Pilimanianngitsumik inuuneqarneq pilluarnartuuvoq
DANIEL MIRIAMILU 2000-mi septembarimi katipput, Barcelonamilu Spaniamiittumi atugarissaartuupput. Daniel ima oqaluttuarpoq: “Suliffigissaaratta akisuunut neriniartarfiliarsinnaasarpugut, nunanullu allanut aallarsinnaasarluta pitsaasunillu atisarsisinnaasarluta. Aamma oqaluusseqataasarpugut.” Taava pisoqarpoq.
2006-imi ataatsimeersuarnermi oqalugiaammi apeqqut una Danielip killitsissutigaa: “Inuit ‘toqutaaffissaminnut ingerlasut’ aqqummut naassaanngitsumik inuussutaasumut saaqqullugit sapinngisatsinnik iliuuseqartarpugut?” (Uss 24:11) Oqalugiaammi nassuiarneqarpoq inuit aniguisinnaassappata Biibilip oqariartuutaanik oqaluussissutiginninnissaq akisussaaffigigipput. (ApS 20:26, 27) Daniel oqaluttuarpoq: “Misigivunga Jehova uannut oqaluttoq.” Aamma oqalugiaammi eqqaaneqarpoq Jehovamut kiffartornermi iliuuseqarnerugaangatta nuannaarnerusartugut. Danielip tamanna ilumoortoq nalunngilaa Miriam pilluarluni pioneriummat.
Daniel oqalugiaammit attortingaarami aalajangerpoq inuunerminik allannguiniarluni. Sulinikinnerulerpoq pionerinngorlunilu, oqaluussisartunillu pisariaqartitsiffiusumi kiffartulissagaluarunik qanoq pilluarnartiginissaa eqqarsaatigisalerpaa.
UNAMMINIARNARIARLUNI NUANNERSIVOQ
2007-imi maajimi Daniel Miriamilu suliffimminnit soraarput Panamamullu tikeraarfiginikuusaminnut nuullutik. Qeqertat Bocas del Toro Caribeap imartaaniittut oqaluussiffigisalerpaat. Inuit tassaniittut amerlanersaat Ngabemik taaguuteqarput. Daniel Miriamilu pilersaarput qaammatit arfineq-pingasut aningaasaataarunnissamik tungaanut Panamamiinniarlutik.
Umiatsiat sikkilillu angallatigaavut. Kiassuup ataani 30 kilometerinik isorartutigisumik qummukajaakkut sikkilerlutik angalaaqqaarnertik suli eqqaamavaat. Daniel qasungaarami ilisimajunnaangajappoq. Ngabeusut assut inoroorsaartuupput, pingaartumik oqaasiinik ilikkagaqalaarsimatilluni. Sivitsunngitsoq 23-nik atuaqqissaaqateqartalerput.
Aningaasaataarukkamik qanoq iliorpat? Daniel ima oqarpoq: “Spaniamut uternissarput eqqarsaatigileratsigu qullilivugut. Biibilimik atuaqqissaaqatigisartakkavut ungageqaavut.” Qaammalli ataaseq qaangiummat tusarluarpugut. Miriam ima oqarpoq: “Specialpionerinngortinneqarpugut. Qimassannginnatsigit nuannaaqaagut!”
PILLUAATIGINERPAASAAT
Peqatigiiffimmi allannguisoqarmat 2015-imi specialpioneriujunnaartariaqalerput. Qanoq pippat? Tussiaat 37:5-imi neriorsuut una isumalluaatigaat: “Aqqutigisassatit Naalakkamut isumagitikkit, tatigiuk, taava akuliukkumaarpoq.” Pioneriusinnaaniassagamik suliffittaarput, maannakkullu ilagiit ilaanni Veraguasimi Panamamiittumi kiffartorput.
Daniel ima oqarpoq: “Spaniamiitilluta isumaqanngikkaluarpugut pilimanianngitsumik inuusinnaalluta. Maannalu taama inuuvugut pingaaruteqavittunillu amigaateqarata.” Suna pilluaatiginerpaavaat? Ima oqarput: “Jehova pillugu maniguuttunik ilinniartitsineq pilluarnartuuvoq nalissaqanngitsoq!”