1-2. (a) As­sersuusiorlutit nas­suiaruk sooq inuit tup­pal­lersar­neqar­nis­samin­nik pisariaqar­titsisut aam­ma qanoq tup­pal­lersaasin­naasut. (b) Meeq­qat ilaat qanoq ajor­tumik pineqar­tar­pat?

INUIT tup­pal­lersar­neqar­nis­samik pisariaqar­titsiner­tik inun­nguuseraat, tup­pal­lersaasin­naaneral­lu nuan­ner­poq. As­sersuutigalugu meeran­nguaq pin­nguar­til­luni orluguni seeq­qumigul­lu amiiakalatserluni qial­luni anaanaminut ataataminul­luun­niit or­nigutis­saaq. Amiiakalatser­nera angajoq­qaavisa aaq­qis­sin­naan­ngilaat, meerarli tup­pal­lersarsin­naavaat. Im­maqa qanoq pisoqar­nersoq aperis­savaat, qul­lii al­lar­terlugit eq­qis­sisarlugulu oqaluutis­savaat im­maqalu an­ner­neratigut supuulaarlugu mat­tuserlugulu. Meeraq sivitsun­ngitsoq aaq­qit­tar­poq pin­nguaq­qilerlunilu. Pif­fis­sap ingerlanerani amiiakalatser­nera aaq­qis­saaq.

² Ajoraluar­tumil­li meeq­qat ajor­nerungaar­tumik an­nersin­neqar­tar­put. Ilaat kinguaas­siuutitigut ator­nerlugaasar­put. Meeraq im­maqa ataasiarluni ukiul­luun­niit arlal­lit ingerlaneran­ni ator­nerlugaasar­poq. Taman­na misigis­sutsik­kut itisuumik ikiler­neqar­nermik kinguneqar­tar­poq. Pinerliisut ilaat tigusarineqar­tar­put pineqaatis­sin­neqarlutil­lu, al­lal­li pineqaatis­sin­neqan­ngitsoor­pasit­tar­put. Ator­nerluisoq ingerlaan­naq pineqaatis­sin­neqaraluar­pal­luun­niit meeraq ator­nerlugaasimasoq inersimasun­ngor­nerminut al­laat taman­na an­niaatigingaarsin­naavaa.

3. Korinthimiunut al­lak­kat aap­paat 1:3, 4-milu eq­qaaneqar­tutut Jehovap suna piumasaraa, aam­ma apeq­qutit suut sam­mis­savavut?

³ Qatan­ngut inersimasoq meeraal­luni ator­nerlugaasimanini pis­sutigalugu misigis­sutsik­kut suli an­niaateqaruni qanoq ikior­neqarsin­naava? (2 Korinthimiut 1:3, 4 atuakkit). Ersarip­poq Jehovap kif­fami asasami asaneqar­nis­saat tup­pal­lersar­neqar­nis­saal­lu piumasarigaa. Taamaat­tumik apeq­qutit pingasut  uku sam­meriar­tigit: (1) Meeraal­lutik ator­nerlugaasimasut sooq tup­pal­lersar­neqar­tariaqar­pat? (2) Kik­kut pisariaqar­tumik tup­pal­lersaasin­naap­pat? (3) Uagut qanoq tup­pal­lersaasin­naavugut?

4-5. (a) Sooq pingaaruteqar­pa paasis­sal­lugu meeraq inersimasumut naleq­qiul­lugu al­laanerusoq? (b) Ator­nerlun­neqar­neq meeq­qap tatigin­nis­sin­naaneranut qanoq sun­niuteqarsin­naava?

⁴ Inersimasut meeraal­lutik ator­nerlugaasimasut ukior­pas­suit qaangiutereeraluar­tut suli tup­pal­lersar­neqar­nis­sar­tik pisariaqar­tis­sin­naavaat. Sooq? Taman­na paasiumal­lugu meeq­qat inersimasunit al­laanerujus­suunerat paaseq­qaar­tariaqar­par­put. Meeraq ajor­tumik pineqaraangami inersimasumut naleq­qiul­lugu al­laanerujus­suarmik at­tugaasin­naavoq. As­sersuuteqariar­ta.

⁵ Meeq­qat peroriar­tor­fim­min­ni qanimut at­taveqar­nis­sar­tik pisariaqar­tip­paat. Taamatut at­taveqar­nerit meeq­qamut toq­qis­sisimatitsisar­put, aam­ma al­lanik taak­kunan­nga asan­nit­tunik tatigin­nin­nis­sar­tik ilin­niar­tar­paat. (Tuss 22:10) Ajoraluar­tumik amerlaner­tigut ator­nerluineq angerlarsimaf­fim­mi ilaqut­tamit ilaqut­tamul­luun­niit ikin­ngutaasumit pisar­poq. Meeraq tatigisaminit ator­nerlun­neqaruni al­lanik tatigin­nis­sin­naanera ukior­pas­suar­ni in­narler­neqar­tar­poq.

6. Sooq kinguaas­siuutitigut ator­nerluineq amiilaar­narlunilu kingunipiloqar­titsisar­pa?

⁶ Meeq­qat qajan­nar­tuup­put, kinguaas­siuutitigul­lu ator­ner­luineq amiilaar­nar­lunilu kingunipiloqar­tit­sisar­poq. Meeq­qat timik­kut, misigis­sutsik­kut isumak­kul­lu katis­simal­luni atoqateqar­nis­samut suli piareersiman­ngitsut pin­ngitsaalineqarunik taman­na ajoqutigingaarsin­naavaat. Meeraq ator­nerlugaasimanini pis­sutigalugu atoqatigiin­neq pil­lugu eq­qun­ngitsumik isigin­nit­taaseqalersin­naavoq. Naleqan­ngitsutut misigilersin­naavoq al­lanil­lu tatigisaarul­luni.

7. (a) Sooq meeq­qanik ator­nerluisut meeq­qap sal­loqit­tar­nis­saa saper­nar­tin­ngilaat? (b) Sal­loqit­taanerup suna kingunipilorisin­naavaa?

⁷ Meeq­qat eq­qar­sar­sin­naanerat aam­ma navianar­tuusin­naasunik naliliisin­naanerat ingalas­siman­nis­sin­naaneral­lu suli ineril­luar­siman­ngil­lat. (1 Kor 13:11) Taamaat­tumik ator­nerluisut meeq­qanik sal­loqit­taasin­naanerat ajor­nan­ngitsuararsuuvoq. Ator­nerluisar­tut meeq­qat sal­loqit­tar­tar­paat oqarlutik meeraq pisuutin­neqar­tus­saasoq, ator­nerluineq iser­tuun­neqar­tariaqar­toq, meeraq ator­nerlun­neqar­nerminik oqaaseqaruni kimil­luun­niit up­perineqar­navian­ngitsoq aam­ma inersimasup meeq­qal­lu atoqatigiin­nerat pis­susis­samisuuin­nar­toq asan­nin­nermil­lu ersersitsinerin­naasoq. Taamatut meeraq sal­loqit­tar­neqaruni ukior­pas­suar­ni sal­luliuutaanerat paasiuminaatsis­sin­naavaa. Meeraq ator­nerlugaasimasoq al­liar­tor­til­luni mingut­tuutut, in­narlersimasutut asaneqar­nis­saminil­lu naleq­qutin­ngitsutut misigisin­naavoq.

8. Sooq qularutigin­ngis­sin­naavar­put ajor­tumik pineqarsimasut Jehovap tup­pal­lersarsin­naagai?

⁸ Taamaat­tumik tupaal­lan­nan­ngilaq kinguaas­siuutitigut ator­nerluineq ukior­pas­suar­ni an­niaateqalersitsisin­naam­mat. Taman­na ajor­torujus­suarmik pinerlut­tulior­neruvoq! Nunarsuaq tamak­kerlugu ator­nerluisar­nerup takutip­paa ul­luni kingul­ler­ni inuusugut, nalitsin­nimi inup­pas­suit ‘asan­niuitsuup­put’, aam­ma ‘inuit ajor­tut peq­quserlut­tul­lu ajor­tumut nak­kaak­kiar­tuin­nar­put’. (2 Tim 3:1-5, 13) Saatanip periaasii ajor­torujus­suup­put, inuil­lu Diaavulup iluarisaatut ilioraangata alianangaar­tar­poq. Jehovali Saatanimit taas­sumalu kif­faanit pis­saaneqar­nerungaar­poq. Saatanip iliuusai Jehovap isigin­ngitsuusaar­navian­ngilai. Qularutigin­ngis­sin­naavar­put an­niaativut  ilisimaarigai pisariaqar­titatsin­nil­lu tup­pal­lersar­neqar­nis­sar­put isumagisin­naal­lugu. ‘Guuti tup­pal­lersaajuar­toq’ kif­far­torfigigatsigu pil­luaq­quneqaatigaar­put, ‘an­nikil­liuuteqar­nitsin­nimi tamani uatsin­nik tup­pal­lersaasar­poq an­nikil­liuuteqar­tut tamaasa uatsin­nut tup­pal­lersarsin­naaq­qul­lugit Guutip uatsin­nut tup­pal­lersaatigisaanik’. (2 Kor 1:3, 4) Kik­kul­li aq­qutigalugit Jehova tup­pal­lersaasar­pa?

9. Kun­ngip Daavip Tus­siaat 27:10-mi al­latai naaper­torlugit Jehovap sumigin­nagaasut qanoq pis­savai?

⁹ Meeq­qat qanigisamin­nit ator­nerlugaasimasut angajoq­qaamin­nil­lu il­lersor­neqarsiman­ngitsut ingam­mik tup­pal­lersar­neqar­nis­sar­tik pisariaqar­tip­paat. Tus­siaasior­tup Daavip nalun­ngilaa tup­pal­lersaasuni Jehova tatiginar­ner­paasoq. (Tussiaat 27:10, Testamentitoqaq atuaruk). * Asasamin­nit sumigin­nagaasut Jehovap isumagiumaarai Daavip qularutigin­ngil­luin­nar­paa. Jehova qanoq taamaalior­tarami? Nunami kif­fani aalajaatsut aq­qutigalugit. Up­peqativut anersaak­kut ilaqutaraavut. Jiisusip Jehovamut pal­lorfigin­neqatini qatan­ngutitut anaanatul­lu taavai. – Matt 12:48-50.

10. Apustilip Paulusip utoq­qaaner­tatut kif­far­tor­nini qanoq al­laatigaa?

¹⁰ Ilagiit ilaqutariit­tut qanoq is­sin­naanersut sam­meriar­tigu. Apustili Paulusi utoq­qaaner­taavoq eqiasuil­lunilu aalajaatsoq. Maligas­siuil­luar­poq, al­laal­lu isumas­sarsisin­neqarluni al­lap­poq Kristusimik ilaarsinermisut aam­ma al­lat ilaas­sagaan­ni. (1 Kor 11:1) Utoq­qaaner­tatut kif­far­tor­nini qanoq al­laatigineraa maluginiaruk: “Saamal­luta akor­nas­sin­ni inuuvugut. Soorlu anaanap qitor­nani paaq­qisarai.” (1 Th 2:7) Aam­ma nalitsin­ni utoq­qaaner­tat aalajaatsut Biibili atorlugu pisariaqar­titsisunik sal­laatsunik oqaaseqarlutik tup­pal­lersaasin­naap­put.

11. Sumit erser­pa utoq­qaaner­tat ikiuisin­naasutuaan­ngitsut?

¹¹ Ator­nerlugaasimasunik utoq­qaaner­tat kisimik tup­pal­lersaasin­naap­pat? Naamik. Tamat­ta ‘tup­pal­lersaqatigiin­nis­samik’ akisus­saaf­feqar­pugut. (1 Th 4:18) Qatan­ngutit ar­nat anersaak­kut  inersimal­luar­tut pingaar­tumik qatan­ngutinik ar­nanik pisariaqar­titsisunik tup­pal­lersaasin­naap­put. Tul­luar­poq anaanatut qitor­naminik tup­pal­lersaasutut Jehova Guuti im­minut as­sersuum­mat. (Es 66:13) Ar­nat pisariaqar­titsisunik tup­pal­lersaasut Biibilimi eq­qaaneqar­put. (Job 42:11) Jehovap ar­nat up­peqatimin­nik ar­nanik misigis­sutsik­kut naal­liuuteqar­tunut tup­pal­lersaasar­nerat nuan­naarutigingaar­paa! Pisariaqaraangat ilaan­nik­kut utoq­qaaner­tat qatan­ngut ar­naq anersaak­kut inersimal­luar­toq kisimiitsil­lugu aperisin­naavaat naal­liuuteqar­tumik ikiuisin­naanersoq. *

12. Qanoq ilius­san­ngilagut?

¹² Soorunami kristumioqatit­ta paasitik­kusun­ngisaan­nik paasiniaasas­san­ngilavut. (1 Th 4:11; 2 Th 3:11) Taavami tup­pal­lersar­neqar­nis­samin­nik pisariaqar­titsil­lutik ikior­neqarusut­tut qanoq ikiorsin­naavavut? Iliuuserisin­naasavut tal­limat Biibilimik tun­ngavil­lit sam­meriar­tigit.

13. Kun­nginik al­lak­kat siul­liit 19:5-8 ersersin­neqar­tutut Jehovap in­ngiliata Elia qanoq ikior­paa, in­ngililu qanoq ilaarsin­naavar­put?

¹³ Ikiuigit. Pruf­fiiti Elia toqun­niar­neqar­nermini qimaagami ima isumatsas­simatigaaq al­laat toquin­narusul­luni. Jehovap in­ngili pis­sarsuaq taas­sumun­nga aal­lar­tip­paa. Eliap tamatumaner­piaq pisariaqar­titaanik in­ngilip ikior­paa. Elia nerisas­saanik qalarlaanik tunivaa nerinis­saanil­lu kajumis­saarlugu. (1 Kunngit 19:5-8 atuakkit). Taamatut iliuuseqar­neq pingaarutilim­mik ersersitsivoq: An­nikitsun­nguamil­luun­niit asan­nit­tumik iliuuseqar­neq iluaqutaangaarsin­naavoq. Qatan­ngutitsin­nik asan­nin­ner­put ersersis­sin­naavar­put as­sersuutigalugu iggan­nerisigut, tunis­sutin­nguamik tuninerisigut imaluun­niit al­lagan­nguamik qiim­mal­lan­nar­tunik al­laf­figinerisigut. Taas­suma misigis­susii pil­lugit oqaloqatiginis­saanut peq­qusiileqigut­ta asan­nin­ner­put ersersis­sin­naavar­put ikiuiniarluta iliuuseqar­nik­kut.

14. Eliamut pisut qanoq ilin­niarfigisin­naavavut?

¹⁴ Naner­tisimasut toq­qis­sisimaler­sik­kit. Eliamut tun­ngatil­lugu aam­ma al­lamik ilin­niagaqarsin­naavugut. Jehovap tupin­nar­tulior­nik­kut pruf­fiiti qaq­qamut Horebimukar­nis­samut pisariaqar­titaanik nakus­satsip­paa. Jehovap tas­sani ukior­pas­suit tamatuma sior­na in­nut­tani angerfigeqatigisimam­magit im­maqa tas­saner­piaq Elia toq­qis­sisimavoq. Aam­ma misigisimasin­naavoq im­minik toqutsiniar­tunit kiisami ungasil­lil­luni. Taman­na qanoq ilin­niarfigisin­naavar­put? Ator­nerlugaasimasunik tup­pal­lersaarusuk­kut­ta taak­ku toq­qis­sisimasutut misigiteq­qaar­tariaqar­pavut. As­sersuutigalugu utoq­qaaner­tat eq­qarsaatigisin­naavaat qatan­ngut ar­naq isumatsaq­qasoq angerlarsimaf­fim­mi toq­qis­sisimaf­fim­miik­kusus­sin­naanera naalagaaf­filersaar­tarfim­miin­nin­ngar­nit. Al­lali paarlat­tuanik misigisin­naavoq.

15-16. Qanoq ersersis­sin­naavar­put tusar­naarluarluta?

¹⁵ Tusar­naar­luar­tarit. Biibilimi ersaris­sumik siun­nersuuteqar­poq: “Kinaluun­niit tusarasuar­tarli, kisian­ni oqaluk­kumaataar­tuul­luni.” (Jaak 1:19) Uagut tusar­naarluar­tar­pugut? Im­maqa eq­qarsar­pugut tusar­naarluarusuk­kut­ta oqaaseqarata oqalut­tuar­toq isigiin­nas­sagip­put. Tusar­naarluar­nerli taamaagin­nan­ngilaq. As­sersuutigalugu Elia qanoq ajor­tigisumik misiginerminik Jehovamut oqalut­tuarmat Jehova tusar­naaq­qis­saar­poq. Jehovap paasivaa Elia an­nilaangasoq, kisimiit­tutut misigisoq aam­ma suliani asuliin­naasorigai. Elia taamatut misigiun­naar­nias­sam­mat Jehovap asan­nit­tumik ikior­paa. Eliamut tusar­naarluarsimanini ersersip­paa. – 1 Kng 19:9-11, 15-18.

¹⁶ Qatan­nguter­put tusar­naaraangatsigu qanoq asan­nin­ner­put ersersis­sin­naavar­put?  Ilaan­nik­kut naleq­qut­tumik asan­nil­luta oqaaseqalaar­nik­kut qanoq misiginitsin­nik ersersitsisin­naavugut. Im­maqa ima oqarsin­naavutit: “Ajoqaaq taamatut nalaataqarsimagavit! Meeraq taama pineqar­tus­saan­ngik­kaluar­poq!” Im­maqa aperineratigut ikin­ngutivit isumatsaq­qasup oqaasii paasil­luarsimanerlugit qulak­kiis­savat. Ima aperisin­naavutit: “Qanoq isumaqar­nersutit paasitilaarsin­naavinga?” Imaluun­niit: “Taama oqaravit ima paasivara ... Paasil­luar­para?” Taamatut asan­nit­tumik oqaaseqalaar­nik­kut takutis­savat tusar­naarluar­tutit aam­ma paasin­nik­kusut­tutit. – 1 Kor 13:4, 7.

17. Sooq erinitsajuit­tariaqarlutalu oqalup­pal­laas­san­ngilagut?

¹⁷ Eq­qaamajuk oqalup­pal­laas­san­ngitsutit. Siun­nersuiniarlutit imaluun­niit oqalut­tuar­tup isumaanik aaq­qiiniarlutit akor­nuseeqinak. Erinitsajuigit! Eliap uum­mam­miuni tamaasa Jehovamut an­nik­kamigit isumatsaq­qanera aliasun­neralu paatsuugas­saan­ngil­lat. Kingusin­nerusuk­kut Elia up­per­nik­kut Jehovap nakus­satsereeraluaraani oqaatsit taak­kor­piaat atorlugit qanoq misiginini eq­qaaq­qip­paa. (1 Kng 19:9, 10, 13, 14) Taman­na qanoq ilin­niarfigisin­naavar­put? Isumatsaq­qasut uum­mam­miutik ataasiaan­naratik an­nit­tariaqarsin­naavaat. Jehova ilaarlugu erinitsajuil­luta tusar­naarluarusup­pugut. Aaq­qiis­sutis­sanik oqaaseqarata misigin­neqataaner­put ersersik­kusup­par­put. – 1 Petr 3:8.

18. Qin­nutivut naner­tisimasumut qanoq tup­pal­lersaataasin­naap­pat?

¹⁸ Naner­tisimasoq qaman­nga pisumik qinoqatigisaruk. Isumatsaq­qasup im­maqa qinunis­sani ajor­nar­tit­tar­paa. Jehovamut saaf­figin­nin­nis­saminut ajuk­kus­sin­naavoq. Inuk taama misigisoq tup­pal­lersarusuk­kutsigu qinoqatigisin­naavar­put qin­nutitsin­nilu atia taasarlugu. Aam­ma qinoqatiginerani Jehovamut eq­qaasin­naavar­put naner­tisimasoq uagutsin­nit ilagiin­nil­lu asaneqangaar­toq. Jehova qin­nuigisin­naavar­put kif­fani asasani eq­qis­sisimasutut misigilerseq­qul­lugu tup­pal­lersaq­qul­lugulu.  Qin­nutit taamaat­tut tup­pal­lersaataangaarsin­naap­put. – Jaak 5:16.

19. Tup­pal­lersaanis­samut suut iluaqutigisin­naavavut?

¹⁹ Oqaat­sit tup­pal­ler­saataasut atuk­kit. Oqalutsin­nak eq­qarsaq­qaarit. Eq­qarsaq­qaar­nani oqaaserisat an­nersitsisin­naap­put, inus­siar­nersumil­li oqaaserisat katsorsaataasin­naap­put. (Uss 12:18) Taamaat­tumik Jehova qin­nuigiuk inus­siar­nersumik, tup­pal­lersaataasunik katsorsaataasunil­lu oqaaseqaq­qul­lutit. Eq­qaamajuk oqaatsit oqaaserineqarsin­naasut sun­niuteqarluar­ner­paat tas­saam­mata Jehovap nam­mineq oqaasii Biibilimiit­tut. – Hebr 4:12.

20. Ajor­tumik pineqarsimasut ilaat qanoq misigisar­pat, aam­ma sumik paasitik­kusup­pavut?

²⁰ Qatan­ngutit ator­nerlugaasimasut ilaat misigisar­put mingut­tuujul­lutik, naleqaratik, asaneqaratik aam­ma al­laat asaneqarsin­naanatik. Taman­nali eq­qun­ngil­luin­nar­poq! Al­las­simaf­fiit iluaqutigalugit Jehovap isaani naleqangaar­neran­nik eq­qaasik­kit. (Ungalusaq “ Biibilimi tup­pal­lersaatis­sat” takuuk). Eq­qaamajuk pruf­fiiti Danieli isumatsaq­qagami in­ngilimit qanoq asan­nit­tumik nakus­satsin­neqar­toq. Jehovap kis­saatigaa qanoq asaneqar­tiginerminit paasin­nis­sasoq. (Dan 10:2, 11, 19) Taamatut­taaq qatan­ngutivut aliasut­tut Jehovamit asaneqangaar­put!

21. Ajor­tulior­tut peq­qis­simin­ngitsut qanoq pineqas­sap­pat, taman­nalu pitin­nagu sunis­sar­put aalajangiusimal­luin­nas­savar­put?

²¹ Al­lat tup­pal­lersaraangatsigit Jehovap asan­nin­neranik eq­qaasit­tar­pavut. Aam­ma Jehova Guutiusoq naaper­tuil­luar­toq puiun­ngisaan­nas­savar­put. Ator­nerluinerit suul­luun­niit iser­tuun­neqarsin­naan­ngil­lat. Jehovam­mi suut tamaasa takusin­naavai ajor­tulior­tul­lu peq­qis­simin­ngitsut pil­lar­neqar­nis­saat isumagiumaar­paa. (4 Mos 14:18) Taman­na pitin­nagu ator­nerlugaasimasut asan­nin­nermik sapin­ngisatsin­nik ersersitsivigisigit. Aam­mat­taaq tup­pal­ler­nangaar­poq ilisimaaralugu Saatanimit taas­sumalu silarsuaanit ajor­tumik pineqarsimasut tamaasa Jehovap ataavar­tumik katsorsarumaarai. Ungasin­ngitsuk­kut misigisimasat an­ner­nar­tut eq­qaamaneerutivis­sap­put. – Es 65:17.