1. Oqaluus­sisar­tup oqaasii 7:20-mi allas­simasutut kun­ngip Saalumuup qanoq ilin­niar­tip­paatigut?

 KUN­NGI Saalumuut allap­poq: “Nunami ima iluas­suseqar­tigisumik inoqan­ngilaq ajun­ngitsuliuin­navil­luni ajor­tuliun­ngisaan­narlunilu inuusumik.” (Oqal 7:20) Aap, tamatta ajor­tiliuvugut. (Joh 1. 1:8) Taamaat­tumillu tamatta Guutimit inoqatitsin­nillu isumak­keerfigineqar­tar­nis­samik pisariaqar­titsisar­pugut.

2. Qanimut ikin­ngum­mit isumak­keerfigineqar­neq qanoq misiginar­tar­pa?

² Qular­nan­ngitsumik qanimut ikin­ngutin­nik ajual­latsitsinikuuvutit. Kuk­kus­sutit aaq­qik­kusuk­kakku ikin­ngutigiuarusuk­kak­kulu ilumoorlutit utoq­qatserfigaat. Isumak­keerfigim­matit qanoq misigivit? Oqilial­lap­pit? Aap, nuan­naangaaler­putit!

3. Allaaserisami matumani suut eqqar­tus­savagut?

³ Jehova ikin­ngutiginer­paarusup­par­put, ilaan­nik­kulli oqaatsitigut iliuutsitigullu ajual­latsit­toor­tar­par­put. Isumak­keerfigerusuk­kaatigulli sooq qularin­ngis­sin­naavar­put? Jehovap isumak­keerfigin­nit­tar­nera uagullu isumak­keerfigin­nit­tar­ner­put qanoq assigiin­ngis­suteqar­pat? Kingul­ler­tullu, kik­kut Guutimit isumak­keerfigineqarsin­naap­pat?

4. Sooq Jehovap isumak­keerfigin­nik­kumasar­nera qularin­ngis­sin­naavar­put?

⁴ Jehovap isumak­keerfigin­nik­kumasar­neranik oqaasiani neriorsoq­qis­saar­neqar­pugut. Inngili oqaaseqar­tar­toq aqqutigalugu qaq­qami Siinaajimi Moorsisimut Jehova imminut ima eqqar­tor­poq: “Naalagaq, Naalagaq tassa Guuti nal­lit­tuisoq saam­maasorlu, kamajaatsoq ilumoor­nermik sal­lusuis­sum­millu peqangaar­toq. Ilumoor­nermik atatitsisoq kinguaariis­soqatigiinni tuusintini ataatsini pisuus­susernik unioq­qutitsinernillu, ajortulianillu isumak­kiisoq.” (Mos 2. 34:6, 7) Jehova Guutiugami asan­nit­toq nal­lit­tuisorlu ajor­tulior­tut peq­qis­simisut isumak­keerfigiumasar­pai. – Neh 9:17; Tuss 86:15.

5. Tus­siaat 103:13, 14-ilu naaper­torlugit Jehovap ilisimasani qanoq sun­ner­tis­sutigisar­pai?

⁵ Jehovap Pin­ngor­titsisuusup ilisimal­luin­nar­paatigut. Inuit ataasiak­kaat tamaasa ilisimaq­qis­saarmagit tupin­naqaaq! (Tuss 139:15-17) Aamma naam­mal­luin­nan­ngis­sutsit angajoq­qaatsin­nit kingor­nus­sagut tamaasa nalun­ngilai. Allaallu inuunermi aqqusaak­katsin­nit qanoq ilusilersor­neqar­tugut ilisimavaa. Jehovap ilisimasani qanoq sun­ner­tis­sutigisar­pai? Nal­lit­torusuler­tar­paatigut. – Tuss 78:39; Tussiaat 103:13, 14 atuakkit.

6. Jehovap isumak­keerfigin­nik­kusungaar­nini qanoq upper­narsarsimavaa?

⁶ Jehovap isumak­keerfigin­nik­kusungaar­nini upper­narsarsimavaa. Nalun­ngilaa inuup siul­liup, Adamip, iliuusii pis­sutigalugit ajor­timik toqumillu perloq­quneqar­tugut. (Rom 5:12) Kinaluun­niit perloq­qus­sum­mit tamatuman­nga imminut aniguisis­sin­naananilu allamik aniguisitsisin­naan­ngilaq. (Tuss 49:8-10) Guuter­pulli asan­nit­toq misigin­neqatigaluta aniguisin­niarluta iliuuseqar­poq. Qanoq? Johan­nesi 3:16-imi allas­simavoq Jehovap ernituani uagut pil­luta toqoq­qul­lugu aal­lar­tik­kaa. (Mat 20:28; Rom 5:19) Jiisusi upper­tini kinaluun­niit aniguisin­niarlugu naal­liul­luni toquvoq. (Hebr 2:9) Jehovap ernini asaqisani anniangaarluni kan­ngunarsagaal­lunilu toqusoq takul­lugu anniaatigisimas­saqaa! Jehovap isumak­keerfigerusun­ngik­kunisigut ernermi toqunis­saa akuerisimanavian­ngik­kaluar­paa.

7. Biibilimi Jehovap ilumoorluni isumak­keerfigisaasa ilaat kik­kuup­pat?

 ⁷ Biibilimi Jehovap ilumoorluni isumak­keerfigisai arlal­lit allaatigineqar­put. (Ef 4:32) Kik­kut eqqaavigit? Immaqa kun­ngi Manasse ajor­tuusoq Jehovamullu ajorluin­nar­tumik ajor­tulior­toq eqqaavat. Taanna guutipilus­sior­nermik siulersuivoq. Meeq­qani guutipilun­nut pil­liutigalugit toqup­pai. Allaat guutisiorfimmi Jehovamut pigititami guutiliaq nap­par­tip­paa. Biibilimi ima allaatigineqar­poq: “Anner­toqisumik Naalak­kap isaani ajor­tumik ilior­poq tamatumuunak­kullu narrutsatsil­lugu.” (Nal 2. 33:2-7) Manas­seli qaman­nga pisumik peq­qis­simim­mat Jehovap ilumoorluni isumak­keerfigaa allaallu kun­ngin­ngor­teq­qil­lugu. (Nal 2. 33:12, 13) Immaqa aamma kun­ngi Daavi, ilaatigut allasior­nermigut toqutsinermigullu Jehovamut ingasat­tumik ajor­tulior­toq, eqqaavat. Ajor­tulianili nas­suerutigim­magit ilumoorlunilu peq­qis­simim­mat Jehovap isumak­keerfigaa. (Sam 2. 12:9, 10, 13, 14) Aap, Jehovap isumak­keerfigin­nik­kumasar­nera qularin­ngis­sin­naavar­put. Aamma sam­misas­satsitut isumak­keerfigin­nit­tar­nera inuit isumak­keerfigin­nit­tar­neran­nit allaaneruvoq.

8. Jehovap asseqan­ngitsumik Eqqar­tuus­sisuunera isumak­keerfigin­nis­sin­naaneranut qanoq sun­niuteqar­pa?

⁸ Jehova ‘nunarsuarmik tamarmik eqqar­tuus­sisuuvoq’. (Mos 1. 18:25) Eqqar­tuus­sisup pik­koris­sup inatsisit ilisimal­luar­tariaqar­pai. Jehova Eqqar­tuus­sisoriin­nar­nagu Inatsisilior­torigatsigu Eqqar­tuus­sisuuvoq pik­koril­luin­nar­toq. (Es 33:22) Jehovap eqqor­tut eqqun­ngitsullu ilisimal­luar­ner­paavai. Eqqar­tuus­sisoq pik­koris­soq aamma susin­naasariaqar­pa? Aalajangiin­ngin­nermini pis­sutsit piviusut tamaasa misis­sorsin­naasariaqar­pai. Tamatumun­nga tun­ngatil­lugu aamma Jehova Eqqar­tuus­sisuuvoq pitsaaner­paaq.

9. Jehovap isumak­keerfigin­nis­sanerluni aalajangiileraangami suut tun­ngavigisar­pai?

⁹ Jehovap suliani tamani pis­sutsit tamaasa ilisimal­luaq­qis­saar­taramigit inun­nit eqqar­tuus­sisunit allaaneruvoq. (Mos 1. 18:20, 21; Tuss 90:8) Inuit takusaat tusagaallu kisiisa isumal­luutigineq ajor­pai. Nalun­ngil­luin­nar­paa inuup iliuusii tunuliaqutaanit, peroriar­tor­neranit, avatangiisiinit misigis­susiinit isumaanillu qanoq sun­ner­neqar­tar­tut. Jehovap aamma uum­mam­miugut takusin­naavai. Pis­sutiginiak­kagut, siuner­tagut kis­saatigullu paasil­luin­naq­qis­saarsin­naavai. Suul­luun­niit Jehovamut iser­tor­neqarsin­naan­ngil­lat. (Hebr 4:13) Taamaat­tumik Jehovap isumak­keerfigin­nin­nera pis­sutsinik ilisiman­nil­luin­nar­neranik tun­ngaveqar­tar­poq.

10. Sooq oqarsin­naavugut Jehovap eqqar­tuus­sutai naaper­tuil­luar­tuaan­nar­tut? (Mosesimik 5. 32:4)

¹⁰ Jehovap eqqar­tuus­sutai naaper­tuil­luar­tuaan­nar­put. Kinaas­susersiun­ngil­luin­nar­tar­poq. Isik­koq, pigis­saar­neq, nuimaneq pigin­naaneril­luun­niit tun­ngavigalugit isumak­keerfigin­nin­ngisaan­nar­poq. (Sam 1. 16:7; Jaak 2:1-4) Kialuun­niit Jehova akilerlugu peq­quserlutsis­sin­naanagulu tatisin­naan­ngilaa. (Nal 2. 19:7) Pakatsineq kil­litsianerluun­niit tun­ngavigalugit aalajangiin­ngisaan­nar­poq. (Mos 2. 34:7) Jehovap pis­sutsit atuk­kagut ilisimal­luin­naramigit Eqqar­tuus­sisuuvoq piuk­kun­nar­ner­paaq. – Mosesimik 5. 32:4 atuaruk.

11. Sooq Jehovap isumak­keerfigin­nit­tar­nera asseqan­ngila?

¹¹ Hebræerisut Allak­kanik Iller­nar­tunik allaqataasut Jehovap isumak­keerfigin­nit­tar­nerata asseqan­ngin­nera paasivaat. Qinerlerfis­siaq  naaper­torlugu ilaan­nik­kut hebræerisut oqaaseq taamaal­laat Guutip ajor­tulior­tumik isumak­keerfigin­neriaasianut innersuus­sutaasoq ator­tar­paat. Oqaatsimi tas­sani inuit kil­lilim­mik isumak­keerfigeqatigiit­tar­nerat pineqan­ngisaan­nar­poq. Jehovap kisimi ajor­tulior­toq peq­qis­simisoq isumak­keerfigil­luin­narsin­naavaa. Jehovamit isumak­keerfigineqar­ner­put qanoq iluaqutigisar­par­put?

12-13. (a) Jehovamit isumak­keerfigineqar­toq qanoq misigisar­pa? (b) Jehovap isumak­keerfigin­nin­nera qanoq sivisutigisumik iluaqutigineqar­tar­pa?

¹² Jehovap isumak­keerfigin­nis­simanera akuerigaangatsigu ‘nakus­satsit­tarlutalu’ isumak­kut eqqis­sisarlutalu minguitsumik nalun­ngeqatigin­nis­suteqaler­tar­pugut. Jehovamit isumak­keerfigineqar­nik­kuin­naq taama misigisin­naavugut. (ApS 3:19) Jehovap isumak­keerfigigaangamitigut ajor­tuliorsiman­ngisaan­nar­tutut isigaluta ikin­ngutigileq­qit­tar­paatigut.

¹³ Jehovap isumak­keerfigereeraangamitigut ajor­tuliar­put pil­lugu unnerluutigeq­qis­sanatalu pil­lan­ngisaan­nas­savaatigut. (Es 43:25; Jer 31:34) Jehovap ajor­tuliagut ‘kangiata kitaanit ungasitsigineratut’ uatsin­nit ungasil­lisip­pai. (Tuss 103:12) Jehovap isumak­keerfigin­nin­nera qanoq anner­tutigisoq eqqarsaatigigaangatsigu qujamasungaaler­tarlutalu mianerin­niler­tar­pugut. (Tuss 130:4) Kik­kulli Jehovamit isumak­keerfigineqarsin­naap­pat?

14. Jehovap isumak­keerfigin­nit­tar­neranut tun­ngatil­lugu suut sam­mereer­pagut?

¹⁴ Sam­meriik­katsitut ajor­tuliap qanoq anner­tutiginera annikitsigineraluun­niit Jehovap isumak­keerfigin­nin­neranut aalajangiisuuneq ajor­poq. Aamma paasivar­put Jehovap isumak­keerfigin­nis­sanerluni aalajanger­nialeraangami Pin­ngor­titsisitsitut, Inatsisilior­tutsitut Eqqar­tuus­sisutsitullu ilisimasani ator­tarai. Jehovalli suut maluginiar­tar­pai?

15. Jehovap suna maluginiar­tar­paa? (Luk­karsi 12:47, 48)

¹⁵ Jehovap maluginiar­tagaasa ilagaat piaaraluni ajor­tulior­toqarsimanersoq. Tamanna Jiisusip Lukkarsi 12:47, 48-milu erseq­qis­sar­paa. (Atuakkit). Inuk ajor­tulior­nis­saminik pilersaarusior­toq Jehovallu maajugisaatut piaaraluni ilior­toq ingasat­tumik  ajor­tulior­poq. Taman­nalu pis­sutigalugu Jehovamit isumak­keerfigineqan­ngeratarsin­naavoq. (Mak 3:29; Joh 9:41) Nas­suerutigisariaqar­par­pulli ilaan­nik­kut nalun­ngik­kaluarlugu eqqun­ngitsulior­taratta. Tamatumani isumak­keerfigineqarsin­naavugut? Soorunami! Jehovap alla maluginiar­tagaa sam­meriar­tigu.

16. Peq­qis­simineq qanoq paasisariaqarpa, Jehovamillu isumak­keerfigineqar­nis­samut sooq pingaaruteqar­pa?

¹⁶ Jehovap ajor­tulior­toq ilumoorluni peq­qis­siminersoq aamma maluginiar­tar­paa. Peq­qis­simineq qanoq paasisariaqar­pa? Tas­saavoq “isumamik, isigin­nit­taatsimik siuner­tamil­luun­niit allan­ngor­titsineq”. Tamatumani pineqar­put ajor­tuliamik eqqor­tuliun­ngitsoor­nermil­luun­niit peq­qis­simis­sutigin­nin­neq qaman­ngalu pisumik ajuusaarutigin­nin­neq. Peq­qis­simisup kuk­kus­sutini aliasuutigiin­nar­nagit kisianni aamma anersaak­kut san­ngiil­linini pis­sutigalugu eqqun­ngitsuliorsimanini aliasuutigisar­paa. Eqqaamas­savat kun­ngit Manasse Daavilu ingasat­tumik ajor­tulioraluarlutik ilumoorlutik peq­qis­simigamik Jehovamit isumak­keerfigineqarmata. (Kng 1. 14:8) Aap, Jehova peq­qis­siminermut upper­narsaatinik takoq­qaarluni isumak­keerfigin­nit­tar­poq. Ajor­tulior­tar­nerulli ajor­tuliorsimanerul­luun­niit aliasuutiginerat naam­man­ngilaq. Iliuuseqar­nis­samut piareersimasariaqar­pugut. * Tamanna aamma Jehovap maluginiar­tar­paa.

17. Jehovamut saan­neq qanoq paasisariaqarpa, ajor­tuliar­pullu ajor­tuliareq­qis­san­ngik­kutsigu tamanna sooq pingaaruteqar­pa? (Esaja 55:7)

¹⁷ Jehovap aamma ajor­tulior­toq imminut saas­simanersoq maluginiar­tar­paa. Tassa inuk ajor­tuliorun­naarluni Jehovap iluarisaatut inooriaaseqar­tariaqar­poq. (Esaja 55:7 atuaruk). Jehovatut eqqarsar­taaseqalerumal­luni isumaminik allan­nguisariaqar­poq. (Rom 12:2; Ef 4:23) Eqqarsar­taaserisimasaminik iliuuserisarsimasaminillu aalajangersimal­luin­narluni unitsitsisariaqar­poq. (Kol 3:7-10) Kisianni soorunami aatsaat Kristusip pil­liutaa upperigutsigu Jehovap isumak­keerfigerusus­sal­lutalu ajor­tuliagut piias­savai. Jehovap pis­suserisatsin­nik allan­nguiniarluta  sapin­ngisatsin­nik iliuuseqar­tugut takuguniuk pil­liut taanna tun­ngavigalugu isumak­keerfigerusus­savaatigut. – Joh 1. 1:7.

18. Jehovap isumak­keerfigin­nit­tar­nera pil­lugu suut sam­mereer­pagut?

¹⁸ Eqqar­tuk­katta pingaar­nersaat naatsumik uteq­qilaariar­tigit. Jehovap isumak­keerfigin­nit­tar­nera asseqan­ngilaq. Sooq taama oqarsin­naavugut? Siul­ler­tut, isumak­keerfigin­nik­kumatuujum­mat. Aap­paat­tut, ilisimal­luin­narmatigut. Tunuliaqutar­put nalun­ngil­luin­naramiuk ilumoorluta peq­qis­siminersugut ilisimavaa. Pingajuat­tullu, Jehovap isumak­keerfigigaangamitigut ajor­tuliagut tamaasa peer­tarmagit. Taamaat­tumillu minguitsumik nalun­ngeqatigin­nis­suteqarsin­naal­lutalu taas­suman­nga iluarisaasin­naavugut.

19. Sooq naam­mal­luin­nan­ngitsuugaluarluta ajor­tulior­taraluarlutalu nuan­naarsin­naavugut?

¹⁹ Soorunami naam­mal­luin­nan­ngitsuutil­luta ajor­tulior­tas­saagut. Taamaat­torli Indsigt i den Hellige Skrift, atuagaq 2, qup­per­neq 770-imi allas­simasut tup­pal­lersaatigisin­naavagut: “Jehovap nal­lit­tuisutut san­ngiis­sutsit innimigisarmagit kif­faasa naam­mal­luin­nan­ngis­suseq kingor­nus­simasar­tik pis­sutigalugu kuk­kus­sutitik ilerasuutigiuar­tariaqan­ngilaat. (Ts 103:8-14; 130:3) Guutip aqqutigeq­qusaatigut ingerlajuarunik nuan­naarsin­naap­put. (Flp 4:4-6; Jo1 3:19-22).” Tamanna qiim­maal­lan­nangaarami!

20. Allaaserisap tul­liani suut sam­mis­savagut?

²⁰ Ajor­tuliarisimasagut ilumoorluta peq­qis­simis­sutigigaangatsigit Jehovap isumak­keerfigerusut­tarmatigut qujamasungaar­pugut. Jehovali isumak­keerfigin­nit­tar­toq qanoq ilaarsin­naavar­put? Isumak­keerfigin­nit­tar­ner­put Jehovap isumak­keerfigin­nit­tar­neranut sutigut assigiis­suteqar­pat sutigullu assigiin­ngis­suteqarlutik? Tamatuma paasinis­saa sooq pingaaruteqar­pa? Apeq­qutit taakku allaaserisap tul­liani akineqas­sap­put.