1-2. Sadoki kinaava? (Nalunaarsuutit 1. 12:23, 27-29)

 TAKORLOORUK Daavi Israalimut tamarmut kunngin­ngortin­neqartoq takujumallugu inuit 340.000-t sinnerlugit katersuuttut. Ulluni pingasuni oqaluppalunnerit, illarpalunnerit Jehovamillu unnersiutigin­nilluni erinarsorpalunnerit qaqqani Hebronip eqqaani akiasuapput. (Nal 1. 12:40) Inupparpassuit taakkua ilagaat angut inuusuttoq Sadokimik atilik. Amerlanernit maluginiar­neqanngik­kaluartoq Jehovap taanna maluginiarpaa, kissaatigaalu ilisarisimalis­sagipput. (Nalunaarsuutit 1. 12:23, 27-29 atuakkit). Sadokili kinaava?

² Sadoki palasiuvoq palasiunerlu Ebjatari qanimut suleqatigalugu. Sadoki aamma Guutip piumasaanik paasinnis­sinnaas­suseqarpoq immikkullu ittumik ilisimas­suseqalersin­neqarluni. Inuillu ikioqqusut siunnersorluartarpai. Aamma sapiitsuuvoq. Sapiissusialu allaaserisami matumani qanoq ilinniarfigisin­naagipput sammissavarput.

3. (a) Sooq Jehovap kiffai sapiitsuusariaqarpat? (b) Allaaserisami matumani suna sammissavarput?

³ Nalitsinni Saatanip Guutip innuttai aatsaat taama sakkortutigisumik saassuttarpai. (Pet 1. 5:8) Jehovap Saatanimik silarsuarmillu ajortumik suujunnaarsitsinissaa utaqqitillugu sapiitsuusariaqarpugut. (Es 35:4) Sadokip sapiitsuunera pingasutigut qanoq ilaarsin­naagipput maanna sammeriartigu.

 GUUTIP KUNNGEQARFIA TAPERSERSORUK

4. Guutip kunngeqarfia tapersersorumallugu sooq sapiitsuusariaqarpugut? (Aamma asseq takuuk).

⁴ Guutip kunngeqarfia uummaterput tamakkerlugu tapersersorparput, taamaalior­nitsinnili sapiissuseqar­tariaqarpugut. (Mat 6:33) Assersuutigalugu silarsuarmi ajortumi matumani Jehovap najoqqutassiai maleruarumallugit Kunngeqarfillu pillugu nutaarsiassat nuannersut oqaluus­sissutigiumallugit sapiitsuusariaqarpugut. (Tes 1. 2:2) Aamma silarsuarmi avissaar­tuuffiunerujar­tortumi politikkimut akuliun­naveersaar­nitsinni sapiissuseqar­tariaqarpugut. (Joh 18:36) Jehovamut kiffartor­torpassuit politikkimut akuliunneq ajoramik sakkutuujujuman­nginnamillu aningaasatigut ajornar­torsiortarput, timikkut anniartin­neqartarput parnaarus­saasarlutil­luunniit.

5. Sadoki Daavi tapersersorumallugu sooq sapiissuseqar­tariaqarpa?

⁵ Sadoki Daavip kunngin­ngortin­neqarnissaa nalliut­torsiutigiumallugu Hebroniliarami aamma sakkulisarluni sorsunnermi akiuunnissamut piareersimavoq. (Nal 1. 12:39) Israali saassun­neqarnerani illersorumallugu Daavi sorsoqatigiumavaa. Sadoki sakkutuutut misilit­tagakik­kaluarluni sapiissuseqangaarpoq.

6. Daavi sapiissuseqarnikkut qanoq Sadokimut maligas­saalluarpa? (Tussiaat 138:3)

⁶ Palasi Sadoki qanoq sapiissuseqalersimava? Angutit nukittuut sapiitsullu amerlasuut ilisarisimavai. Qularnan­ngitsumik taakku ilinniarfigil­luarsimavai. Assersuutigalugu Daavi siulersuisutut sakkutuutullu sapiissuseqangaarmat Israalikkut tamarmik kunngin­ngortik­kusuppaat. (Nal 1. 11:1, 2) Daavip akeqqaminik saassus­sinermini Jehova tatigiuarpaa. Ima allappoq: “Taamani suaarama akivarma; sapiillisipparma nakussatsil­lungalu.” (Tussiaat 138:3, New World Translation; Tuss 28:7) Sadokip aamma angutit allat ilinniarfigisimavai, soorlu Jojada taassumalu ernera  Benaja sakkutuujusoq aamma siuaasaqaqatigiis­sortamini naalagaasut 22-t Daavimut ilumoorfiginnittut. (Nal 1. 11:22-25; 12:27-29) Taakkua tamarmik Daavi kunngitut tapersersorluin­narpaat.

7. (a) Nalitsinni sapiissuseqarnikkut maligas­siuisoqarpa? (b) Qatanngut Nsilu videumi oqaluttuartoq qanoq ilinniarfigaajuk?

⁷ Jehovap naalakkersuineranik sapiillutik tapersersuisimasut misigisaat misissorutsigit sapiillis­sutigisin­naavagut. Saatanip politikkimut akuliun­nissamik neqeroorutaa kunngitta, Kristusip Jiisusip, nunamiik­kallarami itigartil­luinnarpaa. (Mat 4:8-11; Joh 6:14, 15) Jehova nukittoqutigalugulu tatigiuarpaa. Aamma nalitsinni angutit inuusuttut amerlasuut sakkutuujujumanatillu politikkimut akulius­simanngillat. Taakkua misigisaat jw.org-imi atuarukkit qularnan­ngitsumik iluaqutigissavat. a

QATANNGUTITIT IKIUKKIT

8. Utoqqaanertat qatanngutitik ikiorumallugit qaqugukkut sapiissuseqar­tariaqartarpat?

⁸ Jehovap innuttai kajumillutik ikioqatigiittarput. (Kor 2. 8:4) Ilaannikkulli taamaalior­nerminni sapiissuseqar­tariaqartarput. Assersuutigalugu sorsuut­toqaleraangat utoqqaanertat tassaniittut nalusan­ngilaat qatanngutitik qiimmas­sarneqar­tariaqartut, tapersersor­neqartariaqartut immaqalu anersaakkut timikkullu pilersor­neqartariaqartut. Asagamikkit pisariaqar­titaannik isumassorumallugit allaat navianar­torsioriaan­naasarput. (Joh 15:12, 13) Taamaalioraangamik Sadoki sapiitsoq ilaartarpaat.

9. Samuelimik allakkat aappaat 15:27-29 naapertorlugit Daavip Sadoki soqquaa? (Aamma asseq takuuk).

⁹ Daavi navianar­torsior­tinneqarpoq. Ernerata Absalomip kunngin­ngorumalluni Daavi toqunniarsaraa. (Sam 2. 15:12, 13) Daavi Jerusalemmimit qimaapal­lattariaqarpoq! Kiffani ima oqarfigai: “Qimaanasuarniarta, taamaaliun­ngikkutta  Absalomimit aniguinavian­ngilagut.” (Sam 2. 15:14) Kiffanilu qimaatillutik Daavip paasivaa Absalomi qanoq pilersaaruteqarnersoq paasinias­saguniuk kiffami ilaat Jerusalem­mimiigin­nartariaqartut. Taamaattumik Sadoki palasillu allat paasissutis­siisartussatut Jerusalemmimut utertariaqarput. (Samuelimik 2. 15:27-29 atuakkit). Taakkuli mianersungaar­tariaqarput. Daavip peqqussutaa allaat taakkua inuunerinik navianar­torsior­titsisinnaavoq. Absalomimi angutaavoq makitasooq, akiniaajumatooq peqqusersoorlu. Sadokip palasillu allat isertortukkut alapernaarsuinerat Absalomip paasiguniuk qanoq iliorumaartoq takorloorsin­naavarput!

10. Sadokip ilagisaasalu Daavi qanoq illersorpaat?

¹⁰ Sadokip saniatigut Daavip aamma ikinngutini ilumoorfiginnittoq alla, Hushaji, aperaa ikiorsin­naaneraani. (Sam 2. 15:32-37) Daavip pilersaarusior­neratut Hushajip Absalomi tapersersor­tuusaarlugu siunnersuutigaa qanoq Daavi saassun­neqassasoq, siunnersuutaalu Daavip saassun­neqarnis­saminut piareersar­nissaanut periarfissiivoq. Kingorna Hushajip Sadoki Ebjatarilu paasitippai qanoq pisoqassasoq. (Sam 2. 17:8-16) Angutillu taakkua marluk Daavimut oqariar­tortitsisoqarnissaa isumagaat. (Sam 2. 17:17) Jehovap ikiuineratigut Sadoki palaseqataalu Daavip inuuneranik illersuinermi pingaarutilimmik iliuuseqarsimapput. – Sam 2. 17:21, 22.

11. Qatanngutigut ikioraangatsigit Sadokip sapiitsuunera qanoq ilaarsin­naavarput?

¹¹ Qatanngutit navianar­torsiortut ikiussagutsigit Sadokitut qanoq sapiitsuusin­naavugut? (1) Ilitsersuutit maleruakkit. Navianar­torsior­toqartillugu ataasius­suseqar­tuarnissarput pingaaruteqarluinnarpoq. Ilitsersuutit immikkoor­tortaqarfitsin­neersut malikkit. (Hebr 13:17) Utoqqaanertat ajunaar­nersuaqar­nissamut piareersimajuarsin­naanias­sagamik tamatumunnga aaqqissuussatik  ilitsersuutillu akuttual­laanngitsumik misissor­tassavaat. (Kor 1. 14:33, 40) (2) Sapiitsuugit mianersor­tuullutillu. (Uss 22:3) Silatusaarit pisariaqan­ngitsumillu navianar­torsior­titsinak. (3) Jehova tatigiuaruk. Eqqaamajuk Jehovap qatanngutitillu isumannaatsuujuar­nissarsi pingaar­tingaaraa. Qatanngutivit isumannaatsuunis­saannik ikiuisarninni ikiorsin­naavaatit.

12-13. Viktor aamma Vitalii qanoq ilinniarfigaagit? (Aamma asseq takuuk).

¹² Qatanngutigut Viktor aamma Vitalii qanoq misigisaqar­tarsimasut sammeriartigu. Ukrainemi uppeqatitik isumassor­niarlugit nerisassanik imermillu aatsivigisarpaat. Viktor ima oqarpoq: “Sumi tamani nerisassanik ujarler­tarpugut. Eqqatsinni eqqaasserpalut­toqartarpoq. Qatanngutitta ilaat nerisassanik quersuaatiminit tunissuteqarpoq. Tunissutai oqaluus­sisartorpassuit ulluni arlalinni inuussutigaat. Nerisassat biilinut issorar­tillugit qaartartoq 20 meterisut ungasitsigaluta tuppoq. Ulloq naallugu Jehova kimigiiserfigaara oqaluus­sisartunik pisariaqartumik ikiuiuar­nissamut sapiilliseq­qullunga.”

¹³ Vitalii ima oqarpoq: “Sapiitsuusariaqarpugut. Ikiuiniarlunga angalanera siulleq nalunaaquttap-akunnerinik aqqaneq-marlunnik sivisus­suseqarpoq. Angalanera tamaat Jehovamut qinujuarpunga.” Vitalii sapiitsuuvoq, aammali mianersortuuvoq. Nangilluni ima oqarpoq: “Ilisimas­suseqaq­qullunga anneruniajuitsooq­qullungalu Jehovamut qinujuarpunga. Oqartus­saasunit aqqutigeq­qusaasut kisiisa biilerfigaakka. Qatanngutit qanoq suleqatigiittut takullugu uppernikkut nakussatsis­sutigaara. Aqqusinerni biilernissamut ajoqutaasut piiartarpaat, ikiuiniarnermi pisariaqartut katersorlugillu biilinut ikisarpaat, uagullu aqqutaani nerisas­saqartit­tarlutalu qasuersaarfis­saqartit­tarpaatigut.”

JEHOVA ILUMOORFIGIUARUK

14. Asasatta ilaat Jehovamut ilumoorfigin­nikkunnaarpat qanoq sunnerneqaatigisin­naavarput?

¹⁴ Ilaquttatta ilaat qanimul­luunniit ikinngutitta ilaat Jehovamit qimaguppat misilin­neqaataasinnaavoq ajornar­nerpaat ilaat. (Mos 1. 6:5, 6; Uss 24:10) Taanna asangaarutsigu tamanna akueriuminaatsis­sinnaavarput. Illit taamatut alianartumik misigisaqaruit Sadokip ilumoorfigin­ninnermut tunngatillugu maligassiaa nakussatsis­sutigisinnaavat.

15. Sadoki Jehovamut ilumoorfigin­nittuarumalluni sooq sapiitsuusariaqarpa? (Kunnginik 1. 1:5-8)

¹⁵ Sadokip Jehova ilumoorfigiuarpaa qanimut ikinngutini Ebjatari ilumoorfigin­nikkunnaarmat. Daavip naalakkersuinerata naggataatungaani tamanna pivoq. Daavi toqujar­tortillugu ernera Adonija imminut kunngin­ngortin­niarsarivoq, Jehovalli kissaatigaa Saalumuut kunngin­ngussasoq. (Nal 1. 22:9, 10) Ebjatari aalajangerpoq Adonija tapersersor­niarlugu. (Kunnginik 1. 1:5-8 atuakkit). Taamaalior­nermigut Ebjatarip Daaviin­naanngitsoq aammali Jehova ilumoorfigiun­naarpaa! Takorloorsin­naaviuk Sadoki qanoq nikallor­tigalunilu pakatsitigisimassasoq? Ukiut 40-t sinnerlugit Ebjatarilu palasitut qanimut suleqatigiis­simapput. (Sam 2. 8:17) Marluullutik “angerutsip illerfia Jerusalemimut oqquppaat”. (Sam 2. 15:29) Aap, marluullutik Daavi kunngitut tapersersorsimavaat Jehovamullu kiffartornermi iliuuserpas­suaqarsimallutik. – Sam 2. 19:12-15.

16. Sadokip ilumoorfigin­nittuar­nissaminut suna iluaqutigaa?

¹⁶ Ebjatari ilumoorfigin­nikkunnaaraluartoq Sadoki Jehovamut ilumoorfigin­nittuarpoq. Daavip nalunngilaa Sadoki tatigiuarsin­naallugu. Adonijap pilersaarutaa paasinarsimmat Daavip qinnuigai Sadokip, Naatap Benajallu Saalumuut kunngitut tanissagaat. (Kng 1. 1:32-34)  Sadokip Jehovamut kiffartor­tuartut, soorlu Naatat aamma Jehovamut Daavimullu ilumoorfiginnittut allat, qanimut suleqatigisin­naagamigit nakussatsis­sutigisimassavai. (Kng 1. 1:38, 39) Saalumuut kunngin­ngorami “Sadoki Ebjatarip atorfigigaluanut ivertippaa” palasiunin­ngortillugu. – Kng 1. 2:35.

17. Qanigisappit ilaat Jehovamut ilumoorfigin­nikkunnaarpat Sadoki qanoq ilaarsin­naaviuk?

¹⁷ Sadoki qanoq ilaarsin­naaviuk? Qanigisappit ilaat Jehova qimanniarlugu aalajangerpat illit Jehovamut ilumoorfigin­ninnerit erseqqissumik ersersiguk. (Jos 24:15) Jehovap eqqortulior­nissamut pisariaqar­titannik nakussatsis­savaatit sapiillisis­sallutillu. Jehova qinnuigisaruk ikinngutitillu aalajaatsut peqatigisarlugit. Jehovap ilumoorfigin­ninnerit pingaar­tingaarpaa akissarsisis­sallutillu. – Tuss 37:28.

18. Marco aamma Sidse qanoq ilinniarfigaagit?

¹⁸ Marco nulianilu, Sidse, panitik marluk ilagiinnit qimagummata qanoq misigisimasut sammeriartigu. Marco ima oqarpoq: “Meeqqagut inunngor­neranniilli asangaarpagut. Ajoqutaasin­naasunut illersor­niarlugit sapinngisarput tamaat iliorusuppugut. Taamaattumik Jehova qimanniarlugu aalajangermata alianangaarpoq.” Ima nangippoq: “Jehovalli najortuarsimavaatigut. Immitsinnut qiimmas­saqatigiis­sinnaanerput isumagaa. Uanga sanngiik­kaangama nuliara nukittuujusarpoq, nuliarali sanngiik­kaangat uanga nukittuujusarpunga.” Sidse ima oqarpoq: “Pisariaqar­titatsinnik Jehovamit nakussatsin­neqanngik­kaluarutta pinertusaarsimasin­naassan­ngikkaluarpugut. Pisuusutut misigigama aliasungaarpunga, tamannalu pillugu Jehova oqaluttuuppara. Tamatuma kinguninngua qatanngutip arnap ukiorpassuarni takusiman­ngisama ornippaanga, assani tuinnut ileriarlugit toqqarlunga isigalunga oqarfigaanga: ‘Sidse, eqqaamajuk: Illit pisuunngilatit!’ Jehovap ikiuineratigut kiffartornermi nuannaar­tuarsin­naasimavunga.”

19. Suna aalajangiusimaviuk?

¹⁹ Jehovap kissaatigaa kiffani tamarmik Sadokitut sapiitsuussasut. (Tim 2. 1:7) Taamaaliorumalluta imminut tatigival­laarnata Jehova tatigil­luinnar­tariaqarparput. Taamaattumik sapiissuseqar­nerusariaqaraangavit Jehova saaffigisaruk. Qularutigis­sanngilat Sadokip sapiitsuuneratulli sapiillisis­sinnaagaatit! – Pet 1. 5:10.