1. Jehovap ulluani aniguiumalluta susariaqarpugut?

 “JEHOVAP ullua” Biibilimi eqqaaneqaraangat Jehovap akeqqaminik suujunnaarsitsinissaa innuttaminillu aniguisitsinissaa pineqartarpoq. Itsaq Jehova inuiaqatigiit ilaannik pillaasarpoq. (Es 13:1, 6; Ez 13:5; Sef 1:8) Nalitsinni “Jehovap ullua” aallartissaaq Babylon­nersuaq saassun­neqarpat sorsunnermillu Harmagedonnimik naggaser­neqarluni. Aniguiumalluta maanna piareersar­tariaqarpugut. Jiisusip ilinniar­tippaatigut annikil­liornar­tussarsuarmut piareersimajuar­tariaqartugut. – Mat 24:21; Luk 12:40.

2. Tessaluunikamiunut allakkat siulliit sooq iluaqutigisin­naavagut?

² Paulusip Tessaluunikamiunut allakkamini siullerni arlalinnik assersuusior­nermigut kristumiut ullormut Jehovap eqqartuus­siffissaanut piareersimajuarsin­naaqqullugit ikiorpai. Paulusip nalunngilaa Jehovap ullua taamani nalliun­navianngitsoq. (Tes 2. 2:1-3) Taamaak­kaluartorli qatanngutini ullormut tassunga piareersimaqquai, soorlu aqagu takkuttussaasoq. Uagullu aamma allatai iluaqutigisin­naavagut. Maanna ukununnga tunngatillugit nassuiaatai sammeriartigit: (1) Jehovap ullua qanoq nalliuk­kumaartoq, (2) kikkut aniguisitaanavian­ngitsut aamma (3) aniguisitaajumalluta qanoq piareersarsin­naasugut.

3. Jehovap ullua qanoq unnuakkut tillinniatut nalliuk­kumaarpa? (Aamma assiliaq takuuk).

³ “Unnuakkut tillinniatut.” (Tes 1. 5:2) Tamanna Jehovap ulluata nalliuk­kumaarnera pillugu assersuutit pingasut siulleraat. Tillinniat unnuakkut inuit ilimagin­ngisaattut tillinniartarput. Taamatuttaaq Jehovap ullua inuit amerlanersaasa tupaallaatigisaattut  tassangaannaq nalliuk­kumaarpoq. Allaat kristumiut ilumoortut pisoqariataarnera tupaallaatigisin­naavaat. Ajortulli assiginagit suujunnaarsitaanavian­ngillat.

4. Jehovap ullua qanoq naartusup nallisitsisar­neratut issava?

⁴ ‘Arnap naartusup nallisitsisar­neratut.’ (Tes 1. 5:3) Naartusup akunneq sunarpiaq ernissanerluni siumut oqaatigisin­naasanngilaa. Ilimagaali tassangaannaq anniarluni ernisulis­salluni. Naartugaannimi ernineq pinngitsoor­tinneqarsin­naanngilaq. Taamatuttaaq Jehovap ulluanut tunngatillugu ulloq akunnerlu qaqugorpiaq nalliutis­sanersut naluarput. Qularin­ngilarpulli Guuti tassangaannaq akuliuk­kumaartoq ajortullu aniguinavian­ngitsut.

5. Annikil­liornar­tussarsuaq qanoq ullup qaammaler­neratut issava?

⁵ Ullup qaammaler­neratut. Paulusip pingajussaanik assersuusior­nermini unnuakkut tillinniat eqqartorpai. Maannali Jehovap ullua ullup qaammaler­neranut assersuuk­kunarpaa. (Tes 1. 5:4) Unnuakkut tillinniat piffissap ingerlanera sianigin­ngitsoorlugu ullup qaammaler­neranit pakasar­neqarsin­naagamik allanit takuneqarsin­naapput. Taamatuttaaq Guutip iluarin­ngisaanik iliortuar­nermikkut taartumiiginnartut annikil­liornar­tussarsuarmi qulaarneqassapput. Taakku assiginagit Jehovap iluarin­ngisaanik iliunngin­nitsigut ‘ajunngitsulli, naapertuil­luartut ilumoortullu suulluunniit’ iliuuserinerisigut Jehovap ulluanut piareersimasin­naavugut. (Ef 5:8-12) Assersuutit allat marluk atorlugit Paulusip aniguinavian­ngitsut allaatigai.

6. Inuit amerlanerit sininnerat qanoq isumaqarpa? (Tessaluunikamiunut 1. 5:6, 7)

⁶ ‘Sinittut.’ (Tessaluunikamiunut 1. 5:6, 7 atuakkit). Jehovap ulluani aniguis­sanngitsut  inunnut sinittunut Paulusip assersuuppai. Sinittut eqqamin­niittunik piffissallu ingerlaneranik sianigisaqan­ngillat. Taamaattumik nalusarpaat pingaarutilinnik pisoqaraangat pisullu qisuariarfigisin­naanagit. Nalitsinni inuit amerlanerit anersaakkut sinipput. (Rom 11:8) Ulluni kingullerni inuunitsinnut uppernarsaatit soqutigin­ngilaat annikil­liornar­tussarsuullu nalliutingajalernera upperinagu. Nunarsuarmi pingaarutilimmik pisoqaraangat ilaat anersaakkut itertarput Guutillu kunngeqarfia pillugu nutaarsiassat nuannersut soqutigilerlugit. Amerlasuulli eqqumajun­naarlutik sinileq­qittarput. Allaat inuit ilaat ulloq Guutip eqqartuus­siffissaa upperigaluarlugu isumaqarput qanittukkut nalliun­navianngitsoq. (Pet 2. 3:3, 4) Uagulli ulloq qanilliar­tortillugu eqqumajuar­nissarput pingaar­tingaarparput.

7. Sooq Guutimit suujunnaarsitaasussat aalakoortunut assersuun­neqarsin­naappat?

⁷ ‘Aalakoortut.’ Paulusip inuit Guutimit suujunnaarsitaasussat imerajuttunut assersuuppai. Aalakoortut eqqaminni pisartunut arriitsumik qisuariartarput aalajangiinerlul­lutillu. Taamatuttaaq inuit ajortut Guutip mianersoq­qussutai qisuariarfigin­ngilaat, inooriaaseqar­nerallu toqumik kinguneqassaaq. Kristumiulli eqqumal­lutillu silatusaassapput. (Tes 1. 5:6) Oqaaseq ‘silatusaarneq’ aamma ‘aalakuun­nginnermik’ nutserneqarsinnaasoq Biibilimik ilisimatuup ima nassuiarpaa: “Isumakkut eqqissisimallunilu allanngujuinneq silatusaartumik naliliisin­naalersitsisoq taamaalillunilu eqqortumik aalajangiisin­naalersitsisoq.” Sooq isumakkut eqqissisimassaagut? Politikkikkut inuiaqatigiinnilu oqallisigineqartartut akuliuf­figissan­nginnatsigit. Jehovap ullua qanilliar­tortillugu arlaata illersor­nissaanut tatineqar­nerujar­torsinnaavugut. Qanorli oqassanerluta ernumas­sutigisariaqan­ngilarput. Guutimmi anersaava iluaqutigalugu isumakkut eqqissisimallutalu silatusaartumik aalajangiisin­naavugut. – Luk 12:11, 12.

8. Tessaluunikamiunut allakkat siulliit 5:8 naapertorlugu suut eqqumanis­satsinnut iluaqutigis­savagut? (Aamma assiliaq takuuk).

⁸ ‘Sakissakkut saattuaasaq niaqoror­tinnaveeqqullu atikkit.’ Paulusip kristumiut sakkutuunut eqqumasunut akiuunnis­samullu atisalersorsimasunut assersuuppai. (Tessaluunikamiunut 1. 5:8 atuaruk). Sakkutuup qaquguk­kulluunniit pisariaqalerpat akiuunnissamut piareersimanera naatsorsuutigineqartarpoq. Taamatuttaaq uagut Jehovap ulluanut piareersimajuar­tariaqarpugut. Upperneq asanninnerlu sakissakkut saattuaasatut neriuullu niaqoror­tinnaveeq­qutitut atorutsigit iluaqutigingaas­savagut.

9. Uppernerput qanoq illersuutigaarput?

⁹ Sakissakkut saattuaasaq sakkutuup uummataanut illersuutaasarpoq. Upperneq asanninnerlu uummatitsinnut assersuutaasumut illersuutaasarput. Guutimummi kiffartor­tuarnis­satsinnut Jiisusimullu malinnit­tuarnis­satsinnut iluaqutigisarpagut. Upperutta qularis­sanngilarput qamannga pisumik kiffartorfigigutsinni Jehovap akissarsisis­sagaatigut. (Hebr 11:6) Aamma artornar­torsioraluarut­taluunniit Siulersuisorput Jiisusi ilumoorfigiuarsin­naavarput. Nalitsinni maligas­siuilluartut malersor­neqarnermi aningaasatigul­luunniit ajornar­torsiornermi aalajaat­tuartut ilinniarfigigutsigit uppernerput nakussatsis­savarput. Jehovamut kiffartor­nerminnik pingaar­titsillutik inooriaatsiminnik pisariil­lisaasut ilaarnerisigut pigisalerituun­ngornaveersaarsin­naavugut. b

10. Guutimik inoqatitsinnillu asanninnerput qanoq iluaqutigaarput?

 ¹⁰ Eqqumajuarlutalu silatusaar­tuassagutta asanninneq pingaaruteqarluinnarpoq. (Mat 22:37-39) Guuti asagatsigu oqaluus­sinitsinni qanorluunniit ajornar­torsioraluarluta oqaluus­siuarsin­naavugut. (Tim 2. 1:7, 8) Aamma uppeqatigin­ngisagut asagatsigit sapinngisamik amerlanerpaanut oqaluus­siuarpugut, allaat oqarasuaatikkut allakkatigullu. Inoqatitta allannguinissaat eqqortumillu iliuuseqaler­nissaat neriuutigiuarparput. – Ez 18:27, 28.

11. Uppeqatitsinnik asanninnerput qanoq iluaqutigaarput? (Tessaluunikamiunut 1. 5:11)

¹¹ Uppeqatigut aamma asagatsigit ‘qiimmas­saqatigiit­tuarlutalu ineriar­torteqatigiit­tuarpugut’. (Tessaluunikamiunut 1. 5:11 atuaruk). Soorlu sakkutuut sanileriillutik akiuuteqatigiittartut, uagut aamma qiimmas­saqatigiit­tarpugut. Ilaannikkut sakkutuup piaarinani sakkutooqatini akiuutsillutik ajoquser­toorsinnaavaa. Tamatumunnga assingusumik qatannguterput akiniarlugu piaaraluta ajuallatsin­navianngilarput. (Tes 1. 5:13, 15) Aamma ilagiinni siulersuisut ataqqinerisigut asanninnerput ersersit­tarparput. (Tes 1. 5:12) Paulusip Tessaluunikami ilagiit allaffigimmagit ukioq ataasiun­ngitsorluunniit qaangiuttoq pilersin­neqarsimapput. Ilagiinni tassani utoqqaanertat misilit­tagakil­lutillu kukkussuteqartarput. Taamaak­kaluartorli ataqqineqar­tariaqarput. Annikil­liornar­tussarsuaq qanilliar­tortillugu imaassinnaavoq ilagiinni utoqqaanertanit siulersor­neqarnissarput pisariaqar­tinnerulis­sagipput. Imaassinnaavoq qullersaqarfipput immikkoor­tortaqarfiil­luunniit attaveqarfigisin­naajunnaarigut. Taamaattumik utoqqaanertat asanissaat ataqqinissaallu maannangaaq pingaaruteqarpoq. Qanorluunniit pisoqas­sagaluarpat utoqqaanertat kukkussutaat isiginiar­nerunagit aalajaal­lutilli Jehovamit Kristusi aqqutigalugu siulersor­neqarnerat isiginiar­nerussavarput.

12. Neriuuterput isumakkut qanoq illersuutigaarput?

¹² Soorlu sakkutuup niaqoror­tinnaveeqqutini niaquminut illersuutigigaa, uagut aniguisitaanissamik neriuut isumakkut illersuutigaarput. Neriuuteqarluaratta silarsuup neqeroorutigisai  naleqar­tinngilagut. (Flp 3:8) Neriuuterput isumakkut eqqissisimas­sutigaarput. Wallacep Laurindallu Afrikami kiffartortut neriuutertik iluaqutigaat. Sapaatip-akunneri pingasut ingerlanerinnaanni aappaata anaanani aappaatalu ataatani toqukkut annaavaat. COVID-19-imillu nappaalanersuaq pissutigalugu ilaquttatik najoriar­torlugit angerlarsin­naanngillat. Wallace ima allappoq: “Toqusut makititaanis­saannik neriuut iluaqutigalugu toquler­neranni ullut kingulliit pinnagit paratiisissamili ullut siulliit inuuffigisassaat eqqarsaatigaakka. Aliasuk­kaangama neriuut eqqissis­sutigisarpara.”

13. Anersaaq illernartoq piumallugu qanoq iliorsin­naavugut?

¹³ “Anersaap innera qameqinasiuk.” (Tes 1. 5:19) Paulusip anersaaq illernartoq ilutsinni innermut assersuuppaa. Guutip anersaavanik sunnerneqarutta aallussil­luarluta eqqortuliorusut­tarpugut Jehovalu pillugu suliaqar­nissamut nukissaqar­tarluta. (Rom 12:11) Anersaaq illernartoq piumallugu qanoq iliorsin­naavugut? Qinnutigisin­naavarput, Guutip oqaasia atuarsin­naavarput Jehovallu peqatigiis­sortaanut ilaanerput ersersillugu. Taamaaliorutta ‘anersaap inerititai’ ineriar­tortissin­naavagut. – Gal 5:22, 23.

14. Guutip anersaavanik tunineqar­tuassagutta sunaveersaar­tariaqarpugut? (Aamma asseq takuuk).

¹⁴ Guutip anersaava illernartoq pigereerlugu ‘anersaap innerata qamitin­nginnissaa’ mianersuutigis­savarput. Guutip anersaani eqqarsaatikkut pissusilersor­nikkullu minguitsuinnarnut tunniuttarpaa. Minguttuunik eqqarsaateqar­tuarutta eqqarsaatigullu malillugit iliorutta anersaamik illernartumik tunisarun­naassavaatigut. (Tes 1. 4:7, 8) Tunineqar­tuassagutta ‘tusarliussat Guutimit isumassarsiarititaasut suusupagis­sanngilagut’. (Tes 1. 5:20) “Tusarliussat” taakkua ilagaat Jehovap ullua nalitsinnilu piffissap nukingin­nassusia pillugit oqariartuutit. Eqqarsalin­ngilagut Harmagedonni nalitsinni nalliun­navianngitsoq. Ullut tamaasa ‘illernartumik pissuseqar­nitsigut Guutimullu tunniusimanitsigut’ ersersit­tarparput Jehovap ullua  eqqarsaatigiuarlugu nalliutingajalerneralu upperalugu. – Pet 2. 3:11, 12.

15. Paasissutissanit eqqunngitsunit anersaapiluillu sunniiniutaannit salloqit­tarneqas­sanngikkutta sussaagut? (Tessaluunikamiunut 1. 5:21)

¹⁵ Siunissami ungasin­ngitsukkut Guutip akerlilersortai ima nalunaassapput: “Eqqissineq isumannaas­suserlu!” (Tes 1. 5:3) Nunarsuarmi tamarmi inuit amerlanerit oqaatsinit anersaapilunnit isumassarsiarititaasunit salloqit­tarneqassapput. (Saqq 16:13, 14) Uagummi? ‘Sunut tamanut tunngatillugu eqqortoq paasiniar­tarutsigu’ salloqit­tarneqar­navianngilagut. (Tessaluunikamiunut 1. 5:21 atuaruk). Grækerisut oqaaseq “paasiniar­tarsiuk”-mik nutserneqartoq inuit saffiugassanik misissueriaasiinut tunngatillugu atorneqar­tarsimavoq. Kuulti kuultiviunersoq sølvilu sølviviunersoq paasiniarlugu misissor­neqartarput. Uaguttaaq tusakkagut atuakkagullu ilumoorluin­nartuunersut paasiniaq­qissaar­tariaqarpagut. Taamani Tessaluunikamiut taamaalior­tariaqarput, maannalu annikil­liornar­tussarsuaq qanilliar­tortillugu taamaalior­nissarput pingaaruteqar­nerungaarpoq. Uppertik­kuminar­tuunata atuakkagut tusakkagullu Biibilimi allassimasunut Jehovallu peqatigiis­sortaanit pisartak­katsinnut sanilliut­tarlugit eqqarsarsin­naassuserput atortarparput. Taamaaliorutta anersaapiluit sunniiniutaannit salloqit­tarneqas­sanngilagut. – Uss 14:15; Tim 1. 4:1.

16. Sumik neriuuteqarpugut, qanorlu iliorusuppugut?

¹⁶ Nalunngilarput Guutip innuttai annikil­liornar­tussarsuarmi aniguisin­neqassasut. Inuttulli ataasiakkaatut inuunerput aqagu qanoq issanersoq naluarput. (Jaak 4:14) Taamaattorli annikil­liornar­tussarsuup nalliutin­nginnerani toqugaluarutta aniguigut­taluunniit aalajaakkutta inuunermik naassaan­ngitsumik akissarsisin­neqarumaarpugut. Tanitat Kristusi qilammeeqatigissavaat. ‘Savat allat’ nunarsuarmi paratiisimiissapput. Tamatta neriuuterput nuannersoq eqqarsaatigisigu Jehovallu ulluanut piareersimajuarluta!