Atuartartut apeqqutaat
Galatiamiunut allakkani 5:22, 23-milu allassimasut kisimik ‘anersaap inerititaanut’ ilaappat?
Kristumiutut pissuserisassat qulingiluat versini taakkunani allaatigineqarput: “[Anersaap] inerititaa tassa asanninneq, nuannaarneq, eqqissineq, kamaginninneq, inussiarnissuseq, ajunngissuseq, upperneq, saamaneq, imminut naalakkersinnaaneq.” (NW) Guutilli anersaava iluaqutigalugu pissuserilersinnaasavut taakkuinnaanngillat.
Anersaap inerititaa allaatigitinnagu Paulusip allatai uku maluginiakkit: “Uinngup suliai [tassaapput] kanngunartuliorneq, mingunnartuliorneq, ippinnartuliorneq, guutipilussiorneq, anersaalerineq, qinngarsuineq, saqitsaanneq, annerusineq, kamanneq, saqitsagajunneq, assuariinneq, immikkoorniarneq, sinnganeq, imerajunneq, nerrersuneq allallu taamaattut.” (Gal 5:19-21, NW) Tassa Paulusi ‘uinngup suliaanik’ allanik, soorlu Kolossemiut 3:5-imi eqqaaneqartunik, eqqaasaqarsimasinnaagaluarpoq. Tamatumunnga assingusumik anersaap inerititaata immikkoortui qulingiluat allaatigereerlugit ima nangippoq: “Taamaattunut inatsisit assortuinngillat.” (NW) Anersaaq illernartoq iluaqutigalugu pissutsit nuannersut ineriartortissinnaasavut Paulusip tamakkerlugit eqqaanngilai.
Qanoq nalunngilarput? Paulusip ilagiinnut Efesosimiittunut allatamini qaamasup inerititaa qanoq allaatigineraa maluginiaruk: “Qaamasup inerititai tamatigut [tassaapput] ajunngitsuuneq, iluarneq ilumoornerlu.” (Ef 5:8, 9) “Ajunngitsuuneq, iluarneq ilumoornerlu” ‘qaamasup inerititaanut’ ilaapput, ajunngitsuunerli aamma ‘anersaap inerititaanut’ ilaavoq. Paulusip ‘iluarneq ilumoornerlu’ Galatiamiut 5:22, 23-milu eqqaanngilai, eqqaasimasuugunigilli aamma tamanna kukkunerusimanavianngilaq.
Tamatumunnga assingusumik Paulusip Timotheusi kajumissaarpaa “naapertuilluarneq, Guutimut tunniusimaneq, upperneq, asanninneq, pinertusaarneq, [aamma] saamaneq” noqqaassutigissagai. (1 Tim 6:11, NW) Taakkunannga pingasuinnaat (upperneq, asanninneq aamma saamaneq) ‘anersaap inerititaanut’ ilaasutut allaatigineqarput. Timotheusilli anersaaq illernartoq iluaqutigalugu naapertuilluarneq, Guutimut tunniusimaneq aamma pinertusaarneq ineriartortittariaqarpai. – Kolossemiut 3:12; 2 Petrusi 1:5-7 naleqqiutikkit.
Tassa kristumiutut pissuserisassat tamakkerlugit Galatiamiunut allakkani 5:22, 23-milu allaatigineqanngillat. Guutip anersaava iluaqutigalugu ‘anersaap inerititaanik’ ineriartortitsisinnaavugut. Anersaakkulli inersimallualerumagutta pissuserisassat taakku qulingiluat kisiisa ineriartortinnissaat naammanngilaq. Aamma “inuttut pissuseq nutaaq Guutip piumasaa naapertorlugu ilumoortumik naapertuilluarnikkut ilumoorfiginninnikkullu pinngortitaq” atissagutsigu allat ineriartortittariaqarpavut. – Ef 4:24, NW.