Tussiaat 12:8-mi allassimasut qanoq paasisariaqarpat?

Tussiaat 12:2-5 allassimavoq ‘inuit akornanni ilumoorsuseqar­tueruttoq’. Taava versi 6-8 ima allassimavoq:

Versi 6-imi paasivarput Guutip “ikiortariallit” qanoq pissanerai, tassa annatsissagai.

Versi 7-imi allassimavoq Jehovap oqaasii ‘sukuluitsuusut sølvitut akuiakkatut’. Aap, tamatta upperil­luinnarparput Jehovap oqaasii minguitsuusut. – Tuss 18:30; 119:140.

Tussiaat 12:8-mi Biibilimik nutsikkat ilaanni ima allassimavoq: “Illit, Naalagaq, paariumaarpatit.” (tastamantitoĸaĸ 1961-imi naqitigaq; aamma takuuk New World Translation). Versillu siuliani Guutip oqaasii eqqaaneqarmata inuit ilaat isumaqarput Guutip paarisai tassaasut oqaasii. Ilumoorpoq Biibili pigineqaq­qusaanngik­kaluartoq akerlilersuisunillu suujunnaarsin­neqarniaraluartoq Guutip paarisimagaa. – Es 40:8; Pet 1. 1:25.

Aammali inuit versi 6-imi eqqaaneqartut paarisarpai, tassa “ikiortariallit” ‘erloqinar­torsiortullu’ Jehovap ikiortarpai aniguisit­tarlugillu. – Job 36:15; Tuss 6:5; 31:2, 3; 54:9; 145:20.

Taamaattumik versi 8-mi ‘Jehovap paarisai’ eqqaaneqarmata inuit imaluunniit oqaasii pineqarpat?

Tussiaatip misissornerani paasinarpoq inuit pineqartut.

Tussiaatip aallartinnerani Daavip Jehovamut kiffartortut aalajaatsut inunnit ajortunit salluliorfigineqartut eqqaavai. Taava versi 4-mi allassimavoq inuit ajortumik oqaluttut Jehovap nungutissagai. Tassa tussiaammi matumani neriorsor­neqarpugut Jehovap innuttani paarissagai, oqaasiilu minguitsuummata taamaaliornissaa qularin­ngilarput.

Versi 8-mi ‘Jehovap paarisai’ eqqaaneqartut tassaapput inuit, tassa inunnit ajortunit ajoquser­neqarsimasut.

Taava sooq Biibilimik nutsikkat ilaanni ima allassimava: “Paariumaarpatit”? Tamanna Allakkat Illernartut hebræerisut allassimaq­qaarfiit assilillugit allaqqitanut tutsuiginartunut naapertuuk­kaluarpoq. Grækerisulli nutsikkami Septuagintami oqaatsit uku atorneqarput: “Paaraatsigut” aamma “sernigaluta”. Tassa inuit aalajaatsut ikiortariallit erloqinar­torsiortullu pineqarsimassapput. Taakku “eqqarleriinnut ukununnga”, tassa inunnut ajortunut, sernigineqassapput. (Tuss 12:7, 8) Allakkani Illernartuni hebræerisuuni aramæerisuun­ngortitani versi tamanna ima nutserneqarpoq: “Illit, NAALAGAQ, naapertuil­luartut paarissavatit, eqqarleriinnut ajortunut ukununnga naassaan­ngitsumik sernigis­savatit.” Nutsikkanit taakkunannga uppernarsar­neqarpoq Tussiaat 12:8-mi eqqaaneqartut tassaan­ngitsut Guutip oqaasii.

Taamaattumik versimi tamatumani inunnut aalajaatsunut neriuutis­saqarpoq – Guuti ilumut akuliuk­kumaarpoq!