1. Jehovap kiffani qanoq kajumis­saarpai? (Aamma assit takukkit).

 TUPPALLERSAR­NEQARNIS­SATSINNIK siunnersor­neqarnis­satsinnillu pisariaqar­titsigaangatta kina saaffigisin­naavarput? Akissutaa nalunngilarput. Jehova Guuti qinunikkut saaffigisin­naavarput. Biibilimi ‘qinujuar­nissatsinnik’ kajumis­saarneqaratta nalunngilarput Jehovap qinukulasar­nissarput kissaatigigaa. (Tes 1. 5:17) Inuunitsinni sutigut tamatigut qinunikkut saaffigisin­naavarput siunnersoq­qullutalu. (Uss 3:5, 6) Jehova Guutiugami tukkortoq qinunermut tunngatillugu killilersun­ngilaatigut.

2. Allaaserisami matumani suut sammissavagut?

² Qinusinnaaneq tunissutaammat qujamasuutigeqaarput. Taamaak­kaluartoq ulapittaratta qinusar­nissamut piffissaqarnissaq ajornakusoor­tissinnaavarput. Aamma imaassinnaavoq misigisugut qinnutigut pitsanngorsar­tariaqarlugit. Qujanar­tumilli Biibili iluaqutigalugu qiimmas­sarneqarlutalu siunnersor­neqarsin­naavugut. Allaaserisami matumani Jiisusi ilaarlugu qanoq qinusar­nissamut piffissaqarsin­naasugut aamma pingaarutillit tallimat ilanngut­tarnerisigut qinnutigut qanoq pitsanngorsarsin­naagigut sammissavarput.

3. Jiisusip qinuneq pillugu suna nalunngilaa?

³ Jiisusip nalunngilaa Jehovap qinnutigut pingaartikkai. Suli qilammiitilluni angutit arnallu aalajaatsut qinnutaat  Ataatami qanoq akisarai takusarsimavaa. Assersuutigalugu Hannap, Daavip, Eliap allarpassuillu qamannga pisumik qinnutaat akineqarmata Jiisusi Ataatami sanianiippoq. (Sam 1. 1:10, 11, 20; Kng 1. 19:4-6; Tuss 32:5) Taamaattumik Jiisusip ilinniartitani ilinniartippai qinukulasar­nissaannik qularutigis­sanngikkaallu qinnutitik tusarneqarumaartut. – Mat 7:7-11.

4. Jiisusip qinusar­neranit suna ilikkarparput?

⁴ Jiisusip nammineq Jehovamut qinunermigut ilinniartitani maligassippai. Nunarsuarmiin­nermini Jiisusi akulikitsumik qinusarpoq. Ulapittarami inuppas­suarnillu ilagineqartarami qinusar­nissaminut piffissaqar­niartarpoq. (Mak 6:31, 45, 46) Makiaartarpoq qinunis­saminut piffissaqar­niassagami. (Mak 1:35) Ilaanni pingaarutilimmik aalajangiin­nginnermini unnuaq naallugu qinuvoq. (Luk 6:12, 13) Aamma nunarsuarmi suliassami ajornakusoor­nerpaartaa naammas­siniassagamiuk toqussi aqaguttoq unnuakkut qinusaqat­taarpoq. – Mat 26:39, 42, 44.

5. Qinugaangatta Jiisusi qanoq ilaarsin­naavarput?

⁵ Jiisusip maligas­siaanit ilinniarparput ulapikkaluarut­taluunniit qinusar­nissamut piffissaqar­tariaqartugut. Jiisusi ilaarlugu ullaaralaan­nguakkut unnukkul­luunniit qinusar­nissamut piffissaqar­niarsin­naavugut. Taamaalioraangatta Jehovamut ersersit­tarparput qinusin­naanermik tunissut immikkut ittoq qujamasuutigalugu. Qatanngutip arnap Lynnemik atillip qinusar­nissamik pisinnaatitaaffik pillugu ilinniaq­qaarami killitsinnini eqqaamavaa. Ima oqarpoq: “Paasigakku Jehova qaquguk­kulluunniit qinunikkut saaffigisin­naallugu ikinngutitut qanigisatut isiginerulerpara. Taamaalil­lungalu qinnutikka pitsanngorsar­tuarniar­tarpakka.” Ilimanarpoq amerlanersagut aamma taamatut misigisartut. Taamaattumik pingaarutillit tallimat qinnutitsinni eqqaasarsin­naasagut sammeriartigit.

6. Saqqummersitat 4:10, 11-lu naapertorlugit Jehovamut tunngatillugu suna naleqquppa?

⁶ Jehova unnersiutigiuk. Apustili Johannesi takorluuisin­neqarami utoqqaanertat 24-t qilammiittut Jehovamik guutisiortut takuai. Oqarput ‘Jehova pissaasoq kisimi unnersiutigineqar­tariaqarlunilu ataqqineqar­tariaqartoq’. (Saqqummersitat 4:10, 11 atuakkit).  Inngilit aalajaatsut Jehovamik unnersiutigin­ninnissaminnut ataqqin­ninnissaminnullu pissutis­sarpassuaqarput. Taakkuami qilammeeqatigaat ilisarisimal­luarlugulu. Iliuusiisigut takusin­naasarpaat pissusii nuannersut. Taamaalioraangamillu unnersiutigerusuler­tarpaat. – Job 38:4-7.

7. Suut pillugit Jehova unnersiutigisin­naavarput?

⁷ Aamma uagut qinnutitsinni Jehova unnersiutigerusut­tarparput, taannalu pillugu suna nuannaarutiginerlugu qujamasuutiginerlugulu oqaatigisarlugu. Biibili atuartillugu Jehovap pissusii illit nuannarisatit maluginiartakkit. (Job 37:23; Rom 11:33) Taava pissusii taakku pillugit qanoq misiginerlutit Jehova qinunikkut oqaluttuuguk. Aamma Jehova unnersiutigisin­naavarput ikiortarmatigut aamma anersaakkut ilaquttagut tamaasa ikiortarmagit. Isumassorlutalu illersor­tuarpaatigut. – Sam 1. 1:27; 2:1, 2.

8. Jehovap qutsaviginissaanut sunik pissutis­saqarpugut? (Tessaluunikamiunut 1. 5:18)

⁸ Jehova qutsavigisaruk. Qinunikkut Jehova qutsaviginissaanut pissutis­sarpassuaqarpugut. (Tessaluunikamiunut 1. 5:18 atuakkit). Nuannarisagut suulluunniit pillugit qutsavigisin­naavarput, tunissutimmi ajunngitsut tamarmik Jehovameersuupput. (Jaak 1:17) Assersuutigalugu nunarsuup alutornassusia pinngor­titaalu tupinnangaartut pillugit qutsavigisin­naavarput. Aamma inuunerput, ilaquttagut, ikinngutigut neriuuterpullu pillugit qujamasunnerput oqaatigisin­naavarput. Jehovalu qutsavigerusupparput ikinngutigerusum­matigut.

9. Sooq Jehovamut qujamasun­nissarput ilungersuutigisariaqarparput?

⁹ Inuppassuit qujamasuitsuummata uagut Jehovamut qujamasut­tuunissarput ilungersuutigisariaqarparput. Inuit kissaatigisatik kisiisa eqqarsaatigisarpaat pigeriikkatik qujamasuutiginagit. Taamatut isiginnit­taaseqalis­sagaluarutta qinnutigut piumasaannarnik nipeqas­sagaluarput. Tamanna pinngitsoor­tinniarlugu Jehovap uagutsinnut iliuusiinut tamanut qujamasunnerput ersersin­niartuar­tariaqarparput. – Luk 6:45.

10. Qatanngutip arnap qujamasuttuuneq pinertusaar­nissaminut qanoq iluaqutigaa? (Aamma asseq takuuk).

¹⁰ Qujamasuttuuneq iluaqutigalugu ajornar­torsiutigut naammagalugit atorsin­naavagut. Qatanngutip arnap Kyung-sookimik atillip tamanna misigaa. b Puammigut siaruaas­simasumik kræfteqalerpoq. Ima oqarpoq: “Napparsimalernera nikallus­sutigingaarpara. Misigivunga suut tamaasa annaasimallugit, annilaangasorujus­suuvungalu.” Pinertusaar­nissaminut suna iluaqutigaa? Oqaluttuarpoq unnuit tamaasa innanngin­nermini illumi qalianukar­tarluni ullormut qujamasuutigisani tallimat pillugit qinuniarluni. Taamaalioreeraangami eqqissisutut misigisarlunilu Jehovamik asannin­nerminik ersersitsinis­saminut  killinneqartarpoq. Paasivaa misilin­neqarnermi Jehovap kiffani aalajaatsut tapersersortarai inuunitsinnilu pilluaq­qussutit misilin­neqarnernit amerlanerungaartut. Kyung-sookitut arlaatigut misilin­neqaraluarluta Jehovamut qujamasut­tuunissatsinnut pissutis­sarpassuaqarpugut. Qujamasunnerput qinunikkut ersersit­tarutsigu misigis­sutsikkut oqimaaqatigiis­saarinis­satsinnut pinertusaar­nissatsinnullu iluaqutigis­savarput.

11. Jiisusip qilaliareernerata kingorna sooq ilinniartitai sapiissuseqar­tariaqarpat?

¹¹ Oqaluus­sinermi sapiinnissamik Jehova qinnuigisaruk. Jiisusip qilalian­ngitsiarluni ilinniartitani eqqaasippai nammineq pilluni ilisiman­nittutut nassuiaassasut “Jerusalemmimi, Judiiami tamarmi, Samaariami nunarsuullu isorpiaa tikillugu”. (ApS 1:8; Luk 24:46-48) Kingornatigut juutit siuttuisa apustilit Petrusi Johannesilu tigusarivaat juutillu eqqartuus­siviisa qullersaannut sassartillugit, peqquaallu angutit aalajaatsut taakku oqaluus­siunnaassasut. Allaat sioorasaarpaat. (ApS 4:18, 21) Petrusi Johannesilu qanoq akippat?

12. Apustilit Suliaat 4:29, 31-lu naapertorlugit ilinniartitat suppat?

¹² Juutit upperisarsiornikkut siuttuisa sioorasaarutaannut Petrusi Johannesilu ima akipput: “Guutimut naalannani ilissinnut naalanneq Guutip eqqortuliornertut isigissaneraa nammineq nalilis­savarsi. Uagulli takusagut tusakkagullu eqqartorun­naarsin­naanngilagut.” (ApS 4:19, 20) Petrusi Johannesilu iperagaammata ilinniartitat nipituumik Jehovamut qinullutik ersersippaat taassuma piumasaatut iliorusullutik. Ima qinupput: “[Inussiaatitit] sapiissuseqangaarlutik illit oqaatsit pillugu oqaluus­siniassammata ikiukkit.” Qamannga pisumik qinnutaat Jehovap akivaa. – Apustilit Suliaat 4:29, 31 atuakkit.

13. Jin-hyuk qanoq ilinniarfigaarput?

¹³ Oqartussaasut oqaluus­siunnaaq­qussappatigut oqaluus­siuarnitsigut ilinniartitat ilaarsin­naavagut. Qatanngut angut Jin-hyukimik atilik sakkutuujujuman­nginnami parnaarus­saaqqavoq. Parnaarus­sivimmi parnaarussat immikkoor­titaasut isumaginis­saannut akisussaaf­filerneqarpoq. Pisariaqar­titaalli kisiisa pillugit oqaloqatigisinnaavai, Biibililu pillugu oqaluus­seqquneqanngilaq. Periarfis­saqaraangami oqaluus­sisinnaaniassagami sapiinnis­saminik periaaserin­nissaminillu qinusarpoq. (ApS 5:29) Ima oqaluttuarpoq: “Jehovap qinnutiga akivaa sapiissusermik ilisimas­susermillu tunillunga. Taamaalil­lungalu parnaarussat amerlasuut minutsinik tallimanik Biibilimik misissueqatigisalerpakka. Taava unnukkut allakkanik allattarpunga parnaarussanut tunniusassannik.” Jin-hyuk ilaarlugu sapiissuseq ilisimas­suserlu qinnutigisin­naavagut qularinagu Jehovap oqaluus­sinitsinni ikiorumaaraatigut.

14. Ajornar­torsiornermi suna iluaqutigis­savarput? (Tussiaat 37:3, 5)

¹⁴ Ajornar­torsiutit naammagalugit atornis­saannut ikioqqullutit Jehova qinnuigiuk. Inuppassuit nappaammik, eqqarsar­taatsikkut nanertisimanermik, asasamik toqusoornermik, ilaqutariinni ajornar­torsiornermik, malersor­neqarnermik, ajornar­torsiutinil­luunniit allanik nalaataqartarput. Aamma nappaalanersuit sorsunnerillu suli ajornerulersitsisarput. Taamaattumik uummammiugisatit tamaasa Jehovamut aniatikkit. Ikinngutigil­luakkat oqaluttuul­lugulusooq atukkatit Jehovamut oqaluttuarikkit. Qularutigis­sanngilat Jehova ‘akuliuk­kumaartoq’. – Tussiaat 37:3, 5 atuakkit.

15. Qinuneq ‘annikil­liornermi pinertusaar­nissatsinnut’ qanoq iluaqutigis­savarput? Assersuuteqarit.

 ¹⁵ Qinujuarutta ‘annikil­liornermi pinertusaarsin­naassaagut’. (Rom 12:12) Jehovap nalunngilaa kiffani qanoq nalaataqar­tarnersut – ‘annikil­liorneranni nillianerat tusartarpaa’. (Tuss 145:18, 19) Qatanngutip arnap pioneriusup 29-nik ukiullip Kristiemik atillip tamatuma ilumoornera paasivaa. Perulun­nartumik peqqiil­liuleriataarpoq tamatumalu kingunerisaanik isumatsaq­qarujus­sualerluni. Kingusin­nerusukkut paasivaa anaanani katsorsar­neqarsin­naanngitsumik nappaateqalersoq. Ima oqarpoq: “Jehova kimigiiserfigisarpara nakussatseq­qullunga ullut tamaasa anigorsin­naanias­sagakkit. Ataatsimiigiar­tarnikkut namminerlu misissuisarnikkut anersaakkut ittunik sammisaqar­niartarpunga.” Imalu nangippoq: “Qinusarama ullut ajornerpaaffikka anigorpakka. Nalunngilara Jehovap najortuaraanga. Tamannalu tuppallersaatigingaarpara. Peqqissutsikkut ajornar­torsiutikka ingerlaannaq aaqqinneqan­ngikkaluartut Jehovap qinnutikka akivai qamuuna eqqissinermik tunillunga.” Eqqaamajuartigu “Jehovap [nalunngikkaa] Guutimut tunniusimasut misilin­neqarnermit qanoq aniguisis­sallugit”. – Pet 2. 2:9.

16. Sooq ussernartup akiornissaanut Jehovamit ikiorneqar­tariaqarpugut?

¹⁶ Ussernar­torsioraangavit ikioqqullutit Jehova qinnuigisaruk. Naammal­luinnan­ngitsuugatta eqqunngitsulior­nissamut ussernar­torsiorneq akiortuar­tariaqarparput. Saatanillu akiuunnerput oqimaan­nerulersin­niartarpaa. Ilaatigut taamaalior­niartarpoq aliikkusersuutit aserorsaataasut atorlugit. Aliikkusersuutit taamaattut minguttuunik eqqarsalersitsisin­naapput. Taamaat­tunillu eqqarsaateqar­tarutta ingasattumik ajortuliornermik kinguneqarsinnaavoq. – Mak 7:21-23; Jaak 1:14, 15.

17. Ussernartumut nakkaan­naqqunata qinnutigut naapertorlugit qanoq iliuuseqarsin­naavugut? (Aamma assit takukkit).

 ¹⁷ Eqqunngitsulior­nissamik ussernar­torsiut qaangis­sagutsigu Jehovamit ikiorneqar­tariaqarpugut. Jiisusip qinnummi najoqqutas­saasumi tamanna ilannguppaa ima oqarami: “Ussernartumut nakkaan­naqqunata ikiortigut, Diaavulumillu annaatsigut.” (Mat 6:13) Jehova ikiuinis­saminut piareeqqavoq, ikiorneqar­nissarpulli qinnutigisariaqarparput. Qinnutigullu naapertorlugit iliuuseqar­tariaqarpugut. Ilaatigut taamaaliorsin­naavugut inuit Jehovamik kiffartor­tuunngitsut eqqarsar­taasiisa eqqunngitsut ingalas­simaniar­nerisigut. (Tuss 97:10) Ineriar­tornartunik eqqarsaateqalerumalluta Biibili atuarlugulu misissoq­qissaarsin­naavarput. Aamma ataatsimiigiartarneq oqaluus­seqataasarnerlu eqqarsar­taatsitsinnik illersuutaasin­naapput. Jehovap neriorsorpaatigut artukkatsinnik usserneqar­nissarput akuerinaviarnagu. – Kor 1. 10:12, 13.

18. Qinunermut tunngatillugu tamatta susariaqarpugut?

¹⁸ Ulluni kingullerni makkunani erloqinartuni Jehovamut aalajaak­kumalluta tamatta qinusar­nissarput aatsaat taama pingaaruteqartigaaq. Ullut tamaasa qamannga pisumik qinusar­nissamut piffissamik immikkoor­titsisarit. Jehovap kissaatigaa ‘uummammiugisagut tamaasa’ qinunikkut saqqummiutis­sagigut. (Tuss 62:9) Jehova unnersiutigisaruk iliuusiinullu qujamasunnerit oqaatigisarlugu. Oqaluus­sinermi sapiitsuusin­naaqqullutit taassumunnga ikioqqugit. Ajornar­torsiorninni ussernar­torsior­ninnilu ikioqqullutit kimigiiserfigiuk. Qanorluunniit pisoqas­sagaluarpat inuillu allat qanorluunniit oqassagaluarpata Jehovamut qinujuarit. Jehovap qinnutigut qanoq akisarpai? Apeqqut pingaarutilik taanna allaaserisami tulliuttumi akissutis­sarsissavarput.