1. Petrusimit allakkat siulliit 5:2 naapertorlugu utoqqaanertat pingaarutilimmik sumik isumagisas­saqarpat?

 ILAGIINNI utoqqaanertat Jehovap asasaanik paarsisutut akisussaaf­filerneqarput. Angutit taakkua qatanngutiminnik isumassuinissartik pingaar­tippaat paarsisutullu suleruloor­tarlutik. (Jer 3:15; Petrusimit 1. 5:2 atuaruk). Utoqqaanertat ilagiitsin­niittut qujamasuutigeqaagut!

2. Utoqqaanertat ilaat sunik ajornar­torsiuteqartarpat?

² Utoqqaanertat akisussaaffitik isumaginiarlugit assigiin­ngitsutigut ajornar­torsiorsin­naapput. Ilagiinnik isumassuinissaq suliarujussuuvoq. Tonyp, USA-mi utoqqaanertaasup, suliassin­neqarnermini piginnaasami killeqarnerat ilikkar­tariaqarpaa. Ima oqaluttuarpoq: “COVID-19 atuutilermat ataatsimiinnerit oqaluus­sinerlu pilersaarusior­niarlugit suliassaqar­nerulerpunga. Qanorluunniilli sulitigigaluaraangama suliassaarutin­ngisaan­narpunga. Naggataatigut Biibilimik atuartarnera, misissueq­qissaar­tarnera qinusarneralu naammattumik piffissaqarfigiun­naarpakka.” Ilir, Kosovomi utoqqaanertaasoq, allamik ajornar­torsiuteqarpoq. Sorsuffim­miitilluni peqatigiif­fitsinnit ilitsersuutit maleruaruminaatsippai. Ima oqarpoq: “Immikkoor­tortaqarfimmiit aperineqarama qatanngutit navianar­torsiorfiusumiittut ikiorsin­naanerikka sapiissusera misilin­neqarpoq. Ilitsersuutit tulluarpasin­ngimmata annilaangavunga.” Asiami oqaluus­sisartutut aallartitap Tim-imik atillip ullormut naammas­siniagassani angumeriuminaatsittarpai. Ima oqarpoq: “Ilaannikkut qatanngutit isumaginis­saannut nukissaqarpiarnanga misigisarpunga.” Utoqqaanertat assingusunik ajornar­torsiutillit suna iluaqutigisin­naavaat?

3. Tamatta Giidiuup maligassiaa qanoq iluaqutigisin­naavarput?

³ Eqqartuussisoq Giidiuut utoqqaanertat ilinniarfigisin­naavaat. (Hebr 6:12; 11:32) Guutip innuttaanik illersuisuullunilu  paarsisuuvoq. (Eqq 2:16; Nal 1. 17:6) Giidiuut assigalugu utoqqaanertat pissutsini erloqinartuni Guutip innuttaanik isumagin­nittussan­ngortin­neqarput. (ApS 20:28; Tim 2. 3:1) Taamaattumik utoqqaanertat Giidiuup anneruniajuinnera, maniguunnera, naalannera qasujuitsuuneralu ilinniarfigisin­naavaat. Tamatta ilagiitsinni utoqqaanertat qujamasuutiginerulersin­naavagut. Qatanngutit angutit ilungersortut taakku tapersersorsin­naavagut. – Hebr 13:17.

4. Giidiuup qanoq ersersippaa anneruniajuillunilu maniguut­tuulluni?

⁴ Giidiuut anneruniajuillunilu maniguuppoq. b Jehovap inngilianit oqarfigineqarami Israalikkut Midjanik­kunniit aniguisissagai maniguulluni ima oqarpoq: “Eqqarlerisakka Manassekkunni nikanar­nersaapput, uangalu ataatama inoqutaani nukarlersaavunga.” (Eqq 6:15) Giidiuut ajukkuppoq, Jehovalli nalunngilaa Giidiuup suliassaq sapinngikkaa. Aap, Jehovap ikiuineratigut suliassin­neqarnini naammassivaa.

5. Qaqugukkut utoqqaanertap anneruniajuin­nissani maniguun­nissanilu sapernar­tissinnaavaa?

⁵ Utoqqaanertat sutigut tamatigut sapinngisaminnik anneruniajuil­lutillu maniguun­niartarput. (Mika 6:8; ApS 20:18, 19) Piginnaasatik naammas­sisatillu oqarataarutigineq ajorpaat, aamma kukkugaangamik eqqarsalerneq ajorput naleqaratik. Ilaannikkulli tamanna sapernarsinnaavoq. Assersuutigalugu imaassinnaavoq utoqqaanertap suliassarpassuit akuerigaluarlugit paasigaa ilaat naammas­sisinnaanagit. Imaluunniit naammassisani pillugit isornar­torsior­neqaruni naammas­sisaniluunniit alla pillugu nersualaar­neqaruni maniguun­nissani sapernar­tissinnaavaa. Utoqqaanertat Giidiuut qanoq ilinniarfigisin­naavaat?

6. Anneruniajuinnermut tunngatillugu utoqqaanertat Giidiuut qanoq ilinniarfigisin­naavaat? (Aamma asseq takuuk).

⁶ Ikioqqusarit. Inuup anneruniajuitsup nalunngilaa pisinnaasani killeqartut. Giidiuup allanut ikioqqusar­nermigut ersersittarpaa anneruniajuitsuulluni. (Eqq 6:27, 35; 7:24) Utoqqaanertat silatusaartut aamma taamaaliortarput. Tony eqqaaneqareersoq ima oqarpoq:  “Peroriar­tornera pissutigalugu iliuuserisin­naasakka qaangerlugit suliassin­neqaraangama akuersiin­nartarpunga. Taamaattumik aalajangerpunga ilaqutariittut atuaqqis­saaqatigiin­nitsinni anneruniajuinneq misissor­niarlugu, aamma nuliara aperaara qanoq eqqarsarnersoq. Aamma jw.org-imi video Oplær andre, hav tiltro til dem, og giv dem myndighed – ligesom Jesus isiginnaarpara.” Imminut artukkin­nginniassagami Tony allanut ikioqqusalerpoq. Iluaqutaanera pillugu ima oqarpoq: “Ilagiinni suliassat isumagineqartarput, uangalu Jehovamik ikinnguteqarnerma ineriar­tortinnissaanut piffissaqar­nerulerpunga.”

7. Isornar­torsior­neqarnermi utoqqaanertat Giidiuut qanoq ilaarsin­naavaat? (Jaaku 3:13)

⁷ Isornar­torsior­neqaruit saamasuugit. Utoqqaanertat isornar­torsior­neqaraangamik Giidiuup maligassiaa iluaqutigisin­naavaat. Nalunnginnamiuk kukkujuitsuunani Efraimikkut isornar­torsiormanni kamalernanilu saamalluni akivai. (Eqq 8:1-3) Naammagit­taalliortut maniguulluni tusarnaarpai, inussiar­nersumillu akimmat kamakkun­naarput. Utoqqaanertat silatusaartut Giidiuut ilaarlugu isornar­torsior­neqaraangamik tusarnaaq­qissaartarput saamasumillu akisarlutik. (Jaaku 3:13 atuaruk). Taamaalillutik ilagiinni eqqisseqatigiinneq tapersersor­tarpaat.

8. Utoqqaanertat nersualaar­neqaraangamik qanoq akisinnaappat? Assersuuteqarit.

⁸ Jehova ataqqinaatis­sittaruk. Midjanikkunnut ajugaanini pillugu nersualaar­neqarami Giidiuup Jehova ataqqinaatissippaa. (Eqq 8:22, 23) Utoqqaanertat Giidiuut qanoq ilaarsin­naavaat? Naammas­sisatik pillugit Jehova ataqqinaatis­sissinnaavaat. (Kor 1. 4:6, 7) Assersuutigalugu utoqqaanertaq ilinniar­titsillaq­qinnini pillugu nersualaar­neqaruni oqarsinnaavoq siunnersuutit Guutip oqaasianeersut tamattalu Jehovap peqatigiis­sortaanit ilinniar­tinneqar­tartugut. Utoqqaanertat eqqarsaatigisarsin­naavaat ilinniar­titseriaasertik Jehovamut ataqqinaataanersoq imminul­luunniit malugeq­qusaarnerunersoq. Timothyp utoqqaanertatut kiffartulerami oqalugiarneq nuannaringaarpaa. Ima oqarpoq: “Oqaaserpassuit atorlugit aallarniil­lungalu assersuusiortarama nersualaar­neqarajut­tarpunga. Ajoraluar­tumilli tusarnaartut Biibili Jehovalu pinnagit uanga maluginiar­tarpaannga.” Piffissap ingerlanerani Timothyp paasivaa ilinniar­titseriaatsini allanngor­tittariaqarlugu imminut malugeq­qunngin­niassagami. (Uss 27:21) Iluaqutaanera pillugu ima oqarpoq: “Maannakkut qatanngutit oqarfigisarpaannga ajornar­torsior­nerminni misilin­neqarnermin­niluunniit oqalugiaatiga qanoq iluaqutigisimanerlugu Jehovamullu qanillis­sutigisimallugu. Siornatigut nersualaar­neqarnermin­ngaanniit maannakkut oqaaseqaataat nuannaarutigineruakka.”

9. Sooq Giidiuup naalannissaq sapiissuseqar­nissarlu sapernar­tissinnaavaa? (Saqqaani assiliaq takuuk).

⁹ Giidiuut eqqartuus­sisutut toqqarneqarnermi kingorna naalallunilu sapiissuseqar­tariaqarpoq. Navianartumik suliassin­neqarpoq ataatami Baalimut pilliiviutaa aserorter­tussanngoramiuk. (Eqq 6:25, 26) Kingusin­nerusukkut sakkutuunik katersor­titsereerluni marloriarluni sakkutuut ikilisissagai peqquneqarpoq. (Eqq 7:2-7) Aamma oqarfigineqarpoq akeqqat tammaarsimaffiat unnuakkut saassutissagaa. – Eqq 7:9-11.

10. Qaqugukkut utoqqaanertap naalannissani sapernar­tissinnaavaa?

¹⁰ Utoqqaanertat naalakkumasuusariaqarput. (Jaak 3:17) Utoqqaanertaq Biibilimi allassimasunut  Guutillu peqatigiis­sortaanit ilitsersuutinut kajumilluni naalakkaangami maligas­siuilluartarpoq. Ilaannikkulli naalannissani sapernar­tissinnaavaa. Assersuutigalugu immaqa ilitsersuutit nutaat malinnaaf­figiuminaatsis­sinnaavai. Ilaannikkut eqqarsarsinnaavoq ilitsersuut aalajangersimasoq naleqqunnersoq maleruar­nissaaluunniit silatusaar­nerunersoq. Imaassin­naavorluunniit navianar­torsiuutigisin­naasaminik suliassin­neqartoq. Taamaat­toqartillugu utoqqaanertat Giidiuup naalannera qanoq ilaarsin­naavaat?

11. Utoqqaanertat naalannis­saminnut suna iluaqutigisin­naavaat?

¹¹ Ilitsersuutinut tusarnaaq­qissaarit maleruaal­lutillu. Guutip Giidiuut oqarfigaa ataatami pilliiviutaa qanoq aserortissagaa, sumi Jehovamut pilliivilius­sanersoq uumasumillu sumik pilliis­sanersoq. Giidiuullu apeqqusiinani peqquneqar­nermisorluinnaq iliorpoq. Nalitsinni utoqqaanertat allakkatigut nalunaarutitigullu isumannaatsuunissamut aamma Jehovamut qanimut attaveqar­tuarnissamut tunngatillugu Jehovap peqatigiis­sortaanit maleruagas­sinneqartarput. Utoqqaanertat maleruaaq­qissaarnerat pissutigalugu asavagut. Ilagiin­niittullu tamarmik iluaqutigisarpaat. – Tuss 119:112.

12. Peqatigiif­fitsinni suleriaatsikkut allannguisoqaraangat utoqqaanertat Hebræerit 13:17 qanoq maleruarsin­naavaat?

¹² Naleqqus­sarsinnaagit. Eqqaamajuk Jehovap Giidiuut peqqugaa sakkutuut tamangajaasa angerlar­teqqullugit. (Eqq 7:8) Giidiuut immaqa eqqarsarsimasinnaavoq allannguut tamanna pisariaqarnersoq iluatsis­sanersorluunniit. Taamaak­kaluartorli naalappoq. Nalitsinni suleriaatsikkut allannguisoqaraangat utoqqaanertat Giidiuut ilaartarpaat. (Hebræerit 13:17 atuaruk). Assersuutigalugu 2014-imi Siulersuisoqatigiit ataatsimiit­tarfinnik ataatsimeersuar­tarfinnillu sanaartornerit qanoq aningaasalersor­neqartar­nissaat allanngor­tippaat. (Kor 2. 8:12-14) Siornatigut ilagiit sanaartor­niaraangata peqatigiissortat atukkiisarput. Ilagiillu aningaasat atukkatik utertillugit akilertarpaat. Maannakkulli sumiluunniit pisariaqar­titsisoqaraangat ilagiit tunissuteqarsin­naanerat apeqqutaatinnagu aningaasat nunarsuaq tamakkerlugu ilagiinnit tamanit tunissutigineqartartut atorlugit ataatsimiit­tarfiit ataatsimeersuar­tarfiillu sanaartor­neqartarput. Allannguut tamanna Josép tusaramiuk qularaa iluaqutaas­sanersoq ima eqqarsarluni: ‘Ataatsimiit­tarfimmik ataatsimil­luunniit sanaartor­toqarnavianngilaq. Nunatsinni allaalluin­nartumik periaaseqar­toqartarpoq.’ Taava allannguutip akuerinissaanut Josép suna iluaqutigaa? Ima oqarpoq: “Ussatit 3:5, 6-imilu Jehovap tatiginissaanik eqqaasin­neqarpunga. Allannguullu kinguneqarluaqaaq. Ataatsimiit­tarfiit amerlanerusut sanaartor­neqartalerput tunissuteqariaasittalu allanngor­tinneratigut naligiis­saarisalerpugut.”

13. (a) Giidiuup suna upperil­luinnarpaa? (b) Utoqqaanertat Giidiuut qanoq ilaarsin­naavaat? (Aamma asseq takuuk).

 ¹³ Sapiillutit Jehovap piumasaatut iliorit. Annilaangagaluarluni navianar­torsiuutigisin­naasaminillu suliassin­neqaraluarluni Giidiuup Jehova naalappaa. (Eqq 9:16, 17) Jehovamit sapiillisin­neqarami Giidiuup upperil­luinnarpaa Israalikkunnik illersuinermini Jehovap ikiussagaani. Utoqqaanertat nunani suliatsinnik inerteq­quteqarfiusuni najugallit Giidiuut ilaartarpaat. Tigusarineqarnermik, killisior­neqarnermik, soraarsitaanermik unatarneqar­nermillu kinguneqarsin­naagaluartoq ilagiit ataatsimiinnerini oqaluus­sinermilu sapiillutik siulersuisarput. c Annikil­liornar­tussarsuarmi utoqqaanertat ilitsersuutit pisassatik maleruar­niarlugit sapiissuseqar­tariaqassapput. Ilitsersuutit taakkua maleruar­nissaat navianar­torsior­narpasis­sinnaapput. Assersuutigalugumi Guutimit eqqartuus­sinissamik tusarliussamut nataqqornatut allaatigineqartumut Gogillu Magogimeersup saassus­sineranit aniguisin­naanissamut tunngatillugu ilitsersor­neqassagunarpugut. – Ez 38:18; Saqq 16:21.

14. Giidiuup qasujuitsuunini qanoq ersersippaa?

¹⁴ Giidiuup eqqartuus­sisutut suliassin­neqarnera nukersor­nartorujussuuvoq. Midjanikkut unnuakkut qimaammata Giidiuup Jizreelip narsartaaniit kuussuaq Jordani tikivillugu malersorpai, kuussuullu sinaa orpikkanik ulikkaarunarpoq. (Eqq 7:22) Giidiuut Jordanimut pigami unippa? Naamik! Qasugaluarlutik angutitamilu 300-t Jordani ikaarpaat akeqqallu malersor­tuarlugit. Naggataatigullu Midjanikkut anguaat ajorsar­tillugillu. – Eqq 8:4-12.

15. Sooq utoqqaanertap qasujuitsuunissani sapernar­tissinnaavaa?

¹⁵ Utoqqaanertaq ilagiinnik ilaquttaminillu isumassuisarami ilaannikkut timikkut, isumakkut misigis­sutsikkullu nukissaaruttutut  misigisarsinnaavoq. Utoqqaanertat taama misigigaangamik Giidiuut qanoq ilaarsin­naavaat?

16-17. Giidiuup qasujuitsuunis­saminut suna iluaqutigaa, utoqqaanertallu suna qularin­ngissin­naavaat? (Esaja 40:28-31) (Aamma asseq takuuk).

¹⁶ Jehovamit nakussatsin­neqarnissat tatigiuk. Giidiuup Jehovap nakussatsis­sagaani tatigaa, pakatsin­ngilarlu. (Eqq 6:14, 34) Ilaanni Giidiuup angutitamilu Midjanikkut kunngii marluk, immaqa qatigattuuni issiallutik qimaasut, arpallutik malersorpaat. (Eqq 8:12, 21) Guutillu ikiuineratigut anguaat ajugaaf­figalugillu. Aamma utoqqaanertat Jehova ‘nukillaarneq ajortoq’ tatigil­luinnarsin­naavaat. Jehovap pisariaqar­titaannik nakussatsissavai. – Esaja 40:28-31 atuakkit.

¹⁷ Qatanngutip angutip Matthewimik atillip, Napparsim­mavinnut Attaveqar­titanut ilaasortap, misigisaa sammeriartigu. Qasujuitsuunis­saminut suna iluaqutigisimanerlugu ima nassuiaavoq: “Filippimiut 4:13-imi allassimasut ilumoornerat misigisarpara. Ilaannikkut qasungaarlunga nukeeruttutut misigigaangama qatanngutit ikiorniarlugit timikkut isumakkullu nukissannik tuneqqullunga qamannga pisumik Jehova qinnuigisarpara. Jehovallu anersaavanit nakussatsin­neqarnera qasujuitsuunissannut iluaqutigisimaqaara.” Giidiuut ilaarlugu utoqqaanertat Jehovap innuttai isumassor­niarlugit imaannaan­ngitsuugaluaraangal­luunniit ilungersortarput. Soorunami anneruniajuitsuullutik misserratigis­sanngilaat iliuuserisin­naasatik nukitillu killeqartut. Tatigisin­naavaalli Jehovap ikioqqullutik qinnutitik tusarnaarumaarai pisariaqar­tumillu nakussatsis­sagaatsik. – Tuss 116:1; Flp 2:13.

18. Utoqqaanertat Giidiuut qanoq ilaarsin­naavaat?

¹⁸ Utoqqaanertat Giidiuut ilinniarfigil­luarsin­naavaat. Utoqqaanertat suliassat qanoq annertutigisut suliarisin­naanerlugit aalajangeraangamik aamma isornar­torsior­neqaraangamik nersualaar­neqaraangamillu anneruniajuitsuul­lutillu maniguut­tariaqarput. Naggatissap qanilliar­tornerani naalallutillu sapiittariaqarput. Qanorluunniit ajornar­torsioraluarlutik tatigisariaqarpaat Guutip nakussatsis­sinnaagaatsik. Paarsisortagut qasusuillutik isumassuingaartut qujamasuutigalugillu pingaar­tittuarpagut. – Flp 2:29.