ATUAQQISSAAGASSAQ 22
‘Aqqutikkut illernartukkut’ ingerlajuarit
“Tassani aqqusinniaqalerumaarpoq Aqqummik Illernartumik.” – ES 35:8.
ERINARSUUT 34 Assuarnaallunga inoorusuppunga
QILANAARTUUT a
1-2. Juutit Babylonnimi najugallit pingaarutilimmik sumik aalajangigassaqalerpat? (Ezra 1:2-4)
PERSERIT kunngiat nalunaaruteqarsimavoq! Juutit ukiut 70-it Babylonnimi aallarussaaqqareerlutik Israalimut utertussanngorput. (Ezra 1:2-4 atuakkit). Babylonnimiut tigusaminnik iperagaatitsineq ajoraluartut Jehovap ajornarunnaarsippaa juutit nunaminnut uternissaat. (Es 14:4, 17) Babylonni ajugaaffigineqarmat kunnginngorlaap juutit oqarfigai aallarsinnaasut. Taamaattumik juutit tamarmik, ingammik ilaqutariinni ittuusut, aalajangigassaqalerput: Babylonni qimassanerlugu tassaniiginnassanerlutilluunniit. Sooq aalajangigassaq tamanna imaannaanngitsuusimassava?
2 Juutit ilarpassui utoqqaligamik ungasissorsuarmut angalasinnaanngillat. Juutillu amerlanerit Babylonnimi inunngorsimagamik nunami allami najugaqarsimanngisaannarput. Taakkua Israali siuaasamik nunaattut isigaat. Juutit ilaasa Babylonnimi pisuunngorsimagamik angerlarsimaffitik ilorrisimaarnartut suliffimmillu qimannissaat nalusaminnillu nunassinissartik ajornakusoortissimasinnaavaat.
3. Juutit Israalimut utertut Jehovamit qanoq akissarsisinneqarumaarpat?
3 Juutit aalajaatsut nalunngilaat Israalimut uternerup iluaqutissartai qimataminnut ilungersornerminnullu sanilliullugit annerungaartut. Pingaartumik guutisiornerannut tunngatillugu iluaqutissartaqarneruvoq. Illoqarfimmimi Babylonnimi 50-it sinnerlugit guutisiorfeqarpoq. Jehovamulli pigititamik guutisiorfeqanngilaq, pilliiveqanngilaq aaqqissuussaasunillu pilliisussanik palaseqatigeeqarani. Taamaattumik Israalikkut Moorsisip inatsisaani pilliinissamut piumasaqaatit eqqortissinnaanngilaat. Aamma guutipilussiortut Jehovamik taassumalu najoqqutassiaanik ataqqinnittunit amerlanerungaarput. Taamaattumik juutit Jehovamik asannittut guutisiorneq minguitsoq pilerseqqinniarlugu nunaminnut uternissartik qilanaareqaat.
4. Juutit Israalimut uterniartut ikiorniarlugit Jehovap qanoq neriorsorpai?
4 Babylonnimiit Israalimut angalaneq ilungersunartoq qaammatit sisamat missaannik sivisussuseqarsinnaavoq. Jehovali neriorsuivoq akornutaasinnaasut tamaasa piiarniarlugit. Iisaaja ima allappoq: “Naalakkap aqqutissaa iluarsarsiuk, nunami naasuitsumi aqqusineq nalimmatsersiuk Guutitsinnut. ... Nuna qaarsulik narsaamaninngussaaq nunalu qattunerasaartoq qoorunngorluni.” (Es 40:3, 4) Takorlooriaruk inoqajuitsukkut aqqusineq angalaffigiuminartoq. Tassuuna angalasut qaqqakkooratillu qattunikkut ammukaratillu qummukartariaqannginnamik aqqutikkut toqqissukkut angalaneq ajornannginnerussaaq. Aamma apuutiaarnerussapput.
5. Babylonnimiit Israalimut aqqusineq assersuutaasoq qanoq taaguuteqarpa?
5 Nalitsinni aqquserngit taaguuteqartarput kisitsiseqartarlutilluunniit. Aqqusineq assersuutaasoq Iisaajap allaatigisaa aamma taaguuteqarpoq. Ima allassimavoq: “Tassani aqqusinniaqalerumaarpoq Aqqummik Illernartumik taaneqassasumik. Minguttut taanna ingerlavigissanngilaat.” (Es 35:8) Neriorsuut taanna Israalikkunnut taamani qanoq isumaqarpa? Nalitsinnilu uagutsinnut qanoq isumaqarpa?
‘AQQUT ILLERNARTOQ’ – ITSAQ MAANNALU
6. Sooq aqqut illernartumik taaneqarpa?
6 ‘Aqqut Illernartoq’ – aqqummut taaguut nuanningaarami! Sooq illernartumik taaneqarpa? “Minguttut” – tassa juutit atoqatigiinnikkut eqqunngitsuliortartut, guutipilussiortartut allatigulluunniit ingasattumik ajortuliortartut – Israalimut isertitaassanngimmata. Juutit nunaminnut utertut Guutiminnut inuiaasussaapput illernartut. (Mos 5. 7:6) Jehovamilli iluarisaajumallutik suli allannguisariaqarput.
7. Sooq juutit ilaat allannguisariaqarpat? Assersuuteqarit.
7 Juutit amerlanerit Babylonnimi inunngorsimagamik Babylonnimiut eqqarsartariaasiannit sunnerneqarsimagunarput. Juutit Israalimut utereersut ukiut 69-it qaangiummata Ezrap paasivaa taakkua ilaat allamiunik nuliarsimasut. (Mos 2. 34:15, 16; Ezra 9:1, 2) Kingusinnerusukkullu meeqqat Israalimi inunngorsimasut hebræerisut oqalussinnaannginnerat naalagaatitap Nehemiap tupigusuutigaa. (Mos 5. 6:6, 7; Neh 13:23, 24) Guutip oqaasia pingaartumik hebræerisut allanneqarpoq. Meeqqalli inuusuttullu hebræerisut paasisinnaanngikkunik qanoq ilillutik Jehovap asanissaa kiffartorfiginissaalu ilikkarsinnaassavaat? (Ezra 10:3, 44) Erserpoq juutit taakku allannguingaatsiartariaqartut. Israalimilu guutisiorneq minguitsoq pilerseqqinneqalermat taamaaliornissartik ajornannginnerutissavaat. – Neh 8:8, 9.
1919-imiilli angutit, arnat meeqqallu millionillit Babylonnersuaq qimassimavaat ‘Aqqutikkullu Illernartukkut’ ingerlalerlutik (Immikkoortoq 8 takuuk)
8. Sooq itsaq pisimasut uagutsinnut pingaaruteqarpat? (Saqqaani assiliaq takuuk).
8 Immaqa ilaat eqqarsassapput: ‘Tamakkorpassuit paasillugit soqutiginaraluarput, kisianni itsaq juutinut pisut uagutsinnut pingaaruteqarpat?’ Aap, pingaaruteqarput, iliuutsigummi ‘Aqqutikkut Illernartukkut’ ingerlanermut assersuunneqarsinnaammata. Tanitaagaluarutta ‘savanulluunniit allanut’ ilaagaluarutta Aqqummi Illernartumiittuartariaqarpugut. Taamaalioruttami maanna siunissamilu Kunngeqarfik pissutsinik nuannerluinnartunik pilersitsippat Jehovap kiffartorfigiuarnissaanut iluaqutigissavarput. b (Joh 10:16) 1919-imiilli angutit, arnat meeqqallu millionillit Babylonnersuaq, tassa upperisarsiornerit eqqunngitsut, qimassimavaat aqqutikkullu assersuutaasukkut ingerlalerlutik. Illit taakkua ilagigunarpaatsit. Inuit aqqut taanna ukiut hundredit missaasa matuma siorna ingerlavigilersimavaat. Ukiorpassuilli sioqqullugit aqqut taanna allanit piareersarneqarsimavoq.
AQQUMMIK PIAREERSAANEQ
9. Esaja 57:14 naapertorlugu ‘Aqqut Illernartoq’ qanoq piareersarneqarpa?
9 Juutinut nunaminnut utertunut akornutaasinnaasut piiarnissaat Jehovap isumagaa. (Esaja 57:14 atuaruk). Nalitsinnimi ‘aqqummut illernartumut’ tunngatillugu qanoq assingusumik iliorsimava? 1919 ukiunik hundredilikkuutaanik sioqqullugu Jehovap imminik ataqqinnittut aqqutigalugit inuit Babylonnersuarmit anisinnaaniassammata aqqutissiuuppai. (Aamma takuuk Esaja 40:3). Guutimik ataqqinnittut suliaqarluarmata kingusinnerusukkut inuit eqqortuliorusuttut Babylonnersuarmit anillutik Guutip innuttai ilagalugit Jehova kiffartorfigilersinnaavaat. Aqqut qanoq piareersarneqarsimanersoq sammeriartigu.
Inuit Babylonnersuarmit anisinnaaniassammata ukiuni hundredilikkuutaani angutit Guutimik mianerinnittut aqqut piareersarpaat (Immikkoortut 10-11 takukkit)
10-11. Biibilimik naqiterineq nutserinerlu qanoq iluaqutaasimava? (Aamma assiliaq takuuk).
10 Naqiterineq. 1450-ip missaata tungaanut Biibili assaannarmik assilillugu allanneqartarpoq. Tamanna pisariummat Biibilit pissarsiariuminaallutillu akisoorujussuupput. Naqiterutilli katitertakkat nassaarsiarineqarmata Biibilit taakkunannga sanaat pissarsiariuminarnerulerput.
11 Nutserineq. Ukiorpassuarni Biibili pingaartumik latiinerisut pissarsiarineqarsinnaammat ilinniagartuut kisimik paasisinnaavaat. Naqiterinerli atorneqarnerulermat Guutimik mianerinnittut Biibili oqaatsinut inuinnaat paasisinnaasaannut nutserniarlugu ilungersornerulerput. Taamaalillutik inuit Biibili atuarlugu paasisinnaalerpaat palasit ilinniartitsissutaat ilumut Biibilimi ilinniartitsissutigineqarnersut.
Inuit Babylonnersuarmit anisinnaaniassammata angutit Guutimik mianerinnittut aqqut piareersarpaat (Immikkoortut 12-14 takukkit) c
12-13. 1800-kkunni ilumoortumik pingaartitsisut ajoqersuutit eqqunngitsut qanoq qulaartalerpaat?
12 Biibilimik misissueqqissaarutit. Biibilimik misissueqqissaartartut Guutip oqaasiani atuakkatik ilikkagaqarluarfigaat. Paasisatillu allanut ingerlateqqittalerpaat. Assersuutigalugu 1800-kkunni angutit ilumoortumik pingaartitsisut assigiinngitsut oqaluffinni ajoqersuussutigineqartut eqqunngitsut qulaarlugit naqitaaqqanik saqqummersitsipput. Tamannalu palasit kamaatigaat.
13 1835-p missaani angut upperluartoq Henry Grew naqitaaqqamik saqqummersitsivoq. Tassani Biibili tunngavigalugu nassuiarpaa toqujuissuseq Guutimit tunissutaasoq, naak oqaluffinni ajoqersuussutigineqartaraluartoq tarneq toqujuitsoq inunnguuserigipput. 1837-mi palasip George Storrsip qimuttuitsortilluni naqitaaqqat taakkua ilaat nassaaraa. Atuaramiuk qularinngilaa ilumoortoq pingaarutilik paasillugu. Paasisanilu allanut ingerlateqqinniarlugit aalajangerpoq. 1842-mi ima qulequtalimmik oqalugiaqqattaarpoq: “Apeqqut: Ajortut toqujuitsuuppat?” George Storrsip allatai angutip inuusuttup Charles Taze Russellimik atillip paasisaqarfigilluarpai.
14. Aqqutip assersuutaasup piareersarneqareersimanera qatanngutip Russellip suleqataasalu qanoq iluaqutigaat? (Aamma assiliaq takuuk).
14 Aqqutip assersuutaasup piareersarneqareersimanera qatanngutip Russellip suleqataasalu qanoq iluaqutigaat? Misissuinerminni leksikonit, Biibilimi allassimasunik ujarliutit Biibilillu nutsikkat assigiinngitsut suliarineqareersimasut atorluarsinnaavaat. Aamma Henry Grewip, George Storrsip allallu Biibilimik misissuisimanerat iluaqutigaat. Qatanngut Russell suleqataalu namminneq Biibilimut tunngasunik atuakkanik naqitaaqqanillu saqqummersitsillutik anersaakkut aqqusinnioqataapput.
15. 1919-imi pingaarutilinnik qanoq pisoqarpa?
15 1919-imi Babylonnersuup Guutip innuttai pissaaneqarfigiunnaarpai. Ukioq taanna “inussiaq aalajaallunilu silatooq” suliaqartalerpoq inuit eqqortuliorusuttut ‘Aqqutikkut Illernartukkut’ ingerlalersinnaaniassammata. (Mat 24:45-47) Inuit allat aalajaallutik aqqummik piareersaallutik suliaqarsimanerat pissutigalugu tassuuna ingerlalersut Jehova siunertaalu pillugit ilikkagaqarsinnaanerulerput. (Uss 4:18) Jehovallu piumasaqaataanut naapertuuttumik inooriaaseqarsinnaalerput. Jehovap piumasarisimanngilaa innuttami allannguutit pisariaqartut tamaasa ataatsikkut iliuuserissagaat. Piffissalli ingerlanerani innuttani minguiarpai. (Ungalusaq “ Jehovap innuttani minguiarnerulerpai” takuuk). Inuunitsinni sutigut tamatigut Guutip iluarisaatut iliorsinnaanissarput qilanaareqaarput! – Kol 1:10.
‘AQQUT ILLERNARTOQ’ SULI INGERLAVIGINEQARSINNAAVOQ
16. 1919-imiilli ‘Aqqut Illernartoq’ ingerlavigineqarniassammat qanoq iliortoqarsimava? (Esaja 48:17; 60:17)
16 Aqquserngit suulluunniit aserfallatsaaliorneqartarput. 1919-imiilli inuit amerlanerusut Babylonnersuarmit qimagunnissaat siunertaralugu “Aqqummik Illernartumik” anersaakkut aqqusinniortoqartuarpoq. Inussiaq aalajaallunilu silatooq toqqarneqaqqammersoq suliniuteqalerpoq 1921-milu Biibilimik atuaqqissaarnissamut iluaqutissaq Guds Harpe saqqummersillugu. Atuagarlu taanna oqaatsini 36-ni 6 millionit pallillugit naqiterneqarpoq, inuppassuillu taanna iluaqutigalugu ilumoortut Biibilimeersut ilinniarpaat. Maanna Biibilimik mississueqateqarnitsinni iluaqutissaq Naassaanngitsumik pilluarsinnaavutit! pigaarput. Tamatta ‘Aqqutikkut Illernartukkut’ ingerlajuarniassagatta ulluni kingullerni Jehovap peqatigiissortani aqqutigalugit anersaakkut inuussutissaqartittuarpaatigut. – Esaja 48:17; 60:17 atuakkit.
17-18. ‘Aqqutikkut Illernartukkut’ ingerlanerup apuuffissaa suua?
17 Oqarsinnaavugut Biibilimik misissueqateqarnissaminik akuersisoq kinaluunniit ‘Aqqutikkut Illernartukkut’ ingerlalertartoq. Ilaasa sivikitsumik angalaqataariarlutik aqqut qimattarpaat. Allat apuuffissartik tikitserlugu angalaqataaniarlutik aalajangertarput. Apuuffissaat suugami?
18 ‘Aqqutikkut Illernartukkut’ ingerlanerup apuuffissaa qilaliarnissamik neriuutilinnut tassaavoq ‘Guutip paratiisia’ qilammiittoq. (Saqq 2:7) Nunarsuarmi inuunissamik neriuutillit apuuffissaat tassaavoq ukiut 1.000-t naappata naammalluinnartunngornissaat. Aqqutikkut tassuuna ingerlaguit tunummut qiviaqinak. Paratiisissamullu tikiffissat angutserlugu tassuuna ingerlajuarit. “Angalalluarnissannik” kissaappatsigit!
ERINARSUUT 24 Jehovap qaqqaanut majuarta
a Assersuutaasumik aqqut Babylonnimiit Israalimut Jehovap “Aqqummik Illernartumik” taavaa. Aamma nalitsinni Jehova innuttaminut aqqutissiuussiva? Aap, 1919-imiilli inuppassuit Babylonnersuaq qimallugu ‘Aqqutikkut Illernartukkut’ angalalersimapput. Tamatta apuuffissarput tikitserlugu aalajaalluta aqqutikkoortuartariaqarpugut.
c ASSIMI MALUGISASSAT: Qatanngutip Russellip suleqataasalu Biibilimik misissueqqissaarutit sananeqareersimasut atoraat.