1. Guutip innut­tai pil­lugit Saq­qum­mersitani suna paasinarsisin­neqarpa?

 SAQ­QUM­MERSITANI paasinarsisin­neqar­poq Guutip qilammi kun­ngeqarfia pilersin­neqarsimasoq Saatanilu qilam­mit anisitaasimasoq. (Saqq 12:1-9) Tamanna qilammi eqqis­sinermik kinguneqaraluar­toq uagutsin­nut ilungersunar­tumik kinguneqar­poq. Sooq? Saatanip maani nunarsuarmi aalajaal­lutik Jehovamut kif­far­tor­tut kamaal­lugit saas­sut­tarmagit. – Saqq 12:12, 15, 17.

2. Aalajaat­tuar­nis­samut suna iluaqutigis­savarput?

² Saatanimit saas­sun­neqar­nitsinni qanoq aalajaat­tuarsin­naavugut? (Saqq 13:10) Siunis­sami pisus­sanik ilisiman­nin­neq ilaatigut iluaqutigisin­naavar­put. Assersuutigalugu Saq­qum­mersitani apustilip Johan­nesip ajun­ngisaarfigineqar­nerit nuan­nersut qanit­tuk­kut misigisas­satta ilaat allaatigai. Guutip akeraasa suujun­naarsitaanis­saat ajun­ngisaarfigineqar­nerit taak­kua ilagaat. Saq­qum­mersitat naaper­torlugit akeq­qat taakku qanoq ittuunerat qanorlu pineqar­nis­saat maanna misis­soriar­tigu.

3. Saq­qum­mersitani assersuutit ator­neqar­tut ilaat suuppat?

³ Saq­qum­mersitani versimi siul­lermi ilisimatin­neqar­pugut paasis­sutis­sat atualik­kagut ‘assersuutitut’ allan­neqarsimasut. (Saqq 1:1) Guutip akerai assersuutaasumik allaatigineqar­put. Taava kingusin­nerusuk­kut uumasut nujuar­tat arlal­lit allaatigineqar­put. Assersuutigalugu allas­simavoq “uumasoq nujuar­taq qulinik nas­sulik arfineq-marlun­nillu niaqulik imaanit qaqisoq”. (Saqq 13:1) Uumasup taas­suma malitsigaa “uumasoq nujuar­taq alla nunarsuarmit qaqisoq”. Uumasoq taanna pulateriaarsuusarujus­suar­tut oqalut­tar­poq, aamma “inneq qilam­mit nunarsuarmut nak­kar­tit­tar­paa”. (Saqq 13:11-13) Taava  uumasoq alla, “uumasoq nujuar­taq aap­pal­laris­soq” ator­tit­tar­tumit issiaf­figineqar­toq, saq­qum­mer­poq. Uumasut nujuar­tat taakku Jehovamut Guutimut kun­ngeqarfianullu sivisuumik akeraasimap­put. Taamaat­tumik kik­kuunersut paasis­sal­lugu pingaaruteqar­poq. – Saqq 17:1, 3.

4-5. Assersuutit paasinis­saan­nut Danieli 7:15-17 allas­simasut qanoq iluaqutigaagut?

⁴ Akeq­qat taakku kik­kuunerat paasin­ngin­nerani assersuutit qanoq isumaqar­nersut paasisariaqar­par­put. Biibilip imminut nas­suiar­tin­nis­saa tamatumani pingaaruteqarluin­nar­poq. Saq­qum­mersitani assersuutit ator­neqar­tut amerlanersaat Biibilimi atuak­kani allani nas­suiar­neqareer­put. Assersuutigalugu pruf­fiiti Danieli ‘nersutit angisoorsuit sisamat imaanit qaqisut’ pil­lugit sin­nat­tor­poq. (Dan 7:1-3) Sumut assersuutaanerat Danielip nas­suiar­paa. Nersutit angisoorsuit taakku ‘kun­nginut’, imaluun­niit naalagaaf­fin­nut, sisamanut assersuutaap­put. (Danieli 7:15-17 atuakkit). Nas­suiaat tamanna paasiuminar­toq iluaqutigalugu paasivar­put Saq­qum­mersitani uumasut allaatigineqar­tut politik­kik­kut pis­saanilin­nut innersuus­sutaasut.

⁵ Maanna Saq­qum­mersitani assersuutit ilaat misis­soriar­tigit. Misis­sor­neranni assersuutit isumaan­nik paasin­nin­nis­samut Biibilimi qanoq ikior­neqar­tugut sam­mis­savar­put. Uumasut nujuar­tat aal­lar­niutigis­savagut. Siul­ler­tut, kik­kun­nut assersuutaanersut paasis­savar­put. Aap­paat­tut, uumasut qanoq pineqas­sanersut sam­mis­savar­put. Kingul­ler­tullu, pisut taakku uagutsin­nut qanoq sun­niuteqas­sanersut misis­sus­savar­put.

6. Uumasoq nujuar­taq arfineq-marlun­nik niaqulik sumut assersuutaava? (Saq­qum­mersitat 13:1-4)

⁶ Uumasoq nujuartaq arfineq-marlunnik niaqulik sumut assersuutaava? (Saqqummersitat 13:1-4 atuakkit). Maluginiar­par­put uumasoq taanna milakulaatut isik­koqar­toq, nan­nutulli isigaqarlunilu løvitut qaneqar­poq qulinillu nas­soqarluni. Danieli kapitali 7-imi nersutit sisamat eqqaaneqar­tut aamma taak­kunin­nga ilisar­naateqar­put. Saq­qum­mersitanili uumasoq ataasiin­naq taak­kunin­nga tamanik ilisar­naateqar­poq. Uumasoq nujuar­taq taanna naalagaaf­fim­mut, imaluun­niit nunarsuarmi naalagaaf­fis­suarmut, ataasiin­narmut assersuutaan­ngilaq. Allas­simavoq “naggueqatigiin­nut, inuian­nut, qanorluun­niit oqaasilin­nut inuiaqatigiin­nullu tamanut” naalak­kersuisoq. Tassa nunat naalak­kersuisuinit tamanit annerusimas­saaq. (Saqq 13:7) Taamaat­tumik uumasoq nujuar­taq taanna oqalut­tuarisaanermi politik­kik­kut pis­saanilin­nut inun­nut naalak­kersuisimasunut tamanut assersuutaasimas­saaq. * – Oqal 8:9.

7. Uumasup nujuar­tap niaqui arfineq-marluk sunut assersuutaappat?

⁷ Niaqqut arfineq-marluk sunut assersuutaappat? Saq­qum­mersitat kapitali 13-imi uumasup eqqaaneqar­tup kapitali 17-imi aamma allaatigineqar­nera iluaqutigaar­put. Saq­qum­mersitat 17:10-mi allas­simavoq: “Taakku kun­nginut arfineq-marlun­nut assersuutaap­put: Tal­limat pis­saaneqarun­naareer­put, ataaseq maaniip­poq, alla suli tikiutin­ngilaq. Tikiuk­kunili sivikitsuin­narmik pis­saaneqas­saaq.” Politik­kik­kut pis­saanil­lit ilaat arfineq-marluk Saatanip atorsimasai pis­saaneqangaar­nerat pis­sutigalugu ‘niaq­qunut’ assersuun­neqar­put. Taakku nunarsuarmi naalagaaf­fis­suup­put Guutip innut­taanut sun­niuteqangaarsimasut. Apustilip Johan­nesip nalaani taak­kunan­nga tal­limat saq­qum­mereersimap­put: Egypteni, Assyria, Babylonni, Medo-Persia Grækenlandilu. Johan­nesip takorluuisitaanerata nalaani  nunarsuarmi naalagaaf­fis­suit arfer­ngat, Roma, suli naalak­kersuivoq. Naalagaaf­fik sorleq kingul­liul­luni arfineq-aap­paat­tut nunarsuarmi pis­saaneqar­ner­paan­ngus­sava, imaluun­niit niaqun­ngus­sava?

8. Suut uumasup nujuar­tap niaquisa arfineq-aap­paan­nut assersuutaappat?

⁸ Maanna Danielimik allak­kani siulit­tuutit iluaqutigalugit uumasup nujuar­tap niaquisa arfineq-aap­paata kingul­lersaatalu sumut assersuutaanera paasis­savar­put. Naalagaaf­fik sorleq naggatis­sap nalaani, ‘Naalak­kap ulluani’, pis­saaneqar­ner­paava? (Saqq 1:10) Tuluit Nunaat aamma USA suleqatigiil­lutik nunarsuarmi pis­saaneqar­ner­paap­put. Taamaat­tumik iner­niliisin­naavugut taakku tas­saasut uumasup nujuar­tap niaquisa arfineq-aap­paat Saq­qum­mersitat 13:1-4 eqqaaneqar­toq.

9. Uumasoq nujuar­taq ‘savaaq­qatut marlun­nik nas­sulik’ sumut assersuutaava?

⁹ Saq­qum­mersitat kapitali 13-imi paasivar­put niaq­qut arfineq-aap­paat, Tuluit Nunaat USA-lu, uumasutut nujuar­tatut ‘savaaq­qatut marlun­nik nas­sulit­tut, pulateriaarsuusarujus­suar­tulli oqalulersutut’ illuni iliuuseqar­tar­toq. Uumasoq “tupin­nangaar­tulior­tar­poq, allaat inuit isigitil­lugit inneq qilam­mit nunarsuarmut nak­kar­tit­tar­paa”. (Saqq 13:11-15) Saq­qum­mersitat kapitalini 16-imi 19-imilu uumasoq nujuar­taq taanna ‘pruf­fiititut ilumuun­ngitsutut’ allaatigineqar­poq. (Saqq 16:13; 19:20) Danielip tamatumun­nga assingusoq eqqaavaa, tassa Tuluit Nunaata USA-llu nunarsuarmi pis­saaneqar­ner­paatut ‘asseqan­ngitsumik piuneerutitsis­sasut’. (Dan 8:19, 23, 24) Sorsun­nersuarmi kingul­lermi taamator­piaq pisoqar­poq. Atombombit marluk Maneras­suarmi sorsun­nerup unitsin­neqar­neranut pis­sutaaqataasut ilisimatuunit tulun­nit Amerikamiunillu qaar­tar­tuliaap­put. Tuluit Nunaata USA-llu nunarsuarmi pis­saaneqar­ner­paatut qaar­tar­tulior­nermik­kut ‘inneq qilam­mit nunarsuarmut nak­kar­tit­tar­paat’.

10. “Uumasup nujuar­tap siul­liup assinga” sumut assersuutaava? (Saq­qum­mersitat 13:14, 15; 17:3, 8, 11)

¹⁰ Taava uumasoq nujuar­taq alla saq­qum­mer­poq. Taanna uumasumut nujuar­tamut arfineq-marlun­nik niaqulim­mut assinguvoq, aap­pal­laris­suuninili allaanerus­sutigaa. “Uumasup nujuar­tap siul­liup assinganik” taaneqar­poq ‘kun­ngillu arfineq-pingajuat­tut’ allaatigineqarluni. * (Saqqummersitat 13:14, 15; 17:3, 8, 11 atuakkit). ‘Kun­ngi’ taanna saq­qum­mersimasutut, peerus­simasutut kingusin­nerusuk­kullu saq­qum­meq­qit­tus­satut allaatigineqar­poq. Tamanna Naalagaaf­fin­nut Peqatigiin­nut, FN-imut, nunarsuarmi politik­kik­kut pis­saanil­lit soqutigisaan­nik siuarsaasumut, tul­luangaarami! Siul­lermik Folkeforbunditut saq­qum­mer­poq. Taava sorsun­nersuup kingul­liup nalaani peerup­poq. Kingusin­nerusuk­kullu ullumik­kut ilisimasatsitut saq­qum­meq­qil­luni.

11. Uumasut nujuar­tat susar­pat, aamma sooq siooragisariaqan­ngilagut?

¹¹ Uumasut nujuar­tat, tassa naalak­kersuisut, eqqun­ngitsumik paasis­sutis­siisar­nermik­kut Jehovamik innut­taanillu akerlilersueq­qusisar­put. Taak­kua ‘nunarsuarmi tamarmi kun­ngit Guutip Kil­leqan­ngitsumik Pis­saanil­lip ullus­sarsuani’, tassa Harmagedon­nimi, sorsun­nis­samut assersuutaasumik katersus­savaat. (Saqq 16:13, 14, 16) Siooranis­samulli pis­sutis­saqan­ngilagut. Guuter­put pis­sarsuaq, Jehova, naalak­kersuinerminik tapersersuisut tamaasa annaak­kumal­lugit iliuuseqapal­las­saaq. – Ez 38:21-23.

12. Uumasut tamarmik qanoq pineqas­sappat?

 ¹² Uumasut tamarmik qanoq pineqas­sappat? Tamanna Saq­qum­mersitat 19:20-mi akineqar­poq: “[Uumasoq] nujuar­taq pruf­fiitilu ilumuun­ngitsoq, uumasup nujuar­tap saavani tupin­nar­tulior­tar­nermigut uumasup nujuar­tap nalunaaqutaanik nalunaaqutser­neqarsimasunik assinganillu pal­lorfigin­nit­tunik tam­mar­titsisoq, tigusaap­put. Taakku marluk tatsimut ikual­las­saam­mik ikumasumut uumatil­lugit naloriun­neqar­put.” Tassa Guutip politik­kik­kut pis­saanil­lit akeq­qani naalak­kersuitil­lugit qaqugorsuarmut suujun­naarsis­savai.

13. Politik­kik­kut pis­saanil­lit pis­sutigalugit kristumiut sunik unam­miniagaqarpat?

¹³ Tamanna uagutsinnut qanoq sunniuteqarpa? Kristumiuugatta Guuti kun­ngeqarfialu ilumoorfigisariaqar­pagut. (Joh 18:36) Taamaaliorumal­luta politik­kimut akuliutin­ngisaan­nar­tariaqar­pugut. Nunarsuarmi naalak­kersuisut oqaatsitigut iliuutsitigullu tamak­kiisumik tapersersor­neqar­nis­sar­tik piumasarisarmas­suk tamanna assut saper­narsin­naavoq. Tatineqar­nermut nak­kaan­nar­tut uumasup nujuar­tap nalunaaqutaanik nalunaaqutser­neqas­sap­put. (Saqq 13:16, 17) Kinaluun­niilli taama nalunaaqutser­neqar­toq Jehovamit iluarisaas­sananilu naas­saan­ngitsumik inuuneqas­san­ngilaq. (Saqq 14:9, 10; 20:4) Taamaat­tumik pingaaruteqarluin­nar­poq tamatta immik­kut qanorluun­niit tatineqaraluarutta politik­kimut akuliutin­ngil­luin­nar­nis­sar­put!

14. Apustilip Johan­nesip tupaal­lan­nar­toq alla suna takuaa? (Saq­qum­mersitat 17:3-5)

¹⁴ Apustilip Johan­nesip takusani alla pis­sutigalugu ‘assut tupigutsan­nini’ eqqaavaa. Suna takugamiuk? Arnaq uumasut qaasut­tut taak­kua ilaanni issiasoq. (Saqq 17:1, 2, 6) ‘Arnatut ator­tit­tar­torsuar­tut’ isik­koqar­poq ‘Babylon­nersuarmil­lu’ taaneqarluni. ‘Nunarsuarmi kun­ngit atoqatigiin­nik­kut eqqun­ngitsulioqatigisar­pai’. – Saqqummersitat 17:3-5 atuakkit.

15-16. “Babylon­nersuaq” sumut assersuutaava, taman­nalu qanoq nalun­ngilarput?

¹⁵ “Babylonnersuaq” sumut assersuutaava? Arnaq taanna nunarsuarmi politik­kik­kut siulersor­tinik atoqatigiin­nik­kut eqqun­ngitsulioqateqar­tar­tutut allaatigineqarami politik­kik­kut peqatigiif­fin­nut assersuutaasin­naan­ngilaq. (Saqq 18:9) Allaat assersuutaasumik issiaf­figinerisigut naalak­kersuisut aqun­niar­tar­pai. Aamma Saatanip silarsuaani niuer­nik­kut aaq­qis­suus­sanut piumatuunut, ‘nunarsuarmi niuer­tutut’ allaatigineqar­tunut, assersuutaasin­naan­ngilaq. – Saqq 18:11, 15, 16.

¹⁶ Biibilimi oqaaseq “ator­tit­tar­toq” Guutimut kif­far­tor­neraraluarlutik guutipilus­sior­nermut arlaatigut ilaasunut inuil­luun­niit ajor­tut iliuusiinik nuan­narisaqar­tunut innersuus­sutaasin­naasar­poq. (Ez 16:2, 35, 36; Jaak 4:4) Aalajaal­lutilli Guutimut kif­far­tor­tut ‘minguitsunik atoqateqarsiman­ngisaan­nar­tunil­lu’ taaneqar­put. (Kor 2. 11:2; Saqq 14:4) Itsaq Babylonni guutipilus­sior­nermi qitiul­luin­nar­poq. Taamaat­tumik Babylon­nersuaq guutipilus­sioriaatsinut tamanut assersuutaasimas­saaq. Aap, arnaq taanna tas­saavoq upperisarsior­nerup eqqun­ngitsup naalagaaf­fis­sua. – Saqq 17:5, 18; Takuuk jw.org-imi allaaserisaq: “Hvad er Babylon den Store?”

17. Babylon­nersuaq qanoq pineqas­sava?

¹⁷ Babylonnersuaq qanoq pineqassava? Apeq­qut taanna Saq­qum­mersitat 17:16, 17-imilu ima akineqar­poq: “Nas­suit qulit uumasullu nujuar­tap takusavit arnaq ator­tit­tar­toq uumis­sorlugulu pigisaanik tamanik, allaat atisaanik, arsaas­savaat. Neqaa nungul­lugu neris­sal­lugulu innermik nungutil­luin­nas­savaat. Guutimmi eqqarsaatimisut ilioq­qul­lutik sun­nis­sam­matik assigiim­mik eqqarsaateqalis­sap­put.”  Aap, Jehovap inuiaqatigiit kajumis­saas­savai uumasoq nujuar­taq aap­pal­laris­soq, tassa FN-i, atorlugu eqqun­ngitsumik upperisarsior­nerup naalagaaf­fis­suanik saas­sus­seq­qul­lugit nungutitsil­luin­naq­qul­lugillu. – Saqq 18:21-24.

18. Babylon­nersuarmut attuumas­suteqan­ngin­nis­sar­put qanoq qulak­keersin­naavarput?

¹⁸ Tamanna uagutsinnut qanoq sunniuteqarpa? ‘Guutisioriaaseq Guutitta minguitsutut mingutsin­neqarsiman­ngitsutullu isigisaa’ aalajangiusimasariaqar­par­put. (Jaak 1:27) Ilin­niar­titsis­sutinit eqqun­ngitsunit, Guutimik ilisarisiman­nin­ngitsut nal­liut­torsiutaan­nit, ileq­qorlun­nermit Babylon­nersuullu anersaarsior­tar­neranit sun­ner­tik­kusun­ngisaan­nas­saagut! ‘Arnap’ ajor­tulior­tar­neranut Guutimit pisuutitaaq­qunagit inuit ‘arnamit aneq­qul­lugit’ kalerrisaar­tuas­savagut. – Saqq 18:4.

19. “Pulateriaarsuusarujus­suaq inner­tut qalipaatilik” kinaava?

¹⁹ “Pulateriaarsuusarujus­suaq inner­tut qalipaatilik” aamma Saq­qum­mersitani allaatigineqar­poq. (Saqq 12:3) Pulateriaarsuusarujus­suaq taanna Jiisusimut inngiliinullu akiuup­poq. (Saqq 12:7-9) Guutip innut­taanik saas­sus­sisar­poq, aamma pis­saanermik uumasunut nujuar­tanut, tassa inuit naalak­kersuisuinut, tun­nius­sisar­poq. (Saqq 12:17; 13:4) Pulateriaarsuusarujus­suaq kinaava? Tas­saavoq “itsaq pulateriaarsuk Diaavulumik Saatanimillu taaneqar­toq.” (Saqq 12:9; 20:2) Taas­suma Jehovamut akeraasut tamaasa aqup­pai.

20. Pulateriaarsuusarujus­suaq qanoq pineqas­sava?

²⁰ Pulateriaar­suusarujus­suaq qanoq pineqassava? Saq­qum­mersitat 20:1-3 nas­suiar­neqar­poq inngilip Saatani itinersuarmut, par­naarus­sivit­tut ittumut, naloriutis­sagaa. Saatani par­naarus­saaq­qanermini ‘ukiuni 1.000-ni inuiaqatigiin­nik tamanik tam­mar­titsis­san­ngilaq’. Naggataatigut Saatani anersaapiluilu “tatsimut innerusumut ikual­las­saataasumul­lu” naloriun­neqar­nermik­kut suujun­naarsin­neqarluin­nas­sap­put. (Saqq 20:10) Saatani anersaapiluilu peerup­pata pis­sutsit qanoq issanersut takorlooruk. Ilaa nuan­nerunaq!

21. Saq­qum­mersitani atuak­kagut sooq nuan­naarutigisin­naavagut?

²¹ Saq­qum­mersitani assersuutit allas­simasut isumaat paasil­lugit qiim­maal­lan­nangaarami! Jehovamut akeraasut kik­kuunersut paasiin­nar­nagu aamma qanoq pineqas­sanersut paasivar­put. Aap, “pil­luar­poq siulit­tuutit taak­kua oqaaser­taan­nik nipituumik atuaasoq, pil­luar­pullu taak­kunani allas­simasunik tusar­tut”! (Saqq 1:3) Guutimulli akeraasut peerutereer­pata inuit aalajaatsut ajun­ngisaarfigineqar­nerit qanoq ittut nuan­naarutigis­savaat? Tamanna allaaserisani ataqatigiinni kingul­lermi eqqar­tus­savar­put.