eqqunngitsumillu aamma ilumoortumik sallumillu immikkoor­titsisin­naanissaq ilinniarusungaarparput. (Uss 2:3-6; Hebr 5:14) Inunnit ajorineqan­ngitsut ilarpassui Jehovap iluarinar­tinngilai. Taamaattumik inunnut qunugaluarut­taluunniit qulakkeer­niartariaqarparput Jehovamik asanninnitta sakkortunerpaanissaa.

6. Sooq alapernaarsuiar­tortitat qulit ilumoortoq killormut saatsippaat?

⁶ Inunnut qununerput Guutimik mianerin­ninnitsinnit annertuneruppat Jehovap aniguisitsisin­naanera qularilersin­naavarput. Itsaq pisimasoq eqqarsaatigeriaruk. Angutit naggueqatigiis­sortaminni naalagaasut aqqaneq-marluk Jehovap nuna Israalikkunnut neriorsuutigisimasaa alapernaarsoriar­torpaat. Taakkua ilaasa qulit Kanaanikkunnut qununerat Jehovamik asannin­nerannit anneruvoq. Israalik­koqatiminnut ima oqarput: “Inuiaat taakku saassus­sinnaan­ngilavut uatsinnit pissaaneqar­nerujus­suummata.” (Mos 4. 13:27-31) Inuit isaanni Kanaanikkut Israalikkunnit pissaaneqar­nerupput.  Kisianni kialuunniit Israalikkut akeqqatik ajugaaf­figisin­naanngin­nerarlugit oqartup Jehova eqqarsaatigin­ngitsoorpaa. Alapernaarsuiar­tortitat qulit eqqarsaatigisimasus­saagaluarpaat Jehovap Israalikkut qanoq iliornissaat kissaatigineraa. Aamma qanoq ikioreersimaneraatik eqqarsaatigeq­qissaarsimasus­saagaluarpaat. Taamaaliorsimasuugunik paasissagaluarpaat Kanaanikkut pissaaneqarnerat Jehovap Killeqan­ngitsumik Pissaanillip pissaaneqar­neranut sanilliullugu suunngitsoq. Alapernaarsuiar­tortitat uppernikitsut assiginagit Josva Kalebilu Jehovamit iluarisaarusupput. Israalikkunnut ima oqarput: “Naalakkap nunamut tassunga isertik­kumaarpaatigut asagunisigut.” – Mos 4. 14:6-9.

7. Jehovamik mianerin­ninnerput qanoq nakussatsis­sinnaavarput? (Aamma asseq takuuk)

⁷ Jehovamik mianerin­ninnerput nakussatsis­sagutsigu aalajangigas­saqaraangatta Jehovap suna iluarinar­tinneraa eqqarsaatigisariaqarparput. (Tuss 16:8) Biibilimi oqaluttuat atuartillugit uku eqqarsaatigisakkit: ‘Uanga taama nalaataqarsimasuuguma qanoq iliorniarlunga aalajangersimas­sagaluarpunga?’ Assersuutigalugu takorlooriaruk alapernaarsuiar­tortitat qulit isumalluan­ngitsumik nalunaaruteqartut tusaallugit najuuttutit. Inunnut qunullutit upperis­sagaluarpigit? Jehovamil­luunniit asanninnerit taassumanngalu iluarisaarusunnerit tunngavigalugit iliuuseqas­sagaluarpit? Taamani Israalikkut upperin­ngilaat Josva Kalebilu ilumoortumik oqaluttut. Tamatumalu kingunerisaanik kinguaariit taakku upperin­ninngitsut nunamut neriorsuutigisamut iseqqusaan­ngillat. – Mos 4. 14:10, 22, 23.

8. Pissuserineqartussaq suna ilungersorluta ineriar­tortittariaqarparput, aamma sooq?

⁸ Maniguunneq. Jehovap ilumoortoq maniguuttunut saqqummersittarpaa. (Mat 11:25) Ilumoortoq ilinniarumallugu ikiorneqarnerput maniguulluta akuerivarput. (ApS 8:30, 31) Mianersuutigisariaqarparpulli makitasuun­ngunngin­nissarput. Makitasuujugutta isumaqalersin­naavugut nammineq isumarput Biibilimi najoqqutassianit Jehovallu peqatigiis­sortaaniit ilitsersuutinit pitsaanerusoq.

9. Qanoq ililluta maniguut­tuarsin­naavugut?

⁹ Maniguut­tuassagutta eqqaamas­savarput Jehovamut sanilliullugu qanoq mikitigaluta. (Tuss 8:4, 5) Aamma maniguun­neruler­nissamut ilinniarusus­suseqar­neruler­nissamullu Jehovamut qinunikkut ikioqqusin­naavugut. Jehovap ikiussavaatigut eqqarsaatiminik – Biibilimit aamma peqatigiis­sortaanit ilinniak­katsinnik – nammineq eqqarsaatitsin­ningaanniit pingaar­nerutitsinissamut. Biibilimik atuaraangavit Jehovap maniguunneq nuannarigaa aamma makitaneq, anneruniarneq pingaakujunnerlu uumigigai qanoq uppernarsar­neqartoq maluginiartaruk. Aamma kiffartorninni allanut akisussaaf­feqarnerusumik suliassin­neqaruit maniguut­tuarnissat eqqumaf­figeqqissaaruk.

QANOQ ILUMOORTOQ AALAJANGIUSIMASIN­NAAGIPPUT

10. Jehovap kikkut aqqutigalugit innuttani ilitsersor­tarsimavai?

¹⁰ Jehovap peqatigiis­sortaanit ilitsersuutit tatigiuakkit. Itsaq Israalimi Moorsisi kingusin­nerusukkullu Josva aqqutigalugit Jehova innuttaminut ilitsersuisarpoq. (Jos 1:16, 17) Angutit taakku Jehovamit sinniisutut isigigaangamikkit Israalikkut pilluaq­quneqartarput. Ukiorpassuit qaangiummata ilagiit kristumiut pilersin­neqarmata apustilit aqqaneq-marluk ilitsersuisarput. (ApS 8:14, 15) Taava kingusin­nerusukkut eqimattanut taakkununnga  ilaalerput utoqqaanertat Jerusalem­mimiittut allat. Angutit aalajaatsut taakkua ilitsersuinerat maleruaramikku ilagiit “ullut tamaasa uppernikkut nakussatsit­tarlutillu amerliartorput”. (ApS 16:4, 5) Nalitsinni aamma Jehovap peqatigiis­sortaanit ilitsersuutit maleruaraangatsigit pilluaq­quneqar­tarpugut. Angutilli Jehovap toqqagai akueriuman­ngikkutsigit qanoq misigis­sagaluarpa? Apeqqut taanna akissutis­sarsiumallugu Israalikkut nunamut neriorsuutigisamut siulersor­neqarneranni qanoq pisoqarsimasoq sammeriartigu.

11. Moorsisimik Jehovap siulersuisussatut toqqagaanik ataqqin­ninngitsut qanoq pineqarpat? (Aamma asseq takuuk).

¹¹ Israalikkut nunamut neriorsuutigisamut angalanerminni angutit nuimasut ilaat Moorsisimut pikitsitsipput taassuma siulersuisussatut Jehovamit suliassin­neqarnera ataqqinagu. Ima oqarput: “Ilagiinnut ilaasut pinngitsoqarnatik illernar­tuupput, Naalagarlu akornan­niippoq.” (Mos 4. 16:1-3) “Ilagiinnut ilaasut” tamarmik Guutip isaani illernar­tuunerat ilumoorpoq, taamaattorli Jehovap Moorsisi innuttaminut siulersuisun­ngortis­simavaa. (Mos 4. 16:28) Pikitsitsisut Moorsisi isornar­torsioramikku Jehova isornar­torsiorpaat. Jehovap piumasaa pinnagu namminneq kissaatigisatik – pissaaneqar­nerunissartik allanillu nersugaanissartik – eqqarsaatigineruaat. Guutip pikitsitsisut taakkununngalu illersuisut tuusintillit toquppai. (Mos 4. 16:30-35; 17:6, 14) Nalitsinni qularis­sanngilarput Jehovap peqatigiis­sortaminut tunngatillugu aaqqissuus­saminik ataqqin­ninngitsut assuarigai.

12. Sooq Jehovap peqatigiissortai tatigiuarsin­naavagut?

¹² Jehovap peqatigiissortai tatigiuarsinaavagut. Biibilimi ilumoortoq aalajangersimasoq pillugu paasinnit­taatsitsinnik imaluunniit Jehovamut kiffartor­nitsinni periuutitsinnik allannguinissamut pisariaqaleraangat Siulersuisoqatigiit nangaanatik pisariaqartunik  allannguisarput. (Uss 4:18) Taamaaliortarput Jehovamit iluarisaarusukkamik. Sapinngisaminnik Guutip oqaasia, najoqqutassiaq Jehovap innuttaasa tamarmik maleruar­tariaqagaat, tunngavigalugu aalajangiisarput.

13. “Oqaatsit ineriar­tornartut tunngavigalugit malittarisassiaq” suua, qanorlu iliuuseqar­nissarput pingaaruteqarpa?

¹³ ‘Oqaatsit ineriar­tornartut tunngavigalugit malittarisassiaq aalajangiusimajuaruk.’ (Tim 2. 1:13) “Malittarisassiaq” taanna tassaavoq Biibilimi kristumiunut ilinniar­titsissutigineqartut. (Joh 17:17) Ilinniar­titsissutigineqartullu taakku upperisatsinnut tamanut tunngaviupput. Jehovap peqatigiis­sortaasa ilinniar­tittarpaatigut malittarisassiap aalajangiusimanissaa qulakkiis­sagipput. Taamaalior­tarutta anersaakkut illersor­neqassaagut.

14. Qanoq kristumiut ilaasa “oqaatsit ineriar­tornartut tunngavigalugit malittarisassiaq” aalajangiusimajun­naarpaat?

¹⁴ “Oqaatsit ineriar­tornartut tunngavigalugit malittarisassiaq” maleruarun­naarutsigu qanoq pisoqassava? Assersuuteqariarta. Kristumiut siulliit nalaanni ilagiin­niittut ilaat eqqunngitsumik oqarput Jehovap ullua nalliutereersimasoq. Allakkiaqarsimagunarpoq apustilimit Paulusimit allannerar­neqartunik taama imalinnik. Ilumoornerat qulakkiin­ngivillugu kristumiut Tessaluunikamiittut ilaasa tamanna upperaat allaallu tusatsiagaq ingerlateq­qillugu. Paulusimit najorneqarlutik ilinniar­tinneqarnertik eqqaamasimasuugunikku salloqit­tarneqarsimanavian­ngikkaluarput. (Tes 2. 2:1-5) Paulusip qatanngutit siunnersorpai tusakkatik tamaasa upperis­sanngikkaat. Paulusillu ikiorniarlugit Tessaluunikamiunut allakkami aappaanni ima inerniliivoq: “Taama uanga Paulusi nammineq assannik allallunga inuulluaq­qusivunga, tassa allakkanni tamani ilisarnaatitut allariaasera.” – Tes 2. 3:17.

15. Salluliuutinut ilumoorpasittunut qanoq imminut illersorsin­naavugut? Assersuuteqarit. (Aamma assit takukkit).

¹⁵ Paulusip Tessaluunikamiunut oqaasii qanoq ilinniarfigisin­naavagut? Biibilimi ilinniak­katsinnut naapertuutin­ngitsumik tusagaqaraangatta imaluunniit uissuum­minartumik  tusagaqarutta silatusaar­tariaqarpugut. Sovjetunioniusimasumi qatanngutit qullersaqarfim­meerpasissunik allagarsipput, allakkalli taakku uagutsinnut akeraasunit pipput. Allakkani qatanngutit ilaat kajumis­saarneqarput peqatigiis­sortamik allamut atanngitsumik pilersitsissasut. Allakkiaq uppernarpasik­kaluartoq qatanngutit aalajaatsut salloqit­tarneqan­ngillat. Paasivaat allakkani oqariar­tuutigineqartut ilinniak­kaminnut naapertuutin­ngitsut. Nalitsinni ilumoortumut akeraasut paatsiveerutsin­niarluta avissaar­tuutsin­niarlutalu teknologii nutaajunerusoq atortarpaat. ‘Paatsiveeruteqqunata’ tusakkagut atuakkagullu ilumoortunut ilinniarsimasatsinnut naapertuunnersut misissor­tarutsigit immitsinnut illersorsin­naavugut. – Tes 2. 2:2; Joh 1. 4:1.

16. Ilumoortumut akerliusoqalerpat qanoq iliussaagut? (Romamiut 16:17, 18)

¹⁶ Jehovamik ilumoorfiginnittut ataasioqatigiuakkit. Guutip kissaatigaa ataasioqatigiilluta kiffartorfigis­sagitsinni. Ilumoortoq aalajangiusimajuarutsigu ataasioqatigiit­tuassaagut. Ilumoortumut akerliusumik siaruar­terisut avissaar­tuutsitsisuusarmata Guutip mianersoq­quaatigut taakku ilagisaq­qunagit. Taamaaliun­ngikkutta ilumoortumit avissaariar­torsinnaavugut. – Romamiut 16:17, 18 atuakkit.

17. Ilumoortoq aalajangiusimagutsigu qanoq iluaqutigis­savarput?

¹⁷ Ilumoortoq aalajangiusimal­luinnarutsigu anersaakkut isumannaatsumiissaagut upperluar­tuullutalu. (Ef 4:15, 16) Saatanip eqqunngitsunik ilinniar­titsissutigisaanit sunniiniutaanillu uukapaatin­neqarnavian­ngilagut, annikil­liornar­tussarsuarmilu Jehovamit sernigineqarumaarpugut. Ilumoortoq aalajangiusimal­luarutsigu ‘Guutip eqqissisitsisup najussavaatigut’. – Flp 4:8, 9.