ATUAQQISSAAGASSAQ 19
Naapertuilluartumut naakkiuffissaqanngilaq
“Pilluangaassapput inatsisinnik nuannarinnittut, naakkiuffissaqanngilarlu taakkununnga.” – TUSS 119:165.
ERINARSUUT 126 Eqqumasa
QILANAARTUUT *
1-2. Atuakkiortoq qanoq allassimava, allaaserisamilu matumani suna sammissavarput?
ULLUMIKKUT inuit millionilikkuutaat Jiisusimik upperinninnerarput, ilinniartitsissutaali naalannagit. (2 Tim 4:3, 4) Atuakkiortoq ima allassimavoq: “Jiisusi ullumikkut inuusuuppat ukiut 2.000-t matuma siorna inuit Jiisusimik itigartitsinerattut uagut itigartissagaluarparput? ... Akissutaa amerlanersatsinnut aappiussagaluarpoq.”
2 Jiisusip nalaani taassuma ilinniartitsissutaanik tusarnaartut tupinnartuliortarneranillu takunnittut taanna upperfigilinngilaat. Sooq? Allaaserisap matuma siuliani Jiisusip oqaasii iliuusiilu pissutigalugit inuit naakkiuttarnerannut pissutaasartut sisamat sammivagut. Naakkiussutaasartut sisamat allat sammeriartigit. Taakku sammitillugit aamma sammissavarput sooq inuit ullumikkut Jiisusip malinnittaanik itigartitsisartut uagullu uppernerput qanoq annaanaveersaarsinnaagipput.
(1) JIISUSI KINAASSUSERSIORTUUNNGILAQ
Jiisusip ajortuliortartunik peqatiginnittarnera inuppassuit naakkiussutigaat. Tamatumunnga assingusumik ullumikkut qanoq naakkiuttoqarsinnaava? (Immikkoortoq 3 takuuk) *
3. Jiisusip iliuusii suut pissutigalugit inuit ilaat naakkiuppat?
3 Jiisusi nunarsuarmiikkami inuit tamalaat peqatigisarpai. Inuit nuimasut pisuullu nereqatigisarpai, aammali inuit piitsut nikagineqartullu piffissaqarfigilluartarpai. Aamma “ajortuliortartutut” isigineqartunik misiginneqatiginnittarpoq. Jiisusi taamatut pissuseqarmat inuit makitasuut ilaat naakkiupput. Ajoqersukkanut ima aperipput: “Sooq ilanngaaserisut ajortuliortullu nereqatigaasigit imeqatigalugillu?” Luk 5:29-32.
Jiisusip ima akivai: “Peqqissut nakorsamik pisariaqanngillat, napparsimasulli. Tikiutinngilanga iluartut qaaqqujartorlugit ajortuliortulli allamik isumataaqqullugit.” –4. Pruffiitip Esajap allaatigisaatut juutit Missiarsi pillugu suna naatsorsuutigisussaagaluarpaat?
4 Allakkani qanoq allassimasoqarpa? Missiarsip tikiunnissaa sioqquterujussuarlugu pruffiiti Esaja allappoq silarsuarmit akuerisaassanngitsoq. Ima siulittuivoq: “Nikanartitaq, inuit narrugisaat, ... maajugalugu alartitiinnagaq, asiginnagaq, suutinngisarput.” (Es 53:3) Missiarsi ‘inunnit’ nikagineqartussaammat juutit Jiisusip akueriumaneqannginnissaa naatsorsuutigisussaagaluarpaat.
5. Jiisusip malinnittai ullumikkut qanoq isigineqartarpat?
5 Ullumikkut aamma taamaattoqarpa? Aap. Palasit amerlasuut inuit nuimasut, pisuut silatuusorineqartullu oqaluffimminnut tikilluaqqorusungaartarpaat. Taamaaliortarput naak inuit taakkua inooriaasiat ileqquilu Guutip najoqqutassiaanut naapertuutinngikkaluartut. Palasit taakkua Jehovap kiffai aallussilluartut ileqqorissaartullu silarsuarmi matumani nuimasuunngimmata nikagaat. Paulusip allanneratut ‘nikagisaasut’ Guutimit toqqarneqarput. (1 Kor 1:26-29) Jehovallu kiffani aalajaatsut tamaasa asangaarpai.
6. Jiisusip isiginnittaasia Matthæusi 11:25, 26-milu allaatigineqartoq qanoq ilaarsinnaavarput?
6 Uppernerput qanoq annaanaveersaarsinnaavarput? (Matthæusi 11:25, 26 atuakkit). Silarsuarmi Guutip innuttaanik isiginnittaaserineqartumit sunnerteqinak. Eqqaamajuk Guutip piumasani naammassiumallugu inuit maniguuttut kisiisa atortarai. (Tuss 138:6) Silarsuarmilu sianiitsuusorineqartut atorlugit qanoq naammassisaqartigisimasoq eqqarsaatigiuk.
(2) JIISUSIP ISUMMAT EQQUNNGITSUT QULAARPAI
7. Sooq Jiisusip farisiiarit ilumoortuusaartuunerarpai, taakkulu qanoq qisuariarpat?
7 Jiisusip sapiilluni nalimini upperisarsiornikkut siuttut ilumoortuusaartut assuarisarpai. Assersuutigalugu farisiiarit angajoqqaanik isumaginninneq suusupagalugu errortoriaaseq aalajangersimasoq pingaartinnerummassuk assuarai. (Matt 15:1-11) Ajoqersugai tupaallallutik ima oqarput: “Nalunngiliuk farisiiarit oqaaserisatit tamakku mamiatsaatigigaat?” Jiisusip ima akivai: “Naasoq sunaluunniit Ataatama qilammiittup ikkussarinngisaa sorlai ilanngullugit nusunneqassaaq. Ilaginnarsigit tappiitsuullutik tappiitsunik ingerlassisuupput, tappiitsullu tappiitsoqanni ingerlakkuniuk marluullutik kussinermut nakkassapput.” (Matt 15:12-14) Upperisarsiornikkut siuttut mamiatsaatiginninnerat Jiisusip ilumoortumik oqalukkunnaassutiginngilaa.
8. Jiisusip qanoq ersersippaa upperisaq ataasiinnaq Guutimit akuerineqartoq?
8 Jiisusip aamma upperisarsiornikkut ilinniartitsissutigineqartut eqqunngitsut qulaarpai. Oqanngilaq qanorluunniit upperisaqaraluaraanni Guutimit iluarisaasoqarsinnaasoq. Oqarporli inuppassuit aqqutikkut silittukkut toqumut ingerlassasut, ikittuinnaalli aqqutikkut amitsukkut inuunermut ingerlassasut. (Matt 7:13, 14) Aamma ersersippaa inuit Guutimut kiffartornerartut ilaat ilumoortuusaartuusut. Ima mianersoqqusivoq: “Pruffiitioqqusersunut mianersoritsi; taakkua savatut atisaqarlutik ornittarpaasi, ilumikkulli amaruupput kiisortut. Inerititaasigut ilisarisinnaassavasi.” – Matt 7:15-20.
Jiisusip ajoqersuutinik ileqqunillu eqqunngitsunik assuarinninnera inuppassuit naakkiussutigaat. Tamatumunnga assingusumik ullumikkut qanoq naakkiuttoqarsinnaava? (Immikkoortoq 9 takuuk) *
9. Upperisarsiornikkut ilinniartitsissutigineqartut eqqunngitsut suut Jiisusip qulaarpai?
9 Allakkani qanoq allassimasoqarpa? Biibilimi siulittuutigineqarpoq Missiarsi ‘Jehovap Tuss 69:10; Joh 2:14-17) Taamaattumik upperisarsiornikkut ilinniartitsissutigineqartut ileqqorineqartullu eqqunngitsut Jiisusip qulaartarpai. Assersuutigalugu farisiiarit upperaat tarneq toqusuitsuusoq, Jiisusilli toqu sininnermut assersuuppaa. (Joh 11:11) Saddukiiarit toqusunit makititaasoqarsinnaanera upperinngilaat, Jiisusilli ikinngunni Lazarusi makitippaa. (Joh 11:43, 44; ApS 23:8) Farisiiarit upperaat suut tamarmik siumut aalajangeriigaasut, Jiisusilli ersersippaa inuit Guutimut kiffartorusunnerlutik namminneq aalajangersinnaagaat. – Matt 11:28.
illuanik ilungersuutiginningaassasoq’. (10. Sooq ilinniartitsissutigisagut inuppassuit naakkiussutigisarpaat?
10 Ullumikkut aamma taamaattoqarpa? Aap. Biibilimik ilinniartitsinitsinni upperisarsiornikkut ajoqersuutit eqqunngitsut qulaartaratsigit inuppassuit naakkiuttarput. Palasit ilinniartitsissutigisarpaat Guutip inuit ajortut anniarfimmi pillartarai. Palasit ajoqersuinerluut tamanna atorlugu inuit qunusiaralugit aquppaat. Jehovamut Guutimut asannittumut kiffaagatta ajoqersuinerluut tamanna qulaartarparput. Palasit aamma tarnip toqusuitsuunera ilinniartitsissutigisarpaat. Ajoqersuutilli tamatuma Biibilimit aallaaveqannginnera qulaartarparput. Ilumoortuugaluarpammi toqusunik makititsisoqartariaqassanngikkaluarpoq. Suut tamarmik siumut aalajangeriigaanerannik ajoqersuut upperisarsioqatigiippassuarni upperineqaraluartoq uagut ilinniartitsissutigaarput inuit Guutimut kiffartorusunnerlutik namminneq aalajangersinnaagaat. Upperisarsiornikkut siuttut tamanna qanoq qisuariarfigisarpaat? Kamattarput!
11. Jiisusip oqaasii naapertorlugit Guutip innuttani qanoq piumasaqarfigai? (Johannesi 8:45-47)
11 Uppernerput qanoq annaanaveersaarsinnaavarput? Ilumoortoq nuannarigutsigu Guutip oqaasii upperalugillu naalattariaqarpagut. (Johannesi 8:45-47 atuakkit). Saatanitut Diaavulutut innata uppernerput ilumoortorlu aalajangiusimavagut. (Joh 8:44) Guutip piumasaraa innuttami Jiisusitut ‘ajussuseq maajugissagaat, ajunngitsorlu aalajangiusimassagaat’. – Rom 12:9; Hebr 1:9.
(3) JIISUSI MALERSUGAAVOQ
Jiisusip nappakkami anniartitaaffimmi toqunera inuppassuit naakkiussutigaat. Tamatumunnga assingusumik ullumikkut qanoq naakkiuttoqarsinnaava? (Immikkoortoq 12 takuuk) *
12. Sooq juuterpassuit Jiisusip qisummik naalliutsitsiviliami toqunera naakkiussutigaat?
12 Juutit Jiisusi pillugu naakkiussutaat alla suua? Paulusi ima allappoq: ‘Uagut oqaluussissutigaarput Kristusi sanningasulimmut [nappakkamut, NW] kikiattugaasoq – juutit mamiatsaatigisaat.’ (1 Kor 1:23) Sooq juuterpassuit tamanna naakkiussutigaat? Isumaqaramik Jiisusi qisummik naalliutsitsiviliami toqummat pinerluttuullunilu ajortuliortuusimassasoq, Missiarsiunani. – 5 Mos 21:22, 23.
13. Jiisusi pillugu naakkiuttut suut paasinngilaat?
13 Juutit naakkiuttut paasisimanngilaat Jiisusi pisuussuteqanngitsuullunilu eqqunngitsumik unnerluussaallunilu naapertuilluanngitsumik pineqartoq. Juutit eqqartuussisoqatigiivisa pingaarnersaanni ilaasortaasut Jiisusi eqqartuukkumallugu tuaviinnaq katersuupput, eqqartuussinerminnilu inatsisit malinngilaat. Naapertuilluartuliornissartik soqutiginngilluinnarpaat. (Luk 22:54; Joh 18:24) Jiisusi pillugu unnerluutit tamatumunngalu uppernarsaatit tusarnaaramikkit siumut isummiussereerlutillu “sallusumik nalunaajaasussarsiorput toqutassanngortikkumallugu”. Sallullutik nalunaajaasussanik nassaannginnamik palasiunerup unnerluussinermini atorsinnaasaminik Jiisusi oqartinniarsaraa. Taamaaliornerat inatsisinut naapertuutinngilluinnarpoq. (Matt 26:59; Mark 14:55-64) Eqqartuussisullu naapertuilluanngitsuliortut taakkua Jiisusip toqusunit makititaanerata kingorna Romamiut sakkutuui Jiisusip ilerranik paarsisut “aningaasanik amerlasuunik” tunivaat Jiisusip timaata ilivermiinnginnera pillugu salloqqullugit. – Matt 28:11-15.
14. Missiarsip toqunissaa Allakkani Illernartuni qanoq siulittuutigineqarpa?
14 Allakkani qanoq allassimasoqarpa? Jiisusip nalaani juuterpassuit Missiarsip toqunissaa ilimaginngilaat, Allakkanili Illernartuni Es 53:12) Taamaattumik juutit Jiisusip nalaani inuusut naakkiunnissaminnut pissutissaqanngikkaluarput.
ima siulittuutigineqarpoq: ‘Inuunini toqumut tunniukkamiuk inatsisinik unioqqutitsisunut ilaliussaatippoq. Kisianni amerlasuut ajortuliaat ersuppai ajortuliortullu sinnerlugit pineqarluni.’ (15. Jehovap Nalunaajaasuinik unnerluussinerit suut pissutigalugit inuit ilaat naakkiussimappat?
15 Ullumikkut aamma taamaattoqarpa? Aap. Jiisusi naapertuilluanngitsumik unnerluussaallunilu eqqartuussaavoq, taamatuttaarlu Jehovap Nalunaajaasui naapertuilluanngitsumik pineqartarput. Soorlu 1930-kkunni 1940-kkunnilu USA-mi guutisiorsinnaanerput eqqartuussivinni arlaleriarluni illersorneqartariaqartarpoq. Eqqartuussisullu ilaasa akerlilersuisuunerat erseqqippoq. Quebecimi, Canadamiittumi, katuullit naalakkersuisullu ikioqatigiillutik suliarput akerlilersorpaat. Nalunaajaasorpassuit Guutip kunngeqarfia, tassa naalagaaffia, pillugu saniliminnik oqaloqateqartarnertik pissutigiinnarlugu parnaarussaasarput. Tysklandimi nazistit naalakkersuineranni qatanngutit angutit inuusuttut aalajaatsorpassuit toqutaapput. Ukiunilu kingulliunerusuni qatannguterpassuagut Ruslandimiittut Biibili pillugu eqqartuisarnertik, ingasaassiniarnertut nalilerneqarsimasoq, pissutigalugu eqqartuussaallutillu parnaarussaapput. Allaat Biibili New World Translation of the Holy Scriptures russisut nutsigaq inerteqqutaavoq, tamatumanimi Jehovap aqqa atorneqarmat “ingasaassiniartut” atuakkiaattut naatsorsuutigineqarpoq.
16. Johannesip allagai siulliit 4:1-imi ersersinneqartutut, sooq Jehovap innuttaanik salluliuutinit tammartinneqanngisaannassaagut?
16 Uppernerput qanoq annaanaveersaarsinnaavarput? Ilumoortut paasiniakkit. Jiisusi qaqqami oqaluutsiminik tusarnaartut mianersoqqullugit oqarpoq ‘tamanik ajortunik’ salluliuutigineqassasut. (Matt 5:11) Salluliuutit tamakku Saatanimeersuupput. Akerlilersuisut taassumannga sunnerneqarlutik ilumoortumik asannittut nikassarlugit salluliuutit siammarterpaat. (Saqq 12:9, 10) Akerlilersortitta salluliuutaat itigartittariaqarpagut. Salluliuutit tamakku qunulissutiginagillu uppernikkut sanngiillissutiginngisaannartigit. – 1 Johannesi 4:1 atuaruk.
(4) JIISUSI KILLUUTIGINEQARLUNILU QIMANNEQARPOQ
Jiisusip Judamit killuutigineqarnera inuppassuit naakkiussutigaat. Tamatumunnga assingusumik ullumikkut qanoq naakkiuttoqarsinnaava? (Immikkoortut 17-18 takukkit) *
17. Jiisusip toqunngitsiarnerani pisut sooq inuit ilaasa naakkiussutigaat?
17 Jiisusi toqunissi sioqqutitsiarlugu apustilit aqqaneq-marluk ilaannit killuutigineqarpoq. Aamma apustilimit allamit pingasoriarluni miserratigineqarpoq unnummilu tamatumani apustilinit tamanit qimanneqarluni. (Matt 26:14-16, 47, 56, 75) Jiisusip tamanna tupaallaatiginngilaa. Allaammi taamaattoqarumaarnera siulittuutigaa. (Joh 6:64; 13:21, 26, 38; 16:32) Inuit ilaat naakkiullutik immaqa ima isummersinnaapput: ‘Jiisusip apustilii taamatut pissuseqarpata uanga taakkununnga ilaarusunngilanga.’
18. Jiisusip toqulernerata nalaani siulittuutit suut eqquuppat?
18 Allakkani qanoq allassimasoqarpa? Jiisusip inunngornissaa sioqquterujussuarlugu Jehovap oqaatsimini allaatigitippaa Missiarsi sølvinik 30-nik killuutigineqassasoq. (Zak 11:12, 13) Siulittuutigineqarpoq Jiisusi ikinngutiminit killuutigisaassasoq. (Tuss 41:10) Aamma pruffiiti Zakaria ima allappoq: “Paarsisoq persuttaruk savat paarisai siammartillugit.” (Zak 13:7) Inuit eqqortuliorusuttut pisimasut tamakku naakkiussutiginagit siulittuutit Jiisusimut eqquunnerat uppernikkut nakussatsissutigisussaavaat.
19. Inuit eqqortuliorusuttut suna nalunngilaat?
19 Ullumikkut aamma taamaattoqarpa? Aap. Nalitsinni Nalunaajaasut ilisimaneqarluartut ilaat sallusuissummik qimagupput, tunussisunngorsimapput allanillu tunussisunngortitsiniaasarlutik. Jehovap Nalunaajaasui pillugit tusagassiuutitigut internetikkullu oqaluttuat nuanniitsut, tammartitsiniutit salluliuutillu siammartertarpaat. Inuilli eqqortuliorusuttut tammartinneqarneq ajorput, nalunngilaammi taamaattoqartarumaarnera Biibilimi siulittuutigineqartoq. –20. Sallusuissummit qimaguttunit tammartinneqaqqunata suut iluaqutigissavagut? (2 Timotheusi 4:4, 5)
20 Uppernerput qanoq annaanaveersaarsinnaavarput? Qinujuarnikkut, atuaqqissaartarnikkut Jehovallu suliassiissutigisaanik ulapputiginnittuarnikkut uppernerput nakussassartuartariaqarparput. (2 Timotheusi 4:4, 5 atuakkit). Uppersuseqarutta tusakkagut nuanniitsut paatsiveerussutigisassanngilagut. (Es 28:16) Aamma Jehovamik uppeqatitsinnillu asannikkutta Biibilimillu nuannarinnikkutta sallusuissummit qimaguttunit tammartinneqarnavianngilagut.
21. Ullumikkut inuit amerlanersaasa tusarliussarput itigartikkaluaraat suna nalunngilarput?
21 Jiisusi nalimini inuusunit naakkiussutigineqarlunilu assuarineqarpoq. Inunnilli allarpassuarnit upperineqarpoq. Uppertunngortut ilagaat juutit Killisiuisoqatigiivini ilaasortaasoq aamma “palasit amerlaqisut”. (ApS 6:7; Matt 27:57-60; Mark 15:43) Ullumikkuttaaq inuit millionilikkuutaat upperluartuujuarput. Sooq? Ilumoortut Biibilimeersut nalunagillu nuannarigamikkit. Guutip oqaasiani ima allassimavoq: “Pilluangaassapput inatsisinnik nuannarinnittut, naakkiuffissaqanngilarlu taakkununnga.” – Tuss 119:165.
ERINARSUUT 52 Kristumiutut tunniulluinnarneq
^ imm. 5 Allaaserisap matuma siuliani inuit Jiisusimik itigartitsinerannut ullumikkullu malinnittaanik itigartitsinerannut pissutaasut sisamat sammivagut. Allaaserisami matumani sammissavagut naakkiussutaasartut sisamat allat. Aamma paasissavarput inuit eqqortuliorusullutillu Jehovamik asannittut sooq naakkiuffissaqanngitsut.
^ imm. 60 ASSIMI MALUGISASSAT: Jiisusip Matthæusi ilanngaaserisullu nereqatigigai.
^ imm. 62 ASSIMI MALUGISASSAT: Jiisusip niuertut naalaffimmit anisikkai.
^ imm. 64 ASSIMI MALUGISASSAT: Jiisusip qisuk anniartitaaffik ersukkaa.
^ imm. 66 ASSIMI MALUGISASSAT: Judap Jiisusi kunillugu killuutigigaa.