ATUAQQISSAAGASSAQ 20
Oqaluussininni isumalluartuujuarit
‘Siaruartigassatit siaruarterniakkit assatillu sarliaannartarnagit.’ – OQAL 11:6.
ERINARSUUT 53 Isumalluarlunga oqaluussiniarpunga
QILANAARTUUT *
Jiisusi qilaliareermat ajoqersugai kajumeqalutik Jerusalemimi illoqarfinnilu allani oqaluussipput (Immikkoortoq 1 takuuk)
1. Ajoqersukkat Jiisusimit qanoq maligassinneqarpat, qanorlu qisuariarpat? (Saqqaani assiliaq takuuk).
JIISUSI nunarsuarmiikkallarami oqaluussinermini isumalluartuujuarpoq, ajoqersukkamilu taamaattuunissaat kissaatigaa. (Joh 4:35, 36) Ajoqersukkat Jiisusi najortigigallaramikku kajumeqalutik oqaluussisarput. (Luk 10:1, 5-11, 17) Jiisusili tigusaallunilu toqutaammat oqaluussinissaminnut kajumissuseerukkaluarput. (Joh 16:32) Taamaattumik Jiisusip makititaanermi kingorna oqaluussinermi aallussiuaqqullugit kajumissaarpai. Qilaliareermat ajoqersugai ima oqaluussitigipput allaat akerlilersortiminnit naammagittaalliutigineqalerlutik. Akerlilersortai ima oqarput: “Jerusalemi ajoqersuutissinnik tamakkerparsi.” – ApS 5:28.
2. Jehovap oqaluussinerput qanoq pilluaqqusimavaa?
2 Kristumiut siulliit oqaluussinerat Jiisusip siulersorpaa, Jehovallu ikiuineratigut amerlasuut uppertunngorput. Assersuutigalugu ukiumi 33-mi piinsip ulluani inuit 3.000-ngajaat imermut morsutsinneqarput. (ApS 2:41) Taamanimiillu ajoqersukkat amerliartupiloorput. (ApS 6:7) Inuilli suli amerlanerusut ullussani kingullerni uppertunngorumaarnerat Jiisusip siulittuutigivaa. – Joh 14:12; ApS 1:8.
3-4. Sooq nunat ilaanni oqaluussineq unamminiarnarsinnaava, allaaserisamilu matumani suut sammissavagut?
3 Tamatta oqaluussinitsinni isumalluartoorusuppugut. Tamanna nunat ilaanni ajornanngitsuararsuuvoq, soqutiginnittummi amerlangaarmata ilaat atuaqqissaaqatigineqartalernissaminnut
utaqqisariaqartarput. Nunalli ilaanni inuit naapikkuminaattarput naapinneqartullu amerlasuut soqutiginninneq ajorlutik. Taamaattumik oqaluussineq unamminiarnartarpoq.4 Illit najugarisanni oqaluussineq unamminiarnartuuppat allaaserisami siunnersuutit iluaqutigissajunnarsivatit. Nalunaajaasut ilaat inunnik amerlanerusunik naapitsiumallutik qanoq iliuuseqarsimanerat ilaatigut sammissavarput. Aamma oqaluussinitsinni inuit qanorluunniit qisuariaraluarpata isumalluartuujuarnissatsinnut pissutaasut eqqartussavagut.
INUIT NAAPIKKUMINAAKKAANGATA
5. Nalunaajaasorpassuit oqaluussinerminni qanoq unamminiagaqarpat?
5 Illumiit illumut oqaluussineq Nalunaajaasorpassuarnut unamminiarnarneruleraluttuinnarpoq. Nalunaajaasut ilaasa oqaluussiffigisartagaanni iserfigiuminaatsunik inissiaqarfissuaqarpoq. Ilaat isaariami nakkutilliisoqartarput, taamaattumillu qaaqquneqaqqaarani isertoqarsinnaaneq ajorpoq. Nalunaajaasulli allat akornuteqaratik illumiit illumut oqaluussisinnaasaraluartut angerlarsimasut ikittuinnaasarput. Allallu avinngarusimasuni inoqarpianngitsunilu oqaluussisarput. Taakku illunnguaq ataaseq tikikkumallugu sivisuumik angalasariaqartarput ilaannikkullu ornitatik angerlarsimanngitsoorutigisarlugit. Oqaluussininni assingusunik unamminiagaqaruit nikalloqinak, inuimmi suli amerlanerusut naapikkumallugit iliuuseqarsinnaavutit.
6. Oqaluussisartut aalisartullu qanoq assigiissuteqarpat?
6 Jiisusip oqaluussinerput aalisartuunermut assersuuppaa. (Mark 1:17) Aalisartut ilaat ullorpassuarni pisaqanngitsoorsinnaasarput. Tunniutiinnarnerli ajorput. Pisaqarnerujumallutik piffissaq, sumiiffik periuserlu allanngorartillugit aalisartarput. Uaguttaaq oqaluussinitsinni assingusunik allannguisinnaavugut. Taakkua ilaat sammeriartigit.
Illit oqaluussiffigisartakkanni inuit angerlarsimarpiarneq ajorpata misilillugu piffissami sumiiffinnilu assigiinngitsuni aamma periutsit allat atorlugit oqaluussigit (Immikkoortut 7-10 takukkit) *
7. Piffissani assigiinngitsuni oqaluussisarneq qanoq kinguneqarsinnaava?
7 Piffissani assigiinngitsuni oqaluussisarit. Inuit angerlarsimanissaat ilimagigaangakku oqaluussisarit, taava amerlanerusut naapittassavatit. Allaammi inuit ulapinnerpaat angerlartariaqartarput! Qatannguterpassuagut ualikkut unnulerneraniluunniit oqaluussigaangamik naapitaqarnerusarput. Aamma ullup taamaasinerani inuit ulapinnginnerusaramik oqaloqatigiuminarnerusarput. Imaluunniit utoqqaanertap Davidimik atillip siunnersuutaa iluaqutigisinnaavat. Taanna oqaluusseqatinilu illumiit illumut oqaluussereeraangamik angerlarsimanngitsoorutigisaminnut ingerlaannaq utertarput. David ima oqarpoq: “Uterfigeqqitagut amerlasuut naapittarpagut, tamannalu tupaallaatigisarpara.” *
Illit oqaluussiffigisartakkanni inuit angerlarsimarpiarneq ajorpata misilillugu piffissani assigiinngitsuni oqaluussigit (Immikkoortut 7-8 takukkit)
8. Oqaluussinitsinni Oqaluussisartup oqaasii 11:6-imi allassimasut qanoq maleruarsinnaavagut?
8 Misiliiuartariaqarpugut, tamatuminngalu Oqaluussisartup oqaasiini 11:6-imi eqqaasinneqarpugut. (Atuaruk). David, eqqaaneqareersoq, taamatorluinnaq iliorpoq. Angerlarsimanngitsoorutigisaqattaakkani ullut ilaanni kiisami naapippaa. Naapitaa soqutiginnippoq, imalu oqarpoq: “Ukiut arfineq-pingasungajaat maani najugaqarpunga, aatsaavissuarli Jehovap Nalunaajaasuinit kasuttorfigineqarpunga.” Davidip oqaluttuani ima nangippaa: “Paasinikuuara inuit angerlarsimarpiarneq ajortut naapikkaangatsigit amerlanertigut tusarnaarumasartut.”
Illit oqaluussiffigisartakkanni inuit angerlarsimarpiarneq ajorpata misilillugu sumiiffinni assigiinngitsuni oqaluussigit (Immikkoortoq 9 takuuk)
9. Illumiit illumut naapikkuminaatsut angujumallugit Nalunaajaasut ilaat qanoq iliorsimappat?
9 Sumiiffinni assigiinngitsuni oqaluussisarit. Nalunaajaasut ilaasa illumiit illumut oqaluussinermi naapikkuminaatsut angujumallugit sumiiffiit assigiinngitsut oqaluussiffigisarpaat. Assersuutigalugu aqqusinermi atuagaasiviilluunniit angallattakkat atorlugit oqaluussisarput. Tamannalu inunnik illumiit illumut oqaluussiffigineqaqqusaanngitsuni najugalinnik oqaloqateqarnissaminnut iluaqutigisimaqaat. Aamma oqaluussisartorpassuit niuertarfinni inuillu katersuuffigisartagaanni iluatsilluartumik oqaluussisarput. Floiran, Boliviami ilagiinnik nakkutilliisoq, ima oqarpoq: “Tuniniaavinnut niuertarfinnullu ataatsip pingasullu akornanni oqaluussiartortarpugut, taamaalineranimi pisiniartitsisut ulapinnginnerusarput. Oqaloqateqarluartaqaagut allaallumi atuaqqissaaqatitaartarluta.”
Illit oqaluussiffigisartakkanni inuit angerlarsimarpiarneq ajorpata misilillugu periutsit allat atorlugit oqaluussigit (Immikkoortoq 10 takuuk)
10. Inuit oqaluussiffigiumallugit qanoq allatut iliuuseqarsinnaavugut?
10 Periutsit allat misilittakkit. Illumiit illumut oqaluussininni arlaleriarlutit piffissanilu assigiinngitsuni misiliisaraluarlutit naapikkuminaatsitaqaruit qanoq iliorsinnaavit? Katarína ima oqarpoq: “Oqaluussiffigisartakkanni inuit naapissinnaanngikkaangakkit allaffigisarpakka.” Katarína qanoq ilinniarfigisinnaavarput? Oqaluussiffigisartakkatsinni inuit tamaasa oqaluussiffigiumallugit sapinngisatsinnik iliuuseqartariaqarpugut.
INUIT SOQUTIGINNINNGIKKAANGATA
11. Sooq inuit ilaasa tusarliussarput soqutiginngilaat?
11 Inuit ilaasa tusarliussarput soqutiginngilaat. Guuti Biibililuunniit inuunerminni pisariaqartissorinngilaat. Nunarsuarmi naalliunnartoqangaarmat Guuti upperinngilaat. Aamma upperisarsiornikkut siuttut Biibilimik maleruaanerartut ilumoortuusaarnerat takusaramikku Biibili atorsinnaasorinngilaat. Allat suliffitik, ilaquttatik ajornartorsiutitillu eqqarsaatigiuartarpaat Biibilillu iluaqutaasinnaanera upperinagu. Inuit taamaattut oqaluussiffiginerini qanoq isumalluartuarsinnaavugut?
12. Filippimiut 2:4-mi allassimasut oqaluussinitsinni qanoq iluaqutigisinnaavagut?
12 Inuttut soqutiginninnermik ersersitsisarit. Amerlasuut aallaqqaammut soqutiginninngikkaluarlutik inuttut soqutiginninnermik ersersitsivigineqaramik tusarnaarusulersimapput. (Filippimiut 2:4 atuaruk). David, eqqaaneqareersoq, ima oqarpoq: “Pulaagarput soqutiginninnani oqaraangat Biibili Biibililersaarutigullu ilisarpagut. Taava inussiarnersumik aperisarparput suna pissutigalugu soqutiginninnginnersoq.” Inuit soqutigineqaraangamik malugisinnaasarpaat. Oqaatsigut eqqaamanngikkaluarlugit imaassinnaavoq pissuserinnerput eqqaamassagaat. Allaallumi oqaaseqarnissamut periarfissinngikkaluarpatigut pissusilersornitsigut kiinnatsigullu ersersissinnaavarput soqutigalugit.
13. Oqaluussinitsinni sammisarput pulaagassatsinnut qanoq naleqqussarsinnaavarput?
13 Oqaluussinitsinni sammisarput pulaagassatsinnut naleqqussaraangatsigu inuttut soqutiginninnermik ersersitsisarpugut. Assersuutigalugu kasuttorfigisassatit meerartaqarpasippata, taava immaqa angajoqqaajusut meeqqanik perorsaaneq ilaqutariittulluunniit pilluarnerulernissaq pillugit Biibilimi siunnersuutit soqutigissavaat. Imaluunniit kasuttorfigisassat arlalinnik parnaarsaateqarpat pinerlunnerup ernumanerullu nunarsuarmi nalinginnaaneruleraluttuinnarnera aallarniutigisinnaavat. Taava pinerluttoqarunnaarnissaanik Biibilimi neriorsuutit takutissinnaavatit. Qanorluunniit ikkaluarpat tusarnaarumasut tamaasa paasitinniarsarikkit Biibili qanoq iluaqutigisinnaagaat. Katarínap, eqqaaneqareersup, eqqarsaatigisarpaa Biibili nammineq inuunermini qanoq iluaqutigisimallugu. Taamaattumik saqqummiussami iluaqutaasinnaanerat qularinngilluinnartarpaa, tamannalu oqaluussiffigisaasa malugisarpaat.
14. Ussatit 27:17 naapertorlugu oqaluusseqatigiit qanoq ikioqatigiissinnaappat?
1 Kor 4:17) Uaguttaaq ilagiitsinni misilittagaqarluartut ilinniarfigisinnaavagut. (Ussatit 27:17 atuaruk). Shawn avinngarusimasumi pioneritut kiffartornermini taamaaliorsimavoq. Oqaluussiffigisartagaani inuit amerlanersaasa upperisartik naammagaat. Shawnili nikallunngilaq. Sooruna? Ima oqarpoq: “Ajornanngikkaangat oqaluusseqateqartarpunga. Illumiit illumut oqaluussigaangatta ilinniartitsillaqqinnerulernissamut ikioqatigiittarpugut. Assersuutigalugu pulaaqqammisatta oqaasii uagullu akissutigut eqqartortarpagut. Taava eqqartortarparput tulliani taamatut oqarfigitikkaluarutta qanoq pitsaanerusumik akisinnaanerluta.”
14 Allanit siunnersortittarit. Apustilip Paulusip oqaluusseriaatsini ilinniartitseriaatsinilu Timotheusimut ingerlateqqittarpai, taamatullu allanut iliortaqqullugu kajumissaarpaa. (15. Sooq oqaluussinitsinnut tunngatillugu qinunissaq pingaaruteqangaarpa?
15 Jehovamut ikioqqusarit. Oqaluussilernerit tamaasa Jehovamut siulersoqqusarit, anersaavami illernartoq ikiortigitinnagu arlaannarpulluunniit naammassisaqarsinnaanngilaq. (Tuss 127:1; Luk 11:13) Qinugaangavit qanorpiaq ikiorneqarusunnerit oqaatigisaruk. Assersuutigalugu soqutiginnittut tusarnaarusuttullu angusinnaaqqullugit Jehovamut ikioqqusinnaavutit. Taava qinnutigisannut naapertuuttumik naapitannut tamanut sapinngisannik oqaluussigit.
16. Sooq atuaqqissaartarneq oqaluussinitsinnut taama iluaqutaatigiva?
16 Atuaqqissaartarnissat piffissaqarfigisaruk. Biibilimi ima allassimasoqarpoq: ‘Sianigilersiuk Guutip piumasaa sunaasoq: ajunngitsoq, iluarinartoq, naammalluinnartoq.’ (Rom 12:2) Atuaqqissaaraangatta Guuti pillugu ilumoortut upperinerulertarpagut, tamannalu oqaluussinitsinnut sunniuteqartarpoq. Katarína, eqqaaneqareersoq, ima oqarpoq: “Ungasinngitsukkut paasilerpara Biibilimi ilinniartitsissutigineqartut tunngaviusut upperinerulertariaqarlugit. Taamaattumik ilumut Pinngortitsisoqarneranik, Biibilip Guutimeersuuneranik Guutillu nalitsinni nunarsuarmi peqatigiissortaqarneranik uppernarsaatit misissoqqissaarpakka.” Tamanna Katarínamut qanoq sunniuteqarpa? Uppernerulerpoq oqaluussinermilu nuannaarnerulerluni.
OQALUUSSINITSINNI ISUMALLUARTUARPUGUT
17. Sooq Jiisusi oqaluussinermini isumalluartuarpa?
17 Jiisusip oqaluussiffigisaasa ilaat soqutiginninngillat, taamaattorli isumalluarluni oqaluussiuarpoq. Nalunngilaami inuit sallusuissut qanoq pisariaqartitsigigaat. Aamma sapinngisamik inuit amerlanerpaat uppertunngornissaannut ikiorusuppai. Nalunngilaalu aallaqqaammut soqutiginninngitsut ilaat kingorna ajoqersuganngorumaartut. Jiisusip ilaqutaasa ilaat eqqarsaatigikkit. Jiisusi ukiuni pingasuni affarmilu nunarsuarmi oqaluussimmat ‘qatanngutaasa upperfiginngilaat’. (Joh 7:5) Makititaaneratali kingorna kristumiunngorput. – ApS 1:14.
18. Sooq oqaluussiuarpugut?
18 Kikkut Jehovamik Nalunaajaasunngussanersut naluarput. Inuit ilaat aatsaat sivisuumik atuaqqissaareerlutik Jehovamut kiffanngortarput. Allaallumi tusarnaarusunngitsut pissuserissaarnerput isumalluartuunerpullu takullugu piffissap ingerlanerani ‘Guuti unnersiutigilersinnaavaat’. – 1 Petr 2:12.
19. Oqaluussinitsinnut tunngatillugu Korinthimiunut allakkat siulliit 3:6, 7-imilu qanoq paasitinneqarpugut?
1 Korinthimiut 3:6, 7 atuakkit). Qatanngut angut, Getahun, Etiopiami kiffartortoq ima oqaluttuarpoq: “Najugaqarfigisanni ukiut 20-t sinnerlugit kisima Nalunaajaasuuvunga. Maannali oqaluussisartut 14-iuvugut. Taakkunannga 13-it imermut morsutsinneqareerput, ilaatigut nuliara meeqqagullu pingasut. Ataatsimiikkaangatta 32-t missaanniittarpugut.” Inuit Jehovamit kajungilersinneqarnissaat utaqqitillugu Getahun erinitsajuilluni oqaluussiuarsimavoq, tamannalu pilluaqquneqaatigaa. – Joh 6:44.
19 Oqaluussinitsinni sallusuissutip naatsiiassartaanik ikkussuillutalu imerteritilluta eqqaamasariaqarparput Guuti naajartortitsisuusoq. (20. Oqaluussinerput annaassiniarnermut qanoq assersuunneqarsinnaava?
20 Jehovap inuit tamaasa annannissamut periarfissikkusuppai. Silarsuatoqqap matuma naggatissaata tungaanut Ernini inunnik nunani tamaneersunik katersuitippaa, uagullu ikiuussinnaatippaatigut. (Hagg 2:7) Oqaluussinerput annaassiniarnertut ippoq. Assersuutigalugu umiiartoqarsimatillugu annaassiniartunik aallartitsisoqartarpoq. Annaanneqartut ikittuinnaagaluarpataluunniit annaassiniaqataasut tamarmik suliaat pingaaruteqangaarpoq. Aamma oqaluussinitsinni taamaappoq. Inuit qassit Saatanip silarsuatoqaaniit annaanneqassanersut naluarput. Jehovallu taakkuninnga ikiuinermini tamatta atorsinnaavaatigut. Andreas Boliviami najugalik ima oqarpoq: “Nalunngilara aatsaat amerlasuut ikioqatigiikkaangata soqutiginnittoq anersaakkut ineriartorsinnaasoq Nalunaajaasunngorlunilu.” Qanortoq uaguttaaq oqaluussinitsinni isumalluartuarisa! Tamanna Jehovamit pilluaqquneqaatigalugulu oqaluussinitsinni nuannaalissutigissavarput.
ERINARSUUT 57 Inunnut tamalaanut oqaluussivugut
^ imm. 5 Oqaluussinitsinni inuit angerlarsimanngikkaangata soqutiginninngikkaangataluunniit qanoq isumalluartuarsinnaavugut? Siunnersuutit iluaqutigisinnaasagut allaaserisami matumani sammissavagut.
^ imm. 7 Allaaserisami matumani oqaluussinermut siunnersuutit maleruartillugit inunnik paasissutissanik suliarinnittarneq pillugu inatsit sapinngisamik malinneqartariaqarpoq.
^ imm. 60 ASSIMI MALUGISASSAT: (qulaaniit ammut): Aappariit illumiit illumut oqaluussisut, angerlarsimasoqarpianngilarli. Kasuttorfigisaat siulleq sulivoq, tullia nakorsiarpoq pingajuallu pisiniarfileraluni. Siulleq kingusinnerusukkut angerlarsimasoq uterfigivaat. Tullia nakorsiartarfiup eqqaani atuagaasiviit angallattakkat atorlugit oqaluussinerminni naapippaat. Pingajuat sianerfigivaat.