1-2. Tussiaat 25:14 naapertorlugu Jehova qanimut ikinngutigerusuk­kutsigu susariaqarpugut?

 QANIMUT ikinnguteqarusukkuit pissuserineqartussat suut pingaaruteqarsoraagit? Akerusus­sagunarputit ikinngutigiil­luartut asaqatigiil­lutillu tapersersoqatigiit­tassasut. Mianerin­ninnerli immaqa eqqarsaatiginngilat. Allaaserisamili matumani allassimaffimmi najoqqutarineqartumi allassimasutut Jehovamik ikinnguteqarusuttut taanna mianerisariaqarpaat. – Tussiaat 25:14, NW atuaruk. b

² Qanorluunniit sivisutigisumik Jehovamut kiffartorsimagaluarutta tamatta taassuminnga mianerin­nittuusariaqarpugut. Guutimilli mianerinninneq qanoq isumaqarpa? Jehovamik mianerinninneq qanoq ilinniarsin­naavarput? Aamma kunngik­kormiuni nakkutil­liisuutitaq Obadja, palasiuneq Jojada aamma kunngi Joashi qanoq ilinniarfigisin­naavagut?

3. Nassuiaruk annilaanganeq qanoq illersuutigisin­naaneripput.

³ Guutimik mianerin­ninnermi taassuma iluarin­ngisaanik iliussasoraluni annilaanganeq pineqarpoq. Annilaanganeq nuanniip­pasikkaluartoq silatusaartumik aalajangiinissamut iluaqutigisaratsigu iluaqutaasinnaavoq. Assersuutigalugu nangiarneq innaarsuup killinganut qanillival­laanngin­nissamut iluaqutigaarput. Ajoqusis­sasoraluta ulorianar­torsior­titsisin­naasunit  qimagutipal­lattarpugut. Asasatsinnik ikinnguteqar­nitsinnik aseruinissaq annilaangatigalugu asannin­ngitsumik oqaaseqarnatalu iliuuseqar­navianngilagut.

4. Jehova pillugu qanoq misiginissarput Saatanip kissaatigaa?

⁴ Saatanip kissaatigaa inuit Jehova ersigissagaat. Saatanip isumaqalersik­kusuppaatigut Jehova akiniaasuullunilu kamattuaan­nartuusoq qanorluunniillu ilioraluarutta nuannaar­tissinnaan­ngikkipput. (Job 4:18, 19) Jehova ersinangaarsoralugu kiffartorfigiun­naassagipput Saatanip kissaatigaa. Jehovali ersigis­sanngilarput. Ajuallatsin­nissaali annilaan­ngatigalugu ataqqinissaa ilinniar­tariaqarparput.

5. Guutimik mianerinninneq qanoq isumaqarpa?

⁵ Inuup Guutimik mianerinnittup taanna asavaa, taassuminngalu ikinnguteqar­nerminut aseruisin­naasumik iliuuseqarusun­navianngilaq. Jiisusi Guutimik mianerin­nittuuvoq. (Hebr 5:7) Jiisusip Jehova ersiginngilaa. (Es 11:2, 3) Qamanngali pisumik asangaarpaa naalakkusullugulu. (Joh 14:21, 31) Jehova asannit­tuummat, ilisimas­suseqarmat, naapertuil­luartuummat pissaaneqangaarmallu Jiisusi ilaarlugu ataqqingaarparput. Aamma nalunngilarput Jehovap asangaaramisigut siunnersuutiminut qisuariar­tarnerput sunnerneqaatigisaraa. Jehovamut naalanngikkutta aliasutsit­tarparput naalakkaangattali nuannaar­tittarlugu. – Tuss 78:41; Uss 27:11.

6. Guutip mianerinissaa ilaatigut qanoq ilinniarsin­naavarput? (Tussiaat 34:12)

⁶ Jehovamik mianerinninneq inunnguuserin­nginnatsigu ineriar­tortittariaqarparput. (Tussiaat 34:12 atuaruk). Assersuutigalugu pinngortitap qimerloor­neratigut taamaaliorsin­naavugut. Paasigaangatsigu Jehovap pinngor­titaasigut ilisimassusia, pissaaneqangaarnera uagutsinnillu asanninnersua ersersin­neqartartut ataqqinerulerlugulu asaneruler­tarparput. (Rom 1:20) Qatanngut arnaq Adriennemik atilik ima oqarpoq: “Jehovap ilisimas­susersua pinngor­titaasigut ersersin­neqartoq alutorisaqaara. Tamannalu iluaqutigalugu paasisarpara Jehovap uannut suna pitsaanerpaasoq ilisimagaa.” Taama eqqarsaatigin­neqqissaartarami ima isummerpoq: “Jehovamut, inuunermik uannut tunisisumut, attaveqarninnut ajoqusiisin­naasumik sumilluunniit iliuuseqarusun­navianngilanga.” Illimmi, sapaatip-akunnera manna Jehovap pinngor­titaasa ilaata eqqarsaatiginissaa piffissaqarfigisin­naaviuk? Taamaalioruit Jehova ataqqinerulerlugulu asanerulissavat. – Tuss 111:2, 3.

7. Qinusarneq Jehovamik mianerin­ninnermik ineriar­tortitsinissamut qanoq iluaqutigaarput?

⁷ Aamma qinusarnikkut Guutimik mianerin­ninnerput ineriar­tortissin­naavarput. Jehovamut qinugaangatta ilisarisimanerujar­tortarparput. Misilin­neqarnermi aalajaan­niassagatta nakussatseq­qulluta qinnuigigaangatsigu pissaaneranik assissaqan­ngitsumik eqqaasin­neqartarpugut. Jehovap ernerminik uagut pilluta tunnius­sisimanera pillugu qutsavigigaangatsigu Jehovap asanninnersua eqqaasarparput. Ajornar­torsior­nitsinnilu Jehovamut ikioqqugaangatta ilisimas­suseqangaarnera eqqarsaatigisarparput. Taama qinusarnerput Jehovap ataqqineruler­nissaanut iluaqutigis­savarput. Aamma Jehovamik ikinnguteqar­nitsinnut ajoqusiisin­naasumik iliunngin­nissarput aalajangiusimanerulis­savarput.

8. Guutimik mianerin­nittuas­sagutta qanoq iliorsin­naavugut?

⁸ Biibilimik atuaqqis­saarneq Guutimik mianerin­nittuar­nissamut iluaqutigisin­naavarput.  Maligas­saalluartummi ilinniarfigisin­naavagut maligas­siuinerluttullu ilinniutigalugit. Maanna sammeriartigit Jehovamut kiffartortut aalajaatsut ilaat marluk – kunngip Akabip kunngik­kormiuni nakkutil­liisuutitaa Obadja palasiunerlu Jojada. Aamma Juudami kunngi Joashi piffissap ingerlanerani Jehovamut kiffartorun­naartoq qanoq ilinniutigisin­naaneripput paasissavarput.

9. Obadjap Jehovamik mianerin­nittuunini qanoq iluaqutigaa? (Kunnginik 1. 18:3, 12)

⁹ Obadja Biibilimi eqqaaneqaq­qaarmat ima allassimavoq: “Obadja Guutimik mianerin­nilluin­nartuuvoq.” (Kunnginik 1. 18:3, 12 atuakkit). Obadja Guutimik mianerin­nittuugami unneqqarin­nillunilu tatiginartuuvoq. Taamaat­tumillu kunngik­kormiuni akisussaaf­filerneqarpoq. (Aamma takuuk Nehemia 7:2). Guutimik mianerin­nittuugami aamma pisariaqar­titaminik sapiissuseqangaarpoq. Obadjap nalaani kunngi Akabi Jehovap “isaani ajortumik iliorpoq siuliminit tamanit ajornerusumik”. (Kng 1. 16:30) Akabillu nuliata Baalisiortup Jeezabeelip Jehova uumigingaaramiuk naalagaaffimmi avannarlermi Israalimi guutisiorneq ilumoortoq atorunnaarsin­niarsaraa. Allaat Guutip pruffiitii amerlasuut toqutsis­simavai. (Kng 1. 18:4) Aap, ersarippoq Obadja piffissami oqitsorsiorfiun­ngitsumi Jehovamik guutisiortoq.

10. Obadja qanoq immikkuul­larissumik sapiissuseqarpa?

¹⁰ Obadja qanoq immikkuul­larissumik sapiissuseqarpa? Jeezabeelip Guutip pruffiitii toqunniarlugit malersulermagit Obadjap taakkua ilaat 100-t isertorpai ‘qaarusummi ataatsimi 50-iutillugit isumagalugillu nerisas­saannik imigassaannillu’. (Kng 1. 18:13, 14) Paasineqarsimagaluaruni toqutaasimas­sagaluarpoq. Soorunami Obadja toqorusunnani annilaangasimassaaq. Obadjalli Jehova kiffaalu inuunerminiit asaneruai.

11. Nalitsinni Jehovamut kiffartortut Obadja qanoq ilaartarpaat? (Aamma asseq takuuk).

¹¹ Nalitsinni Jehovamut kiffartortut amerlasuut nunani suliatsinnik inerteq­quteqarfiusuni inuupput. Qatanngutigut oqartus­saasunik ataqqin­nittuupput, Obadjali ilaarlugu  Jehovap kiffartorfigiuarnissaa aalajangiusimavaat! (Mat 22:21) Inuit pinnagit Guuti naalakkersuisutut naalakkamikku ersersit­tarpaat Guutimik mianerin­nittuullutik. (ApS 5:29) Nutaarsiassat nuannersut pillugit oqaluus­siuarput isertor­tumillu ataatsimiit­tarlutik. (Mat 10:16, 28) Qatanngutimik anersaakkut inuussutis­saqartuar­nissaat isumaginiar­tarpaat. Henri, Afrikami nunami suliatsinnik inerteq­quteqarfiusimasumi najugalik, qanoq misiginersoq sammeriartigu. Inerteq­quteqarnerup nalaani Henri kajumilluni Biibililersaarutinik Nalunaajaasoqatiminut pajuttarpoq. Ima allappoq: “Ittoortuuvunga, taamaattumik qularin­ngilara Jehovamik ataqqin­ningaarnera pisariaqar­titannik sapiissuseqalis­sutigalugu.” Taanna ilaarlugu sapiitsuusinnaavit? Guutimik mianerinninneq ineriar­tortikkukku sapissanngilat.

12. Palasiunerup Jojadap nuliatalu qanoq ersersippaat Jehova ilumoorfigalugu?

¹² Palasiunerup Jojadap Jehova mianerigamiuk ilumoorfigaa allallu Jehovap guutisiorfiginissaanut kajumis­saarlugit. Jeezabeelip paniata Ataljap Juudami imminut dronningin­ngortinnerata nalaani tamanna erseqqissivoq. Ataljap naakkit­taatsuulluni pissaaneqarusungaarlunilu Juudami kunngip eqqarlii tamaasa, allaat ernuttani tamaasa, toqoriaraluarpai. Paasinarpoq inuit Atalja ersigimmassuk. (Nal 2. 22:10, 11) Erngutaasa ilaat – Joashi – Jojadap nulianit Joshabatimit annaanneqarami aniguivoq. Uinilu meeraq Ataljamut isertuuppaat isumagalugulu. Jojada Joshabatilu taama iliormata Daavip kinguaavini kunngiussuseq attatiin­narneqarpoq. Jehova ilumoorfigigamiuk Atalja ersiginagu Jojada eqqortuliorpoq. – Uss 29:25.

13. Joashi arfineq-marlunnik ukioqartoq Jojadap ilumoorfigin­ninnini qanoq takuteqqippaa?

¹³ Joashi arfineq-marlunnik ukioqartoq Jojadap ilumoorfigin­ninnini takuteqqippaa. Joashi Daavimit kinguaajugami kunngin­ngortin­neqartussaavoq. Taamaattumik Jojada Joaship kunngin­ngortin­nissaanik pilersaarusiorpoq. Pilersaarut iluatsin­ngitsoorpat Jojada toqutaariataarsinnaavoq. Jehovalli ikiuineratigut pilersaarut iluatsippoq. Israalikkunni qullersaasunit Levikkunnillu tapersersor­neqarluni Jojadap Joashi kunngin­ngortippaa Ataljalu toqutaatillugu. (Nal 2. 23:1-5, 11, 12, 15; 24:1) Jojadap “kunngi inuillu Naalagarlu angerfigeqatigai inuit neriorsuisillugit Naalakkamut innuttaanis­saannik”. (Kng 2. 11:17) Jojada aamma Jehovap “naalaffiata isaariaani paarsisulersuivoq. Taakkua sianigissavaat mingutsis­simasumik kimilluunniit naalaffimmut isertoqan­nginnissaa”. – Nal 2. 23:19.

14. Jojadap Jehova ataqqigamiuk qanoq ataqqinaaser­neqarpa?

¹⁴ Jehova siusinnerusukkut oqarsimavoq ‘ataqqin­nitsini ataqqis­sallugit’. Aamma Jojadamik ataqqinnippoq. (Sam 1. 2:30) Assersuutigalugu palasiunerup Jojadap ajunngitsuliai ilinniarfiginias­sagatsigit Biibilimut allatsippai. (Rom 15:4) Jojadalu toqugami immikkut ittumik ataqqinaaser­neqarpoq. “Daavip Illoqarfiani ilivaat kunngit iliveqarfiannut Israelimi Guutimut illuanullu ajunngitsunik naammas­sisaqarsimaqimmat.” – Nal 2. 24:15, 16.

15. Jojada pillugu oqaluttuaq qanoq ilinniarfigisin­naavarput? (Aamma asseq takuuk).

¹⁵ Tamatta Jojada pillugu oqaluttuaq Guutip mianerinissaanut iluaqutigisin­naavarput. Ilagiinni utoqqaanertat eqqumallutik ilumoorfigin­nillutillu Guutip savaataanik illersuinermikkut Jojada ilaarsin­naavaat. (ApS  20:28) Utoqqaat aamma Jojada ilinniarfigisin­naavaat. Jehovamik mianerin­nillutillu ilumoorfiginnittut Jehovap siunertani naammas­siniarlugu suli atorluarsinnaavai. Inuusuttut Jehovap Jojadamik pinneriaasia maluginiarsin­naavaat. Qatanngutit utoqqaat, ingammik ukiorpassuarni Jehovamut kiffartorsimasut, ataqqinerisigut Jehova ilaarsin­naavaat. (Uss 16:31) Tamattalu Israalikkunni qullersaasut Levikkullu Jojadamik tapersersuisut ilinniarfigisin­naavagut. Ilumoorfigin­nilluta siulersortigut naalallugit tapersersortigit. – Hebr 13:17.

16. Qanoq erserpa kunngi Joashi anersaakkut sanngiitsuusoq?

¹⁶ Kunngi Joashi Jojadamit sunnerneqarluarpoq. (Kng 2. 12:3) Suli inersimasun­ngornani Jehovap iluarisaatut iliorusuppoq. Jojadalli toqunerata kingorna Juudap naalagartai tunussisut Joaship tusarnaarpai. Tamatuma kingunerisaanik Joaship innuttaasalu ‘napasut Asheramut pigititat guutiliallu guutisiorfigilerpaat’. (Nal 2. 24:4, 17, 18) Tamanna aliasuutigingaarlugu Jehovap “imminut utertik­kumallugit pruffiitinik aallartitsivigai”. Inuilli tusaajuman­ngillat. Aamma Jojadap ernera Zakkaria c Jehovamut pruffiitiullunilu palasiugaluartoq Joashillu illortaarigaluaraa tusaajuman­ngilaat. Zakkariap ilaqutaanit ikiorneqangaaraluarluni kunngip Joaship qujamasunnani  Zakkaria toqutaatippaa. – Nal 2. 22:11; 24:19-22.

17. Joashi mianerin­nikkunnaarami qanoq pineqarpa?

¹⁷ Joaship Jehova mianeriun­naarmagu ajortumik kinguneqarpoq. Jehova ima oqarsimavoq: ‘Narrugin­nitsikka kanngutsissapput.’ (Sam 1. 2:30) Kingusin­nerusukkut Aramip sakkutuuisa ikittuinnaasut Joaship sakkutoorpassui ajugaaffigaat taannalu anniaatigisaanik ikilerlugu. Aramæerit aallareermata Joashi kiffaminit toqunneqarpoq Zakkaria toqussimammagu. Inuit kunngi taanna ajortuusorigamikku isumaqarput kunngit akornannut ilisaasariaqan­ngitsoq. – Nal 2. 24:23-25.

18. Jeremia 17:7, 8-lu naapertorlugit Joashi qanoq ilaarnaveersaarsin­naavarput?

¹⁸ Joashi qanoq ilinniutigisin­naavarput? Joaship assigaa orpik sorlaqarpian­ngitsoq napasumik uppinnaveequser­neqanngikkuni upperiaannaasoq. Napasoq peermat, tassa Jojada toqummat, Joashi anorersuarmit uppitin­neqarpoq, tassa tunussisunit sunnertilluni Jehovamut aalajaak­kunnaarpoq. Tamatumannga erserpoq uppeqatitta ilaquttattalu maligas­saalluarnerat iluaqutigigaluarlutigu tamanna Jehovamut naalannis­satsinnut aalajangiisuus­sanngitsoq. Anersaakkut nukittujuas­sagutta Guutimik mianerin­ninnerput asannin­nerpullu atuaqqis­saartarnikkut, eqqarsaatigin­neqqissaar­tarnikkut qinusar­nikkullu nakussatsit­tariaqarparput. – Jeremia 17:7, 8 atuakkit; Kol 2:6, 7.

19. Jehovap sumik piumaffigaatigut?

¹⁹ Jehovap artukkatsinnik piumaffigineq ajorpaatigut. Uagutsinnut piumasaqaatai Oqaluus­sisartup oqaasii 12:13-imi ima eqikkar­neqarput: “Guuti mianeruuk inatsisaalu maleruarlugit, inuit tamarmik taamaalior­tussaapput!” Guuti mianerigutsigu qanorluunniit misilin­neqassagaluarutta aalajaat­tuarsin­naavugut, soorlu Obadja Jojadalu aalajaat­tuartut. Suulluunniit kialuunniillu Jehovamut ikinngutaanerput ajoqusersin­naanngilaa.