1-2. Inuuner­put allan­ngoraangat sooq allas­simaf­fiit ilaat isumaqar­neruler­tar­pat?

 INUUNER­PUT allan­ngoraangat najoq­qutas­siat Biibilimeersut uagutsin­nut isumaqar­neruler­tar­put. Assersuutigalugu katit­tus­sat aap­pariin­nermut tun­ngasunik siun­nersuutit Biibilimeersut pil­lugit oqalugiarfigineqar­tar­put. Najoq­qutas­siat eqqar­tor­neqar­tut aatsaat tusalin­ngilaat. Ullormiilli katif­fian­niit isumaqar­neruler­put. Sooq? Aap­pariit­tut maleruar­tus­san­ngoramik­kit.

² Aap­pariin­nut angajoq­qaan­ngor­tunut aamma taamaap­poq. Meeq­qat qanoq perorsar­neqarsin­naasut pil­lugu oqalugiaater­pas­suit tusar­naarsimavaat. Qitor­nar­taarmatali siun­nersuutit taak­kunani eqqar­tor­neqarsimasut isumaqar­neruler­put. Qitor­nar­taar­tik nam­min­neq perorsar­tus­saavaat. Taman­nalu akisus­saaf­ferujus­suuvoq! Ersarip­poq inuuner­put allan­ngoraangat najoq­qutas­siat Biibilimeersut nalun­ngil­luak­kagut isumaqarluar­neruler­tar­tut. Taamaat­tumik Jehovamut kif­far­tor­tut itsaq Israalimi kun­nginut peq­qus­sut maleruarlugu ‘inuuner­tik tamaat’ Biibili atuarlugulu atuak­katik eqqarsaatigeq­qis­saar­tar­paat. – Mos 5. 17:19.

3. Allaaserisami matumani suut sam­mis­savagut?

 ³ Angajoq­qaajususi, kristumiup akisus­saaf­figisin­naasaasa pingaar­nersaasa ilaat akisus­saaf­figaarsi, tassa meeq­qassi Jehova pil­lugu ilin­niar­tin­nis­saat. Guuter­pulli pil­lugu ilisimas­sutis­siin­narusun­ngilasi. Meeq­qasi Jehovamik asan­nin­nis­saan­nut ikiorusup­pasi. Qanoq taamaaliorsin­naavisi? Allaaserisami matumani siun­nersuutit Biibilimeersut sisamat iluaqutigisin­naasatit sam­mis­savagut. (Tim 2. 3:16) Aamma angajoq­qaat kristumiut siun­nersuutit Biibilimeersut qanoq iluaqutigisimaneraat sam­mis­savar­put.

4. Angajoq­qaat meeq­qatik Jehovamik asan­nin­nis­saan­nut ikior­neranni suna iluaqutigisin­naavaat? (Jaaku 1:5)

⁴ Siunnersuut siulleq: Jehovamit siulersortigitsi. Meeq­qasi Jehovamik asan­nin­nis­saan­nut ikiorsin­naajumal­lugit ilisimas­suseqar­tariaqar­pusi, taamaat­tumik Jehovamut ikioq­qugitsi. (Jaaku 1:5 atuaruk). Jehova siun­nersuil­laq­qin­ner­paavoq. Sooq? Ilaatigut uku marluk pis­sutigalugit. Siul­ler­tut, angajoq­qaatut misilit­tagaqar­ner­paavoq. (ApS 17:28) Aap­paat­tullu, siun­nersuutai iluaqutaajuaan­nar­put. – Es 48:17.

5. (a) Jehovap peqatigiis­sor­taasa angajoq­qaat ikiorumal­lugit suut saq­qum­mersit­tar­paat? (b) Isigin­naagas­siami takutin­neqar­tutut aap­pariit Amorimik­kut qitor­namin­nik perorsaanerat qanoq ilin­niarfigaajuk?

⁵ Jehovap angajoq­qaat meeq­qamin­nik perorsaanerminni iluaqutigisin­naasaan­nik Biibilimi siun­nersor­tar­pai. Aamma Jehovap peqatigiis­sor­taasa Biibililersaarutit perorsaanermut tun­ngasut saq­qum­mersit­tar­paat. (Mat 24:45) Assersuutigalugu allaaserisani ataqatigiinni “Ilaqutariin­nut iluaqutis­sat”-ni siun­nersuutitsialaat atuarsin­naavasi. * Aamma jw.org-imi apersuinerit piviusuusaar­titallu angajoq­qaat qitor­namin­nik perorsaanerminni iluaqutigisin­naasaat isigin­naar­neqarsin­naap­put. * – Uss 2:4-6.

6. Ataataasoq nulianilu Jehovap peqatigiis­sor­taanit siulersor­neqar­ner­tik pil­lugu qanoq misigiva?

⁶ Jehovap peqatigiis­sor­tani aqqutigalugit  ikiuisimanera angajoq­qaar­pas­suit qujamasuutigingaarsimavaat. Ataataasoq Joemik atilik ima oqalut­tuar­poq: “Meeq­qat pingasut Jehovamut kif­far­tuleq­qul­lugit perorsar­nis­saat imaan­naan­ngitsuuvoq. Nuliaralu Jehovamut ikioq­qujuar­pugut. Misigisar­pugullu ajor­nar­torsior­nitsinni iluaqutigisin­naasatsin­nik allaaserisaq isigin­naagas­siarluun­niit pif­fis­saal­luar­tumi saq­qum­mersin­neqar­tar­toq. Jehovap siun­nersuutai tamatigut ator­tarsimavagut.” Joep nuliatalu paasisimavaat allaaserisat isigin­naagas­siallu taamaat­tut iluaqutigalugit qitor­natik Jehovamut attaveqarluar­nerulersimasut.

7. Sooq angajoq­qaat maligas­siuil­luar­tariaqar­pat? (Romamiut 2:21)

⁷ Siunnersuutit aappaat: Maligas­siuisaritsi. Meeq­qat angajoq­qaatik maluginiaq­qis­saar­tar­paat isigisatillu ilaar­tarlugit. Soorunami angajoq­qaat tamarmik naam­mal­luin­nan­ngitsuup­put. (Rom 3:23) Taamaat­tumik meeq­qamin­nut maligas­saal­luarumal­lutik angajoq­qaat sapin­ngisamin­nik iliuuseqar­tariaqar­put. (Romamiut 2:21 atuaruk). Ataataasoq meeq­qat pil­lugit ima oqar­poq: “Svampitut sunik tamanik mil­luaasutul­lusooq ittar­put. Iliuutsigut ilin­niar­titsis­sutiginiak­katsin­nut naaper­tuutin­ngik­kaangata pis­susilersor­neran­nit malun­nar­tar­poq.” Tassa meeq­qatta Jehovamik asan­nin­nis­saat kis­saatigigutsigu Jehovamik asan­ningaar­ner­put erseq­qit­tariaqar­poq.

8-9. Andrewip Emmallu oqaasii qanoq ilin­niarfigaagit?

⁸ Assigiin­ngitsor­pas­suar­tigut angajoq­qaat qitor­natik Jehovamik asan­nin­nis­saan­nut ilin­niar­tis­sin­naavaat. Qatan­ngut 17-inik ukiulik Andrewimik atilik ima oqalut­tuar­poq: “Angajoq­qaama qinunerup pingaaruteqar­nera erseq­qis­sar­tuaan­nar­paat. Unnuit tamaasa nam­mineq qinoreeraluaraangamaluun­niit Ataatama qinoqatigisar­paanga. Angajoq­qaama ima eqqaasit­tuaan­nar­paan­nga: ‘Qaquguk­kul­luun­niit Jehova oqaloqatigisarsin­naavat.’ Taamaat­tumik qinuneq pingaar­tingaaler­para, Jehovalu Ataatatut asan­nit­tutut isigisarakku qinuneq maanna nuan­narisar­para.” Angajoq­qaajususi, Jehovamik asan­nin­nissi qitor­nas­sin­nut qanoq sun­niuteqarsin­naanera eqqaamajuarsiuk.

⁹ Qatan­ngutip arnap Emmamik atil­lip anaanaa aamma maligas­saal­luar­tuusimavoq. Ataataata qimam­matik anaanaa akiitsor­pas­suaqaler­poq. Emma ima oqalut­tuar­poq: “Anaanama pisariaqar­tunut akis­saaleqisaraluarluni Jehovap kif­far­torfigin­nitsiminik isumagin­nit­tar­nera ikiuisar­neralu eqqar­tor­tuaan­nar­pai. Inooriaasianit takusin­naasar­para oqaatsini upperil­luin­narai. Anaanama ilin­niar­titsis­sutigisani nam­mineq maleruar­tar­pai.” Emmap misigisaa qanoq ilin­niarfigaar­put? Angajoq­qaat ajor­nar­torsioraluarlutik maligas­saal­luarsin­naap­put. – Gal 6:9.

10. Angajoq­qaat Israalik­kuusut qitor­namin­nik oqaloqateqar­nis­samin­nut qaquguk­kut periarfis­saqar­tar­pat? (Mosesimik 5. 6:6, 7)

¹⁰ Siunnersuutit pingajuat: Qitornasi oqaloqatigikulasarsigit. Israalik­kut peq­quneqar­put Jehova pil­lugu qitor­natik ilin­niar­tis­sagaat. (Mosesimik 5. 6:6, 7 atuakkit). Angajoq­qaat taamanik­kut qitor­namin­nik oqaloqatigin­nin­nis­samin­nut Jehovalu pil­lugu ilin­niar­titsinis­samin­nut periarfis­sar­pas­suaqar­put. Assersuutigalugu nukap­piaq­qap Israalik­kuusup immaqa tiimer­pas­suit atorlugit ataatani naasoris­saanermi ikior­tar­paa. Niviarsiaq­qallu ullup annersaani illulerinermi, mersor­nermi ikaar­titerinermilu anaanani ikior­tarsimavaa. Angajoq­qaat meeq­qallu suleqatigiit­taramik pingaarutilip­pas­suit oqaloqatigiis­sutigisarsin­naavaat. Assersuutigalugu Jehovap  ajun­ngitsuunera Jehovamillu ikior­neqar­tar­ner­tik eqqar­torsin­naavaat.

11. Angajoq­qaat kristumiut qitor­natik qaquguk­kut oqaloqatigisarsin­naavaat?

¹¹ Nalitsin­nili pis­sutsit allan­ngorsimap­put. Sumiif­fip­pas­suarni ullup ilarujus­suani angajoq­qaat meeq­qallu peqatigiin­neq ajor­put. Angajoq­qaat sulisar­put meeq­qallu atuar­tarlutik. Taamaat­tumik angajoq­qaat meeq­qatik oqaloqatigiumal­lugit periarfis­sarsior­tariaqar­tar­put. (Ef 5:15, 16; Flp 1:10) Ilaatigut ilaqutariit­tut atuaq­qis­saaqatigiin­nermi taamaaliorsin­naap­put. Qatan­ngut angut inuusut­toq Alexanderimik atilik ima oqar­poq: “Ataatama ilaqutariit­tut atuaq­qis­saaqatigiin­nis­saq isumagiuaan­nar­paa, sunaluun­niillu akor­nutaatin­neq ajor­paa. Atuaq­qis­saaqatigeereeraangatta oqaloqatigiit­tar­pugut.”

12. Ilaqutariit­tut atuaq­qis­saaqatigiin­nermi ittuusup suna eqqaamasariaqar­paa?

¹² Angajoq­qaat meeq­qatik ikiorusuk­kamik­kit misigis­sutsimin­nik oqalut­tuar­tar­nis­saat kis­saatigaat. Taamaat­tumik ilaqutariinni ittuusup ilaqutariit­tut atuaq­qis­saaqatigiin­ner­tik meeq­qamin­nut nuan­nersuutik­kusup­paa. Biibililersaarut nutaaq Naassaanngitsumik pilluarsinnaavutit! sam­mitil­lugu meeq­qatillu ammasumik oqaloqatigiit­tarsin­naap­put. Angajoq­qaalli paasigunikku meerar­tik kuk­kusumik isigin­nit­taaseqar­toq qisuariapiloor­natik meeq­qamik unneq­qaril­luni misigis­sutsiminik oqalut­tuar­nera qujamasuutigisariaqar­paat. Atuaq­qis­saaqatigiin­ner­tik nuan­nersuutik­kusuk­kamikku unnummi tamatumani meeq­qat isor­nar­torsior­naveersaar­tariaqar­paat.

13. Ilaqutariit­tut atuaq­qis­saaqatigiin­ngik­kaluarlutik angajoq­qaat meeq­qatik Jehovamut qanil­linis­saan­nut qanoq ikiorsin­naavaat?

¹³ Angajoq­qaat ilaqutariit­tut atuaq­qis­saaqatigiin­nis­sar­tik utaq­qin­ngik­kaluarlugu meeq­qatik Jehovamut qanil­linis­saan­nik ilin­niar­tis­sin­naavaat. Anaanaasoq Lisa oqalut­tuar­poq meeq­qaminik ilin­niar­titsinermini Jehovap pin­ngor­titai ator­tarlugit. Assersuutigalugu qim­mer­tik quianar­tumik iliuuseqaraangat Jehovamut atas­suserlugu meeq­qani ima oqarfigisar­pai: “Jehova uagutsitulli quiasaal­laq­qis­suuvoq inuunermillu nuan­narin­nit­tuul­luni.”

14. Sooq angajoq­qaat meeq­qatik pitsaasunik ikin­ngutitaar­nis­saan­nut ikior­tariaqar­paat? (Ussatit 13:20)

 ¹⁴ Siunnersuutit sisamaat: Meeq­qasi pitsaasunik ikin­ngutitaarnis­saan­nut ikiorsigit. Biibilimi paasivar­put ikin­ngutitta ajun­ngitsumik ajor­tumil­luun­niit sun­ner­taraatigut. (Ussatit 13:20 atuaruk). Taamaat­tumik meeq­qassi ikin­ngutaat ilisarisimal­lualerumal­lugit peqatigiik­kaangata sam­misaqaqatigisarsigit. Aamma meeq­qasi Jehovamik asan­nit­tumik ikin­ngutitaar­niar­neranni ikiorsin­naavasi. (Kor 1. 15:33) Assersuutigalugu ilaqutariit­tut sam­misaqaqatigiin­nis­sin­nut Jehovamut attaveqarluar­tut qaaq­qusarsin­naavasi. – Tuss 119:63.

15. Angajoq­qaat meeq­qatik pitsaasunik ikin­nguteqar­nis­saan­nut qanoq ikiorsin­naavaat?

¹⁵ Tonyp nulianilu meeq­qatik pitsaasunik ikin­ngutitaarsin­naaq­qul­lugit qanoq ikiorsimal­lugit ima oqalut­tuaraa: “Qatan­ngutit inuusun­nerusut utoq­qaanerusullu assigin­ngitsunik tunuliaqutal­lit – ilaatigut ilagiin­nik nak­kutil­liisut, oqaluus­sisar­tutut aal­lar­titat allallu – qaaq­qusar­nikuuagut. Qaaq­qusagut ilaan­nik­kut nereqatigisar­pagut ilaqutariit­tul­luun­niit atuaq­qis­saaqatigiin­nitsin­nut ilaatit­tarlugit. Taamaalior­tarsimagatta Jehovamut kif­far­tor­nermin­nik nuan­narin­nit­tut ilisarisimal­lualer­pagut. Misigisalik­kersaarutaat, aal­lus­sil­luar­nerat imminullu pil­liutigeriaan­naanerat meeq­qatta ilin­niarfigaat Jehovamullu qanil­lis­sutigalugit.” Angajoq­qaajususi, meeq­qasi pitsaasunik ikin­ngutitaar­nis­saan­nut ikior­tarsigit!

16. Qitor­naasoq Jehovamut kif­far­torusun­ngip­pat angajoq­qaat suna eqqaamasariaqar­paat?

¹⁶ Qitor­nar­put sapin­ngisatsin­nik ilin­niar­tit­taraluarlugu aalajangersin­naavoq Jehovamut kif­far­tor­niar­nani. Qitor­naasup Jehova tunup­pagu angajoq­qaajusut misigisin­naap­put kuk­kusimal­lutik. Eqqaamasariaqar­paalli kik­kut tamarmik Jehovamut kif­far­torusun­nerlutik nam­mineq aalajangiisin­naatitaasut. Ilissi qitor­nassi Jehova qimas­simap­pagu uteq­qin­nis­saa neriuutigiuaan­narsiuk. Ernermik tam­mar­tumik assersuusiami qanoq pisoqar­toq eqqaamasiuk. (Luk 15:11-19, 22-24) Tas­sani angut inuusut­toq inuunerlus­simagaluar­toq  ataataminut uter­poq. Ilumulli taamatut pisoqarsin­naava? Aap. Angutip inuusut­tup Eliemik atil­lip misigisaa sam­meriar­tigu.

17. Eliep misigisaa qanoq qiim­maal­laatigaajuk?

¹⁷ Elie oqalut­tuar­poq meeraanerminiilli angajoq­qaaminit Jehovamik asan­nin­nis­saminik ilin­niar­tin­neqar­tarsimal­luni. Inuusut­tuaraal­lunili kristumiutut inuugaluarluni iser­torluni ajor­tulior­taler­poq. Angajoq­qaavisa ikior­niaraluar­paat, tusaajuman­ngilaali Jehovalu qimal­lugu. Ima oqalut­tuar­poq: “Angajoq­qaakka qimareerlugit ikin­ngutigalu Biibili pil­lugu eqqar­tuikulasar­pugut. Biibili eqqar­tor­nerujar­tor­til­lugu angajoq­qaama ilin­niar­titsis­sutiginikuusaat eqqarsaatigisaler­pakka Jehovamullu uterusulerlunga.” * Uter­nerata kingorna angajoq­qaavisa sapin­ngisamin­nik meeraaneraniit ilin­niar­tin­niar­tarsimagamikku qujamasuutigisimas­savaat. – Tim 2. 3:14, 15.

18. Angajoq­qaat meeq­qamin­nik perorsaanerminni ilungersor­tut pil­lugit qanoq misigivit?

¹⁸ Meeq­qat Jehovamut kif­far­tor­tun­ngoq­qul­lugit perorsarsin­naanerat angajoq­qaanut tunis­sutaavoq akisus­saaf­fit­talik nuan­nersoq. (Tuss 78:4-6) Angajoq­qaat ilungersorlutik pif­fis­sarujus­suaq ilin­niar­titsinermut ator­tarmas­suk nersualaarusup­pagut. Angajoq­qaallu qularin­ngis­sin­naavaat meeq­qatik Jehovamik asan­nin­nis­saan­nik ilin­niar­tin­niarlugit sapin­ngisamin­nik iliuuseqaraangata Ataatar­put asan­nit­toq qilam­miusoq nuan­naar­tar­toq! – Ef 6:4.