Guutimit iluarisaasinnaagaluarpoq
JEHOVA kiffartuupparput taassuminngalu iluarisaarusullutalu pilluaqqusaarusulluta. Guutimilli qanoq iluarisaasinnaagatta? Biibilip nalaani ilaat ingasattunik ajortuliorsimagaluarlutik Guutimit iluarisaaqqilerput. Allat ajunngitsunik pissuseqaraluarlutik naggataatigut Guutimit iluarisaajunnaarput. Taamaammat ima aperisinnaavugut: “Jehovap tamatsinni suna maluginiarnerusarpaa?” Tamanna akissutissarsiumallugu Rehabeamimik, Judap kunngianik, oqaluttuaq iluaqutigisinnaavarput.
AALLARTINNERLIORTOQ
Rehabeamip angutaa, Salomo, Israelimi ukiuni 40-ni kunngiuvoq. (1 Kng 11:42) Ataatani toqummat Rehabeami Jerusalemimiit Sikemimut kunnginngorniarluni aallarpoq. (2 Nal 10:1) Kunnginngornissani ernumagaa? Salomop ilisimassusersuani tusaamaneqaatigaa. Ajornartorsiummik aaqqikkuminaatsumik aaqqiisinnaanermut ilisimassuseqarnerluni Rehabeamip takutittussanngorpaa.
Israelikkut naqisimaneqartutut misigigamik Rehabeamimut ilaminnik aallartitsipput ima oqaqqusillutik: “Ataatavit oqimaatsunik nammagassissimavaatigut; kisianni pinngitsaalisaalluni sulisitaaneq ataatavillu nammagassiissutai oqimaatsut oqilisikkukkit kiffartorfigissavatsigit.” – 2 Nal 10:3, 4.
Rehabeami aalajangeruminaatsumik aalajangigassaqalerpoq. Inuit piumasaat malippagit ilaquttanilu illussaarsuarmioqatinilu sungiussimasamittut inuulluataarunnaartariaqassagunarput. Inuilli piumasaat itigartippagit immaqa inuit pikitsitsissapput. Qanoq iliorpa? Angutit utoqqaanerusut angumminik ikiuisimasut oqaluuteqqaarpai. Taakkua inunnut tusarnaaqqullugu siunnersorpaat. Rehabeamilli ukioqatini oqaluuppai inuillu peqqarniitsumik piniarlugit aalajangerluni. Taakku ima oqarfigai: “Oqimaatsunik nammagassinniarpassi, uangalu nammakkasi suli oqimaannerulersissavakka. Ataatama iperaattamik pillartarsimavaasi, uangali skorpioninik pillartarumaarpassi!” – 2 Nal 10:6-14.
Ilinniagassartaa takusinnaaviuk? Nalitsinni ukiorpassuit Jehovamik kiffartorsimasunik utoqqarnik, eqqortunik aalajangiinissatsinnik ikiuisinnaasunik, ilaqarpugut. Silatusaarluta taakku tusarnaartigit. – Job 12:12.
JEHOVAP ‘OQAASIA NAALAPPAAT’
Pikitsitsisut akiorniarlugit maanna Rehabeamip sakkutuuni katersorpai. Jehovalli pruffiiti Shemaja ima oqariartortippaa: “Israelimiut qatanngutigigassigit saassutissanngilasi. Tamassi uterniaritsi, 1 Kng 12:21-24. *
pisimasoq tamanna uannit pivoq.” –Jehovamut naalannissaq Rehabeamimut ajornaatsuinnaanngila? Inuit kunngitaartik pillugu qanoq eqqarsassappat? ‘Skorpioninik’ pillarniarlugit oqarfigisimavai, maannali pikitsitsisorpassuit iliuuseqarfiginianngilai! (2 Nal 13:7 naleqqiuguk). Inuilli qanorluunniit isumaqaraluarpata kunngi sakkutuunilu Jehovap “oqaasia naalallugu angerlarput”.
Sumik ilinniarfigisinnaavarput? Inunnit illaruaatigineqaraluaruttaluunniit Guutimut naalannissaq silatusaarnerujuaannarpoq. Naalakkaangatta Guutip pilluaqqujuaannassavaatigut. – 5 Mos 28:2.
Rehabeami naalakkami pilluaqquneqarpa? Rehabeami Judakkunnut Benjaminikkunnullu suli naalakkersuivoq, taakkunanilu illoqarfinnik allanik sanaartorniarluni aalajangerpoq. Aamma illoqarfiit ilaat “assut pissatsitippai”. (2 Nal 11:5-12) Pingaarnerusumillu, piffissap ilaani Jehovap inatsisai malippai. Naggueqatigiit qulit naalagaaffiat guutipilussiorfiulermat amerlasuut Rehabeami pallorfiginninnerlu ilumoortoq tapersersorniarlugit Jerusalemimut aallarput. (2 Nal 11:16, 17) Tassa Rehabeami Jehovamut naalammat naalagaaffia aalajaallivoq.
REHABEAMIP AJORTULIORNERA PEQQISSIMINERALU
Rehabeamip naalagaaffini aalajaallimmat ilimaginngisamik iliorpoq. Jehovap inatsisai naalakkunnaarlugillu guutipilussiulerpoq! Sooq taamaaliorpa? Anaanaa, Ammonikkuusoq, aalajangiineranut sunneeqataava? Naluarput, inuiaalli taassuma maligassiuinerlunnera ilaarpaat. (1 Kng 14:21) Taava Jehovap Egyptenip kunngiata Shishakip Judami naalagaaffiup illoqarfippassuinik tiguaanissaa akueraa. Tamanna pivoq naak Rehabeamip illoqarfiit taakku pissatsisissimagaluarai! – 1 Kng 14:22-24; 2 Nal 12:1-4.
Shishakip sakkutuuisalu Jerusalemimut, Rehabeamip naalakkersuiffianut, saassussiniarlutik aallarmata pissutsit ajornerulerput. Tamatuma nalaani pruffiiti Shemajap Rehabeami naalagartaalu Guutimit pisumit ima nalunaariartorfigai: “Tunukkassinga uangattaaq tunussavassi Shishakip assaanut pisillusi.” Taamatut perorsaatissinneqarami Rehabeami sua? Ajunngingaartumik qisuariarpoq! Biibilimi ima allassimavoq: “Judap naalagartai kunngilu maniguutilerput oqarlutillu: ‘Naalagaq naapertuilluartuuvoq!’” Taamaammat Jehovap Rehabeami annaappaa, Jerusalemilu aserugaanngilaq. – 2 Nal 12:5-7, 12.
Tamatuma kingorna Judap naalagaaffiani naalakkersuinini Rehabeamip ingerlatiinnarpaa. Toqunnginnermini ernini amerlasuunik tunissuteqarfigai. Qatanngutiminnut Abijamut, kunnginngortussamut, pikitsitsinnginnissaat anguniagarigunarpaa. (2 Nal 11:21-23) Taamaaliornermigut Rehabeami inuusunnerminiit silatusaarnerusumik iliorpoq.
REHABEAMI AJUNNGITSUUA AJORTUUALUUNNIIT?
Rehabeami ajunngitsuliorsimagaluartoq taassuma naalakkersuinera pillugu Biibilimi ima allassimavoq: “Ajortumik inuuseqarpoq.” Sooruna? “Naalakkap ujarnissaa pingaartinnginnamiuk.” Taamaammat Jehovap iluarinngilaa. – 2 Nal 12:14.
Rehabeamip inuuneranit suna ilinniarfigisinnaavarput? Ilaannikkut Guuti naalattarpaa. Aamma Jehovap innuttaanut ajunngitsunik suliaqarpoq. Jehovali qanittumik attaveqarfiginngilaa, taassuminngalu iluarisaarusulluni qamannga pisumik kissaateqanngilaq. Taamaalilluni eqqortuliorunnaarpoq guutipilussiulerlunilu. Immaqa ima eqqarsarputit: ‘Jehovap naqqiinera Rehabeamip akuerigamiuk imaappa kukkussutini ilumut peqqissimissutigigai, Guutimillu iluarisaarusuttoq? Immaqaluunniit allat qanoq iliornissaminik oqarnerat maliinnarpaa?’ (2 Nal 11:3, 4; 12:6) Kingusinnerusukkut inuunermini ajortulioqqilerpoq. Aatani kunngi Daavi assiginngingaaramiuk! Ilumoorpoq Daavi aamma kukkusarmat, ajortulianili ilumoorluni peqqissimissutigai. Aamma inuunini naallugu Jehova asallugulu pallorfiginninneq ilumoortoq pingaartippaa. – 1 Kng 14:8; Tuss 51:3, 19; 63:2.
Biibilimi oqaluttuaq tamanna ilinniarfigingaarsinnaavarput. Inuit ilaquttaminnik pilersuigaangata allanullu ajunngitsulioraangata ajunngittaqaaq. Jehovamilli iluarisaajumalluta taassuma akuerisaatut pallorfigisariaqarparput taassumunngalu qanittumik attaveqartariaqarluta.
Tamanna anguniarlugu Jehovamut qamannga pisumik asannittuusariaqarpugut. Soorlu ikumatitsigaangatta inneq qameqqunagu qisuttortuartariaqaripput, taamatuttaaq Guutimut asannittuarsinnaavugut taassuma Oqaasianik atuaqqissaartarnikkut, eqqarsaatigeqqissaartarnerisigut qinunikkullu nikallujuinnikkut. (Tuss 1:2; Rom 12:12) Aamma asanninnerput qanorluunniit ilioraangatta Jehovamit iluarisaarusulissutigissavarput. Kukkugaangattalu ilumoorluta peqqissiminissamut Jehovamullu isumakkeerfigeqqusarnissamut kajumississutigissavarput. Taava Rehabeamitut issanngilagut, pallorfiginninnermullu ilumoortumut aalajaattuassalluta. – Jud 20, 21.
^ par. 9 Salomo aalajaakkunnaarmat naalagaaffiup marlunngorluni avinnissaa Guutip oqaatigereersimavaa. – 1 Kng 11:31.