ATUAR­TUUL­LUNGA il­loqarfeerar­put pisoqarfiual­laan­ngilaq. Atualerama atuaqatik­ka meeq­qat atuarfian­ni naam­mas­seqatigivak­ka. Il­loqarfim­mi amerlanerit qanoq ateqar­tut nalun­ngilak­ka, taak­kualu nalun­ngilaan­nga.

Liber­ty nunaminer­tanik naatitsivin­nik, majsinik naatitsif­fiunerusar­tunik, avatanger­neqarsimavoq. Inun­ngorama ataatama naasoris­saasoq sul­lit­tar­paa. Inuusut­tuaraal­lunga traktorer­neq naasoris­saanermilu al­lanik suliaqar­neq ilin­niar­para.

Inun­ngorama ataataga inuusut­tuun­ngilaq. 56-inik ukioqar­poq anaanagalu 35-nik ukioqarluni. Ataatagali nukit­tul­lunilu peq­qip­poq. Tamaviaarluni sulineq nuan­naraa, taman­nalu uagutsin­nut ingerlateq­qil­lugu. Akis­sarsiak­kaajun­ngilaq, taamaat­toq angerlarsimaf­feqar­nis­sar­put, atisas­saqar­nis­sar­put naam­mat­tunil­lu nerisas­saqar­nis­sar­put isumagaa. Aam­ma pif­fis­saqarfigisar­paatigut. Ataataga 93-inik ukioqarluni anaanagalu 86-inik ukioqarluni toquvoq. Marluul­lutik Jehovamut kif­far­tun­ngil­lat. Nuk­kamali ilaat 1972-imili aalajaal­luni utoq­qaaner­tatut kif­far­tor­poq.

Anaanaga up­perluar­tuugami sapaatit tamaasa baptistit oqaluf­fian­nut naalagiaqatigisar­paatigut.  Aq­qaneq-marlun­nik ukioqarlunga ataasiul­lunilu pingasuus­suseq pil­lugu ajoqersuut tusaq­qaarak­ku anaanaga aperaara: “Qanoq ilil­luni Jiisusi Er­niusin­naagami Ataataajutigaluni?” Eq­qaamavara akigaanga: “Er­ni, taman­na paasis­saan­ngilaq. Aam­ma paasisus­saan­ngilar­put.” Aap, paasin­ngil­luin­nar­para. 14-il­li mis­saan­ni ukioqarlunga kuum­mi kuisip­punga. Ataasiul­lunilu pingasuus­suseq pis­sutigalugu pingasoriarlunga morsutsip­paan­nga!

Atuar­tuul­lunga ikin­ngutima til­luut­tar­tup til­luut­tar­nermik misiliinis­samut akuersitip­paanga. Sungiusar­taler­punga til­luut­tar­tul­lu peqatigiif­fian­nut Golden Gloves-imut ilaasor­tan­ngorlunga. Pik­korip­pal­laan­ngin­nama unam­minerit amerlan­ngitsut misilereerlugit unip­punga. Kingusin­nerusuk­kut sak­kutuun­ngoq­quneqar­punga Tysklandimul­lu aal­lar­tin­neqarlunga. Tamatuma nalaani naalak­kat siulersuisus­satut piuk­kuk­kamin­nga sak­kutuut ilin­niarfian­nut pisip­paan­nga. Sak­kutuut silarsuaan­ni ingerlal­luar­nis­sara kis­saatigaat. Sak­kutuujujuar­nis­sarali kis­saatigin­ngin­nak­ku ukiuni marlun­ni sak­kutuujusus­saanera naam­mat 1956-imi sak­kutuujujun­naar­punga. Sivitsun­ngitsoq sak­kutuunut al­laanerul­luin­nar­tunut ilan­ngup­punga.

Sal­lusuis­sut nalugal­larak­ku angutivik qanoq it­tuus­sanersoq kuk­kusumik isigin­nit­taaseqarfigaara. Filminit ilagisar­tak­kan­nil­lu sun­ner­neqar­punga. Angutit Biibili pil­lugu oqalut­tar­tut angutivit­tut isigin­ngilak­ka. Inuunin­nil­li al­lan­nguis­sutigisan­nik ilik­kagaqar­punga. Kusanar­tumik aap­palut­tumik biileqar­punga, ul­lul­lu ilaan­ni il­loqarfik­kut ingerlaar­til­lunga ar­nat inuusut­tut marluk aggeq­qul­lunga aalaterif­figaan­nga. Sunaaf­fa aleqama uiata najai. Ar­nat inuusut­tut taak­ku Jehovamik Nalunaajaasuup­put. Napasuliaq Alapernaarsuiffik-mik aam­ma Iteritsi!-mik tunisar­paan­nga, kisian­ni Napasuliaq Alapernaarsuiffik iluamik paasineq ajor­para. Maan­nali ilagiit atuak­kamik atuaq­qis­saaqatigiin­neran­nut, angerlarsimaf­fim­min­ni Biibilimik atuaq­qis­saaqatigiil­luni eq­qar­tueqatigiil­lunilu ataatsimiin­nermut sivikitsumut, qaaq­quaan­nga. Oqarfigaak­ka eq­qarsaatiginiarlugu. Qungujup­put aperalungalu: “Neriorsor­pitigut?” Akivak­ka: “Neriorsor­pas­si.”

Ugguar­punga taama oqarama, misigigamali neriorsuutiga unioq­qutis­sin­naanagu un­nuk taan­na ataatsimiigiar­punga. Meeq­qat ajasoorutiginer­paavak­ka. Biibilimik taama ilisimasaqar­tiginerat tupin­naqaaq! Anaanaga sapaatit tamaasa naalagiaqatigisaraluarlugu Biibili pil­lugu ilisimasaqar­pian­ngilanga. Maan­na paasisaqar­nerorusuk­kama Biibilimik atuaq­qis­saaqatigineqar­tar­nis­sara akuerivara. Guutip Ajugaqan­ngitsup Jehovamik ateqar­nera paasisama siul­liit ilagaat. Ukior­paaluit sioq­qul­lugu anaanaga Jehovap Nalunaajaasui pil­lugit aperigak­ku akiin­nar­paanga: “Angut utoq­qaq Jehovamik atilik pal­lorfigaat.” Maan­nali misigivunga isik­ka uisitaasut!

Sal­lusuis­sut nas­saarisimal­lugu nalun­ngin­nak­ku siumukaler­tor­punga. 1957-imi marsimi, siul­lermeerlunga ataatsimeeqataanin­nit qaam­matit qulingiluat qaangiutiin­nar­tut, kuisip­punga. Isigin­nit­taasera al­lan­ngor­poq. Angutiviuneq pil­lugu Biibilimi ajoqersuutigineqar­tut paasinerat nuan­naarutigeqaara. Jiisusi angutaavoq naam­mal­luin­nar­toq. Angutinit al­lanit tamanit nukit­tunerul­lunilu pis­saaneqar­neruvoq. Paggin­ner­nul­li ilaaneq ajor­poq. Siulit­tuutigineqar­tutul­li ‘naal­liutsitaavoq’. (Es 53:2, 7) Paasivara Jiisusimut ajoqersugaq ilumoor­toq ‘tamanut inus­siar­nersuus­sasoq’. – 2 Tim 2:24.

 Aap­paaguani, 1958-imi, pionerin­ngor­punga. Sivitsun­ngitsorli pioneritut unik­kal­lar­tariaqar­punga. Sooq? Ar­nap inuusut­tup atuak­kamik atuaq­qis­saaqatigiin­nermut qaaq­qusisup aap­paa, Gloria, nulis­siun­niarlugu aalajangerama! Taman­na peq­qis­simis­sutigin­ngisaan­nar­para. Taamani Gloria erlin­nar­tuuvoq, ul­lumik­kul­lu suli erlin­nar­tuul­luni. Diamandimit erlin­nar­ner­paamit uan­nut erlin­nar­nerum­mat qujangaar­punga katis­simagak­ku! Gloria maan­na oqalut­tualaas­saaq:

“16-inik qatan­nguteqar­punga. Anaanaga Nalunaajaasuuvoq aalajaatsoq. 14-inik ukioqar­tunga toqum­mat ataatama Biibili atuaq­qis­saar­taler­paa. Anaanaaruk­kat­ta ataatama atuarfiup pisor­taa isumaqatigiis­suteqarfigaa. Angajora ukioq taan­na atuarfim­mi naam­mas­sisus­saam­mat ataataga aperivoq ul­loq al­lor­tarlugu paarlakaajaal­luta atuar­tarsin­naanersugut. Taamaalil­luta paarlakaajaal­luta qatan­ngutivut nukarliit paarisarsin­naas­savavut. Aam­ma ataatat­ta soraan­ngin­nerani un­nuk­korsiutit piareersarsin­naas­savavut. Atuarfiup pisor­taa akuersivoq, taamaalior­pugul­lu angajuma atuarfim­mi naam­mas­sinis­saata tungaanut. Ilaqutariit nalunaajaasut marluk atuaq­qis­saaqatigisar­paatigut, qatan­ngutigiil­lu aq­qaniliul­luta Jehovamik Nalunaajaasun­ngor­pugut. As­sut it­tuutugaluarlunga oqaluus­sineq nuan­naraara. Ukiut ingerlaneran­ni it­tuutunerma qaanger­nis­saanut uima, Samip, ikior­paanga.”

1959-imi februaarimi Glorialu katip­pugut. Pioneritut kif­far­toqatigiin­ner­put nuan­naraar­put. Ukiumi tas­sani juulimi Betelimi kif­far­tor­nis­samut qin­nuteqar­pugut. Qul­lersaqarfim­mi as­sut kif­far­torusup­pugut. Qatan­ngutip inus­siar­nersup, Simon Krakerip, oqarfigaatigut taamani aap­pariit Betelimut akuerineqar­neq ajor­tut. Sulili Betelimi kif­far­torusup­pugut, ukior­pas­suil­li utaq­qeq­qaar­tariaqarluta.

Qul­lersaqarfim­mut al­lap­pugut aperalutalu oqaluus­sisar­tunik pisariaqar­titsif­fiunerusumut aal­lar­tin­neqarsin­naanerluta. Ataasiin­narmik periarfis­sip­paatigut: Pine Bluff, Arkansas. Taamani Pine Bluf­fimi ilagiit marluin­naap­put. Aap­paat qaqor­tunik amilin­nik oqaluus­sisar­toqar­put aap­paal­lu qer­ner­tormiunik oqaluus­sisar­toqarlutik. Qer­ner­tormiut ilagiivinut, taamaal­laat 14-inik oqaluus­sisar­tulim­mut, aal­lar­tin­neqar­pugut.

Im­maqa eq­qarsar­putit sooq Jehovap Nalunaajaasuisa oqaluus­sisar­tut qer­ner­tormiut qaqor­tumil­lu amil­lit im­mik­koor­tin­neraat. Taamani al­lamik periarfis­saqan­ngin­nera tamatumun­nga pis­sutaavoq. As­sigiin­ngitsunik nagguil­lit akulerun­nis­saat iner­teq­qutaavoq, aam­ma nakuuserfigineqar­nis­saq aarleq­qutigineqar­poq. As­sigiin­ngitsunik nagguil­lit naapil­lutik pal­lorfigin­nip­pata naalagaaf­filersaarfiup sequtser­neqar­nis­saa sumiif­fin­ni amerlasuuni qatan­ngutit er­num­matigaat. Aam­ma taama pisoqar­tar­poq. Nalunaajaasut qer­ner­tormiut qaqor­tumik amil­lit ineqarfian­ni matumiit matumut oqaluus­sisut tigusarineqar­tar­put unatar­neqarsin­naasarlutil­lu. Taamaat­tumik oqaluus­sinis­samik sulias­saq naam­mas­siumal­lugu inatsisit naalap­pavut neriuutigalugulu pis­sutsit al­lan­ngorumaar­tut.

Oqaluus­siner­put unam­miniar­nar­toqar­poq. Qer­ner­tormiut najugaqarfian­ni oqaluus­sigaangat­ta qaqor­tumik amil­lit matuan­nut kasut­tor­toor­tar­pugut. Aalajangipal­lat­tariaqar­tar­par­put Biibili pil­lugu naatsumik aal­lar­niis­sanerluta imaluun­niit utoq­qatseriarluta matup tul­lianukas­sanerluta. Taamani pis­sutsit taamaap­put.

Pioneriugat­ta soorunami aningaasarsior­tariaqar­pugut. Sulif­fitsin­ni amerlaner­ni ul­lormut 3 dollarinik akiler­neqar­tar­pugut. Gloria il­lulerisar­poq. Il­lumi ataatsimi naam­mas­siaar­nias­sam­mat ikiorsin­naatitaavara. Ilaqutariit ul­loqeq­qanut nerisas­sanik tunisar­paatigut. Nerisas­sat kis­sariaan­naat Glorialu anin­ngin­nitsin­ni nerisar­pavut. Sapaatit-akun­neri tamaasa Gloriap ilaqutariit al­lat manis­saas­sut­tar­pai. Uanga naatsiivian­ni sulisar­punga, igalaanik qil­lersaasar­punga il­lul­lu silataani sulias­sanik al­lanik suliaqar­tarlunga. Aam­ma qaqor­tumik amil­lit angerlarsimaf­fian­ni igalaanik qil­lersaasar­pugut. Gloriap ilorliit qil­lersar­tar­pai uangalu silarliit. Ul­loq naal­lugu qil­lersaasarat­ta ul­loqeq­qanut nerisit­tar­paatigut. Gloria il­lup iluani ilaqutariit ilaginagit nerisin­naatitaavoq. Uanga silataani biilinut iniliami nerisar­punga, kisian­ni nerisas­sat mamar­taqim­mata taman­na ajorin­ngilara. Ilaqutariit inus­siar­nersuup­put, kisian­ni ilagisar­tak­kamin­nit sun­ner­tis­simap­put. Eq­qaamavara taamaal­luta  orsersor­tarfim­mi biili orsereerlugu sulisoq aperigak­ku Gloriap perusuersar­tarfik atorsin­naaneraa qis­simeriarlunga kamal­luni oqarfigigaanga: “Par­naaq­qavoq.”

Qatan­ngutivul­li nuan­nisaqatigisar­pavut, aam­ma oqaluus­siner­put as­sut nuan­narivar­put! Pine Bluf­fimut tikeq­qaarat­ta qatan­ngut angut taamani ilagiin­ni kif­far­tor­tuusoq ineqatigaar­put. Nulia al­lamik up­perisalik Gloriap Biibilimik atuaq­qis­saaqatigisaler­paa. Uanga aap­pariit paniat ningaaval­lu atuaq­qis­saaqatigisaler­pak­ka. Panigiit Jehova kif­far­torfiginiarlugu aalajangeramik kuisip­put.

Qaqor­tumik amil­lit ilagiivini nuan­narisatsin­nik ikin­nguteqar­pugut. Neriar­toq­qusar­paatigut, kisian­ni peqatigiin­ner­put al­lanit takuneqaqinam­mat taarsereeraangat or­nit­tar­pavut. Taamani Ku Klux Klan, peqatigiif­fik al­lamik nagguilin­nik uumis­suinermik nakuuser­nermil­lu siuarsaasoq, amerlasuunik ilaasor­taqar­poq. Eq­qaamavara hal­loweenimi un­nuk­kut angut Ku Klux Klanimut ilaasor­tat atisaat tul­luusimaarluni atorlugit aneersuar­tarfim­mini is­siasoq takul­lugu. Misigisal­li ajor­tut qatan­ngutit asan­nit­tulior­nis­samut unis­sutigin­ngilaat. Aasat ilaan­ni ataatsimeersuariar­nis­samut aningaasanik pisariaqar­titsigat­ta qatan­ngutip angutip biiler­put pisiarivaa. Qaam­mat ataaseq qaangiut­toq kias­suup ataani matumiit matumut oqaluus­sereerluta amerlasuunil­lu Biibilimik atuaq­qis­saaqateqareerluta as­sut qasuvugut. Angerlarat­talu tupaal­lap­pugut. Biiler­put il­lut­ta silataani unin­ngavoq! Saavani igalaami pap­piaraqar­poq ima al­las­simasulim­mik: “Biilersi uan­nit tunis­sutitut piniarsiuk. Qatan­ngutersi.”

Al­lap asan­nit­tulior­nera aam­ma kil­lin­neqaatigeqaara. 1962-imi South Lansingimi, New Yorkimiittumi, Naalagaaf­fim­mut Kif­far­tor­nermik Ilin­niarfim­mi najuun­nis­samut qaaq­qusaavunga. Ilagiin­nik, ilageeqatigiin­nik ilageeqatigiin­nil­lu arlalin­nik nak­kutil­liisut qaam­mam­mi ataatsimi ilin­niar­tin­neqar­tus­saap­put. Taamani sulif­feqan­ngilanga aningaasaateqar­piar­natalu. Pine Bluf­fimi telefoniliorfim­mi sulif­fis­sarsior­punga. Atorfinitsip­pan­nga sulif­feqarfim­mi tas­sani qer­ner­tormiuni siul­ler­paas­saanga. Naggataatigut oqarfigaan­nga atorfinitsik­kusul­lunga. Qanoq ilius­saanga? New Yorkimut angalanis­samut akis­saqan­ngilanga. Eq­qarsar­punga neqeroorutaat akueriniarlugu ilin­niarfim­mil­lu qaaq­qusis­sut itigar­tin­niarlugu. Betelimut al­lan­nis­samut piareersarlunga puiun­ngisaan­nagas­san­nik pisoqar­poq.

Ilagiin­ni qatan­ngutip ar­nap al­lamik up­perisalim­mik uil­lip ul­laat ilaan­ni kasut­torfigaatigut al­lak­kal­lu-puuanik tunil­lunga. Aningaasanik ulik­kaar­poq. Sunaaf­fa qitor­nani arlal­lit ilagalugit ul­laak­kut itiaariarluni an­noraas­sias­sanik naatitsisarfim­mi naasupilun­nik piiaasarsimasoq. New Yorkimukar­nis­samut akis­saqar­nias­sagama taamatut katersisimap­put. Ima oqar­poq: “Ilin­niarfim­mukarit sapin­ngisal­lu tamaat ilik­kagaqarlutit, taava utis­saatit ilin­niar­til­lutalu!” Kingusin­nerusuk­kut telefoniliorfik aperaara aal­lar­tin­nis­sara sapaatit-akun­nerinik tal­limanik kinguar­tis­sin­naanerlugu. Itigar­tip­paan­nga. Kisian­ni soqutaan­ngilaq aalajangereerama. Nuan­naarutigeqaara tas­sani sulilin­ngin­nama!

 Pine Bluffimiin­ner­put Gloriap ima eq­qaamavaa: “Inuit oqaluus­sif­figisar­tak­kavut nuan­nareqaak­ka! 15-t 20-l­lu mis­saan­niit­tut atuaq­qis­saaqatigisar­pak­ka. Ul­laap tungaani matumiit matumut oqaluus­sisar­pugut ul­lul­lu sin­nera, ilaan­nik­kut un­nuk­kut aq­qar­nup tungaanut, Biibilimik atuaq­qis­saaqateqar­tarluta. Oqaluus­siner­put nuan­ner­tar­nermut il­loqarfik qimal­lugu angalal­luni kif­far­tor­nermi aal­lar­tik­kusup­pal­laan­ngik­kaluar­punga. Jehovali al­lanik pilersaaruteqar­poq.” Taan­naqa oqar­poq.

Pine Bluffimi pioneriul­luta specialpionerin­ngor­nis­samut qin­nuteqar­pugut. Akuerineqar­nis­sar­put naatsorsuutigil­luin­nar­par­put. Sooq? Nalun­ngin­natsigu ilageeqatigiin­nik arlalin­nik nak­kutil­liisup Texasimi ilagiin­nik specialpioneritut ikiuutis­sasugut kis­saatigigaa. Taman­na nuan­nerunar­tip­par­put. Taamaat­tumik akineqar­nis­sar­put utaq­qiler­par­put utaq­qiler­par­put, kisian­ni al­lak­kanut is­soraavip­put imaqan­ngilaq. Kiisami al­lagarsivugut. 1965-imi januaarimi nak­kutil­liisutut angalasar­tutut sulias­sin­neqar­pugut! Taamani qatan­ngut Leon Weaver, maan­na USA-mi Im­mik­koor­tor­taqarfiup Ataatsimiititaliaani ataqatigiis­saarisuusoq, aam­ma ilagiin­nik nak­kutil­liisutut kif­far­tor­tun­ngor­tin­neqar­poq.

Ilagiin­nik nak­kutil­liisun­ngor­nis­sara merseraara. Ukiup ataatsip mis­saa sioq­qul­lugu ilageeqatigiin­nik arlalin­nik nak­kutil­liisup, James A. Thompsonip, pigin­naanik­ka misis­sor­pai. Inus­siar­nersumik nas­suiaap­paanga sutigut pitsan­ngorsaasin­naasunga ilagiin­nil­lu nak­kutil­liisup pis­suserisas­sai pitsaasut aalajangersimasut eq­qaal­lugit. Tamatuma kingunin­ngua ilagiin­nik nak­kutil­liisun­ngorama paasivara siun­nersuutai qanoq pisariaqar­titsigalugit. Nak­kutil­liisun­ngor­nerma kingor­na ilageeqatigiin­nik arlalin­nik nak­kutil­liisuni qatan­ngut Thompson siul­ler­paatut kif­far­toqatigiler­para. Qatan­ngut aalajaatsoq taan­na ilin­niarfigingaar­para.

Taamanik­kut ilagiin­nik nak­kutil­liisut ilin­niar­tin­neqar­pal­laar­neq ajor­put. Sapaatip-akun­nerani ataatsimi ilagiin­nik nak­kutil­liisoq malin­naavigaara. Taava sapaatip-akun­nerani ataatsimi ilagiin­nut tikeraar­nin­ni malin­naavigaanga. Siun­nersuivoq ilitsersuil­lunilu. Taava kisimiil­luta ingerlaq­qip­pugut. Eq­qaamavara Gloriamut oqarlunga: “Mas­sak­kut aal­las­san­ngik­kaluarami.” Pif­fis­sap ingerlanerani pingaarutilim­mik paasisaqar­punga. Qatan­nguteqar­tuaan­nar­poq pik­koris­sunik ilin­nik ikiuisin­naasunik, kisian­ni illit ikioq­qusariaqar­putit. Qatan­ngutinit misilit­tagaqarluar­tunit J. R. Brownimit, taamani nak­kutil­liisumit angalasar­tumit, aam­ma Fred Ruskimit, Betelimi kif­far­tor­tumit, ikior­neqar­nera suli qujamasuutigaara.

Taamanik­kut al­lamik nagguilin­nik uumis­suineq nalingin­naavoq. Ku Klux Klan taamaal­lutik Ten­nes­seemi il­loqarfim­mi tikeraak­katsin­ni ingerlaar­put. Pif­fis­sami al­lami eq­qaamavara oqaluus­sinitsin­ni  neriniar­tarfim­mi unil­latsiarluta perusuersar­tarfim­mut iserama angutip al­lamik nagguilin­nik uumis­suisutut kakior­tis­simasup kamap­paseqaluni malik­kaanga. Qatan­ngul­li angut qaqor­tumik amilik, uatsin­nit anginerujus­suaq, iser­poq. “Qatan­ngut Herd, ajun­ngilatit?” qatan­ngut aperivoq. Angut perusuersar­tarfik atoq­qaar­nagu anipal­lap­poq. Ukiut ingerlaneran­ni takuara al­lamik nagguilin­nik uumis­suineq inuup amianik aal­laaveqar­nani ajortimik tamatsin­niit­tumik aal­laaveqar­toq. Aam­ma paasivara am­mip qalipaataa apeq­qutaatin­nagu qatan­ngut qatan­ngutaasoq aam­ma pisariaqalis­sap­pat il­lit pil­lutit toqorusus­sasoq.

Ukiuni aq­qaneq-marlun­ni ilagiin­nik ukiunilu 21-ni ilageeqatigiin­nik arlalin­nik nak­kutil­liisutut angalasar­pugut. Ukiut taak­kua nuan­nersuup­put pil­luaq­qus­sutaasut qiim­maal­lan­nar­tunik misigisaqarfiusut. Kisian­ni aam­ma al­latigut akis­sarsisin­neqar­pugut. 1997-imi aggustimi ukior­pas­suar­ni angorusutar­put anguar­put. Qin­nuteqaq­qaar­nitsin­nit ukiut 38-t qaangiut­tut USA-mi Betelimi kif­far­tor­nis­samut qaaq­quneqar­pugut. Qaam­mat qaangium­mat Betelimi kif­far­tuler­pugut. Isumaqarlunga Betelimi qatan­ngutit akisus­saasut sivikitsuin­narmik ikioq­qus­sasut, sunaaf­fali taamaan­ngitsoq.

Siul­ler­tut Kif­far­tor­nermik Nak­kutil­liisoqarfim­mi sulias­sin­neqar­punga. As­sut ilin­niarfiungaar­poq! Qatan­ngutit angutit tas­saniit­tut nuna tamak­kerlugu utoq­qaaner­taqatigiin­nit ilagiin­nil­lu nak­kutil­liisunit apeq­quter­pas­suit akiuminaatsut inun­nul­lu ataasiak­kaanut tun­ngasut akisar­paat. Qatan­ngutit angutit erinitsajuil­lutik ikiuinerat qujamasuutigaara. Tas­sani kif­far­toq­qilis­sagaluaruma qatan­ngutinit angutinit taak­kunan­nga suli ilik­kagas­sar­pas­suaqas­sagaluar­punga.

Glorialu Betelimi inuuner­put nuan­nareqaar­put. Ul­laak­kut itiaar­tuaan­nar­pugut, taman­nalu Betelimi iluaqutigaar­put. Ukiup ataatsip mis­saa qaangiut­toq Jehovap Nalunaajaasuisa Siulersuisoqatigiivisa Kif­far­tor­nermut Ataatsimiititaliaan­ni ikior­titut kif­far­tuler­punga. Taava 1999-imi Siulersuisoqatigiin­nut ilaasor­tan­ngor­tin­neqar­punga. Sulias­sami tas­sani ilik­kagaqaqaanga. Pingaar­ner­tul­li ilik­kar­para Jiisusi Kristusi, inuun­ngitsoq, kristumiut ilagiivinut niaquusoq.

Inuunera eq­qarsaatigigaangak­ku ilaan­nik­kut pruf­fiititut Amositut misigisar­punga. Jehovap savanik paarsisoq maniguut­toq figeninik, inuit piitsut nerisar­tagaan­nik, putoorisar­toq maluginiar­paa. Guutil­li Amosi pruf­fiitin­ngor­tip­paa sulineranilu amerlasuunik pil­luaq­qul­lugu. (Am 7:14, 15) Taamatut­taaq Jehovap Liber­tymi nunaan­narmi sulisar­tunit piitsuneersuusunga maluginiar­paanga. Jehoval­lu maan­na eq­qar­tor­nis­saan­nut amerlaval­laar­tunik pil­luaq­qungaar­paanga! (Uss 10:22) Inun­ngorama piitsuuvugut, maan­nali misigivunga takorloorsiman­ngisaan­nak­kat­tut anersaak­kut pisuun­ngorsimal­lunga!