Atuartartut apeqqutaat
Qanga Guutip innuttai Babylonersuarmi aallaarussaaqqappat, tassa parnaarussaaqqappat?
100-kkunniilli 1919-ip tungaanut anersaakkut parnaarussaaqqapput. Sooq paasinnittaatsitsinnik taamatut allannguineq pisariaqarpa?
Uppernarsaatit takutippaat 1919-imi kristumiut tanitat Babylonersuarmit aniguisinneqartut ilagiinnullu minguiarneqarsimasunut katersorneqartut. Una eqqarsaatigiuk: 1914-imi Guutip naalagaaffia qilammi naalakkersuilerniariartoq Guutip innuttai misilinneqarput anersaakkullu minguiarneqalerlutik. * (Mal 3:1-4) Taava 1919-imi Jiisusip “inussiaq aalajaallunilu silatooq” Guutip innuttaanik minguiarneqarsimasunik “piffissaq eqqorlugu” nerisitsisartussaq toqqarpaa. (Matt 24:45-47, NW) Ukiumi tamatumani Guutip innuttai Babylonersuarmit anersaakkut parnaarussaaqqanerminnit iperagaapput. (Saqq 18:4) Kisianni qanga Guutip innuttai anersaakkut parnaarussaappat?
Siornatigut nassuiartarparput Guutip innuttai 1918-ip aallartinnerani sivikitsumik Babylonersuarmit parnaarussaasut. Vagttårnet marsip 15-iat 1992-imoortumi allassimavoq Israelikkut Babylonimut aallarussaanerattulli Guutip innuttai 1918-imi Babylonersuarmit parnaarussaasut. Misissueqqissaartoqaqqinnerulli takutippaa Guutip innuttai 1918 sioqquterujussuarlugu parnaarussaasut.
Ezekielip allagaani kapitali 37-mi siulittuutigineqarpoq Guutip innuttai aallarussaassasut kingusinnerusukkullu iperagaassasut. (Ez 37:1-14) Ezekielip takorruisinneqarluni takuaa qooroq saanikunik ulikkaartoq. Jehova ima oqarpoq: “Saanikut uku tassa Israelikkut tamarmik.” (Versi 11) Pineqartut tassaapput itsaq Israelikkut. Siulittuutillu eqquuteqqinnerani pineqarpoq “Israeli Guutip pigisaa”, tassa tanitat. (Gal 6:16; ApS 3:21) Takorruukkami saanikut uummarput sakkutoorpassuanngorlutillu. Guutip innuttaasa 1919-imi Babylonersuarmit iperagaanerat taamatut allaatigineqarpoq. Siulittuutilli tamatuma qanoq takutippaa parnaarussaaneq sivisoorujussuusoq?
Siullermik, Ezekielip inuit toqungasut saanikui ‘parngulluinnarsimasut’ takuai. (Ez 37:2, 11) Tassa inuit sivisoorujussuarmik toqungapput. Aappassaanik, Ezekielip toqungasut uummariataarnatik uummariartoruusaartut takuai. Ima allassimavoq: “Perpalulerpoq, saarngillu imminnut qanillipput.” Taava takuai ‘ujaloqalerlutillu uininittut’, taakkulu ameqalersut. Kingusinnerusukkut anersaartorneq taakkua “iluannut pivoq uummartillugillu”. Naggataatigullu Jehovap inuit uummaqqissimasut nunassaannik tunivai. Tamakkorpassuit pinerat sivisusimassaaq. – Ez 37:7-10, 14.
Siulittuutigineqartutorluinnaq Israelikkut sivisuumik aallarussaaqqapput. Kr.in.si. ukiumi 740-mi Israelikkut naggueqatigiissortaasa quliusut, naalagaaffiup avannarliup innuttaasa, siulliullutik aallarussaallutik nunartik qimattariaqalerpaat. Kingusinnerusukkut Kr.in.si. 607-imi Jerusalemi Babylonimiunit tiguarneqarmat Israelikkut naggueqatigiissortaasa marluusut, naalagaaffiup kujalliup Judap innuttaasa, nunartik qimattariaqalerpaat. Taava Kr.in.si. ukiumi 537-mi iperagaagamik juutit ikittunnguit naalaffik sanaqqissallugu Jehovamillu pallorfiginninneq pilerseqqinniarlugu Jerusalemimut uterput.
Tassa annikitsualuppassuit tamakkua takutippaat kristumiut tanitat Babylonersuarmit parnaarussaaqqanerat 1918-imiit 1919-imut pisimasunit sivisunerujussuusimassasoq. Piffissaq sivisooq tamannarpiaq Jiisusip pivaa oqarami naasupiluit, tassa kristumiuunerartut, aamma qajuusiassat, tassa “Naalagaaffiup qitornai”, naajartoqatigiissasut. (Matt 13:36-43) Piffissami tamatumani kristumiut ilumoortut ikittuinnaapput. Kristumiuunerartummi amerlanerit ajoqersuutit eqqunngitsut akueralugit tunussisunngorsimapput. Tamanna pissutigalugu oqarsinnaavugut ilagiit kristumiut Babylonersuarmit parnaarussaaqqasut. Taamatut parnaarussaaqqapput 100-kkunniit Guutip naalaffiata anersaakkut ittup naggatissap nalaani minguiarneqarnissaata tungaanut. – ApS 20:29, 30; 2 Th 2:3, 6; 1 Joh 2:18, 19.
Ukiuni hundredilinni taakkunani palasit politikkikkullu siuttut inuinnarnut pissaaneqarnertik annaanaveersaarpaat. Assersuutigalugu inuit Biibileqaqqusaanngillat, oqaatsilluunniit paasisinnaasatik atorlugit Biibilimik atuaqqusaanngillat. Biibilimik atuartut ilaat nappakkami ikuallallugit toqunneqarput. Palasillu ajoqersuutaannut akerliusumik ajoqersuisut peqqarniitsumik pillarneqartarput. Taamani sallusuissummik ilisimannilernissaq allanillu ilinniartitsinissaq ajornangajalluinnarpoq.
Ezekielip takorruugaanit aamma paasivarput Guutip innuttai uummaqqikkiartuaartut. Qanga
aamma qanoq anersaakkut eqeeriartulerpat? Takorruukkami ‘perpalunneq’ eqqaaneqarpoq. Tamanna naggatissap nalaa ukiunik hundredilikkuutaanik arlaqanngitsunik sioqqullugu aallartippoq. Ukiuni tamakkunani ajoqersuinerluttorpassuaqaraluartoq inuit ikittut aalajaallutik sallusuissut nassaarerusullugulu Guuti kiffartorfigerusuppaat. Ilaat Biibilimik atuaqqissaartarput sapinngisartillu tamaat ilikkakkatik inunnut allanut oqaluttuaralugit. Ilaasa allat Biibili oqaatsinut inuit paasisinnaasaannut ilungersorlutik nutsertarpaat.Taava 1800-kkut naalerneranni ‘saanikut uineqalerlutillu ameqalerput’. Charles Taze Russell ikinngutaalu sallusuissut Biibilimeersoq paasiumallugu Jehovalu kiffartorfigiumallugu ilungersorput. Aamma inuit allat sallusuissummik paasinnissinnaaqqullugit Zion’s Watch Tower atuagassiallu allat atorlugit ikiorpaat. Kingusinnerusukkut Guutip innuttaasa 1914-imi isiginnaagassiaq “Skabelsens Fotodrama” 1917-imilu atuagaq tuluttooq Den fuldbyrdede Hemmelighed uppernermikkut nakussatsissutigaat. Kiisalu 1919-imi Guutip innuttai ‘uummaqqipput nutaamillu nunataarlutik’. Taamanikkumiilli tanitanut ilannguttalerput nunarsuarmi naassaanngitsumik inuunissamik neriugisallit. Tamarmik Jehova pallorfigaat ataatsimoorlutillu ‘sakkutoorpassuanngorlutik’. – Ez 37:10; Zak 8:20-23. *
Tassa erseqqippoq 100-kkunni tunussisut amerliartuinnarmata Guutip innuttai Babylonersuarmit anersaakkut parnaarussaaqqalersut. Piffissaavoq taarsiorfiusoq, ukiorpassuarnimi Jehovamut kiffartorniarneq imaannaanngitsuuvoq soorlu Israelikkunnut aallarussaaqqasunut taamaassimasoq. Ullumikkulli sallusuissut kikkunnut tamanut oqaluussissutigineqarpoq. ‘Paasisimasartuut qaammarinnerisa’ nalaanni inuunitta nuannissusia! Maanna inuppassuit ‘minguiarneqarlutillu eqqiarneqarsinnaapput’ pallorfiginninnerlu ilumoortoq ilassillugu. – Dan 12:3, 10.
Saatanip Jiisusi usserniaramiuk naalaffimmukaappaa, imaluunniit naalaffimmik takorruuisippaa?
Saatanip naalaffik Jiisusimut qanoq takutinneraa qulakkeerlugu ilisimanngilarput.
Biibilimik allattut Matthæusip Lukasillu pisimasut allaatigaat. Matthæusi allappoq Diaavulup Jiisusi Jerusalemimut ‘ingerlaqatigigaa, naalaffiullu inngianut pisikkaa’. (Matt 4:5) Lukasi allappoq ‘Diaavulup Jerusalemimut ingerlakkaa, naalaffiullu inngianut pisikkaa’. – Luk 4:9.
Siornatigut atuagassiaatitsinni allassimavoq Jiisusi Saatanimit usserniarneqarami timikkut naalaffimmukaanneqarsimanavianngitsoq. Vagttårnet aggustip 15-iat 1961-imoortumi tamanna Saatanip Jiisusimik ussiiniarluni silarsuarmi naalagaaffinnik tamanik qaqqamit portusoorsuarmiit qimerloortitsineranut assersuunneqarpoq. Allassimavoq qaqqaqanngitsoq silarsuarmi naalagaaffinnik tamanik takunniffiusinnaasunik. Nangillunilu allassimavoq ilimanartoq taamatulli Saatanip Jiisusi naalaffivimmukaassimanavianngikkaa. Atuagassianili kingusinnerusukkut saqqummersuni
allassimavoq Jiisusi naalaffimmiit ammut pississimagaluaruni toqusimasinnaagaluartoq.Oqartoqartarpoq Jiisusi Levikkuunnginnami naalaffiup illernartup inngianeeqqusaanngitsoq taamaattumillu Saatanip Jiisusi takorruuinikkut usserniarsimassagaa. Ukiut hundredillit tamatuma siorna Ezekieli aamma takorruuisinneqarnikkut naalaffimmukaanneqarpoq. – Ez 8:3, 7-10; 11:1, 24; 37:1, 2.
Kisiannimi Jiisusi takorruuinikkut naalaffimmukaanneqarsimappat ima aperisoqarsinnaavoq:
-
Jiisusip naalaffimmiit ammut pissinnissani ilumut ussernartorsiorfigisimassagaluarpaa?
-
Saatanip Jiisusi ujaqqanik timiusanngortitseqqugamiuk ujaraviit timiusaviillu pivai, aamma naalagaaffiit takutikkamigit imminik pallorfiginninnivimmik iliuuseqaqquaa. Taamaattumik imaassinnaava Saatanip Jiisusi naalaffivimmiit ammut pisseqqugaa?
Kisiannimi Saatanip takorruuisitsinerunngitsumik Jiisusi naalaffivimmukaassimappagu ima aperisoqarsinnaavoq:
-
Jiisusip naalaffiup illernartup inngianiinnermigut Inatsisit unioqqutippai?
-
Jiisusi inoqajuitsumiit qanoq Jerusalemimukarpa?
Apeqqutit kingulliit marluk akissutissarsiorneranni paasissutissat allat iluaqutigisinnaasavut misissoriartigit.
Professori D. A. Carson allappoq oqaaseq grækerisooq ‘naalaffimmik’ nutserneqartartoq Matthæusip Lukasillu atoramikku illernartuut Levikkut kisimik iserfigisinnaasaat kisiat pinnagu pigunaraat naalaffik tamatumalu silarlii. Jiisusilu tamatuma qarmarsuani kujataani-kangisissuani teqikkuata qaavanut ungalulimmut pisinneqarsimasinnaavoq, tassanngaanniimmi Kedronip Qooruata naqqanut 140 meterit missaannik ititigaaq. Oqaluttuarisaanermik ilisimatooq Josefus allappoq tamanna itingaarami inuk tassani qeqarluni ammut qiviaruni “uissanngulissasoq”. Jiisusi Levikkuunngikkaluarluni allanit ajorineqarani tassaniissinnaavoq.
Jiisusili inoqajuitsumiit Jerusalemimi naalaffimmut qanoq pisimasinnaava? Naluarput. Biibilimi allassimaannarpoq Jiisusi Jerusalemimut pisoq. Allassimanngilaq Jiisusip Jerusalemi qanoq ungasitsigineraa Saatanimillu qanoq sivisutigisumik usserniarneqarnersoq. Taamaattumik Jiisusi Jerusalemimut pisussimasinnaavoq, pisuinnarlugu sivisugaluarpalluunniit.
Saatanip “silarsuarmi naalagaaffiit tamaasa” Jiisusimut qimerloortikkamigit takorruuisinneratigut taamaaliorsimasinnaavoq, nunarsuarmimi qaqqaqanngilaq tamakkuninnga tamanik ataatsikkut takunniffiusinnaasumik. Takorruuisissimasinnaavaa uagut filmimik qinngortitsivik atorlugu silarsuarmi sumiiffiit allat assinginik takutitsisarnitsitut. Saatani takorruuisitsigunarpoq, kissaatigaali Jiisusip nunamut pallorluni guutisiorfigissagaani. (Matt 4:8, 9) Taamaattumik Saatanip Jiisusi naalaffimmukaakkamiuk imaassinnaavoq naalaffimmiit ammut pissinnermigut inuunerminik navianartorsiortitsissasoq kissaatigigaa. Jiisusilli tamanna itigartippaa. Tamannalu misilinneqaataangaarnerussagaluarpoq takorruuisinneqarnikkut usserniarneqarnermininngarnit!
Tassa imaassinnaavoq Jiisusi ilumut Jerusalemiliartoq naalaffiullu portunersaani qeqartoq. Soorunami allaaserisap matuma aallaqqaataani allassimaneratut Saatanip naalaffik Jiisusimut qanoq takutinneraa qulakkeerlugu ilisimanngilarput. Upperilluinnarsinnaavarpulli Saatanip Jiisusi eqqunngitsuliortinniarlugu usserniartuarsimassagaa Jiisusillu nangaanngivilluni tamatigut itigartittaraa.
^ imm. 2 Napasuliaq Alapernaarsuiffik juulip 15-iat 2013-imoortoq, qupp. 10-12, imm. 5-8, 12 takukkit.
^ imm. 2 1919-mi pisut ilaat pillugit ukunani allaatigineqarput: Ezekieli 37:1-14 aamma Saqqummersitat 11:7-12. Ezekielip allagaani versini taakkunani pineqarput Guutip innuttai tamarmiusut sivisoorujussuarmik paarnaarussaaqqareerlutik 1919-imi pallorfiginninnermut ilumoortumut utertut. Kisianni Saqqummersitat 11:7-12-mi siulittuummi pineqarpoq qatanngutit tanitat ikittunnguit Guutip innuttaanik siulersuisut 1919-imi anersaakkut uummaqqinnerat. Qatanngutit taakku piffissami sivikikujuttumi susinnaanngikkallartitaapput.