Sorsunnersuup kingulliup nalaani angajoqqaakka Estlandi qimallugu Tysklandimut nuupput, tassanilu inunngorpunga. Inunngoreersunga Canadamut nuunnissarput pilersaarusiorpaat. Canadami Ottawap eqqaani kukkukuusivimmi najugaqaq­qaarpugut, kukkukuut illuatungaan­niittut uagullu illuatungaaniilluta. Piitsuungaarpugut, kisianni imaallaat manninnik ullaakkorsior­tarpugut.

Taamaalluni anaanaga Jehovap Nalunaajaasuinit Saqqummersitat 21:3, 4-millu atuffan­neqarpoq. Tusakkani killitsis­sutigingaaramigit qialerpoq. Angajoqqaama ilumoortut Biibilimeersut misissorpaat, sivitsun­ngitsorlu imermut morsutsin­neqarsin­naanngorput.

Angajoqqaama tuluttut paasisin­naanertik killeqaraluartoq Jehovamut kiffartornertik pimooruppaat. Sudburymi Ontariomiittumi nikkelinik aatsitsivimmi unnuarsiorsimagaluaraangamiluunniit arfinin­ngornerit tamangajaasa ataatap najagalu Sylvia oqaluus­seqatigisarpaatigut. Sapaatillu-akunneri tamaasa ilaqutariittut Napasuliaq Alapernaarsuiffik atuaqqis­saartarparput. Anaanama ataatamalu ilinniar­tilluarmannga Jehova asalerpara. Tamannalu killitsis­sutigalugu 1956-imi qulinik ukioqarlunga Jehovamut tunniul­luinnarpunga. Angajoqqaama Jehovamik asanningaarnerat inuunera tamaat nakussatsis­sutiginikuuara.

Atuarnera naammas­sigakku Jehovamut kiffartornera aallukkun­naarpara, eqqarsarama pionerin­ngoruma timmisartumik angalanissara akissaqar­tilinngisaan­nassallugu. Radioqarfimmi nipilersornermik aallakaatitas­siortar­tunngorpunga, tamannalu nuannareqaara. Unnukkulli sulisarama ataatsimiigian­ngitsoor­tarpunga inuillu Guutimik asannin­ngitsut ilagisarlugit. Qujanartumik nalunngeqatigin­nissutiga Biibilimik ilinniar­tinneqarsimasoq killitsis­sutigalugu allannguivunga.

Oshawamut Ontariomiittumut nuukkama Ray Norman najaalu Lesli pionerillu allat naapippakka. Taakkualu tikilluaq­qusaasutut misigitip­paannga. Nuannaangaarnerat takugakku anguniakkakka eqqarsaatigeq­qilerpakka. Pionerin­ngornissannik kajumis­saarpaannga, 1966-imilu septembarimi pionerin­ngorpunga. Nuannaaqaanga inuuneralu ingerlal­luarpoq. Inuuninnili tupaallaatigisannik pisoqar­tussanngorpoq.

Suli atuarlunga Canadami Betelimut Torontomiittumut qinnuteqarpunga. Kingusin­nerusukkut pionerin­ngoreerlunga ukiuni sisamani Betelimi kiffartorsin­naanersunga  aperineqarpunga. Kisianni Lesli nuannareqigakku kiffartor­nissara akuerigukku takoqqin­ngisaan­narnissaa annilaangas­sutigaara. Qamannga pisumik qinoreerlunga Betelimukar­nissara akueraara, Leslili inuulluaq­qugakku aliasoqaanga.

Betelimi errorsisarfimmi kingusin­nerusukkullu allatsitut kiffartorpunga. Lesli Gatineaumi Quebecimiittumi specialpionerin­ngorsimavoq. Eqqarsaatigisarpara qanoq innersoq eqqortumillu aalajangiisimanerlunga. Taava nuannaarutigeqisannik tupaallatsin­neqarpunga. Leslip ania Ray Betelimut kiffartor­tussatut qaaqquneqarpoq. Taannalu ineqatigilerakku Lesli aamma attaveqarfigeq­qissinnaalerpara. Ukiuni sisamani Betelimi kiffartornerma ullut naggataanni, februaarip 27-anni 1971-imi, katippugut!

Ilagiinni Quebecimiittuni franskisut oqaaseqarfiusuni Leslilu kiffartor­tussanngor­tinneqarpugut. Ukiut arlaqan­ngitsut qaangiummata tupaallaatigeqisannik 28-innarnik ukioqarlunga ilagiinnik nakkutil­liisunngorsin­naanersunga aperineqarpunga. Misigivunga inuusup­pallaarlunga misilit­tagakip­pallaarlungalu, kisianni Jeremia 1:7, 8-milu allassimasut tuppallersaatigeqaakka. Leslili marloriarluni biilinik ajortoor­nikuuvoq, aamma sinissaaruttarpoq. Taamaattumik ilagiinnik nakkutil­liisutut kiffartor­nissarput merserivarput. Leslili oqarpoq: “Jehovap suliassik­kaangatigut sapinngisatsinnik iliussan­nginnerpugut?” Akuersivugut nuannaarutigalugulu ukiuni 17-ini angalasartutut kiffartorluta.

Ilagiinnik nakkutil­liisutut kiffartorninni ulapittarama Lesli piffissaqarfigerpiarneq ajorpara. Ilikkagas­saqarpunga. Taamaalluni ataasin­ngornikkut ullaakkut matukkut sianertoqarpoq. Matu ammaratsigu inoqanngilaq, koorili ilineqarsimavoq. Iluaniipput nerriviup qalia, naatitat, immussuit, iffiaq-qaqortoq, viinni immiartorfiillu. Aammalu iluaniippoq allagannguaq ima allannilik: “Nuliat nuannisaqatigiartoruk.” Ulloq taanna alianaallunilu seqinnarippoq, Leslili nassuiaappara oqalugiaatit piareersar­tussaagakkit pisinnaananga. Nikalloraluarluni paasinnippoq. Allaffinni issiatillunga ilerasulerpunga. Efesossimiut 5:25, 28-milu allassimasut eqqarsaatigaakka. Paasivara Jehovap kissaatigigaa nuliama misigis­sutsikkut pisariaqartitai isumagisus­saagikka. Qinoreerlunga Lesli oqarfigaara: “Qaa, ingerlasa!” Nuannaaqaarlu. Kuussuup sinaanut alianaal­luinnartumut pigatta nerriviup qalia siaarparput ullorlu taanna nuannerluin­nartumik atorlutigu. Aammali oqalugiaatima piareersar­nissaannut piffissaqarlunga.

British Columbiamiit Newfoundlandimut nakkutil­liisutut angalasaqat­taarpugut nuannersorpas­suarnillu misigisaqarluta. Nukappiaraallunga angalanissamik kissaatigisara piviusun­ngorsimavoq. Ilinniarfik Gileadi eqqarsaatiginikuugaluarlugu nunami allami kiffartor­nissara kissaatigin­ngilara.  Oqaluus­sisartutut aallartitat immikkuul­larippasipput, uangalu ajukkuppunga. Aamma Afrikami nunat ilaannut nappaalanersuaqarfiusumut sorsuffiusumul­luunniit aallartitaasin­naanerput annilaan­ngatigaara. Tassa Canadami najugaqarnerput nuannaarutigaara.

1992-imi nunani Sovjetunionimut atasimasuni oqaluussineq akuerisaaleqqimmat Estlandimut oqaluus­sisartutut aallartitaarusun­nersugut aperineqarpugut. Tupaallaatigeqaarput, Jehovamulli tamanna pillugu qinuvugut. Eqqarsarpugullu: ‘Jehovap suliassik­kaangatigut sapinngisatsinnik iliussan­nginnerpugut?’ Akuersivugut eqqarsarlutalu: ‘Imaallaat Afrikalias­sanngilagut.’

Ingerlaannaq Estlandimiutut ilinnialerpugut. Qaammatit marluk qaangiummata nakkutil­liisutut angalasartutut kiffartoq­quneqarpugut. Estlandimi, Letlandimi Litauenimi aamma Kaliningradimi Ruslandimiittumi ilagiit 46-t oqaluus­sisartoqatigiillu tikeraar­tartussan­ngorpagut. Tassa Letlandimiutut, Litauenimiutut russisullu ilinniar­tariaqaleratta unamminiarnaqaaq. Taamaattorli ikinngutit ilungersornigut killitsis­sutigalugit ikiorpaatigut. 1999-imi Estlandimi immikkoor­tortaqarfeqalerpoq, tassanilu Immikkoor­tortaqarfiup Ataatsimiititaliaani Toomas Edur, Lembit Reile aamma Tommi Kauko ilagalugit kiffartor­tussanngorpunga.

Nalunaajaasorpassuit pinngitsaalisaallutik Siberiamut aallartin­neqarsimasut ilisarisimalerpagut. Parnaarus­sivimmi ajortumik pineqaraluarlutik ilaquttaminniillu avissaar­tinneqaraluarlutik tamanna kamassutigilin­ngilaat. Kiffartornertik nuannaarutigalugu ilungersuutigiuarpaat. Maligas­saalluarnerat ilinniarfigaarput, paasivarput pissutsini artornaraluartuni nuannaarluta aalajaat­tuarsin­naalluta.

Ukiorpassuarni ulapaarsimanermut qasuersaar­nissatsinnut piffissaqarpiarsiman­ngilagut. Lesli qasorsuataar­talermat Canadamut uterniarluta eqqarsaatigilerparput. Pattersonimi New Yorkimiittumi pikkoris­sarnissamut qaaqquneqaratta qularutigaara najuussin­naanerluta. Qamanngali pisumik qinoreerluta akuersivugut. Aalajanger­nerpullu Jehovap pilluaqquaa. Ilinniarfim­miitilluta Lesli nakorsanit misissor­tikkami paasivarput fibromyalgiimik nappaateqartoq. Pisariaqar­tumillu ikiorneqarmat kiffartornerput ingerlateq­qissinnaan­ngorparput.

2008-mi unnuit ilaanni Estlandimiilluta qullersaqarfimmiit sianerfigitippunga. Aperineqarpunga Congomut kiffartoriar­torsinnaanersugut. Tupaallaatigeqaara ingammik aqaguani akisariaqarama. Leslimulli oqanngilanga nalunnginnakku sinissaarutissasoq. Afrikamut tunngatillugu ernumas­sutigisakka pillugit qinusaqat­taarama unnuaq taanna uanga sinissaaruppunga.

Aqagukkut Lesli oqarfigigakku isummerpugut: “Jehovamuna Afrikaliaq­qugaatigut. Qanoq ililluta misilin­ngikkutsigu paasisin­naagatsigu nuannarinerlugu?” Ukiut 16-it Estlandimeereerluta Kinshasamut  Congomiittumut timmisar­torluta aallarpugut. Immikkoor­tortaqarfiup eqqaa qorsooq­qillunilu eqqissisimanaqaaq. Leslip initsinnut nivinngagaasa siulliit ilaagaat allagartaq Canadamiit aallarattali pigisaa ima allannilik: “Sumiikkaluaraangavil­luunniit nuannaartarit.” Qatanngutit naapereerlugit Biibilimillu misissueqateqar­talereerluta oqaluus­sisartutut aallartitatut suli nuannaar­nerulerpugut. Piffissap ingerlanerani immikkoor­tortaqarfimmit aallartitatut Afrikami nunat 13-it tikeraar­nissaannut pisinnaatitaaf­feqarsimavugut. Inuit assigiin­ngitsorpassuit nuannersullu naapissimavagut. Afrikamiinnerput ernumas­sutigiun­naarpara Jehovalu qutsavigaarput Afrikamut aallartis­simammatigut.

Congomi nerisassanik assigiin­ngitsunik sassaal­liiffigineqar­tarpugut, assersuutigalugu sullinerit. Eqqarsaraluarpunga mamarinagit, kisianni qatanngutigut mamarsartut takugatsigit usserpagut mamaralugillu.

Qatanngutigut qiimmas­sarniarlugit pisariaqar­titaannillu nassaan­niarlugit nunap kangianut angalavugut. Inuit saassusiumatuut nunaannarmi najugallit saassut­tarpaat arnat meeqqallu ajoquserlugit. Qatanngutigut amerlanerit pigisakitsuupput. Makititaanis­samillu neriuuteqarluarnerat, Jehovamik asanninnerat peqatigiis­sortaanillu ilumoorfigin­ninnerat killitsis­sutigaagut. Maligas­siuinerat pissutigalugu sooq Jehovamut kiffartor­nerluta eqqarsaatigilerparput, Jehovamullu uppernerput nakussatsik­kusupparput. Qatanngutitta ilaasa angerlarsimaffitsik inerittuutitillu naajartortut annaasimavaat. Tamatuma eqqaasippaanga pigisagut annaariaan­naagigut Jehovamullu attaveqarnerput pingaar­nerpaajusoq. Qatanngutigut artornar­torsioraluarlutik naammagit­taalliulin­ngillat. Taakkua isiginnit­taasiat ajornar­torsiutitta peqqiil­liutittalu isumalluarluta naammagalugit atornis­saannut kajumis­sissutigaarput.

Hongkongimi immikkoor­tortaqarfimmut nuutsin­neqartus­sanngoratta tupaqaagut. Takorloorsiman­ngisaan­narparput Kangiani najugaqar­nissarput. Suliassin­neqartar­nitsinnili allani tamani Jehovap asannittup ikiortarmatigut aallarpugut.  2013-imi Afrika alianaal­luinnartoq ikinngutigullu asasagut qialluta qimappagut. Ornigarpullu ilisiman­ngilarput.

Hongkongi ulapaarfiullunilu inuppas­suaqarmat allannguinerujussuuvoq. Kinamiutut ilinniarneq unamminiarnaqaaq. Qatanngutittali tikilluaq­quaatigut, nerisas­saataallu mamareqaagut. Immikkoor­tortaqarfimmi suliassat amerlanerulerput, illuliorfissat illullu akii qaffarujus­suarput. Taamaattumik Siulersuisoqatigiit silatusaartumik aalajangerput immikkoor­tortaqarfiup pigisai amerlanerit tuniniarlugit. Tamatuma kinguninngua, 2015-imi, Koreamut Kujallermut nuuppugut tassanilu suli kiffartorluta. Aamma taakkua oqaasiisa ilinniarneri unamminiarnarput. Pikkorip­pallaan­ngikkaluarluta qatanngutitta qiimmas­sartarpaatigut oqarlutik Koreamiutut oqaatsit ilikkariar­torigut.

Ikinngutitaar­niarneq imaannaan­ngitsuuvoq. Siulliullutali qaaqqusisaratta ikinngutitaar­torpugut. Paasivarput qatanngutit assigiin­ngikkaluarlutik allaanerual­laanngitsut. Jehovap pinngor­tissimavaatigut uummatitta ammarsin­naanngor­nissaanut, taamaalillutalu ikinnguterpassuagut asalersin­naavagut. – Kor 2. 6:11.

Paasivarput Jehovap inunnik akuerin­ninneratut akuerin­ninnissarput pingaaruteqartoq Jehovallu uagutsinnik asanninnera ilitsersuus­sineralu eqqumaf­figisariaqarlugit. Nikallungagaangatta imaluunniit eqqarsaatigigaangatsigu qatanngutitta iluarineraatigut ikinngutitsinnit allagarsiagut qiimmaal­lannartut atuaqqit­tarpagut. Jehovap qinnutigut akisimavai, takutis­simavaa asalluta kiffartor­tuarnis­satsinnullu nakussatsit­tarluta.

Ukiut ingerlanerini Leslilu ilikkarparput qanorluunniit ulapitsigigaluarluta immitsinnut piffissaqarfiginissatta pingaaruteqassusia. Aamma paasivarput immitsinnut illaatigisarnissaq pingaaruteqartoq, ingammik oqaatsinik nutaanik ilinniaraangatta. Unnuit tamaasa nuannaarutigisimasagut eqqartor­tarpagut taakkulu pillugit Jehova qutsavigisarlugu.

Ilumoortumik oqassaguma eqqarsaatigisiman­ngisaan­narpara oqaluus­sisartutut aallartitaanissara imaluunniit nunani allani najugaqar­nissara. Taamaattorli misigisimavara Jehovap annertoq­qusersuineratigut ajornar­toqanngitsoq. Pruffiititut Jeremiatut misigivunga Jehovamit salloqit­tarneqarsimallunga. (Jer 20:7) Aap, Jehovap ilimagin­ngisatsinnik amerlasoorpas­suarnik tupaallatsit­tarpaatigut pilluaq­qusarlutalu, allaat timmisartumik angalanissara piviusun­ngortillugu. Nukappiaraagallarama takorloorsiman­ngisaan­nakkannik nunarpassuit tikeraarsimavagut. Suliassin­neqarnitsinni tamani Leslip tapersersuiumatuunera qujamasuutigeqaara.

Immitsinnut eqqaasit­tarpugut Jehova asagatsigu iliuutsigut tamaasa iliuuserisarlugit. Misigisatta ersersiin­narpaat naassaan­ngitsumik inuulerutta qanoq nuanner­tigissasoq. Taamanik­kussamut Jehovap ‘assani ammarumaarpai pinngor­titallu tamaasa kissaatigisaannik qaarsil­lartillugit’. – Tuss 145:16.