1, 2. (a) Qitor­naq kuisik­kusuleraangat angajoq­qaat ilaat qanoq misigisar­pat? (b) Sooq kuisit­tus­sat Jehovamut tun­niul­luin­narsimanerlutik aperineqar­tar­pat? (Al­laaserisap aal­laq­qaataani as­seq takuuk).

NIVIARSIAQ­QAP Mariamik atil­lip, angajoq­qaani isigitil­lugit, kuisit­tus­sat al­lat nikorfaqatigai. Oqalugiar­tup apeq­qutai marluk nipituumik ersaris­sumil­lu akivai. Kingunin­ngua kuisip­poq.

² Mariap Jehovamut tun­niul­luin­narsimanera kuisin­neralu angajoq­qaavisa tul­luusimaarutigingaar­paat. Kuisin­ngin­neranili Mariap ar­naa er­numalaarsimavoq. Ima eq­qarsar­poq: ‘Maria kuisin­nis­saminut nukangaval­laar­pa? Jehovamut tun­niul­luin­nar­nini qanoq pimoorus­sas­saatiginersoq ilumut paasivaa? Kuisin­nis­samut suli utaq­qeq­qaar­tariaqar­pa?’ Qitor­naq kuisik­kusul­luni oqaraangat angajoq­qaar­pas­suit asan­nit­tut taama im­minut aperisar­put. (Oqal 5:4) Inuunermimi aalajangigas­sani tamani pingaar­ner­paaq tas­saavoq Jehovamut tun­niul­luin­nar­neq kuisin­nerlu. – Ungalusaq   “ Jehovamut tun­niul­luin­nareer­pit?” takuuk.

3, 4. (a) Kuisin­nerup pingaaruteqas­susia apustilip Petrusip qanoq erseq­qis­sar­paa? (b) Sooq Petrusip kuisin­neq Noap umiarsualior­neranut as­sersuup­paa?

³ Apustilip Petrusip kuisin­neq Noap umiarsualior­neranut as­sersuup­paa. Ima oqar­poq: “Kuisin­neq, tamatumun­nga as­singusoq, ... maan­na aam­ma ilis­si an­nas­sutigaarsi.” (1 Petrusi 3:20, 21, NW atuakkit). * Umiarsuaq Noap ilumoorluni Guutip piumasaatut iliorusun­neranut takus­sutis­saavoq. Tun­niusimal­luni Jehovap sulias­siis­sutaa naam­mas­sivaa. Up­per­nini pil­lugu Noa ilaqut­tanilu Jehovamit an­naan­neqar­put. Petrusimuna sumik ilin­niar­tin­niaraatigut?

⁴ Umiarsuaq Noap up­per­neranut up­per­narsaataavoq. Inuup kuisin­nera Kristusimut makititaasimasumut up­per­nini tun­ngavigalugu Guutimut tun­niul­luin­narsimaneranut up­per­narsaataavoq. Kuisit­tut Noa as­sigalugu Guutimut naalat­tar­put sulias­siis­sutaalu suliarisarlugit. Soorlu ulersuarmi Jehovap Noa an­naak­kaa aam­ma silarsuaq man­na ajor­toq piuneeruk­kuniuk kif­fani aalajaatsut kuisis­simasut an­naatis­savai. (Mark 13:10; Saqq 7:9, 10) Erseq­qip­poq Jehovamut tun­niul­luin­narlutalu kuisin­nis­sar­put pingaaruteqangaar­tuusoq. Aam­mami arlaata kuisin­nis­sani kinguar­teqat­taaruniuk naas­saan­ngitsumut inuunis­saminut periarfis­sani an­naasin­naavaa.

5. Al­laaserisami matumani suna sam­mis­savar­put?

 ⁵ Kuisin­nerup pimoorus­sas­saanera paaseriaratsigu maan­na apeq­qutit pingasut akis­sutis­sarsis­savavut: Kuisin­neq pil­lugu Biibilimi qanoq al­las­simasoqar­pa? Inuk kuisik­kumal­luni susariaqar­pa? Qitor­nar­put Biibilimil­luun­niit atuaq­qis­saaqatigisar­tagar­put al­la ilin­niar­tik­kaangatsigu sooq kuisin­nerup pingaaruteqas­susia eq­qaamajuar­tariaqar­par­put?

6, 7. (a) Johan­nesip kuis­sutaa qanoq isumaqar­pa? (b) Kiap kuisin­nera al­lanit tamanit al­laanerua, aam­ma sooq?

⁶ Kuisin­neq pil­lugu Biibilimi al­las­simasoq siul­leq tas­saavoq Johan­nesip Kuisisup kuisitsisar­nera. (Matt 3:1-6) Inuit Mosesip inatsisaanik unioq­qutitsisimasut ajor­tuliamin­nik peq­qis­simis­sutigin­nin­ner­tik takutin­niarlugu kuisit­tar­put. Johan­nesil­li kuisitsinera pingaar­ner­paaq peq­qis­siminermut tun­ngan­ngilaq. Johan­nesip im­mik­kut it­tumik pisin­naatitaaf­figaa Jiisusimik, Guutip er­neranik naam­mal­luin­nar­tumik, kuisitsinini. (Matt 3:13-17) Jiisusi ajor­teqan­ngin­nami peq­qis­simisariaqan­ngilaq. (1 Petr 2:22) Guutip piumasaa malil­lugu inuunis­saminut piareer­nini up­per­narsar­niarlugu kuisip­poq. – Hebr 10:7.

⁷ Jiisusip oqaluus­sisaler­nerata kingor­na ajoqersugai aam­ma al­lanik kuisitsisaler­put. (Joh 3:22; 4:1, 2) Aam­ma inuit taak­ku Mosesip inatsisaanik unioq­qutitsisimanermin­nik peq­qis­simis­sutigin­nin­ner­tik pil­lugu kuisip­put. Jiisusil­li toqunerata makititaaneratalu kingor­na taas­sumun­nga ajoqersugan­ngorusut­tut al­lamik pis­suteqarlutik kuisit­taler­put.

8. (a) Makititaareerluni Jiisusip ajoqersuk­kani sumik peq­quai? (b) Sooq kristumiut kuisit­tariaqar­pat?

⁸ Ukiumi 33-mi Jiisusi makititaareerluni 500-nit amerlanerusunut, angutinut, ar­nanut im­maqalu al­laat meeq­qanut, takutip­poq. Im­maqa pif­fim­mi tas­sani ima oqar­poq: “Taamaat­tumik aal­laritsi inuil­lu inuian­nit tamaneersut Ataatap aq­qani, Er­nerup aq­qani anersaal­lu il­ler­nar­tup aq­qani imermut morsutsil­lugit kuinerisigut ajoqersugan­ngor­til­lugit, ajoqersorlugil­lu ilis­sin­nut peq­qus­sutik­ka tamaasa maleruaq­qul­lugit.” (Matt 28:19, 20, NW; 1 Kor 15:6) Jiisusip ajoqersuk­kani ajoqersugan­ngor­titsior­tor­nis­samik peq­quai. Kinaluun­niit ajoqersugan­ngorumasoq, imaluun­niit Jiisusip ‘nam­maataanik’ ersus­siumasoq, kuisit­tariaqar­poq. (Matt 11:29, 30) Guutip iluarisaanik kif­far­torumasup akuereq­qaar­tariaqar­paa Guutip piumasaminik naam­mas­sin­nin­niarluni Jiisusimik aal­lar­titsisimanera. Taava imermi morsutsitaal­luni Guutip akuerisin­naasaanik kuisis­sin­naalis­saaq. Jiisusip ajoqersugaasa siul­liit kuisin­nis­sap qanoq pingaaruteqar­tiginera paasigaat Biibilimi erser­poq. Eq­qarsan­ngil­lat utaq­qeq­qaar­niarlutik kingusin­nerusuk­kul­lu kuisin­niarlutik. – ApS 2:41; 9:18; 16:14, 15, 32, 33.

9, 10. Etiopiamiup Saulusil­lu maligas­siaan­nit kuisin­neq pil­lugu suna ilik­kar­par­put?

⁹ Apustilit Suliaat 8:35, 36 atuakkit. Angut Etiopiamiu juutit up­perisaan­nut ilan­ngus­simasoq Jerusalemimi pal­lorfigin­nereerluni angerlar­poq. Filipip Jehovap in­ngiliata peq­qum­mani angum­mut Etiopiamiumut Jiisusi pil­lugu nutaarsias­saq nuan­nersoq tusarliup­paa. Etiopiamiu sua? Jiisusip naalak­katut akuerinis­saata  pingaaruteqas­susia paasivaa Jehoval­lu kristumiunut piumasaqaataa iliuusererusul­lugu. Taamaam­mat kinguarsarani kuisip­poq.

¹⁰ Maligas­saq al­la tas­saavoq angut juutiusoq Saulusimik atilik. Juutit inuiat­tut tamarmiul­lutik Guutimut tun­niul­luin­narsimap­put, unioq­qutitsiuarmatali Jehovap juutit ajat­tor­pai. Juutit suli eq­qor­tumik Guutimik pal­lorfigin­nis­sorigamigit Saulusip kristumiut malersor­pai. Taamaal­lunili Jiisusip makititaasimasup qilam­mit nam­mineq Saulusi oqaluup­paa. Saulusi sua? Kristusimut ajoqersuk­kap Ananiap ikiuinera akueraa. Biibilimi ima al­las­simavoq: “Nikuip­porlu kuisil­lunilu.” (ApS 9:17, 18; Gal 1:14) Kingusin­nerusuk­kut apustilitut Paulusitut ilisimaneqaler­poq. Maluginiaruk Guutip piumasaminik naam­mas­sin­nin­niarluni Jiisusimik aal­lar­titsisimanera paasigamiuk ingerlaan­naq kuisit­toq. – Apustilit Suliaat 22:12-16 atuakkit.

11. (a) Biibilimik atuaq­qis­saar­tar­tut sooq kuisik­kusut­tar­pat? (b) Kuisit­toqaraangat qanoq misigisar­pugut?

¹¹ Aam­ma nalitsin­ni Biibilimik atuaq­qis­saar­tar­tunut tun­ngatil­lugu taamaap­poq, inuusuk­kaluar­pata utoq­qaagaluar­pataluun­niit. Biibilimi al­las­simasut nuan­naralugil­lu tutsuigigamik­kit Jehovamut tun­niul­luin­narusul­lutil­lu kuisik­kusungaar­tar­put. Ataatsimeersuar­ner­ni tamani kuisit­tus­sanut oqalugiaat im­mik­kut it­tuusar­poq. Biibilimik atuaq­qis­saar­tar­tut sal­lusuis­sut pigiliuk­kaangamik­ku kuisin­niarlutil­lu aalajangeraangata Jehovap Nalunaajaasui nuan­naar­tar­put. Aam­ma angajoq­qaat meeq­qatik taamaalioraangata nuan­naangaar­tar­put. Ukiumi kif­far­torfiusumi 2017-imi Jehovamut tun­niul­luin­narsimaner­tik takutin­niarlugu kuisit­tut 284.000-t sin­ner­paat. (ApS 13:48) Taak­kua kuisin­neq kristumiunut piumasaqaataasoq paasivaat. Kuisin­ngin­nermin­nili susariaqar­pat?

12. Biibilimik atuaq­qis­saar­tar­toq kuisin­ngin­nermi soq­qaar­tariaqar­pa?

¹² Biibilimik atuaq­qis­saar­tar­toq kuisin­ngin­nermini Guuti pil­lugu, taas­suma inun­nut nunarsuarmul­lu siuner­taa inuil­lu an­naan­niarlugit iliuuserisai pil­lugit eq­qor­tumik ilisimasaqaq­qaar­tariaqar­poq. (1 Tim 2:3-6) Taava up­per­nermik ineriar­tor­titsisariaqar­poq, taman­na Guutip inas­sutaanik maleruaanis­samut uumigisaanil­lu taamaatitsinis­samut iluaqutigis­savaa. (ApS 3:19) Taman­na pingaaruteqar­poq, Jehovam­mi uumigisaanik iliuuseqar­tuar­tup tun­niul­luin­nar­nera Jehovap akuerinavian­ngilaa. (1 Kor 6:9, 10) Sulili aam­ma al­lamik iliuuserisas­saqar­poq. Jehovamut tun­niul­luin­narusut­tut ilagiit ataatsimiin­nerini najuul­lutil­lu nutaarsias­saq nuan­nersoq pil­lugu oqaluus­sisariaqarlutil­lu ilin­niar­titsisariaqar­put. Piumasaqaatit taak­ku Kristusimut ajoqersugan­ngorusut­tumut kimul­luun­niit atuup­put. (ApS 1:8) Atuaq­qis­saar­tar­tup tamak­ku tamaasa iliuusereq­qaar­tariaqar­pai. Taava nam­mineq qinunik­kut Jehovamut tun­niul­luin­narsin­naalerlunilu kuisis­sin­naalis­saaq.

13. Al­lanik ilin­niar­titsigaangat­ta sooq kuisin­nis­sap kristumiunut piumasaqaataanera eq­qaamasariaqar­par­put?

¹³ Meeq­qavut Biibilimil­lu atuaq­qis­saaqatigisar­tak­kavut pisariaqar­tunik iliuuseqar­niar­neran­ni ikioraangatsigit ilumoorluni Jiisusimut ajoqersugan­ngorusut­tup kuisit­tariaqar­nera eq­qaamasariaqar­par­put. Taamaap­pat tun­niul­luin­nar­nerup kuisin­nerul­lu pingaaruteqas­susiat pif­fis­saal­luaraangat eq­qar­tus­sal­lugu merseris­san­ngilar­put. Meeq­qat­ta Biibilimil­lu atuaq­qis­saaqatigisar­tak­kat­ta siumukar­tuar­nis­saat kuisin­nis­saal­lu kis­saatigaar­put!

14. Sooq kinaluun­niit kuisin­nis­samut tatineq ajor­par­put?

¹⁴ Soorunami kial­luun­niit meeraq Biibilimil­luun­niit atuaq­qis­saaqatigisar­tagaq kuisin­nis­saanut tatisus­saan­ngilaa. Jehovam­mi kif­far­torfigeq­qul­luni kinaluun­niit pin­ngitsaalin­ngilaa. (1 Joh 4:8) Al­lanik ilin­niar­titsigaangat­ta nam­mineerluni Jehovamut at­taveqar­nis­sap ineriar­tor­tin­nis­saata pingaaruteqas­susia erseq­qis­sar­tariaqar­par­put. Taava Biibilimik atuaq­qis­saar­tar­toq Guuti pil­lugu sal­lusuis­sutip ilisimanera qujamasuutigiguniuk kristumiunul­lu ilumoor­tunut piumasaqaatit tamaasa iliuusererusuk­kunigit kuisik­kusulis­saaq. – 2 Kor 5:14, 15.

15, 16. (a) Kuisin­nis­samut tun­ngatil­lugu aalajangersimasumik ukioqar­nis­saq piumasaqaatigineqar­pa? Nas­suiaruk. (b) Sooq Biibilimik atuaq­qis­saar­tar­toq up­perisarsior­ner­ni al­lani kuisereersimagaluaruniluun­niit Jehovap Nalunaajaasuisut kuisit­tariaqar­pa?

¹⁵ Kuisin­nis­samut tun­ngatil­lugu aalajangersimasumik ukioqar­nis­saq piumasaqaataan­ngilaq. Inuit tamarmik as­sigiin­ngin­namik atuaq­qis­saar­tar­tul­lu ilaat  anersaak­kut suk­kanerusumik siumukar­tar­put. Amerlasuut inuusut­tuaraal­lutik kuisit­tar­put Jehovamul­lu aalajaat­tuar­tarlutik. Al­lat Biibilimik sal­lusuis­sut ukioq­qor­tusereerlutik ilin­niar­tar­paat kuisit­tarlutil­lu. Ilaam­mi al­laat 100-t sin­nerlugit ukioqar­tar­put!

¹⁶ Ar­naq Biibilimik atuaq­qis­saar­tar­toq up­perisarsior­ner­ni as­sigiin­ngitsuni arlaleriarluni kuisereersimagami ilumut kuiseq­qit­tariaqar­nerluni aperivoq. Apeq­qutaa akiniarlugu taas­sumin­nga atuaq­qis­saaqatigin­nit­tar­tup Biibilimi al­las­simaf­fiit arlal­lit takutip­pai. Biibilimi suna piumasarineqar­nersoq paasigamiuk ar­naq kuisip­poq, naak 80-it pal­lil­lugit ukioqaraluarluni. Maligas­siaanit suna ilik­kar­par­put? Jehovap piumasaa pil­lugu sallusuissut aatsaat ilisimagutsigu taas­suma kuisin­ner­put akueris­savaa. Tas­sa up­perisarsior­ner­ni al­lani kuisereersimagaluarut­taluun­niit Jehovap Nalunaajaasuisa ilaat­tut kuisit­tariaqar­pugut. – Apustilit Suliaat 19:3-5 atuakkit.

17. Ul­lormi kuisif­fim­mi suna eq­qarsaatigis­sal­lugu naleq­qup­pa?

¹⁷ Ul­loq kuisif­fik nuan­naangaarfiusar­poq. Aam­ma tun­niul­luin­nar­nerup kuisin­nerul­lu piumasaqaatitaqar­neran­nik eq­qarsaatigin­neq­qis­saar­nis­samut pif­fis­saal­luar­poq. Kristumiunut ilumoor­tunut piumasaqaatit tamaasa eq­qor­tin­niaraan­ni tamaviaar­nar­poq. Jiisusip ajoqersugai piumaf­figineqar­put “im­min­nik pil­lutik inuujun­naaq­qul­lugit, im­min­nil­li toq­qutigin­nit­toq makis­simasorlu pil­lugu inooq­qul­lugit”. – 2 Kor 5:15; Matt 16:24.

18. Al­laaserisami tul­liut­tumi apeq­qutit suut sam­mis­savavut?

¹⁸ Soorlu sam­mereerip­put Nalunaajaasun­ngor­niarluni aalajanger­neq pimoorun­neqar­tus­saavoq. Taamaat­tuminguna al­laaserisap aal­laq­qaataani eq­qaaneqar­tutut Mariap anaanaa im­minut aperisoq. Angajoq­qaajuguit im­maqa ima aperisimavutit: ‘Qitor­nara kuisin­nis­samut ilumut piareersimava? Guutimut tun­niul­luin­narsin­naajumal­luni Jehova pil­lugu naam­mat­tumik ilisimasaqar­pa? Kuisin­ngin­nermini ilin­niagaqaq­qaarlunilu sulif­feqaq­qaar­tariaqar­pa? Kuisereerlunimi ingasat­tumik ajor­tulior­pat?’ Al­laaserisami tul­liut­tumi apeq­qutit taak­ku aam­ma angajoq­qaat kristumiut kuisin­nermut tun­ngatil­lugu qanoq eq­qor­tumik isigin­nit­taaseqarsin­naanersut sam­mis­savavut.