1. Tamatta suna misiginikuugunarparput?

 ANERSAAKKUT ittumik angujuminaatsitannik anguniagaqar­nikuuit? b Taamaappat kisimiin­ngilatit. Assersuutigalugu Philip akulikin­nerusumik Guutimut qinorusuk­kaluarluni qinnutinilu pitsaanerulersin­niaraluarlugit qinunissamut piffissaaleqisarpoq. Erika katersuunnernut aggiaarusuk­kaluarluni inortuisarpoq. Tomášillu Biibili tamaat atuarusuk­kaluarpaa, imali oqarpoq: “Biibilimik atuarneq nuannarival­laanngilara. Pingasoriarlunga aallaqqaataaniit atuarlugu aallartit­taraluarpara, Mosesimilli allakkat pingajuinut killikkaangama unittoor­tarpunga.”

2. Iliuusererusutat piviusun­ngortis­simanngikkukku sooq nikallus­sanngilatit?

² Iliuusererusutat piviusun­ngortis­simanngikkukku nikalloqinak. Allaat angoriaan­naarpasis­sinnaasoq piffissar­tornarlunilu tamaviaar­nartarpoq. Anguniagaqarnikkut Jehovap iluarisaatut iliorusukkavit ersersippat taassumunnga attaveqarnerit pingaar­tillugulu sapinngisannik kiffartorfigerusullugu. Jehovallu ilungersornerit iluaralugulu sapikkannik piumaffiginavian­ngilaatit. (Tuss 103:14; Mika 6:8) Taamaattumik atukkatit eqqarsaatigalugit angusin­naasannik anguniagaqartarit. Anguniakkat anguniarlugu qanoq iliorsinnaavit? Siunnersuutit ilaat sammeriartigit.

3. Sooq piumassuseqarneq pingaaruteqarpa?

³ Anersaakkut ittunik anguniagaqarnermi piumassuseq pingaaruteqarluinnarpoq. Piumassuseqartormi anguniakkani angujumallugu tamaviaartarpoq. Piumassuseq anorimut angallammik tissiar­taammik siumukar­titsisartumut assersuun­neqarsinnaavoq. Anori iluaqutigalugu angallat apuuffis­saminut apuussinnaavoq. Anorsaar­tillugulu apuutiaarsinnaavoq. Taamatuttaaq, piumassuseqarluarutta anguniakkagut angujuminar­tinnerus­savagut. David, qatanngut El Salvadorimi najugalik, ima oqarpoq: “Piumassuseqaruit akornutaasinnaasut suulluunniit unissutiginagit tamaviaassaatit.” Illimmi, qanoq piumassuseqar­nerulersinnaavit?

4. Suna qinnutigisin­naavarput? (Filippimiut 2:13) (Aamma assiliaq takuuk).

⁴ Piumassuseq qinnutigisaruk. Jehovap anersaani illernartoq aqqutigalugu anguniakkavit angunissaanut piumassuseqar­tissinnaavaatit. (Filippimiut 2:13 atuaruk). Ilaannikkulli piumassuseqarpal­laanngik­kaluarluta anguniagaqarsin­naavugut nalunngin­natsigu tamanna eqqortulior­nerusoq. Tamannalu ajunngitsuuvoq. Norinap Ugandami najugallip tamanna misigaa. Biibilimik ilinniar­titaqaler­nissani anguniagaraa. Ilinniar­titsillaq­qissorin­nginnamili piumassuseqarpal­laanngilaq. Suna iluaqutigaa? Ilinniar­titsinissamut piumassuseqar­neruler­nissani ullut tamaasa qinnutigisarpaa ilinniar­titsillaq­qinneruler­nissanilu sulissutigalugu. Taamaalilluni qaammatialuit qaangiuttut piumassuseqar­nerulerpoq ukiorlu naanngitsoq marlunnik Biibilimik ilinniar­titaqalerluni.

5. Piumassuseqar­nerulerumalluta suut eqqarsaatigisin­naavagut?

⁵ Jehovap iliuuserisimasarpassui eqqarsaatigisakkit. (Tuss 143:5) Apustilip Paulusip Jehovamit ajunngisaangaarfigineqarnini eqqarsaatigisaramiuk Jehovamut kiffartornini tamaviaarutigaa. (Kor 1. 15:9, 10; Tim 1. 1:12-14) Taamatuttaaq illit pillutit Jehovap iliuuserisimasarpassui eqqarsaatigisarukkit anguniakkavit angunissaanut piumassuseqar­nerulissaatit. (Tuss 116:12) Qatanngutip arnap Hondurasimi najugallip pionerin­ngornissamik anguniagaqar­nermini suna iluaqutiginerlugu ima nassuiarpaa: “Jehovap uannut asanninnersua eqqarsaatigisarpara. Innuttaminut ilaaleq­qullunga ikiorpaanga. Aamma isumassorlungalu illersor­tarpaanga. Taamatut eqqarsaatigin­neqqissaartarama Jehova asanerulerlugulu anguniakkama angunissaanut piumassuseqar­nerulerpunga.”

6. Piumassuseqar­nerulerumalluta aamma qanoq iliorsin­naavugut?

⁶ Anguniakkavit angunerata iluaqutissartai eqqarsaatigisakkit. Maluginiaruk Erikap eqqaaneqareersup katersuunnernut aggiaar­tarnissaminut suna iluaqutigineraa. Ima oqarpoq: “Paasivara inortuisarama nuannersorpas­suarnik misigisaqan­ngitsoor­tarlunga.  Aggiaarumali qatanngutit ilassil­lugillu ilagisin­naavakka. Aamma siunnersuutitsialaat oqaluus­sininni nuannaar­nerulis­sutigisin­naasakka tusarnaarsin­naavakka.” Erikap aggiaar­tarnerup iluaqutissartai eqqarsaatigigamigit anguniakkani anguaa. Illimmi, iluaqutissat suut eqqarsaatigisin­naavigit? Biibilimik atuarnermut qinunermul­luunniit tunngasunik anguniagaqaruit Jehovamut attaveqarninnut qanoq nakussatsis­sutaasinnaasoq eqqarsaatigisaruk. (Tuss 145:18, 19) Kristumiutullu pissuserineqartussat ilaat ineriar­tortinniarlugu anguniagaqaruit allanut attaveqarninnut qanoq pitsanngor­titsisinnaasoq eqqarsaatigisaruk. (Kol 3:14) Anguniakkat sooq angorusun­nerlugu allattuisin­naavutit. Allattuk­katillu atuartakkit. Tomáš eqqaaneqareersoq ima oqarpoq: “Anguniakkama angunissaanut pissutis­saqarluaraangama tunniutiinnarneq ajorpunga.”

7. Juliop nuliamilu anguniak­kaminnik angusinis­saminnut suna kaammat­tuutigaat?

⁷ Ilinnik kaammattuisut ilagisakkit. (Uss 13:20) Juliop nuliamilu oqaluus­sinerunissartik qanoq angusimaneraat maluginiaruk. Julio ima oqarpoq: “Anguniak­katsinnik tapersersuisunik ikinnguteqarpugut anguniagarpullu pillugu oqaloqatigisarlugit. Ikinngutitta amerlanersaasa anguniakkat assingusut angusimagamikkit atoriaan­naasunik siunnersor­tarpaatigut. Ikinngutitta aamma aperisarpaatigut pilersaarutigut qanoq ingerlanersut pisariaqar­titatsinnillu qiimmas­sartarluta.”

8. Aatsaat piumassuseqaraangatta anguniagarput sulissutigisarutsigu angussavarput? Nassuiaruk. (Aamma assiliaq takuuk).

⁸ Tamatta ilaannikkut piumassuseqarpal­laarneq ajorpugut. Taamaak­kaluartoq anguniakkatta angunissaa suli sulissutigisin­naavarput. Assersuuteqariarta: Anori iluaqutigalugu angallat tissiar­taatilik apuuffis­saminut apuussinnaavoq. Kisianni anorlileriar­tortarlunilu anorikin­neruleriar­tortarpoq, ullullu ilaanni qatsungasarpoq. Tassa imaappa angallat uningaannartoq? Taamaat­tariaqanngilaq, imaassin­naavormi motooreqarluniluunniit iputeqartoq. Taakkulu iluaqutigalugit umiartortoq apuuffis­saminut ingerlasinnaavoq. Piumassuserput anorimut allanngorar­tartumut assersuun­neqarsinnaavoq. Ilaannikkut piumassuseqarluar­tarpugut ilaannikkullu piumassuseqarpal­laarnata. Aatsaat piumassuseqarluaraangatta anguniagarput sulissutigisarutsigu angunavian­ngilarput. Umiartortorli apuunniarsarisoq assigalugu piumassuseqan­ngikkaluarluta anguniagarput sulissutigiuarsin­naavarput. Tamanna ilungersunaraluartoq kinguneri nuannaarutigiumaarpagut. Piumassuseqarpal­laanngik­kaluarlutali anguniak­katsinnik sulissutigin­ninnerput Jehovap iluarineraa sammeriartigu.

9. Piumassuseqarpal­laanngik­kaluarluta anguniagarput sulissutigis­savarput? Nassuiaruk.

⁹ Jehovap kissaatigaa kajumilluta nuannaarlutalu  kiffartorfigis­sagitsinni. (Tuss 100:2; Kor 2. 9:7) Taamaattumik piumassuseqarpal­laanngik­kaluarluta anguniagarput anersaakkut ittoq suli sulissutigis­savarput? Paulusip maligassiaa eqqarsaatigiuk. Taanna ima oqarpoq: “Timiga sukannerfigisarlugulu inussiatut pisarpara.” (Kor 1. 9:25-27, q.a.i.) Allatut iliorusuk­kaluaraangami eqqortulior­niarluni imminut pinngitsaalisarpoq. Kiffartornera Jehovap iluaraa? Ilaana, ilungersorneralu pillugu akissarsisippaa. – Tim 2. 4:7, 8.

10. Piumassuseqarpal­laanngik­kaluarluta anguniakkatta suli sulissutiginissaa sunik iluaqutis­sartaqarpa?

¹⁰ Uaguttaaq piumassuseqarpal­laanngik­kaluarluta anguniakkatta angunissaa sulissutigigaangatsigu Jehovap iluarisarpaa. Iliuuserisassaq nuannarival­laanngik­kaluarlugu Jehovamut asanninnerput aallaavigalugu iliuuserigaangatsigu Jehovap tamanna iluarisarpaa. Soorlu Paulusi pilluaqqugaa, uaguttaaq ilungersornigut pillugit pilluaq­qussavaatigut. (Tuss 126:5) Jehovallu pilluaq­qusinera misigigaangatsigu piumassuseqar­nerulersin­naavugut. Qatanngut arnaq Polenimi najugalik Lucynamik atilik ima oqarpoq: “Ingammik qasugaangama oqaluus­serusup­piarneq ajorpunga. Oqaluus­sereeraangamali nuannaarneq misigisartagara tunissutaavoq nuanningaartoq.” Piumassuseqarpal­laanngik­kaangatta qanoq iliorsin­naanersugut maanna sammeriartigu.

11. Imminut aqussin­naanermik ineriar­tortitsinitsinni Jehovap qanoq ikiorsin­naavaatigut?

¹¹ Imminut aqussinnaaneq qinnutigisaruk. Imminut aqussinnaaneq eqqarsaatigigaangatsigu immaqa ajortulior­naveersaarnissaq eqqarsaatiginerusarparput. Aammali ajunngitsulius­sagutta imminut aqussin­naasariaqarpugut, ingammik suliassaq pisariuppat imaluunniit piumassuseqarpal­laanngikkutta. Eqqaamajuk imminut aqussinnaaneq anersaap illernartup inerititaasa ilagigaat. Taamaattumik imminut aqussin­naanerulerumallutit Jehova qinnuigisaruk anersaamik illernartumik tuneqqullutit. (Luk 11:13; Gal 5:22, 23) Davidip eqqaaneqareersup akulikin­nerusumik Biibilimik misissueq­qissaar­talerusuttup qinusarnini iluaqutigaa. Ima oqarpoq: “Imminut aqussin­naanermik ineriar­tortitseq­qullunga Jehova qinnuigisarpara. Ikiuineratigullu pilersaarusiornittut akulikitsumik misissueq­qissaar­talerpunga.”

12. Anguniakkatta angunis­saannut Oqaluus­sisartup oqaasii 11:4 qanoq iluaqutigisin­naavarput?

¹² Atukkavit pitsaal­luinnar­tunngor­nissaat utaqqeqinagu. Pissutsit maanna atuutsillugit atukkagut pitsaal­luinnar­tunngor­navianngillat. Pissutsit pitsaal­luinnartut utaqqigutsigit anguniagarput angunavian­ngilarput. (Oqaluus­sisartup oqaasii 11:4 atuaruk). Qatanngut Daynielimik atilik ima oqarpoq: “Atukkagut pitsaal­luinnar­tunngor­navianngimmata nangaanata aallartiin­nassaagut.” Qatanngutip Ugandamiittup Paulimik atillip kinguar­titerin­nginnissamut pissutaal­luartoq alla ima eqqaavaa: “Imaannaan­ngitsorsioraluarluta iliuuseqarutta Jehovap ikiorsin­naavaatigut.” – Mal 3:10.

13. Sooq annikitsunik anguniagaqarneq iluaqutaasinnaava?

¹³ Annikitsunik iliuuseqarit. Angujuminaatsumik anguniagaqarutta piumassuseerus­sinnaavugut. Illit taama misigiguit anguniakkat immikkoor­titerlugu pisariil­lisaasinnaavit? Assersuutigalugu kristumiutut pissuserineqartussap ineriar­tortinnissaa anguniagarigukku annikitsutigut ersersinnissaa sulissutigeq­qaarsinnaavat. Biibili naallugu atuarusukkukku immaqa sivisual­laanngitsumik atuartarnissat pilersaarusiorsinnaavat. Tomášip eqqaaneqareersup Biibili tamaat ukiup ataatsip ingerlanerani atuarniarlugu  kissaatigigaluarpaa, imali oqarpoq: “Paasivara ullormut atuarniakkakka uannut amerlaval­laartut. Aalajangerpunga aallarteq­qinniarlugu, kisianni ullut tamaasa kapitalip ilaannaa atuarniarlugu eqqarsaatigeq­qissaar­niarlugulu pilersaarusiorpunga. Taamaaliorama atuarnera nuannaarutigilerpara.” Atuarnerminik nuannaarutigin­ninnerulerami sivisunerusumik atuartalerpoq. Kingunerisaanik Biibili tamaat atuarpaa. c

14. Suut unittoorutigisin­naavagut?

¹⁴ Piumassuseqarluaraluarluta imminullu aqussin­naagaluarluta ajoraluartumik anguniakkatta sulissutiginerani unittoorsin­naavugut. Assersuutigalugu ilimagin­ngisatsinnik pisoqarpat anguniakkatta angunissaanut piffissaarus­sinnaavugut. (Jaak 4:13, 14) Arlaanik nikallus­sutigisin­naasatsinnik nalaataqarutta nukissaarus­sinnaavugut. (Uss 24:10) Naammal­luinnan­ngitsuugatta anguniakkatta angunissaanut ajoqutaasumik kukkusin­naavugut. (Rom 7:23) Qasusin­naavugul­luunniit. (Mat 26:43) Unittoorutta ulluluk­kuttaluunniit suna iluaqutigisin­naavarput?

15. Unittoorutta tunniutiin­nassaagut? Nassuiaruk. (Tussiaat 145:14)

¹⁵ Eqqaamajuk unittooruit imaanngilaq iluatsin­navianngitsutit. Biibilimi allassimavoq ajornar­torsiutinik nalaataqar­tassasugut. Aammali Jehovap ikiuineratigut qaqeqqis­sinnaasugut erseqqis­sarneqarpoq. (Tussiaat 145:14 atuaruk). Qatanngut Philip eqqaaneqareersoq ima oqarpoq: “Unittooqat­taarnikka eqqarsaatigival­laarnagit anguniagara anguniarlugu siumukaq­qittarama misigisarpunga iluatsillunga.” David eqqaaneqareersoq ima oqarpoq: “Unittoornerit ullulun­nerillu akornutaasutut isiginagit Jehovamut asanninnermik ersersitsinissamut periarfissatut isigisarpakka.” Aap, unittooraluarlutit ingerlaq­qikkuit  ersersissavat Jehova nuannaar­tikkusullugu. Jehovap anguniakkannik ilungersuutigin­ninnerit takugaangamiuk nuannaarutigisarpaa!

16. Unittoornerit qanoq ilinniutigisin­naavagut?

¹⁶ Unittoornitit ilinniutigisakkit. Sooq unittoorsimanerlutit eqqarsaatigiuk imminullu ima aperalutit: ‘Unittooq­qinngin­niassagama arlaatigut allannguisin­naavunga?’ (Uss 27:12) Ilaannikkulli unittoornitta ersersittarpaa piviusorsiorpal­laarnata anguniagaqarsimasugut. Tamanna ilisarnarpaluppat anguniakkat nalileq­qissinnaavat paasiumallugu ilinnut suli angusas­saanersoq. d Anguniakkat ilinnut naleqqutin­ngitsoq angunngikkukku Jehovap iluatsin­ngitsutut isiginavian­ngilaatit. – Kor 2. 8:12.

17. Sooq angoriikkagut eqqarsaatigisas­savagut?

¹⁷ Angusimasatit eqqarsaatigisakkit. Biibilimi allassimavoq ‘Guutip naapertuil­luartuugami iliuutsitit puiornavian­ngikkai’. (Hebr 6:10) Aamma illit puiussan­ngilatit. Angoriikkatit – soorlu Jehovamut attaveqalernerit, taanna pillugu allanut oqaluus­sisalernerit imermullu morsutsitaasimanerit – eqqarsaatigisakkit. Anersaakkut ittunik anguniakkatit angusimagakkit aamma maanna anguniakkat angusinnaavat. – Flp 3:16.

18. Anguniakkatta sulissutiginerani suna eqqaamas­savarput? (Aamma assiliaq takuuk).

¹⁸ Jehovap ikiuineratigut anguniakkavit angunissaa sapinngilat, soorlu umiartortoq apuuffis­saminut apuuttartoq. Aammali eqqaamajuk umiartortut angalanertik nuannaarutigisaraat. Taamatuttaaq, anersaakkut ittumik anguniakkavit sulissutiginerani Jehovap ikiuinera pilluaq­qusineralu eqqumaf­figisakkit. (Kor 2. 4:7) Tunniutiinnarnak siumukar­tuaruit annerungaartunik pilluaq­quneqarumaarputit. – Gal 6:9.