1-2. Lotsimut assingusumik nalitsinni qanoq unamminiagaqarpugut?

 NALITSINNI inuit atoqatigiinnermut isiginnit­taasiat eqqarsaatigalugu Lotsitut misigisarpugut. Taanna ‘inatsisaatsut kanngut­taatsulior­nerannik aliasuutigin­ningaarpoq’. (Pet 2. 2:7, 8) Lotsip Guuti mianeralugulu asagamiuk inuit iliuusii ajortut Guutip uumigisai itigartippai. Aamma nalitsinni inuit Jehovap najoqqutas­siaanik ataqqin­ninngitsut akornanni inuuvugut. Taamaak­kaluartorli Guuti asallugulu mianerinissaa ineriar­tortikkutsigu taassuma isaani minguitsuujuarsin­naavugut. – Uss 14:2.

² Ussatit iluaqutigalugit Jehovap asannilluni minguitsuujuar­nissamut piumassuseqalersip­paatigut. Kristumiut tamarmik – angutit arnallu, inuusuttut utoqqaallu – Ussatini allassimasut ilinniarfigigunikkit iluaqutigingaarsin­naavaat.

3. Nalunaarsuutit siulliit 28:9 naapertorlugu uummatitta illersornissaa sooq pingaaruteqarpa? (Aamma asseq takuuk).

³ Uummatitta assersuutaasup illersornissaa pingaaruteqarluinnarpoq. Sooq? Jehova uummatinik misissuisarmat. Tassa inuit takusin­naasaat isigiin­narnagit qamuuna inuttut qanorpiaq ittuunerput takusin­naasarpaa. (Nalunaarsuutit 1. 28:9 atuaruk). Siunnersuutai naassaan­ngitsumik inuussutaasinnaasut eqqarsaatigiuarutsigit asajumaarpaatigut. (Joh 4:14) Taava Saatanip inuillu pissaaneqarfigisaasa atoqatigiinnermut tunngatillugu salloqit­taaniutaannik eqqarsalaar­navianngilagul­luunniit. (Joh 1. 5:18, 19) Jehova qanilliar­torutsigu asanerulerlugulu ataqqinerulis­savarput. Ataatarput aliasutsik­kusunngin­natsigu ajortuliornissaq uumigingaaratsigu  eqqarsaatigis­sanngilarpul­luunniit. Taamaattumik ussernar­torsioraangatta ima eqqarsar­tarpugut: ‘Guuti uannik asanningaartoq qanoq-aamma piaaralunga aliasutsik­kusussavara?’ – Joh 1. 4:9, 10.

4. Qatanngutip arnap Jehovamik mianerin­ninnini nakkaan­nanngin­nissamut qanoq illersuutigaa?

⁴ Marta, qatanngut arnaq Kroatiami najugalik atoqatigiinnikkut eqqunngitsulior­nissamut ussernar­torsiortoq, ima allappoq: “Eqqarsarluaq­qissaar­nissara ajortuliorusus­suseqar­nermalu akiornissaa sapernar­tippara. Jehovali mianerigakku tamanna illersuutigaara.” b Qanoq illersuutigigamiuk? Marta oqarpoq ajortumik aalajangiinerup qanoq kinguneqarlutitsisin­naanera eqqarsaatigisimallugu. Aamma uagut taamaaliorsin­naavugut. Nakkassagaluarutta ajorluin­nartumik kinguneqarsinnaavoq, tassami Jehova aliasutsis­savarput naassaan­ngitsumillu kiffartorsin­naanerput annaaratarsin­naallugu. – Mos 1. 6:5, 6.

5. Leo qanoq ilinniutigisin­naaviuk?

⁵ Jehova mianerigutsigu ajortumik iliortartut ikinngutigerusun­navianngilagut. Leop, Congomi najugallip, tamatuma ilumoornera paasivaa. Imermut morsutsitaanermi kingorna ukiut sisamat qaangiummata ikinngutipalaaqalerpoq. Eqqarsarpoq nammineq ajortuliun­ngikkuni Jehova ajortuliorfiginagu. Sivitsun­ngitsorli ikinngutipalaani ilaarlugit imigassamik atornerluillunilu atoqatigiinnikkut eqqunngitsuliorpoq. Angajoqqaami kristumiuusut ilinniar­titsissutaat taamanilu Jehovamut kiffartorallarami qanoq pilluar­tiginerluni eqqarsaatigilerpai. Tamatuma kingunerisaanik silattuaqivoq. Utoqqaanertanit ikiorneqarluni Jehovamut uterpoq. Maannalu utoqqaanertatut specialpioneritullu nuannaarluni kiffartorpoq.

6. Arnat assersuutaasut marluk qanoq ittut sammissavagut?

 ⁶ Ussatit kapitali 9 sammeriartigu. Tassani ilisimassuseq sianiis­suserlu – arnatut assersuutaasutut – eqqartor­neqarput. c Sammineranni eqqaamajuk inuit Saatanip pissaaneqarfigisaasa atoqatigiinnikkut eqqunngitsuliorneq pornografiilu tiguartif­figisimagaat. (Ef 4:19) Pingaaruteqangaarpoq Guutimik mianerin­ninnermik ineriar­tortitsiuar­nissarput ajortunillu ingalas­simannin­nissarput. (Uss 16:6) Taamaattumik tamatta, angutaagaluarutta arnaagaluarut­taluunniit, kapitali taanna iluaqutigisin­naavarput. Tassani arnat marluk ‘misilit­tagakitsunik’ ‘sianiitsunillu’ qaaqqusipput. Tamarmik immikkut oqartarput: ‘Maanga sanguniarit illunnut neriartorlutit.’ (Uss 9:1, 5, 6, 13, 16, 17) Sorlermulli isernerat assigiin­ngilluin­nartunik kinguneqarumaarpoq.

7. Arnap sianiis­susermut assersuutaasup qaaqqusineranik akuersineq qanoq kinguneqartarpa? (Ussatit 9:13-18) (Aamma assiliaq takuuk).

⁷ Ussatit 9:13-18 atuakkit. Arnap sianiis­susermut assersuutaasup qaaqqusinera eqqarsaatigiuk. Illumini festeqatigiumallugit sianiitsut qaaqqusarpai. Isertunut qanoq kinguneqartarpa? “Pulaartui toqusut inaata itinersaaniipput.” Ussatini assersuutaasut assingusut eqqaaneqareersut eqqaamas­sagunarpatit. ‘Arnaq takornartaq’ innimiilluni qaninniarujoortoq pillugu ima mianersoq­quneqarpugut: “Taassuma illua toqumut kiviartorpoq.” (Uss 2:11-19) ‘Arnaq takornartaq’ alla pillugu mianersoqqussut Ussatit 5:3-10 atuarneqarsinnaavoq. Arnap taassuma “tumai atapput toqup tungaanut”.

8. Qanoq aalajangigas­saqarpugut?

⁸ Arnamik sianiitsumik tusaasut aalajangigas­saqarput: Qaaqqusissutaa akuerissavaat itigartil­luguluunniit? Uaguttaaq assingusumik aalajangigas­saqalersin­naavugut. Atoqatigiinnikkut eqqunngitsulior­nissamut ussernar­torsiorutta pornografiimul­luunniit tunngasut fjernsynikkut internetik­kulluunniit nueriataarpata qanoq iliussaagut?

9-10. Sooq atoqatigiinnikkut eqqunngitsuliorneq ingalas­simassavarput?

⁹ Atoqatigiinnikkut eqqunngitsuliun­nginnissamut pissutis­saqarluarpugut. Arnaq sianiis­susermut assersuutaasoq oqarpoq: “Imeruersaatissaq tillitaq mamarnerusarpoq.” “Imeruersaatissaq tillitaq” suugami? Uiusup nuliaasullu atoqatigiit­tarnerat Biibilimi imermut  puilasuutimit kuuttumut assersuun­neqarpoq. (Uss 5:15-18) Angutip arnallu katissimasut atoqatigiit­tarnertik nuannaarutigisin­naavaat. Kisianni “imeruersaatissaq tillitaq” allaanerul­luinnarpoq. Tassani atoqatigiinnikkut eqqunngitsuliorneq Guutip inerteq­qutigisaa pineqarsinnaavoq. Inuit atoqatigiinnikkut eqqunngitsuliortut allanut isertor­niarsarisarput, soorlu tillinniaq isertorluni tillinniakulasartoq. Ajortuliartik ‘mamarnerusutut’ isigisarpaat allanit qulaarneqaratik eqqunngitsuliorsin­naasorigunik. Alianaqisumik salloqit­tarneqarput! Jehovammi suut tamaasa isigai. Uatsinnut ajornerpaamik pisoqarsin­naanera tassaavoq Jehovamit iluarisaajun­naarnissaq. Tamannalu ‘mamartutut’ taaneqarsin­naanngil­luinnarpoq. (Kor 1. 6:9, 10) Aammali ajortunik allanik malitseqarpoq.

¹⁰ Atoqatigiinnikkut eqqunngitsuliorneq kanngusunnermik, naleeruttutut misiginermik, kissaatigin­ngisamik naartunermik ilaqutariillu avissaar­nerannik kinguneqarsinnaavoq. Ersarippoq sianiitsup qaaqqusis­sutaata itigartinnissaa silatusaar­nerusoq. Jehovamik ikinnguteqarun­naarnerup saniatigut atoqatigiinnikkut eqqunngitsulior­torpassuit aamma toqussutigisin­naasaminnik nappaateqalertarput. (Uss 7:23, 26) Ussatit 9:18-imi ima inerniler­neqarpoq: “Pulaartui toqusut inaata itinersaaniipput.” Taavami arnap ‘sianiitsup’ qaaqqusineranik akuersisut sooq taama amerlatigippat? – Uss 9:13-18.

11. Sooq pornografiimik isiginnaarneq ajoqutaangaarpa?

¹¹ Inuppassuit pornografii nakkaan­narfigisarpaat. Ilaallu isumaqarput ajoqutaan­ngitsoq. Pornografiili ajoqutaallunilu nikarnarsaataallunilu pinngitsuuisin­naajunnaarsitsisarpoq. Assit naleqqutin­ngitsut isiginnaarsimagaanni puigoruminaatsorujus­suusarput. Aamma pornografiip kissaatipalaat toqutinneq ajorpai, pileris­susipiloqalersitsiin­nartarpoq. (Kol 3:5; Jaak 1:14, 15) Aap, pornografiimik isiginnaar­tartorpassuit atoqatigiinnikkut eqqunngitsulior­talertarput.

12. Qanoq ersersis­sinnaavarput assit pileris­susipiloqalersitsisinnaasut mianersorfigalugit?

¹² Elektroniskiusumik atortoris­saarutitsinni pornografiimik tunngas­suteqartoq saqqummeriar­taarpat qanoq iliussaagut? Ingerlaannaq itigartis­savarput. Jehovamik ikinnguteqarnerput pingaar­nerpaatik­kutsigu itigartinnissaa ajornan­nginnerutis­savarput. Allaat assit pornografiimut tunngan­ngikkaluartut pileris­susipiloqalersitsisin­naapput. Sooq ingalas­simassavagut? Isumatsin­niluunniit eqqunngitsuliorusulersitsisin­naasumik iliuuseqarusun­nginnatta. (Mat 5:28, 29) David, utoqqaanertaq Thailandimi najugalik, ima oqarpoq: “Imminut aperisarpunga: ‘Assit pornografiimut tunngan­ngikkaluartut alarnagit isiginnaarukkit Jehovap iluaris­savaanga?’ Taamatut eqqarsartarama silatusaartumik iliornissannut iluaqutigaara.”

13. Suna silatusaartumik iliornissamut iluaqutigis­savarput?

¹³ Jehova mianeralugu aliasutsik­kusunngin­natsigu tamanna silatusaartumik iliornissamut iluaqutigis­savarput. Guutimik “mianerinninneq ilisimas­susermut aallarniutaavoq”. (Uss 9:10) Tamanna Ussatit kapitalip 9-p aallartinnerani nuannersumik erseqqis­sarneqarpoq. Tassani arnaq ilisimas­susermut assersuutaasoq allaatigineqarpoq.

14. Qaaqqusineq allaanerusoq suna Ussatit 9:1-6 atuarparput?

¹⁴ Ussatit 9:1-6 atuakkit. Versini taakkunani Jehovamit Pinngor­titsisitsinnit ilisimas­susermut tamarmut aallaaviusumit qaaqquneqarneq pillugu atuarpugut. (Uss 2:6; Rom  16:27) Illorsuaq ‘arfineq-marlunnik sukarsualik’ Jehovap ilisimas­suseqarusuttunik tamanik tikilluaq­qusineranut assersuutaavoq.

15. Guutip qaaqqusilluni qanoq ilioqquaatigut?

¹⁵ Arnaq ilisimas­susermut assersuutaasoq pillugu Ussatit kapitali 9-p atuarnerani paasivarput Jehovap tukkorluni ajunngitsorpas­suarnik tunisaraatigut. Arnaq nerisassanik mamartunik viinnimillu iggiserlugu piareersak­kaminik perusuttunut qaaqqusisoq eqqaaneqarpoq. (Uss 9:2) Aamma versi 4, 5-imilu allaqqavoq: ‘Sianiitsumut ima oqarpoq: “Nerisas­siannik neriartorniarit.”’ Sooq qaaqqusissutaa akueris­savarput? Jehovap kissaatigimmagu qitornani silatusaassasut toqqissisimas­sasullu. Kissaatiginngilaa kukkoqqaarluta peqqissimis­sutigisatsinnik ajoqutigisatsinnillu iliussasugut. Taamaattumik “peqqusersuitsut sianissusermik pissamaateqartippai”. (Uss 2:7) Jehova mianerigutsigu nuannaar­tikkusus­savarput. Siunnersuutai tusarnaarlugillu maleruarusuppagut. – Jaak 1:25.

16. Alainip qanoq Guutimik mianerin­ninnini silatusaartumik aalajangiinissamut iluaqutigaa, qanorlu kinguneqarpa?

¹⁶ Alainip, ilagiinni utoqqaanertaasup atuarfimmilu ilinniar­titsisuusup, Guutimik mianerin­ninnini silatusaartumik aalajangiinissamut iluaqutigaa. Ima oqaluttuarpoq: “Suleqatima ilarpassui filmit pornografiimut tunngasut isiginnaar­nerisigut atoqatigiinneq pillugu ilikkagaqar­nerarput.” Alainilli tamanna eqqunngitsoq nalunngilaa. “Guutimik mianerin­ninnera pissutigalugu filmit taakkua isiginnaar­nissaat itigartil­luinnarpara. Aamma sooq isiginnaarusun­ngikkikka suleqatinnut nassuiarpara.” Alain ilisimassuseq akuerigamiuk ‘silassorissutsip aqqutaani ingerlavoq’. (Uss 9:6) Alainip aalajangiusiman­ninnera pissutigalugu suleqataasa ilaasa Biibili soqutigalugu misissor­talerpaat ataatsimiigiar­talerlutillu.

17-18. Ilisimas­susermik akuersisut maanna suut nuannaarutigaat, sunalu qilanaarisin­naavaat? (Aamma assiliaq takuuk).

¹⁷ Arnat marluk assersuutaasut atorlugit Jehovap erseqqissarpaa qanoq pillualersin­naasugut. Arnap sianiis­susermut assersuutaasup qaaqqusineranik akuersisut atoqatigiinnikkut eqqunngitsuliorneq isertortumik aliikkutarisarpaat. Iliuutsitik qanoq kinguneqassasut paasinngilaat. Toqumik kinguneqassapput. – Uss 9:13, 17, 18.

¹⁸ Arnap ilisimas­susermut assersuutaasup qaaqqusis­sutaanik akuersisut allaalluin­nartumik siunissaqassapput! Maanna anersaakkut peqqinnartunik piareersarluakkanik nerersuaarput. (Es 65:13) Pruffiiti Iisaaja aqqutigalugu  Jehova oqarpoq: “Tusarnaar­niarsinga, taava nerilluassaasi piisaas­sallusilu nerisassanik kimittuunik.” (Es 55:1, 2) Jehovap iluarisaasa nuannarinis­saannik uumigisaasalu uumiginis­saannik ilinniar­tinneqar­tarpugut. (Tuss 97:10) Aamma ilisimassutsip iluaqutiginissaanut allanik qaaqquseqataasarnerput nuannaarutigeqaarput. Soorlulusooq ‘illoqarfiup portunersartaani ima torlulasugut: “Misilit­tagakitsoq maanga sanguli!”’ Ilisimassuseq uagutsinnut akuersisunullu allanut maannak­kuinnaan­ngitsoq naassaan­ngitsumilli iluaqutaassaaq. ‘Silassorissutsip aqqutaani ingerlajuarutta’ naassaan­ngitsumik inuusin­naavugut. – Uss 9:3, 4, 6.

19. Oqaluus­sisartup oqaasii 12:13, 14-ilu naapertorlugit sorusuppugut? (Aamma ungalusaq “ Guutimik mianerinninneq iluaqutigalugu ...” takuuk).

¹⁹ Oqaluus­sisartup oqaasii 12:13, 14 atuakkit. Ulluni kingullerni ajortuni makkunani Jehova mianeriuarutsigu uummaterput illersorsin­naavarput, minguitsuujuarsin­naavugut Jehovamullu attaveqarluarsin­naalluta. Jehova asallugulu qamannga pisumik ataqqigatsigu sapinngisamik amerlanerit ilisimassutsip iluaqutiginissaanut qaaqqorusuppagut.