1-2. (a) Jiisusip ilinniartitani qanoq mianersoqquai? (b) Sooq ilinniartitat Jiisusi qimappaat? (Aamma assit takukkit).

 “SOORUNAMI siunertarineqartoq ajunngitsuuvoq, timili sanngiippoq.” a (Mat 26:41b) Taamatut oqarami Jiisusip paasilluin­narsimavaa naammal­luinnan­ngissuserput pissutigalugu kukkusarumaartugut. Oqaasiili aamma mianersoq­qussuteqarput: Imminut tatigival­laalissan­ngilagut. Akunnialuit sioqqullugit ilinniartitat imminut tatigalutik neriorsuisimapput Jiisusi qimanngisaan­narniarlugu. (Mat 26:35) Eqqortumik iliuuseqarusupput. Taamaak­kaluartorli paasinngilaat tatineqarnermi eqqortumik iliuuseqarusun­nissamut aalajangius­simasaraluartik eqqortin­ngitsooriataarsin­naallugu. Taamaattumik Jiisusip ima mianersoqquai: “Ussernartumut nakkaan­naqqunasi eqqumajuarlusilu qinujuaritsi.” – Mat 26:41a.

² Ajoraluartumik ilinniartitat eqquman­ngitsoorput. Jiisusi tigusarineqarmat qanoq pippat? Najuinnarpaat, imaluunniit annilaangaleramik qimaappat? Eqquman­ngitsooramik qimanniarnagu oqaraluarlutik Jiisusi qimappaat. – Mat 26:56.

3. (a) Jehovamut aalajaat­tuarumalluta sooq imminut tatigival­laalissan­ngilagut? (b) Allaaserisami matumani suut sammissavagut?

³ Imminut tatigival­laarneq navianar­torsiulersitsisinnaavoq. Soorunami Jehovamut attaveqar­nitsinnut ajoqutaasinnaasut iliuuserin­ngilluin­narnissaat aalajangiusimavarput. Taamaattorli naammal­luinnan­ngitsuugatta ussernar­torsiorsin­naavugut. (Rom 5:12; 7:21-23) Eqqunngitsumik iliornissamut ussernar­torsioriataarsin­naavugut. Jehovamut aamma erneranut aalajaat­tuarumalluta  Jiisusip siunnersuutaa maleruar­tuartariaqarparput. Ussernar­torsiun­nginnis­satsinnut allaaserisaq manna iluaqutigis­savarput. Siullertut, eqqumaf­figilluin­nagassagut suunersut sammissavarput taavalu ussernartumut qanoq imminut illersorsin­naanerluta. Naggataatigut qanoq eqqumajuarsin­naanersugut eqqartus­savarput.

SANNGIIS­SUTITIT SUUNERSUT EQQUMAFFIGIUK

4-5. Sooq ajortuliat ingasagisas­saanngik­kaluartut eqqumaf­figisariaqarpagut?

⁴ Ajortuliat ilaat ingasan­ngikkaluarlutik Jehovamut attaveqar­nitsinnut ajoqusiisin­naapput. Piffissallu ingerlanerani ingasattumik ajortuliornermik kinguneqarsin­naapput.

⁵ Tamatta eqqunngitsulior­nissamut ussernar­torsior­tarpugut. Assigiin­ngitsunilli sanngiis­suteqaratta ussernar­torsiornerit inummiit inummut assigiin­ngissin­naapput. Assersuutigalugu ilaata atoqatigiinnikkut eqqunngitsulior­nissamut ussernar­torsiorneq akiugarisinnaavaa. Immaqa allap minguttuumik iliuuseqartarneq, soorlu imminut inertittarneq imaluunniit pornografiimik isiginnaartarneq, akiugarisinnaavaa. Aamma allap immaqa inunnut qununeq, pingaar­niarneq, kamajaneq imaluunniit alla akiugarisinnaavaa. Soorlu Jaaku allattoq ‘kinaluunniit pileris­sutsiminit kajungilersin­neqarnikkut usserneqar­nikkullu misilin­neqartarpoq’. – Jaak 1:14.

6. Sumut tunngatillugu imminut unneqqarif­figisariaqarpugut?

⁶ Illit ussernar­torsiutigisin­naasatit ilisimavigit? Imminut salloqit­tarluta sanngiis­sutigut miserratigigutsigit eqqarsarut­taluunniit nukittungaaratta eqqunngitsulior­naviarata navianar­torsiussaagut. (Joh 1. 1:8) Eqqaamajuk Paulusi allammat allaat ‘anersaamit siulersortittut’ eqquman­ngikkunik ussernartumut nakkaan­narsinnaasut. (Gal 6:1) Imminut unneqqarif­figisariaqarpugut suullu nukittuf­figinagit paasiniarlugu. – Kor 2. 13:5.

7. Suna eqqumaf­figeqqis­saartariaqarparput? Assersuuteqarit.

⁷ Sanngiiffigut suunersut paasereerutsigu qanoq iliussaagut? Imminut illersorumalluta iliuuseqar­tariaqarpugut! Assersuut una eqqarsaatigiuk: Itsaq illoqarfiup qarmarsuisa qajannar­nerpaat tassaapput isaaffii. Taamaattumik illoqarfik illersor­neqarniassammat isaaffiit amerlasuunik paarsisoqartarput. Tamatumunnga assingusumik uaguttaaq sanngiis­sutigut eqqumaf­figeqqis­saartariaqarpagut. – Kor 1. 9:27.

 QANOQ IMMINUT ILLERSORSIN­NAASUGUT

8-9. Angut inuusuttoq Ussatit kapitali 7-imi allaatigineqartoq ingasattumik ajortuliorumanani qanoq iliorsimasus­saagaluarpa? (Ussatit 7:8, 9, 13, 14, 21)

⁸ Imminut qanoq illersorsin­naavugut? Angutip inuusuttup Ussatit kapitali 7-imi allaatigineqarnera ilinniutigisin­naavarput. Taassuma arnaq inuunerluttoq atoqatigaa. Versi 22-mi allassimavoq “pinasuarluni” malikkaa. Versinili siulianiittuni erserpoq taamaaliun­nginnermini aalajangiinerloqat­taartoq naggataatigut ajortulior­nerminik kinguneqartumik.

⁹ Ajortuliun­nginnerani qanoq pisoqarpa? Siullermik “aqqusinermi angalaarpoq arnap illuata teqeqquata eqqaani, taavalu arnap illuata tungaanut ingerlarusaalerluni”. (Ussatit 7:8, 9 atuakkit). Taava arnaq takugamiuk tununngilaa. Kuninneqaramilu itigartinngilaa. Arnarlu oqarami “pilliutinik nereqatigiis­sutissanik” pilliisimalluni ersersin­niarunarpaa inuttut ajortuunani. Angutillu inuusuttup tusarnaarpaa upperalugulu. (Ussatit 7:13, 14, 21 atuakkit). Angutip inuusuttup navianartut qanillinaveersaarsimasuugunigit imminut illersorsimas­sagaluarpoq ajortuliorsimas­sanngik­kaluarlunilu.

10. Angutip inuusuttup kukkuneratut nalitsinni qanoq kukkusoqarsinnaava?

¹⁰ Saalumuup angummik inuusuttumik allaatigin­ninneranit erserpoq Jehovap kiffaanut kimulluunniit qanoq pisoqarsinnaasoq. Ingasattumik ajortulioreerluni misigisinnaavoq tamanna tassangaannaq pisimasoq. Imaluunniit imaassinnaavoq oqartoq: “Taamaalior­toorama.” Kingumulli qiviarluni qanorpiaq pisoqarnersoq eqqarsaatigiguniuk paasissagunarpaa aalajangiinerloqat­taarnini naggataatigut ajortulior­nerminik kinguneqartut. Imaassinnaavoq Jehovamut asannin­ngitsunik ikinnguteqartoq, aliikkutassat toqqartakkani ajortumik sunnerneqaatigisimagai imaluunniit nittartakkat alakkar­tarsimasai sumiiffiillu ornissimasai kristumiunut naleqqutin­ngitsuusut. Aamma imaassinnaavoq Jehovamut qinusarun­naarsimasoq, Biibilimik atuartarun­naarsimasoq, ataatsimiigias­saarsimasoq oqaluus­seqataasarun­naarlunilu. Angutitut inuusuttutut Ussatini eqqaaneqartutut ajortuliornera piaarinaatsoornikkut pisimanngilaq.

11. Ingasattumik ajortuliorumanata qanoq iliortariaqarpugut?

¹¹ Qanoq ilinniutigisin­naavarput? Ingasattumik ajortuliorumanata pingaaruteqarpoq ajortulius­sutigisin­naasatta ingalas­simalluin­narnissaat. Saalumuup angut inuusuttoq arnarlu oqaluttuarereerlugit tamanna erseqqissarpaa. Arnamut tunngatillugu ima allappoq: “Atuartin­ngikkigit arnap taassuma aqqutai.” (Uss 7:25) Aamma allappoq: “Arnaq taanna ungasillugu ingerlasarit, illuata matua qanilleqinagu.” (Uss 5:3, 8) Ajortulior­nissamut imminut illersor­niarluta ajortulior­nissamik kinguneqar­titsisinnaasut suulluunniit ingalas­simalluin­narnissaat pingaaruteqarpoq. b Imaassinnaavoq kristumiut allat navianar­torsiutigin­ngisaat ingalas­simasariaqarigut, uagummi taakku ussernartumut nakkaan­nassutigisin­naagatsigit. – Mat 5:29, 30.

12. Juubi qanoq aalajangerpa, tamannalu qanoq ussernar­torsior­nissamut illersuutigaa? (Jobi 31:1)

¹² Ajortulior­nissamik kinguneqar­titsisinnaasut ingalas­simajumallugit allanngor­titassaan­ngitsumik aalajanger­tariaqarpugut mianersor­niarluta. Juubi taamaaliorpoq. Taassuma ‘isini isumaqatigiis­suteqarfigisimallugit’ aalajangiusimavaa arnamik nuliarin­ngisaminik ajuutigin­ninniakujulluni isigisaqassanani. (Jobi 31:1 atuaruk). Aalajangersimanermisut iliorami allasior­nissaminut navianar­torsior­titsisinnaasut  ingalas­simalluinnarpai. Uaguttaaq ussernartumut nakkaan­nassutigisin­naasagut suulluunniit ingalas­simalluin­narniarlugit aalajangersin­naavugut.

13. Sooq suut eqqarsaatigisar­nerlugit mianersuutigisariaqarparput? (Aamma assit takukkit).

¹³ Suut eqqarsaatigisar­nerlugit mianersuutigisariaqarparput. (Mos 2. 20:17) Ilaat isumaqarput kissaatit naleqqutin­ngitsut malillugit iliuuseqan­ngikkaanni takorloor­tarnissaat eqqunngitsulior­nerunngitsoq. Taamatulli eqqarsartoq imminut salloqittarpoq. Inuup eqqarsaatigiuakkani sakkortusisiin­nartarpaa, eqqunngitsoq eqqarsaatigiuaruniuk akioruminaatsitaminik ussernar­torsiorneq pilersissavaa. Soorunami ilaannikkut eqqunngitsunik eqqarsariataarsin­naavugut. Eqqarsaatit taamaattut itigartil­luinnar­nissaat ajunngitsunillu taarser­nissaat pingaaruteqarpoq. Taamaaliorutta eqqarsaatit eqqunngitsut pileris­susinngor­nissaat pinngitsoor­tissinnaavarput, taamaalillutalu ingasattumik ajortulior­nissamut imminut illersorluta. – Flp 4:8; Kol 3:2; Jaak 1:13-15.

14. Ussernartumut nakkaan­nanngin­nissatsinnut aamma suna illersuutigisin­naavarput?

¹⁴ Ussernartumut nakkaan­nanngin­nissamut aamma qanoq imminut illersorsin­naavugut? Jehovap inatsisaanut naalannerup uagutsinnut iluaqutaajuaan­narnera upperil­luinnar­tariaqarparput. Immaqa ilaannikkut eqqarsaatitta kissaatittalu Guutip akuerisaanut naapertuutsin­nissaat sapernar­tissinnaasarparput. Taamaalior­niarlutali ilungersuuteqarnerput peqqissimis­sutiginiavian­ngilarput, qamuunami eqqissineq misigis­savarput.

15. Sooq eqqortumik iliuuseqarusus­susermik ineriar­tortitsineq pingaaruteqarpa?

¹⁵ Eqqortumik iliuuseqarusussuseq ilinniagassaavoq pingaarutilik. ‘Ajortummi uumiginissaa ajunngitsullu nuannarinissaa’ ilinniarutsigit Jehovap iluarisaatut iliornissarput aalajangiusimanerulis­savarput. (Am 5:15) Aamma pissutsit sumiiffiillu ajortuliornermik kinguneqar­titsisinnaasut ingalas­simanissaat eqqumaf­figinerus­savarput. Aamma ussernar­torsior­tinneqariataarutta, takorloorsiman­ngisatsinnik  imaluunniit pinngitsoor­tissinnaan­ngisatsinnik, eqqortumik iliuuseqarusunnerput ussernartumut nakkaan­nanngin­nissamut nakussatsis­sutigisin­naavarput.

16. Anersaakkut sammisaqartarneq eqqumajuar­nissamut qanoq iluaqutigisin­naavarput? (Aamma assit takukkit).

¹⁶ Qanoq eqqortumik iliorusus­sutsimik ineriar­tortitsisin­naavugut? Jehovamut asannin­nitsinnik nakussatsitsisumik iliuuseqar­tarnitsigut. Ataatsimiik­kaangatta oqaluus­seqataagaangattalu Jehovap iluarisaatut iliorusus­sutsimik ineriar­tortitsisarpugut, taamaalillutalu eqqunngitsulior­nissamut ussernar­torsioriaan­naassan­ngilagut. (Mat 28:19, 20; Hebr 10:24, 25) Guutip oqaasiata atuartar­neratigut, misissor­tarneratigut eqqarsaatigeq­qissaar­tarneratigullu ajunngitsoq nuannarinerulerlugulu ajortoq uumigineruler­tarparput. (Jos 1:8; Tuss 1:2, 3; 119:97, 101) Aamma eqqaamajuk Jiisusip ilinniartitani ima oqarfigimmagit: “Ussernartumut nakkaan­naqqunasi … qinujuaritsi.” (Mat 26:41) Ataatatsinnut qilammiusumut qinugaangatta ikiuinera misigisarparput nuannaar­tinnissaalu kissaatigineruler­tarlugu. – Jaak 4:8.

SISSUERTUARIT

17. Petrusi sanngiis­sutsimik sumik akiugaqartuarpa?

¹⁷ Imaassinnaavoq sanngiis­sutsitta ilaat ajugaaf­figisin­naagigut allalli sivisuumik akiortariaqarlugit. Apustili Petrusi eqqarsaatigiuk. Inunnut qunulluni pingasoriarluni Jiisusi nalunerarpaa. (Mat 26:69-75) Kingusin­nerusukkulli juutit eqqartuus­siviisa qullersaannut oqaluussigami inunnut qununini qaangersimarpasippaa. (ApS 5:27-29) Taavali ukiut arlaqan­ngitsut tamatuma kingorna qanoq pisoqarpa? “Kipineqarsimasut qunugalugit” kristumiut juutiun­ngitsut nereqatigisarun­naarpai. (Gal 2:11, 12) Petrusip inunnut qununini sanngiis­sutigeq­qilersimavaa. Immaqalu allaat ajugaaf­figilluin­narsimanngilaa.

18. Sanngiis­sutsimut ajugaaf­figereersimasorisatsinnut qanoq pisoqarsinnaava?

¹⁸ Imaassinnaavoq Petrusitulli sanngiissuseq ajugaaf­figereersimasorisarput akiorniar­tuartariaqaripput. Qatanngut angut ima nassuerpoq: “Ukiuni qulini pornografiimik isiginnaan­nginnama ilumoorlunga isumaqaraluarpunga ajornar­torsiutigiun­naarlugu. Pinngitsuuisin­naajunnaarsimanermali  assigaa uumasoq kiisortoq piffissaq eqqorlugu saassus­seqqeriataar­nissaminut toqqorluni utaqqisoq.” Qatannguterput tunniutiin­narnani sanngiis­sutsini ajugaaf­figiniarlugu iliuuseqar­tuarpoq. Paasivaa ullut tamaasa – immaqa pissutsit ajortut atuukkun­naarnissaata tungaanut – akiorniar­tuartariaqarlugu. Pornografii ingalas­simaniarlugu iliuuseqar­nerusariaqarpoq, nuliaminillu aamma utoqqaanertanit ikiorneqarluarpoq.

19. Ajugaaf­figiuminaatsumik sanngiis­suteqarutta qanoq akiorsin­naavarput?

¹⁹ Ajugaaf­figiuminaatsumik sanngiis­suteqarutta eqqunngitsulioqqunata qanoq iliussaagut? Jiisusip siunnersuutaa una maleruarutsigu silatusaassaagut: ‘Ussernartumut nakkaan­naqqunasi eqqumajuaritsi.’ Allaat anersaakkut nukittuutut misigigaangavit eqqunngitsulior­nissamik kinguneqar­titsisinnaasut ingalas­simasakkit. (Kor 1. 10:12) Sanngiissutsit akiorniarlugu iliuutsit iluaqutigereersimasatit iliuuseriuakkit. Ussernartunut nakkaan­naqqunak ‘tamaviaarit’. – Pet 2. 3:14.

TAMAVIAARNERUP AKISSARSIASSARTAI

20-21. (a) Sissuer­tuarutta tamanna qanoq iluaqutigis­savarput? (b) Nammineq sapinngisarput tamaat iliuuseqarutta Jehovap qanoq ikiussavaatigut? (Korintimiunut 2. 4:7)

²⁰ Upperil­luinnarsin­naavarput ussernartut ingalas­simaniarlugit tamaviaarnerput tamatigut uagutsinnut pitsaanerpaamik kinguneqartartoq. ‘Ajortip nuannersui qaangiutipal­lattarput’, Jehovalli piumasaatut iliorneq nuannaar­nivimmik kinguneqar­tuaannarpoq. (Hebr 11:25; Tuss 19:9) Jehovap najoqqutas­siaanik maleruaasussatut pinngor­titaagatta taamaappoq. (Mos 1. 1:27) Jehovap iluarisaatut inooriaaseqarutta ‘minguitsumik nalunngeqatigin­nissuteqarnerput’ nuannaarutigisin­naavarput siunissamilu naassaan­ngitsumik inuuneqalersin­naalluta. – Tim 1. 6:12; Tim 2. 1:3; Juud 20, 21.

²¹ Ilumoorpoq ‘timi sanngiitsoq’. Tamannali isumaqanngilaq ikiortis­saqanngitsugut. Jehovap pisariaqar­titatsinnik nakussatsik­kumalluta piareersimavoq. (Korintimiunut 2. 4:7 atuaruk). Maluginiarulli Guutip pissaaneq nalingin­naanngitsoq tunniuttaraa. Pissaaneq nalinginnaasoq – tassa ullut tamaasa ussernartunut imminut illersor­niarluta sapinngisatsinnik tamaviaarnerput – nammineq akisussaaf­figaarput. Uagut sapinngisarput tamaat iliuuseqarutta qularis­sanngilarput Jehovap qinnutigut akillugit pisariaqar­titavitsinnik nakussatsis­sagaatigut. (Kor 1. 10:13) Aap, Jehovap ikiuineratigut eqqumajuarlutalu ussernartunut imminut illersorsin­naavugut.