Inoroorsaarneq – Nuannaarutaallunilu pisariaqartoq!
“Immissinnut inoroorsaarfigiuaritsi pitseriitsuunasi.” – 1 PETR 4:9.
1. Kristumiut siulliit pissutsit atugaat qanoq ippat?
UKIUT 62-ip 64-illu nalaanni apustilip Petrusip kristumiut ‘siammarsimallutik inuiaat allat akornanni takornartaallutik Pontusimi, Galatiami, Kappadokiami, nunap immikkoortuani Asiami Bityniamilu najugaqartut’ allaffigai. (1 Petr 1:1) Qatanngutit taakku assigiinngitsorpassuarnik tunuliaqutaqarput. ‘Innikkut misilinneqaramik’, imaluunniit malersorneqaramik, qiimmassarneqartariaqarlutillu siulersorneqartariaqarput. Aamma piffissami navianartumi inuupput. Petrusi allappoq ‘naggatissaq qanillisoq’. Jerusalemimi piuneerunneqartussaavoq, tamannalu pivoq ukiut quliunngitsulluunniit qaangiummata. Kristumiut sumiikkaluartulluunniit pissutsit erloqinartorsiorfiusut anigorniarlugit suna iluaqutigisinnaavaat? – 1 Petr 4:4, 7, 12.
2, 3. Sooq Petrusip qatanngutini inoroorsaaqqullugit kajumissaarpai? (Allaaserisap aallaqqaataani assiliaq takuuk).
2 Petrusip qatanngutiminut kajumissaarutaasa ilaat unaavoq: “Immissinnut inoroorsaarfigiuaritsi.” (1 Petr 4:9) Oqaaseq grækerisooq ‘inoroorsaarnermik’ nutserneqartoq nutsiinnavillugu isumaqarpoq “takornartanik nuannarinninneq, imaluunniit takornartanut inussiarnisaarneq”. Petrusilli qatanngutini, imminnut ilisarisimasariillutillu susassareqatigiittaraluartut, ‘inoroorsaarfiginnittarnissaannik’ kajumissaarpai. Inoroorsaarneq qanoq iluaqutigissagamikku?
3 Imminnut qaninnerulissutigissavaat. Illimmi? Arlaannut qaaqqusaallutit nuannisaravit eqqaamaviuk? Aamma illit uppeqatinnik qaaqqusigavit immissinnut qaninnerulerpusi, ilaa? Inoroorsaarnitsigut qatanngutivut ilisarisimallualersinnaavavut. Petrusip nalaani kristumiut inuusut ajornartorsiutit ajorneruleriartortillugit imminnut qanillisariaqarput. ‘Ulluni kingullerni’ aamma uagut taamaaliortariaqarpugut. – 2 Tim 3:1.
4. Allaaserisami matumani suut sammissavavut?
4 Qanoq ‘immitsinnut inoroorsaarfigisinnaavugut’? Inoroorsaarnissatsinnut aporfiusinnaasut qanoq qaangersinnaavavut? Pulaartutut qanoq pissuserissaarsinnaavugut?
INOROORSAARNISSAMUT PERIARFISSAT
5. Ataatsimiinnitsinni qanoq inoroorsaarsinnaavugut?
5 Ataatsimiinnerni: Jehovap peqatigiissortaasalu ataatsimiinnernut qaaqqusarpaatigut. Ataatsimiinnernut najuuttut tamaasa, pingaartumik takkuttaleqqaartut, tikilluaqqusaasutut misigitikkusuppavut. (Rom 15:7) Aamma taakku Jehovap pulaartorai, taamaammat qanorluunniit isikkoqaraluarpata atisaallu apeqqutaatinnagit toqqissisimasutut misigitikkusuppavut. (Jaak 2:1-4) Kisimiilluni takkuttoqarpat issiaqatiserissaviuk? Ataatsimiinnermi susoqarnissaanik paasisaqarnissaanut allassimaffiilluunniit atuffassissutigineqartut nassaarinissaannut ikiorukku qujamasussagunarpoq. Tamanna ‘inoroorsaarnermik’ ersersitseriaasiuvoq pitsaalluinnartoq. – Rom 12:13.
6. Pingaartumik kikkut qaaqqusassavavut?
6 Tamulugassanut nerisassanulluunniit qaaqqusigit: Biibilip nalaani inoroorsaarnermik ersersitseriaatsit amerlanertigut ilagisarpaat neriartoqqusineq. Tamanna ikinngutigiikkusunnermut eqqisseqatigiikkusunnermullu ersiutaasarpoq. (1 Mos 18:1-8; Eqq 13:15; Luk 24:28-30) Pingaartumik kikkut qaaqqusassavavut? Ilagiitsinni qatanngutivut. Pissutsit maanna atuuttut ajorneruleriartortillugit qatanngutivut pisariaqartinnerulerlugillu ikinngutitut ilumoorfigisariaqarpavut. 2011-mi Siulersuisoqatigiit USA-mi Betelimi ilaqutariittut Napasuliaq Alapernaarsuiffik-mik atuaqqissaaqatigiinnerup aallartiffia 18:45-ugaluartoq 18:15-imut allanngortippaat. Sooq? Nalunaarummi eqqaaneqarpoq ataatsimiinneq naammassiaarneruppat Betelimi kiffartortunut qaaqqusinissaq pulaarnissarlu ajornannginnerulissasoq. Aamma immikkoortortaqarfiit allat taamaaliorsimapput. Betelimi ilaqutariinni imminnut qanillinerunissaannut periarfissaqarnerulersitsivoq.
7, 8. Oqalugiarniarlutik tikeraat qanoq inoroorsaarfigisinnaavavut?
7 Ilaannikkut qatanngutit angutit ilagiinnit allaneersut, ilagiinnik nakkutilliisut immaqalu Betelimit aallartitat ilagiitsinni oqalugiartarput. Ilagiitsinni tikeraartoqaraangat inoroorsaarnissamut periarfissatsialaasarpoq. (3 Johannesi atuakkit). Uagutsinnut tamulukkiartornissamut neriartornissamulluunniit qaaqqusinnaavavut. Illit taamaaliornissannut periarfissaqarpit? 5-8
8 USA-mi qatanngut arnaq ima oqaluttuarpoq: “Ukiut ingerlanerini uigalu oqalugiartunut nuliaannullu angerlarsimaffitsinni inoroorsaarnissamut periarfissaqartarsimavugut. Misigisat tamarmik nuanneqaat, pingaarnerpaamillu anersaakkut ineriartornartuullutik. Peqqissimissutiginngisaannarparput.”
9, 10. (a) Kikkut sivisunerusumik inisimasorineqartariaqarsinnaappat? (b) Angivallaanngitsunik angerlarsimaffillit ikiuutaasinnaappat? Assersuuteqarit.
9 Illusimasitsineq: Biibilip nalaani tikeraartunik unnuisitsisarneq nalinginnaavoq. (Job 31:32; Fiil 22) Aamma nalitsinni taamaappoq. Ilagiinnik nakkutilliisut tikeraaraangamik inisimaffissaminnik pisariaqartitsisarsinnaapput. Aamma Nalunaajaasunut ilinniarfinni ilinniartunut kajumissutsiminnillu sanaartoqataasunut tunngatillugu taamaassinnaavoq. Pinngortitamimmi ajunaarnersuaqarnerup kingunerisaanik angerlarsimaffeeruttunut tunngatillugu? Angerlarsimaffitsik sanaqqinneqarnissaata tungaanut allami ineqarallartariaqarsinnaapput. Isumaqassanngilagut illorujussuallit kisimik inisimasoqarsinnaasut. Immaqa taakku inisimasoqartareerput. Angerlarsimaffiit mikigaluarpalluunniit illit inisimasoqarsinnaavit?
10 Qatanngutip angutip Korea Kujallermeersup Nalunaajaasunut ilinniarfinni ilinniariat tikeraartorisani nuannersunik eqqaamasaqarfigai. Ima allappoq: “Katerngaajullutalu angerlarsimaffipput angivallaanngimmat aallaqqaammut nangaagaluarpunga. Ilinniartunilli inisimasoqarneq nuanningaartunik uagutsinnut misigisaqarfiuvoq. Katerngaajulluta takusinnaavarput aappariit Jehovamik kiffartoqatigiillutillu anersaakkut ittunik anguniagaqatigiikkaangata qanoq nuannaartigisinnaasut.”
11. Ilagiinnut nooqqammersut sooq inoroorsaarfigineqarnissaminnik pisariaqartitsippat?
11 Ilagiinnut nooqqammersut: Immaqa kisimiittut ilaqutariilluunniit ilagiitsinnut nuussimapput. Imaassinnaavoq ilagiissinni pisariaqartitsisoqarmat nuussimasut. Immaqa pioneriupput ilagiissinnut aallartinneqarsimasut. Tamanna taakkununnga sungiunniagassarujussuussaaq. Immaqa sumiiffimmut nutaamut, ilagiinnut allamut, allaalluunniit oqaatsinut kulturimulluunniit allarluinnarmut naleqqussartariaqarput. Tamulugassanik nerisassanilluunniit sassaallerfigisinnaavigit imaluunniit arlaannukaqatigalugit? Tamanna ikinngutitaarnissaminnut allannguutinullu sungiussinissaminnut iluaqutigissavaat.
12. Misigisamit qanoq erserpa inoroorsaarniarlutit sorpassuarnik piareersaasariaqanngitsutit?
12 Inoroorsaarumallutit sorpassuarnik piareersaasariaqanngilatit. (Lukasi 10:41, 42 atuakkit). Qatanngut angut nulianilu ajoqersuiartortitatut aallarteqqaaramik ima eqqaamasalikkersaarpoq: “Inuusuppugut, misilittagaqarpiarnata angerlarserlutalu. Unnuit ilaanni nuliara ingammik angerlarserpoq, tuppallersaaniarneralu iluaqutaanngilaq. Taava unnukkut arfineq-pingasup qeqqata missaani kasuttortoqarpoq, sunaaffa arnaq Biibilimik atuaqqissaartartoq appelsiinanik pingasunik nassarluni pajuttoq. Ajoqersuiartortitat nutaat tikilluaqqorusullugit takkulluni. Iseqquarput imermillu tunillugu. Taava tiiliorlutalu kissartumik kakaoliorpugut. Suli swahilisut oqalussinnaanatalu taanna tuluttoorsinnaanngilaq. Taamatulli pisoqarnera qatanngutinik nunaqavissunik ikinngutitaartornitsinnut aallarniutaavoq nuannersoq.”
INOROORSAARTUUNISSAT NANGAASSUTIGEQINAGU
13. Inoroorsaarneq sunik iluaqutissartaqarpa?
13 Inoroorsaarnissannut nangaanikuuit? Taamaappat nuannisarnissaraluarnut naassaanngitsumullu ikinngutitaarnissannut periarfissaq maanngaannartissimasinnaavat. Kiserliorunnaarnissamut iliuuserisassat pitsaanerpaat ilaat tassaavoq inoroorsaarneq. Sooq ilaat inoroorsaarnissaminnut nangaasarpat? Arlalinnik pissuteqarsinnaapput.
14. Qaaqqusinissamut qaaqqusaanissamullu piffissaqarpiaratalu nukissaqarpianngikkutta susinnaavugut?
14 Piffissaq nukissallu: Jehovap innuttai ulapittuullutillu akisussaaffippassuaqarput. Ilaat misigipput inoroorsaarnissaminnut piffissaqarpiaratillu nukissaqaratik. Taamatut misigiguit qaaqqusinissamut qaaqqusaanissamullu piffissaqarumallutit pilersaarutitit allanngortittariaqarsinnaavatit. Tamanna pingaaruteqarpoq, inoroorsaarnissamummi Biibilimi kajumissaarneqarpugut. (Hebr 13:2) Tassa inoroorsaarnissaq eqqortuliorneruvoq. Inoroorsaarsinnaajumallutilli pingaaruteqannginnerusut tunulliuttariaqarsinnaassavatit.
15. Sooq ilaat inoroorsaarsinnaanatik misigippat?
15 Illit pillutit nammineq isummat: Arlaanni inoroorsaarusukkaluarlutit ajukkunnikuuit? Immaqa ittooravit pulaartuit pikkunaalliulernissaat ernumassutigaat. Imaluunniit aningaasaateqarpallaanngilatit allatullu tunniussaqartigisinnaanak misigalutit. Eqqaamajulli angerlarsimaffiit kusanarnerpaajusariaqanngimmat. Angerlarsimaffiit eqqiluitsuullunilu torerpat inussiarnersuuguillu naammappoq.
16, 17. Pulaartoqarnissat ernumagigukku suna iluaqutaasinnaava?
16 Pulaartoqarnissannut ernumalaaruit kisivit taamatut misiginngilatit. Utoqqaanertaq Tuluit Nunaanneersoq ima nassuerpoq: “Pulaartussanut piareersaaniarneq ernumanalaarsinnaavoq. Soorluli Jehovamut kiffartornermi iliuuserisartakkat allat tamaasa assigalugit, iluaqutit nalerisimaarnerlu isumakuluutinit annerungaarput. Pulaartut issiaqatigalugit kaffisorujoorluni oqaloqatigigaangakkit nuannisartarpunga.” Pulaartunnut inuttut soqutiginninneq iluaqutaajuaannarpoq. (Fil 2:4) Inuit amerlanerit inuunerminni misigisatik oqaluttuarissallugit nuannarisarpaat. Immaqalu aatsaat ataatsimooraangatta misigisaat tusarnaarsinnaavavut. Utoqqaanertaq alla ima allappoq: “Ikinngutit ilagiinneersut pulaartorigaangakkit paasilluarnerullugillu ilisarisimallualertarpakka, ingammik qanoq sallusuissummiilersimanerata tusarnaarneratigut.” Pulaartunnut inuttut soqutiginninnermik ersersitsiguit kikkut tamarmik nuannisarnissaat ilimagisinnaavat.
17 Qatanngut arnaq pioneri ilinniarfitsinni ilinniartunik inisimasoqartartoq ima nassuerpoq: “Inigisara angivallaanngilaq atornikunillu pequtaateqarpunga, taamaammat aallaqqaammut ernumaqqaaraluarpunga. Ilinniartitsisut ilaata nuliata eqqissisarpaanga. Oqarpoq nammineq Uss 15:17) Isumakuluttariaqanngilatit, pingaarnerpaarmi tassaavoq pulaartutsinnut asanninnermik ersersitsinissaq.
uinilu kiffartornerminni angalagaangamik sapaatit-akunneri nuannernerpaat tassaasartut anersaakkut ittunik pingaartitsisumi najugaqarnerit. Tikeraarisartagaat immaqa pigisarpassuaqanngillat, kisianni assigiimmik pingaartitaqarput – Jehovamut kiffartornissamik pilimanianngitsumillu inuunissamik. Anaanama meeraalluta oqaasinnaavanik uuminnga eqqaasitsissutigaara: ‘Naatitanit nerisassiat asanninnertaqartut pitsaanerupput.’” (18, 19. Misigissutsit nuannerpallaanngitsut qaangerniaraanni qaaqqusineq qanoq iluaqutigisinnaavarput?
18 Allat pillugit isiginnittaatsit: Ilagiinniittut arlaat uumitsaattarpiuk? Taanna pillugu misigissutsitit nuannerpallaanngitsut akiornianngikkukkit allanngornavianngillat. Immaqa pissusilersoriaasia nuannarinnginnakku qaaqqorusunngilat. Immaqaluunniit puiunaatsitannik ajuallatsinneqarsimavutit.
19 Allanut, allaat ilinnut akeraasunut, attaveqarlualerumallutit inoroorsaarnissannik Biibilimi siunnersuuteqarpoq. (Ussatit 25:21, 22 atuakkit). Pulaaqqusiguit inuk taanna pillugu misigissutsitit nuannerpallaanngitsut qaangeruminarnerulerlutillu aaqqiagiinnginnerit aaqqikkiartulersinnaapput. Immaqa taassuma pissusii nuannersut Jehovap sallusuissummut kajungilersikkamiuk takusai maluginiarnerulissavatit. (Joh 6:44) Asanninneq kajumississutigalugu qatanngut ilimaginngisaanik qaaqqugukku ikinngutigiilluarnermut aallarniutaasinnaavoq. Asanninneq kajumississutiginerlugu qanoq paasisinnaaviuk? Siunnersuut Filippimiut 2:3-miittoq una maleruarsinnaavat: ‘Makitajuitsuunissigut allat ilissinnit annerutissigit.’ Qatanngutitta uagutsinnit sutigut annerunerat paasiniartariaqarparput. Immaqa taakkua uppernerat, pinertusaarnerat kristumiutulluunniit pissusaat alla ilinniarfigisinnaavavut. Taakkua pissusii nuannersut eqqarsaatigigutsigit asanerulerlugillu inoroorsaarfiginissaat ajornannginnerulissaaq.
PULAARTUTUT PISSUSERISSAARIT
20. Qaaqqusissummut akuersisimagutta sooq aamma qanoq tatiginartuussaagut?
20 Tussiaasiortoq Daavi Jehovamut ima aperivoq: “Kinaava tupinni tikeraajusinnaasoq?” (Tuss 15:1) Taava Jehovap tikeraaminut pissusereqqusai Daavip eqqartulerpai. Taakkualu ilagaat tatiginartuunissaq, allassimammat taanna “nammineq ajunaarutigissagaluaruniulluunniit uppernarsaamminik aalajangiussiinnartoq.” (Tuss 15:4) Qaaqqusissummut akuersigutta aatsaat pisariaqavissorpat taamaatitsissaagut. Qaaqqusisoq immaqa pulaarnissatsinnut piareersaalereersimassaaq, taamaatitsiguttalu iliuusai tamarmik asuliinnassapput. (Matt 5:37) Inuit ilaat allamut ajunnginnerorpasissumut qaaqqusaagangamik siullermut taamaatitsiinnartarput. Tamanna asannittuliornerullunilu ataqqinninnerua? Qaaqqusisup sassaalliutai suugaluarpataluunniit qujamasuutigisariaqarpavut. (Luk 10:7) Taamaatitsisariaqaruttalu qaaqqusisoq nalunaarfigipallakkutsigu asannittuliornerullunilu innimittarnerussaaq.
21. Kulturini ileqqut ataqqinerisigut qanoq pulaartutut pissuserissaarsinnaavugut?
21 Aamma kulturit assigiinngissutaasa ataqqinissaat pingaaruteqarpoq. Kulturit ilaanni qaaqqusaaqqaaratik pulaartut tikilluaqqusaasarput. Allani pulaannginnermi isumaqatigeeqqaarnissaq ajunnginnerusarpoq. Sumiiffiit ilaanni qaaqqusisup pulaartuni nerisassat pitsaanerpaartaannik tunisarpai, ilaquttanilu kingulliuttarlugit. Allani tamarmik assigiimmik pineqartarput. Sumiiffiit ilaanni pulaartut nerisassanik tapeeqataasarput. Allanili qaaqqusisut iluarinerusarpaat pulaartut nassataqanngikkaangata. Kulturit ilaanni qaaqqusat siullermik aappassaanilluunniit qaaqquneqaraangamik inussiarnerniarlutik qujaannartarput. Allanili qaaqqusaaneq siulleq akuerinngikkaanni inussiarniitsuliornerusarpoq. Qaaqquneqaraangatta uagutsinnik qaaqqusisut qaaqqugamisigut nuannaarutigissagaat misigitikkusuttarpavut.
22. Sooq inoroorsaarfigeqatigiinnissarput taama pingaaruteqartigaa?
22 Silarsuarmi pissutsit pillugit Petrusi allappoq ‘tamarmik naggatissaat qanillisoq’. (1 Petr 4:7) Ullumikkut silarsuup oqaluttuarisaanerani annikilliornartussarsuaq misigineqarnikuunngitsoq misigisussaavarput. Pissutsit maanna atuuttut ajorneruleriartortillugit qatanngutivut qamannga pisumik asasariaqarpavut. Petrusip siunnersuutaa una aatsaat taama pisariaqartigaaq: “Immissinnut inoroorsaarfigiuaritsi.” (1 Petr 4:9) Aap, inoroorsaarneq nuannaarutaallunilu pingaaruteqarpoq – maanna naassaanngitsussamullu.