Inuusuttuususi – Aalajaallusi Diaavulu akiorsiuk
“Guutip sakkutuussutai tamarmiusut atiniarsigit atasinnaaqqullusi Diaavulup qoqassiniaraangasi.” – EF 6:11.
1, 2. (a) Sooq kristumiut inuusuttut Saatanimut anersaapilunnullu sorsunnermi ajugaasinnaappat? (Allaaserisap aallaqqaataani assiliaq takuuk). (b) Suut eqqartussavavut?
PAULUSIP kristumiut sakkutuunut assersuuppai. Sorsuppugut, akeqqavullu piviusuupput! Inunnulli sorsunngilagut, Saatani anersaapiluillu akiorpavut. Ukiuni tuusintilinni sorsuttartuugamik assut pikkorissuupput. Taamaattumik, pingaartumik inuusuttuugutta, sorsunnermi ajugaasinnaanngitsutut misigisinnaavugut. Inuusuttut akeqqanut taama pissaaneqartigisunut ajugaasinnaappat? Aap, ajugaasinnaapput, aamma ajugaassapput! Sooq? Jehovamit pissatsitaasaramik. Aamma sorsuttartut sungiusarluarsimasut assigalugit sorsunnermut piariareersarnermi ‘Guutip sakkutuussutai tamarmiusut ativaat’. – Efesosimiut 6:10-12 atuakkit.
2 Paulusip taama assersuusiorami Romamiut sakkutuuisa atisaat eqqarsaatigisimasinnaavai. (ApS 28:16, 17) Allaaserisami matumani assersuusiaq torrallataq taanna misissussavarput. Aamma inuusuttut ilaasa sakkutuussutit tamarmiusut atornerisa sapernartortai iluaqutissartaalu pillugit qanoq oqartut eqqartussavarput.
‘SALLUSUISSUTIP QITERUTAA’
3, 4. Biibilimi sallusuissutit Romamiut sakkutuuisa qiterutaannut qanoq assingussuteqarpat?
3 Efesosimiut 6:14 atuaruk. Romamiut sakkutuuisa qiterutaat saviminertaqarput qitermut illersuutaallutillu saattuaasamik oqimaatsumik nikitsaaliuisartunik. Aamma qiterutit ilaat panamut savimmullu kapuummut ninngusuunik pooqartarpoq. Sakkutooq qiterutini sukalluarsimagaangamiuk imminut tatigaluni sorsugiarsinnaasarpoq.
Guutip oqaasiani sallusuissutit ilikkakkavut ajoqersuutinut eqqunngitsunut illersuutigisarpavut
4 Taamatuttaaq Guutip oqaasiani sallusuissutit ilikkakkavut ajoqersuutinut eqqunngitsunut illersuutigisinnaavavut. (Joh 8:31, 32) Guutip oqaasiani sallusuissutit nuannarinerulerutsigit Guutip najoqqutassiaasa maleruarnissaat, imaluunniit ‘saattuaasap’ atornissaa, ajornannginnerulissaaq. (Tuss 111:7, 8; 1 Joh 5:3) Aamma sallusuissutit paasilluarsimagutsigit akeqqatsinnut illersorluarnerusinnaassavavut. – 1 Petr 3:15.
5. Sooq ilumoortumik tamatigut oqaluttariaqarpugut?
5 Guutip oqaasiani sallusuissutit pingaartikkatsigit Biibilimi allassimasut maleruartarlugillu tamatigut ilumoortumik oqaluttarpugut. Salluneq Saatanip sakkuisa sunniuteqarnerpaat ilagaat. Salluliornerit salluliortumut taakkuninngalu upperinnittumut ajoqutaasarput. (Joh 8:44) Naammalluinnanngitsuugaluarluta sapinngisatsinnik sallunaveersaartarpugut. (Ef 4:25) Tamanna sapernarsinnaavoq. Abigail, 18-inik ukiulik, ima oqarpoq: “Ilumoortumik oqalunneq ilaannikkut, pingaartumik ajornartorsiut sallunikkut qaangerneqarsinnaagaangat, imminut akilerpasissinnaaneq ajorpoq.” Sooq tamatigut ilumoortumik oqalunniartarpa? Ima nangippoq: “Ilumoortumik oqalukkaangama Jehovamut ilerasuutissaqarneq ajorpunga. Aamma angajoqqaama ikinngutimalu tatigisinnaasarpaannga.” Victoria, 23-nik ukiulik, ima oqarpoq: “Ilumoortumik oqalukkuit upperisallu illersorukku immaqa qinngasaarneqassaatit. Tamannali nalissaqanngitsumik iluaqutissartaqartarpoq: Imminut tatigilissaatit, Jehovamut qaninnerusutut misigissaatit asannitsivillu ataqqinerulissavaatsit.” Takusinnaaviuk sooq ‘sallusuissutip qiterutaata’ tamatigut atornissaa pingaaruteqartoq?
‘ILUARNERUP SAATTUAASAA’
6, 7. Sooq iluarneq saattuaasamut assersuunneqarpa?
6 Romamiut sakkutuuata saattuaasaa saviminernik sanimukartunik sakissamut naammattunngorlugu sukanneqartartunik sananeqartarpoq. Savimerngit
taakku saviminernik naatiffilinnik amernik sukateruteqartarput. Tuii aamma saviminernik sanimukartunik amernik sukaterutilinnik qallersimasarput. Saattuaasaq aalanissamut ajoqutaasinnaallunilu savimerngit iluamik inissisimanersut misissukulaarneqartariaqartarput. Saattuaasalli uummat erlaviillu panap kiinaanut qarsullu inngianut illersortarpai!Uummatitta illersornissaanut ilisimassuserput amigarpoq
7 Jehovap najoqqutassiai iluartut, imaluunniit naapertuilluartut – ‘uummatitsinnik’, tassa ilukkut kinaassutsitsinnik – illersuisartut saattuaasamut assersuunneqarsinnaapput. (Uss 4:23) Sakkutuup saattuaasani savimineq arlaannik ninnguinnerusumik taarsernavianngilaa. Taamatuttaaq Jehovap suut eqqortuunerannut najoqqutassiai uagut eqqortuusorisatsinnik taarsernavianngilagut. Uummatitta illersornissaanut ilisimassuserput amigarpoq. (Uss 3:5, 6) Taamaattumik uummaterput ‘saattuaasamit’ illersorneqarnersoq misissukulasariaqarparput.
8. Sooq Jehovap najoqqutassiai maleruartariaqarpavut?
8 Ilaannikkut misigisarpit Jehovap najoqqutassiai pissutigalugit kiffaanngissusiiagaallutit imaluunniit kissaatigisattut iliorsinnaanak? Daniel, 21-nik ukiulik, ima oqarpoq: “Biibilimi najoqqutassiat malikkakkit ilinniartitsisut ilinniartoqatimalu illaruaatigisarpaannga. Piffissap ilaani imminut tatigiunnaarlunga isumatsaqqalerpunga.” Maannali qanoq misigiva? Ima nangippoq: “Naggataatigut Jehovap najoqqutassiaanik maleruaanerup iluaqutissartai takuakka. ‘Ikinngutima’ ilaat ikiaroortalerput, allat ilinniarunnaarput. Qanoq inuuneqalersut takullugu alianarpoq. Jehovap ilumut illersortarpaatigut.” Madison, 15-inik ukiulik, ima oqarpoq: “Jehovap najoqqutassiaanik maleruaanissaq atuaqatimalu torrassorisaattut nuannarisaattullu iliunnginnissaq sapernartippara.” Qanoq iliorpa? “Imminut eqqaasippunga Jehovap aqqanik ateqaateqarninnik ussernartullu tassaaginnartut Saatanip uannik eqqaassineri. Akiuunnermi ajugaagaangama tulluusimaartarpunga.”
‘PITSERIASSUTSIP KAMIPPAI’
9-11. (a) Kristumiut qanoq ittunik assersuutaasunik kamippaqarpat? (b) Oqaluussinermi toqqissisimanerunissamut suna iluaqutigisinnaavarput?
9 Efesosimiut 6:15 atuaruk. Sakkutooq Romamioq kamillaangalluni sorsugiarsinnaanngilaq. Kamippaat amernik pingasunik qallersimasarmata ninngusuujupput. Aamma atoruminartuullutillu quaannaveersaartitsisarput.
10 Sakkutuut Romamiut kamippaat sorsunnermi ajugaanissamut iluaqutigisaraat uagut kamippaat assersuutaasut ‘eqqissinerup iivangkiiliuanik ingerlassinissamut’ iluaqutigisarpavut. (Es 52:7; Rom 10:15) Oqaluussiumallutali ilaannikkut sapiilluinnartariaqartarpugut. Bo, 20-nik ukiulik, ima oqarpoq: “Atuaqatinnut nalunaajaanissaq annilaanngatigisarpara. Immaqa kanngusukkama. Pisut eqqarsaatigigaangakkit nalunngilara sooq taamaattussaanngikkaluarlunga. Maanna ukioqatinnut nalunaajaanissaq nuannaraara.”
11 Kristumiut inuusuttut amerlasuut misigisarput piareersarsimatillutik oqaluussigaangamik toqqissisimanerusarlutik. Qanoq piareersarsinnaavit? Julia, 16-inik ukiulik, ima oqarpoq: “Biibililersaarutit atuagaasivinniitittarpakka, aamma atuaqatima isumaat upperisaallu tusarnaartarpakka. Taamaalillunga eqqarsaatigisinnaavara suut iluaqutigissaneraat. Piareersarsimagaangama sorpiaat iluaqutigisinnaaneraat eqqartorsinnaavakka.” Makenzie, 23-nik ukiulik, ima oqarpoq: “Inussiarnersuuguit tusarnaarluartaruillu peqatitit sunik unamminiagaqartut paasisinnaalissavat. Atuagassat inuusuttunoortut tamaasa atuarniartarpakka. Taamaalillunga peqatikka Biibilimi imaluunniit jw.org-imi iluaqutissaannut innersuussiffigisinnaavakka.” Oqaluussinissamut piareersarluarsimaneq naammagisanik ‘kamippaqarnerup’ assigaa.
“UPPERNERUP EQQORTINNAVEEQQUTAA”
12, 13. Saatanip “qarsui ikumasut” ilaat suuppat?
12 Efesosimiut 6:16 atuaruk. Sakkutooq Romamioq takisuumik eqqortinnaveeqquteqartarpoq. Tuiinit seeqquinut assiaqutaasarpoq pananullu qalugiusanullu qarsunullu illersuutaasarluni.
13 Saatanip ‘qarsut ikumasut’ qanoq ittut atorlugit eqqoriarsinnaavaatit? Immaqa Jehova pillugu salluliuutit atorlugit saassuttarpaatit. Saatanip Jehovamit asaneqanngitsutut allanillu soqutigineqanngitsutut misigitikkusuppaatit. Ida, 19-inik ukiulik, ima oqarpoq: “Misigisarpunga Jehovap ungasikkaanga ikinngutigerusunngikkaangalu.” Taamatut misigigaangami qanoq iliortarpa? “Ataatsimiinnerit uppernikkut assut nakussatsissutigisarpakka. Isumaqartarama qanoq oqaasissaqartunga soqutigineqanngitsoq akinngisaannarpunga. Maannali ataatsimiinnernut piareersartarpunga marloriarlungalu pingasoriarlungaluunniit akiniartarlunga. Sapernarpoq, kisianni akigaangama nuannaarnerulertarpunga. Qatanngutit aamma qiimmassaasarput. Angerlaraangama naluneq ajorpara Jehovap asagaanga.”
14. Idap misigisaanit suna paasivarput?
14 Sakkutuup eqqortinnaveeqqutaata angissusia allanngorneq ajorpoq. Idalli misigisaanit paasivarput uppernerput taamaanngitsoq. Uppernerput allisinnaavoq qumarsinnaallunilu, nakussatsissinnaavoq sanngiillisinnaallunilu. Uagut apeqqutaaginnarpugut. (Matt 14:31; 2 Th 1:3) “Uppernerup eqqortinnaveeqqutaa” illersuutigissagutsigu anginerulersittariaqarlugulu mattunerulersittariaqarparput!
‘NIAQORORNAVEEQQUT ANNASSUT’
15, 16. Neriuuterput niaqorornaveeqqutitut qanoq ippa?
15 Efesosimiut 6:17 atuaruk. Sakkutooq Romamioq niaqquminut, qungatsiminut kiinnaminullu illersuutigisaminik niaqorornaveeqquteqartarpoq. Niaqorornaveeqqutit ilaat sakkutuumit paarineqartarsinnaaniassammata tigummiveqartarput.
16 Niaqorornaveeqqutip sakkutuup qarasaanut illersuutaasarneratut ‘annaanneqarnissamik neriuutitta’ eqqarsartaaserput illersortarpaa. (1 Th 5:8; Uss 3:21) Neriuut Guutip neriorsuutaasa eqqarsaatigiuarnissaannut ajornartorsiornitsinnilu nikallunnginnissamut iluaqutigisarparput. (Tuss 27:1, 14; ApS 24:15) Neriuuterpulli illersuutigissagutsigu piviusutut isigisariaqarparput. Niaqorornaveeqqut tigumminagu atortariaqarparput!
17, 18. (a) Niaqorornaveeqquterput peerniassagatsigu Saatani susarpa? (b) Saatanimit salloqittarneqarsimannginnerput qanoq ersersissinnaavarput?
17 Niaqorornaveeqquterput peerniassagatsigu Saatani susarpa? Jiisusimut qanoq ilioriaraluartoq eqqarsaatigiuk. Saatanip nalunngilaa Jiisusi inuiannut naalakkersuisunngortussaasoq. Jiisusili naalliulluni toqoqqaartariaqarpoq. Aamma kunnginngornissaminut Jehovap piffissarititaa utaqqeqqaartariaqarpaa. Taamaattumik Saatanip naalakkersuisunngujaarnissamik neqeroorfigaa. Neriorsorpaa Jiisusip ataasiaannarluni pallorfigippani ingerlaannaq Luk 4:5-7) Saatanip aamma nalunngilaa Jehovap silarsuarmi nutaami nuannersunik neriorsoraatigut. Neriorsuutilli tamatuma eqquunnissaa utaqqeqqaartariaqarparput utaqqinitsinnilu ajornartorsiuterpassuaqarsinnaalluta. Taamaattumik Saatanip maanna ilorrisimaarnartumik inuuneqarnissamik neqeroorfigisarpaatigut. Kissaatigaa Guutip naalagaaffia tunulliullugu ilorrisimaarnissarput salliutissagipput. – Matt 6:31-33.
silarsuarmut naalakkersuisunngortissallugu. (18 Kristumiut inuusuttut amerlasuut Saatanimit salloqittarneqarsimanngillat. Assersuutigalugu Kiana, 20-nik ukiulik, ima oqarpoq: “Nalunngilara Guutip naalagaaffiata kisimi ajornartorsiutivut tamaasa aaqqissinnaagai.” Neriuutaa eqqarsartaasianut inooriaasianullu qanoq sunniuteqarpa? Silarsuarmi matumani pissutsit atuukkunnaarnissaasa eqqaamanissaanut iluaqutigaa. Kianap piffissani nukinilu tamaasa silarsuarmi matumani atorfigissaarnissamut atornagit Jehovamut kiffartornermut atorpai.
‘ANERSAAP PANAA, GUUTIP OQAASIA’
19, 20. Guutip oqaasianik qanoq atuillaqqinnerulersinnaavugut?
19 Romamiut sakkutuui panat 50 centimeterit missaanni takitigisut atortarpaat. Sakkutuut ullut tamaasa sungiusartaramik panamik atuillaqqissuusarput.
20 Guutip oqaasia panamut Jehovamit pisatsinnut apustilip Paulusip assersuuppaa. Upperisattali illersornissaanut eqqarsartaatsittaluunniit allanngortinnissaanut atorluarnissaa ilinniartariaqarparput. (2 Kor 10:4, 5; 2 Tim 2:15) Illit qanoq panamik atuillaqqinnerulersinnaavit? Sebastian, 21-nik ukiulik, ima oqarpoq: “Biibilimik atuarninni kapitalini tamani versi ataaseq allattarpara. Versit nuannarinerpaasakka katersorpakka.” Tamanna Jehovap eqqarsartaasianik paasinnilluarnerunissamut iluaqutigisarpaa. Daniel ima nangippoq: “Biibilimik atuarninni versit oqaluussinermi naapitama iluaqutigisinnaasaat toqqartarpakka. Paasivara inuit Biibilimik nuannarinninnerit sapinngisannillu taakkuninnga ikiuiniarnerit takugaangamikku ajunngitsumik qisuariartartut.”
21. Sooq Saatani anersaapiluillu ersigisariaqanngilavut?
21 Allaaserisami matumani inuusuttut misigisaannit paasisatsitut Saatani anersaapiluillu ersigisariaqanngilavut. Pissaaneqarput, Jehovamilli pissaaneqarnerunngillat. Aamma naassaanngitsumik piunavianngillat. Parnaarunneqassapput Kristusillu ukiuni 1.000-ni naalakkersuinerani ajoqusiisinnaassanatik, tamatumalu kingorna suujunnaarsitaassapput. (Saqq 20:1-3, 7-10) Akerarput, taassuma pilersaarutai anguniagaalu ilisimavavut. Jehovap ikiuineratigut aalajaalluta akiorsinnaavarput!