1. Tussiaat 18:47-mi allaatigineqartutut Daavip Jehova qanoq taavaa?

 INUUNITSINNIK ajornar­torsior­titsisin­naasumik allanngorluin­nartitsisin­naasumil­luunniit nalaataqar­tarsinnaavugut. Qujanar­tumilli Jehovamut Guutimut ikioqqusin­naavugut! Allaaserisap siuliani eqqaasin­neqarpugut Jehova Guutiusoq uumassusilik uagutsinnillu ikiuinis­saminut piareersimajuartoq. Taassumannga ikiorneqaraangatta oqaatsit uku uppernarsisarpagut: “Naalagaq uumavoq!” (Tussiaat 18:47 atuaruk). Daavilli Guutip uumanera allaatigeq­qammerlugu ‘qaarsumik’ taavaa. Tassa uumassuseqan­ngitsumut assersuuppaa. Sooq taama taavaa?

2. Allaaserisami matumani suut sammissavagut?

² Allaaserisami matumani sooq Jehova qaarsumut assersuun­neqarnersoq tamannalu qanoq ilinniarfigisin­naaneripput sammissavagut. Aamma paasissavarput taanna uagut qaarsutsitut qanoq isigilersin­naagipput. Kiisalu Jehovap pissusii qaarsumut eqqaanartut qanoq ilaarsin­naanerigut sammissavarput.

SOOQ JEHOVA QAARSUMIK TAANEQARTARTOQ

3. Oqaaseq “qaarsoq” Biibilimi qanoq atorneqartarpa? (Asseq takuuk).

³ Biibilimi oqaaseq “qaarsoq” atorneqarmat Jehovap pissusiisa ilaat paasinerusin­naavagut. Kiffaasa taassuminnga unnersiutigin­ninnerminni oqaaseq taanna atorajuppaat. Jehovap ‘qaarsutut’ taaneqarnera siulleq Mosesimik allakkat tallimaat 32:4-mi allassimavoq. Hanna qinulluni oqarpoq ‘Guutitsitut qaarsoqan­ngitsoq’. (Sam 1. 2:2) Habakkukip Jehova ‘qaarsumisut’ taavaa. (Hab 1:12) Tussiaat 73-imik tussiaasiortup Jehova ‘uummatimi qaarsorisaatut’ taavaa. (Tuss 73:26) Allaallu Jehova imminut qaarsumik taavoq. (Es 44:8) Maanna Jehovap  pissusiisa ilaat pingasut qaarsumut eqqaanartut sammeriartigit, paasillugulu taanna qanoq ‘qaarsorilersin­naagipput’. – Mos 5. 32:31.

4. Jehova qanoq qimarnguffittut ippa? (Tussiaat 94:22)

⁴ Jehova qimarnguffiuvoq. Soorlu anorersuarmi qaarsoq oqqiffiusinnaasoq taamatuttaaq Jehovap ajornar­torsioraangatta illersor­tarpaatigut. (Tussiaat 94:22 atuaruk). Toqqissisimatit­tarpaatigut neriorsorlutalu naalliunnerput ataavar­tuussan­ngitsoq. Aamma oqarfigaatigut uagutsinnik annilaangatitsisut anniartitsisullu suulluunniit peerumaarlugit. – Ez 34:25, 26.

5. Jehova qanoq qaarsorilerlugu qimarnguf­figisin­naavarput?

⁵ Jehovamut qinusarnikkut taanna qaarsorilerlugu qimarnguf­figisin­naavarput. Qinugaangatta Jehovap ‘eqqissinermik uummatitsinnik isumatsinnillu paarsisumik’ tunisarpaatigut. (Flp 4:6, 7) Qatanngut angut Artjomimik atilik uppernini pissutigalugu parnaarus­saaqqasoq qanoq misigisaqarnersoq paasiniariartigu. Pisortani atorfilimmit arlaleriarluni apersor­neqartarpoq, ajortumik pineqartarpoq sioorasaar­neqartarlunilu. Ima oqaluttuarpoq: “Apersor­neqartarnera artorsaatigisarpara … Jehovamut qinujuaan­narpunga. Uummatikkut eqqissinissaq ilisimas­suserlu qinnutigisarpakka. Malersor­neqartaraluarlunga eqqissisimaan­narsinnaasarpunga … Jehovap ikiortarmanga soorlulusooq qarmaq oqqiffigisariga.”

6. Sooq Jehova tatigiuaan­narsinnaavarput? (Esaja 26:3, 4)

⁶ Jehova tatiginartuuvoq. Soorlu qaarsoq nikisin­neqarsin­naanngitsoq, taamatulli Jehova aalassatsin­neqarsin­naannginnami ikiuinis­saminut piareersimajuaannarpoq. “Qaarsuummat ataavartussaq” tatigil­luinnarsin­naavarput. (Esaja 26:3, 4 atuakkit). Toqunngisaan­nassagami neriorsuutini eqqortit­tuaannarsinnaavai, qinnutigut tusarnaar­tuaannarsinnaavai pisariaqar­titatsinnillu ikiorsin­naajuaan­narluta. Tatiginis­saanullu pissutaasut allat tassaapput ajunngitsulior­nitsinnik eqqaaman­nittuaan­narnera uagutsinnillu pilluaq­qusisarnera. (Hebr 6:10; 11:6) Aap, kiffani ilumoorfigiuaannarpai! – Sam 2. 22:26.

7. Jehova tatigigutsigu qanoq misigisaqassaagut? (Aamma asseq takuuk).

⁷ Jehova tatigil­luinnarutsigu qaarsorilis­savarput. Upperil­luinnarparput allaat artorsar­nitsinni taassumunnga naalannerput iluaqutigis­sallugu. (Es 48:17, 18) Taassumannga tapersersor­neqarnerput misiginerujar­tortillugu tatiginerulis­savarput. Taava qanorluunniit misilin­neqartigigaluarutta pinertusaarsin­naassaagut. Ilaannikkut misilin­neqarnigut sakkortungaaraangata taamaallaat Jehovamit ikiorneqarsin­naasarpugut. Allanut ikioqqusin­naanngik­kaangatta paasisarparput Jehova qanoq tatiginar­tiginersoq. Vladimir ima oqarpoq: “Isertitsivim­miinninni Jehovamut aatsaat taama qanitsigisutut misigivunga. Kisimiil­luinnarama pissutsillu atukkakka allanngor­tissinnaan­nginnakkit Jehovap tatigil­luinnarnissaa ilikkarpara.”

8. (a) Sooq oqarsin­naavugut Jehova aalajaatsuusoq? (b) Guuti qaarsorigatsigu qanoq iluaqutigisarparput? (Tussiaat 62:7, 8)

 ⁸ Jehova aalajaatsuuvoq. Qaqqarsuartut illuni Jehova aalajaatsuuvoq allanngujaatsuullunilu. Kinaassusia siunertaalu allanngun­ngisaannarput. (Mal 3:6) Edenimi pikitsitsisoqarmat Jehovap inunnut siunertani allanngor­tinngilaa. Soorlu apustili Paulusi allattoq, Jehova ‘imminik miserratigisin­naanngilaq’. (Tim 2. 2:13) Tassa imaappoq qanorluunniit pisoqaraluarpat imaluunniit allat qanorluunniit ilioraluarpata Jehovap siunertani najoqqutas­sianilu allanngor­tinngisaan­nassavai namminerlu allanngun­ngisaan­nassalluni. Taamaammat upperil­luinnarparput erloqinar­torsior­nitsinni Jehovap ikiussagaatigut siunissamullu neriorsuutini eqqortissagai. – Tussiaat 62:7, 8 atuakkit.

9. Tatjana qanoq ilinniarfigaajuk?

⁹ Jehovap pissusii aamma nunarsuarmut inunnullu siunertaa eqqarsaatigisarutsigit tatiginerulis­savarput, tassa qaarsorilis­savarput. Taamaalior­nerpullu misilin­neqarnitsinni eqqissisimaan­narnissatsinnut pinertusaar­nissatsinnullu iluaqutigis­savarput. (Tuss 16:8) Qatanngutip arnap Tatjanamik atillip uppernini pissutigalugu illumini parnaarussaasup tamanna misigaa. Ima oqarpoq: “Kisimiil­luinnarpunga. Aallaqqaammut tamanna sapernar­tippara nikallungasarlungalu.” Taavali Jehova taassumalu inunnut siunertaa eqqarsaatigeq­qissaaramigit paasivaa sooq misilin­neqarnermini pinertusaar­nissani taama pingaaruteqar­tigisoq. Tamannalu pissutigalugu eqqissisimaannarpoq aalajaat­tuarnis­saminullu nakussatsin­neqarluni. Ima nangippoq: “Jehova asagakku nuannaar­tikkusuk­kakkulu taama nalaataqarpunga. Tamannalu eqqarsaatigisalerakku nammineq artorsaatikka eqqarsaatigival­laarunnaarpakka.”

10. Jehova manna qanoq qaarsorilersin­naavarput?

¹⁰ Qanittukkut misilin­neqangaassaagut Jehovalu aatsaat taama tatigitigisariaqas­savarput. Pinertusaarsin­naaqqulluta ikiuiumaar­neranik upperin­ninnerput maanna nakussatsit­tariaqarparput. Qanoq taamaaliorsin­naavugut? Biibilimi oqaluttuat nalitsinnilu Jehovamut kiffartortut misigisaat pillugit atuartarsin­naavugut. Taamaalior­tilluta maluginiarsin­naavarput Jehovap ‘qaarsutut’ illuni kiffani qanoq ikiortarsimanerai. Oqaluttuat taakku eqqarsaatigeq­qissaarutsigit Jehova qaarsorilis­savarput.

JEHOVAP PISSUSII ILAAKKIT

11. Jehovap pissusii sooq ilaarusuppagut? (Aamma ungalusaq “ Qatanngutit angutit inuusuttut anguniarsin­naasaat” takuuk).

¹¹ Sammeqqam­merparput Jehovap pissusii qaarsumut eqqaanartut. Maanna sammissavarput taakku qanoq ineriar­tortissin­naanerlugit. Jehova ilaarnerujar­tortillugu qatanngutit nakussatsin­nerusin­naavagut. Assersuutigalugu Jiisusi oqarpoq Siimuut Keefassimik (“Petrusi”-mik nutserneqar­tartumik) qaarsuaqqamik  isumaqartumik taaneqassasoq. (Joh 1:42) Tamatumannga erserpoq Petrusi ilagiinni tassaalerumaartoq tuppallersaallunilu nakussatsitsisartoq. Ilagiinni utoqqaanertat ‘qaarsorsuup alanngortaanik’ taaneqarput. Tassani pineqarpoq ilagiin­niittunik illersuisarnerat. (Es 32:2) Soorunami tamatta – arnaagaluarutta angutaagaluarut­taluunniit – Jehova ilaarutsigu ilagiin­niittut tamarmik iluaqutigissavaat. – Ef 5:1.

12. Allanut qanoq qimarnguf­fiusinnaavugut?

¹² Qimarnguffiugit. Imaassinnaavoq pinngortitami ajunaar­nersuit, eqqissiviil­liornerit sorsunneril­luunniit pissutigalugit uppeqatitsinnik qimaasunik illusisitsisin­naasugut. “Ulluni kingullerni” pissutsit atukkagut ajorsigalut­tuinnarmata ilagiinni ikiorsin­naasagut amerliar­tuinnassapput. (Tim 2. 3:1) Aamma uppeqatigut misigis­sutsikkut anersaakkullu nakussatsis­sinnaavagut. Ilaatigut taamaaliorsin­naavugut ataatsimiigiaraangata oqaloqatigisar­nerisigut tuppallersar­tarnerisigullu. Taamaaliorutta ilagiinni asaqatigiinnermik qiimmas­saqatigiin­nermillu siuarsaassaagut. Jehovamut kiffartor­tuunngitsorpassuit inoqatitik peqqarniitsumik pisarpaat. Tamannalu pissutigalugu uppeqatigut tatineqartutut allaallu asaneqan­ngitsutut misigisin­naasarput. Taamaattumik ataatsimiigiaraangata sapinngisamik asaneqartutut, nakussatsin­neqartutut toqqissisimasutullu misigitik­kusuppagut.

13. Utoqqaanertat qanoq qimarnguf­fiusinnaappat? (Aamma asseq takuuk).

¹³ Utoqqaanertat ilagiin­niittunut artornar­torsiortunut qimarnguf­fiusinnaapput. Pinngortitami ajunaar­nersuaqar­tillugu napparsimaleriataar­toqartillugulu utoqqaanertat uppeqatimik ikiorneqar­nissaat isumagisarpaat. Aamma anersaakkut pisariaqartitaat isumagisarpaat. Utoqqaanertaq inussiarnersoq, misigin­neqataasartoq tusarnaarumasartorlu  saaffigiuminar­nerusarpoq. Taamatut pissuseqaruni allat asaneqartutut misigitissavai, taamaalillunilu siunnersuutai Biibilimik tunngavillit akueriuminar­nerussapput. – Tes 1. 2:7, 8, 11.

14. Qanoq tatiginar­tuunerput ersersis­sinnaavarput?

¹⁴ Tatiginartuugit. Ingammik allat ajornar­torsior­neranni tatiginar­tuunerput taakkununnga misigitik­kusupparput. (Uss 17:17) Tatiginartutut isigineqar­nissarput qanoq sulissutigisin­naavarput? Ullut tamaasa sapinngisatsinnik Jehova ilaarniarsin­naavarput, soorlu neriorsuutitsinnik piffissamillu eqqortitsiniar­tarluta. (Mat 5:37) Aamma pisariaqar­titsisunik ikiuisin­naasarpugut. Ilagiinnilu suliassin­neqaraangatta ilitsersuutit naapertorlugit naammas­sinissaa qulakkeer­niarsin­naasarparput.

15. Utoqqaanertat tatiginar­tuunerat ilagiin­niittut qanoq iluaqutigissavaat?

¹⁵ Utoqqaanertat tatiginartut ilagiinnut iluaqutaasarput. Qanoq? Ilagiin­niittut utoqqaanertanut, soorlu oqaluus­sisartoqatigiinnik nakkutil­liisumut, saaffigin­neriaan­naagaangamik toqqissisimasarput. Aamma utoqqaanertanit  ikiorneqarumagaangamik asaneqartutut misigisarput. Utoqqaanertallu namminneq isumartik pinnagu Biibilimik Biibililersaarutitsinnillu tunngavilimmik siunnersuigaangamik uppeqatiminnit tatigineqartarput. Utoqqaanertat tusakkaminnik allat susassarin­ngisaannik allanut oqaluttuareqqiineq ajortut neriorsuutiminnillu eqqortitsisartut tatigineqartarput.

16. Aalajaatsuunerput uagutsinnut allanullu qanoq iluaqutaassava?

¹⁶ Aalajaatsuugit. Jehova tamatigut naalattarutsigu aalajangiisar­nigullu najoqqutassianik Biibilimeersunik tunngaveqarpata allanut ajunngitsumik sunniuteqar­tarsinnaavugut. Uppersuseqar­nerujar­tortilluta eqqoqqis­saartumillu ilisimas­suseqar­nerujar­tortilluta najoqqutassiat Biibilimeersut aalajangiusimanerulis­savagut Jehovalu ilumoorfigil­luinnalerlugu. Taava eqqunngitsumik ilinniar­titsissutigineqartut eqqarsar­taatsillu Jehovap iluarinngisai sunnertis­sutigis­sanngilagut. (Ef 4:14; Jaak 1:6-8) Jehova taassumalu neriorsuutai upperigatsigit nuanniitsunik tusagaqaraangatta eqqissisimaan­narsinnaasarpugut. (Tuss 112:7, 8) Aamma ajornar­torsiutillit ikiorsin­naasarpagut. – Tes 1. 3:2, 3.

17. Utoqqaanertat uppeqatitik eqqissisimaan­naqqullugit susinnaappat?

¹⁷ Utoqqaanertat ileqquminnik aqutsisin­naassapput, naliliil­luarsin­naassuseqassapput, peqqissaar­tuussapput naleqqus­sarsinnaas­sallutillu. Utoqqaanertat ‘Guutip oqaasianik tutsuiginartumik aalajangiusiman­nilluin­nartuunermikkut’ uppeqatitik eqqissisimaan­narsinnaaq­qullugit upperluar­tuusinnaaq­qullugillu ikiortarpaat. (Tit 1:9; Tim 1. 3:1-3) Maligas­siuilluar­nermikkut paarsisuul­luarnermikkullu utoqqaanertat uppeqatitik ataatsimiigiar­tuarnissamut, oqaluus­seqataajuar­nissamut namminerlu Biibilimik misissuisar­nissamut kajumis­sisittarpaat. Qatanngutit nuanniitsunik nalaataqaraangamik Jehovap tatiginissaanik taassumalu siunertaata eqqaamajuar­nissaanik utoqqaanertanit eqqaasin­neqartarput.

18. Sooq Jehova unnersiutigerusupparput taassumunngalu qanittuarusulluta? (Aamma ungalusaq “ Jehovamut qanoq qanillisoqarsinnaasoq” takuuk).

¹⁸ Jehovap pissusii nuanningaartut sammereerlugit kunngitut Daavitut ima oqarsin­naavugut: “Unnersiutigineqarli Naalagaq, qaarsora.” (Tuss 144:1) Jehova tatigiuarsin­naavarput. Utoqqaligaluarut­taluunniit imminut qanittuar­nissamut ikiussagaatigut upperil­luinnarlugu ima oqarsin­naavugut: “Taanna tassa qaarsora.” – Tuss 92:15, 16.