1. Inuit tamarmik pingaarutilim­mik sumik aalajangigas­saqar­pat?

 NALITSINNI inuit pingaarutilim­mik aalajangigas­saqar­put. Jehova Guuti qilammi nunarsuarmilu Naalak­kersuisutuaasutut tapersersorusup­paat, imaluun­niit akeraa ajor­toq, Saatani Diaavulu, tapersersorusup­paat? Toq­qagas­sat marluin­naap­put. Toq­qagaat naas­saan­ngitsumik inuuneqaler­nis­saan­nut nungutitaanis­saan­nul­luun­niit aalajangiisuus­saaq. (Mat 25:31-33, 46) ‘Annikil­lior­nar­torsuarmi’ aniguisus­satut suujun­naarsitaasus­satul­luun­niit nalunaaqutser­neqas­sap­put. – Saqq 7:14; 14:9-11; Ez 9:4, 6.

2. (a) Hebræerit 10:35-39 sunis­samut kajumis­saar­neqar­pugut? (b) Saq­qum­mersitat qanoq iluaqutigisin­naavagut?

² Hebræerit 10:35-39 atuakkit. Jehovap naalak­kersuinera tapersersor­niarlugu aalajangersimaguit taava silatusaarlutit toq­qaasimavutit. Maanna allat eqqor­tumik aalajangeeq­qul­lugit ikiorusungaar­patit. Taamaalior­ninni Saq­qum­mersitani paasis­sutis­sat atorsin­naavatit. Atuak­kami maluginiar­nar­tumi tas­sani Jehovamik akerlilersuisut qanoq pineqar­nis­saat aamma naalak­kersuineranik ilumoorfigin­nil­lutik tapersersuisut ajun­ngisaarfigineqar­nis­saat paasinarsisin­neqar­poq. Ilumoor­tut taama pingaaruteqar­tigisut misis­soq­qis­saar­tariaqar­pagut. Taamaaliorutta Jehovamut kif­far­tor­tuar­nis­sar­put aalajangiusimanerulis­savar­put. Tamatuma saniatigut ilik­kak­kagut allat eqqor­tumik aalajangeeq­qul­lugit aalajaat­tuaq­qul­lugillu ikior­nis­saan­nut atorsin­naavagut.

3. Allaaserisami matumani suut sam­mis­savagut?

³ Allaaserisami matumani apeq­qutit uku sam­mis­savagut: Guutip naalak­kersuineranik tapersersuisut qanoq pineqas­sap­pat? Aamma uumasumik nujuar­tamik aap­pal­laris­sumik,  Saq­qum­mersitani allaatigineqar­tumik, tapersersuiniarlutik aalajanger­tut qanoq pineqas­sap­pat?

4. Apustilip Johan­nesip eqimat­tat sorliit qilammi Jiisusimik nikorfaqateqar­tut takuai?

⁴ Apustilip Johan­nesip takorluuisitaanermini takuai eqimat­tat marluk Jehovap naalak­kersuineranik tapersersuisut naas­saan­ngitsumillu inuuneqalersin­neqar­tut. Eqimat­tat siul­liit 144.000-up­put. (Saqq 7:4) Naalak­kersuisun­ngoq­qul­lugit, imaluun­niit qilammi Jiisusimik kun­ngioqateqaq­qul­lugit, nunarsuarmiit qilam­mut pisin­neqar­put. Jiisusi ilagalugu nunarsuarmut naalak­kersuip­put. (Saqq 5:9, 10; 14:3, 4) Johan­nesip takorluuisitaanermini takuai qaq­qami Ziion­nimi qilam­miit­tumi Jiisusi nikorfaqatigigaat. – Saqq 14:1.

5. Qanit­tuk­kut 144.000-nit sin­nerut­tut qanoq pineqas­sap­pat?

⁵ Apustilit nalaan­niit manna tikil­lugu tuusintil­lit 144.000-nut ilaasus­satut toq­qar­neqarsimap­put. (Luk 12:32; Rom 8:17) Johan­nesili ilisimatin­neqar­poq “sin­nerut­tut”, imaluun­niit ikit­tun­nguit, ulluni kingul­lerni nunarsuarmi inuus­sasut. Sin­nerut­tut taakku annikil­lior­nar­torsuup aal­lar­tin­ngin­nerani Jehovamit akuerisaasutut inaarutaasumik ‘naqis­suser­neqas­sap­put’. (Saqq 7:2, 3; 12:17) Annikil­lior­nar­torsuullu ingerlanerani sin­nerut­tut taakku qilaliar­tin­neqas­sap­put 144.000-nullu, aalajaal­lutik toqusimasunut, ilan­ngutitin­neqarlutik. Qilammi Jiisusi Guutip kun­ngeqarfiani naalak­kersueqatigis­savaat. – Mat 24:31; Saqq 5:9, 10.

6-7. (a) Johan­nesip eqimat­tat kik­kut tul­liul­lugit takuai, taak­kulu pil­lugit sunik paasisaqar­pugut? (b) Sooq sin­nerut­tut aamma “inup­par­pas­suit” Saq­qum­mersitat kapitali 7 soqutigisariaqar­paat?

⁶ Johan­nesip eqimat­tat qilam­miit­tut takoreerlugit “inup­par­pas­suit” takuai. Taak­kua kisin­neqarsin­naan­ngin­ner­tik 144.000-nit allaanerus­sutigaat. (Saqq 7:9, 10) Taakku pil­lugit sunik paasisaqar­pugut? Johan­nesi ima oqarfigineqar­poq: “Taakku tas­saap­put annikil­lior­nar­torsuarmit aniguisut. Atisatik takisuut errorsimavaat Savaaq­qallu aavanik qaqor­titil­lugit.” (Saqq 7:14) “Inup­par­pas­suit” taakku annikil­lior­nar­torsuarmit aniguereerunik nunarsuarmi maani inuus­sap­put nuan­nerluin­nar­tunillu ajun­ngisaarfigineqas­sal­lutik. – Tuss 37:9-11, 27-29; Uss 2:21, 22; Saqq 7:16, 17.

⁷ Qilaliar­tus­satut imaluun­niit maani nunarsuarmiit­tus­satut toq­qar­neqarsimagaluarutta Saq­qum­mersitat kapitali 7-imi allaatigineqar­tunut ilaaner­put takusin­naavar­put? Taamaaliorsin­naasariaqar­pugut. Taamanik­kus­samut Guutip kif­fai eqimat­tat marluk pis­sanganarluin­nar­tunik misigisaqas­sap­put! Jehovap naalak­kersuineranik tapersersuiniarluta aalajangersimaner­put nuan­naarutigingaas­savar­put. Annikil­lior­nar­tus­sarsuaq pil­lugu Saq­qum­mersitani allanik sunik paasitin­neqar­pugut? – Mat 24:21.

8. Annikil­lior­nar­tus­sarsuaq qanoq aal­lar­tis­sava, inuillu amerlanerit qanoq qisuarias­sap­pat?

⁸ Allaaserisap siuliani eqqaaneqar­tutut nunarsuarmi politik­kik­kut pis­saanil­lit qanit­tuk­kut Babylon­nersuaq, upperisarsior­nerup eqqun­ngitsup naalagaaf­fis­sua, saas­sutis­savaat. (Saqq 17:16, 17) Tamanna annikil­lior­nar­torsuarmut aal­lar­niutaas­saaq. Tamatuma kingunerisaanik inup­pas­suit Jehova guutisiorfigilis­savaat? Naamik. Saq­qum­mersitat kapitali 6-imi ersersin­neqar­poq taamanik­kus­samut Jehovamut kif­far­tun­ngitsut politik­kerinut nunarsuarmilu niuer­nik­kut aaq­qis­suus­sanut, qaq­qanut assersuun­neqar­tunut, illersor­tis­sarsius­sasut. Jehovap kun­ngeqarfim­minik  tapersersuin­ngin­nerat pis­sutigalugu akerlilersor­timisut isigis­savai. – Luk 11:23; Saqq 6:15-17.

9. Jehovap innut­tai annikil­lior­nar­tus­sarsuarmi allaaneruner­tik qanoq ersersis­savaat, taman­nalu qanoq kinguneqas­sava?

⁹ Annikil­lior­nar­tus­sarsuarmi Jehovamut aalajaal­lutik kif­far­tor­tut allaaneruner­tik ersersis­savaat. Nunarsuarmi inunni eqimat­tatut kisiar­taal­lutik Jehova Guuti kif­far­torfigis­savaat ‘uumasorlu nujuar­taq’ tapersersorusun­ngil­luin­nas­sal­lugu. (Saqq 13:14-17) Aalajaan­nerat Jehovamik akerlilersuisut kamangaalis­sutigis­savaat. Tamatuma kingunerisaanik naalagaaf­fiit iligiit Guutip innut­taanik nunarsuaq tamak­kerlugu saas­sus­sis­sap­put. Biibilimi siulit­tuummi tamanna Gogip Magogimi najugaqar­tup saas­sus­sineranik taaneqar­poq. – Ez 38:14-16.

10. Jehovap innut­tami saas­sun­neqar­nerat qanoq qisuariarfigis­savaa? (Saq­qum­mersitat 19:19-21)

¹⁰ Saas­sus­sineq tamanna ingasal­luin­nar­toq Jehovap qanoq qisuariarfigis­savaa? Jehova oqar­poq: “Uumitsan­nera qaf­farumaar­poq.” (Ez 38:18, 21-23) Saq­qum­mersitat kapitali 19-imi tamatuma kingorna pisus­sat allaatigineqar­put. Jehovap ernini innut­taminik illersueq­qul­lugu akeraan­nullu ajugaaq­qul­lugu aal­lar­tis­savaa. Jiisusip akil­luni saas­sus­sinermini “qilammi sak­kutoor­pas­suit” – inngilit aalajaatsut aamma 144.000-t – ilagis­savai. (Saqq 17:14; 19:11-15) Sorsun­nermi tamatumani inuit peqatigiif­fiillu Jehovamik akerlilersuisut tamarmik nungutin­neqarluin­nas­sap­put! – Saqqummersitat 19:19-21 atuakkit.

11. Saq­qum­mersitani pisoq pingaaruteqarluin­nar­toq suua?

¹¹ Nunarsuarmi aalajaatsut Guutip akeraasa suujun­naarsin­neqarluin­nar­neran­nit aniguisut qanoq misigis­sasut takorlooruk. Taamanik­kus­samut qiim­mat­tangaas­sap­put! Babylon­nersuup suujun­naarsin­neqar­nera qilammi nuan­naarluni suaar­taatigineqar­tus­saagaluar­toq alla suli nuan­naarutigineqar­nerus­saaq. (Saqq 19:1-3) Saq­qum­mersitani pisoq pingaaruteqarluin­nar­toq – ‘Savaaq­qap katin­nera’. – Saqq 19:6-9.

12. Savaaraq qaqugu katis­sava? (Saq­qum­mersitat 21:1, 2)

¹² Katin­neq qaqugu pis­sava? 144.000-t Harmagedon­nimi sorsun­neq sioq­qutitsiarlugu tamarmik qilam­miis­sap­put. Pif­fis­samili tamatumani Savaaraq katis­san­ngilaq. (Saqqummersitat 21:1, 2 atuakkit). Harmagedon­nimi sorsun­nerup Guutimullu akeraasut tamarmik nungutin­neqar­nerisa kingorna Savaaraq katis­saaq. – Tuss 45:4, 5, 14-18.

13. Savaaraq katip­pat qanoq pisoqas­sava?

¹³ Savaaraq katip­pat qanoq pisoqas­sava? Katin­nermi angutip arnallu ataqatigiiler­tar­nerat­tut assersuutaasumik katin­nermi tamatumani Kun­ngi, Jiisusi Kristusi, ‘nulias­sanilu’, 144.000-t, ataasioqatigiilis­sap­put. Pisumi pingaaruteqarluin­nar­tumi tamatumani naalak­kersuisut nutaat ukiuni 1.000-ni nunarsuarmut naalak­kersuisus­sat iver­tin­neqas­sap­put. – Saqq 20:6.

14-15. Saq­qum­mersitat kapitali 21-mi 144.000-t sumut assersuun­neqar­pat? (Saq­qaani assiliaq takuuk).

¹⁴ Taava Saq­qum­mersitat kapitali 21-mi 144.000-t illoqarfim­mut kusanarluin­nar­tumut ‘Jerusalem­mimik nutaamik’ taaneqar­tumut assersuun­neqar­put. (Saqq 21:2, 9) Illoqarfik taanna “ujaq­qanik aqqaneq-marlun­nik tun­ngaveqar­poq, taak­kunanilu atit aqqaneq-marluk, Savaaq­qap apustiliisa aqqaneq-marluk atii” allas­simap­put. Sooq tamanna Johan­nesip soqutigaa? Ujaq­qat ilaanni atini  allas­simasoq takugamiuk. Tamanna immik­kut pisin­naatitaaf­fiuvoq anner­tooq! – Saqq 21:10-14; Ef 2:20.

¹⁵ Illoqarfik assersuutaasoq taanna allanit tamanit allaaneruvoq. Aqqusinersua kuultiuvoq pitsaasoq, aqqaneq-marlun­nik sapan­ngaris­sunik isaaf­feqar­poq, qarmarsui tun­ngaviilu ujaq­qanik erlin­nar­tunik pin­nersagaap­put illoqarfillu kip­paris­suul­luni. (Saqq 21:15-21) Amigaateqar­pasip­porli! Johan­nesip uagutsin­nut oqaasii maluginiak­kit: “Jehova Guuti Kil­leqan­ngitsumik Pis­saanilik aamma Savaaraq tas­saam­mata illoqarfiup guutisiorfia illoqarfimmi guutisiorfik takun­ngilara. Illoqarfik Guutip alutor­nas­susianit qaam­marsar­neqarami Savaaq­qamillu qul­leqarami seqinermit qaam­mam­millu qin­ngor­neqar­nis­saminik pisariaqar­titsin­ngilaq.” (Saqq 21:22, 23) Jerusalem­mimut nutaamut ilaasut Jehova najus­savaat. (Hebr 7:27; Saqq 22:3, 4) Taamaat­tumik Jehova Jiisusilu tas­saap­put illoqarfiup tamatuma guutisiorfia.

16. Guutip kun­ngeqarfiata ukiuni 1.000-ni naalak­kersuinerani inuit sunik misigisaqas­sap­pat?

¹⁶ Illoqarfik taanna eqqarsaatigis­sal­lugu tanitanut soqutiginar­poq. Nunarsuarmili inuunis­samik neriugisal­lit tamanna aamma soqutigisariaqar­paat. Guutip kun­ngeqarfiata ukiuni 1.000-ni naalak­kersuinerani Jerusalemmi nutaaq kisis­saan­ngitsunik ajun­ngisaar­tas­saaq. Johan­nesip takuaa ajun­ngisaar­nerit taakku ‘kuus­suar­tut imermik inuus­sutaasumik kuut­tutut’ ittut. Kuus­suullu sinaaniip­put ‘orpiit inuus­sutaasut inuiaqatigiin­nut tamanut peq­qis­sinar­tunik pilutal­lit’. (Saqq 22:1, 2) Taamanik­kus­samut inuit tamarmik ajun­ngitsut taak­kua iluaqutiginis­saan­nut periarfis­saqas­sap­put. Inuit naalat­tut tamarmik naam­mal­luin­nar­tun­ngoriar­tuaas­sap­put. Nap­parsimasoqarun­naarlunilu anniar­toqarun­naarlunilu aliasul­luni qiasoqar­tarun­naas­saaq. – Saqq 21:3-5.

17. Kik­kut ukiuni 1.000-ni naalak­kersuineq iluaqutigis­savaat? (Saq­qum­mersitat 20:11-13)

¹⁷ Kik­kut ajun­ngitsulior­nerit taak­kua iluaqutigis­savaat? Siul­ler­tut, inup­par­pas­suit Harmagedon­nimit aniguisut meeq­qallu paratiisimi inun­ngor­tut. Saq­qum­mersitanili kapitali 20-mi aamma neriorsuutigineqar­poq toqusimasut makitin­neqas­sasut. (Saqqummersitat 20:11-13 atuakkit). ‘Naaper­tuil­luar­tut’ aalajaatsut toqusimasut ‘naaper­tuil­luan­ngitsul­lu’,  Jehova pil­lugu ilin­niar­nis­samut periarfis­saqarsiman­ngitsut, nunarsuarmi maani inuunis­samut tamarmik makitin­neqas­sap­put. (ApS 24:15; Joh 5:28, 29) Taava imaappa ukiuni 1.000-ni naalak­kersuinermi kik­kut tamarmik nunarsuarmi inuusus­satut makitin­neqas­sasut? Naamik. Toquner­tik sioq­qul­lugu Jehovamut kif­far­toruman­ngil­luin­nar­tut uum­mar­teq­qin­neqas­san­ngil­lat. Periarfis­sar­tik ator­nerluk­kamikku ersersip­paat nunarsuarmi paratiisimi inuunis­samut piuk­kun­nar­natik. – Mat 25:46; Tes 2. 1:9; Saqq 17:8; 20:15.

18. Ukiut 1.000-t naap­pata nunarsuarmi pis­sutsit qanoq issap­pat?

¹⁸ Ukiut 1.000-t naap­pata nunarsuarmi inuusut tamarmik naam­mal­luin­nar­tuus­sap­put. Kinaluun­niit ajor­timit Adamimit kingor­nus­satsin­nit aal­laaveqar­tumik atugarlior­titaajun­naas­saaq. (Rom 5:12) Adamip ajor­tulior­neratigut perloq­qus­sut atuuk­kun­naarluin­nas­saaq. Taamaat­tumik ukiut 1.000-t naap­pata nunarsuarmiit­tut inut­tut naam­mal­luin­nar­tutut ‘uum­mas­sap­put’. – Saqq 20:5.

19. Sooq misiliineq kingul­leq pisariaqarpa?

¹⁹ Nalun­ngilar­put Jiisusip Saatanimit assuar­naak­kun­naar­nis­samut usser­neqar­nini nak­kaan­narfigin­ngik­kaa. Misilin­neqar­nermini aalajaap­poq. Saatanili misiliinis­samut periarfis­sin­neqar­pat inuit naam­mal­luin­nar­tut tamarmik aalajaas­sin­naas­sap­pat? Ukiut 1.000-t naap­pata Saatani itinersuarmit iperagaap­pat tamarmik immik­kut apeq­qut taanna nam­min­neq akisin­naas­savaat. (Saqq 20:7) Misilin­neqar­nermi kingul­lermi tas­sani aalajaatsut naas­saan­ngitsumik inuuneqalis­sal­lutillu inus­siaataan­ngin­neq piviusoq nuan­naarutigis­savaat. (Rom 8:21) Pikitsitsisut Diaavulumut anersaapiluinullu ilan­ngutitil­lugit qaqugorsuarmut suujun­naarsin­neqas­sap­put. – Saqq 20:8-10.

20. Saq­qum­mersitani siulit­tuutit pis­sanganar­tut qanoq isumaqarfigaagit?

²⁰ Saq­qum­mersitat naatsumik eqik­karlugit sam­mereerlugit qanoq misigivit? Siulit­tuutini tupin­nar­tuni imminut takunerit qiim­maal­laatigaajuk? Qular­nan­ngitsumik allat kajumis­saarusuler­patit peqatigaluta Jehovap minguitsumik guutisiorfiginis­saanut. (Saqq 22:17) Siunis­sami pisus­sat eqqar­toratsigit qiim­maal­lap­pugut apustilitullu Johan­nesitut ima oqarusul­luta: “Amen! Naalagaq Jiisusi, tikiugit.” – Saqq 22:20.