Tamanna Biibilimi nassuiar­neqanngilaq. Aalajanger­nerannulli pissutaaqataasinnaasut soqutiginartut eqqaaneqarput.

Mariia inngilimit oqarfigineqarpoq naartulerlunilu ernissasoq. Mariia inngilimit taama paasitin­neqarami Naazaratsimi, illoqarfimmi Galiliiamiittumi, najugaqarpoq, aamma Juuserfi tassani najugaqarpoq. (Luk 1:26-31; 2:4) Kingusin­nerusukkut Egyptenimiit uteramik Naazaratsimut tikipput. Jiisusi tassani peroriartorpoq Naazaratsimiun­ngorlunilu. (Mat 2:19-23) Taamaattumik Jiisusi, Juuserfi Mariialu eqqarsaatigigaangatsigit aamma Naazaratsi eqqaasarparput.

Mariiap ilaqutaasa ilaat Elizabettimik atilik Juudami najugaqarpoq. Elizabettip palasi Zakkaria uigaa, taakkualu Johannesi imermut morsutsitsisalersoq ernertaaraat. (Luk 1:5, 9, 13, 36) Mariiap Elizabetti qaammatini pingasuni Juudami tikeraarsimavaa. Kingorna Naazaratsimut uterpoq. (Luk 1:39, 40, 56) Taamaattumik Mariiap Juudap nunataa nalunngilaa.

Kingusin­nerusukkut Juuserfi Mariia ilagalugu Naazaratsi qimallugu Betlehem­miliarpoq Romamiut peqqusisimammata ‘inuit tamarmik illoqarfimmut inunngorfigisaminnut nalunaarsor­tikkiar­tussasut’. Siulittuutit naapertorlugit Betlehemmi tassaavoq Missiarsip inunngorfissaa. (Luk 2:3, 4; Sam 1. 17:15; 20:6; Mika 5:1) Jiisusi inunngoq­qammersoq Juuserfip Mariia naalungiarsuuteqartoq ungasissumut Naazaratsimut angalassasoq piumaffiginngilaa. Jerusalemmimit kilometerinik qulinngiluanik ungasitsigisumi, Betlehem­mimiiginnarput. Taamaalillutik naalungiartik ilagalugu Jehovap inatsisaanut naapertuuttumik pilliiar­tornissartik ajornan­nginnerutippaat. – Mos 3. 12:2, 6-8; Luk 2:22-24.

Siusinnerusukkut Guutip inngiliata Mariia oqarfigisimavaa ernera ‘Daavip issiavis­saarsuanik tunineqassasoq kunngisullu naalakkersuisuussasoq’. Immaqa Juuserfip Mariiallu paasivaat Jiisusip Betlehemmimi, Daavip illoqarfiani, inunngornissaa pingaaruteqartoq. (Luk 1:32, 33; 2:11, 17) Immaqa isumaliorput Guutip qanoq iliortik­kusunneraatsik utaqqitillugu tassaniigin­narunik silatusaar­nerussasoq.

Ullorissat najoqqutaralugit siulittuisartut Betlehemmimut apuummata naluarput Juuserfi Mariialu qanoq sivisutigisumik tassaniis­simanersut. Eqqaaneqarporli illumi najugaqartut, ernerallu inorlaajunani ‘nukappiaran­nguusoq’. (Mat 2:11) Naazaratsimut uteratik Betlehemmimi najugaqalersimarpasipput.

Herodasi peqqusivoq “nukappiaqqat marlunnik ukiullit nukarliunerusullu Betlehem­mimiittut ... tamarmik toqorar­neqassasut”. (Mat 2:16) Juuserfi tamanna pillugu inngilimit mianersoq­quneqarami Mariia Jiisusilu ilagalugit Egyptenimut qimaavoq Herodasillu toqunissaata tungaanut tassaniigin­narlutik. Kingusin­nerusukkut Juuserfi ilaqutaalu Naazaratsimut nuupput. Sooq Betlehemmimut utinngillat? Tamatuma nalaani Herodasip ernera, Arkilaausi, peqqarniitsoq Judiiami naalakkersuilersimammat Juuserfilu inngilimit mianersoq­quneqarami tassunngas­sagaluarunik navianartoq. Naazaratsimi Juuserfip Jiisusi toqqissisimatillugu perorsarpaa, Jiisusilu Guutimut kiffartor­tunngorpoq. – Mat 2:19-22; 13:55; Luk 2:39, 52.

Jiisusi toqunermigut allanik qilaliar­nissamik suli periarfis­siinngitsoq Juuserfi toqusimagunarpoq. Taamaattumik Juuserfi nunarsuarmi makititaassaaq. Taamanik­kussamut inuppassuit Juuserfi naapillugu aperisin­naavaat sooq Mariialu Jiisusip inunngornerata kingorna Betlehem­mimiigin­narsimanersut.